Kadwangpulu’t adwang Domingo ning Ordinaryung Panaun

Ing Pamagsalita nang Jesus tungkul king Kasakitan na at Kamatayan

I. Pamuklat a Panalangin
Ibpa, king buung bie mi, panikuanan ming micabus kami king nanu mang kasakitan. Tatakasan mi at painggulutan mi ing nanu man ing makabayat king pamibiebie mi. Ing anak yung Jesus, e na tekasan ing kasakitan a makarikil para keya nune kinaul ne iti ban miligtas kami king upaya ning kasalanan. Dinan yu keng lakas lub ban agyu ming arapan ing nanu mang kasakitan a daratang king bie mi. Kalupa ning Guinung Jesus, e ke pu sana mimiwas kargan at pusanan mi la reng krus a kailangan ming dalan ban mabiasa mi lang kalinguan reng makasarili ming pamibiebie. Saupan yu kami Guinu. Antabayanan yu ke king pamaglakbe mi kabang tatalukian da kayu king bunduk ning kalbaryu a nung nukarin mipapasiag ing tune yung ligaya. Amen.


II. Pamamasa
Mt.16:21-27
21 Manibat na kanita pepakilala nang Jesus karing alagad na king kailangan yang munta Jerusalem at dumalan dakal a kasakitan king gamat da ring makatua na ning balen, ding pamuntuk da ring pari, at ding talaturu ring Kautusan at ipapate re. Oneng king katlung aldo subli yang mie.
22 Tiki neng Pedro king metung a suluk at nganang tinutul, “Guinu, e na sa paintulut ning Dios yan! E sukat malyari keka ing makanyan!”
23 Inarapan neng Jesus i Pedro at ngana, “Mabating ka kagulutan ku, Satanas! Metung kang bisang munie sagabal kanaku. Ing pamisip mu e king Dios nune king tau.”
24 Kaybat na nita, “ sinabi nang Jesus karing alagad na, “Nung ing ninuman bisa yang tuki kanaku, sukat nang kalinguanr ing sarili na, pusanan ne ing krus na at tuki ya kanaku. 25 Uling ing ninumang bisang sagip king bie na, mawala ya; oneng ing ninumang ibating ne ing bie na alang-alang kanaku,akit ne. 26 Nanung apala na ning tau nung abandi ne ing mabilug a yatu oneng mawala naman ing bie na? Kabud mete ya ing tau, ala yang arapat nanuman para abawi na ing bie na. 27 Ing Anak ning Tau datang yang kayabe ning kayupayan nang Ibpa na at antabayanan de ring anghel na. King paniatang na ablasan ne ing balang metung agpang king depat na.

III. Turu
King ebanghelyu tamu, magtaka tamu siguru obat I Jesus e ya tatakut arapan ne ing keyang kasakitan inyang sasabian na karing alagad na king “ kailangan yang munta Jerusalem at dumalan dakal a kasakitan king gamat da ring makatua na ning balen, ding pamuntuk da ring pari, at ding talaturu ning kautusan at ipapate re. “ (v. 21) Uling e pangkaraniwan akakit ining lakas na lub Jesus arapan na ing kasakitan a makarikil kanu keya, e tamu dapat magtaka obat I Pedru, e na atanggap ing paniabian ning Guinu inyang ngana: “ Guinu, e na sa paintulut ning Dios yan! E sukat malyari keka ing makanyan!” (v. 22)
Likas na kekatamu ing mimiwas king kasakitan. Ninu mo kekatamu ing masayang mamagkasakit? Ala kekatamu ing matula potang daranas tamung kabayatnan ampon kasakitan. E ta la naman buring akakit mamagkasakit reng luluguran ta king bie. Inya makanyan na mu ing meging reaksyun ng Pedro.
Ing kasakitan, e na kaburian ning Guinu. Ing kasakitan bunga ne ning pamikasala tamu, a amana tamu manibatan pa karing mumunang pengari tamu a ri Adan ampon I Eba. Uling king kasalanan, dinatang ing kasakitan. Inyang dinatang ya I Jesus e ya naman mikabus king kasakitan kalupa tamu agyang ala yang kasalanan. Linasa yang tutu lalam ding gamat da reng marawak agyang sasabian tamung tutu yang Dios. E na aligtasan ing kasakitan. E na naman iniwasan o guewang pelitan mo ing sitwasyun ba yang mikabus king dalanan nang kasakitan. Nune, sinadya na ing sarili na at tinggap na ing pamilasa na balat karing paratang da a e naman tutu at pigawagawa da mu ding kalaban na. Keni, akutang ta king sarili tamu: “ Obat mo I Jesus, tinggap na ing kasakitan a makarikil kaya? Ot e na mo iniwasan o pilayan ing kasakitan a e naman dapat para keya? Obat kinaul ne ing krus na, ngening ala ne mang depatan mong marok? Obat memagkasakit ya ngening e ne man mikasala a kalupa tamu?”

Keni ta ya akakit ing misteryo ning kasakitan. Nung ing Guinu kinaul ne ing kasakitan a e naman dapat mibie keya, nanu pa mo itamung talatuki na? Nanu mo ing daptan tamu potang itamu ing mamagkasakit? Kalupa nang Jesus, itamu dapat, makasadya tamung kaulan mu naman ing daratang a kasakitan king bie tamu. Para kekatamung talatuki ning Guinu, e ya kabud parusa ing kasakitan, nune paralan ya king bayung bie a bibie ning Guinu kareng egana-ganang bisang tuki keya. Balu tamu, nung makasadya ta yang kaulan ing kasakitan ning bie, akit ta ya ing tutung bieng amanuan ng Jesus (v. 25) Reng taung e makasadyang tanggap king nanu mang kasakitan, ila reng kawawalan a bie a amanuan ning Guinu. (v..25) Ing bieng makasarili ampon alang pamagbayu migit ya pa king kaparusan ning kasakitan. Pota naman mebiasa ta nang kumaul king kasakitan a daratang kekatamu, maging tutung kalupa na ka tamu ning Guinu at maging karapat-dapat tamung tuki keya. Metung yang kondisyun karing talatuki ning Guinu king “sukat dang kalinguan ing sarili da, pusanan de ing krus at tuki la king Guinu. “(v.24)
E tamu tatakut king kasakitan. Kalupa nang Jesus, kaulan ta ya ini, uling oini ing maging susi king bayung bieng bibie na kareng talatuki na. Agyang daranas tamung kasakitan, e mamate ing kekatamung pamag-asa. Uling kalupa ng Kristo a sinubling mie kaybat ng linasa, itamu naman, mabibie tamu king pamag-asang balu tamung e mabibigu. King kasakitan, maging kalupa taya ing Guinu. Nung kayabe ta yang memagkasakit, kayabe ta ya naman king pamag-asang miyabe tamu keya king bie na king alang-angga.

IV. Pamigunam
Anak ku pa Guinu, penandaman ku na ing kasakitan. Agyang e ku man buring kaulan ing kasakitan, mibait at dinagul na ku king kasakitan. Kalulu ku mu Guinu. Maranun kung mimulat king kasakitan.
Bayu ku pang kasal Guinu. Ala ku pang anak. 22 yrs old. Uli na pin king kakulangan king pera, manyali kung asan palengke Guagua balang galing-aldo at pipisali ku palengke San Fernandu. Atin kung kayabe. Maka-tricycle mi lang dadalan reng sasaliuan mi manibat Guagua anggang San Fernandu. Daralan ke king highway balang galing-aldo agyang madalumdum at maina ya ing sulu ning tricycle mi. Manakitan na ke man Guinu.
Oneng mapagal ampong peligrosung bagya. Minsan a galing-aldo kabang magbiyahi kami papunta San Fernando, asabalan na ke ning metung a saken. Misalbag ngan ing karga mi. Sinakobla ya ing tricycle mi. Ikeng adwa ning abe ku, menga-sipit-sipit ke king tricycle. Milako ke male tau. Pilayi da ke ospital. Mapilan mung aldo ing milabas, mete ya ing abe ku uling mika impeksyun ya ing metung nang bitis. Uling ala ya pung pera, mika gangrene ya at ikwa nang mete. Aku, makanyan mu naman pu Guinu. Ing metung kung bitis, mika impeksyun ya naman king gangrene, at pinutut de ing bitis angga king tud ku. Inyang mumuna, e ku a tanggap. Inuli da ku, balu ku mikagastus-gastus la reng pamilya ku, at ngeni, e na ku makapagobra uling ala ne ing metung kung bitis. Inyang milyari kanaku ini, sinaupan da ku reng miyembru da ring BEC. Melunus la siguru kanaku inya sinaupan da ku. Balu ku, atyu ku pa ospital, sinaup na la kanaku. Maragul ku pung pasalamat king saup da. Manibat kanita, mekiabe na ku kareng cell meeting da balang domingu. Agyang maka sakle ku pa, makiabe ku kareng energizer da. Karin king BEC ku midinan lakas lub Guinu. Kalupa yu, dinanas ku naman kasakitan. Oneng mika kabaldugan ining pamagkasakit kung ini uling ikit ku kekayu naman ing kasakitan a delanan yu .Oneng balamu e pu sapat ing kasakitan a binie ku kanaku Guinu. Uling mapilan mung domingo kaybat ng meputut ing bitis ku, ing misis ku megpa-check up ya king ospital. At karin ikit da king ring adwa nang batu,
e no malyari. E ku na pu balu Guinu ing gawan ku inyang midinan kaming maragul a problemang kalupa niti. E na ku pin makapagobra, ining misis ku pa, mesira la pa reng batu na. Manibat kanita, lual lub ke king ospital. Agyang mamagkasakit kung maglakad, aku pu ing magbante kaya. Oneng kabang luluat, sabi da ring doktor, mangailangan yang dialysis ba yang kumabye. Nukarin ku kumang pamayad king dialysis Guinu? Ala na ke man pung pera. Anak ya pa ing misis ku, kasing idad kya mu. Iya rugu ing abe ku king bie ku uling ala ke pang anak. Ngeni, buri mu neng kuanan? Makananu ku Guinu? E ku na yata balung dalan ini? King bandang tauli, uling e ke a pa dialysis ing asawa ku, mika blood poisoning ya pu. King bale, makalukluk ku lele na, alben keng mimina ampon tatakut mate. Kanita mika planu kung saling artificial legs para kanaku, oneng ginastus ku na la pu reni para kaya. Oneng agyang nanu pu ing gewa ku, ikwa na rin pung mete. Inyang makaburul ya, ni minsan, e ke likuan. Makalukluk ku lele ning kabaung na uling tutu keng kaluguran. Ngeni kingua yu ne pu. Guinu, kasakit pu ing kasakitan a binie yu kanaku. Nung e da kayu pu akilala, e ku man pu aintindian ing kabaldugan ning egana-ganang milyari kanaku. Ikayu linasa kayu balat kareng kasalanan a e yu naman gewa. Tinggap yu ing kasakitan mibie kekayu. Saupan yu ku Guinu ban tanggapan ku naman ing meging kapalaran ku. E naku man pu milalako pamag-asa. Nung memagkasakit ku kayabe yu, balu ku, midinan kapakibatan ing egana-gana king kekong lugud ampon ganaka. Balu ku pu kayabe yu ne ing misis ku banwa at masaya ya ken. Ngeni pu atiu ku bale, gagawang miyayaliwang bage ban apisali ku. Gagawa kung key chains ampon miyayaliwang accessories bilang kapanintunan ku pu. Aku na mu pung dili ngeni. King lungkut ning denasan ku, e na ku man pu milalako pamag-asa kekayu Guinu. Ing kasakitan ku magbunga yang masanting para kanaku. Uling kalupa yu, e muli ing kasakitan ku king ala. Balu ku, mika bayu kung pamag-asa, kayabe king kapanatagan a lub ampon matatag a kasalpantayanan kekayu Guinu. King bayung bie ku ngeni Guinu, ikayu ing kayabe ku. Balu ku e yu ku lalakuan, e yu ku papaburen. Masaya ku ngeni uling agyang makananu, didenan yu ku pa pung pangabiayan Guinu. Salamat pu. E yu ku pu lalakuan. Amen.

V. Pamanahimik

VI. Tauling Panalangin
Ibpa, e ya tinakut ing Guinu ming Jesus king kasakitan a mibie keya nune tinggap na ini bilang paralan ban micabus ke ngan pu kareng kasalanan mi keka. Agyang ala yang kasalanan, tinggap nang malugud ing kaparusan a dapat mipunta kekami. Pauli na ning keyang pamananggap king kasakitan na king krus, leko na pu ing pangayalipin mi king kasalanan na iyang sangkan ning egana-ganang kasakitan keti ke yatu. Turuanan yu keng mabiasang tanggap king kasakitan ampon kapagsubukan a daratang king bie mi, ban kalupa ning kekong anak, mabiasa ming kalinguan ing sarili mi at apanikuanan mi ing bayung bieng pangaku na kareng talatuki ng mamuat krus. Pasiknangan yu kami Guinu potang daralan keng kasakitan. Nung e da kayu tutukyan king pamamuat yu king krus, e ke mibata Guinu. Salamat Guinu. Salamat. Amen.

Download here:

Page 1: http://www.mediafire.com/file/sdpx63y5rq2ex1r/08.28.11%20pg.%201.doc
Page 2: http://www.mediafire.com/file/8mwawfa7w2hb5c1/08.28.11%20pg.%202.doc

Kadwangpulu’t metung a Domingo ning Ordinaryung Panaun

Ing Pisiag nang Pedro tungkul kang Jesus

I. Pamuklat a Panalangin

Ibpa, dinan yu keng malalam a kebaluan king kekong anak a I Jesus. Dinan yu ke pu naman kasalpantayanan keya ban milako ing egana-ganang takut mi king bie. King kayang tune a pangatau ampon tune a panga-Dios, e ke malyaring milako pamag-asa, e ke malyaring malili, e ke malyaring magulu isip, uling iya ing binie yu kekami ban panaligan ampon pagtiwalan. King bieng dinake na kekami, midinan keng bieng alang-angga. Pauli na, tinggap yu kami bilang anak yu at tagapagmana mu naman king banwang pengaku ning Guinung Jesus kekaming talatuki na. Amen.


II. Pamamasa
Mt.16:13-20
13 Inyang miras ya I Jesus banda king balen na ning Cesarea Felipe, kitang na karing alagad na, “ Agpang king sasabian da ring tau, ninu ing Anak ning Tau?”
14 Mekibat la, “Sasabian da king ya I Juan a Maminyag; sasabian da ring aliwa king ya i Elias, at ating sasabing ya i Jeremias o metung ya karing propeta.”
15 O ikayu,” nganang kinutang karela, “ninu aku?”
16 Mekibat ya i Simon Pedro, “ Ika ing Cristo, ing Anak ning Dios a mabie.”
17 Nganang Jesus, “ Simon, anak nang Juan, mapalad ka! Uling ing sinabi mu e menibatan king tau, o nune kang Ibpa kung atyu banua; ya mismu ing pepabalu kaniti keka, ika i Pedro at babo na niting batu italakad ke ing iglesia ku. At e re sambutan ding pasbul ning impierno. 19 Ibie ku la keka ding susi na ning Kayarian ning Banua: nanuman ing e mu paintulut keti king yatu e munaman mipaintulut karin banua, at nanu man ing paintulut mu keti king yatu mipaintulut munaman Karin banua.” p
20 Kaybat na nita, penabilinan na lang maigpit ding alagad na king e ra paniabian kaninu man king ya ing Cristo.
III. Turu
Inyang sinikat ya ing mulawin, marakal la reng anak a bisang magmulawin mu naman. Pakamaskara lang mulawin, at neng kai, gawa la pang pakpak a kartun ba la mong makasulapo kalupa da reng mulawin. Inyang dinatang ya i batman ampon i spiderman, pakamaskara la naman batman ampon spiderman deng anak. Uling ala lang pakpak reni, akit mo reng anak, bitin-bitin la naman kalupa da ri batman ampon spiderman. Inyang sinikat ya i Darna, makanyan mu naman. Mamakmul la naman batu ampon panikuanan da naman sulapo ampon makitumbukan. Inya mu, anggang ngeni magtaka la pa reng anak nung makananu ya kanung makasulapo i Darna ngening atiu la king kanuan na reng pakpak na. Reng anak tutu, agyang e la man mo tutung tau rening alben da, paniwalan da la. At buri do pang pakiapusan ! Nung pangutnan yo ring anak karing pangatau da rening superheroes a reni, balu dong balu. At pota mong makipate la karing kakialung da, isip da ila ri mulawin, batman, spiderman o kaya i darna. Kasimpling kapaniwalan a dapat tamung pag-isipan!
King ebanghelyu ngeni, akit ta ya ing kekatamung Guinu a mangutang. Siguru uling malambat da neng akakit reng Hudyu ampon malambat na nong kautus reng apostoles na, buri nang abalu nung ustu ing pangakilala da keya. Buri na naman abalu kareng tau nung nanu ing panakit da keya at nung nanu ing kebaluan da tungkul keya. King pulayi ning storya ning ebanghelyu tamu, balamu, megkamali la reng aliwang tau king kebaluan da kaya uling bala da iya i Elias o Juan Bautista. E de a basa ing tutu nang pangatau. E de ikwa ing katutuan ning keyang panga-Dios. Inya siguru, uling ala ni metung kareng Hudyu ing mekabasa king tutu nang pangatau ampon panga-Dios, kitnan no ngeni reng taung malapit keya nung ninu iya. At balu tamu king i Pedro ing mekabasa king tune nang pangatau ning Guinu,na iya ing Kristo ( ing mepili, ing mesias, ing talapangabus ) at iya ing anak ning Dios ( na tutu ya king panga-Dios na! )
Masakit ta yang tukyan ing Guinu nung e ta ya balu pangatau. Magkasakit ta king kekatamung kasalpantayanan nung e malino kekatamu king I Jesus tutu yang tau, tutu yang Dios. Masakit ta yang luguran I Jesus nung e ta pa balu king iya ing kekatamung talapangabus a maganaka at kapatad a makiagum king nanu man kapalaran tamu king bie. Masakit ta yang pakiapusan ing Guinu, nung e taya balu pilubluban. (Neng kai, masanting mu naman pakiapusan ta la rening anak a binggit tamu nandin. Agyang e la tutu rening superheroes, kilala dong kilala nung ninu at nanu ing pangatau da rening superheroes da. At uli na pin kilala dong kilala, balu dong pakiapusan!)

Panikuanan ta yang akilala ing Guinu kareng amanu na, lalu na kareng ebanghelyung babasan tamu balang domingu. Kareng ebanghelyung babasan tamu neng domingu, akilala taya nung makananu ya misip ing Guinu, abalu ta ya ing pusu na, abalu taya ing kaburian na para kekatamu, a pigunaman ta ya ing ganaka, ing lunus, ing malasakit na kekatamu, lalu na kareng mamagkasakit, ma-uulila, malulungkut, milelele ampon pakakalulu. King bandang tauli, nung tutu ta neng kilala ing Guinu, akit tamu ing realidad ampon reng bageng makapadurut kekatamu kapamilatan da ring mata ng Kristo. (Ausan da ring BEC, a Optics of Christ) -potang ing panakit tamu kareng miyayaliwang bage keti yatu, kalupa nya naman king panakit ng Kristo. At potang ing disposisyun tamu kareng bage keti yatu, kalupa nya naman ning disposisyun ng Kristo, aintindian ta ne kanita ing pusu ng Kristo ( Ausan dang heart of Christ ).
Ing pangakilala tamu kang Kristo muli ya dapat king pamilupa tamu king Guinu king isip, amanu ampon dapat. E ya superhero ing Guinu, pero nung tutukyan ta la reng anak a pilit dong pakilupan reng idolo da, dapat mung pakilupan ta ya naman ing Guinu. Nung makananu ya I Kristo, makanita tamu naman sana king kekatamung pamibiebie. Ing apostol Pablo ngana kareng mumunang kristiyano: “ Aliwa na aku ing mabibie, ali, nune I Kristu na ing mabibie kanaku.” (It is no longer I that live, but Christ lives in me!)
Ing Guinu ya ing Kristo, ing anak ning Dios. Ustu mu king paubaya ta ya kaya ing egana-gana king bie tamu. Bayu tamu matudtud potang bengi, sabian ta kaya: “ Guinung Jesus, ika ing Kristo, ika ing anak ning Dios! Susuku ku ngan keka ing egana-gana king bie ku! Amen.”

IV. Pamigunam
“Ika Guinu ing Kristo! Ika ing Guinu ning bie ming mipapamilya!”. Karening amanu ke inumpisan ing bie ming mipapamilya Guinu inyang akilala da ka .
Kalulu ku mu Guinu. Atin kung asawa, atin kung metung a anak a babai, 8 years old. Makatuknang ke king dating rilis Divine Mercy. Mipayabe ku king BEC uling ating mag-BEC king sitio mi. Gagawan da ing cell da balang domingu king siping ming bale. Makanyan kong abalu reng BEC. Minsan a aldo, pintalan da ku reng mag-BEC uling a balitan da king masakit ya ing anak ku. Penalangin de ing anak ku. Oneng inyang ikit da king ing sakit ning anak ku grabi ya, sinaupan da kaming mantun saup ban apaulu mi ya ing anak ku. Mekapunta ke Menila ampon kareng miyayaliwang ospital king saup da. Oneng uling ikit dang atin yang cancer ing anak ku, memagkasakit kami king papaulu king anak. Ikwa ming pepa-chemotherapy mi ya ing anak. Kanitang panaun a ita, kikiyak kung kikiyak lalu na potang saingsing ne ing anak ku. E na rugu aintindian ing malilyari kaya. Mepayat ya. Mekalbu ya. Butul at balat niya mu. Oneng agyang makanyan man Guinu, e ku milako pamag-asa. King BEC abalu ku king ikamu kabud Guinu ing makasaup king problema ku, inya e ku milako pamag-asa. Idinaun ku ngan ing egana-gana keka Guinu lalu na ing kabilian mi. At uling e ku milako pamag-asa, pisali ku ne ing bale ku ban apaulu kya mu ing anak ku. E milako ing pamanyaup da ring abe ku kanaku. Inyang minsan, dinenan na neng taning ning metung a doctor ing anak ku. Sinabi na king isuku ku na ngan kekakyu ing kapalaran ning anak ku. Agyang meging antini ing sitwasyun, e ku pa mu rin kewalan pamag-asa Guinu king lugud yu. Tiki na ku minsan a aldo ning doktora mi king metung a healing mass king pisamban. Karin Guinu, pekirandaman mu ing kiyak ku keka.
Manibat kanita, me-ulu ya rugu ing anak ku a bala ku mate ne. King lugud yu Guinu, ngeni mayap ne ing anak ku. Metaba ne. Makaba ne buak at metung ya pa kareng biasa king klasi da. Nung e da ka akilala Guinu, makananu ku? Makananu ya ing pamilya ku nung e da kayu a balu? Nukarin da ku pulutan nung e da ko abalu? King bie ku, ika na ing tinuring kung Guinu, ika ing tinuring kung talapangabus ampon malapit kareng kekaming mamagkasakit king bie. Sinuku ku na ngan pu kekayu ing egana-gana king bie ku. Ngeni, agyang ala na keng sariling bale, masaya ke pu king pamilya. Kinayap ne ing anak ku pauli na pu ning saup yu kekami. E yu ke lalakuan Guinu. Ika tutu ing anak ning Dios, ing Guinu king pamibiebie mi. Amen.


V. Pamanahimik

VI. Tauling Panalangin
Ibpa, binie ye kekami ing Guinung JesuKristo. King keyang tutung pangatau ampon tutung panga-Dios, lalu mi yang akikilala ing tutung lupa yu. Saupan yu kami ban lalu mi yang akilala pa king bie mi ing Guinu ming JesuKristo ban lalu mi yang a luguran ampon a tukyan. Iya sana ing maging Guinu ning pamibibie mi. Abalu mi pu sanang asuku ing egana-gana king pamibiebie mi king kayang pangatau at panga-Dios. Lalu pu sanang maging makapit ing kekaming kasalpantayanan keya ban e ke magkasakit tutuki kaya king nanu mang kaorasan at panaun. Ika Guinung Jesus ing Kristo, ing tuneng anak ning Dios a mabibie at mag-ari mangga man king alang-angga. Amen.

VII. Kutang
1. Ninu I Jesus para keka?

Download here:

Page 1: http://www.mediafire.com/file/iq0jcdgk2lixiao/08.21.11%20pg.%201.doc
Page 2: http://www.mediafire.com/file/kea5h05uekke00v/08.21.11%20pg.%202.doc

Kadwangpulung Domingo ning Ordinaryung Panaun

Ing Kasalpantayanan na ning Metung a Babai

I. Pamuklat a Panalangin
Ibpa, salamat king binie yung kasalpantayanan kekami. Uli na ning kekaming kapaniwalan keka, balu mi king e mu ipagkaimut ing nanu mang mayap kekami. Pauli na niti, mamag-asa kami king bie mi, king ibie mu ngan ing nanu mang makakayap kekami. Pasiknangan yu kami Guinu potang milalako ke pamag-asa king bie. Potang magigipit kami, e yu ke lalako pamag-asa king kekang lugud at lingap. Ikayu Guinu ing mamantabe kekami. E yu ke pu papaburen. Amen.


II. Pamamasa
Mt.15:21-28
21 Likuan neng Jesus ing lugal a ita at minta ya king sakup da ring siudad na ning Tiro at Sidon. 22 Ing metung a babaing taga Canaan a manuknangan king lugal a ita linapit ya at nganang dinalung, “Makamal a Ginu, Anak nang David, malunus kayu pu kanaku! Alipnan ne ning demonyu ing anak kung babai; masakit yang tutu daralanan.”
23 Oneng e ne bitasang pekibatan Jesus. Linapit la ding alagad na at pekisabi ra, “ Palakuan yu ne. E na katamu patugutan tutukian at atne king kasigla!”
24 Kanita nganang mekibat Jesus “Mituburan ku bukud mung karing tupa nang melili ning balen Israel.”
25 Panandam na kaniti ning babai linapit ya at siniklaud king arap nang Jesus. “ Saupan yu na ku sa Ginu. “nganang mekisabing mayap.
26 Pekibat nang Jesus, “E mayap ing kuanan ing pamangan da ring anak at iyugse karing asu.”
27 “Tutu pin ita, Ginu,” nganang tinutul ning babai, “oneng makapangan no man ding asu agyang king mugmug a mangayugse king lamesa da ring karelang amu.”
28 Kanita nganang mekibat Jesus, “ Babae, karagul mu kasalpantayanan! Matupad ing kekang aduan.” Kanita mu rin kinayap ya ing anak na.

III. Turu
Ating mapilan kekatamu ampon kareng kilala tamu a mibili na king sitwasyun a alanganin ampon masakit. Pero ing masakit diling sitwasyun ya ing sitwasyun a nung nukarin ala ta nang akakit a solusyun o pakibat at ala ta nang lugar pang pigalon. Gipit ne ing metung a tau potang ati ne king sitwasyun a ini. Balu tamu ing sitwasyun ning taung magigipit. Marakal la reng taung milalako pamag-asa king bie uli na pin ning kagipitan Dakal kareni, e no maniwala man king atin pang makasaup king mabayat dang daranasan. Keng kekatamung komunidad, marakal no reng ditak-ditak a milalako pamag-asa king sitwasyun ning balen tamu. Inya marakal no reng magplanung mako king bansa. Marakal na la naman reng lulub keng e masanting a bage o kaya obrang e mayap, ban milako la keng kagipitan. Kuntoru sasakit ing kabilianan ning metung a tau, balamu lalabug ya naman ing akakit nang pamag-asa king bie. Ing masakit pa, mali ya ing kakalawatan da, ba dang panandaman ing pangalako da king kagipitan.

Ing ebanghelyu ta mu ngeni, tungkul ya keng metung a babaing magigipit. Atin yang anak a alipnan ne ning demonyu. At balu na king I Jesus mu ing maka-ulu kaniti. Oneng agyang balu neng binusni ing kapagnasan na king Guinu, balu na naman king ala ya pang karapatan king grasyang anyaran na king Guinu. Oneng ikit tamu king e ya milako pamag-asa inyang e ne buring uluan ning Guinu ing anak na. King kakapilit na king Guinu a bunga ning katatagan na ning keyang kapaniwalan king Guinu at ning keyang kababan, ikwa na murin ing anyaran na king Guinu. Apabilib ne ing Guinu uling king keyang matatag a kasalpantayanan at kababan.

Malino ya ing mensahi na ning ebanghelyu kekatamu: King oras ning kagipitan, e ta dapat kawawalan pamag-asa. Ing tutung kasalpantayan mamunga yang kapagpursigyan, kababan ampon pamag-asa. Itamung talatuki ning Guinu, e tamu milalako pamag-asa lalu na potang

masakit na ing kabilian tamu. Uling ing kekatamung pamag-asa ( hope ) manibatan ya king kasalpantayanan tamu ( faith ). Nung tutu tayang paniwalan ing Guinu, e tamu dapat kawawalan pamag-asa. Nung tutu tayang kilala ing Guinu, e tamu dapat milalako agyang kapilan man pamag-asa. Nung maniwala tamu king ing Dios mayupaya ya, at alang imposibli kaya, e tamu dapat isipan king ing Dios e na adinan solusyun o kapakibatan ing kekatamung kagipitan agyang makananu ya pa kasakit. Nung matatag ya ing kasalpantayanan ta king Guinu, matatag ya naman dapat ing kapaniwalan tamu king kaluguran na ka tamu.

Reng taung e milalako pamag-asa, atin lang saya a sisinup king pusu ra. Ing saya a ini manibatan ya king kebaluan da na mipakibatan la king anyaran da king Guinu uling kilala de ing Guinung paniwalan da. Siguru e de akwa ing anyaran da ngeni, o bukas, oneng balu da, king karelang pusu, king mipakibatan la king karelang pamangailangan king kaorasan a buri na ning Guinu. Inya balu mong balu reng taung mitmung pamag-asa king bie ra. Masaya lang masaya agyang ala pa ing pakibat kareng pangadi ra. Balu da, makibat ya ing Guinu king oras a kalugudlugud. E la mabibigu reng ating pamag-asa king Guinu. E masasayang ing karelang kapanenayan at ing karelang kapagpasensyahan. E la magugulu isip, e la mababalisa uling balu da makibat at makibat ya ing Guinu king ustung panaun. Inya e tamu sasawang manalangin king Guinu lalu na nung magigipit ta na. Iyampang ta la ngan keya reng kapagnasan tamu, lalu na potang atiu ta king kagipitan at potang ala ta nang ayayaninag a nanu pa mang pamag-asa king bie. Alang imposibli keng Guinu. King gamat na atiu ya ing kapalaran na ning yatu at ning bie tamu. Manalig tamu at anyaran tamu ing kailangan tamu kaya a alang takut at kapikakunuan.

IV. Pamigunam
Labing adwa ku anak Guinu. Ing asawa ku karpinteru ya. Aku, ati ku mu bale. Masakit ing bie Guinu, masakit. Neng minsan atin yang obra ing asawa ku. Oneng mas marakal ing ala yang obra. Potang ala yang obra, umpisan ku nong puntalan reng kayabe ku ban saupan da ku. Agyang makapakananu, atin no man a bibie kanaku agyang ditak. Uling abe ku king BEC, e na ku maririneng mumunta karing kayabe ming atinan. Potang lungub na ku king gate da, at potang akit da na ku, e da na ku pangutnan nung nanu ing buri ku uling balu da potang tinuklu na ku king gabun da, metung ya ing buri na sabian nita: ala na kung pera. At king lugud ning Dios, rening abe ku king BEC a atinan, e no man tutuknang susuporta kanaku lalu na potang ala na ku talagang pera. Kalugud yu Guinu! Tutung e mu ke papaburen. Metung ya rugu ing kanakung panalangin Guinu, na sana, atin mu sang metung karening anak ku ing makayari king pamagaral. Iya na Guinu ing anyaran ku, uling balu ku nung ating mayari karela, agyang metung mu, milako ke kening kabilianan ming iti. Malaut ampon masakit ya yata ing kanakung pangarapan Guinu. Oneng keka alang imposibli. E na ku man siguru maninap nung ing kanakung pamag-asa matupad ya uling balu ku malugud ka Guinu at sasaupan yo reng taung atiu king masakit a kabilianan. Agyang mamagkasakit ku ngeni Guinu, masaya kung sisinup king pusu ku ing pamag-asa kung mayari ya ing metung kareng anak ku. Pauli na ning kapanaligan ku keka Guinu,

balu ku e ku mabigu. Mibie at mibie ya kanaku ing anyaran ku keka king panaun a kaburian mu. Ika Guinu ing sangkan ning kanakung pamag-asa. Agyang mamagkasakit ku ngeni, datang ing panaun, uli na ning lugud yu, mika kaganapan ing paninap kung ating mayari karening anak ku. Keka O Guinu ing pamag-asa kung e mabibigu. Amen.

V. Pamanahimik

VI. Tauling Panalangin
Ibpa, nukarin ke pa munta neng magigipit kami? Nu ke pa mulayi neng ala na keng akit a kapakibatan kareng kekaming kasakitan? Ika mu Ibpa ing pamag-asa ning balang tau. King binie mung kasalpantayanan kekami, dininan yu kaming pamag-asang e mamamate. Uling kilala da kayu Guinu, balu ming e yu paburen mate la reng pangarap mi, ampon ing kapagnasan mi king pamibiebieng mayap ampon ating katahimikan. Antabayanan yu kami Guinu potang milalako ke pamag-asa. Potang dadalumdum na ing kekaming akakit, potang ala na keng ayayaninag a nanu mang mayap king bie mi, saupan yu kami Guinu. Amen

VII. Kutang
1. Nanu pa ing anyaran ku king Guinu a manenaya ku pang ibie na kanaku?

Download here:
Page 1: http://www.mediafire.com/file/cmurn3cajmppnfk/08.14.11%20pg.%201.doc

Page 2: http://www.mediafire.com/file/7bi7att7ag2h0ut/08.14.11%20pg.%202.doc

Kalabingsiyam a Domingo ning Ordinaryung Panaun

Linakad Ya i Jesus Babo ning Danum

I. Pamuklat a Panalangin
Ibpa, ika ing kayabe mi king nanu man panaun. Neng dadalan ya ing bagyu king bie mi, at neng makapadurut kami karing bageng makaibie takut kekami, pasiknangan yu la pu reng lub mi. Pabusten yung lumapit ke kekayu agyang atiu kami king libutad da ring alun a mangaragul ampon mangakatas. Iatiat ye pu ing gamat yu kekami neng mangailangan keng saup. Sagipan yu kami neng mimina ke pu lub. Salamat Guinu, Salamat. Amen.


II. Pamamasa

Mt.14:22-33
22 Kaybat na nita, agad na lang pepasaken Jesus king bangka ding alagad na. Pepaunan na na lang dinalakit king kangatba nang pampang ning dagat-dagatan kabang paulian na la ding tau. 23 Inyang apaulian na na la ding tau, minukiat yang magdili-dili king metung a bunduk-bundukan ban manalangin. Miras ing bengi. Magdili-dili ya karin i Jesus. 24¬ Ketang oras a ita malibutad ne ing bangka king dagat-dagatan. Sapul-sapulan ne ning alun, uling makasalungat ya king tiup na ning angin.
25 Pilatan na ning alas tres ila ning alas sais ning abak pintalan na lang Jesus ding alagad na, lalakad ya babo ning danum. 26 Inyang ikit deng lalakad babo na ning danum, mengilabut la king takut. “Multu ya!” ngarang sinabi at kinulisak la king takut da.
27 Agad-agad yang minaus karela i Jesus . Ngana, “ E kayu tatakut! Aku i Jesus!”
28 Kanita, anang kinulait Pedro, “Ginu, nung ika pin, iyutus mung munta ku keka babo na ning danum!”
29 “Mekeni!” nganang mekibat Jesus. Inya kinuldas ya i Pedro king bangka at megumpisa yang linakad babo ning danum papunta kang Jesus. 30 Inyang ikit na ing masikan a tiup na ning angin, tiblan ne ning takut at megumpisa yang limbug. Nganang kinulisak, “Ginu, sagipan mu ku!”
31 Agad-agad neng inabut Jesus ing gamat na; telan ne i Pedro at ngana, “Abe, karitak mu kasalpantayanan! Obat mikakunu ka?”
32 Parehu lang sinampa king bangka at kasampa ra tinuknang tutiup ing angin. 33 Simban de i Jesus ding alagad a makasake king bangka at ngara, “ Tutu pin, ika ing Anak ning Dios!”

III. Turu

Marakal no ring daramdaman tamung tau a sasabi:”Manibat inyang melapit ku king Guinu, ot balamu, lalung mesakit ing bie ku? Ot balamu mas marakal a daratang a kapagsubukan manibat inyang megpumilit kung lumapit kaya?” Balamu oini ing karanasan da ring kerakalan kareng taung migbayu bie inyang asumpungan de ing Guinu. Masaya la keng karelang bayung pamibiebie, oneng oyta pin, mas marakal la kanu kapagsubukan king bie a ala naman inyang e de pa masyadung kilala ing Guinu. Ya ing karanasan da reng marakal kekatamung tutung susuyu king Guinu. Tutu ya ini o ali? Marakal la reng sasabing tutu ini

Kukwentu na ning ebanghelyu ing metung a makapagmulalang milyari kareng apostoles inyang atiu la king dagat-dagatan. Malakas ya ing tiup ning angin, mamalun ya ing dagat, galo-galo ya ing bangka nung nu la makasake, madalumdum at makatakut ing sitwasyun. Kabira-bira, akit de i Jesus, lalakad king dagat. Ing metung karela, i Pedru, megpumilit yang lapitan ne i Jesus at inyad nang lumakad ya king dagat papunta keya. Oneng kabang maglakad ya king danum papunta kang Jesus, ditak-ditak lalbug ya. Segip nyang Jesus inyang meg-panic ya.


E mo makanyan mu naman ing bie tamu, itamung bisang lumapit king Guinu? Masaya tayang akakit ing Guinu. Buri tayang lapitan. Kalupa nang Pedru, magpumilit tamung lapitan ta ya ing Guinu ban panandaman tamu ing saya ning lalakad mu naman king babo ning danum. Oneng obat kabang lalapit tamu keya, ot balamu, ditak-ditak lalbug tamu? Obat balamu, imbes na sasaya tamung lalapit kaya, balamu yata, malulunud tamu? E mo makanyan ing kutang tamu king sarili tamu nandin? Obat kabang lalapit ta king Guinu, lalu yatang pasakit nang pasakit ing kabilian tamu? Metung ya ing pakibat ning Guinu kekatamu, potang akakit nang lalbug tamu kabang lalapit tamu keya: “Abe, karitak mu kasalpantayanan? Obat mikakunu ka?” (v. 31)

Masyadu tamung malagwang tatakut king tiup ning angin, king lakas ding alun, king dalumdum ning bengi ampon king danum a makalunud Masyadu ing takut tamu kareng problemang makapadurut kekatamu, karing alingasngas a daramdaman tamu, karing kasakitan ampon pabayat a panandaman tamu king pamibiebie tamu. Ala tang kompyansa king Guinu. Maritak ing kekatamung kasalpantayanan at kapanaligan keya. Inya, e tamu magtaka obat asasabi tamung lalu tang mamagkasakit king bie kabang lalapit ta king Guinu. Nung maritak ing kasalpantayanan ta keya, danasan tamu ing denasan na naman Pedro. Ditak-ditak lalbug tamu agyang lalapit tamu rugu king Guinu.

E ta na magduda. Ing kasalpantayanan tamu king Guinu, metung ne kareng bage king yatung na ala na dapat lugar king nanu pa mang pamagduda. Ing kasalpantayanan tamu keya metung yang batung matatag. E ta mabigu king kekatamung kasalpantayanan king Guinu. Nung matatag ya ing kasalpantayanan ta keya, agyang nanu pang bagyu, agyang makananu ya pa kalakas ing angin, agyang sirku-sirku ya pa ing bangka tamu king bie, ing bie tamu king Guinu, magawa yang bieng matatag ampon masaya, alang nanu man ing makayanig keni. At potang tutung angga na king batal tamu ing danum a makapadurut kekatamu, e ta kailangan migaganaka, uling iatiat niya mu rin ning Guinu ing gamat na kekatamu ban iligtas na katamu king nanu man kapahamakan king bie. Manalig tamu keya. E ta milalako kasalpantayanan king Guinu agyang makapadurut tamu kareng miyayaliwang problema king bie.

IV. Pamigunam

Magdili-dili na ku king bie Guinu. Misane na kung magdili-dili king bie ku. Malambat na nakung likwan ning asawa ku. E ku mika anak a kinabie. Makatatlu ya me-caesarian ing misis ku, oneng ala ni metung Guinu ing kinabie karela. Inya oini, aku nang dili keng bale. Matua na ku Guinu. Malambat na kung mag-BEC Guinu. Manibat inyang meg-BEC ku, mika komunidad kung malati. Mika kayabe kung makiramdam karing istorya kung malungkut. Oneng kabang daramdaman ku la reng istorya da ring abe ku king cell ku, e na
ku man pala aliwa karela. Ila, agyang e la magdili-dili, panandaman da naman pala ing lungkut. Mangulila la naman pala king lugud ampon ganaka king bie da. E da naman pala akakit ini kareng kayabe da. Lalu da kang akilala Guinu king BEC. Uli na pin niti, lalu kung melapit keka. Ngeni agyang magdili-dili ku bale, balu ku kayabe da ka. Ika ing mamie atensyun kareng milelele. Ika ing mamie ganaka at lunus kareng makakalinguan ampon mangulila kalupa ku. Inya kilub ning pusu ku, masaya ku Guinu. Ika ing meging saya ku uling tutung mamantabe ka kanaku. Ala na kung balung puntalan potang panandaman ku ing lungkut Guinu. Ikamu kabud ing saya ku.
Oneng tutwa na ku Guinu. Ditak-ditak, panandaman ku ing sakit ning bie a alang kayabe. E na ku masikan. Agyang bisa na kung painawa, e ku maka painawa uling kailangan kung magobra. Babagal na ku kilus at uli na nita, e no masyadung matula reng kapagobra ku king gagawan ku. Makananu ku rugu Guinu? Obat balamu pin, nung kapilan ku pa milapit keka, ngeni ku pa mamagkasakit? Oneng Guinu, ing ebanghelyu mu ngeni iyang magpalakas kanaku. E ku dapat milalako kapanaligan king ganaka at lugud mu kanaku king bie ku, agyang makapadurut ku karing miyayaliwang bage a mamie kasakitan kanaku. Ika mu tutu Guinu ing kakung sandalan. Ala ng aliwa pa. Keka ku manalig, Keka ku mamag-asa at balu ku e mu ku paburen. At nung malunud ku man karing pabayat ning bie, balu ku Guinu, sagipan mu ku. Reng magtiwala keka Guinu e la mabibigu. Akit de ing upaya mu king bie da ngeni ampon kapilan man. Amen.

V. Pamanahimik

VI. Tauling Panalangin

Ibpa, patawaran yu kami king pamagduda mi kekayu. Neng makapadurut kami kareng bageng makabayat king bie mi, milalako ke kapanaligan keka. Pauli niti, lalu keng sasakit bili king pamibiebie mi. Pasiknangan mu Guinu ing kekaming kasalpantayanan ban kanita agyang nanu pang bagyu ing dumalan king bie mi, e ke milalako katatagan king kekaming kasalpantayanan king Guinu ming Jesus. Sagipan mu kami Guinu neng malulumud ke karing makapadurut kekami. Ika Guinu ing kekaming katatagan. Ika ing Guinung mayupaya a panaligan mi. Amen.

VII. Kutang
1.Tutu mong mas marakal ngeni ing kapagsubukan ku king bie ngening mas melapit ku king Guinu?

Download here:

Page 1: http://www.mediafire.com/file/pdxq2twdclde3ts/08.07.11%20pg.%201.doc
Page 2: http://www.mediafire.com/file/vt3uts7lsl72t5s/08.07.11%20pg.%202.doc