Katlungpulu’t metung Domingo ning Ordinaryung Panaun

Ing Babala Laban karing Talaturu ning Kautusan at Pariseo

I. Pamuklat a Panalangin
Ibpa, e yu pelampasan ing ugaling mapanabusu ampon palalu. Kekaming menabusu king upayang binie yu kekami, patawad Guinu, patawad. Ikayu ing tutung talaturu. Ing amanu yu , ya naman ing daraptan yu. Patawaran yu kami, ikeng malakas lub manaral oneng magkulangan king

II. Pamamasa

Mt.23:1-12

1 Kaybat na nita, inarapan na lang Jesus ding dakal a tau ampon ding alagad na at ngana karela, 2 “ding talaturu ning Kautusan at Pariseo ila ding mirinan upaya ban palino king Kautusan nang Moises. s 3 Inya pamintuan yu at tukian ing nanumang yuyutus da kekayu, oneng e yu la pakiapusan king daraptan da, uling e ra tutuparan ing ipanaral da. 4¬ Manaptas lang mangabayat a karag at papusan da karing tau, kabang ila naman agyang metung mu man karing taliri da e re kikimut ban saupan da lang magkarga kareti. 5 Pakitang-tau mu ing sablang dapat da. Alben yu nun gnu la pangalapad ding ka relang pilakteria t at pakakabakaba da la borlas ding karelang balabal. 6 Maburi lang tutung lulukluk karing kabisera neng makipamiesta la at karing piling luklukan karing sinagoga; 7 tutu rang buri ing pupugayan da la karing palengki at ausan da lang ‘Maestro.’ 8 Oneng ikayu e kayu payaus’Maestro,’ uling mikakapatad kayu ngan at metung kayu mu Maestro. 9 E ye ausan ‘Tata’ ing ninuman keti king yatu, anti na ning atin kayung metung mung Tata a atyu banua 1 0 ini e kayu payaus ‘Talaturu,’ uling atin kayung metung mung Talaturu at ya ing Cristo. 11 Ing pekamaragul kekayu ya ing maging talasuyu 12 Mibaba ya ing ninumang mitatas king sarili na, at mitas ya ing ninumang mibababa king sarili na.

III. Turu

Pota mong keng pamilya mipapate lang mipapate ri ima ampon tatang, at kaybat da mong mipate, pangaralan do reng anak da at turu da karela king dapat lang mipapanupaya king bawat metung at dapat lang mikakalugud, atin kayang bisa ing panaral a ita? O nu mong ing metung a pulis, akakit meng mangotung kareng magtinda king palengke, at kaybat nong kuanan reng kotung na karening street vendors king palengke lumakad ya king kotsi da reng pulis a manenaya king lual, at karin king kotsi da ring pulis makatatak ya ing motto da ring kapulisan a nganang makasulat: “ Serbisyo at Integridad”, kapanipaniwala ya pa kaya ing motto da? Makananu de kayang aintindian ding anak ing metung a teacher king skwela da potang mimimwa ya ing teacher karela potang e la magaral lisyun, ngening ala neng guewa ining teacher da nung e magtindang miyayaliwang bage imbes na turu ya karela? Makananu pin naman? Makananu mu ne man aintindian ing panga-Kristianu na ning metung a magsilbi king pisamban, nung angga ngeni e no pa apapatawad reng mismung kapatad na a mikasala keya? Makananu pin ini?

Ikit nang Jesus ing sitwasyun a ini. King ebanghelyu, e na pelampasan Jesus ing mwa na kareng taung atiu king pusisyun a manaral king metung a bage, oneng aliwa naman ing daraptan da. Pauli na ning “makasalampak” a panugaling ini, a nung nukarin mikakawani ya ing sasabian king gagawan, marakal la reng taung malilitu, malilili ampon mibabayatnan lalu na karetang manalig karening klasing taung a reni. Inya e ya masanting pamanamanu ing Guinu inyang ikit na ing panugaling aini kareng pamuntuk da reng balen, kareng manimunu karela inyang panaun nang Jesus. Ing sinabi nang Jesus kareng tau nung makananu lang maki-utus kareni, mabayat yang bagya: “Pakiramdaman yu la pero e yo pakiapusan”. Karening klasing tau a reni, ustu na ing pakiramdaman ta la mu, oneng e ta la dapat pakiapusan. Oini na siguro ing pekamabayat nang sinabing Jesus kareng taung aliwa ing amanu da kareng amanuan da.

Mayapa I Jesus, buri na pa king pakiramdaman ta la pa reng tau a reni. Oneng ing problema king kapanaunan a iti, reng tau, e no makiramdam man kareng taung reni. Ma respetu la pa siguru reng tau, ampon pakisabian do pa, oneng e da no pakiramdaman, agyang masanting pa ing panyabian da.

E tamu isipan king sasabian na ning Guinu ini kareng Pariseu inyang kapanaunan na mu. Ya mu naman ing buri nang sabian kekatamu. Iya mu naman ing babala na kekatamung tatalan a responsibilidad kareng amanung sasabian tamu ampon kareng dapat a gagawan tamu. Maging sumbagal ampon pabayat tamu kareng aliwang tau. Maging mabayat ya lub ing Guinu kekatamu potang makaniti tamu pamanugali. Ing kabanalan a panaral tamu iya dapat ing mismung panikuanan tamung kabanalan king pamibiebie tamu. E malagwa ini, oneng buri na sabian kareng kekatamung atiu king lugar a manaral o mamuntukan, reng sasabian tamu kareng tau, dagpa la pa sana kekatamu bayu karela. Nung digpa ya pamu ing amanung buri tang panaral kareng sarili tamu, ing mumunang magbayu dapat itamu, aliwa reng aliwang tau pamu. Ing mumunang mi-apektuan karing panaral tamu dapat, itamung manaral, itamung atiu king pusisyun. At akit tamu, nung tutung dagpa ya pa ing panaral tamu king sarili tamung pusu, akit tamu king maragul ing kekatamung kakulangan, at itamu naman mangailangan tamung kapatawaran karing maragul tamung kakulangan. Nung makaniti ta ya akakit ing responsibilidad ning metung a pamuntuk, iya dapat ing mumunang mika kababan, uling iya dapat ing mumunang magbayu.

E tamu karapat dapat mamuntukan nung ala tamung kababan. Potang daragul ne ing buntuk tamu uling atin tamung tatalnan a upaya, milalako tamu karapatan ban mamuntukan king nanu mang bage. Milalako na ing “witnessing” tamu kareng panaral a buri tamung ipabalu kareng sasakupan tamu. Kalupa ning sinabi tamu nandin, keng kapanaunan tamu, e no makiramdaman man reng tau lalu na nung puru mung kayabangnan ampon ka plastikan ing papakit tamu. Reng tau ngeni pakiramdaman da na la mu reng tutung “saksi”, o kareng taung tutung mag-witness karing sasabian da. Kening bageng iti, tutung marakal tamu kakulangan, inya, ala tamung sangkan obat kailangan dagul ta buntuk, agyampang marakal no reng agawa tamung kayapan kareng aliwang tau.

Panalangin ta king Guinu, king sana, e da ka tamu mu pakiramdaman deng ninumang taung kautus tamu, nune pakiapusan da naman sa ing nanumang “witnessing” a akit da king pamibiebie tamu. E la sana kabayatnan reng tau kekatamu, nune, mika kanauan la potang maging kautus da ka tamu.

IV. Pamigunam

Atiu king kultura tamu ing amanuan dang “connections” o koneksyun. Anti ta na mong malakas o ma-upaya potang atin tamung kilala “babo” arapin. Balu ta no mang gagamitan reni potang atin tamung kailangan. Ing sablang e malyari, malilyari potang mandar no reng “connections” tamu. Agyang “nobody” tamu king komunidad, maging “somebody” tamu pauli da rening connections a reni. Inya naman kanita ne maloloku ing systema tamu. Pauli da pin rening connections a reni, masisira ing disiplina tamu. “ Hanggat makakalusot, lulusot” arapin.

Oneng isipan ta ya I Maria. Karagul a connection iyan king babo! Indu ne ning Dios! Aroy, ala na sigurung connection king babu ing migit pa kaniti. Oneng agyang atin yang connection I Maria, e ne pegmaragul ini. E na inabusu ini. Nung itamu sigurung mika connection kalupa nang Maria, karakal a abusu siguru ing malyari! Pangalandakan tamu kareng aliwang tau, king kilala ta ya ing Dios, at kailangan mung tukyan da ing sasabian tamu karela. Anti ta na mong Pariseu potang makanyan tamu pamanugali.

Oneng ikit tamu kang Maria ing kababan. Tutu, maragul ya connection king Guinu, oneng ala tamung abusung ikit king pamibiebie na. E ya menabusung upaya, e ya megmaragul, e ya megmatas lub. E ya meging pabayat kareng kautus na, nune meging kalugudlugud ya kareng kayabe na king Nazaret. Anyaran tamu ing grasyang maging mababa tamu potang kautus ta la reng tau. E ta sana daragul buntuk pota mimigit tamu kareng aliwang tau.

V. Pamanahimik

VI. Tauling Panalangin

Ibpa, agyang mitmu kong upaya, e yu peparamdam kekami ing upaya yung alang angga nune ing kababan yu lub. Patawaran yu ke pu potang daragul ke buntuk. Potang maging pabayat kami kareng kapara ming tau. Potang reng amanu mi aliwa ilang amanuan mi, potang manaral kaming bageng e mi naman mismung gagawan. Patawad Guinu. Dinan yu ke pung kababan lub ban ikami mismu ing manakit kareng sarili ming kakulangan. Mabiasa ke pu sanang sumuyu kareng kayabe mi, lalu na kareng tutung mangailangan ampon pakakalulu. Ini aduan mi kapamilatan ning Guinu ming Jesus. Amen.

Download here:
Page 1: http://www.mediafire.com/file/7v6o2gcn847dzdj/10.30.11%20pg.%202.doc
Page 2: http://www.mediafire.com/file/7v6o2gcn847dzdj/10.30.11%20pg.%202.doc

Katlungpulung Domingo ning Ordinaryung Panaun

Ing Maragul Diling Kautusan

I. Pamuklat a Panalangin Ibpa, liguran yu ke king mabilug yung panga Dios. Ngeni, anyaran yu kekami, king luguran da kayu king mabilug ming pangatau. King bageng iti Guinu, mamagkasakit kami uling mamagkasakit kaming luguran da kayu king mabilug ming pusu, isip, lakas ampon pangatau. Pira-pirasu ne ing pusu mi Guinu, inya magkasakit da kayung luluguran. Dinan yu keng pasibayung pusung lulugud kekayu a alang pasubali ban aibie mi kekayu ing kapanyamban a e mi abie kaninuman o king nanu pa man bage. Kaluguran da kayu Guinu. Saupan yu ke pung maging tapat kekayu kalupa ning katapatan yu kekami. Salamat pu Guinu. Salamat. Amen.

II. Pamamasa

Mt.22:34-40

34 Mitipun la ngan ding Pariseo inyang abalitan da nung makananu na lang apatahimikan Jesus ding Saduseo. 35 ¬¬ At mengutang ya kang Jesus ing metung karela a talaturu ning Kautusan ban neng subukan. 36 ¬Ngana, “ Maestro, isanu ing maragul diling utus king Kautusan?” 37 Pekibat nang Jesus, “Luguran me ing Ginung kekang Dios king mabilug mung pusu, king mabilug mung kaladua, at king mabilug mung kaisipan.’ 38 Yan ing maragul diling utus. 39 Kalupa nia naman niti ing kadua: ‘Luguran me ing kalupa mung tau antimo ing sarili mu.’ 40 Kareting aduang kautusan karin ya makatalakad ing mabilug a Kautusan at ing turu da ring propeta.”

III. Turu

Balu tamu nung nanu la reng jueteng, lotto o sweepstakes. Sugal la reni. Ban kanita makapamyalung ka karening klasing sugal a reni, kailangan pamu taya ka. Nung e ka taya, ala kang chance manyambut. Nung taya ka agyang ditak mung alaga, agyang makapakananu, manyambut ka nung ing numerung teya mu lumual ya. Kuntoru marakal ka tataya, mas daragul ya ing panyambutan mu nung sakaling lumual ya ing numerung teya mu. Ing tataya tamu dipende ya kekatamu. Reng aliwa, potang atin la mong apaninap a numeru, taya lang maragul bagya ketang numerung apaninapan da uling king paniwala da, mas makasiguradu lang manyambut kanu ustung reng apapaninap dang numeru ila reng tataya da. Potang panandaman tamung makasiguradu tamu king metung a bage, mas maragul ing tataya tamu. Ngeni, o nu mong midinan kang swerti king bie, at akilala me ing papalakad king jueteng keti Pampanga, at meging matalik meng kaluguran. At uling buri na kang saupan rugu, sinitsit ne keka ing numerung lumual king tutuking bola. (Balu ta naman king a mamaniobran do reng lulual a numeru ) Ginarantian na ka king lumual ya ing numerung sinitsit na keka. Sinabi na keka king taya kamu sana, at siguradung manyambut ka. Taya ka kaya? At nung taya ka, magkanu mo ing itaya mu? Nung makanyan ka kasiguradung lumual ya ing numerung sinabi ning papalakad king jueteng, makasadya ka kayang itaya mu ngan ing egana-ganang pibandian mo? Tutal, siguradu na ka man lumual ya ing numerung ita, makasadya ka kayang itaya mu ngan ing egana-ganang pera ampon pibandian mo, ban apanikuanan me ing pekamaragul a premyung agyu nang akwa ning alaga ning pibandian mo? E na ka man siguru tayang ditak mu ne, uling maragul a kasayangnan nung balu mung lumual ya ing numerung ini, kaybat as nya karitak ing teya mu! Inya ing kutang, nung makanyan ka kasiguradu, taya mu ngan kaya ing egana-ganang pera mo at pibandian mo? Nung ing pakibat mu ali, ot mo tatakut kang taya mu ngan ing egana-gana, ngening, makasiguradu na kamang manyambut? King ebanghelyu tamu ngeni, buri na ning Guinu, king itaya ta ya ing mabilug tamung bie, pusu, kaladwa, ampon sikanan keya. Ala tamu kanu dapat lelele para kareng aliwa pang bage. Buri na itaya ta ya ngan ing mabilug tamung pangatau kaya. Luguran ta ya kanu king mabilug tamung pusu, isip, kaladwa at sikanan. Makasadya ta ya kayang itaya ing mabilug tamung lugud king Guinu? Makasadya tamu kaya? Nung e tamu makasadya, bakit mo? Atin ta pa kayang aliwang dapat a luguran king mabilug tamung pangatau bukud keya? Oneng ing Dios na mismu ing sasabi kekatamu king ing paralan king tutung tagumpe king bie yapin ya ini: “ Luguran me ing Ginung kekang Dios king mabilug mung pusu, king mabilug mung kaladua, at king mabilug kaisipan.” Ala nang mas migit pa king sayang panandaman tamu, king sayang bunga ning lugud tamu king Dios. Potang mebiasa ta nang dinaun ngan keya ing egana-gana, mabiasa tamu naman magtiwala ampon mamag-asa kareng pangaku na. Panandaman tamu ing katahimikan king bie tamu, agyang magugulu ya pa ing makapadurut kekatamu. Panandaman tamu ing upaya ning lugud na kapamilatan ning direksyun a bibie na karing pamibiebie tamu agyampang atiu tamu libutad ning marakal a kapagsubukan. Oneng kalupa ning storya a mebanggit nandin tungkul king jueteng, e tamu pa makasadyang itaya taya ngan ing egana-gana para king metung a bageng atin ta nang kasiguraduan. Marakal tamu tutung pasubali. Agkatan na ka tamu ning Guinu, king luguran taya a alang pasubali. E tamu dapat mitatakutan o mababalisa nung anyaran na ning Guinu ing mabilug tamung pangatau. Uling ing Dios ya mu ing karapatdapat king mabilug tamung lugud at pamibiebie. Inya pin keya mu kabud bibie ing kapanyamban a e tamu bibie kaninuman o king nanu pa mang bage. Itaya ta ne ing mabilug tamung pangatau king Dios. Siguradu ya ini. Ala tang kasambut nung ini ing gawan tamu. Ing Dios na mismu iyang gagarantiya keni. Karagul a kasayangnan nung barya barya mu rugu ing taya tamu king Dios. Oneng nung teya ta ya ing mabilug tamung pangatau, siguradu mung manyambut tamung kayamanan a alang sukad at alang kayangganan.

IV. Pamigunam

Sinugal ya naman I Maria. E king paralan a pera o nanuman bage nune king panga indu na king Dios. Sinugal yang maragul. Teya ne ing mabilug nang pamibiebie, ing egana-ganang reputasyun na teya ne. Akit ta ya ini inyang kitang na king Anghel Gabriel: “ Makananu kung kagli, ngening ala ku pang karelasyun a tau?” At balu tamu, kalupa ning sinabi ning Anghel Gabriel keya, kinagli ya I Maria kapamilatan ning Espiritu Santo at e kapamilatan ning relasyun na king metung a tau a anti na mong asawa. Mebuktut ya agyang ala ya pang asawa. E maragul a kamarinayan ini? Nung ikayu ing atiu king sitwasyun a ini, mabisa ko kayang abalu da reng taung mika relasyun ka at mebuktut ka bayu ka pa kinasal? Karagul a sugal a ini kang Maria. Oneng uling kaluguran neng Maria ing Dios, teya na ing mabilug nang pangatau keya. Sinuku na na king Dios ing egana-gana ban mipatupad mu ing kaburian ning Dios para keya ampon para kekatamu. Para kang Maria, reng amanu ning Dios atin lang kasiguraduan. Alang nanu man o ninuman ing malyaring salangsang kareng amanung iti. Inya a itaya taya ing bie tamu karing amanung sasabian ning Guinu kekatamu. Kalupa nang Maria, alang kamarinayan o nanu mang kapikakunuan ing dapat maging sumbagal king pangatupad karing kaburian ning Guinu. E tamu malyaring magkamali nung mibie ya king Dios ing mabilug tamung pangatau, uling keya mu dapat mibie ing mabilug tamung kapanyamban at lugud.

V. Pamanahimik

VI. Tauling Panalangin

Ibpa, nanu ing atiu kekami a e menibatan kekayu? Ing egana-ganang pangatau mi, ing egana-ganang pibandian ampon kayatinan mi, ibat ngan kekayu. Ot mo e mi la buring ibalik kekayu reni potang anyaran yo kekami? Turuanan yu kami ban luguran da kayu king mabilug ming pangatau, at ibie kekayu ing tutu ampon ganap a kapanyamban a e mi dapat ibie kaninuman o king nanu mang bage. Akit mi pu sana ing tutung saya potang tutu mi nang sinuku kekayu ing mabilug ming pangatau. Kapamilatan ning indung Maria, saupan yu ke pung manalig king kekong ganaka ampon mamag-asa kareng pangaku yu kekaming manatiling tapat king kekong kautusan. Lako yu pu ing pangapisi ning pusu mi uling maralas, e da kayu luluguran king mabilug ming pusu at kaladua. Saupan yu ke pu Guinu king kekeng keinan. Antabayanan yu kami ban mabiasa kaming tutung ibie ing kapanyamban a dapat mung ibie kekayu. Amen.

VII. Kutang

1. Asabi ku kaya ngeni king Guinu king kaluguran ke king MABILUG kung pusu, isip, lakas ampon pangatau?

Page 1:
http://www.mediafire.com/file/g4nx223ckzubcd0/10.23.11%20pg.%201.doc

Page 2:
http://www.mediafire.com/file/3haqy5n2aaygk8m/10.23.11%20pg.%202.doc

Kadwangpulu’t siyam a Domingu ning Ordinaryung Panaun

Ing Kutang tungkul king Pamamayad Buis

I. Pamuklat a Panalangin Ibpa, Ikayu ing sibul at panibatan ning sablang upaya. Masaya ke pu uling dinake yu pu ing kekong upaya kareng taung kalupa mi a gugubyernu kekami. Mabiasa ke pu sanang mamie mangaintuliran a kapamintuan kareng gugubyernu kekami. Mabiasa kami mu naman sang mamie nung nanu man ing mangaintuliran kekayu ikayung Dios a tune malugud ampon mayap. Saupan ye pu ing balen mi ngeni. Dinen yu ke pung kapayapan ampon katahimikan king kekeng balen. Ibalik yu Guinu ing masanting a kabilianan ning kekaming bansa ban na keng sumulung king dalan ning kayapan. Salamat Guinu. Salamat. Amen.

II. Pamamasa

Mt.22:15-21 15Meko la ding Pariseo at minisip lang paralan nung makananu reng arakap I Jesus king pamagsalita na. 16 Kaybat na nita, tiburan da lang makikit kang Jesus ding karelang alagad at ding mapilan a tauhan nang Herodes. Ngara kang Jesus, “Maestro, balu mi ing tapat kayu at tuturu yu ing sablang katutuan tungkul king kaburian na ning Dios para king tau. E kayu biasang mangabiran kenu man, uling paraparehu mu ing lawe yu karing tau. 17 Sabian yu na kekami nung nanu ing pamalak yo? Labag king Kautusan tamu ing mamayad buis king Emperador ning Romap o ali?” 18Oneng balu nang Jesus ing e mayap dang parasan, inya ngana karela, “Hipokrita! Obat buri yu kung subukan? 19 Pakit ye kanaku ing salaping pamayad buis!” Inyang inabutanan da ne, 20 kitang na karela, “Kaninu ya larawan at lagyu ing makatatak ken?” 21 Ngarang mekibat,” King Emperador la.” Inya nganang Jesus karela,”Nung makanyan, ibie yu king Emperador ing mangaintulid king Emperador, at ibie yu king Dios ing mangaintulid king Emperador, at ibie yu king Dios ing mangaintulid king Dios.”

III. Turu Ngening panaun a iti, maghigpit ya ing BIR uling magkulangan ya pondu ing gubyernu. Kareng utang a kailangan bayaran ning gubyernu karing pi-utangnan na, alus ala nang mitatagan para king sarili tamung pondu keti Pilipinas. Inya e tamu magtaka nung maina la reng serbisyung publiku tamu karas keng health, education, public works, at miyayaliwa pang pamangailangan. Kailangan, reng kekatamu a ating panakitan, dapat lang mamayad kareng taxes da uling tutu nong kailangan ning gubyernu reni. Nung magkulangan ing pondu ning gubyernu, reng mumunang mituturan ila reng pakakalulu. Ila dapat reng midinan serbisyung publiku a mura. Oneng siyempre, ing isyu ning corruption keng gubyernu iyang maging sangkan da reng taung e bisang mamayad taxes uling e no man kanu miraras keng publiku reng perang babayad da nune kareng bulsa da reng corrupt a government officials. Inyang panaun nang Jesus, mamayad lang taxes mu naman reng Judio. Ing problema mu, mamayad la e king sarili dang gubyernu nune karing dayuan a sinakup karela, ila reng Romans (Romanu) kanita. Nung reng mapilan kekatamu, maibug nong e bisang mamayad taxes keng sarili da nang gubyernu, nanu pa mo nung ing babayaran mung tax miraras ya mu kareng sinakup a bansa keka? Agyang siguru I Andres Bonifacio malsa ya keng sitwasyun a ini. Makanyan mu naman inyang panaun nang Jesus. Inya e tamu magtaka ot lalon dong marok a mata reng ausan dang “publikanu” o tax collectors kalupa da ri Mateo ampon Zacheus. E la mu traydor reni ampon sipsip, mapanabusu la pa uling king binye dang upaya deng Romanu karela at siyempre, mangupit la kareng a kokolekta dang taxes, inya mikukwalta la. Ginamit neng Jesus king metung nang storya ing imahen ning metung a publikanu o tax collector. Balu nang Jesus king ing lawe da reng tau kareni, makasalanan lang tutu. Keng ebanghelyu tamu, buri deng dakpan I Jesus karing amanu na. Balu da reng Pariseo ing pulsu da reng tau tungkul king pamamayad buis. Kasaman do reng taung sinakup karela, kasaman do reng tax collectors, at maskup king pilubluban da ing mamayad buis. Ing pekibat nang Jesus e ya kabud yes or no, nune sinabi na: “Ibie yu king Emperador ing mangaintulid king emperador, at ibie yu king Dios ing mangaintulid king Dios.” (v. 21) Kareng amanu nang ita, e re ikwang arakap I Jesus uli na pin e na no man pigbawalan Jesus a mamayad buis. Pepakit ning Guinu, king dapat mung ibie nung nanu ing mangaintulid kareng pamuntuk tamu ampon nanu ing mangaintulid king Dios. E na buri sabian niti, king kakawani taya ing lugar ning gubyernu king lugar ning Dios. Ali. Itamung Kristiyanu, ing paniwala tamu, ing egana-ganang upaya manibatan king Dios. Manibatan ing upaya da ring gugubyernu kekatamu king Dios. E ta mu dapat isipan king ing gubyernu, atin yang sariling upaya a e na a tagkil ning Dios. Ing Dios iyang mayupayang tutu. Keya manibatan ing egana-ganang upaya, pelalung upaya a akakit tamu king gubyernu. Paintulutan na ning Dios king ing gubyernu iyang mamuntuk kekatamu ban kapamilatan na niti, mika ustisya, kapayapan, progresu ampon ustung pamag-gubyernu ban misulung ya ing balen. Iting upayang iti manibatan king Dios, a iyang mamie upaya at iyang darake king upaya king gubyernu. Uling lehitimu yang midinan upaya ing gubyernu ban gumubyernu kekatamu, ing kekatamung kapamintuan atiu dapat mu naman kening gubyernung binili na ning Dios ban mamuntuk kekatamu. Pauli na niti, dapat tamung mamintu ban kapamilatan ning gubyernung iti, misulung ing kabilian ning balen. Oneng pakatandanan tamu, nung ing gubyernung ini, isakwil ne ing Dios at reng kautusan ning Dios, lalabag ya king upaya a mibie keya. Ala yang upayang labagan no ning gubyernu reng kautusan at kaburian ning Dios uli na pin e manibatan king sarili na ing upayang iti, nune manibatan ya king Dios ing upayang mibie keya. Nung ing metung a gubyernu, susulung na ing injustice (kelan a ustisya), ala yang karapatan gawan na iti. Nung ing gubyernu, susulung na ing pamisagsagan ampon diskriminasyun, ala yang matulid ing gubyernung iti. Nung ing gubyernu susulung na ing diborsyu, abortion, family planning a gagamit a artificial means, o same sex marriage bilang metung a paralan ban isulung ne kanu ing progresu ning balen, gagawa yang kasiran king integridad ning pamilya a tutung maka-karok king pamayulung ning balen tamu. Nung mapalyari ini, ala neng matulid pang gumubyernu uling e na mangaintuliran ing panyaptan na. Lalabagan na na ing upayang mibie mu keya a manibatan king Dios. Atiu tamu keng panaun a iti nung nukarin magugulu la reng memalen keng gugubyernu. Lalung daragul ing kekatamung pamisagsagan bilang metung a balen. Tutung makalunus ing sitwasyun. Lalu lang makalunus reng pakakalulu uling ila reng mumunang mituturan potang tsutsura ing sitwasyun tamu king balen. Marakal la reng milalako na pamag-asa keng balen at mauwa na king katahimikan ampon kapayapan. Ing sitwasyun a iti, indikasyun niya mu king marakal ta kakulangan king Dios bilang metung a memalen. E ta pa biasang makiramdam keya, e ta pa biasang mamintu keya. Inya makanyan ta na mu malilili ampon magugulu. Atiu ya ing Dios kasiping tamu, oneng e ta ya pa mu rin pakiramdaman. Inya mawawala tamu. Magbalik tamu lub king Dios. Ing tutung mangaintuliran keya e taya aibibie keya. E ya tutung salese ing kekatamung balen anggat e taya bibie ing pamanyambang mangaintuliran keya. Anggat kakapit ta king kasalanan a maka-karok e mu kekatamu nune karing kapara tamung tau, e tamu salese bilang metung a balen. Manyad tamung kapatawaran kareng kasalanan tamu, uling rening malilyari kekatamu bilang metung a balen, bunga no reng pamikasala tamu. Kelinguan ta na ing tutung pamanyamba king Dios. Kelinguan ta na ing lunus karing pakakalulu. Inya, alang bakas king bie tamu ing bie ning Guinu a alang sawang mamaus ban magbalik tamu keya.

IV. Pamigunam

Sinulat ng San Lukas king ebanghelyu na king I Jesus mibait ya Bethlehem. Ot mibait ya I Jesus king Bethlehem at e king Nazaret a nung nu la makatuknang ri Jose ampo I Maria? Sasabian ng San Lukas kekatamu king minta la Bethlehem ri Jose ampo I Maria uling mika utus a menibatan kang Emperador Augusto king magpalista la king balen a ibatan da reng egana ganang sasakupan na ning Emperador. I Jose ibat ya king lahi nang David a ibat king Bethlehem. Inya, uling mapamintu la karing gugubyernu karela, minta la Bethlehem ri Jose ampo I Maria ban magpalista agyang mabuktut ya rugu I Maria. I Maria, biasa yang memintu karing gugubyernu karela inyang kapanaunan na. Uli na pin king kapamintuan king gubyernu, agyang mabuktut ya pa, minta ya rugu Bethlehem ban mamintu king kautusan ning Emperador. E ya sinalangsang at megreklamu agyang rugung mabuktut ya. Ing mangaintuliran king Emperador binye nang Maria e king paralan a buwis, nune king paralan a pamamintu king kautusan na. At ikit tamu king e na mu binie Maria nung nanu ing mangaintuliran king Emperador. Binie na naman ing tutung mangaintuliran king Dios uling binie ne ngan ing bie na para mu keng anak ning Dios a I Jesus. Mibait ya I Jesus, sinese neng Maria, peparagulan ne, tikyan ne e mu minsan, nune king mabilug nang pamibiebie. Pekyabayan ne ing anak na anggang king mate ya king krus uling ita tutu ing mangaintuliran mung daptan para king anak ning Dios. Manyawad tang grasya king Indu tang Maria ban mabiasa tamung ibie ing nanu mang dapat ibie kareng gugubyernu kekatamu at ibie ing dapat ibie king Guinu. I Maria, sinuku ne ing mabilug nang pamibiebie king Dios. Itamu man sana, e tamu mag-adwang isip iampang ta ya ing mabilug tamung pangatau king Dios a karapatdapat mung tanggap king mabilug tamung pamibiebie. Amen.

V. Pamanahimik

VI. Tauling Panalangin
Ibpa, ikayu ing mayupayang tutu, at kekayu manibatan ing egana-ganang upaya. Antabayanan yo pu reng gugubyernu kekami ban aisulung da ing nanu mang mayap. Mika katahimikan pu sana king kekaming bansa. Mituknang na pu sana ing pamisagsagan mi ban sumulung na kami king dalan ning ustisya ampon kayapan. Patawaran yu ke pu karing kasalanan mi. Ibie mi pu sana kekayu ing mangaintuliran a pamanyamba kekayu ban aibie mi ing mabilug ming pangatau at pamibiebie a alang pasubali. Saupan yo pu ring gugubyernu kekami ban mabiasa lang mamintu kekayu ikayung sibul at panibatan ning egana-ganang upayang tatalnan da. Malunus ko kekami Guinu, ikaming memalen yung mapagal na ampon malambat nang manenaya king kekong ustisya at king kanawan a pangaku yu karing tapat kekayu. Ikayu na mu pu ing pamag-asang kakapitan mi lalu na neng atiu ke king kabilian a e masanting. Salamat pu Guinu. Salamat. Amen.

VII. Kutang

1. Bibie ku kaya ing pamanyambang mangaintuliran king Guinu?

Download here:
Page 1:
http://www.mediafire.com/file/ga67535bpm1faa6/10.16.11%20pg.%201.doc

Page 2:
http://www.mediafire.com/file/5mx5bj4me03ell8/10.16.11%20pg.%202.doc

Kadwangpulu’t walung Domingo ning Ordinaryung Panaun

Ing Talimhaga tungkul king Kasalanan

I. Pamuklat a Panalangin

Ibpa, ikayu ing Dios a masayang midadake king kekong kayatinan. Buri yung iyabe yu kami king kekong masayang kapiyestan ban aipamudmud yu kekami ing labis labis yung grasya a alang sukad. Ikayu ing Dios a alang pagkaimut a kayapan kareng sablang lelangan yu. Ikayu ing Dios a masayang mangumbira kekami ban makiagum kami king masaya at alang tuknang a kapiyestan a tinangka yu para kareng egana-ganang tapat kekayu. Pasalamat kami pu Guinu, uling ausan yu kami king metung a bieng ganap at e kukulang king pamagsaya. E ke pu milalako pamag-asa ikeng mamagkasakit ngeni uling balu mi ing sasadya yung kapiyestan para kekami king banwa. Salamat pu Guinu, Salamat. Amen.

II. Pamamasa

Mt.22:1-14
1 Migsalita yang pasibayu I Jesus karing dakal a tau king kapamilatan da ring talimhaga. Ngana, 2 “Ing Kayarian ning Banua kalupa ne niti: migtau yang maragul ing metung a ari para king kasal ning anak nang lalaki. 3 Tinubud na la ding ipus na ban maniaus karing kumbiradu na ning kasal, oneng e la mebisang datang. 4 Inya pasibayu yang mitubud aliwang ipus at penabilin na karela, ‘Sabian yu karing mekumbira king manaya na ing kanakung sidia; pepakatat ku na la ding kanakung biserung baka ampon ding aliwa kung sese pataban; makasadia na ing sabla. Munta na kayu keni king kasalan!’ 5 Oneng e ra pinsingan iti ding mekumbira. Sinulung na ning balang metung ing lakad na; minta ya ing metung king asikan na at ing metung naman minta ya king negosyu na. 6 Ding aliwa naman dekap da la ring ipus a tinubud na; penasakit da la at melaus da lang pete. 7 Mimua ya ing ari at peparala na la ding sundalus na at pepapate na la ding tampalasan at pepasilab ne ing karelang siudad. 8Kaybat ngana karela, ‘Makasadia na ing kasalan, oneng e la karapatdapat ding mekumbira. 9Ngeni munta kayu karing dalan a matua at kumbiran yu lang datang king sidia ku ding sablang taung akit yu.’ 10Inya minta la ding ipus karing dalan at tinipun da la ring sablang atagpuan da: e mayap o mayap a tau; at kinatmu ya karing mekumbira ing lugal nung nu da la ikasal. 11“Inyang linual ya ing ari ba na lang lawan ding bisita, ikit ne ing metung a taung e makaimalan pakipagkasal. 12 ‘Abe,’ ngana, ‘baket linub ka keti a e ka makaimalan pakipagkasal?’ Oneng ala yang apakibat ing tau. 13 Kanita ngana ning ari karing ipus, ‘Igapus ye gamat at bitis at iyugse ye king karalumduman king lual. Karin ya kumiak at mitigis a ipan.’” 14 At nganang memupus Jesus, “ Dakal la ding meyaus, oneng ditak la mu ding mepili.”

III. Turu

Kekatamung Pilipinu, potang magtau tamu, “bigay todo tamu” ara pin. Marakal ampon manyaman ing buri tang isadya. Meging tradisyun na kekatamu na potang magtau tamu, reng daratang king bale aliwa mu retang mekumbira, nune pati na reng e me kumbira. Basta, reng egana-ganang taung bisang makipamiyesta kekatamu, welcome la ngan. At potang atiu no king kekatamung bale, e tamu kuntentu potang minsan la kumang pamangan. Buri tamu magbalik la pa ban kumabsi lang tutu. King kaniting paralan, e mu reng bisita reng masaya, itamu man a megsadya ampon megpakapagal, saya mu naman ing panandaman tamu potang a bibisita da ka tamu reng aliwang tau.

Ngeni, nanu mo ing panandaman mu nung sumangid ning marakal at manganyaman mung pigsadya kareng bisita mu, ala ni metung ing dinatang karela? Nanu mo ing panandaman mu nung makasadya na king lamesa ing pamangan, at kaybat ning makabang oras, manenaya ka rugu king balkunahi mu, malaut ka lawe, at ni metung a bisita ala kang ayayaninag a daratang? Nanu mo ing panandaman mu? Masakit ne?

Makanyan ya ing talimhaga tamu ngening dominggo. Ing aring megsadyang pamangan, e re detangan ding bisita na. Ing aring bisa rugung mamie saya ampon bisang midake king keyang kayatinan, menenaya ya rugung malambat uling alang dinatang king kapiyestan a pigsadyan na. Nanu king palage yu mo ing panandaman ning ari aini? Malungkut siyempre ampon masakit. At uling atin ya pa mu ring kababan lub ing ari tamu king talimhaga, ikwa no pang pepayaus ring bisita nang e dinatang. Pepatubud yang ipus na ban ausan no reng bisita na. Oneng lalu yang mebigu ining aring bisang mamie saya. Memie lang miyayaliwang sangkan reng bisita na - sangkan a nung ika ing makaramdam kareni, ikang mengumbira karela, maspak ka salu uling pepakit da mu king e de dinenan ulaga ing pamagtau a pigsadya mu karela at balamu mas maulaga la pa ding sara-sarili dang pigagap a e naman importanti. Ing dok na pa, deng aliwang tiburan nang ipus, pete do reng aliwa nang kinumbira. Uli na niti, mibua ya ing ari. Dinenan nang ustisya ing pamanyakwil dang guewa keya ampon keng pangamate da reng ipus nang tiburan. King bandang tauli, pepapate no ngan at pepasilab no reng siudad da.

Oneng e meyari ing kwentu keni. Uling alang dinatang ni metung kareng kinumbira na. Mengumbira yang aliwang tau. Reng taung mekumbira, ila reng taung e mu isip-isipan a kumbiran na. Basta ninu namu mekumbira. Reng taung ikit da king dalan, mayap o marok ilang mekumbira. At pauli na nita, kinatmu ya ing lugar nung nu la migtau.

Ing Ibpa ya ing ari a mebanggit king talimhaga. Kukumbiran na ka tamu ngan ban miyabe tamu king kapiyestan na. Buri nang idake kekatamu e mu ing saya na nune pati ing egana-ganang grasya a tutung manibatan keya. Ing grasyang ini, alang sukad, alang kayangganan, kalupa ning pamangan a darasnan tamu neng makipamiyesta tamu. Lumual tamung tutung mabsi king grasyang makasadya para kekatamu. Ing kailangan mu, tangu tamu king pamanyaus ning Ibpa king keyang pangumbira. Oneng kalupa da ring mekumbira king talimhaga, e da tinggap ing pamangumbira ning ari uling king sara-sarili dang pigagap. Karagul ping kasayangnan nung e taya tatanggapan ing pamanyaus ning Ibpa ban makiagum tamu king keyang grasya! Tutung karagul a kasayangnan! Potang sasakwil taya ing bibie nang grasya ning Ibpa, karagul a kasayangnan. Potang lalapit na ing sarili ning Guinu kekatamu, ot balamu itamu pang e bisang lumapit keya? Potang atin yang panagkat a makakayap kekatamu, ot balamu, anti mong ala ing keyang pamanagkat? Lalto pa king mas maulaga la kekatamu reng sara-sarili tamung pigagap king bie a king bandang tauli, e no kasing ulaga karening panagkat ning Guinu a bisa mung midake king keyang kayatinan. At kalupa ning mebanggit a talimhaga, ing kapagpasensyan ning ari, mika angganan inyang sinakwil do ring taung mekumbira king kapiyestan ing kayausan ning ari.

Makanyan mu naman ing grasya ning Guinu. Potang e ta buring tanggapan at tutung sasakwil taya ing grasyang buri nang ibie ning Guinu, milako ngan iti kekatamu at mibie karetang mas malagwang tanggap kareng grasya a bibie nang labis labis kareng taung makabusni palad keya. E magkulangan grasya a bibie kekatamu ing Guinu. Kalupa na mo ning metung a kapiyestan, labis labis tutu ing buri nang ibie kekatamu. Oneng agyang labis labis ini, milako ngan ini nung e ta buring tanggapan ini at nung sasakwil ta ya pa mismu ing Guinu tamung e tutuknang king pamanyaus na kekatamu ban makisulu tamu king keyang sinadyang kapiyestan.

King bandang tauli, makalunus tamung lunto itamung manyakwil kareng grasyang lalapit ning Guinu kekatamu. Karagul a kasayangnan nung mas didenan tamung pansin ing sarili tamung pigagap kesa karing grasya a matula nang dadake ning Guinu kekatamu! E tamu sana pasayangnan ing grasya. Makibat tamu keya at datangan ta ya king keyang sinadyang kapiyestan. Akit tamu, potang pekibatan ta ya ing Guinu king keyang kayausan, e tamu sumisi, e tamu mabigu karing pengaku nang labis labis a grasya.

IV. Pamigunam

Inyang dinatang ing makatakdang panaun, nganang San Pablo king sulat na karing tiga Galasya, mibait ya ing anak ning Dios king metung a babai. Ing babaing ini ya i Maria. Ing Dios, inaus ne i Maria ban maging indu ning bugtung nang anak a I Jesus. Kalupa ning
talimhaga tamu ngeni, ing Birhen Maria mu naman inaus ne ning Dios at kitnan ne nung malyari ya ampon nung tanggapan na ing panga indu na king anak ning Dios a I Jesus. Tinubud ne ning Dios ing anghel na, Ing anghel Gabriel ban ibalita na kang Maria ing planu ning Dios e mu para kang Maria nune para king mabilug a yatu. At inyang belita ning anghel kang Maria ini, tinangu ya i Maria at sinabi na: “ Matupad ngan ing egana-ganang sinabi mu kanaku”

I Maria, mitmu ya king grasya uling e ne sinakwil ing pamanyaus ning Dios keya. Kapamilatan ning keya pamagtangu king planu ning Dios, mibie ya ing peka marangal a grasya keya bilang indu ning kekatamung talapangabus a I Jesus. Inyang tinangu ya i Maria king kayausan ning Dios, mibie keya ing grasyang ala ng migit pa. Nanu pa mo ing anyaran mu nung tutung kayabe me I Jesus? Atin pa kayang maging kakulangan king bie nung I Jesus na mismu ing kayabe tamo? Mibie ya I Jesus kang Maria. Ala ne sigurung kapante ining grasyang ini! Ala na sigurung mas marangal pang grasya a malyaring mibie king bie tamu nung I Kristo mismu ing maging kayabe tamu king bie!

Anyaran ta king Birhen Maria ing grasya ban makatangu tamu kareng nanu mang kayausan a ibie ning Dios kekatamu king bie. E ta ya sasakwil ing panagkat na, e tala sana didinan mas migit pang importansya reng pigagap ta king bie kesa king panagkat at kayausan ning Dios kekatamu. Amen.

V. Pamanahimik

VI. Tauling Panalangin
Ibpa, ikayu ing Dios a masayang dadake king nanuman kayatinan yu. E yu pagkaimut kekami ing nanu mang bage o grasya a maka saya at maka kayap king kekaming pamibiebie. Saupan yu kami Guinu king sana dinan ming pansin ing kekong pamanyaus at panagkat potang bibie yu ing grasya yu ban mikatmuan ke king kekong lugud at kayatinan. Mabiasa mi la sang lelele reng sarili ming pigagap a neng kai iyang maging sumbagal king pamakibat mi king kekong kayausan. Kalupa ning indu ming Maria, mabiasa ke pu sanang ibusni mi la reng pamibiebie mi ban gawan yu ing nanu man ing makakayap king bie mi. E mi la pu sana sasaradu reng pusu mi ban e ya misasara ing pasbul ning kekong grasya kekami. Patawaran yu kami pu neng magmaklak-maklakan kami karing panagkat yung makiagum king kekong kapiyestan a makarikil para king kayapan mi. Salamat pu Guinu. Salamat. Amen.

VII. Kutang
1. Nanu la mo ring kayausan ning Guinu kanaku a e ku dinenan pansin?

Download here:
Page1: http://www.mediafire.com/file/557e9p18i4bliqh/10.09.11%20pg.%201.doc
Page2: http://www.mediafire.com/file/jbbzuj7ecb9nqzj/10.09.11%20pg.%202.doc

Kadwangpulu’t pitung Domingu ning Ordinaryung Panaun

Ing Talimhaga tungkul karing Kasamak ning Mulahan Ubas

I. Pamuklat a Panalangin

Ibpa, ikayu ing makibandi king mulahan a ubas. Uling king maragul yung tiwala kekami, guewa yu keng kasamak king kekong ubasan ban kanita aibalik mi ing pupul a dake yu king binie yung mulahan kekami. Guinu, e mi la sana sasakwil reng tutuburan yu kekami lalu na neng magkamali kami king responsibilidad mi king bie. E mi ya sana akakwang sasakwil ing anak yu a iyang tutung tinubud yu ban mika kaligtasan kami. Dinan yu keng grasya ban apakibatan mi ing kayausan yu at ban mamintu kami karing balang amanu yu, kalupa ning Birhen Maria. Salamat pu Guinu Salamat. Amen.


II. Pamamasa

Mt.21:33-43

33 “ Pakiramdaman ye ing metung pang talimhaga. Ating metung a taung menanaman ubas king gabun na at bekuran ne. Kinulkul yang pibilian kin pipapaslan ubas at mitalakad yang metung a tore. Kaybat na nita, peniwala ne karing kasamak at saka ya minta king marayung lugal. 34 Inyang miras na ing panaun ning pamamupul ubas, tiburan na la ding ipus na ban tanggapan da karing kasamak ing parti na. 35 Penasakit da la ring kasamak na ding ipus na, pemalupalu de ing metung, pete re ing metung, at pemasibas de ing metung. 36 Pasibayu, mitubud ne namang aliwa pang ipus ing maki gabun, lalu lang dakal kesa karing minuna; at makanyan munaman ing depat da ring kasamak karela. 37 Katataulian, tinubud ne karela ing anak, nang lalaki, ‘ Pihung igalang da ne man ing anak ku.’ 38 Oneng inyang ikit de ring kasamak ing anak, ngarang misabisabi, ‘ Iti ya ing talapagmana na ning pakisamakan tamu. Tara, paten ta ya ban akua tamu ing bandi na!. 39 Inya dekap de; liwal de king mulahan ubas at saka re pete. 40 Nganang mekibat, “Siguradu na lang ipapate ding e mayap a taung deta, at ipakisamak ne ing mulahan nang ubas karing aliwang makisamak a munie king parti na king pupul king panaun a karampatan.” 42 Nganang Jesus karela, “ E yu wari abasa ini king kasulatan? ‘Ing batung e ra buri ding manalakad bale, ya ing maging batung pamuntuk. Dapat na iti ning Ginu, at pagmulalan tamu!’ 43” Inya ngeni sasabian ku kekayu, “ nganang tinuglung Jesus, “milako ne kekayu ing Kayarian ning Dios at miyabie ya karing taung biasang papamunga kaniti.

III. Turu

Inyang kapanaunan ning lahar, tinas de ing Gapan – Olongapo Road ban e ne masisira mung masisira balang daratang ing lahar. King bandang Bacolor, uling e la pa siguradu nung nu ya magbanda ing direksyun ning lahar, ginawa lang tete a gawang bakal. Guewa deng bakal ini imbes na simentu, uling king isip da e ne man maging permanenting tete ini. Pauli ning lahar, mas masanting na pin man ing e permanenti ing tete uling pota siran niya ning lahar ing mismung Gapan-Olongapo Road ampon ing tete. Oneng king lambatan, inyang tinuknang ng maglahar king Baculud, ing teteng gawa king bakal a dapat, temporary mu king pamaggamit, menatili yang gagamitan ning publiku. Aldo-aldo, daralan la reng marakal ampon mangabayat a saken keni. Uling dapat temporary ya mu, bagya bagya, mimina neng mimina kabang lalabas ing panaun. Ditak ditak, kakawani ya ing teteng bakal king dalan a aspaltadu. Mika siwang ya, at magkangye ya at lalangit-ngit ya antimong kawayan potang mibabayatnan ya kareng saken a daralan. Metung a aldo, inyang dinalan ya ing metung a maragul a truck, mikawani ya ing tete, at misaldak ya ing truck a daralan king ilug lalam. King kekatamung ebanghelyu ngeni, ing talimhagang mikwentu, anti ya mong istorya ning tete matbud a binanggit tamu. E ne man biglaan mesira ing tete. Memie ya pang sinyalis ing tete matbud bayu ya bala-balaus mikawani, mesira ampon mibagsak. Pepakit ampon pepalto yang anti mong signus ing tete inyang mag-umpisa neng mikakawani king dalan a aspaltadu ampon inyang maglagitik yang anti mong kawayan ustung ating daralan a saken. Kaybat, inyang talagang e ne makayagwanta king pwersa ning bayat ding saken a daralan, bigla niyang mesira at misaldak king ilug king lalam.

Ing kapagpasensyan ning Guinu makaba ya. Oneng agyang nu ya pa anti kakaba ing kapagpasensyan a ini, atin ya namang angganan. Ing makibandi king mulahan a ubas mumuna no pang tiburan reng ipus na ban kuanan da ing dake na king pupul king mulahan. Oneng sikwil do reni, kaybat penasakit do pa, pemalupalu da la ampon pete. Guewa da ini e mu minsan, nune makatadwa pa. (Keni pa mu, akit ta ne ing maragul nang kapagpasensyan ning makibandi.) Oneng uling e ya mu mapagpasensya ing makibandi nune mitmu ya pang pamag-asa, tiburan ne pa ing anak na uling king isip na pakiramdaman de ini. Ali dya naman. Sikwil dya naman ini at bandang tauli, pete riya naman kalupa da reng tiburan nang ipus. Kaniti ne mibua ing makibandi. At pepakit na karela ing pwersa ning mua na.

King pamibiebie tamu, mapalyaring sasakwil ta ya ing Guinu marakal a besis. E tamu makiramdam, e tamu mamintu king kaburian na. Pipilit tamu ing buri tamu at uli na niti, e ta ya aibibie keya ing asahan nang bunga king pamibiebie tamu. Siguru e mu minsan o adwang besis na ka tamu dinenan oportunidad para magbayu ning Guinu. Marakal a besis, agkatan na ka tamung makiramdam kareng tutuburan na king bie tamu. Mapalyaring e la propeta o e no ipus rening tutuburan na para kekatamu, pero malino pa king sala ning aldo, king iya ing mitutubud kareni ban akwa tamung baiwan ing kekatamung pamibiebie at kumumpormi tamu king kaburian na king bie tamu. Makaba ya kapagpasensyan ing Guinu. Agyang makatapilan ta la pa sikwil rening tutuburan na e ya pa mu rin milalako pamag-asa king balang aldo, makiramdam ta mu naman. Oneng ing sigurung makaibie mua king Guinu ya ing pamagsakwil tamu king anak ng bugtung a I Jesus. Tinubud ne ning Dios ing anak na ban pakiramdaman taya. Nung king bandang tauli, e ta ya naman pakiramdaman ing anak na at sasakwil ta ya naman, lunto na ing pwersa ning mua ning Dios king bie tamu.

E ne man pabigla-bigla ing Dios kekatamu. Kalupa ning tete matbud a binggit tamu, mamie yang sinyalis ing Guinu king bie tamu king e ya matula king kelan tamung pamagbayu king bie. Nung king lambatan ning panaun, ala pa mu rin ing pamagbayu king pamibiebie tamu, lalu ta pang manakit a sinyalis o indikasyun king bie tamu king e ya tutung matula ing Guinu kekatamu. E ta na panenayan mibugnus ing mwa ning Dios kekatamu. E ta ne panenayan mibagsak ing teteng matbud potang daramdaman ta no reng langit-ngit ampon lagutuk ning keinan niti. Magbayu ta na. Makiramdam tamu at mamintu. Paluban ta ya ing Guinung Jesus king pamibiebie tamu uling iya ing tinubud ning Ibpa ban midinan tamung tutung bie a kalugudlugud keya. Amen.

IV. Pamigunam

Ing bulan ning Oktubre iyang bulan ning Santo Rosaryu. Ing pamigunam tamu ngening bulan a iti makarikil ya king Birhen Maria ban lalu tamung milapit keya at ban lalu ta yang abalu ing gagampanan na king kekatamung bie kasalpantayanan.

Ing tema ning ebanghelyu tamu tungkul ya king pamananggap karing tutuburan ning Dios kekatamu. Ikit tamu, ala ni metung kareng tiburan na ning Dios ing metanggap kareng kasamak ning mulahan a ubas. Pauli ning pamanyakwil da kareng tinubud ning Dios, pelalung king anak ning Dios mismu, mimwa ya ing maganaka ampon mapagpasensyang Dios ning mulahan. Mabiasa talang tatanggapan king bie tamu reng tutuburan ning Dios king bie tamu ban abalu tamung masalese ing dalan at planu ning Dios kekatamu. Ala ne mang sabian kekatamu ing Dios a makarok king bie tamu. Ing planu ning Dios para kekatamu planu yang papunta king kayapan ampon kalugudlugud a kabilianan.

Keni ta ya dapat dinan pansin ing Birhen Maria. Manibat pa king minuna, tinggap nong Maria reng tinubud ning Guinu keya. Magumpisa king anghel Gabriel a iyang memalita keya king misyun na bilang indu ning Messias a I Jesus, angga na king pamananggap na mismu king misyun ning Guinu tamung Jesus bilang kayabe na angga king kapupusan ning bie nang Jesus king krus king kalbaryu. Tinggap no ning Birhen Maria ing nanu mang kaburian ning Dios para keya.

Nung pamananggap mu ing pisasabian, ing Birhen Maria na siguru ing peka modelo ta kaniti. Tinggap ne I Jesus king keyang katawan inyang kinagli ya lalam ning upaya ning Espiritu Santo. Tinggap ne king bie na, manibat pa king pangabait ning Guinung Jesus angga na king kamatayan nang Jesus.

Mabiasa tamung lumawe kang Maria bilang modelo ning kekatamung pamananggap king Dios. Mitmu yang kasalpantayanan king kaburian at amanu ning Guinu. E ya ni minsan sinalangsang keng kaburian ning Guinu nune meging dalan ya ban mika kaganapan ing kaburian ning Ibpa keya ampon kekatamu ngan. Amen.

V. Pamanahimik

VI. Tauling Panalangin

Ibpa, e ko magkulangan king pamanantabe kekami. Potang magkulangan kami, mitutubud kong tau ban pabalu yu ing kamalian mi. E ko tutuknang magpadalang tau ban mamie kareng amanu yung makakayap king bie. Saupan yu ke pung magbayu lub ban maging tapat kami kareng kaburian yu. Anyaran mi pu, kapamilatan na ning Indung Maria, king mabiasa kaming makiramdam ampon mamintu karing amanu yu ban milako ke king e mayap a kabilianan. Iti ngan pu adwan mi, kapamilatan ning Guinu ming Jesu Kristo. Amen.

VII. Kutang
1. Nanu pa king bie ku ing makasumbagal king amanu ning Guinu kanaku?

Download here:

Page 1: http://www.mediafire.com/file/sm72o2yuvmhvqkf/10.02.11%20pg.%201.doc
Page 2: http://www.mediafire.com/file/e33yyi2k2vgcsdf/10.02.11%20pg.%202.doc