Katlung Domingo ning Kuaresma

I Jesus at ing Samaritana

I. Pamuklat a Panalangin

Ibpa mi pung malugud, patawaran yu kami pu kareng kekaming kakulangan kareng kapara ming tau lalu na pu kekayu. Ngeni pung kaorasan, anyaran mi na sumibul yapu sana ing Danum ning Bie karing pusu mi. Uling balu mi pu nung ala yu kareng pusu mi, malaut o imposible ing mie kaming ating kayapan, kapayapan at pamikakalugud. Amen.

II. Pamamasa

Juan 4:5-15

King panaun a ita, i Jesus kaylangan yang dumalan Samaria. 5Miras ya Sicar, ing metung a balen ning Samaria a malapit king gabun a pepamana nang Jacob kang Jose a anak na. 6Atyu karin ing talaga nang Jacob at anti ning mapagal ya i Jesus king pamaglakbe na, linukluk ya lele ning talaga. Halus kaugtuan nang aldo tapat kanita. 7Dinatang ya ing metung a Samaritana ban saklung danum. Nganang Jesus king Samaritana, “Maki-inum na ku mo.” (8Alalu kanita ding alagad na uling minta la king balen ban saling pamangan.) 9Mekibat ya ing Samaritana, Judio ka at aku Samaritana ku, obat maki–inum ka kanaku?” (Sinabi na iti uling ala lang pamakiabe ding Judio karing Samaritano.) 10Sinabi nang Jesus, “Nung balu mu mu ing babie ning Dios at nung ninu ing maki-inum, mekad ika na ing maniawad keya at ibie na keka ing danum a mabie.” 11Ngana ning babai, “Ala kang paniaklu, ginu, at malalam ya ing talaga. Nukarin ka kumang danum a mabie? 12Maygit ka pa wari king makatua ming i Jacob a minie kekami kaniting talaga? Mininum ya at ding anak nang lalaki at ding sese nang animal keting talaga.” 13Mekibat ya I Jesus, “Kumau yang pasibayu ing ninumang minum king danum niting talaga; 14oneng e ne kumau kapilan man ing ninumang minum king danum a ibie ku. Uling ing danum a ibie ku keya maging sibul ya kilub na at ibie ne ing bie alang angga.” 15Ngana ning babai, “Dinan mu ku kaniting danum, ginu, ban kanita e na ku kumaung pasibayu ni e na ku saklu keti.”

III. Turu

Ngening kasalukuyan asna karakal ing migluntong miyayaliwang danum. Atin ng “mineral water”, “purified water”, “distilled water” at atin la pang sasabyan na titinda da king dalan na “criminal water”. At nya kanu pamalagwan deng “criminal water”, uling kingwa da kanu iti king posu. Pauli na niti, memagluntu la ring miyayaliwang “water station”, at neng kayi akit mula pang siping-siping king metung a lugal.

Ing tema ning ebanghelyu tamu ngening katlung Dumingu ning Kwaresma yapin ing danum a bibye bie. Ing kutang nanu ing mumunang lulub king kaisipan tamu potang daramdaman taya ing amanung danum? Siguradung ing pakibat yapin ing metung ya karing bage importanti king bie ning tau. Nung ala yu iti, alang mabie bage sana keti king yatu. Uling reng kegana-ganang ating bie keti king yatu mangailangan la ngan danum.

Reng pipumpunan tamu keti Pampanga, menuknangan la king lele o pampang ning ilug, uling importanti ya king bie ing danum na ning ilug at nya ing sangkan nya inaus da katamung kapampangan. Makanyan murin reng Tagalug, na menukngan king lele mu naman king ilug, na nyang minuna inaus rong Taga-ilog at nyang melambat inaus danong Tagalug. Ing Pangansinan, uling malapit neman king dagat, at ing kabyayan da manibatan king danum ning dagat, at iti yapin ing asin, nya yang sangkan ot inaus dalang tau Pangasinan.

Nya kekatamungan ating bie, e taya akawani ing danum king aldo-aldo tang pamibie-bie. Kailangan ne ning kekatamung pisikal a katawan. Uling ing katawan tang pisikal atin ya dapat 75% a danum bayang masalese mibie-bie. Nya neng magkulang ta danum a katawan, siguradu mu ing mangayna tamu at ala tang ganang magobra.

At iti ya ing mayap a balita kekatamu ngeni. Ing Ginu tang Jesu Kristo bibye ne ing kayang sarili antimong danum ning bie, ban Iya ing mie lakas kekatamu neng daranas tang kapagsubukan, at neng mangayna ta kareng tuksu ning Dyablu. Kalupa na ning ordinaryung danum, na mamagus king mabilug tang katawan. Pabustan tamung ing Ginung Jesus, ing tune danum ning bie, iya ing magus keng mabilug tang pangatau ban kanita ing sablang gawan dareng kegana-ganang parti ning kekatamung katawan, mayap ngan. Amen.

IV. Pamigunam

King mitmung katahimikan, anyaran ta king Banal a Espiritu na dinan na katamung matibe kasalpantayanan king Anak ning Dios Ibpa, i Jesus. Pabustan na sanang sumala ta kaisipan ban akit na aliwa mu ing danum a ordinaryu ya ing importanti king bie tamu nune mas importanti ya ing Danum ning Bie, i Jesus.

Potang daranas tamung kapagsubukan o tuksu e ta kakalingwan ing maus king Danum ning Bie, uling Iya mismu sinabi na, “Nung ninuman ing minum king danum ning bie, e ne kumau kapilan paman.”

Ing materyal a bage temporari mu, kalupa na ning ordinaryung danum, sasaliwan, kauubusan, at dirinat pero ing Danum na ning Bie aliya. Ing mung adwanan na kekatamu yapin ing tanggapan taya king pusu tamu ban ya ing magus kareng mangaragul at angga na kareng mangalati tang uyat. Kanita, akit da, na e tamu mu kabud makatuknang king pampang ning ilug nune manuknangan ya pa ing Danum ning bie king bie tamu. Amen.

V.Pamanahimik

VI Tauling Panalangin

O Ginu, sinabi yu pu nung ninu ing maniawad king Danum ning Bie, e ne kumau kapilan pa man. Paniwalan mi pu ini, uling dakal ng besis ing dinipendi kami kareng bage materyal pero parati kepung mawa. Mididinan kami pung kapasnawan potang Ika, ing Danum ning Bie, atyu ka king bie mi. Kalupa ning danum a ordinaryu, na iyang mimye sikanan king katawan, parati kayu naman pu sanang manuknangan kekami (Ing Danum ning Bie) ban king pamaglakbe mi king yatung iti, reng kaladua mi miras la king kayarian ning Ibpa. Amen.

VII. Kutang

1. Para keka, nanu ya ing maragul ng pamiyaliwa ning danum a ordinaryu at ing Danum ning Bie?
2. Nanu kaya ing masanting tang gawan ban apabalu ta kareng kekatamung kapatad na mas importanti ya ing Danum ning Bie kesa king danum a ordinaryo?
3. Ngening Kwaresma, nanu la kaya reng pwedi tang baywan king sarili, ban ing Danum ning Bie manuknangan ya kareng pusu tamo?

Download:
Page 1: http://www.mediafire.com/?6birreh6fb724e1
Page 2: http://www.mediafire.com/?p9q519n14e4za8r

Kadwang Domingo ning Kuaresma

Ing Pamanaliwa nang Itsurang Jesus


I. Pamuklat a Panalangin

O Ibpa ning Ginu ming Jesu-Kristo, masampat ing atyu ke keti arapan ning pakamalan mung Anak. Bustan mung maslag nang lupa pagkaluban na keng sala at kapayapan. Mananu na sanang mirakayanan kami king sala ning lupa ning kekang Anak ban ing metung at metung kekami tune kaming mikakalugud. Amen.

II. Pamamasa

Mateo 17:1-9
Kalabas da ring anam a aldo, tiki neng Jesus i Pedro ampon ding mikapatad a Santiago at Juan; dela na la king metung a matas a bunduk nung nu la makapagdili-dili. 2King akakit da ring atlung alagad minaliwa ya itsura i Jesus; maslag yang anti ing aldo ing lupa na at meging makasilo ya king puti ing imalan na. 3Kabud-abud ikit de i Moises at i Elias; makipagsalita la kang Jesus. 4Inya nganang Pedro kang Jesus, “Ginu, masanting ing keti ta na. Nung bisa ka gawa kung atlung kubu keti; metung para keka, metung para kang Moises, at metung para kang Elias.” 5Kasalukuyan na pang magsalita inyang tikpan na la ning maslag a biga. Meramdam ya ibat king biga ing metung a siwala. Ngana, “Iti ya ing Anak kung pakamalan a lubus kung katulan. Pakiramdaman ye! 6Inyang dimdam de ring alagad ing siwala mitakutan lang e mu nanu, inya mipasubsub la king gabun. 7Linapit ya i Jesus karela at kilbit na la at ngana karela, “Mibangun kayu. E kayu tatakut!” 8Inyang minatna la, ala lang aliwang ikit karin nune na mu i Jesus. 9Nganang minutus Jesus karela kabang kukuldas la king bunduk, “Ala kayung babalitanan ninuman king ikit yu anggang e subling mie ing Anak ning Tau.”


III. Turu

Pagmasusyan taya ngeni ing kadwa ng Dumingu ning Kwaresma na nung nukarin ing ebanghelyu pepakit na ing pamanaliwa na itsura ning Ginu tang Jesu Kristo, “Maslag yang anti ing aldo ing lupa na at meging makasilo ya king puti ing imalan na.” Keng pamanaliwa na itsura ning Ginung Jesus, bilalag na ing tutu ng kayupayan, na iya ing mesabing Messiah, ing Talapagligtas, a Anak ning Dios. I Moises king Matuang Tipan ikit na naman ing kayupayan ning Dios inyang inaus ne king Bunduk ning Sinai “Minukiat ne kanita I Moises king bunduk at tikpan ne ning biga ing bunduk. Migdatun king babo ning bunduk ing makasilo nang aslag ning panga-atyu ning Ginu” (Exodo 24:15-16).


Kening pamanaliwa na itsura ning Ginung Jesus metupad na ing propesiya ng Propeta Isaiah 60:1-3, 19-20, ngana “ Jerusalem , talakad ka, at sunlag anti ing aldo; ing ligaya ning Ginu keka saslag ya! Mitakpan la king karalumduman ding aliwang bansa. Oneng keka ing sulu ning Ginu sunlag ya; ing ligaya na manatili keka! King uli ning kekang sala datang la ding bansa. Ari datang la uling ing bayu mung aldo saslag ya. “E mu ne maging sulu ing aldo king kayaldawan o ing bulan neng kabengian. Aku, ing Ginu, ing maging sulu mung alang kapupusan; ing sala ning kakung ligaya ya ing sunlag keka. Ding aldo ding kalungkutan mu miwakasan na la. Aldo at bulan lunto-lumbug la, oneng aku, ing Ginu, ing maging sulu mung alang angga.”
Ngening panaun ning Kwaresma, na iyang panaun na ning pamanalangin, at pamanyawad tawad kareng agagawa tang kasalanan. Anyaran tamu king grasya ning Ginu na sunlag ya ing makasilo ng lupa king bie tamu. Ban kanita ing kayupayan ning Ginung Jesus iyang miral king aldo-aldo tang pamibie-bie. Amen.


IV. Pamigunam

Ngening panaun ning Kwaresma, pabustan tamung sunlag ya ing makasilo ng lupa ning Ginung Jesus king bie tamu. Suryan tala reng ugali tamu nung makayung-yung la king sala o king dalumdum. Didinan na katamung oras ning Ginu na lawen tala king kasalukuyan nung nanu la reng mas maulaga king bie tamu. Importanti la paba reng prinsipyu tamo? O, ala tanang prinsipyu at parati tanang makipag – konpormisu? Mas maralas ba ing makipag konpormisu tana mu ban alang gulu, at ban kanita ala ta nang kapate? Buri tamu kasi ing masalese at manyaman a bie, agya pang e na ustu o e na makayung-yung ing bie tamu king Apung Ginu. Nung king kaorasan, binang masakit kekatamu ing talakaran lang pasibayu reng prinsipyu tamu, pasaup ta king Ginung Jesus na sunlag ya ing lupa na king bie tamu ban itamu man kapamilatan ning grasya na sunlag tamu mu naman lupa. Amen.


V.Pamanahimik

VI Tauling Panalangin
Ibpa ming Dios, dakal pung dakal a salamat king binye yung mayap a oras kekami. King pamipakit mu king sala ning lupa ning Anak mung Jesus, mipamasalan kami ning keyang grasya ban ibalik deng prinsipyu kesa king pamakipag-konpormisu. Amen.

VII. Kutang
1. Para keka nanu lareng bage pwedi tang larinan king kekatamung sarili at keng kekatamung komunidad?
2. Nanu lareng prinsipyu na ning tau, na e tana akakit tatalakaran da ngeni?
3. Para keka ng mas akakit mu ngening kasalukuyan kareng tau, prinsipyo o konpormisu?
4. Nanu ya keka kabaldugan ing pamanaliwa na aske ning Ginu tang Jesu Kristo?
5. Nanu kaya ing masanting a paralan ban apanatilyan tala reng prinsiyu ning kayapan?

Page 1: http://www.mediafire.com/?5tsequapvptdqnd
Page 2: http://www.mediafire.com/?18rw1l292z9686i

Mumunang Domingo ning Kuaresma

Ing Pamanuksu na ning Diablo kang Jesus

I. Pamuklat a Panalangin

Ginung Dios, a magnasang parating lugud at manantabe kekami. Pabustan yu pung apigunaman mi ing mensahi ning Kwaresma ban lalu kaming makapiagum king babie ng grasya ning pamagsakrapisyu para kareng aliwa. Lilungan mu kami ning Banal mung Espiritu ban lalung mi-ukit kareng pusu mi reng amanu ning kekang Anak, I Jesus. Amen.

II. Pamamasa

Mateo 4:1-11

Kanita dela ne ning Espiritu i Jesus king disyerto ba neng tuksuan ning diablo. 2Inyang i Jesus mekapag-ayunu neng apat apulung aldo at apat apulung bengi, tiblan ne ning danup. 3Dinatang ya ing mapanuksu at ngana kang Jesus, “Nung ika ing Anak ning Dios iyutus mung maging tinape la ding batung deni.” 4Nganang mekibat Jesus, “Sasabian na ning Kasulatan, ‘E mu bukud king tinape ya mabibie ing tau, nune king balang amanung manibatan king asbuk ning Dios.’” 5Kaybat, tiki ne ning diablo king Banal a Siudad at telakad ne king taluktuk ning Templo. 6“Nung ika ing Anak ning Dios,” ngana, magpabaldug ka, uling sasabian na ning Kasulatan, ‘Ipanibala na ka at paingat karing anghel na, at alalayan da ka, ban e ka mitisud agyang king metung mung batu.’” 7Nganang Jesus, “Sasabian na naman ning kasulatan, ‘E me paniubukan ing Ginung kekang Dios.’” 8Kaybat na nita, dela ne ning diablo king metung a bunduk a tutung matas. Pepakit na la kang Jesus ding sablang kayarian keti king yatu at ing sablang pibandyan da. 9“Ibie ku ngan keka ing sablang yan,” nganang sinabi kang Jesus, “nung siklaud ka king arapan ku at samban mu ku.” 10Pekibat nang Jesus, “Mabating ka, Satanas! Uling ing kasulatan sasabian na, ‘Samban me ing Ginung kekang Dios at ya mung bukud ing kekang suyuan.’” 11Likuan ne kanita ning diablo; dinatang la ding anghel at sinilbian de.


III. Turu

Peg-umpisan tane ing panaun ning Kwaresma nyang milabas a Miyerkules. At ing Miyerkules ayni pamalagwan tayang “Ash Wednesday” na nung nukarin paganaka ya kekatamung tau na menibat tamu mu king alikabuk o gabun at nung e nakatamu pengasnawan ning Dios ala ta sana king yatung iti. Nya karampatan mu ing iduku tala reng buntuk tamu king Dios ban ibye ing kekatamung kapanyamban at kapasalamatan Kaya.

At ngeni namang aldo iti, pagmasusyan taya ing mumuna ng Dumingu ning Kwaresma, na nung nukarin ipakit ne kekatamu ning ebanghelyu na ing mepiling balayan ning Dios, ing Israel e da ikwang a panagumpen ing tuksu ning diablo nyang miglakbe la king disyertu papunta king gabun a pengaku ng YHWH karela. Pero ing bayung Israel , ing mepiling Tagapagligtas, i Jesus na tau mu namang kalupa tamu, na daranup mu naman, at tinuksu na naman ning diablu, menagumpe ya.

Nyang ding Israelita miglakbe la king disyertu ban munta king mipangakung labwan a pengaku ng YHWH para karela, migrebeldi la king Dios pauli ning danum at pamangan. Masyadu lang mamaligwa at buri da ing Dios iyang tuki king buri da. E rane apanenayan man ing Apung Ginu iyang mismung galo ban dinan nong grasya. At iti ing panga-aliwa ning Ginu tang Jesus, uling agya mang dimdam na ing danup, e na ikwang peytuksu king diablu bagkus pebalu na king diablu na “E mu bukud king tinape ya mabibie ing tau, nune king balang amanung manibatan king asbuk ning Dios.”

Deng miglakbeng Israeilta king disyertu, e la kabud mapagrebeldi king Dios nune mapag-alinlangan la pa. Milako la kapanwalan o kasalpantayanan, nya ikwa reng pinyubukan ing Dios ngara, “Kayabe ta ya ing Ginu o ali ta ya?” (Exodo 17:7). Oneng ing Ginung Jesus e ya mekwa king patibung ning diablu, nya pekibatan ne ngana, sasabyan ning kasulatan, “E me paniubukan ing Ginung kekang Dios.’”

Ing katlu at pekamabayat a tuksu king Ginung Jesus, yapin ing tungkul king upaya at pibandyan. Na nung nukarin ibye na ngan ning diablu iti nung duku ya at samban ne. Deng Israelita mebaldug la king tuksung ayni, nyang ginawa ya i Aaron a gintung toro ban samban de. (Exodo 32:1-10). At ing Ginung Jesus menagumpe ya king tuksung ayni, kapamilatan ning amanu na ngana, “Samban me ing Ginung kekang Dios at ya mung bukud ing kekang suyuan.’” At iti mayakit ya naman king libru ning Deuteronomio 6:13.

Ing Ginung Jesus migtagumpe ya kareng tuksung parating gagamitan na ning diablu, pero reng Israelitang miglakbe king disyertu pepaysaul la king tuksu. I Jesus gampanan na ing misyun na ning bayung Israel na nung nukarin agkatan na katamung pakyapusan taya ban ing kayarian ning Dios iya ng miral. Amen.


IV. Pamigunam

Pakatandanan tamu pu na nung ing Apung Ginu, e ya kukupas at e manaliwa kapilan pa man. Ya ing Diyos a malugud at mayupaya napun, king kasalukuyan at king daratang pang panaun. At Ing diablu e ya naman manaliwa, iya ing mapanuksu napun at king kasalukuyan. Kalupa na ning Ginu tang Jesus, tinuksu neng mekatapilan besis, makanyan murin ing gagawan na kekatamu. Pero oyni mu naman ing pakatandanan tamu po, kapilan paman e ya managumpe ing diablu, uling balu tamung ing Dios malugud at maganaka Ya kareng kayang anak. At e tala sana kakalingwan parati reng kayang MAYAP a AMANU, uling kapamilatan dareni agyu tayang palayasan ing mapanuksu, ing dyablu.

Idukit tala kareng pusu tamu rening amanung sinambitla ning Ginu tang Jesus Kristo nyang tinuksu ne king disyertu ning dyablu. “E mu bukud king tinape ya mabibie ing tau, nune king balang amanung manibatan king asbuk ning Dios.” ‘E me paniubukan ing Ginung kekang Dios.’”Samban me ing Ginung kekang Dios at ya mung bukud ing kekang suyuan.’”

King pamaglakbe tamu king bie, dakal ing kapagsubukan at ila ring disyertu ta reni. Wa, tutung kailangan tala reng materyal a bage para mie, pero reni temporari langan. Reng Israelita king disyertu mas dininan dang pansin ing materyal a bage kesa king Dios na parating manantabe at lulugud. Amen.

V.Pamanahimik

VI Tauling Panalangin

O Dios, a Ibpa mi, dakal pung dakal a salamat king babie yung grasya kekami. Kareti pung apat-apulung aldo ning pamigunam, pabustan yu pung akit mi na ating tula at saya king pamagsakrapisyu para kareng aliwa. Kalupa ning kekang Anak, bista man pung mayap at malugud ya, pinili na ing magdusa para kekami. Dinan yu kepung grasya ban miya naman pung apakyapusan. Amen.


VII. Kutang

1. Nanu ing asabi tamu kareng bage temporari at permanenti?
2. Nanu lareng kekang pang-awakan o kapanwalan keng bie ot managumpe kang mas didinan mong pansin deng permanenting bage kesa kareng temporaring bage?
3. Mikapanaun ba na pigdudan mung ing Dios e na pakiramdaman ing pangadi mo? Ikwentu.
4. Nanu ngeni ing kapanwalan mu tungkul king presensya ning Dios king bie mu?
5. Makananu mu babie ing kapanyamban at kasuywan mu king Apung Ginu?

Page 1: http://www.mediafire.com/?9tyyq1ua3btecb3
Page 2: http://www.mediafire.com/?64qnrrwu0e514qm

Kasiyam a Domingo ning Ordinaryung Panaun

Kapilan man e ra kayu Kakilala

I. Pamuklat a Panalangin

O Ibpang malugud, sasamban at pupuryan da kayu pu. Pasalamatan king pinandit uli ning grasyang pagkalub mu kekami. Sopan yu kami pung makatalakad a metung a pibale-bale king babo ning batu ban agyang nanu mang datang a pagsubuk maging matatag kami. Iti ngan pu anyaran at pasalamatan mi king lagyu ning Ginu ming Jesu Kristo. Amen.


II. Pamamasa

Mateo 7:21-27

21“E bala na mung taung mamaus kanaku ‘Ginu, Ginu’ lulub king Kayarian ning Banua, nune deta mung tutupad king kaburian nang Ibpa kung atyu banua. 22Potang miras na ing Aldo ning Pamanukum, dakal la ding maus kanaku, ‘Ginu, Ginu! King lagyu mu penaral mi ing amanu na ning Dios; king lagyu mu penabi mi la ding demonyu, at king lagyu mu dinapat keng dakal a milagru.’ 23Oneng sabian ku kanita karela, ‘Kapilan man e ra kayu kakilala. Dumayu kayu kanaku, ikayung e mayap a dapat!’ “ 24Inya ing balang metung a makiramdam kareting amanu ku at tutuparan na la, mengari ya king taung biasa. Telakad ne ing bale na babo ning batu. 25Menabu ing uran, dinatang ing albug, at sepulan ne ning angin ing baleng ita; e ya miragsa uling makatalakad ya babo ning batu. 26“Oneng ing balang taung makiramdam kareting amanu ku, at kaybat e na la tutuparan, mengari ya king taung mangmang. Telakad ne ing bale na babo ning balas. 27Menabu ing uran, dinatang ing albug, at sepulan ne ning angin ing baleng ita, at miragsa ya at makapangilabut ing pangabagsak na!”


III. Turu

Ing metung a Katolikung Kristiyanu malyari yang maging miyembru daring organisasyun ning Pisamban. At keng pamaging miyembru na, alus aldo-aldo sisimba ya at mag nobena. Bayu ya lungub at luwal king pisamban titiltil ya king agua bendita o “holy water” at sabe siklaud maka arap king altar. Parati neng bibit - bitan ing kayang rosaryu pati na ing Bibliya. E ya kapilan man mig absent kareng selebrasyun ning pisamban, pasku, bayung banwa, maneldo, etc. Pero kapamilatan dangan reni, daramdaman mu kaya ing parating mag reklamu o saingsing king bie. “Ot kasakit ning bie ngene! Ngana parate” Parati ya pang mamarsala ngana “kasalanan dareng manungkulan ini” dapat antini ing gawan da… Parating kasiran kareng aliwang tau ing lulwal king asbuk na. Ala ng mayap at byasa nune mu ing sarili na.

Keng mebasang ebanghelyu, binanggit no ning Ginung Jesus reng adwa kataung menalakad bale. Ing metung telakad ne ing kayang bale babo ning batu at ing metung naman telakad ne ing kayang bale king balas. Itang mitalakad bale babo ning batu, keng panaun tamu, ila pin reng taung malalam pamangilala king Apung Ginu. E dala kabud balu reng amanu ning Dios, nune pagkapilitan do pang daptan reti. Oreni reng taung akakit tamung panatag a itsura o kabilyan king bie, agya pang daralan lang kasakitan. Mararapat iti, uling balu da’t panwalan, na nanuman ing malyari kayabe de ing Dios a malugud, Balu dang king katauli-taulyan ing Apung Ginu pa murin ing mag luid.

Ita namang mitalakad bale king balas, oreni ring tau king panaun tamu na agya pang asno kasanting kabilyan, marakal pibandyan, mangaragul at mangasanting la bale, ala lang kapanatagan a pamibie-bie. Pero mapangadi la naman reng taung areni at mapamakiramdam la naman kareng amanu ning Apung Ginu. Parati la namang sisimba, pauli na ning masanting dang kabilyan king bie at pamanyad pang karagdagang grasya. Oneng potang datangan no ning mabayat a problema at tuksu agad lang mimina kapanaligan king Apung Ginu. Kalupa na wari ning baleng makatalakad king balas, mabule at sasaguling malalasak. Amen.

IV. Pamigunam

Ngening kaorasan, suryan tamu ing bie tang kasalpantayanan. Ninung kalupa ta karening adwang mitalakad bale? Ing mitalakad bale babo ning bato, na matatag a pundasyon, na agyang nanu pang sabyan da tungkul king kayang kasalpantayanan, e ya matitinag. Na, agyang nanu pang daratang a problema e na akwang manyisi at iwasan na ing saing-sing. Pero, dakal la pa kareng kapatad tamu king kasalpantayanan , ing mimina kapanwalan king Dios pauli dareng pagsubuk king bie; pangading e mipapakibatan o kaya ning kakaluluan. Neng kayi naman, pauli ning masyadu tang malapit king pari, at ikit tamu na atin yang kapintasan king kayang panugali, agad tamung mimina kasalpantayanan. Tandanan tamu na e dapat makasentru ing kekatamung kasalpantyanan king pari nune king Ginu tang Jesus. Nung makanini ing sitwasyun tamu, kalupa taya itang taung mitalakad bale king balas. Amen.


V.Pamanahimik

VI Tauling Panalangin

Ginu, dakal pung dakal a salamat, babalik mi pu ing sablang kapuryan at kapasalamatan. Ing ligaya king Ibpa, ligaya king Anak at ligaya king Banal a Espiritu, mangga man king alang angga. Amen


VII. Kutang


1. Atin kang meging karanasan na meyna ka kasalpantayanan pauli ning kasakitan/tuksu king bie?
2. Nanu la reng meging armas tamu ban managumpe kareng kasakitan o tuksu ning bie?
3. King kasalukuyan, nanu ing pwedi tang gawan ban talang atalakad reng pibale-bale tamu king babo ning batu?

Page 1: http://www.mediafire.com/?jkqvtjjbjrb15bw
Page 2: http://www.mediafire.com/?vkxa2aqeagogjhk