Kadwang pulu’t metung a Dominggu king Ordinaryung Panaun

Ding Amanung Babie Bie Alang Angga

I. Pamuklat a Panalangin

Ibpa, manibat king kamumulan kayabe mune ing Amanu, I Jesus, nya kapamilatan na melalang ing sablang bage. Salamat pu kaya at mikaka bie kami. Amen.




II. Pamamasa

Jn. 6:60-69

Ngara ding dakal karing alagad na inyang dimdam da iti. “Masakit ing sasabian na. Ninu ing makatanggap kanyan?” Oneng balu nang Jesus king mibubulungan la tungkul kaniti. Inya sinabi na karela, “Magugulu kayu pamisip kanite? O nung akit ye pa ing Anak ning Tau a magbalik king kabilianan na king minuna? Ing Espiritu ya ing babie bie. Ala yang aibie ing laman. Ding amanung sinabi ku kekayu Espiritu la at bie. Oneng ating mapilan kekayu a e maniwala.” (Uling manibat king kapupurmeruan balu nang Jesus nung ninu ding e maniwala at nung ninu ing magtaksil keya.) At ngana pa, “Iti yang sangkan nung inya sinabi ku kekayu king alang milapit kanaku subali mu nung burian na ning Ibpa. Manibat na kanita dakal na la karing alagad na ding dinulut at e na mekiabe kang Jesus. Inya sinabi nang Jesus karing labing adua, “Ikayu, bisa kayu namang mako?” Nganang mekibat Simon Pedro, “Ginu, keni ke pa munta? Atyu la keka ding amanung babie bie alang angga. Maniwala kami at balu mi na ngeni king ika ing Banal ning Dios.”

III. Turu

Itamung kapampangan, asna karakal ing amanung mangasanting at anti mu rin ing makalisya king buri tang sabyan. Mapilan kareng mangasanting a amnu alimbawa keng tagalog a misa, “Panginoon, maawa ka” nung ibaldug me keng kapampangan dapat “Ginu malunus ka”, oneng mas buri taya ing “Ginu pakalulu” uling kalulu ta mungan king arapan ning Dios.

Neng atin namang taung dadalan king arap ning bale tamu, agad tang sasabyan “Salangi ko pa” ing buri ng sabyan, dening taung areni makapamye lang sala, antimo neng sabyan tamung salangian mu ne ing kandila.

Neng buri ta ne mang abalu nung nukarin ya address ing metung a tau, ing kutang a gagamitan tamu ing “nukarin ka makatuknang?” kesa keng “nukarin ka makabale?” Buri ng sabyan tutuknang ta pa keng obra tamu at magpaynawang kayabe reng kekatamung pamilya. Nya tutuknang tamu king tuknangan tamu at e ya pipagpasyalan mu.

Karen namang amanung makalisya king buri tang sabyan, neng kayi makabigla, damdaman tamu ing “misaksaksakan la!” ngeni pala misisiksikan lamu pala.

Karen namang malugud tang pengari sasabyan dang parati “lelele ko kareng saken”, nung tukyan tala buri, aldo-aldo mangadisgrasya tamu. Ing buri dang sabyan “e ko lelele kareng saken” o kaya “lumaut ko kareng saken.”

Atin naman metung a kunduktor king bus, papalipatan ne ing metung a pasaheru. Tildu ne king pasaheru ing lugar a nung nukarin ne buring lumipat at ngana king pasahero: “keta na ka.” Mekibat ya ing pasaheru: “o abe, obat papalipatan mu ku ken nung ketan na ku?”

Ing ebanghelyu ngeni tungkul ya kang Jesus, ing amanung babie bie. Kalupa na wari king matuang tipan, ing Dios lelangan na ngan ing sabla, king kapamilatan namu ning kayang amanu. Mengapalyari ngan ini, pauli ning LUGUD ning DIOS kekatamu. Pepakit na ning Dios na ing amanu na, maka pamie bie. Ing anggang sablang sinabi na, mika bie ngan at ikit ta ini nyang lelangan no reng tanaman, ayup, animalis at tau. Meging ganap ing tula at saya na ning Dios nyang ikit na ngan ing mayap, masanting at malagung bage-bage. Oneng linto ya king eksena ing amanung magdalang kamatayan, yapin ing Dyablu o I Satanas. Balu tamu na ginamit ya namang amanu ban ing tau malili ya at mabaldug ya king pamikasala. Sinabi na ning Dyablu/ubingan, “E tutung mate kayu! Balu na ning Dios king kabud mangan kayu maging anti kayung Dios a kalupa na at mibuklat kayu mata, at abalu yu ing mayap at ing e mayap” (Gen. 3:4). Makanini ing sablang mayap, mangasanting at mangalagung bage keti king yatu, mesira at meging matsura ngan. Oneng balu tapin, lelangan na ngan ning Dios ing sablang mayap, malagu at mangasanting kapamilatan na ning kayang AMANU at ing AMANUNG ayti yapin ing kayang Anak I Jesus. Nya ban ibalik ing tune ng planu ning Dios king yatung iti, tinubud ne ning Ibpang atyu banua ing kayang anak.

Oneng dakal kareng Judio at disipulus ng Jesus na e da ayntindyan ing amanung sasabyan na. Nyang milabasan a dominggu sinabi ng Jesus “Aku ing tinape a tinipa ibat banwa” (Juan 6:41). “Ing mangan king laman ku at minum king daya ku atin yang bie alang angga at pasublian keng mie king tauling aldo” (Juan 6:53.) E da ayabut ayntindyan deng Judio ampo detang disipulus at likwan de I Jesus. Uling ing ginamit da ing kabyasnan da at aliwa ing kasalpantayanan da king Dios. Sinabi ng Jesus “Iti yang sangkan nung bakit sinabi ku kekayu king alang milapit kanaku subali mu nung buryan na ning Ibpa” (Juan 6:65)

At ngeni keng ebanghelyu masala ng payabut na I Jesus ding amanu na, espiritu at bie la at babie lang bie alang angga. Ipagkalub na sa ning Ibpa ing grasya ning kasalpantayanan ban tanggapan ta ya I Jesus, ing amanung babie bie. Ban ing planu na ning Ibpa, nyang mumuna, mibalik ngan king yatung iti, kapamilatan na ning kayang anak I Jesus, ing amanung bat king kamumulan angga king kawakasan ning panaun. Amen.

IV. Pamigunam

Ibpa, king kaorasan dakal ku pu abalu. Manibat pala ketang kamumulan, puru ngan mayap, malagu at mangasanting ing buri mu para kekami. Kapamilatan na pala ning kekang mayap a manu, linto ngan ing mangasanting at mangalagung bage. Oneng pagkalungkutan ku Ginu, na kalupa da reng pipumpunan ku, I tatang Adan ampoy inang Eba ing madalas mababaldug ku kareng amanung bibye kasiran na mamungang kamatayan. Madalas Ginu ko, gagamitan ke ining asbuk ku king alang kwentang bage. Madalas, deng lulwal a amnu king asbuk ku e la bibye bie, e la mayap, e la malagu at e la mangasanting. E da la kalupa kareng amanu mung babie bie, antimo ing amanung pamamie pag-asa kareng mangabayatnan keng bie.


Ngening kaorasan, anyaran ku pu Ginu, kapamilatan na ning Banal yung Espiritu na dinan ye pung kandadu ining kanakung asbuk at ikamu bukud ing misikap king susi ban kanita Ginu ko, nung kapilan mu buring ibuklat at magsalita ku, karin malyari ing kekang kaburyan. Amen.

V.Pamanahimik

VI Tauling Panalangin

Ginung Dios a malugud at maganaka, ing anggang kapuryan at kapasalamatan keka. Salamat pu kareng amanu yung bibie bie. Nung ala lu pu reni Ginu, e mi pu agyu ing mie kareng dakal a kasiran at matsurang mangapalyari king bie mi. Lalakas kami, titibe kami kasalpantayanan, pauli da reng amanu mu Ginu. Salamat pung dakal. Amen.

VII. Kutang

1. Nanu la reng mumunang atlung paburitu mung amanung sinabi ng Jesus? Bakit?
2. Nanu la reng e mu akalingwan a amanu, na menibat kareng aliwang tau? Positive ampong negative.

Kadwang pulung Dominggu king Ordinaryung Panaun

I Jesus ing Tinape a tinapang ibat Banua

I. Pamuklat a Panalangin

Ibpa, dakal pung salamat king pamanubud yu king kekayung anak, I Jesus. Pauli na mika tinape ning bie kaming kayabe kening pamaglakbe mi papunta king kayarian mu. Balu mi pu king kapamilatan na misadsad kami king kekang kayarian. Amen.

II. Pamamasa
Jn. 6:51-58

51 Aku ing mabie tinape a tinipang ibat banua. Ing ninumang mangan kaniti mie ya kapilan man. At ing laman ku ya ing tinape a ibie ku ban mie ya ing yatu.”
52 Uli na niti, mapali lang mibadbaran ding Judio. Ngarang mipapangutang, ”Makananu nang aibie kekatamu ning taung iti ing laman na ba tamung apangan?”
53 Nganang Jesus karela, ”ing katutuan sasabian ku kekayu: nung e kayu mangan king laman na ning Anak ning Tau at minum king kayang daya na e kayu mika bie king sarili yu. 53 Ing mangan king laman ku at minum king daya ku atin yang bie alang angga, at pasublian keng mie king tauling aldo. 55 Uling ing laman ku tune yang pamangan at ing kanakung daya tune yang inuman. 56 Ing mangan king laman ku at minum king daya ku manatili ya kanaku at aku manatili ku keya. 57 Tinubud na ku ning mabie Ibpa at king uli na mabibie ku; anti munaman ing mamangan kanaku mabibie ya king uli ku. 58 Iti ya ing tinapeng tinipa ibat banua. E ya anti king pengan ding makatua yu.Mengan la, oneng kaybat mete la. Ing mamangan king tinapeng iti mie ya kapilan man.”

III. Turu
Ating miyasawang masipag manintunan. Parati lang bengi na mu daratang king karelang pamibale-bale. Ala lang sasayangan a oras basta tungkul king kapanintunan. Matudtud na lamu, mimisip la pa nung makananu lang manakitan maragul para bukas. Oneng misan a Dumingu kabang deng miyasawa mangwenta la kareng karelang penakitan kilub ning parumingu. Linapit ya karela ing karelang anak, kitnan de reng miyasawa nung nanu ing buri na. Oneng e pa man meka pakibat ing anak da, begut ne ning tatang ing kayang walet at dininan neng pera. At sinabi na keng anak na “sige keta na kapa anak, maiistorbu kaming mangwentang perang ima mu, balu mu namang para keka ngan ini king future mu.” Oneng e meko ing anak king lele da at kilbit ne ning anak ing ima na. Biklat ne ning ima ing drawer at dininan neng tsokolati. Migsalita ya ing anak, ngana “ dad, ima, ika yu ing buri ku, aliwa ing pera at tsokolati.”

King istorya ing buri na ning anak, yapin ing presensya ampong lugud at panaun da reng kayang pengari. Aliwa ing bage materyal a kukupas ampong masisira. Makanini mu naman ing buri ng ipayabut ning ebanghelyu ngeni. Bibye ng Jesus ing kayang sariling laman ban maging pamangan at ing daya na ban maging inuman tamu. Ing laman ampong daya na, sisimbulu ne ning kayang sariling bie. Pagkalub neng buu ing kayang bie para keka tamu, ban mika bie tamung alang –angga. Pekamalino ng Jesus, na nung e tamu mangan king laman na at minum king daya na e tamu mika bie king sarili tamu. Wa, masakit pakiintidyan ing sasabyan na ning Ginung Jesus, na ing katawan at daya na maging pamangan taya. Pero kareng taung sane lulugud, kalupa da reng pengaring bibye panaun kareng anak da, agad da sabyan kareng kaluguran da keng bie, “dyang ing bie ku idaun ku keka yu.”
Imposible king tau, ing laman ng Jesus maging pamangan taya at ing daya na maging inuman taya. Pero king Apung Ginu alang imposible. Ing danum meging alak, ing pipi mekapagsalita ya, ing bulag menakit ya, ing mete mebye ya, ing marok a tau meging maganaka ya at dakal pang imposible pero meging posible king Dios.

Deng aliwa, mangutang la pa nung makananu ya kanung milub I Jesus ketang malating tinapeng tatanggapan tamu neng komunyon. Para karela kasi materyal ing pisasabyan, pero ing pisasabyan ispiritwal. Ing ispiritwal kasi maragul ya pamialiwa king materyal a bage. Kalupa na wari ning mata, karagul na ning bunduk Arayat pero mipapalub ya ngan ing bunduk. Metung pa, Ot neng mamarap ta keng salamin, ot milulub tangan ka rin.
Ing talagang buri ng malyaring Jesus. Uling iya Dios yang malugud, buri ng pabalu parati keka tamu na e ta magdili-dili king bie. Kayabe taya parati kapamilatan na ning pamananggap tamu keya king Banal a Eukaristiya. Kalupa na ning anak king istorya, mas buri tamu mu naman ing presensya at lugud na ning metung a tau kesa keng materyal a bage. Ing sakit keka tamu, e ta ngan panibala keya ing egana-gana at e taya buung tatanggapan king bie tamu. Sasabyan na keka tamu ngeni, kulang pa wari ing lugud ku kekayo? E pa wari sapat ing bie keng buu ing sarili ko, ing laman ampong daya ko? E ko pa wari maniwala na aku ing mabie tinape na tinubud ning Ibpa? Amen.

IV. Pamigunam

Ibpa, patawaran yu kami pu king e mi lubus pamaniwala king kekayung anak, na iya ing mabie tinape a menibat keka. Atyu pu palang parati king busal mi, kapamilatan na ning misa. Potang oras na ning komunyon, bibie neng buu ing sarili na, pauli ning tutu na keng kaluguran. Buri na kaming parating kayabe ban magtagumpe kami king bie papunta king kayarian yu king banua.

Ngeni, agkatan na ka tamung lumapit at tanggapan ing kayang katawan at daya ban yang maging lakas tamu ban tune lugud kareng kapara tang tau at mikasikanan labanan ing tuksu keti king yatu. Sasabyan na keka tamu ngeni, “keni, keni, keni mamaligwa kayung lumapit kanaku, aku ing tinape ning bie. Ing tinapeng e masisira angga king bie alang angga. At ing lumapit ngeni kanaku e ya dumanup kapilan man, at ing maniwala kanaku e ya kumau kapilan man.” Amen.

V.Pamanahimik

VI Tauling Panalangin

Ginung Jesus, parati mu ke sana pung agkatan lumapit keka king dulang ning komunyon. Balu mi pu na ika mu bukud ing maka pamie kekaming kapaldanan para e kami dumanup. Danupan ke king lugud at lingap. Nya e yu ke pu sana paburen king aldo-aldo ming pamibie-bie. Amen.

VII. Kutang

I. Ikwentu. Karanasan na mas inuna ta ya pa ing kapanintunan o materyal a bage kesa king makikit at tanggapan ya ing Tinape ning Bie, I Jesus.

Ikalabing- siyam a Domingu ning Ordinaryung Panaun

I Jesus Ya ing Tinape ning Bie

I. Pamuklat a Panalangin

Ibpa, dakal pung salamat king pamamie yu king kekayung anak, ing Tinape na ning bie mi. Uli na niti, makapaglakbe ke pu king yatung iti na ating kapaldanan. Patawaran yuke pun eng kayi madalas mali pu ing pamaglalawe mi king tune ng kabaldugan ning Banal a Eukaristiya. Palalaman yu ing kekaming kasalpantayanan t maging kawangis na ke pu sanang Jesus, king pamipamirasu na king sarili na para karing aliwang tau. Amen.
II. Pamamasa

JJuan 6:41-51

41Mibubulungan la ding Judio uling sinabi na, “Aku ing tinape a tinipa ibat banua.” 42Sinabi ra, “Aliwa iti I Jesus a anak nang Jose? Kakilala ta ya I tat na at ima na! Makananu nang asabing tinipa yang ibat banua?” 43Mekibat ya I Jesus, “E na kayu mibubulungan. 44Alang makalapit kanaku subali mu nung ilapit ne ning Ibpang mitubud kanaku at pasublian keng mie king tauling aldo. 45Makasulat karing libru da ring propeta,, at ding sabla turuanan na la ning Dios. Lalapit la kanaku ding sablang mekaramdam at mebiasa king turu na ning Ibpa. 46Iti e mangabaldugan king atin nang menakit king Ibpa; ita mung ibat king Dios ya ing bukud menakit na king Ibpa. 47Ing katutuan sasabian ku kekayu; atin yang bie alang angga ing maniwala. 48Aku ing tinape ning bie. 49Mengan lang manna king disyerto ding makatua yu, makanyan man mete la. 50Oneng ing amanuan ku ya itang tinape a ibat banua; ing ninumang mangan kaniti e ya mate. 51Aku ing mabie tinape a tinipa ibat banua. Ing ninumang mangan kaniti mie ya kapilan man. At ing laman ku ya ing tinape a ibie ku ban mie ya ing yatu.


III. Turu

Ating metung a pamilyang ana king kasayang mi abe-abe. Deng miyasawa, parati lang pasalamat keng Apung Ginu, uli na ning dininan nong anak a maganaka ampong mangasipag. Dintang ing panaun, deng miyasawa ila na mung mitagan king karelang pibale-bale. Deng kasing anak da, atin nong kanya-kanyang pamilya. Manibat kanita, panandam da reng miyasawa, na e na kumpletu ing bie da. Agaganaka da, ing saya ampong pamituksuan da reng karelang anak. Misan a aldo, mikasakit yang malala ing karelang pengaring lalaki. Inaus no ning ima ding karelang anak. Ing pangane, nyang abalu na, ing pekibat na, parala nyang pera keng LBC, uling bisi ya. Ing bunsu namang anak, parala nya kanung pera potang megsweldu ya. Ing kadwang pangane naman pekikwanan ng mindam pera kareng kayang kakaluguran at pintalan no reng kayang pengari. Mebigla la reng miyasawa, nyang kayakit da kaya, uling e na pebalu ing muli ya. Kalapit na ning anak kang tatang na, kinaul ne at siniklod ya. Tinulu ya luwa ing masakit ng tatang at ngana ‘ot e mu sinabi na datang ka anak, bang ku sang pepalutung pamangan kang imamu?”

Asne ka importanti ing pisikal a presensya na ning metung a tau neng atin tamung okasyun o selebrasyun. Lalu na pa neng ating manandaman o masakit king pamilya. Mas panandaman ta kasi ing lugud, nung deng kaluguran ta king bie atyu la king lele tamu.

Makanini mu rin ing buri ng ipayabut ning ebanghelyu ngeni. Ing Ginung Jesus iya ing tinape a tinipa ibat banwa. E ya ordinayung tinape ini, e ne kalupa itang “manna” na binye na ning Dios karelang Israelita, nyang atyu la king disyertu. Tinipa ya e mu para kareng Israelita nune para kareng anggang tau keti king yatu. Pamirasuan ya at dadake ya iti ban kapamilatan na niti misanmetung at mikalugud la reng tau. Ing Tinape ayni (I Jesus) pamangan ne ning kaladwa ban tang mikabus king e gana-ganang kapagsubukan king bie.

InIng kutang nanu ing sangkan ot tinipa ya at biryan ng meging tinape ya? Ing tune sangkan ot biryan na ning Ginung Jesus na maging tinape ne ning bie tamu. Buri na kasi ing presensya na keng bie tamu parati yang atyu. Buri na katamung dala ketang kayang penibatan, yapin ing kayarian ning banwa?

Makalungkut mu pin neng kayi, e taya balu kabaldugan ing Banal a Eukaristiya. Neng kayi gagawan ta yang obligasyun iti, tatakut tamu mung miparusan king impiyernu patsa e ta sinimba. Neng kayi gagawan ta yang bangku, ot bakit? Kasi pota mung atin tang kailangan o adwanan karin ta sisimba. Ing mas makalungkut gagawan tayang anting-anting o neng kayi pampaswerti. Antimo itang metung tang kapatad a e ne pengan ing tinape, nune inuli ne at pepakan ne keng kayang sese panabung a manuk. Gewa na kanu iti ban yang manyambut keng sabung.

Anyaran ta king Ginung Jesus na ing tune na sanang kabaldugan ning Banal a Eukaristiya yang tumimu king bie tamu. Sana dinan na katamung grasya na tanggapan taya king bie tamu, uling kaluguran na katamung kaluguran at kaluguran ta ya naman. Amen.

IV. Pamigunam

Ginung Jesus panwalan mi pu na ikayu ing tinape ning Bie na tinipa ibat banwa. Tinipa ko pu busal mi ban antabayanan yu kami at luguran. Neng sisimba kami pu, potang oras ning komunyon, panwalan mi pu na ikayu ing tatanggapan mi. Buri yu pu na parati kayung atyu king presensya mi. Dakal pu ing kapagsubukan a daranasan mi king bie king kasalukuyan, lalu na ngeni na aldo na pu ning kauran. Atna pu kasakit ing bie. Sopan yuke pu kapamilatan na ning Banal a Komunyon na parati yung Paganaka kekami na kayabe ra ko pu dyang ng malyari.
Midinan ke pu sanang sikanan ban isundu ing alimbawa yung pepakit a lugud kareng aliwa. Dinan yuke pung tetagan lub ban lumaban king pagsubuk ning bie. Ikayu pu ing lakas mi neng mangayna kami. Ikayu na pung bala kekami Dakal pung dakal a salamat Ginu king kekayung presensya king Banal a Santa Misa at king kekaming bie. “E kami karapat dapat tanggap keka Ginu, nune iagkas miya ing amanu mu at kumayap na kami pu.” Amen.

V. Pamanahimik

VI. Tauling Panalangin

Ibpa, ikayu ing mibie kekami king mabie tinape na menibat king banwa, I Jesus. Pauli na, mididinan ke pung kapaldanan, uling ing presensya na parati yang atyu busal mi. Lalakas ke pu lub mamarap king bie, uling balu mi na e kami pu lakwan ning kekayung anak. Salamat pu kang Jesus, ing tinape ning bie mi. Amen

VII. Kutang

1. Nanu ya kaya ing bie, nung alang Misa o Banal a Eukaristiya?

Download here:
Page 1: http://www.mediafire.com/view/?5o42u1ada0b20kx
Page 2: http://www.mediafire.com/view/?kv61rs3edouo78d

Ikalabing- walung Domingu ning Ordinaryung Panaun

Ing Pamanintun ding Tau kang Jesus


I. Pamuklat a Panalangin

Dios a Ibpa mi, ing kapupuryan at kapasalamatan king binie yung mayap a oras kekami ban mitipun king lagyu ning Anak mu, I Jesus. Antabayanan yu kami pu ning kekayung Banal a Espiritu ban maging mabunga at mayap ing kekaming pamitipun ngeni. Sana pu, matagkil la reng pusu’t kaisipan mi kareng mayap a amanu ning kekang Anak. Salamat pung dakal, salamat pu. Amen
II. Pamamasa

Juan 6:24-35

24Inyang ikit da ring tau king alayu karin I Jesus ni ding alagad na, sinake la kareting bangka at minta la Capernaum ban panintunan de I Jesus. 25Inyang ikit da ne I Jesus king kangatba na ning dagat, kitnan de. Ngara, “Maestro, kapilan ka pa dinatang keti?” 26Nganang mekibat, “Ing katutuan sasabian ku kekayu: panintunan yu ku e uling ikit yu la ding depat kung milagru, nune uling mengan kayu at kinabsi karing tinape. 27E yu panintunan ing masisirang pamangan, nune panintunan yu ing pamangan a manatili angga king bie alang angga. Ibie na iti kekayu ning Anak ning Tau uling ya ing dininan nang upaya ning Dios Ibpa.” 28Inya kitnan de, “Nanu ing kailangan ming daptan ban arapat mi ing parapat ning Dios?” 29Nganang mekibat Jesus, “Iti ya ing parapat na ning Dios: maniwala kayu king tinubud na.” 30Ngara kang Jesus, “Nanu ing milagrung arapat mu ban akit mi at maniwala kami keka? Nanu ing kekang daptan? 31Mengan lang manna king disyerto ding makatua mi, Agpang king kasulatan, “Dininan na lang tinape ibat banua ban apangan da.” 32Nganang mekibat Jesus, “Ing katutuan sasabian ku kekayu: aliwa I Moises ing minie kekayu king tinapeng ibat banua: nune ing Ibpa ku ya ing babie king tune tinape a ibat banua. 33Uling ing tinape a babie na ning Dios ya itang titipang iba’t banua at babie yang bie king yatu.” 34Ngara, “Dinan mu kaming parati, ginu, kaniting tinape.” 35Nganang Jesus karela, “Aku ing tinape ning bie. E ya dumanup kapilan man ing lumapit kanaku at e ya kumaung danum kapilan man ing maniwala kanaku.

III. Turu

Metung a katutuan king yatung iti, yapin ing tau ala yang kakuntentuan king bie. Patsa ikwa nane ing kayang paninapan, siguradu mung ati na namang bayung kayang anyaran. Dakal tamu daramdaman na sasabing “Ginu, metung mu ing buri ku king bie, buri ku mayari la reng anak ku king karelang pamagaral”, potang meyari la reng kayang anak keng karelang pamagaral. Anyaran na naman, ing sana dyang ayatad na lamu king altar potang makyasawa la reng kayang anak, potang mepalyari iti, manyawad ne naman, na sana akit no dyang den mu mang apu na, angga na king miras no king apu na king talampakan. Iti ing pamagpatune na ing tau, ala yang kakuntentuan king bie.




Keng mebasang ebanghelyu ng San Juan, ring tau panintunan de ing Ginu tang Jesu Kristo, uling bisa no namang makalibring pamangan. Kilala re ing Ginu tang Jesu Kristo na makapagparakal tinape at makapapakan dakal a tau. Anya iti ya ing sangkan nung bakit panintunan de. Itamu man king panaun ayti, maralas ing ausan at panintunan taya ing Ginung Jesus, uling king pamangailangan tang material. E marok ing manyawad tang material (pamangan) a bage king Ginu, uling kailangan ne ning keka tamung katawan iti. Ing kutang materyal/pamangan mu ba ing kailangan ning tau? Nung materyal mu pin ing kailangan ning tau keti king yatu, iti ya ing maging sangkan na ala ya ping kakuntentuan.

King mebasang ebanghelyu, panintunan de ing Ginu pauli ning libring tinape. Tinapeng kaybat meng pengan, dumanup na kana namang pasibayu. Pero payabut na keka tamu ngeni, “wa”, adinan na katamung tinape para king keka tamung pisikal a katawan, pero atin ya namang aliwang klasing tinapeng pagkalub at libri ya namang pamye na. At iti ing kayang sarili, na patsa yang tinggap tamu king bie siguradu mung maging kuntentu tamu king grasyang pagkalub na king aldo-aldo. Uling balu tamu na mas importanti ya ing kesa king nanumang materyal keti king yatu. Amen.


IV. Pamigunam

Balisa ku pu Ginu uling dakal ku pigagap king bie. Dakal ku pangarap king bie. Buri ku reng anak ku mangayari la ngan king karelang pamagaral. Uling paniwalan ku maragul ya asaup ing edukasyun ban mikamasanting ya bie ing metung a tau. Sasabyan ku karela parati na metung kareng pahalagan ning pamilya yapin ing edukasyun. Pero, pauli ning kekang mayap a balita, tuturu naku na okey mu ing mangarap para king masanting a pamibie-bie, na alang marok king mika masanting a edukasyun reng anak ku. Pero atin pang mas importanti kesa king nanu mang bage keti king yatu. At iti Ginu yapin Ika. Uling nanu mang pigagap ku keng bie, akwa ku man ite o ali, ing mas importanti Ika Ginu ko. Uling nanu mang malyari kanaku at kareng pamilya ku, e muku siguradung lakwan, uling tutu mu kaming kaluguran. Amen.
V. Pamanahimik

VI. Tauling Panalangin

Ginung Dios, milabas ne na naman pu ing kekaming pamitipun. Salamat pu king pamanantabe kekami. Dakal kami pu bakalan king pamanuli mi kareng kekaming pamilya at komunidad. Pauli ing pepayabut yu kekami ngeni. Ika napung bala kareng kekaming pigagap king bie, balu mi pu Ginu na mas balu yu pu nung nanu ing mas makakayap kekami. Ing kabanal-banalan a lagyu ning kekayung Anak, I Jesus at ing pamanantabe ning Banal a Espiritu. Amen.

VII. Kutang


1. Nanu ing asabi mu kaniti, “Ing tau ala yang kakuntentuan king bie”.
2. Nanu la reng kasalukuyan mung pigagap king bie?
3. Nanu ing paniwala mu keng materyal at ispiritwal a bage?

Download here:

Page 1: http://www.mediafire.com/?0yjfbg6by2m3otx

Page 2: http://www.mediafire.com/?kv61rs3edouo78d