Kapiestan ning Banal a Pamilya

Ing Pamamunta da Ehipto di Jesus, Maria at Jose

I. Pamuklat a Panalangin

O Dios a Ibpa mi, binye me king Anak mung y Jesu-Kristo ing pali na’t kapanatagan ning metung a pamilya kambe na ning Indung Maria at San Jose karin Nazareth. Bustan mung ing Anak mu makirake ya naman king bie ring sabla ming pamilyang Kristiyana at gawan de ing kekang Iglesya metung a kapimisanan as nung nu ke mabyasang tanggap at sumaup king metung at metung anting galame na ning metung a pamilya. Iti ngan pu adwan at pasalamatan mi king lagyu nang Kristong Ginu mi. Amen.


II. Pamamasa

Mateo 2:13-15, 19-23

13Kalako ra ding Mangabyasa, pepakit ya ing anghel ning Ginu kang Jose king kapamilatan na ning paninap. Ngana, “Mibangun ka, idala me ing Anak ampon i ima na at munta kayu Ehipto. E kayu mamako karin anggang e ku sabian, uling papaintun neng Herodes ing Anak ba neg ipapate.” 14Mibangun ya i Jose, at kanita mu ring benging ita, dela na la ding mi ima at minta la king Ehipto. 15Menatili la karin angga king mete ya i Herodes. Makanyan metupad ing amanung sinabi na ning Ginu king kapamilatan ning propeta, “Inaus keng lumwal ibat Ehipto ing kanakung Anak.” 19Inyang mete ne i Herodes, pepakit ya ing angel ning Ginu kang Jose karin Ehipto king kapamilatan ning paninap. 20“Mibangun ka,” ngana, “iyuli mu na la king bansa ning Israel ding mi-ima, uling mete na la ngan detang bisang makamate king anak.” 21Mibangun ya i Jose at tiki na la ding mi-ima; migbalik la king Israel. 22Oneng inyang abalitan nang Jose king i Arkelao ya ing menalili kang Herodes a tata na bilang ari ning Judea, mitakutan yang taglus karin. Pasibayu yang tinanggap amanu king kapamilatan ning paninap; inya king sakup ning Galilea karin ya migbanda. 23Karin na la tiknang ding mi-ima, king metung a balen a mayayaus Nazaret. King anti kaniting paralan karin metupad ing amanung mesabi king kapamilatan da ring propeta. ”Meyaus yang Nazareno.”


III. Turu

Pagmasusyan taya ngeni ing Kapiyestan ning Sagrada Pamilya na nung nukarin didinan neng maragul importansya ning mabilug a Santa Iglesia Katolika. Iti ya ing oras ning pamamie parangal ning pisamban kareng pengari, pauli ning pamikakalugud ra at king masanting dang pamiparagul kareng karelang anak. Paniwalan ning pisamban na nung e masalese o alang lugud at respeto king kilub ning pamilya makanyan murin e maging masalese o e maging mayap ing komunidad, At patsa e meging masalese ing komunidad e ya naman masalese ing bansa. Nya mag-umpisa ngan king pamilya ing nanumang bage masanting king keka tamung kapaligiran.

Reng gaganap king mebasang ebanghelyu ila pin ding Sagrada Pamilya, I San Jose, Indung Maria at ing Anak, I Jesus. LInikas nong San Jose reng mi-inda pauli ning babala ning angel ning Ginu kapamilatan ning paninap. At patsa dimdam taya ing amanung paninanap, agad tayang agaganaka ing mapaninap mu namang I Jose king Matuang Tipan. I Jose king Matuang Tipan iyang inaus ning Dios ban iligtas no ring kayang balayan king danup ampo ning kasakitan. Pero e milyari ining misyon nang ayni king maligwang paralan, dakal ya pamu delanan kasakitan o kapagsubukan king bie; mipisali ya, meging utusan ya at ikwa na pang mekulung

Makanyan murin kang San Jose ning Bayung Tipan na meyaus king Dios kapamilatan na naman ning paninap. Dakal ya naman kapagsubukan a delanan bayu meging matagumpe ing kayang misyun; pigsisti re reng kayang kabalen uling ing babaing pakasalan na mabuktut ne kaagad, mesakit ya lub at ena lubus a isip ot agawa ng Maria kaya na pigtaksilan ne, uling e na balu nyang mumuna na milamnan ya ing Indung Maria kapamilatan ning upaya ning Banal a Espiritu. Ngeni ikit ta king ebanghelyu nung makananu yang memintu king Dios ban nong isalba kareng bisang makamate kareng mi-indu.

I Jose ning Matuang Tipan, at I San Jose ning Bayung Tipan ila ring sasalamin kareng keka tamung pengaring lalaki na alang patugut maninap o mangarap ban dinan lang masanting a pamibie-bie ring karelang pamilya. Maragul a misyun ing makayatang king metung a pengari lalu na king metung a tatang. Ing tatang na malagad mung magsalita pero dakal ing dapat. Ing tatang na e parating mimwa pero patsa iya ing apamwa salikut na ka ikang anak. Ing tatang na agyang ala neng kaya basta atin ya sana ing kayang pamilya.

Kaluguran a kapatad dinan talang parangal king pusu tamu reng keka tamung pengari. Igulisak tamu na pagmaragul tala, uman tala tanda ning pamipasalamat ta karela, paramdam tamu ing lugud at pakamal ta karela kabang maybe lapa. Uling potang ala nala king yatung iti, e tana agawa pang kawlan at pagsilbyan tala. Amen.


IV. Pamigunam

Ngening lakwan tane ing banwang 2010 at munta tana king banwang 2011. Nanu la kaya reng paninap o pangarap tamu king daratang a banwa. Makasiguradu mayap ngan ing buri tang malyari king bie tamu. Buri ta ngan ing masensu ta ngan pamibie-bie. Siguru alus ing pangarap o paninapan tamu yapin ing bage materyal. E marok ing paninapan o ing pangarap tang iti, uling buri na ning Dios Ibpa ing mipakayap tamu ngan. Ing buri namung payabut keka tamu ning Apung Ginu ngening kaorasan ing nanu man sanang paninap o pangarapan tamu makaayun sana king paninap ning kayang Anak, I Jesus. Uling ing sabla ng paninap o pangarap Jesus keka tamu siguradung mayap ngan. Pabustan tamung mas dinan talang mas maragul a pansin reng paninap o pangarap ning Dios para keka tamu. Uling agya pang nang gwan tamu reng pangarap o paninap na para keka tamu ila pa muring mapalyari. Anya king banwang daratang, pangadi tamu king Apung Ginu na sopan na katamu kareng paninap ta king biie. Maging mipnu ta sana king grasya king banwang paratang kalupa ning Sagrada Pamilya. Amen.

V. Pamanahimik

VI. Tauling Panalangin

O Dios a Ibpa mi, babye mi keka ing sablang kapuryan king pamamili mu king metung a maka-taung pamilya para king kekang Anak. Kapamilatan ning alimbawa ri Maria at Jose, mabyasa kami mu naman sanang maninap at mangarap para kareng aliwa at ali mu king sarili mi. Antabayanan at bendisyunan yu ke pu king daratang a banwa. Amen.

VII. Kutang

1. Para keka ot meyaus lamong Sagrada Pamilya ri San Jose, Indung Maria at ing Anak, I Jesus? Paliwanag.
2. Nanu ing e mu akalingwan a mayap a amanung sinabi ra keka reng kekang pengari?
3. Nanu la reng dapat a mayap na emu akalingwan king bie mu na gewa ra keka reng pengari mu?
4. Nanu la reng paninanap mu o pangarap king paratang a banwa?
5. Kaybat na ning pamipulung tang ayni, nanu ing masanting tang gawan para apakit ing lugud ta kareng pengari tamu?

Download here:

Page 1: http://www.mediafire.com/file/u80bbil5bqy5bz3/12.26.10%20pg.%201.doc

Page 2: http://www.mediafire.com/file/s535ynie94ca0oo/12.26.10%20pg.%202.doc

Kapat a Domingo ning Adbiyento

Ing Pangabait nang Jesus

I. Pamuklat a Panalangin

Ibpa ming malugud impung kapanyamban, kapuryan at kapasalamatan Keka ngeni at king kapilan paman. Ngeni pung kaorasan, pabustan yu pung abalu at panamdaman mi parati ing kekang presensya. Paniwalan mi na partati kang atyu ka king siping mi. Amen.

II. Pamamasa

Mateo 1:18-24

18Anti kaniti ing pangabayit nang Jesu-Cristo: I Mariang ima na at i Jose atin lang pamitangwanan kasal. Bayu ra ikuang mikasal, meyakit king i Maria mebuktut ne. (Iti milyari king upaya ning Banal a Espiritu.) 19I Jose a maging asawa na metung yang banal a tau. E ne buring misalbag a marine i Maria, inya binalak nang kawanian na nia mung lihim. 20Kabang isipan na ing makanyan, pepakit ya king paninap ing metung a anghel ning Ginu. Ngana, “Jose a lahi nang David, e ka tatakut balausnan pakasalan i Maria, uling ing kagli na milyari ya king kapamilatan na ning upaya ning Banal a Espiritu. 21Ibait ne ing metung a anak a lalaki, at ausan meng Jesus uling ya ing magligtas king balen na king pamikasala na.” 22Milyari iting sabla ban matupad ing sinabi na ning Ginu king kapamilatan na ning propeta: 23“Kumagli ya ing metung a dalagang birhen at ibait ne ing metung a anak a lalaki, at mayaus yang Immanuel” (ngana wari, “Ing Dios kayabe taya.”) 24Inyang migising ya i Jose, tiparan na ing inutus na ning anghel ning Ginu: pekasalan ne i Maria.


III. Turu

Itamung tau ngening kasalukuyan asna katamu ka dependi king “advance technology”. Aldo-aldo, pakikwanan na ning tau na atin yang atin adiskubri. Gagawan na ning tau ini ban yang mika masanting at mayan a bie. Reng pengari pin king Japan , papagaral do reng anak ra kareng iskwelang kabang atyu la karin akakit dala kareng cellphone ra nung nanu ing gagawan da reng anak ra. Pagaral do reng anak ra karening klasing iskwelang areni ban lang makasiguradu na parati lang atyu king mayap a sitwasyun reng karelang anak.

Pagmasusyan taya pu ngeni ing kapat nang Domingo ning Adbiyentu na nung nukarin didinan na katamung mayap a pamikatagun na suryan reng sarili tamu nung kaninu ta maralas magtiwala, kareng amanuan tang “advance technology” o king Apung Ginu na atyu parati king siping tamu ban lumingap o dumame keka tamu. Akakalingwan taya ing propesiya ng propeta Isaiah 7:14: “Ing metung a birhen a babai ibait ne ing metung a anak a lalaki at pamalagwan neng Immanuel.” Na ing buri ng sabyan ning Immanuel, “Ing Dios atyu king busal tamu.”

King kasalukuyan mas maralas taya pang pagtiwalan ing “advance technology” o materyal a bage at tatauli tanya mu ing Apung Ginu. Metung a alimbawa kaniti neng atin biglang sakit kareng pamilya tamu, uli mong atin tang kilalang doktor o

kaya atin tang dakal a pera ilang mumuna tamung aiisip at maralas pota ng ala yang agawa ing doctor o reng pera tamu karin tanya aganaka ing Apung Ginu at karin tana mu pasaklolu.

Dakal pa kareng kapatad tamu na ing sablang isip ra ing Apung Ginu asne karayu. Uling dakal pa kareng kapatad tamu na ing paburitu rang kakanta yapin ing “From a Distance” na ing tema ning kanta yapin ing Dios atyu yang maka distansyang makalawe kareng e gana-ganang gagawan tamu. From a distance na ing buri ng sabyan midyu makarayu yang bagya, o kaya atin pilatan. At king kamatutwanan ditak la kekatamu reng mika paboritu king kantang “Yahweh, You are Near” na ing buri ng sabyan atyu parati ing Apung Ginu king siping tamu, tandanan tamu e mu makalawe kekatamu nune kayantabe taya pa kareng e gana-gana tang daralanan a kapagsubukan. Ing kutang kaluguran kung kapatad, nanu ya ngeni ing paburitu mung kanta? From a Distance o ing Yahweh, I Know You are Near. Amen.


IV. Pamigunam

King mitmung kababan lub, suryan tala ngeni reng pusu tamu. Kutnan miamas-amas ing sarili tamu tungkul king bie tamung kasalpantayanan. Paniwalan tamu ba na ing Apung Ginu atyu king siping tamo? Ban lalu tayang panamdaman ing presensya na ikanta taya ing paboritu tang kanta.

Refrain: Yahweh I know you are near
Standing always at my side
You guard me from the foe
And You lead me in ways everlasting

1. Lord You have searched my heart and You know when I sit and when I stand
Your hand is upon me protecting me from death
Keeping me from harm (Refrain)

2. Where I can run from your love? If I climb to the heavens You are there
If I fly to the sunrise or sail beyond the sea
Still I’d find You there (Refrain)

3. You are my heart and its ways
You who formed me before I was born
In the secret of darkness before I saw the sun
In my mother’s womb (Refrain)

V. Pamanahimik

VI. Tauling Panalangin

Ginu ming Dios na parating atyu king kekaming siping, dakal pung dakal a salamat king kekayung parating pamanantabe. Parati yu kami pung dinan ning kekayung grasya ban apamalita miya ing kekang alang kupas a lugud. Iti ngan pu daraun mi ngan at anyaran king lagyu ning kekang Anak, I Jesus. Amen.


VII. Kutang

1. Nanu ing panamdaman tamu neng balu ta keng sarili na ing Apung Ginu atyu ya king siping tamu?
2. Nung paniwalan tamu na ing Apung Ginu atyu king siping tamu, akokontrol taya ba ing sarili tamo king pamangawang e ustu?
3. Nanu ing masanting ilage kareng kaisipan tamu o apayu ban e ta mangalingwan na ing Dios atyu king siping tamung manakit king e gana-gana tang gagawan?

Download here:

Page 1: http://www.mediafire.com/file/44gszf5ww2fhpov/12.19.10%20pg.%201.doc

Page 2: http://www.mediafire.com/file/rua0pkeghwcpy5a/12.19.10%20pg.%202.doc

Katlung Domingo ning Adbiyento

Ding Tubud nang Juan a Maminyag

I. Pamuklat a Panalangin

O Ginu, Dios dakal pung salamat king binye yu namang oras kekami ban mitipun king lagyu mu. Payintulutan mu pung akit at panandaman mi ing alang kupas a lugud mu kekami. Dinan yu kami pung kamasalan ban ming lubus ming aytindayn reng kekang amanu. Amen.

II. Pamamasa

Mateo 11:2-11

2Inyang atyu king sukulan i Juan a Maminyag, abalitan na ing daraptan nang Cristo. Mitubud yang mapilan karing alagad na at pepapuntan na la kang Jesus. 3Ngarang kinutang kang Jesus, ”Sabian yu na mo kekami nung ikayu itang datang a amanuan nang Juan o kailangan ke pang manayang aliwa?” 4Nganang mekibat Jesus, ”Magbalik na kayu at sabian yu kang Juan ing kekayung daramdaman at akakit: 5manakit la ding bulag, makalakad la ding pile, kakayap la ding leprosuan, makaramdam la ding maklak, susubli lang mie ding mete, at mipanaral ya ing Mayap a Balita karing kalulu. 6Mapalad ya ing taung e magduda kanaku!” 7Kalako da ring alagad nang Juan, migsalita ya i Jesus karing tau tungkul kang Juan. Ngana, ”Kanitang minta kayu kang Juan king disyerto, nanu ing panenayan yung akit? Ing metung a timbung babayuntuk na ning angin? 8Nanu ing liwalan yung alben? Ing metung a taung makaimalan masanting? Ding taung pakaimalan masanting karing palasyu la mu mayayakit! 9Inya sabian yu kanaku, nanu pin ing buri yung akit? Ing metung a propeta? Wa, sasabian ku kekayu, maygit ya pa king metung a propeta ing ikit yu. 10Uling i Juan ya itang sasabian na ning kasulatan: ’Oyan ing tubud ku, ngana ning Dios, itubud keng makapaunan keka ba nang isadia ing dalanan mu.’ 11Sasabian ku kekayu, karing sablang taung linto keti king yatu, ala pang linto lalung marangal kesa kang Juan. Makanyan man, ing pekamababang tau king Kayarian ning Banua maygit ya karangal kesa kang Juan.


III. Turu

King katlu nang Domingo ning Adbiyentu payabut na ning Ginung Dios ing malalam at alang kupas ng lugud karing kalulu at karetang daralan kasakitan. Ikit tamu king Matuang Tipan nung makananu ng pepakit YHWH, ning Ginung Dios ing malasakit at lugud na kareng Israelita. Inaus ne I Moises at pepakit ya kaya kapamilatan ning metung a milalab a tanaman, at minyalita ya ing Ginu kaya ngana “Ikit ku nung makananu lang mipasakitan ding memalen kung Israelita karin Ehipto; Dimdam ku ing saingsing da king gamat da ring babie kasakitan karela at balu ku ing kasakitan a daralanan da. Inya tinipa ku ban iligtas ku la king gamat da ring tau Ehipto at idala ku lang lual Ehipto king gabun a malualas at mataba nung nukarin labis-labis ing kabiayan” Exodo 3:7-8).

Masala tang ikit at abalu king karanasan dareng Israelita, na ing Apung Ginu akakit na ngan ing sablang malilyari, at daramdaman na ngan ing sablang saingsing dareng taung magkasakit. Dios yang ating panamdam at malasakit lalu na kareng taung mayayalapusta o mangadakurak a karapatan. At ing sablang sinabi ning Dios

kang Moises mepalyari ngan, uling ikwa dareng Israelita na miras king lugar nung nukarin labis-labis ing kabiayan.

King ebanghelyu tamu ngeni, masala tang apatutwanan na ing Ginung Dios e ya magbayu kapilan pa man, nyang Matuang Tipan angga na king Bayung Tipan. Papakit na atin ya parating kapanamdaman at malasakit kareng pakakalulu. Anyang abalitan ng Juan Bautista ing daraptan nang Jesus, mitubud yang mapilan kareng kayang alagad ban yang makasiguradu nung iya napin ing kayang panenayan a talapanatbus na tinipa ibat banwa ban iligtas ding pakakalulu. At e ya pin migkamali I Juan Bautista uling kabalik dareng kayang alagad makanini ing karelang daralan a balita, ngara, dimdam at ikit mi: ding bulag manakit lang pasibayu, ding pile makalakad la, ding leproswan kakayap la, ding maklak makaramdam la, ding mete susubli lang mie at ing Mayap a Balita mipanaral kareng kalulu.

Dintang ya ibat banwa ing bugtung ng Anak ning Dios Ibpa keti king yatu ban pasibayu ipakit na ing lugud na kareng pakakalulu, kareng taung alang apanaligan nune ing Apung Ginu. King panaun tamung iti, dakal la pa murin reng magkasakit, deng manamdaman at deng pakakalulu keng kekatamung komunidad. Payabut ta karela na ing Ginung Dios e ya magbayu kapilan pa man, nyang milabas, nganing kasalukuyan at king daratang pang panaun. Akakit na ngan ing sabla, at daramdaman na ngan ing kekatamung saingsing. Paniwalan tala reng kayang amanu, na datang ing panaun na e nakatamu mu idala king lugar na nukarin dakal ing kabiayan nune ganap ing tula at saya. Amen.

IV. Pamigunam

King mitmung kababan lub iduku tala reng buntuk tamu at isara lareng kekatamung mata. Magbalik tamu king bie tang milabas at lawen tamu nung nukarin ing panaun na peramdam na ning Ginu ing lugud at pakamal na kekatamu. Dakal ing kapagsubukan a alampasan tamu, neng kayi pagtakan tamu nung makananu ta iti alampasan. Daratang pa neng kayi bisa tanang sumuku, uling ing panakit tamu bala mu alang pamagbayu keti king kekatamung lipunan. Deng atinan lalu la pang miraragdagan pibandyan at reng pakakalulu lalu la pang mamilipit. At kening penandit na e tana lubus aytindyan iti, metung yamu ing kekatamung panaligan, alang aliwa nune ing tinipa ibat banwa, I Jesus ing Anak ning Dios na iya mismu dinalan ya naman maragul a kapagsubukan at kasakitan. Pero uli na ning kayang misyun mayap at atin lugud menagumpe ya kaniti. Nya itamu mu naman, dagdagan tamu ing kekatamung kapibabatan, tandanan tamu ing sinabi ning Ginung Jesus ngana “ Mapalad ya ing taung alang pamikakunu tungkul kanaku. Amen.

V. Pamanahimik

VI. Tauling Panalangin

Ginung Dios, a parating tapat karing kekang pangaku at kapilan man e magbayu. Dinan yu kepung maragul a kasalpantayanan ban mi pung apanagumpen ing sablang kasakitan keti king yatung iti. Parati ye pung ipagkalub ing kekayung Espiritu ban mapalit ing lua king tula. Amen.


VII. Kutang

1. Nanu lamo reng akakit tapang e ustung panugali keng kekatamung komunidad ?
2. Dakal la pa bang balu tang tau na magmaltrato kareng pakakalulu?
3. Nanu ing agawa tamu kareng taung mimisip na ala neng pag-asa ing kekatamung komunidad para masensu?
4. Keng palage mu buri na bang ning Ginung Jesus ing sumanting la pamibie-bie reng pakakalulu? Bakit?
5. Makananu ta makasaup ban ipayabut ing tune ng lugud at pakamal ning Ginung Jesus kareng pakakalulu?

Download here:
Page 1: http://www.mediafire.com/file/hzdzdmeszgdyf2s/12.12.10%20pg.%201.doc
Page 2: http://www.mediafire.com/file/44gszf5ww2fhpov/12.12.10%20pg.%202.doc

Kadwang Domingo ning Adbiyento

Ing Pamanaral nang Juan a Maminyag

I. Pamuklat a Panalangin

O Dios a mapamakalulu at tapat, magsalita ko pu kareng pusu mi, bustan mung ing Ginu ming Jesu Kristo idala na kekami ing Mayap a Balita ning kekang pamamatawad at tapat a lugud. Bustan mung agyagan na kami ning kekang Banal a Espiritu ban miya naman a iyatad ing balita karing anggang bisang makiramdam. Amen.


II. Pamamasa

Mateo 3:1-12

King panaun a ita, linual ya at menaral I Juan a Maminyag king disyerto karin Judea. 2Nganang menaral: “Sumisi kayu at painggulut karing kasalanan yu, uling malapit ne ing Kayarian ning Banua.” 3I Juan ya ing taung amanuan ning propeta Isaias inyang nganang sinabi, “Ing siwala king disyerto kukulait na: ‘Isadia yu ing dalanan ning Ginu, itulid yu la ding dalan a tuntunan na!’” 4Gewa king buak kamelyu ing imalan a susulud nang Juan at makababat yang gewa king balat animal. Durun at pulut-panilan ing pamangan na. 5Migsaria la kang Juan ding tau Jerusalem at ding sablang tau Judea at ding manuknangan king sakup ning Ilug ning Jordan. 6Sinabi da la ring kasalanan da at bininyag na lang Juan king Ilug ning Jordan. 7Oneng panakit na karing dakal a Pariseo at Saduseo a daratang ban pabinyag, ngana karela, ”Ikong lahing ubingan, ninu ing minutus kekayu ban takasan yu ing daratang a kaparusan? 8Nung tune kayung sisisi karing kasalanan yu, ipakilala yu king pamagbayu yung bie. 9E yu pangangas sasabian king lahi na kayung Abraham. Sasabian ku kekayu, agyang karing batung deni ing Dios makapalto yang tune nang lahing Abraham. 10Ngeni pa makasadia neng dugpa ing palakul karing yamut da ring tanaman a e mikakabungang mayap, makatud ya at miyugse king api. 11Bibinyagan da kayu king danum ban mipakilala king sisisian yu la at painggulutan ding kasalanan yu; oneng ing daratang katuki ku lalu yang bmayupaya kesa kanaku. E ku man karapatdapat mamitbit karing sandalyas na. Binyagan na kayu king Banal a Espiritu at king api. 12Atyu king gamat na ing sabungke na; linisan na ing pidadaran na at tipunan na ing pale king kamalig na, oneng dulukan na ing sepu king aping e matatda kapilan man.”


III. Turu

Nyang milabasan a Dumingu, peyabut na kekatamu ning ebanghelyu na mas dapat tang dinan pansin ing pamagsadya king pamanyatang ning Anak ning Tau, kesa king midinan tang takut king kapupusan ning yatu. Dininan na katamung mayap a oras ning Ginu ban suryan tala reng sarili tamu ban kanita nanu mang oras malyari iti, makasadya tamung marap kaya. Kaybat ning pamanyuri, at ikit nung nanu ing tutung sitwasyun ning relasyun tamu king Apung Ginu, ngening aldo ayti, king kadwa ng Dumingu ning Adbiyentu. Y Juan a Maminyag dinatang ya ban isadya no ring Judio king panyatang ning Talapagligtas, Y Jesu Kristo. Ing mensahi na kanita, at angga man ngeni para kekatamu: Magbayu kong bie, ibuklat yo ring pusu yu king keyang Espiritu.

Kaybat ning pamanyuri ta king relasyun tamu king Apung Ginu, agkatan na katamu ngening mamin kareng kekatamung kakulangan at panyad tala rening tawad kalupa na waring Dimas na kayabe ng mipaku ning Ginu tang Jesu Kristo king kalbaryu, (“Ing parusang tinggap mu kaparehu ne ning keya.Matulid para kekata ing magdusang anti kaniti uli na ning depat tang marawak” Lk. 23:40-41). King pamanamin na kareng kayang agawang kasalanan, itamu ring oras ayta mipakibatan ing kayang kayadwanan king Ginu tang Jesu Kristo, (“Jesus, e mu ku sana kakalingwan potang datang na ka king kekang kayarian!“, at mekibat ya ing Ginu ngana “Ing katutuan sasabian ku keka: ngeni mu rin akayabe da ka king Paraiso” Lk. 23:42-43).


Kaybat ning pamanamin at pamanyawad tang tawad kareng kekatamung kasalanan, ing katuki yapin ing pamaglarin kareti. Ing parati tang kukutang nung makananu, kasi balu tamu masaguli mu ing pamanamin at pamanyawad tawad, ing masakit ing pamanigobra king kapaglarinan. Atlu la reng pweding paralan king kapaglarinan. Ing mumuna yapin ing pamiganaka king amanu na ning Ginung Jesus, “Pusanan me ing kekang krus at tuki ka kanaku” na ing buri ng ipayabut ing kalingwan tamu ing makapamie kuswelu kekatamu nune reng isipan tamu ing ikakayap dareng taung makapadurut kekatamu, antimo reng pamilya at sarili tang komunidad. Metung a alimbawa kaniti yapin ing kekatamung kasalukuyang gobernador na bayu ya paman linub king pulitika, marakal na sinabi kaya na masakit at magulu ing lulub kaniti. Dakal kareng kayang kakaluguran na sinabing misip kang dakal bayu mu luban iyan. Oneng e ne inisip ing kayang sariling kapakanan, nune mas inisip no pa reng mas dakal ng asopan, na mas maragul kesa king metung a parokya.

Ing kadwang paralan yapin ing pamaglarin o pamagbayung paditak-ditak. Asabi taya ini uling asna kasakit king tau ing bigla o mabilis a pamagbayu. Makananu ini? Alimbawa, asna ka kaymut kareng taung mangailangan saup. Ing gawan mu kanita, isane meng paditak-ditak ing sarli king pamamie at akit tamu maging sistema nane ning bie tamu iti. At kabang gagawan tang paditak-ditak iti, anyaran tamu ing saup ning Banal a Espiritu, uling makasiguradu e na buring malyari ini ning kalaban, I Satanas.

At ing katlung paralan king kapaglarinan yapin ing e pamangalingwan king panabilin na king tauling apunan, na bayu ne erapan ning Ginu tang Jesu Kristo ing kamatayan ngana, “Babie ke kekayu ing metung a bayung kautusan: mikakalugud kayu. Nung makananu da kayung liguran, makanyan kayu namang mikakalugud. Abalu da ring sablang tau king alagad da kayu, nung mikakalugud kayu” Lk. 13:34-35. Amen.


IV. Pamigunam

Masakit o imposibli king tau ing pamagbayu, pero nung idaun ta ngan iti king Ginu, makasiguradu tamung pagkalub na iti kekatamu. King Ginu ing imposibli maging posibli, alang duda kaniti. Tandanan tamung iya ngan ing linalang king bage akakit tamu keti king yatu at abe tamu kareni. Tandanan tamung dakal ing grasyang pagkalub na kekatamu ning Ginu king aldo-aldo. Nya nanu ing dapat tang ipakibat king lugud at ganakang ayni, nune ing kekatamu mu namang lugud, kapanyamban at kapasalamatan Kaya.

Nya agkatan na katamung lumapit kaya, ban manyad pakalulu at grasya ning kapatawaran. E tamu mu rin kakalingwan ing pamanyad lakas ning Banal ng Espiritu ban ing keka tamung pamagbayu o pamaglarin kareng kekatamung kasalanan apagtagumpayan ta iti. Ing sablang kapasalamatan at kapuryan Keka o Ginu. Amen.

V. Pamanahimik

VI. Tauling Panalangin

O Dios a Ibpa mi, dakal pung dakal a salamat king babye yung grasya kekami. Parati mi pu sanang aganaka ing keka yung kaburyan. Buri mu pung akamtan mi ing tune saya at tula ning bie at ini akit mi mu Keka. Pabustan yu ke pung parating makiramdam kareng amanu na ning kekang Anak, I Jesus, ing Ginu mi at tagapagligtas. Amen.


VII. Kutang

1. Kapilan tamu aranasan na ing pakalulu o kapatawaran ning Dios alang kupas?
2. Atin ta bang dapat ipanyad tawad kareng mismung kayabe ta king komunidad? Nung atin ngeni na ing pamikatagun para manyad kapagpasensyan kaniti.
3. Nanu la kaya reng pwedi tang adagdag a paralan king pamaglaren kareng kekatamung keynan?

Download here:

Page 1: http://www.mediafire.com/file/55a1twl9k0iizpw/12.05.10%20pg.%201.doc
Page 2: http://www.mediafire.com/file/hzdzdmeszgdyf2s/12.05.10%20pg.%202.doc

Mumunang Domingo ning Adbiyento

Alang Makibalu king Aldo o king Oras a ita

Alang Makibalu king Aldo o king Oras a ita

I. Pamuklat a Panalangin

Dios ning alang kupas a lugud at kayapan, bendisyunan yu kami pu at ing pinili yung lugar ban ing kekang Banal a Espiritu ya pung miral king kaorasan. Sopan yu ke pung maging matalas a kaisipan at maging malam a lub ban miyang mas lalung aintidyan ing kekang Mayap a Amanu. Amen.

II. Pamamasa

Mateo 24:37-44

37Ing paniatang na ning Anak ning Tau kalupa na nitang milyari king panaun nang Noe. 38Kanitang panaun bayu dinatang ing albug, mamangan la at miminum ding tau; makiasawa la ding lalaki at babai angga king mismung aldo a linub ya king barku i Noe. 39At e ra balu ing malilyari angga king dinatang ing albug at tiki na lang ngan ning albug. Makanyan mu naman ing malyari potang datang ne ing Anak ning Tau. 40King panaun a ita karing aduang taung atyu king marangle, mayakua ya ing metung at mitagan ya ing kadua. 41Karing aduang babaing gigiling trigu, mayakua ya ing metung at mitagan ya ing kadua. 42Inya mingat kayu uling e yu balu nung nanung aldo ing paniatang na ning kekayung Ginu. 43Oneng tandanan yu ini: nung ing metung a mibalebale balu na nung nanung oras ning bengi karin ya datang ing mapanako, siguradung e ya matudtud at e ne paburen makapanlub king bale na. 44Inya, makanyan kayu namang sukat makasadiang parati, uling datang ya ing Anak ning Tau king oras a e ye panenayan datang!


III. Turu

Pagmasusyan taya ngeni ing mumuna nang Domingo ning Adbiyentu. Ing Adbiyentu yapin ing kapagmasusyan na nung nukarin I adya tamu ing sarili king kadwa ng panyatang ning Ginu tang Jesu Kristo. Masanting at mayap yang pamikatagun para kekatamung Katoliku ing kapagmasusyan a ini. Gagawan taya ini misan king pabanwa ban suryan pasibayu reng kekatamung sarili. Bisa tang mag retrit king panaun a ini. At ing pamagretrit pakiwangis taya king metung a taung bisang marap king salamin ban ng akit ing sarili na. Oneng e mu basta marap king salamin, nune anyaran ning Apung Ginu ing matras tamung mapilan a takbang ban mas lalu tang akit ing sarili tamu at akutang ing ninu na ngeni itamu king arapan ning Apung Ginu. Atin bang migbayu king pangatau tamo? Meging mas mayap tamu ba kesa ketang milabasan a Adbiyento?

Sasabyan na ning ebanghelyu na potang datang yang pasibayu ing Anak ning Tau, I Jesus, kalupa na nyang panaun ng Noe. Magsaya at mamangan la kanita reng tau bayu datang ing albug. At nyang dintang na ing oras, reng taung e maniwala king

daratang a albug, tiki no ning danum at mengamate la ngan. Itamu king kasalukuyan, uling balu tamu at paniwalan tamung datang yang pasibayu ing Ginu tang Jesu Kristo ban tuparan ing kayang pengakung ituki na katamu king kayang Tatang king banwa. E na binang maulaga nung kapilan iti mapalyari. Ing mas importanti kekatamu ing kapagsadyan king oras ayta. E tana kukutang nung kapilan ing kapupusan ning yatu nune nanu ing parati tang dapat gawan ban potang datang ita makasadya tang parati. Mas tamung didinan pansin ing pamabie-bie tang mayap at atin takut Kaya. Nanung pitatakutan tamu king panaun ning panyatang ning aldo ayta? Balu ta naman na potang datang na ing oras ayta maging maayus na ngan ing kegana-gana. Ala ng takut, danup at sakit. Mikakalugud no ngan reng tau. Uling ing Dios, Ing Apung Ginu lugud at mayap ya. Nya ing kegana-gana lugud at mayap ngan. Ing tauling kutang, buri mu ng marapat ine? Nung ali pa, misip ka at gawa ng kapaglarinan. Nung wa, tumiman ka at mayap a oras. Amen.


IV. Pamigunam

Pigunaman taya ngeni ing sulat ng San Pablo kareng tau Roma. Ing sulat ayni pwedi tayang maging armas king pamanyuri king bie tang kasalpantayanan at king kekatamung kapagsadyan king panyatang ng pasibayu ning Ginu tang Jesu Kristo.

Nganang San Pablo ngeni kekatamo, Kapatad: Balu yu king miras na ing oras: migising na ko ngeni: ing kaligtasan tamu mas malapit ngeni kesa kanitang magmula tamung salpantaya. Ing bengi alus linipas ne, at tutu neng malapit sunlag ing aldo. Payinggulutan ta na ing pamanyapat karing sablang dapat ning karalumduman, at damputan ta na la ring sandata at lage tana king masala ban marap king labanan. Mibye-bie ta sanang makayagpang king karampatan, anting tau king masala. E na magpalalu king katakawan at pamaglasing, e na darapat king nanu mang kanawangan, ala ng kagaspangan a ugali, e na mipate-pate at mipangarirya. Bustan yung I Jesu-Kristong Ginu ya ing maging kalasag yu: E yu na isipan ing munye dalan king pamanusig karing marok ng pamitan ning kekong katawan. Ing Amanu ning Ginu. Amen.

V. Pamanahimik

VI. Tauling Panalangin

(Ikanta taya)

Datang na ka, Ginu, lalbug ne ing aldo;
Ing bengi daratang dalumdum daralan.
Datang na ka, Ginu, at ikabus mu ku,
Ing alun maragul, ing angin masikan.

1. Kaba ning bie daralan kung takut
Pagal at danup at kapikakunuan
Ika ing Ginu ku at Dios ning bie ku
Datang na ka, Ginu, at ikabus mu ku.
2. Kaba ning bie daralan kung takut
Mikakasala uli ning keinan ku.
Dapot ibie mu ing pakalulu mu.
Datang na ka, Ginu, at ikabus mu ku.

VII. Kutang
1. Para keka nanu ya kabaldugan ing kadwa ng panyatang ning Anak ning Tau?
2. Nanu lamo reng gagawan mung kapagsadyan king panyatang ning Ginu?
3. Buri mu neng datang ing kadwa ng panyatang ning Ginu? Nung wa o ali, bakit?

Download here:
Page 1:
http://www.mediafire.com/file/37xd2ebcaqq9s35/11.28.10%20pg.%201.doc
Page 2:
http://www.mediafire.com/file/55a1twl9k0iizpw/11.28.10%20pg.%202.doc

Solemnidad ning Kristong Hari

Ing Pangapaku nang Jesus king Krus

I. Pamuklat a Panalangin

Ibpa, king kaorasan manyawad ke pung grasya ning kekayung pakalulu. Patawaran yu kami pu, uling maralas milang gagamitan deng kekaming upaya king sarili ming kapakanan. Sopan yu kami pung maging kawangis ning kekayung Anak, I Jesus, makasadyang magdaun king bie para kareng aliwa. Amen.

II. Pamamasa

Lucas 23:35-43

35Makatalakad la ding tau karin at manalbe la kabang pituya-tuya de ring makatua da ring Judio. Ngara, ”Linigtas na la ding aliwa; paburen yung iligtas na ngeni ing sarili na, nung ya pin ing Cristo, ing pinili ning Dios!” 36Pituya-tuya dia naman ding sundalus; lepitan de at alukan maslam a alak. 37 Ngara, ”Nung ika pin ing ari da ring Judio iligtas mu ing kekang sarili!” 38Deting amanu makasulat la king kabuntukan na: ”Iti ya ing Ari da ring Judio!” 39Ininsultuan nia naman ning metung karing kriminal a makabitin. Ngana, ”Aliwa wari ika ing Cristo? Iligtas mu ing kekang sarili at pati na ikami!” 40Oneng sebianan ne ning metung ing kayabe na. Ngana, ”Ala na kang takut king dios? Ing parusang tinggap mu kaparehu ne ning keya. 41Matulid para kekata ing magdusang anti kaniti uli na ning depat tang marawak; oneng ya ala yang bitasang depat a marawak.” 42At kaybat sinabi na kang Jesus, ”Jesus, e mu ku sana kakalinguan potang datang na ka king kekang kayarian!” 43Nganang Jesus keya, ”Ing katutuan sasabian ku keka: ngeni mu rin akayabe da ka king Paraiso.”

III. Turu

Pagmasusyan taya ngeni ing Solemnidad ning Kristong Ari. Bina yang maulaga ing ukasyung ayni king mabilug a Sankakristiyanuan, uling kapamilatan na niti, pasibayu ng paganaka ing tune kabaldugan ning upaya, ning tune pamagserbisyu.

Makasulat ngan kareng apat a ebanghelyu ing kasakitan, kamatayan king krus at ing pamanyubli ng mebie ning Ginu tang Jesu Kristo. Pisanan neng Jesus ing krus papunta king kalbaryo (king amanung Hebreo Golgotha), na ing buri ng sabyan “bungu” (23:33). Agpang king kwentu ing bungu ng Adan atyu ya karin. At ini ing meging sangkan ot atin ngening “Chapel of Adam” king “Holy Sepulchre”. King kwentu murin, sasabyan da ing tinulung daya ning Ginu tang Jesus king krus, minagus iti king bungu ng Adan. Ing minagus a daya ning bayung Adan, ing mapamintung Anak, i Jesus, iyang lilinis at babayu king minunang Adan.

Bakit kaya, pinili ne ning Ginung Jesus ing dalan ning Krus? Ot e na namu pinili ing malwat a bie? Ot biryanan ng mate king idad 33, na oyni ing idad ning kalakaslakasan ning metung a tau? Ot biryanan ng mate king makalunus at makarineng paralan? Oreni reng maralas tang kukutang at ing pakibat na kekatamu ning Ginu yapin ing tune upaya atin yang karampatang lugud at pamagsakrapisyu.

Tinuksu ne king disyertu ning Dyablu ing Ginu tang Jesus bayu ya pa mentra king

kayang ministeryu. At ngeni king babo ning krus, king oras ning dusa at kasakitan, inulit na naman ning Dyablu ing pamanuksu. Mekatatlu ne tinuksu ing Ginu tang Jesus. Tinuksu ne kapamilatan dareng makatua na ning Jerusalem , ngarang sinabi “Linigtas na la ding aliwa; paburen yung iligtas na ngeni ing sarili na…” (23:35). Reng sundalus ngara, “Nung ika pin ing ari da ring Judio iligtas mu ing kekang sarili!” (23:37). Ing metung karing kriminal a makabitin , ngana “Aliwa wari ika ing Kristo? Iligtas mu ing kekang sarili at pati na ikami!” (23:39). Buri na ning Dyablu ing e misundu ing pamikabus ning tau king kasalanan. Buri na ning Dyablu na mimwa ya ing Ginung Jesus kareng taung mipaku Kaya. Buri na ning Dyablu na datang la reng angel king banwa king metung mung utus ng Jesus ban ipakit ing tune ng upaya antimong ari. Oneng e makanini ing gewa ning Ginu tang Jesus. King babo ning krus, kabang papatak tunggal ditak ing kayang daya, e nana inisip ing kayang sarili nune ing isipan na itamu. Buri ng ipayabut at ipakit keka tamu ing tune ng upaya ning metung a tutung ari. At ing tune upayang ayni yapin ing makasadyang pamagdaun king sarili ng bie, ban lugud at magsakrapisyu para kareng aliwa. Amen.

IV. Pamigunam

Ngening kaorasan paganaka na kekatamu ning Ginu tang Jesu Kristo nung nanu ya kabaldugan ing kasakitan at kamatayan na king krus. Pebustan ng malyari ing bageng ayni, banang ipakit kekatamu ing tune kabaldugan ning upaya o ning metung a tutung ari. Ing tutung ating upaya dapat atin yang lugud at pamagsakrapisyu na agyu neng idaun ing kayang sarili para kareng aliwa. E na kalupa ning babie ng upaya ning yatu na imbis na magsilbi, buri tamu itamung pagsilbyan. Oyni ing metung a maragul a sangkan ot bakit parating magulu ing kekatamung lipunan at oyni murin ing sangkan ot bakit asna karakal kalulu.

King babo ning krus, inaus neng Jesus ing Ibpa ban patawaran no reng taung migtaksil, miglakwan, liningad, meninsultu, menumbuk, menampaling at memaku Kaya king krus (22:34). Sinabi ng Jesus king sisising mapanako, na ngeni murin akayabe nane king Paraiso (v.43). Mete yang dadaun ne ing kayang ispiritu king Ibpang atyu banua (22:46). King kayang kamatayan, ing kapatawaran at pakalulu meganap na: “Ikit da ring taung makatipun manalbe karin ing milyaring iti at minuli la; durugdugan da la ring salu ra” (23:48). Mipatawaran ya ing mapanako, e pauli ning sinisi ya nune talagang mitmu ya king pamamatawad ing Ginu tang Jesu Kristo. Ing kekatamung ari malapit yang talaga kareng pakakalulu, kareng sasakwil ning lipunan at karing makasalanan. Ing kayang kapatawaran e ne bunga ning nanu mang mayap tang dapat nune manibat ini king tune ng grasya. Amen.


V. Pamanahimik

VI. Tauling Panalangin

Diyos ning lugud at pakalulu, dakal a dakal pung salamat king binie yung panaun ban ipayabut kekami ing tune ng kabaldugan ning tutung upaya. Sopan yu kami, o Banal a Espiritu ban parating maging kawangis ing Ginung Jesus. Amen.

VII. Kutang

1. Nanu ya kabaldugan keka ing krus ning Ginu tang Jesus?
2. Nanu ing pamiyaliwa ning kayarian ning yatu at ing kayarian ning Dios?
3. Keng palage tamu, mag-ari neba ing Ginu tang Jesus king kekatamung komunidad? Nung wa, nanu la reng palatandanan at nung ali, nanu lamo reng dapat tapang gawan?

Download here:

http://www.mediafire.com/file/5ax4l2wcf5ftjy4/11.21.10 pg. 1.doc

http://www.mediafire.com/file/gh1tcnticoexi8y/11.21.10 pg. 2.doc

Katlungpulu’t atlung Domingo ning Ordinaryung Panaun

Ing Pamagsalita nang Jesus tungkul king Pangalasak na ning Templo

I. Pamuklat a Panalangin

Ginung Jesus, sasamban at pasalamatan da kayu pu. Patawad pu, uling madalas mas didinan milang pansin deng prublema kesa king lugud mu kekami. Sopan yu kami pung ilako la reti uling ilang maging sumbagal king tune ming pamag-unawa kareng kekang amanu. Kulang pu ing kasalpantayanan mi kareng pangaku mu, kulang ing kekaming pamag-asa keng babie mung kaligtasan. Amen.

II. Pamamasa

Lucas 21:5-19

5Pipagsalitan da ring mapilan karela ing sintingan na ning Templo, ing sintingan a babie da ring marmol at ding ain a miyain king Dios. Inya sinabi nang Jesus, 6”Ding akakit yu den, datang ing panaun, metung man alang mitagan a batung makatumpak king kalupa nang batu; mabaldug la ngan king gabun.” 7Ngarang mengutang kang Jesus, ”Maestro, kapilan malyari iti? At nanu ing palatandanan king pangatupad na niti?” 8Pekibat na, ”Mingat kayu ban e na kayu alinlang ning ninuman. Uling dakal la ding datang king lagyu ku a sumabing, ’Aku ing Cristo!’ at ’Ing panaun dinatang na!’ 9E kayu tutuki karela. E kayu pailigalig nung makabalita kayung gera at rebolusyun. Kailangan king mapalyari la pa mu deti, oneng e mangabaldugan king ing kawakasan dinatang na.” 10At ngana pa karela, ”Lusuban ne ning metung a bansa ing kalupa nang bansa at lumaban ya ing metung a kayarian king kalupa nang kayarian. 11Mika mangasikan a ayun, danup, at salut karing miyayaliwang lugal at ating lunto makapangilabut a bage a mangaragul a tanda a manibat banua. 12Bayu malyari iting sabla, pandakpan da kayu at ligaligan. Idala da kayu karing sinagoga ban litisan at ipasukul. King uli ku iyarap da kayu karing ari at karing gobernador. 13Iti ya ing maging masanting yung oras ban munie patutu tungkul kanaku. 14Ipanatag yu ing lub yu; e kayu paibalisa nung makananu yung ipagdipensa ing kekayung sarili; 15uling dinan da kayung amanu at kabiasnan a e na agyung labanan o tutulan ning ninuman karing kekayung kalaban. 16Agyang ding pengari ku, kapatad, kamaganak, at kakaluguran ipanganiaya ra kayu; ipapate da la ring mapilan kekayu. 17Pikasaman da kayu ding sabla king uli ku. 18Oneng metung man king buak yu alang mabating. 19Magpakatatag kayu uling king kekayung kapibabatan karin yu tanggapan ing kaligtasan.

III. Turu

Adwa lang puntu reng buri ng ipayabut ning ebanghelyu ngeni. Ing mumuna yapin ing propesiya ning Ginu tang Jesu Kristo king pangalasak ning templu ning Jerusalem at ing kadwa yapin ing pamamie ng babala kareng kayang alagad king pamanyatang dareng bulaang propeta. King panaun ng Aring Solomon pepagawa ne ing templu ning Jerusalem, pero sinira ne ning Imperyo ning Babylonia nyang 586 B.C.E. Telakad at selese na nemang pasibayung Zerubabel, oneng malati at simple yamu. Nya I Herod the Great migplanu ya at pegawa neng mas maragul at magarbung templu kesa ketang pegawa ng Aring Solomon. Reng pari tiru dalang magobra, ban ila mismu deng mangawa king templu. Gewa da ini ban makasiguradu lang malinis la gamat deng magobra. Mig-umpisa ing pamangawa nyang 19 B.C.E. at meyari ya nyang 64 B.C.E. kapamilatan ng Herod Agrippa II ampo pa ni Albinus. Meyari yamung kumpletu ing templu nyang ing Ginu tang Jesu Kristo gagawan na na ing misyun na keti king yatu. At kening panaun ayni na sinabi ing “Karing akakit yung den, datang ing panaun ing metung man alang mitagan a batung makatumpak king kalupa nang batu; mangalasak la ngan king gabun.” At tutu pin ing propesiya ning Ginung Jesus king templu ning Jerusalem, uling nyang 70 C.E. silab, penyira at lesak ne ning Imperyu ning Roma. Biryan ning Dios na malasak ya ing templu agya pang telakad de ini para king kapanyamban. Ikit na ning Dios na mas dininan dang maragul a pansin ing kapanyamban o selebrasyun king templu na kasumangid na nini sasaryan dong sasara reng mata at balugbug da kareng mangailangan lingap at lugud. Pebalu na karela at ngeni kekatamu na ing tune kapanyamban ala yu king maragul at magarbung pisamban nune atyu king kekatamung katapatan kareng kayang panabilin o turu. Ing tune kapanyamban atyu king pusu ning metung a taung maniwala, na parati neng luluguran at liligtas ning Ginu tang Jesu Kristo. Dyang nanu man ing malyari, keti man king bansa tamu o king aliwa pang lupalup, makasiguradu tamung sopan na katamu. Agyang datang lapa reng bulaang propeta na ilang maging sangkan ning pamisagsagan tamu bilang mikakapatad, ala tang dapat pitakutan uling iya ing Mesiyas, ing bugtung ng Anak ning Ibpa, e na paintulutan na mawala metung man king buwak tamu. Amen.

IV. Pamigunam

Masira ngan ing kegana-ganang bage keni king yatu pero ing lugud at pakamal na kekatamu ning Dios e mabating. Uling ganap at lugud ya. Paintulutan naman ing datang lareng bulaang propeta pero e naka tamu lakwan ning kayang Banal a Espiritu na makasadyang mangatwiran at makilaban karela. Wa, tutu ing anggang propesiya ning Ginu tang Jesu Kristo mangapaltutu, datang man ing oras na mangasira la reng pisamban a gewa ta para Kaya, milaban-laban laman ding sablang bansa, mika masikan man ayun, danup at salut, at ipapate da katamu man ala tang dapat ikatakut, uling balu ta king pusu tamu na kayabe taya parati at kaybat naman ning bageng ayni siguradu namang dala na katamu king bie kaganapan. Nya tuknangan tana ing masyadung paylingasngas king bie. Ing gawan tamu samban tayang mismung katapatan king pusu tamu, pasalamatan at pakikwanan tamung kabang sisimba tamu parati talang pakiisip ding kalupa tang tau. Agnan tang gawan ing kapanyamban na ating kasuywan at lugud kareng kapara tang tau. Dinan tang mas maragul a pansin ing pamaglingap at lugud, uling oyni ing buri na ning Dios na mas dinan tang maragul a pansin. Amen.

V. Pamanahimik

VI. Tauling Panalangin

Ginu, dakal pung dakal a salamat king grasyang pagkalub mu parati kekami. Tatas mi pu parati Keka ing nanumang bage. Parati yu ke pung bendisyunan king lagyu ning Ibpa, ning Anak at ning Banal a Espiritu. Amen.

VII. Kutang
1. King panaun tamu, nino-ninu mo ing sasabing ilang mie masanting a bie kekatamu? Paliwanag.
2. Nanu ing munang bage na lungub king kaisipan mu, nung sabyan de ing amanung, kawakasan ning yatu.
3. Nanu ing asabi mu king sinabi ning Ginung Jesus na “Agyang ding pengari yu, kapatad, kamag-anak at kakaluguran ipanganyaya ra kayu.”

Download here:

http://www.mediafire.com/file/k8ud682v878zipk/11.14.10 pg. 1.doc

http://www.mediafire.com/file/4n2e8mbfh1dr188/11.14.10 pg. 2.doc

Katlungpulu’t adwang Domingo ning Ordinaryung Panaun

Ing Kutang tungkul king Pamaniubling Mebie

I. Pamuklat a Panalangin

Ibpa, dakal pung dakal a salamat king oras a pigkalub mu kekami. Pabustan yu pung maging malino kekami ing buri ng sabyan ning pamanyubling mie. Balu mi pung ining bage ayni mangailangan ing malalam a kasalpantayanan. Sopan yu kami Banal a Espiritu. Sopan yuke pu. King lagyu ning Ginung Jesus. Amen.


II. Pamamasa

Lucas 20:27-38

Ating mapilan a Saduseo a linapit kang Jesus. Ding Saduseo ila ding taung sasabing alang pamaniubling mebie. ¬¬28Ngara, ”Maestro, sinulat neng Moises iting Kautusan para kekami: ’Nung ing metung a lalaki mate yang alang ayanak king asawa na, ing kapatad nang lalaki kailangan neng pakasalaning mebalu ban mika anak la para king mete.’ 29Ating pitung mikakapatad a lalaki. Mekiasawa ya ing pangane at mete ya namang alang ayanak. 30Pekasalan ne ning kadua ing mebalu, at mete yang alang ayanak. 31Makanyan munaman ing milyari king katlu angga king kapitu; ayasawa de ngan at mete lang alang ayanak king mebalu. 32King katataulian, mete ya naman ing babai. 33Ngeni, king aldo pamaniubling mebie, ninu karing pitung mikakapatad ing maging asawa na, anti na ning mikasal ya karela ngan?” 34Nganang mekibat Jesus karela, ”Miyayasawa la ding lalaki at babai king kapanaunan a iti, 35oneng e na la makiasawa ding lalaki at babaing kabilang karing subling mie. 36Mitulad la karing anghel at e nala malyaring mate; uling king pamaniubli rang mie maging anak nala ning Dios. 37Agyang e Moises patutuan na king subli lang mie ding mete. Uling king istoria tungkul king mababang tanaman a milalablaban, ing Ginu inaus neng ’Dios nang Abraham, Dios nang Isaac, at Dios nang Jacob.’ 38Ngana wari, ing Dios e re Dios ding mete, nune Dios de ring mabie uling ding sabla mabie la uli na.”

III. Turu

Sasabyan na ning batas ning Matuang Tipan, “Nung ating aduang mikapatad a lalaki at manuknangan la king metung a lugal, oneng mete yang alang anak ing metung karela, e ya malyaring makiasawa ing asawa na lual ning pamilya na ning asawa na. Sukat neng pakasalan ning kapatad nang lalaki ing babaing akalakuan na ning kapatad na at dapatan na ing katungklulan na bilang asawa (Deut 25:5-6).” Pamalagwan de ing batas ayni na “levirate law”, ibat king amanung levir, na ing buri ng sabyan “asawang kapatad ning lalaki.” E la maniwala reng Saduceo na ating pamanyubling mie. Kasi para karela nung ating pamanyubling mie maging magulu mu king banwa. Isipan da kasi nung ninu ing maging asawa ning babai karin king banwa.

Ditak mu ing balu tamu tungkul kareng Saduceo. Akilala tala mu kapamilatan dareng sulat dareng karelang kalaban. Metung lang konserbatibung grupu dareng pari. Ing lagyu ning grupu ra menibat ya king lagyu ning metung a minunang pari, I Zadok (1 Hari 1:8; 2:35) Reng Saduceo ila ring ating ganap a kontrol king templu nyang king kadwa ng pangatalakad pasibayu ning templu. Paniwalan do reng limang librung sinulat ng Moises, yapin reng Torah, na keka tamu palagwan talang Pentateuch. E la maniwala na ating pamanyubling mie uling e na naman kanu tuturu reng sulat ng Moises. At e la naman maniwala kareng angel at espiritu.

King ebanghelyu, mengutang la reng mapilan a Saduceo king Ginung Jesus nung ninu kareng pitung lalaki ing maging asawa na ning babai king pamanyubling mie. Mekibat yang diretsu ing Ginung Jesus na reng tau king yatu pwedi lang makyasawa pero king kabilang bie ala ng pamakyasawa. Maging kalupa tana la reng angel at e tana mate kapilan paman.

Reng Saduceo ginamit de king pamangutang ing libru ng Moises, oneng pekibatan na la naman ning Ginung Jesus kapamilatan ning pamangamit mu naman king libru ng Moises (Exod 3:6) ban patutwanan na ing kamatayan aliwa ing kapupusan ning metung a tau. Nyang sinabi na ning Dios: “Aku ing Dios ng Abraham, Dios ng Isaac, at Dios ng Jacob” ing buri ng sabyan ing alang kapupusan ing personal ng relasyun na kareng patriarka. I Abraham kaluguran ne ing Dios, at nung ing tau milako ya kaluguran potang mate ya, pero ing Dios ali ya. Nya patutwanan na nini na datang ing oras na reng mete subli lang mie at makiagum tamu king grasyang iti, na talakad ning Ginu tang Jesu Kristo. Amen.

IV. Pamigunam

Metung karing paniwalan tamu, itamung Kristiyanu, yapin ing adwa ta sangkap, ing materyal na yapin ing keka tamung katawan, na masisira, malalaso at mamate. Ing kadwa naman yapin ing keka tamung kaladwa na iyang manatili at iyang muli king keka tamung Tatang king banwa. Nung ing panusignan tamu yapin ing materyal o katawan tamu, mangabaldugan ing makasukul tamu king bage mawawala, pero nung ing bage ispiritwal o pangkaladua yang mas didinan tang pansin, mibabalik ing keka tamung dignidad na nyang king kamumulan ya talagang buri na ning Tatang tamu king banwa. E na buri ning Mengawa o Linalang na ing bage dininan ng oras at lugud masira at magkasakit yamu. Alimbawa, ing metung a tau ginawa yang lamesa, dininan neng oras, binye ne ing kayang talentu at lakas at ing metung a tau siran nya mu, e kaya manamdaman o sakit a lub ing mengawa?

Nya naman ing kaburyan ning Apung Ginu ing ibalik ne king naturalesa ing tau at maganap mu ini king pamanyubli tang mie na kayabe taya ing Mengawa o Linalang keka tamu. At kabang atyu ta king yatung iti at panenayan tang mapalyari ining lugud at grasyang ini dapat mung isipan at gawan nung nanu ing bage na tutung makaparikil king tau. Ini yapin ing lugud at magsakrispisyu para kareng aliwa. Kailangan murin ing makasadya tayang ibye ing sarili tamu king pamakiagum king katawan nang Jesus a sinubling mebie, at matupad mu ini nung maging aktibu tang miyembru ning Pisamban na tetag ning kayang Anak.

Nung atin tamung pamag-alinlangan king pamanyubling mie, uling e ta abut isipan ing misteryung ayti. Ing gawan tamu ing paubaya tana ngan ing kegana-gana king Apung Ginu. Uling king Dios ing imposibli posibling posibli Kaya.. Kalupa na ning makasalanan king babo ning krus na kayabe ning Ginu tang Jesus. Ala neng akarapat, ala neng apagmaragul at ketang penandit ayta malapit na nyang arapan ing kamatayan, oneng alang impusibli king Dios (Lk 23:40-43). “Ala na kang takut king Dios? Ing parusang tinggap mu kaparehu ne ning keya. Matulid para kekata ing magdusang anti kaniti uli na ning depat tang marawak; oneng ya ala yang bitasang depat a marawak.” At kaybat sinabi na kang Jesus, “Jesus, e mu ku sana kakalinguan potang datang na ka king kekang kayarian!” Nganang Jesus keya, “Ing katutuan sasabian ku keka: ngeni mu rin akayabe da ka king Pariseo. Amen.

V.Pamanahimik

VI Tauling Panalangin
Dios ng Abraham, Isaac, at Jacob. Ika ing Dios dareng sablang mabie. Salamat pung dakal king lugud at grasyang pagkalub mu parati kekami. Ala pung impusibli Kekayu. at e yu ke pu sana kakalinguan iyabe king kekayung kayarian. Amen.

VII. Kutang
1. Nanu ya para keka ing kamatayan?
2. Pitatakutan taba ing kamatayan? Nung wa o ali, bakit?
3. Buring buri tana bang datang na ing amanuan na ning Ginung Jesus na mitulad ta karing angel at e tana malyaring mate, at maging anak na katamu na ngan ning Dios? Nung wa o ali, bakit?

Download here:

http://www.mediafire.com/file/bvpvy9ayowq92kd/11.07.10 pg. 1.doc

http://www.mediafire.com/file/gi7wnv83l41tk56/11.07.10 pg. 2.doc