Kapat a Domingu ning Pamaniubling Mie

I Jesus Y ing Mayap a Pastul

I. Pamuklat a Panalangin

Ibpa, tune pin ing kaluguran at pakamalan mu kami. Balu mi na ngeni ing maragul mung sangkan ot bakit tinubud me kekami ing mayap a pastul, ing Ginung Jesus, ban tairan na ke pala at tipunan papunta keka. Dakal a dakal a salamat pu. Amen.

II. Pamamasa
Juan 10:11-18
11“Aku ing mayap a pastul. Makasadia yang mate ing mayap a pastul para karing tupa na. 12Ing upahan, potang akakit neng daratang ing asung-gubat, darayu ya at tatakas uling upahan ya mu at uling e na la bandi ding tupa. Inya sagmitan na la ning asung-gubat at isalbag ding tupa. 13Tatakas ya ing taung upahan uling upahan yamu at ala yang malasakit karing tupa. 14Aku ing mayap a pastul. Balu ku la ding kanaku at balu da ku ding kanaku, 15nung makananung ing Ibpa balu na ku at ing Ibpa balu ke. At babie ku ing kanakung bie para karing tupa. 16Atin kung aliwang tupa a ala pa keting kural. Kailangan ku la naming panimunan deti; at pakiramdaman da ing siwala ku. Maging metung nia mu ing kawan at metung ing pastul. 17Kaluguran na ku ning Ibpa uling makasadia kung bie ing kanakung bie ba keng tanggapan pasibayu. 18E ne akua ninuman kanaku iting bie, nune kusa keng babie iti. Atin kung upayang ibie at upayang kumang pasibayu kaniti. Iti ya ing utus na kakakung Ibpa ku.”

III. Turu
Ing gaindung ayup, kabukas lulukuban at e nala lalakwan deng sisi na. Madalumdum pa neng abak, lakwan no reng sisi na at sulagpo ne ban mantun pamangan para apapakan na la reng sisi na. Makanini na apakit ning gaindung ayup ing lugud na kareng kayang sisi. Bagkus e ne man matas a pami-isip at e ne man megaral king iskwela ining gaindung ayup ayni at oyni, atin yang kapasidad lugud. Ing ebanghelyu tamu ngening domingu tungkul ya kang Jesus na sinabi, “Aku ing mayap a pastul.” Ing mayap a pastul a pakiwangis taya kareng pengaring e mu maranun migigising, nune disoras la pang matudtud ban manintun pagkabie kareng karelang kaluguran a anak. Ala lang sasayangan oras keng pamagobra, ban kanita akit dong atyu keng masanting a kabilyan deng karelang anak. Dening klasing pengaring a reti ila reng makasadya parating magsakripisyu para ibie ing pamangailangan da reng karelang anak. Neng atin no man sakit o panandaman deng karelang anak, agad mong damdaman karela ing makanini, “Sana kaku na digpa ing sakit na ning anak ku, imbis na kaya.” Mas mumuna la pang manandaman deng pengari potang ati lu king masipit a kabilyan deng karelang anak. Kalupa na wari ning metung a kwentu. Atin kanung metung a ima na ating anak a lalaki, ing kayang anak melulung ya king “drugs”. Pauli na ning bisyu na ning anak a lalaki, parati yang ala keng sarili na. Misan a aldo, ining anak a lalaki ala neng panyali keng bisyu na at dinan dya kanu deng pisasaliwan na nung paten at ibie ne ing pusu ng ima na karela. Nya misan a bengi, inyang e na na apibata ning anak a lalaki ing kayang bisyu, pete at kinwa ne ing pusu nang ima na, oneng keng pamamaligwa na, misakab ya ing anak a lalaki at atabili ne ing pusu at inyang damputan ne, bigla yang migsalita ing pusu at ngana, “Anak menasakit ka?’ Anti ya kaniti karagul a lugud ing pusu da reng pengari, mas buri da pang ilang manasakit kesa reng karelang anak. Neng atin naming kulang kareng karelang anak, lalu na neng disoras na ning bengi, deng pengari e la mipaindatun. Magugulu la kaisipan at alang patna ing pamangadi da, na sana e la medisgrasya deng anak a ala pa king bale da. At deng pengari potang kumpletu no reng anak da, bayu la matudtud lawen da no naman. Kabang lalon do kanita reng pengari deng anak da, bendisyunan dala at sabyan da ini, “Ginu o reni reng anak kung pakamalan, lubus kung matutula karela.” Ing ebanghelyu tamu ngeni, payabut na ing lugud at pakamal na kekatamu ning Ginung Jesus bilang mayap a pastul, makasadia ya parating midaun keng bie na para kareng kayang tupa at ding tupa itamu. At papakit na murin, na iya Dios yang manipun o manabe at e manyalbag o manabi. Buri nong tipunan detang tupa pang ala king kural. Ban kanita sabyan na naman Jesus, “Ibpa, o reni reng anak mung pakamalan, lubus at tutu kung matutula karela.” At kanita maging metung nya mu ing kawan at metung nya mi ing pastul. Amen.

IV. Pamigunam

Ing Ginung Jesus king kaorasan, anyaran na kekatamu na sana maging kawangis taya king amanu, pamanisip at pamidapat-dapat. Buri ng maging mayap tamu mu naming pastul kareng sari-sarili tang pamilya at pipagobran. Buri na namang maging tupa tang mapamintu king kaburyan na ning Ibpa, na makasadyang magsakripisyu para kareng aliwa. Buri na naman na maging instrumentu na katamu ning pamisasanmetung at pamikalugud. At potang sasalbag da katamu reng asung-gubat, a amanuan na ning ebanghelyu, na ila pin ding kapagsubukan king bie tamu. Ganakan tamung agad, “nanu wari ing e na aibie ning Ibpa kekatamu, uling ing kayang anak, I Jesus, ing mayap a pastul binye ne kekatamu ban tairan na katamu king pamaglakbe, nanu pa mo ing e na a ibie kekatamu?” Amen.

V.Pamanahimik

VI Tauling Panalangin

Ibpa, turuanan yu ke pung maging mayap a pastul kareng kekeng pamilya at pipagobran. Turuanan yu kami naman pu sanang maging mayap a tupa, na biasang makiramdam king amanu na ning mayap a pastul, ban kanita Ginu, e kami pu malili king kekaming pamaglakbe papunta king kayarian ning Ibpang atyu banua. Amen.

VII. Kutang
1. Mamili kang atlung taung meging mayap a pastul keka, at bakit?
2. 2. Nanu mo ing dapat mung gawan ban maging mayap at mapamintu kang tupa king mayap a pastul?

Download here:
Page 1: http://www.mediafire.com/view/?iq3wavx73u98852
page 2: http://www.mediafire.com/view/?3697zrs8w606a69

Katlung Domingo ning Pamaniubling Mie ning Ginu

Pepakit Ya I Jesus Karing Alagad Na

I. Pamuklat a Panalangin

Ibpa, salamat king lugud at pakamal mu kekami, na neng atyu kami pu keng sitwasyun na mitatakutan, magugulu at mikakunu king biye, atyu ya ing anak mung I Jesus king busal mi ban paramdam at ipakit kekami na e ke dapat mag-alinlangan king kayang lugud at pamanantabe kekami. Amen.

II. Pamamasa

Lucas 24:35-48

35Belita da ring adua katau ing milyari kabang dalan at nung makananu reng akilala ing Guinu inyang pemirasu ne ing tinape. 36Kabang babalita da pa iti karela. Kabud-kabud atyu I Jesus libutad da. Ngana karela, “Kapayapan keko ngan!” 37Oneng mitakutan la at mengilabut uling bala ra multu ya ing akakit da. 38Inya nganang Jesus karela, “Baket magugulu kayu at mikakunu? 39Lawan yu la ding kanakung gamat at bitis at kilalanan yu king aku at alang aliwa. Salatan yuku ba yung akit. Ala yang laman at butul ing multu, oneng atin ku antimo ing akakit yu.” (40At pangasabi na niti, pepakit nala karela ding gamat na at bitis.) 41E la pa mu rin maniwala uli na ning maragul dang tula at pangasdan. Inya kitang na karela, “Atin kayung nanumang apangan keti?”42Dininan deng kapirasung ningnang a asan; 43Kinua ne iti at pengan king akakit da. 44Kaybat ngana karela, “Ing amanuan ku kanitang kayabe yuku pa ya pin iti: kailangan ing matupad ing sablang misulat tungkul kanaku king kautusan nang Moses, karing libru da ring propeta, at karing dalit.” 45Kanita biklat na la pamisip bada lang aintindian ding kasulatan. 46at sinabi karela, “Anti kaniti ing makasulat: kailangan yang dumalan kasakitan ing Cristo at subli yang mie king katlung aldo, 47at king lagyu na, ing pamanisi at kapatawaran ding kasalanan sukat mipanaral karing sablang bansa, magumpisa keti Jerusalem. 48Ikayu ding testigu kareting sablang bage.


III. Turu

Atin metung a sikat a monasteryu na dadaywan da reng tau pauli na ning katahimikan na ning lugar at kabanalan da reng paring atyu ka rin. Aldo-aldo daramdaman dong magkanta deng kayanakan a pari at akit mu karela ing pamikalugud king bawat metung. Oneng dintang ing oras na ing lugar e dane pupuntalan deng tau, puli na ning ala na keng pusu ra reng pari ing sablang gagawan da. E mu na akit itang dating mipaglasakit la keng bawat metung. Matamad nong magkanta at mangadi king Guinu.

Misan a aldo, king metung a bakanting loti, lele na ning monasteryu, atin metung a lalaking ausan dang Rabbi na menalakad kubu ban Karin mag-ayunu at manalangin. Neng atyu Karin pisasabyan de ring pari king monasteryu at kabang akakit deng mangadi, panamdaman da ing maging payapa la lub. Misan a aldo ing pekamatas karing pari pisyalan ne para makipagkwentu. Disnan neng makatalakad king pasbul, masayang makabuklat adwang gamat, ing balamu wari ing talagang panenayan ne ing pari. Kalapit na ning pari kinaul ne, na balamu wari ring adwang mikaluguran na malwat nang e mikikit.


Inagkat ne ing pari na lungub king kubu at keng kilub ikit ne ning pari ing metung a lamesang dutung na ating makabuklat a libru. Linukluk la reng adwa king arap na ning libru at karin mu rin mig-umpisa yang kinyak ing Rabbi at makanyan mu rin ing pari. Kaybat na nita, metahimik, migsalita ya ing Rabbi “niya minta ka keti bisa kang paturu, oyni ing sabyan mu karela, ing Mesiyas metung ya karela.”

Kaybat na nita, minuli ne king monasteryu at inaus no reng pari ban sabyan ing turu na ning Rabbi. “Ing Mesiyas kayabe taya keti , metung ya kekatamu.”

Manibat kanita , mibalik ing pamikakalugud at kabanalan ketang lugar a ita. Uling balu da na kayabe re ing Mesiyas, I Jesus.

Ing ebanghelyu tamu ngening domingu payabut na ning Ginung Jesus na atyu parati king busal tamu, kalupa da reng adwang alagad a kabang kukwentu da ing mepalyari karela nyang papunta la Emmaus na akilala dya mu ing Ginung Jesus nyang pemirasu ne ing tinape, at kabang babalita da iti, kabud ing Ginu atyu king busal da, mengapamulala la at mitakutan, ing bala da ating multu, oneng pepakit nong Jesus deng sugat na at menyawad ya pang apangan at mekisalu ya karela.

Kaybat na nita, pemasalan no ning Ginu tungkul king banal a kasulatan, na ing Anak ning tau dapat yang dumalan kasakitan at mate at king katlung aldo subli yang mie. At kaybat na nita tiburan na lang ban miye patutu tungkul king kayarian na ning Dios.

Keng ebanghelyu masala nong payabut ning Guinu deng adwang sangkap na ning kekatamung biye kasalpantayanan, ing Eukaristiya at ing Banal a Amanu, na deng adwa atyu la king Banal a Santa Misa. Na deng apostoles akilala dya mu I Jesus nyang memirasu yang tinape at kaybat pemasalan na la kareng banal a kasulatan at kanita da pamu ayntindyan deng apostoles ing sablang mengapalyari.

Nya neng makiagum tamu king Banal a Santa Misa, agaganaka at mipamasalan tamu kareng Banal a Kasulatan, na ing Guinu tune ping Emmanuel ya, na ing Guinu tyu parati king busal tamu. Amen.


IV. Pamigunam

Obat itamu mo, parati tamung sasaingsing king biye, agad tamung sasabyan, ana kasakit ngeni ing biye. Samantalang nung pitutuliran mu mas masakit ing biye niyang minunang panahun. Kanita maglakad la mu ban munta king marayung lugar, oneng ngeni, ana karakal ding asaken para miras king pupuntalan, kanita potang maglakbe la tuknang la para paynawa la, oneng ngeni tuknang tamu keng pamaglakbe ban paynawa ampong mag Jollibee at kabang paynawa tamu, pa text text ta pa. O sanung masakit ing biye ing ngene o ing kanita?

Madalas a sasabi tamu ing masakit ing biye, kasi magkulang tamu pamangilala kang Jesus, akakalingwan tamung agad ing kayang sakripisyung gewa para king pangaligtas na ning kekatamung kaladua. E wari king ebanghelyu, deng apostoles mengatakutan, magugulu at mikakunu la, kalupa na ning sitwasyun tamu king biye, oneng nanung sinabi ng Jesus, ”keni lumapit ko kanaku at lawen yu la ring kakung gamat at bitis”, keni pepakit no ning Guinu ding sugat na, ban patutuanan ing lugud na kekatamu, na sasabyan na kaku at keka, ”atin pa waring migit a lugud ing ain ne ing biye na ning metung a tau para king kayang kakaluguran?” Sana e ta kakalingwan iti, na kayabe taya ing Guinu, na e sasawang lulugud kekatamu, na parati yang atyu busal tamu. Amen.

V.Pamanahimik

VI Tauling Panalangin
Ibpa, turuanan yuke pung maging kawangis na ning kekong anak I Jesus, na ating masabal, na makasadyang manantabe kareng taung mangatakutan, magugulu at mikakunu king biye. Ban kanita Ginu, abalu da reng sablang lelangan na ika atyu ka parating lulugud at manantabe kekami. Amen.

VII. Kutang

1. Kapilan tamu mika alinlangan na ing Ginu ala yu king busal tamu?

Download here:

Page 1: http://www.mediafire.com/?16lahxm1v4gxbv1

Page 2: http://www.mediafire.com/?fd24a5f3mb6bifr

Kadwang Domingo ning Pamaniubling Mie ning Ginu

Pepakit Ya I Jesus Karing Alagad Na

I. Pamuklat a Panalangin

Ibpa, salamat pu king bie, a pigkalub mu kekami. Salamat pu keng pangasubli ng mebie ning kekong anak, I Jesus. Pauli na niti mibalik ing kekaming bie at midinan kaming kapayapan. Kapayapan na makasiguradu na kayabe miya, nanu man ing kekaming araranasan king bie. Salamat pu Guinu. Salamat. Amen.
II. Pamamasa

Juan 20:19-31

19 Kanitang bengi na ning aldo mu ring ita, mitipun la ding alagad. Pakasara la ding pasbul king lugal nung nu la makatipun uli na ning takut da karing Judio. Dinatang ya i Jesus at tinalakad ya libutad da. Ngana karela, “Kapayapan keko ngan.” 20 Pangasabi na niti, pepakit na la karela ding gamat na at ing katalindikan na. Mesaya la ding alagad panakit da king Ginu. 21 Pasibayu nang sinabing Jesus karela, “kapayapan keko ngan. Nung makananu na kung tinubud ning Ibpa, makanyan da kayu namang tutubud.” 22 Pangasabi na niti pengisnawanan na la at sinabi na, “Tanggapan ye ing banal a Espiritu. 23 Nung patawaran yu la ding kasalanan na ning ninuman, mipatawaran la; ing e yu patawaran e ya mipatawaran.”
24Oneng i Tomas (ing mayayaus kambal), ing metung karing labing-adua, alayu inyang dinatang ya I Jesus. 25Inya sinabi da ring aliwang alagad kang Tomas, “Ikit mi ya ing Guinu!” Nganang mekibat tomas, “E ku maniwala anggang e ku la akit ding bakas ding paku karing gamat na at itagkil ing taliri ku king bakas da ring paku at ing gamat ku king katalindikingan na.” 26Pangalabas da ring walung aldo, makatipun lang pasibayu ding alagad king bale at kayabe re i Tomas. Makasara la ding pasbul, oneng linub ya I Jesus at tinalakad ya libutad da. Nganang Jesus karela, “Kapayapan keko ngan.” 27At saka na sinabi kang Tomas, “lawen mu la deng gamat ku at itagkil me keni ing taliri mu. Dala me keni ing gamat mu at itagkil me king katalindikingan ku. E na ka mag-alinlangan, maniwala na ka!” 28Mekibat ya i Tomas, “Guinu ko at Dios ko!” 29Nganang Jesus kang Tomas, “Maniwala na ka uling ikit mu ko? Mapalad la detang maniwala kanaku agyamang e ra ku ikit!” 30Ginawa yang dakal at miyayaliwa pang milagru I Jesus king akakit da ring alagad na, oneng e la makasulat keting libru. 31Misulat la ding atyu keting libru ban maniwala kayu king I Jesus ya ing Cristo, ing Anak ning Dios at king pamaniwala yu mika bie kayu king kapamilatanan na.

III. Turu

Atin metung a anak a babai, idad 12 anyos a mekasake keng bus a papuntang Olongapo. Apagmasdan ne ning metung a makasake a lalaki, na e ya mipaindatun, lawe-lawe ya keng kayang lalabasan at lupa yang balamu malilili. Kitnan ne ning lalaki nung minanu ya, oneng ing anak pala tagalug ya at kitang na ning anak, “kuya papuntang Cubao ba ito?” mekibat ya ing lalaki, “Ah! Hindi, papuntang Olangapo ito”. Inyang abalu na ning anak n
a melili ya pala, maybug yang kumyak. Inaus ne ning lalaki ing kondoktor at sinabi na melili ya ing anak. Kitnan ne ning kondoktor nung nu karin ya munta at mekibat ya ing anak Cubao. Kanita na aganaka ning kondoktor na minaus yang Lubao kareng pasaeru, inya ing anak bala na Cubao ing gugulisak na ning kondoktor. Ing gewa na ning kondoktor, beba ne Sta. Rita ban saguli yang makasake pang Cubao. Oneng bayu ita, ing lalaki kinwentuan ne pa ing anak kabang ala la pa Sta. Rita at pepakit no reng bale ampong pisamban na timbunan na ning lahar at biniru ne pa ing anak bayu ya kinuldas. At ikit ne ning lalaki na mesaya at melwalas ya lupa ing anak. Pangaras king karela, ena na kinwentu na melili ya, nune memasyal ya king Bacolor.

Ing ebanghelyu tamu ngeni, makanyan mu naman ing payabut na. Ding alagad na ning Ginung Jesus atyu la keng metung a kwartu, pakasara la ding pasbul uli na ning takut da karing Judio. Atyu la naman king sitwasyun na e la mipaindatun. E da balu nung nukarin la munta, nung nanu ing gawan da.

At dinatang ya ing Ginung Jesus king kalibutnan da at kayakit na karela e nala sebyanan, kimwanan o penyumbatan keng karelang keynan nune mengamanung ya pang, “kapayapan keko ngan”. Kaybat nong dininan kapayapan, kanita na sinabi ning Ginung Jesus “Nung makananu na kung tinubud ning Ibpa, makanyan da kayu namang tutubud.” At kaybat ng sinabing tutubud na la, kanita na la pengisnawan king kayang Banal a Espiritu.

Keni, pasibayu papakit ning Ginu ing pamaglalang na king tau, balu tamu king libru ning Genesis, na ing tau pengisnawanan ne ba yang mika bie, a kalupa na ning milyari kareng alagad, pengisnawan na la ban kanita milako na ing lungkut, pangabalisa at ban kanita mibalik karela ing bie, na bukud mung manibat king Ginu.

Payabut na ning Ginu, nung makananu tang dapat mabibiye anti mong metung a talatuki o alagad na, ing atin tamung dapat kapayapan king pilubluban tamu, ban kanita kalupa na ning Ginung Jesus, makapamie tamu naman kapayapan kareng aliwa at ini metung yang tanda, na pwedi na nakatamung itubud at pangisnawanan ning keyang Banal a Espiritu, at keni masala nang pepakit na ing Espiritu ning Dios, manatili ya karetang payapa lub. Uling king Dios, deng payapa lub ilang dapat ating upaya.

Ing kapayapan na sana ning Ginung Jesus, a sinubling mebie, ya sana ing miral king balang metung kekatamu. Balikdan tala reng banda tang kayli, wanan, keng arap at gulut tamu at sabyan tamu pung lubus a sigla at saya, kapayapan pu!

IV. Pamigunam

Migunam tamu ngeni, kalupa da reng apostol anyang pigtaksilan de ing Ginu, tatakut la, marine la, ela mipaindatun, maralas makanini tamu naman, pagtaksilan at lilingad taya ing Ginung Jesus king biye tamu. Pipilit tamu nung nanu ing buri tamu, nung nanu ing buri ning yatu, anya nung maging bunga na niti, kasiran, lungkut at alang kapayapan. Sana, itamung kristiyanu parati ta sanang mamaus at manyad king keyang kapayapan, ban kanita asundu tamung mitmung tetagan ing misyun a pigkalub na kekatamu. Pangisnawanan na kata sana ning keyang Banal a Espiritu ban abalu tamu, nung nanu ing buri o planu na kekatamu, nung nanu ing buri nang pagawa kekatamu, ban kanita akawangis taya, a sinabi “Ibpa aliwa ing kaburyan ku nune ing kaburyan mu ing masunud.”

At potang atyu tamu sana ketang mabayat a sitwasyun, mamaligwa ta sanang manyawad kapayapan king Ginu. Kalupa na ning Keyang Indu i Maria a Indu tamu mu naman na bista man aranasan na ing penasakit at pete de ing kayang bugtung a anak, I Jesus, meging payapa ya pa mu rin lub at alang patnang magtiwala parati king ibpang atyu banwa. Amen.

V.Pamanahimik

VI Tauling Panalangin
Ibpa, kapamilatan ning tiburan mung Espiritu Santo, akakabyusan mi ing nanu mang kapigaganakan, kasakitan, karalumduman at kapahamakan king bie mi. Iyang manantabe kekami king pamaglakbe mi at maging sala king dalan ning bie. Salamat pu. Salamat pu king kekong alang anggang lugud kekami na araranasan mi king kapamilatan ning Espiritu Santo. Amen.

VII. Kutang

1. Maging dalan na katamu kaya ning kapayapan o ning kapahamakan?

Download here:

Page 1: http://www.mediafire.com/?oj15nt80nxhh5l3

Page 2: http://www.mediafire.com/?18xwxvznxe81xe5

Domingo ning Pamaniubling Mie ning Ginu

Alleluia! Alleluia! Sinubli Yang Mebie I Jesus


I. Pamuklat a Panalangin

Ibpa, king pangasubling mie ning anak mu, midinan keng maragul a tula ampon lakas lub. Alang karokan ing magtagumpe ampon migit pa king kekong upaya. Pauli niti, mididinan keng pasibayung bayung pamag-asa king kekong lugud ampon upaya na balang aldo, ilako yu ngan pu ing egana-ganang maging pabayat king bie mi. Salamat pu Guinu! Salamat pu. Amen.

II. Pamamasa

Juan 20:1-9

1¬¬¬¬King abak a maranun na ning mumunang aldo ning paruminggu, maralumdum pa, minta ya king kutkutan I Maria Magdalena. Ikit na king makalako ya ing batung takap ning kutkutan. 2Inya milayi ya at minta kang Simon Pedro at king aliwang alagad a pakamalan nang Jesus. Ngana karela, “Kinua re king kutkutan ing Guinu at e mi balu nung nu re binili!” 3Inya linual ya I Pedro at itang aliwang alagad at minta la king kutkutan. 4Milayi la oneng itang aliwang alagad milayi yang mabilis kesa kang Pedro, at minuna yang miras king kutkutan. 5Dinuku ya at kilub ning kutkutan ikit na ing telang pamburul a makabili karin; oneng e ya linub. 6Kanita dinatang yang katuki na i Simon Pedro at taglus-taglus yang linub king kutkutan. Ikit nang makabili karin ing telang pamburul 7at ing panyung penakap king buntuk nang Jesus. Iti e makakayabe ning telang pamburul, nune makakalilua yang makatuklip king metung a lugal. ¬¬¬¬8Linub ya naman itang aliwang a minunang dinatang at ikit na at meniwala ya. (9E ra pa aintindian kanita ing sasabian na ning kasulatan king kailangan yang subling mie I Jesus.)

III. Turu

Ating minsan a telenovela a meging sikat king TV. Ing istorya na tungkul ya king metung a ordinaryung babai. Ing istorya dudurut ya king pamangawang mayap ampon marok. Inyang anak ya pa ing bidang babai, mete ya i ima na at iya mismu ing mikutkut king ima na. Inyang megaral ya, pisasanmetung de reng kaklasi na pauli ning mas biyasa ya kesa karela, ikwa ng meging tagapaglutu king kusina ning palasyu na ning hari, karin murin dakal a mimwa keya, pauli na ning biyasa ya at manyaman yang maglutu. At king inggit da kaya, singkanan deng e tutu, iya at ing kayang tuturing a ima penasakit dala at pelayasan da la king palasyu. Kabang papunta la keng lugar, a nung nukarin do iugse, kabang pupusanan ne ning bidang babai ing tuturing ng ima, mete ya at keni ya maybug a maspak a salu ing bidang babai, kasi agaganaka na ing mengapalyari keng bie na. At minsan asabi na king sobra na ing dadalanan ng kapagsubukan at mapagal ne, ampon bisa neng sumuku, at bisa neng mate.

Itamu naman, maralas daratang keng bie tamu ini, bisa tamu namang sumuku, bisa tang paynawa o tuknang gagawang mayap, kasi neng gagawa tamung mayap dakal lang mimwa at e maka-intindi kekatamu.

E tamu sana kakalingwang na ing Guinu tang Jesus, makanyan mu naman ing milyari keya keti king yatu. Mas marakal at mas masakit ing delanan na, sikwil de ring kabalen na, buri deng paten, pauli na ning tutu nang sasabyan. Maiinggit la keya, uling mayap ya, uling ing sasabyan na akakit dang gagawan na. At ing pekamabayat a karanasan na ya ing pagtaksilan de reng keyang alagad, inyang lingad deng kilala de. Pero nanung gewa na,
menatili yang mapamintu king Ibpa angga king pangamate na king krus. Inya naman pauli ning kapamintuan na, pepasubliyan neng mie king katlung aldo ning Ibpa.

Makanyan mu naman ing anyaran ning guinu kekatamu, ing mabiasa tamung makiramdam at mamintu, bista man masakit at mapagal ing gagawang mayap, e ta dapat susuku, uling ikit tang masala na kaybat ning kasakitan atin tamung panayan a kanawan, kaybat ning krus akit tamu naman ing ligaya.

Ing pangasubling mie ning Guinu iyang mamie pamag-asa kekatamu, king keyang pangasubling mie, sasabian na kekatamu ning Guinu king e magtagumpe ing karokan, king ing paralan ning kayapan iya pa murin ing miral king katataulian.

Para kekatamu, buri ng sabian niti, atin yang angganan ing dewakan at e malyaring manatiling mag-ari ini karing pamibie-bie tamu. Ing upaya ning Guinu, migit ya pa kareng nanu mang upaya. Migit ya pa mismu king kamatayan a pitatakutan tamu.

Kumatmu ya sanang pamag-asa ing bie tamu. Nung balu tamu na ing kayapan ya ing tagumpe king katataulian, malyari ta nang mamag-asa ngeni pa, king kayapan a makadikil na kekatamung meging tapat king Guinu sumangid ning maragul ampon mabayat a kapagsubukan.

Inya kulisak tamu: ”Alleluia! Alleluia! Alleluia! Sinubli yang mebie ing Guinu! Alleluia! ” Amen.

IV. Pamigunam

Ngening aldo ning pangasubling mie ning Guinu, Purian ta ya ing Dios, Kayabe da ring egana-ganang santos ampon angeles king banwa at ring tau keti yatu! Purian ta ya I Kristo, ing kordero ning Dios a megtagumpe sumangid ning kasakitan at kamatayan. Iyagkas ta ya ing himno a makasulat king libru ning kapahayagan a nung nukarin pupurian de ring marakal a tau king banwa at yatu, I Kristo bilang metung a matagumpe.

“Kekaming Guinu at Dios! Karapatdapat kang tanggap
Kapurian, dangal at upaya. Alleluia! Alleluia!

Uling ika ing linalang karing sablang bage at lelangan mu la,
at dininan bie ketang kekang kaburian. Alleluia! Alleluia!

“Ika ing karapatdapat kuma king libru, at mibuklat karing tatak na.
Uling pete ra ka at king kapamilatan na ning kekang kamatayan
Keka lang linigtas para king Dios ding taung manibat king balang
Lahi, salita, balen at bansa. Alleluia! Alleluia!

Gewa mong metung a kayarian ding pari para sumuyu king
Kekatamung Dios, at ilang mag-ari king yatu.” Alleluia! Alleluia!
“Ing Korderong pete ra karapatdapat yang tanggap upaya, pibandian,
Kabiasnan, at sikanan, dangal, ligaya at kapurian!” Alleluia! Alleluia!

“King makalukluk king tronu at king Kordero, miyabe ing dangal,
ligaya, kapurian at upaya angga king kapilan pa man!” Alleluia! Alleluia


V.Pamanahimik

VI Tauling Panalangin
Kapurian keka O Dios, ngening aldo ning pangasubling mie nang Jesus. Matula kami at magsaya uling milabas na ing kasakitan a denasan na. King upayang pepakit na, maging panatag ke lub uling iya ing megtagumpe ngeni, ampon kapilanman. Amen.

VII. Kutang

1. Nanu mo para keka ing kabaldugan ning pangasubling mie ning Guinu?

Download here:
Page 1:

http://www.mediafire.com/?9cnra0yirtm73s4

Page 2:

http://www.mediafire.com/?pb06xx7t6h3vt3x

Domingo ding Palaspas

Domingo ding Palaspas ning Pamailasa ning Guinu

I. Pamuklat a Panalangin

Ibpa, ing kapuryan, kapanyamban at kapasalamatan pu keka yu. Atyu kami pu keng arapan yu ban minsan pa mitipun ban migunam, at magaral kareng kekang amanu. Pabustan yu pung ing Banal a Espiritu lilungan na kami ban mas lalu ya pung maging masala ing kekang buring ipasyag kekami. Iti ngan pu anyaran mi king lagyu ning kekang anak, I Jesus. Amen.

II. Pamamasa

Marcos 14:1-15


Adua na mung aldo at Piesta na na ning Pamaglagpus at ning Tinape Alang Lebadura . Manintun lang paralan ding pamuntuk da ring pari at ding talaturu ning Kautusan ban lihim deng aparakap at apapate I Jesus. Ngara, E ta daraptan iti king aldo na ning piesta, pota magulu la ding tau.

Atyu kanita Karin Betania I Jesus, king bale nang Simon a leprosuan. Kabang mamangan ya, dinatang ya ing babaing magdalang metung a alabastrung lulanan mitmung mal a pabanglu; purung laru a ibat king tanaman a nardo. Biklat ne ing alabastrung lulanan at tigtug na ing pabanglu king buntuk nang Jesus. Mimua la ding mapilan a atyu karin at ngarang misabisabi, “Sinayang na mu ing pabanglu. Nung pisali nay an, mika abli yang maygit atlung dalan a salaping pilak at malyari na lang aibie ding ayabli na karing pakakalulu! At migsalita lang e ustu king babai.

Oneng nganang Jesus karela, “Paburen ye! Obat pakialaman ye? Mayap ing depat na kanaku. Maralas yu lang akakayabe ding pakakalulu,at araptanan yu lang mayap nanumang oras a buri yu. Oneng e yu ku malyaring akayabe kabang panaun. Depat na niting babai ing agyu na; e pa man kiskusan na na kung pabanglu ban isadia ne ing katawan ku para king pangangakutkut ku. Tandanan yu iti: nukarin ya man mipanaral ing Mayap a Balita mabanggit munaman ing depat na niting babai bilang kapigaganakan keya.”

Kaybat na nita, I Judas Iscariote, ing metung karing labing adua, minta ya karing pamuntuk da ring pari ban eng ipanganiaya i Jesus. Tutu lang metulka inyang dimdam da iti at pengakuanan deng dinan salapi. Manibat na kanita menintun neng paralan I Judas ban apanganiaya ne I Jesus.

King mumuna nang aldo ning Piesta ning Tinape alang Lebadura, ing aldo ning pamakamate biserung tupa para king Pamaglagpus, kitnan de I Jesus ding alagad. Ngara, “Nukarin mu buring isadia mi ing apunan para king Pamaglagpus?”

Tiburan na lang Jesus ding adua karing alagad na kayabe niting panabilin: “Munta kayu king siudad. Salubungan na kayu karin ning metung a lalaking magdalang bangang danum. Tukian ye king bale salangian na, at sabian yu king makibale, “Pakutang na ning Maestro: Nu ya karin ing kuartu a pipanganan mi ding kanakung alagad king Apunan ning Pamaglagpus? At ituru ne kekayu ing malualas a kuartu babo; maka-ayus ya at kumpletu gamit. Karin yu isadia ing apunan tamu.”

III. Turu

“Ing grasya at kapayapan ning Dios manatili keka tamu ngan.”
King aldo a iti pagmasusyan taya ing umpisa na ning pamagsakripisyu, kamatayan king krus at pamanyubling mie ning Anak ning Dios, I Jesus. Sablang balu tamu ing umpisa na niti yapin ing tauling apunan o kaya naman ing oras ning pamagtaksil ning metung karing kayang alagad, I Judas. Pero ngeni papakit ng masala ning mayap a balita na bayu ing ausan tamung tauling apunan at ing pamagkalulu ng Judas king Ginu atin pamag “anoint” o pamakilala na ing Ginung Jesus ya ing mepiling tagapagligtas ning meto yatu, “Mesiya” king Hebreo at “Kristo” king Griyego.

King matuang tipan , potang ing Dios atin yang piniling maging ari ning kayang balayang Israel, “anoint” na la, mitutubud yang metung a taung maglage laru/pabanglu king buntuk na ning mepiling maging lingkud na bilang ari. Iti ya ing simbulu na ning pangapili ning Dios king metung a tau. Nya ngening aldo iti, mapalad ya ining babaing mituburan ban maglage laru king buntuk ning Ginung Jesus, masalang papasyag ing kayang panga ari, propeta at pari. Mangaytuliran papasyag ning Dios Ibpa ngana wari “Oyni ing Anak kung katulan at kaluguran, adyang ng malyari magtiwala ku kaya na gawan na ing kakung kaburyan.” Papasyag na ning ebanghelyu na makayanda ne ing Ginung Jesus arapan na na ing kasakitan, kamarinayan at kamatayan king krus pauli ning lugud na keka tamu at kapamintuan king kayang Ibpang atyu banua. Nya mangaytuliran king babu ning krus at king pangasubli ng mie ning Ginu tang Jesu Kristo agulisak tamu, “Tutu pin na I Jesus, ing anak ning Dios, ing tagapagligtas, ing Mesiya, ing Kristo, ing “anointed one” ning Dios Ibpa. Amen.

IV. Pamigunam

King kaorasan pu pigunaman tamu ing gewa ng sakripsyu ning Ginu tang Jesus para keka tamu. Dinan tang maragul pansin ing kapamintuan na king kayang Ibpang atyu banua. Na kapamilatan ning kayang sakripisyu, kamatayan at pamanyubling mie, midinan tamung maragul a grasya na maging pasibayung anak ning Dios na mewala nyang mikasala la reng minuna tamung pengari ri Adan at Eba. Mibuklat ya ing kayarian ning Dios keka tamu ngan. E na na katamu anak ning karalumduman bagkus anak na katamu ning sala, ning mayupayang Dios Ibpa.
Ngeni masalang papasyag na ning Dios keka tamu, nung tinubud ne ing Anak ng pakamalan, na ing laru na kebit king buntuk na iyang meging simbulu ning kayang pangatubud, makanyan mu naman pauli ning pangabinyag at pangakumpil tamu, tutuburan na katamu ngeni ban isundu ing misyun ning kayang Anak I Jesus; na ibalik la ngan deng tau king kayarian ning kayang Ibpa. E tamu tatakut king pangatubud tamu uling adyang ng malyari e naka tamu lakwan ning Dios Anak at Dios Espiritu Santo, uling iti ya ing kaburyan ning Dios Ibpang mayupaya. Amen.

V. Pamanahimik

VI. Tauling Panalangin

Ginung Dios, dakal pung dakal a salamat king binie yung oras kekami at pamisala tungkul king pamitubud yu king kekayung Anak king busal mi. Meging masala murin pu na ikami midinan kami mu naman laru ban makirake king misyun ning kekang Anak keti king yatu. Parati na kepu sanang lilungan ning kekang Banal a Espiritu ban maging matapang, mapibabata, at mapagpasensya king pamanyaup mi king misyun ning kekang Anak. Ing sable pung kapuryan, kapanyamban at kapasalamatan keka yu pung tanggapan. Amen.

VII. Kutang

1. Nanu ya kabaldugan keka ing misyun?
2. Makayanda kabang idaun me ing bie mu para king ikaligaya ning Ibpa?
3. Maniwala kabang ating kabilang bie?
4. Nanu ing pweding tamung isaup ban mibalik la ngan ding kayang Anak king kayarian ning Dios Ibpa?

Download here:

Page 1: http://www.mediafire.com/?y5mv3xgb1nyxrx0

Page 2: http://www.mediafire.com/?2a29syyo2hch36c