Mumunang Domingo ning Adbiyento

Alang Makibalu king Aldo o king Oras a Ita


I. Pamuklat a Panalangin

Ibpa, guewa yu keng kapamilya yu. King dagul ning tiwala yu kekami, dinenan yu keng responsibilidad ban gawan mi ing penibala yu kekami. Dinan yu keng grasya ban e ke sasawang manenaya king kekong pamanyatang ban dasnan yu keng masayang manenaya king kadwang pamanyatang ning Guinu ming Jesus. Salamat Guinu. Salamat pu. Amen.

II. Pamamasa

Marcos 13:32-37

32 “Alang makibalu metung man king paniatang na ning aldo o oras a ita ni ding anghel ning banua ni ing Anak. Ing bukud mung makibalu ya ing Ibpa. 33 Mingat kayu at parating makasadia uling e yu balu nung kapilan mapalyari ita. 34 Mangari ya king metung a lalaking miglakbe king marayung lugal: ipanibala ne ing tuknangan na karing ipus na, ing balang metung agpang king katungkulan na, at iyutus ne ing guardia king pasbul ban manatiling makasadia king pamagbalik na. 35 Inya magsadia kayung parati, uling e yu balu nung kapilan ya datang ing makibandi king bale, mapalyaring sisilim o king kapitangan ning bengi o ganingaldo o abak; 36 pota bigla yang datang at dasnan na kayung matudtud! 37 Ing sasabian ku kekayu ya naman ing sasabian ku karing sabla: Magsadia kayu!”

III. Turu

Reng magaral king eskwela atin lang ausan dang field trip. Ini gagawan da agyang minsan king pabanua. King field trip, mabibiasa la naman reng anak potang akakit dong aktual a malilyari reng pag-aralan da king eskwela. Tanu mong atin kang anak a mig-field trip king aliwang lugar. Karas ning sisilim, e la pa minuli reng anak. Dinatang ing alas otso ning bengi, e ya pa daratang ing anak mu. Siyempre migaganaka ka ikang pengari. E ka mipapaindatun, e ka man mipatudtud agyang mapagal na ka. Dinatang ing alas nuebi, ing alas dyes, at e ya pa daratang ing anak mu. Migaganaka na kang tutu. Lawe lawe ka lual ning awang nung ating daratang a saken. Miras ing alas dosi ning bengi. Manenaya ka pa at ngeni, meg-umpisa na kang mangadi uling king kapigaganakan mu king anak mu. E ka makakera nune migluklukan ka kabang panenayan meng datang ing saken a manatad king anak mu. Inyang ala una ning galing aldo, dinatang ya ing saken a manatad king anak mung panenayan. Mesaya ka uling mipasno ka. Kayabe do reng teachers na at sinabi da king ating mesirang tete king dalan, inya makanyan lang miras galing aldo king pamanuli da. Ikang manenaya, e na importanti ing milyari uling masaya ka, dinatang ne ing panenayan mung anak.

Ing ebanghelyu tamu tungkul ya king pamanyatang nang pasibayu ning Guinu. Sinabi na kekatamu king mako ya saguli oneng datang yang pasibayu. Buri na potang magbalik ya, dasnan na ka tamu, itamung likuan na, manenaya king pasbul kanu para king pamanyatang na. Kalupa ning pengaring e matudtud anggang e dinatang ing anak na, buri ning Guinu king panenayan ta ya at buri na pa king dasnan na ka tamung makagising at e matudtud. Ginamit ne ning ebanghelyu ing terminung “ipus” karing taung manenaya king panginuan a meko. Inyang kapanaunan nang Jesus, reng ipus e do kalupa reng “ipus” a aintindian tamu ngeni. Reng ipus kanita, kayabe da la king
pamilya – e no aliwa king pamilya. Anti na la mong ka-miyembru king pamilya. Inya makanyan ta yang aintindian ing panginuan potang buri nong dasnan makagising reng ipus na uling kapamilya na no reni. King kekatamung kultura, ing amanung “sese” mas malapit ya king kabaldugan ning ipus a amanuan nang Jesus.

Uling kayabe na katamu ning Guinu bilang miyembru ning sarili nang pamilya king metung a bale, buri na makasadya tamung makasadya king pamanyatang na. Kalupa ning pamanenaya ning metung a inda king mabebenging nang anak. Uling mikakalugud tamu, e ya metung a obligasyun a mabayat ing pamanenaya king Guinu. Uling miyembru na katamu ning pamilya nang Kristo, e ne ginamit ning Guinu ing pamagbalik na ban mitakutan tamu. Inya pin, ngeni panaun ning Adbiyento ( Advent), iyang iya ing panalangin tamu king datang ne. Uling balu tamu, potang datang ne, ipatupad na na ngan ing kaburian na kekatamu. At balu tamu, potang mipatupad ing kaburian ning Guinu, ing egana-ganang lugud, kayapan ampon kanauan iyang akit tamu. Inya, kareng minunang Kristiyanu, ing pangading” Datang na ka Guinu, Datang na ka” o “Maranatha” iyang madalas dang pangadi. Sana, itamu man, masaya ta yang panenayan ing pamanyatang na ning Guinu. Pagsadyan taya a alang takut. Reng taung manenaya king Guinu, ila reng taung e milalako pamag-asa. Balu da, e la mabigu king kapanenayan a gagawan da para king Guinu. Amen.

IV. Pamigunam

King domingung aiti, keni ya mag-umpisa ing kalendaryu ning pisamban. Magumpisa ya king ausan tamung panaun ning Adbiyento o “Advent” king Inglis. Ing buri nang sabian ning Advent – ing pamanyatang. Pamanyatang nang ninu? - Pamanyatang nang Kristu. Kerakalan kareng Kristianu, oini ing panaun ning Christmas. Wa, king panaun ning adbiyentu, sasadya ta ya ing sarili tamu ban pagmasusian ing misteryo ning pangabait ning Guinu keti king yatu. Ing pangabait na iyang ausan tamung First Coming o ing mumunang pamanyatang na ning Guinu. Oneng kayabe na ning pagmasusian tamung mumunang pamanyatang ning Guinu, iya ing Kadwang pamanyatang ning Guinu. Balu tamu, ampon paniwalan tamu king ing Guinu mibalik yang pasibayu uli sinabi na datang yang pasibayu. Inya naman manenaya tamu. Ing ebanghelyu tamu ngeni, iya ing sasabian na, king panenayan ta ya ing Guinu. Uling pin ing Christmas iyang atiu king buntuk tamu, milalako king isip tamu ing kadwa nang pamanyatang ning Guinu. Ing pamanyatang nang aini, masaya ya naman dapat. Nung matula tamu king mumunang pamanyatang ning Guinu, ya naman dapat ing tula tamung panandaman king kadwang pamanyatang na ning Guinu. Datang na ka Guinu, datang na ka! Oini ing dapat tang pangadi, itamu tutung masayang manenaya keya. Maranatha! Come Lord, Jesus, Come!


V. Pamanahimik

VI. Tauling Panalangin

Ibpa, datang ne pu sana ing kekong anak a I Jesus. Masaya mi ya pu sanang panenayan ban potang datang ya king oras a e mi balu, dasnan na kaming makagising ampon masayang manenaya keya. Masaya kami king mumuna yung pamanyatang, lalu ke pu sanang maging masaya king kadwa yung pamanyatang. Datang na ka Guinu, datang na kayu ban akit mi nang mipatupad ing egana-ganang kaburian yu keti yatu. Datang na kayu Guinu. Datang na kayu. Amen.

VII. Kutang

1. Makasadya ku kaya king pamanyatang ning Guinu?

Download here:
Page 1: http://www.mediafire.com/?c4jm5xan50n1bgy
Page 2: http://www.mediafire.com/?qoqp10p5swbpswq

Solemnidad ning Kristong Hari

Ing Tauling Pamanukum

I. Pamuklat a Panalangin

Ibpa, panalangin mi king datang ne sana ing kekong anak a I Jesus ban mipatupad na ing egana-ganang kaburian yu keti king yatu. King pamanyatang na bilang ukum ning meto sicluban, matupad sana ing ustisyang pangaku yu karing sablang manalig kekayu. Dinan yu ke pung grasya ban panintunan da kayu karing pamibiebie da reng kapara ming taung mamagkasakit at kababayatnan. Akit mi pu sana ing aske yu kareng aske da reng kalulu ampon mamagkasakit ban kanita, potang datang na kayu, agkatanan yu keng lumapit kekayu ban miyabe ke kareng taung karapat-dapat king bie alang-angga a pengaku yu karing sablang tapat kekayu. Salamat Guinu, Salamat pu. Amen

II. Pamamasa

Mt. 25:31-46

31 “Potang datang ne ing Anak ning Tau antimong Aring makamal at ding sablang anghel a kayabe na, lukluk ya king mal a tronu. 32 Mitipun la arapan na ding sablang tau ning mabilug a yatu. Kanita pikawanian na la karing aduang grupu, antimo nung makananung ing pastul kakawani na la ding tupa karing kambing: 33 ibili na la king banda nang wanan ding tupa at ding kambing king banda nang kayli. 34 At sabian na ning Ari karing atyu king banda nang wanan, ‘ Munta kayu keni, ikayung binendisyunan nang Ibpa ku! Munta kayu keni at tanggapan ye ing kayarian a misadia para kekayu manibat na king pangalalang na ning yatu. 35 Uling meranup ku at pepakan yu ku; mau ku at pepainuman yu ku; dayuan ku at tinggap yu ku karing pibalebale yu, 36 lubas ku at pepaimalanan yu ku; mesakit ku at liningap yu ku;atyu ku king sukulan at delawan yu ku!’ 37 Ipakibat da kanita ding taung makatuliran , ‘Ginu, kapilan da ka ikit danupan at pepakan da ka o mau at pepainum da ka? 38 Kapilan da ka ikit dayuan at tinggap da ka karing pibalebale mi o kaya lubas at ka pepaimalanan da ka? 39 Kapilan da ka ikit mesakit o atyu king sukulan at delawan da ka?’ 40 Nganang makibat ning Ari karela,’ Ing katutuan sasabian ku kekayu king ing nanumang depat yu king metung kareting malating diling kapatad ku, kanaku yu depatan!’ 41”Kaybat sabian na karetang atyu king banda nang kayli,’ Dumayu kayu kanaku, ikayung misumpa!Munta kayu king alang anggang api a misadia para king Diablo at karing anghel a kampun na! Uling meranup ku, oneng e yu ku pepakan; mau ku, oneng e yu ku dininan inuman; dayuan ku, oneng e yu ku tinggap karing pibalebale yu; lubas ku, oneng e yu ku pepaimalanan; mesakit ku at atyu king sukulan, oneng e yuk u delawan. ’44 Kanita tumutul la, ‘Ginu, kapilan da ka ikit danupan o mau o dayuan, lubas, masakit o atyu king sukulan at e da ka seupan? ’45 Nganang makibat karela ning Ari, ‘ Ing katutuan sasabian ku kekayu, kapilan man pigkaimutan yeng seupan ing metung kareting malating dili aku ing pigkaimutan yung saup.’ 46 Inya munta la king alang anggang kaparusan, oneng ding taung makatuliran munta la king bie alang angga.”

III. Turu

Menalbe na kong singing contest king balen? O kaya naman kaya beauty contest? Reng egana-ganang makiabe kareng pa-contest a reni, buri da manyambut la siyempre. Nung anti mong bisa kang makiabe karening pa contest a reni, kailangan, pakibaluan mu pa nanu la reng contest rules keni. Importanti la reni uling nung balu mo reng contest rules o criteria for judging, ila reng panigobran mu ban kanita manyambut ka. Anti mo nung singing contest ya ini, kailangan balu mu nung pilan a porsyentu ing ibie da king quality of voice o kaya nung pilan a porsyentu ing ibie da king audience impact. Siyempre, nung balu mo reng contest rules, ila reng panigobran mung masalese ban daragul naman ing chance mung manyambut. Masakit na nung pakasanting me rugu ing costume mu potang kai, ala na kaman palang akwang puntus keni. Pero nung balu mo reng contest rules ampon criteria for judging, balu mu nung nanu ing panigobran mung masalese ban akwa me ing premyu. Ing ebanghelyu tamu, papalto ne kekatamu ing tauling pamanukum, o last judgment. Ing last judgment iya ing pekatauling diling maganap king bie tamu at king meto sicluban. Karin, datangan na ka tamung Jesus bilang metung a ukum a mie king katatauliang pamanusga na kekatamu ngan. Karin a balu tamu nung ninu reng mayap ampon marok. Karin abalu tamu nung ninu reng miras banwa at ninu reng miras impiyernu. Makananu ta naman mong abalu nung miras ta banwa o kaya king impiyernu? Makananu ta naman abalu nung tutung mayap tamu o tutung marok tamu? Simpli ya ini. As ne kasala king ebanghelyu tamu nanu la reng contest rules ban magtagumpe tamu king katataulian. Ing ebanghelyo ning tauling pamanukum anti ne mong bibie kekatamu reng contest rules o criteria for judging a gamitan ning Guinu king katataulian ning panaun. Nanu la reni? Mumuna, kailangan ginawa tamung kayapan kareng kapara tamung tau. Ing kadwa, ing kayapan a depatan tamu, guewa ta la lalu na para kareng tutung mangailangan king bie, reng alang kanan, alang inuman, reng alang malan, reng ma-uulila, reng taung lulungkut. Rening adwang contest rules a reni o criteria for judging a reni ila reng gamitan na ning Guinu king tauling pamanukum. Kasimpli da ring contest rules ning Guinu. Nung kanung tutu ta lang lilingapan reng pakakalulu ampon reng milelele king bie, anti ta ne kanung tutung sinaupan ing Guinu tamung Jesus. Nung nukarin ing kasakitan lalu na kareng pakakalulu, karin, atiu ya ing Guinu. Nung nukarin ating lungkut ampon pamagkasakit lalu na kareng pakakalulu, karin siguradu yang atiu ing Guinu. Reng malaut a lub kareng pakakalulu, e la siguradung manyambut king pa contest a ini. Reng e biasang sumaup ampon malunus kareng pakakalulu, siguradu lang e manyambut king pa contest a ini. Lelangan na katamu ning Guinu ban lugud tamu lalu na kareng kapara tamung tau a alang paralan ban micabus kareng egana-ganan kasakitan king bie. Inya bisa kang manyambut king pa contest ning bie? Bisa kang miras banwa? Luguran mo reng taung mamagkasakit. Saupan mo reng taung alang paralan ban masensu la king bie da. Lingapan mo reng masakit, puntalan mo reng lulungkut at magdili-dili, lingunan mo reng mangailangan, ipaglaban mo reng milelele ampon alang bosis. Reng tau a bukal king lub da ing tutung pamanyaup karing pakakalulu ila reng taung e makasarili. Ila reng taung ating kababan uling ala lang akwang kapalit ampon sukli potang reng pakakalulu ilang sasaupan da. Ila mu naman reng taung lulugud king Guinu uling nung nukarin ating pamagkasakit, karin atiu ya ing Guinu tamung Jesus. Marakal la reng kekatamung e makakilala king Guinu kareng aske da reng pakakalulu ampon mamagkasakit. E tamu magtaka ot ditak la tutu reng ating malasakit kareng kasakitan da reng pakakalulu. Buklat ta la reng mata tamu at panikuanan ta yang akit ing Guinu karing aske at kabilian da reng pakakalulu. Uling nung e taya akwang akit ing Guinu karela, pota e tamu manyambut king pa-contest para king bieng alang-angga a nung nukarin reng taung sinaup at megmalasakit kareng mamagkasakit ilang manyambut. Amen.

IV. Pamigunam

King domingung iti, pagmasusian ta ya ing kapiestan ning Kristo Rey, o Christ the King. Kening kapiestan a ini, kikilalanan ta ya I Kristo bilang ari ning meto sicluban. Iya ing ari a e pamuntukan kekatamu king pwersa ning upaya na nune king kababan at pamanyuyu a pepakit na at papakit na kekatamung niligtas na kapamilatan ning keyang pangamate. I Kristo, metung yang ari a mitmung kababan agyampang ari ing aus ta keya. I Kristo, metung yang ari a alang sawang susuyu kekatamu. Agyampang kikilalanan ta ya bilang metung a ari, e na papakit ing panga-ari na kapamilatan ning pwersa ning keyang upaya nune king tutung pamanyuyu na kekatamu. Itamu man, mayayaus tamu king panga-ari ning Guinu. Itamu man, atin tamung pamanyaus a ibat kang Kristong ari ban sumuyu tamu kareng kapara tamung tau, lalu na kareng pakakalulu ampon mamagkasakit. Ing pamanyuyung anyaran na ning Guinu kekatamu kalupa ne ning pamanyuyu na kekatamu. Sinuyu ya ing Guinu kekatamu e mu king paralan ning salita nune king tutung pamagdaun na king sarili nang bie para kekatamu ngan. Ala yang pasubali ing Guinu inyang kailangan na neng idaun ing sarili na para king sarili tamung kaligtasan. E ya mig adwa lub inyang tinggap ne ing kamatayan na uling balu na oini ing paralan ban micabus tamu king upaya ning karokan. Angga ngeni, I Kristong kikilalanan tamung ari ning meto sicluban makisanmetung ya karing pakakalulu, karing masakit, kareng milalakuan, karing makalunus, mauulila, malulungkut ampon milelele. Ing pamagkasakit a daranasan da reni, ila mu naman reng bibitbitan nang kasakitan anggang ngeni uling e na akawani ning Guinu ing sarili na kareng pamagkasakit tamu, lalu na rening taung tutung kakabayatnan king pamibiebie da. E na kakalilua ning Guinu ing sarili na karing kabayatnan a daranasan tamu. Kalupa na mo ning metung a pengari a ating maka-ospital a anak. Agyampang aliwa iya ing maka rate king ospital, panandaman nang mas migit pa king anak na ing sakit a panandaman na ning anak. Makanyan ya ing Guinu. Mekisanmetung ya king kekatamung kasakitan, karing kabayatnan tamu uling tutu ta yang kayabe ing Guinung “Emmanuel” a e kinawani kekatamu agyampang ngeni king kasalukuyan. Makisanmetung ta king paralan ning Guinu. E tamu kakawani ing sarili tamu kareng kasakitan ampon kabayatnan a daranasan da reng kapatad tamung pakakalulu. E tamu kakawani ing sarili tamu kareng pigagap da ampon kareng pamag-asa dang salese ing kabilian da. Kapamilatan na ning pamisanmetung tamu kareng kapatad tamung makalunus, karin ta ya akit ing tutu nang aske nang Kristong ari tamu. Nung ing tutung laman ning pusu tamu makaparikil ya king Guinu, e ya dapat lalaut ing lugud ta keya karing lugud tamu karing pakakalulu. Sana, panintunan ta ya ing Guinu karing aske da ring pakakalulu. Potang susuyu tamung tutu karela, susuyu tamung tutu king Guinu mu naman. Amen.

V. Pamanahimik

VI. Tauling Panalangin

Ibpa, kaburian yu king akit mi ya ing aske yu karing pakakalulu. Saupan yu kaming luguran mi la reng pakakalulu, reng mamagkasakit ampon kababayatnan king bie. Patawaran yu ke pu uling mas buri mi la pung kayabe reng atinan. Patawaran yu ke pu uling panintunan mi ing kapurian ibat karing makwalta ampon mayupaya. Patawaran yu ke pu uling maragul ing bibie ming ulaga kareng kayamanan da reng atinan. Busni yo pu reng mata mi ban akit da kayu kareng aske da reng pakakalulu. Gawa ke pu sanang paralan ban midinan kanauan agyang king nanu mang paralan, ing pamibiebie da ring kapara ming taung mamamagkasakit king bie. Kaluguran da kayu Guinu. Sana e mikakawani ing lugud mi kekayu king lugud a buri yung pakit mi kareng pakakalulu. Amen.

VII. Kutang

1. Akakit ke kaya ing aske ning Guinu karing pamibiebie da ring kalulu? Nanu ing gagawan ku ban midinan lang kanauan reng kayabe kung mamagkasakit king bie?

Download here:

Page 1: http://www.mediafire.com/file/sphvd2qqct9fkjq/11.20.11%20pg.%201.doc
Page 2: http://www.mediafire.com/file/jgeaaq6sq4dacz7/11.20.11%20pg.%202.doc

Katlungpulu’t atlung Domingo ning Ordinaryung Panaun

Ing Talimhaga tungkul karing Atlung Ipus

I. Pamuklat a Panalangin

Ibpa, salamat pu king maragul yung tiwala kekami. Penibala yo pu kekami reng kaguiuan a binie yu. Gamitan mi la pu sana reni king pamanyulung ning kayapan keti king yatu. Mabiasa kami pu sanang makibat kareng egana-ganang pegkalub yu kekami ban king pamanyatang yu matula mi la pung aibalik kekayu. Panikuanan mi pu sanang maging responsabli king bie a pigkalub yu. E mi pu sana sasayangnan o akwang misasalaula ing bieng pigkalub yu. Balu mi ya pu sanang sesen at ibili king direksyun a katanggap tanggap kekayu ban midinan kong tula potang mibalik kayu king kapupusan ning panaun. Salamat Guinu. Salamat pu. Amen.

II. Pamamasa
Mt. 25:14-30

14”King panaun a ita, ing Kayarian ning Banua apakilupa me kaniti: ating taung maglakbe king marayung lugal. Inaus na la ding ipus na bayu ya meko at penibala na karela ing pibandian na. 15 Likuananan neng salaping gintu ing balang metung karela agpang king gelingan na: ing metung likuananan neng limang libung salaping gintu, ing kadua aduang libung salaping gintu, at ing katlu, libu.a Kaybat na lang aintriga deti, meko ne. 16 Kanita mu rin, pemuhunan na la ding salapi ning tinanggap limang libung salaping gintu at apadobli na la king pakinabang. 17 Makanyan munaman ing depat na ning tinanggap aduang libung salaping gintu at apadobli na la king pakinabang. 18 Oneng ing ipus a tinanggap libu, linual ya at kinulkul ya king gabun at karin na la selikut ding salapi na ning panginuan na.
19”Kalabas na ning makabang panaun, migbalik ya ing panginuan da ring ipus a deta at meniawad yang kwenta tungkul karing salaping peniwala na karela. 20 Dinatang ya ing ipus a tinanggap limang libung salaping gintu. Sinabi na, ‘ Ginu, likuananan yu ku pung limang libu. Lawan yu! Mika pakinabang kung aliwang limang libung salaping gintu; oren pu.’ 21 Ngana ning amu na, ‘Masanting! Salamat king sipagan mu at katapatan! Anti na ning apaniwalan da ka king anti kareting alaga, ipaniwala ku la keka ding lalung mangaragul a alaga. Mekeni, makisulu ka kanaku.’ b 22 Kaybat na nita, dinatang ya naman ing ipus a tinanggap aduang libung salaping gintu at ngana, ‘ Likuananan yu ku pung aduang libung salaping gintu. Alben yu! Oreni pa ding aduang libung salaping gintu a meging pakinabang ku!’ 23 ¬¬Ngana ning amu na, ‘Masanting! Salamat king sipagan mu at katapatan! Anti na ning apaniwalan da ka king anti kareting alaga, ipaniwala ku la keka ding mangaragul a alaga. Mekeni, makisulu ka kanaku.’ 24 Dinatang ya naman ing ipus a tinanggap libung salaping gintu at ngana, ‘ Balu ku pu, ginu, king maigpit kayu: pupupul kayu king e yu tenam, papalut kayu king e yu silbagan bini. 25 Migaganaka ku; inya selikut ku la king kulkul ding kekayung salapi. Oreni pu ding salapi yo.’ 26 Ngana ning panginuan na, ‘Ala kang kwentang tau, tiktak ka katamad! Balu mu nang pupupul ku king e ku tenam at papalut ku king e ku pipagalan, 27 baket e mu la bildug ding salapi ku king bangku ban king pamagbalik ku e mu ing asubli mu la nune mika interes la sana? 28 Ngeni, kuanan yu la ding salapi keya at ibie yu la king mika pakinabang a limang libu. 29 Uling itang atin na mirinan ya pa angga king maging labis-labis ing atyu keya; oneng itang ala pati na itang ditak a atyu keya milako pa. 30 Tungkul naman kening alang kwentang ipus a ini, iyugse ye king karalumduman king lual ban karin ya manangis at mitigis a ipan.’

III. Turu
Potang lalakuan ta la reng bale tamu ban magobra, mas komportabli tamu potang atin tamung taung lalakuan bale potang mamako tamu. Mas kampanti tamu lub nung ating taung manibala ban kanita, agyang ala tamu at agyang nanu pa ing malyari balang, atin tamung likuan a tau a pagtiwalan tamu. Nung antimo reng mi-asawa lakuan de ing bale para king metung a importanting lakad at balu dang malakuan la bale reng anak, ipanibala do reng anak da kareng kamaganak da o kaya kareng taung pagtiwalan da kabang ala lu bale. E la mipaindatun rening mi-asawang mamako anggang e la makapanintun a taung apagtiwalan da kareng lalakuan dang anak. Potang penibala do reng bale, anak ampon nanu pang miyayaliwang bage kekatamu, buri ng sabian maragul ing tiwala da kekatamu reng taung menabilin kekatamu.

Ing ebanghelyu tamu ngeni, metung yang talimhaga tungkul king metung a makwaltang tau a mamako. Bayu ya meko, penibala no reng pera na kareng ipus na. King metung limang libu, king metung adwa, at king metung, libu. Penibala no reni karela. Maragul ing tiwala na
kareni inya likuan no reni karela. Siguru balu no kapasidad reng taung reni inya miyayaliwa lang ulaga reng likuan na kareng balang metung. Makanyan na pin man ing milyari. Ketang ipus a maragul a tinggap, ikwa nong aparagul reng penibala da kaya inya kabalik ning panginuan da, aibalik no reng penibala da keya king mas migit pang ulaga. Makanyan mu naman ing milyari ketang kadwa. Oneng ketang katlung ipus, e metula ing panginuan, e uling mewala la reng penibala nang pera, nune uling e la merakal at e no ikwang peparagulan.

Ing bie tamu bilang Kristiyanu, metung yang bieng ating pakibatan. Maragul ing tiwala ning Guinu kekatamu, inya penibala ne ing bie tamu kekatamu. At e mu ing bie tamu ing penibala na, pati na ing bie da ring kapara tamung tau. Kayabe king bie a penibala na kekatamu, ya ing egana-ganang kaguiuan o talentu king bie tamu a mibie king bawat metung kekatamu agyang nu ya pa anti. E la kekatamu reni, penibala da la mu kekatamu reni. Mamag-asa ya ing Guinu tamu king magamit la reni ban aisulung tamu ing nanu mang mayap ampon masanting king bie tamu. Dapat mung gamitan ta la rening miyayaliwang kaguiuan a reni king mayap a paralan ban lalu yang misulung ing kayapan ampon kanauan keti king yatu.

Nung anti mong atin tamung kaguiuan king pamanuru, turu tamung masalese ban mika malalam lang kebaluan reng tau. Nung biasa tamung maglutu, mangarpinteru, manasan, manai, magtinda o magkanta, dapat, magamit la reni king mayap a paralan ban aisulung taya ing nanu mang makakayap para kekatamu ampon kareng kapara tamung tau. Tandanan tamu, penibala da la rening kaguiuan a reni, inya e ta la man dapat pagmaragul agyang tutung magaling ta na kareni. At kalupa na naman ning talimhaga, maragul ing mwa na ning Guinu kekatamu nung e ta la gamitan reni at nung mipaburen la at nung e la mekasaup king pamanyulung king nanu mang kayapan. Ing dok na pa, mwa ya ing Guinu nung rening kaguiuan a reni, magamit la king e mayap a paralan o parasan.

Maragul ta pakibatan kareng nanu mang kaguiuan a binie na ning Guinu kekatamu. Potang datang ne at magbalik ne ing Guinu, at potang mangutang ne kekatamu at pakibaluan na nung nanu na ing depatan tamu karing kaguiuan a penibala na kekatamu, sana e ta mu sala-salikut a kalupa nitang katlung ipus. Uling king maragul nang dine ampon takut king panginuan na, selikut na la rening penibala ning panginuan keya at e no ikwang peparagulan reni. Makibat tamung maragul king Guinu king maragul a tiwala a binie na kekatamu. Sana gawan tamu ing egana-gana ban gamitan ta la reng penibala na king mayap a paralan angga na king pamanyatang nang pasibayu. Amen.

IV. Pamigunam
Kayabe ku king BEC Guinu. Inyang magumpisa la ring BEC king Cardinal Santos, mekiabe ku. Marine kung makiabe kanita uling balu ku naman atin kung sakit a epilepsy. Oneng ikit ku naman king agyang miraragsa kung miraragsa neng mangadi kami, ikwa da nang misane reng abe ku at e no mag-panic potang mikaka ataki ku. Masaya ku king BEC Guinu. Iya na ing grupung tatanggap kanaku. Reng aliwang pekiabayan kung grupu medyu ma tuturn off la kanaku lalu na potang balu dang epileptic ku. Uli na pin ning sakit ku, magkasakit kung manintun obra. Inya anggang ngeni, magdependi ku pa kareng matwa ku. Makanyan man Guinu, agyang limitadu mu ing kakung kaguiuan, penikuanan kung agawa ku ing nanu mang agiu ning katawan ku ban sumuyu ku kekayu Guinu at makasaup king pamanyulung ning nanu mang mayap.
Inyang pepatas de ing flooring ning pisamban Guinu, menyawad yang saup o donation ing pari mi pisamban. Bisa ku man mamie donation, ala na ku mang aibie uli na pin ala kung obra. Oneng api isip-isip ku Guinu, king atin na ku mang aliwang kaguiuan a agamit ku ban makasaup king pisamban. Inya pintalan ke ing pari mi at sinabi ku kaya king bisa kung sumaup king construction ning pisamban. Sabi ku kaya, agyang sumaup ku mung mamuat sementu, dutung o kaya nanu man bage king construction, malyari ku. Oini na talaga ing aibie ku at a iambag kung kaguiuan ku ban makasaup king kekatamung pisamban. Mebisa ne man ing pari mi Guinu. Pepayabe na ku kareng laborers keng construction. Keng makaniting paralan Guinu, mesaya ku uling agyang makapakananu, agamit ke ing binie mu pang lakas kanaku ban makapagsilbi ku.
Ngeni Guinu, milabas na ing panaun. Minsan a aldo, menagbag ku king eran ning McDo uling me-ataki kung epilepsy. Manibat kanita, anggang ngeni, me paralyze kung bagya inya maka wheel chair ku angga pa ngeni. E na ku masyadung makakimut ampon makapakiabe kareng meeting mi king BEC, oneng atin ku pa na man agagawa para kareng kayabe ku king BEC. Makapangadi ku pa Guinu. Nung ini na ing kaguiuan a mitatagan kanaku, iya na pa ing gawan ku Guinu. Balu ku, kapamilatan na ning pangadi, marakal ing grasyang mibubulus ibat banwa. Ngeni, makatagun ku pa naman kareng BEC mi San Nicolas. Nung datang na ka ngeni Guinu, at dasnan mu ku king makanining kabilianan, e na ku man siguru marine kekayu uling balu ku, agyampang makanini ku kabilian, gagawan ku pa ing agyu kung gawan at ing kaguiuan at binie yu kanaku e la mesayang nune megamit la king mayap a paralan ban misulung ing kayapan keti yatu. Salamat Guinu. Malugud ko pung tutu. Datang na kayu Guinu. Datang na kayu.

V. Pamanahimik

VI. Tauling Panalangin

Ibpa, maragul pu ing tiwala yu kekami inya penibala yu kekami reng kaguiuan a tutung manibatan kekayu. Gamitan mi la pu sana reni ban kapamilatan da aisulung mi ing kayapan a buri yung pagawa kekami. Patawaran yu ke pu potang agagamit mi la reni king matsurang paralan, potang agagamit mi la king pansarili ming parasan. Patawaran yu kami potang e mi la man mo gagamitan deni uling maririne kami. Dinan yu ke pung sikanan Guinu ban tutu mi lang agamit reng penibala yung kaguiuan ban kanita, king pamanyatang yu, masaya mi lang aibalik reni kekayu. Panenayan da kayu Guinu king pamanyatang yu. Dasnan yu ke sanang karapat-dapat at masayang manenaya king pamanyatang yu. Salamat Guinu. Salamat pu. Amen.

VII. Kutang
1. Nanu la mo reng kaguiuan a binie ning Guinu kanaku? Gagamitan ko kaya reni para king pamanyulung ning kayapan?

Download here:

Page 1: http://www.mediafire.com/file/bx4uqcj8nhc1lvp/11.13.11%20pg.%201.doc
Page 2: http://www.mediafire.com/file/1oh1vnnyfucf29h/11.13.11%20pg.%202.doc

Katlungpulu’t adwang Domingo ning Ordinaryung Panaun

Ing Talimhaga tungkul karing Apulung Dalaga

I. Pamuklat a Panalangin

Ibpa, salamat pu king bie a pigkalub yu pu kekami. Dinenan yu keng pusu ban luguran da kayu. Manatili ke sanang tapat kekayu ban ikayu at ikayu mu ing panintunan na ning pusu mi. Dinen yu keng pusu a biasang manenaya king kekong pamanyatang. Dinen yu kaming pusu a biasang magsaya king kekong presensya ban e ke sasawang panintunan mi yang panintunan ing kekong presensya. Kaluguran da kayu Guinu. Ikayu ing panenayan mi keng bie mi. Datang na kayu ban midinan nang katuparan reng pengaku yu karing manenaya ampon menatiling tapat king kekong lugud at kayapan. Amen.

II. Pamamasa

Mt. 25:1-13

“Karing panaun a ita, ing Kayarian ning Banua apakilupa me king anti kaniti: ating apulung dalagang linual ban sagana king lalaking kakasal. Atin yang daralang sulu ing balang metung karela. 2 Mangmang la ding lima karela at maisip la ding lima. 3 Ding limang mangmang dela da la ring karelang sulu, oneng e la migbakal reserbang laru. 4 Oneng ding limang maisip migdala lang aliwang laru bukud ketang atyu karing sulu ra. 5 Meyantala ya ing lalaking kakasal king paniatang na, inya ikua rang mitundu ding dalaga angga king mipatudtud la. 6” Inyang kapitangan nang bengi meramdam ing kulisak, ‘Oyni na ing lalaking kakasal! Lumual na kayu at salubungan ye!’ 7 Migising la ding apulung dalaga at inayus da la ring sulu da. 8 Ngara ding limang mangmang karing limang maisip, ‘Idake yu kami king laru yu uling matatda la ding sulu mi.’ 9¬¬ Oneng ngarang mekibat, ‘Pota e makagyu kekatamu ngan; mayap pa munta kayu saguli karing tindahan at sali kayung para kekayu.’ 10 Inya linual la ding limang mangmang ban saling laru. Kabang ala lu, dinatang ya ing lalaking kakasal. Linub la ding limang dalagang maisip a makapanaya at makasadia at melaus king lugal ning kasalan a kayabe ning lalaking kakasal; at misara ya ing pasbul. 11 “Kaybat na nita, dinatang la ding limang mangmang a dalaga. Ngarang kinulait, ‘Ginu, ginu, ibuklat ye ing pasbul!’ 12 Oneng nganang mekibat, ‘E malyari; e ra kayu kakilala.’ 13 Nganang menaring Jesus, “ Maglame kayu, uling e yu balu ing aldo ni ing oras.

III. Turu

Minta na ka king metung a klinika a nung nukarin as no karakal ring makapila uling bisa lang kumonsulta king doktor? Manenaya la agyampang pilan pang oras ba lang makapalawe king doktor a pagtiwalan da. Kuntoru magaling ya kasi ing doktor, mas marakal la reng papalawe. At nung marakal la reng palawe, mas makaba ya ing pila da reng manenaya. Neng kai pin, ala ya pa ing doktor a panenayan da, marakal no reng manenayang makapila. Ngeni, ika mong tauling dinatang, siyempre makipila ka naman. Manenaya ka naman kalupa da reng aliwang manenaya. Akit tamu king reng aliwa, uling e la makapanenaya, mamako na la potang akit da na ing makabang pila. Reng aliwa naman, mibabalik na la mu. Oneng kabalik da naman, mas makaba ya ing pila kesa inyang likuan de. Inya, nung e ka biasang manenaya, akwa mung e makapagkonsulta king doktor a kailangan mung pakikitan Ing ebanghelyu tamu ngeni, tungkul ya karing taung manenaya. Manenaya la king pamanyatang ning metung a maulagang tau para karela. Ing simbolo ning pamanenaya da ya ing paritan a makasindi a iyang tatalnan da reng apulung dalagang manenaya king pamanyatang na ning lalaking kakasal. Bengi la manenaya king pamanyatang ning taung panenayan da. E da balu nanu yang oras datang. Balu tamu king ing paritan, mangailangan yang gas ba yang manatiling makasindi. Nung megisan ne ing gas ning paritan, matda ya ing sulu na. Inyang panaun nang Jesus, uling ala la pang gas kanita, ing gagamitan da king paritan, laru a ibat king tanaman a olibo. At uling malambat yang e mekaratang ing panenayan da, ikwa dang ngan mipatudtud rening manenayang dalaga. Oneng inyang dinatang yang bigla ing taung panenayan da king kapitangan na ning bengi, adiskubri da pin ding lima karening dalagang manenaya king ala no palang laru para karing paritan da. Uli na pin niti, e da ikwang meka salubung keng taung panenayan da at king bandang tauli, e la meka tagun king kasal uling e da no pepaluban king lugar a nung nukarin meganap ya ing kasal. Inyang panaun da ring mumunang Kristiayanu, ining talimhagang ini iya ing maglarawan karela king pamanenaya dang gagawan para king pamanyatang ng pasibayung Jesus. Metung ya karing paniwalan tamu king I Kristo mete ya, I Kristo sinubli yang mebie, at I Kristu datang yang pasibayu. At uling sinabi nang datang yang pasibayu, kailangan mung panenayan ta ya king pamanyatang na. Metung ya karing matingkad a pamanugali da reng mumunang Kristiyanu ing pamanenaya king pamanyatang ning Guinu. Pauli ning kapanenayang gagawan da, menatili lang milalablab king karelang kasalpantayanan, masigla ing karelang pamag-asa at mibabaya ing lugud at kayapan da agyang makapadurut la karing sitwasyun a e masanting ampon tutung masakit ampon mabayat. Deng mumunang Kristiyanu, penandaman da naman ing sakit ning kapanenayan a gewa da. Inya akit tamu king talimhaga king mipatudtud la reng manenayang dalaga uling king lambat ning pamanyatang ning panenayan da. Oneng ing buri nang dinan importansya ning talimhaga ya ing larung gagamitan da para king paritan da ring apulung dalaga. Uling kepaltan lang laru ring limang dalaga, e da no asindian reng paritan da inyang dinatang ya ing panenayan da. Retang aliwang dalaga naman, marakal la bakal a laru, inya menatili lang makasindi reng paritan da inyang dinatang ne ing panenayan da. Ing larung amanuan ning talimhaga iya ing laru ning mayap a dapat a iyang magsilbing maulagang elementu ban manatili yang makasindi ing paritan. Ing sasabian ning talimhaga kekatamu ya ini: Mumuna: e tamu manikal manenaya king pamanyatang ning Guinu. E tamu papagal, e tamu matudtud. Panenayan taya ing Guinu king mitmung saya ning pamibiebie tamu. Kadwa: Panenayan ta ya ing pamanyatang ning Guinu a alang sawang gagawang kayapan kareng kapara tamung tau. Ing kayapan a daraptan tamu iyang magsilbing anti mong laru para king paritan tamu ban e ya tutuknang saslag ing pamibiebie tamu. Ing pamibiebie Kristiyanu metung yang bieng kapanenayan. Manenaya tamung alang sawa king Guinu. Manenaya tamu king pamanyatang na, king ganap a pangatatag ning kayarian na keti yatu, king ganap a pangatupad ning kaburian na kekatamu ngan. At e tamu manenaya king antimong ala. Balu tamu, datang ya, at datang ya ban dinan na nang kaganapan ing egana-ganang pengaku na kareng menatiling tapat keya anggang king katataulian ning panaun. Ing kapanenayan a iti dapat yang masaya at mitmu yang pamag-asa uling balu tamu king ing Guinu dinan na ngan patutu ing egana-ganang sinabi na kekatamu. King tutuking munta kong pasibayu king doktor at akit yung makaba ing pila, manenaya kayu. Mabiasa kong manenaya uling king katataulian, ing kekong kapanenayan magbunga yang kayapan at kanauan. E ta mamirapal. E tamu babalag king pila. E tamu mamako king pila at sabian tamu king sarili tamu king magbalik ta na mu. Manenaya tamu. E tamu balu king nanung oras ya datang at king nanung aldo ya datang ing Guinu. Sana potang datang ya, dasnan nong makasindi ring paritan tamu a mitmu king laru ning mayap a dapat. Magbunga ya ing kapanenayan tamu. At king bandang tauli, miyabe tamu king alang anggan a kapiyestan king kasalan ampon banketi a sinadya ning Guinu kareng menenaya kaya. Amen.

IV. Pamigunam

Reng Kristiyanu inyang minunang panaun, tutu reng panenayan ing Guinu. Balu da datang yang pasibayu at pauli na niti, penikuanan dang makasadya lang makasadya nung sakaling datang ya ing Guinu. Ing karelang pamibiebie mitmu yang kapanaligan ampon kasalpantayanan king Guinung panenayan dang datang. Ing karelang pamag-asa e ya milalako karela. Inya naman ing pamibiebie da meging yang mayap a alimbawa kareng kalupa dang tau a e pa kristianu kanita. Kanita, meging bawal ing kasalpantayanan. Nung abalu dang Kristiyanu ka, dakpan da ka at ipapate. Reng aliwang Kristiyanu mengamate la king miyayaliwang paralan. Reng aliwa pepapakan do kareng leon ampon kareng miyayaliwang mabangis a animalis. Reng aliwa, pemaku do king krus, kalupa ning pangapaku ning Guinu tamu. Reng aliwa penabtab do batal, silab da la, ninabu do king bangin. Uling e la milako kapanenayan king Guinu, milalablab la kasalpantayanan. E la tatakut arapan da ing masakit a kamatayan uling balu da, datang ya ing Guinu at iya ing mamie kayablasan king kapanenayan a guewa da. Inya makanyan ta lang parangalan reng martires ampon santos ning minunang panaun. Ila ring menenaya king Guinu. E la ni minsan megbayu kapaniwalan agyang masakit ing kabilian da. Agyang matsura ing tratus da karela, ing pamibiebie da a mitmung lugud ampon kayapan, iya pa mu rin ing pepakit da kareng kapara dang tau, agyang kareng kasalang dang papapate karela. Ing tutung Kristiyanung manenaya king Guinu, e ya tutuknang manenaya king pamanyatang ning Guinu. Agyang e ne daramdaman ing bosis na, agyang madalumdum pa ing makapaligid keya, panenayan at panenayan neng datang ing Guinu. Makasindi ya ing paritan na a mitmung laru, laru ning kayapan a dapat. Agyang mamagkasakit tamu, e tamu mamablas, e tamu gagawang karokan, nune, isundu tamu pa murin ing bieng mitmung kayapan, uling oini ing magsilbing laru tamu king paritan tamu ban manatili yang makasindi mung makasindi angga na king pamanyatang na ning Guinu.

V. Pamanahimik

VI. Tauling Panalangin

Ibpa, buri yu masaya keng manenaya king pamanyatang ning kekong anak a I Jesus. Palablaban yo ring pusu mi ban e ke manikal, ban e ke matudtud king kakapanenaya king pamanyatang ning Guinu. Saupan yu keng manatili king kekaming kasalpantayanan agyang libutad ning kapagsubukan ampon kasakitan. Saupan yu kaming gagawang mayap agyang ala na keng akakit ampon atatanggap a kayapan king makapaligid kekami ban e ya rugu mapapatda ing paritan mi a iyang magsilbing sala king karalumduman a makapaligid kekami. Mamag-asa kami Guinu, king datang ka. At potang datangan mu na kami, tuki yu kami king bangketi yung sidya para kekaming menatiling tapat at manenaya king panyatang yu. Salamat Guinu king kekong kayapan. Amen.

VII. Kutang

1. Makananu na ku kayang dasnan ning Guinu potang datang ya? Matula ya kaya king akit na kanako o ali?

Download here:

Page 1: http://www.mediafire.com/file/2wsn9aczwadp8ih/11.06.11%20pg.%201.doc
Page 2: http://www.mediafire.com/file/53333wvy0btog58/11.06.11%20pg.%202.doc