Kapat a Domingo ning Ordinaryung Panaun

Ing Lalaking Ating Espiritung Marawak

I. Pamuklat a Panalangin

Ibpa, pepakilala ye kekami I Jesus bilang metung a talapagsalita yung mitmung kayupayan. Karing amanu na at dapat na, ikit mi ya ing upaya yu. Ing anak yu ing tinubud yu ban ituru na kekami ing mayap a dalan papunta kekayu. Ilako na pu sana ing nanu mang bage a maka-alipan kekami. Leko no kabayatnan reng ma-aalipan kareng marawak a espiritu, ilako na naman sana reng bageng maging kabayatnan king pamibiebie mi. Maniwala at magtiwala kami pu kekayu. Mabiasa mi la pu sanang pailalam reng kekaming pamibiebie king kekong mayupayang anak. Salamat pu Guinu. Salamat. Amen.

II. Pamamasa

Marcos 1:21-28

21Minta la Capernaum , at kabukasan, Aldo ning Sabbath kanita, linub ya I Jesus king sinanoga at tinuru ya karin. 22Pigmulalan de ring tau, uling tinuru ya karelang mitmung kayupayan; e re kalupa ding talaturu ning Kautusan. 23Kabud-abud linub ya king sinagoga ing metung a lalaking alipnan na ning marawak a espiritu; kukulisak ya. Ngana, 24“Nanung pakialam mu kekami, Jesus ning Nazaret? Minta ka keti ba mu kaming gisanan? Balu ku nung ninu ika: ika ing Banal a menibatan king Dios!” 25Oneng sebianan neng Jesus ing marawak a espiritu. Ngana,”Tahimik ka!Lual ka keya!” 26Pepagalgalan ne ning marawak a espiritu ing tau at kukulisak yang linual keya. 27Mengapamulala la ding sabla, inya ngarang mipapangutang, “ Nanu iti? Ngeni ta pa dimdam yan! Agyu na lang utusan Jesus pati na ding marawak a espiritu at mamintu na la man!” 28At mabilis mikalat king mabilug a Galilea ing balita tungkul kang Jesus.

III. Turu

Inyang magumpisa ne I Jesus manaral king Galilea, e re pa masyadung kilala. Malambat a panaun, e ya migsalita king publiku, e ya linibutad agyang karing miyayaliwang aktibidades da king komunidad. Balu da king anak de ri Maria ampon I Jose a kilala dang metung a karpinteru. Inyang milabas a domingu, ikit ta ya, megumpisa neng menaral king Galilea at sasabian na karing tau, king malapit ne ing kayarian ning Dios at king kailangan nong magsisi reng tau kareng kasalanan da. Ing ebanghelyu tamu ngeni, katuglung ne ning ebanghelyu inyang milabasan a domingu. Papakilala ne pang San Marko king ebanghelyu na nung ninu I Jesus. Marakal la pa reng e makakilala keya inya, ditak ditak papakilala ne nung ninu ing tutung Jesus. Inya e tamu magtaka obat inyang magsalita ya I Jesus king metung a sinagoga king aldo ning Sabat, mengapamulala la reng taung mekiramdam keya uling kanung tinuru ya karelang mitmung kayupayan; e re kalupa ding talaturu ning kautusan. Keni pamu, ikit de I Jesus anti mong metung a propeta, a aliwa kareng balu dang talaturu. Oneng ing pekasentru ning ebanghelyu ngeni ya ing pangalako ning metung marawak a espiritu king katawan ning metung a tau. Ing makapagtaka, reng mismung marawak a espiritu ilang magsalita kareng tau nung ninu I Jesus. “Balu ku”, ngana ning marawak a espiritu, “nung ninu ika: ika ing banal a menibatan king Dios!” Reng marawak a espiritu ila pang mas makakilala kang Jesus. Balu da king iya, menibatan ya king Dios! Inya ring tau, uling e la saneng manakit king kaniting bage, mengapamulala na lamu at sinabi ra:”Nanu iti? Ngeni ta pa dimdam yan! Agyu na lang utusan Jesus pati na ding marawak a espiritu at mamintu na la man! Metung ya ing tutuldu ning ebanghelyo kekatamu: I Jesus menibatan ya king Dios. Anak ne ning Dios. Mitmu yang kahyupayan I Jesus, e mu king pamanyalita na, nune king dapat na mu rin. E ya kabud propeta a biasang magsalita tungkul king Dios, nune, iya mismu, makagawa yang dapat a magpatutu king iya menibatan ya king Dios, at ating yang upaya kalupa ning Dios! Agkatan na ka tamu ning ebanghelyo ban migunam king pangatau ning Guinu. Ing Guinu, mayupaya ya e mu king amanu, nune king dapat mu naman. Alang e malyari keya. Agyang reng marawak a espiritu, mamintu la keya. Inya nung tutu ta yang kilala i Jesus, karapat dapat mu king keya mibili ing mabilug tamung kasalpantayanan, ing mabilug tamung pamagtiwala ampon ing kapamintuan a bibie tamu king Dios. Buri ning ebanghelyo king iyagkas ta yang pasibayu king sarili tamu ing kapaniwalan tamu tungkul kang Jesus, king iya anak ne ning Dios, king iya tutu yang mayupaya at alang nanu man, agyang reng egana-ganang karawakan keti king yatu ing magtagumpe laban keya. Ing kapaniwalan tamu dapat kang Jesus magbunga yang metung a pamibiebie a panatag. Ing bie tamung mitmung tiwala king Guinu dapat mamunga yang metung a pamibiebieng ating kapanatagan uling makapailalam ya ini king metung a Guinu a tutung mayupaya agyang king nanu mang karawakan king yatu. Alang kasakitan, alang dalumdum, alang kasalanan, alang nanu mang problema ing mas migit pa king upaya ning Guinu. Nung makapailalam tamu kareni, at ma-aalipanan kareni, manalig tamu mu king Guinu, at ipakit ta la rening kabayatnan tamu keya, ban ing Guinu na mismu iyang mutus karening kabayatnan a reni a mako at mabating karing bie tamu. Magpailalam tamu king upaya at lugud ning mapakumbabang Jesus a iyang liligtas kekatamu lalu na potang atiu ta king oras ning kagipitan. Amen.

IV. Pamigunam

Kilala ku ne kaya I Jesus? Ninu iya para kanaku? Nanu ing agyu nang gawan king bie ku? Reng kutang a reni lalu lang makalitu king kekatamung kasalpantayanan nung e ta ya kilala I Jesus. Tuturu na ning ebanghelyo tamu ngeni king I Jesus metung yang talapagsalita a mitmung kayupayan kareng amanu na. Metung yang propeta a sasabi karing amanu na ning Guinu. Paniwalan ta naman kaya ing sasabian na? Nung iya ing magsalita karing kaburian na ning Ibpa, pakiramdaman ta naman kaya ing sasabian na kekatamu? O pota angga ta na mung pupuri king keyang kayupayan? Manintun ku kayang panaun king sarili ku ban pigunaman ko reng amanu nang Jesus? Pabusten ke kayang magsalita king pusu ku ing Guinu a bisa mu namang makipagsalita kanako? At nung pabusten keng magsalita ing Guinu king pusu ku, lalu ke kayang akikilala ining Guinung ausan kung Jesus. Lalu ke kayang buring tukyan? Lalu ke kayang tatanggapan king pamibiebie ku? Lalu ke kayang paniwalan king atiu yang atiu king bie ku? Guinung Jesus, ika ing talapagsalita ning Ibpa a mitmung kayupayan, magsalita ka king pusu ku ban mi-ukit la king isip at kaladua ku reng amanu mung makakayap king kakung bie. At ngening balu ku king I Jesus atin yang upaya kareng marawak a espiritu, paniwalan ku kaya king alang nanu mang dewakan ing mimigit keya? Nung mamintu la agyang reng marok a espiritu keya, atin kaya pang aliwang e mayap king bie ko a migit pa keya? Balu nong kontrolan reng karokan, nanu pa kayang karokan ing malyari kung katakutan king bie ko? Atin pa kayang e makapailalam king upaya nang Jesus? Ala na. Ing egana-gana keti king yatu maka-pailalam keya. Inya nung makapailalam na ing sabla king bitis na, nanu pa kaya ing kanakung katakutan nung atiu ngan king keyang upaya ing sabla? Buri na ning Guinu ing nanu mang mayap kanaku. Ing nanu mang e makakayap, lalako na king bie ku. Nung ma-aalipanan ku man king nanung bage keti yatu, buri neng ilako ning Guinu ing kanakung panga-alipan king nanu mang e mayap ke kasalanan ya ini, ke kabayatnan, ke kasakitan, ke kakaluluan, ke nanu ya pa ta, atiu king upaya ning Guinu king milako la reti king kanakung bie. Inya nung makaniti ya kayupaya ing Guinu, ot e ku mo ibie keya ing mabilug kung kapaniwalan ampon tiwala? Balu ku, nung binie ku ne ing mabilug kung kapaniwalan at kapanaligan, midinan kung katatagan king bie. Alang nanu man ing makatomba kening katatagan ku, uling alang nanu mang e mayap ing magtagumpe king Guinu. Nung pepa-ilalam na ku keya, at sinuku ku na king Guinu ing mabilug kung pamibiebie, alang nanu man ing kanakung katakutan uling e na pabusten ning Guinu king mipailalam ku king dewakan o nanu mang e maka-kayap king bie ku. Ika, Guinung Jesus ing mayupayang tutu. Papailalam ku na kekayu ing bie ku ban mipanatag ku bie. Uling balu ku, e yu pabusten king ing bie ku, mipailalam ya king nanu mang marok o e mayap. Keka ing mabilug kung kapaniwalan at pamagtiwala. Amen.

V. Pamanahimik

VI. Tauling Panalangin

Ibpa, binie ye kekami I Jesus bilang metung a talapagsalita yung mitmung upaya. Ibuklat yo ring pusu mi ban makiramdam king keyang amanu a mitmung upaya. Miras sana ing upaya da reng amanu na kareng pamibiebie mi. Magbayu ke pu sana pamibiebie potang damdaman mi la reng amanu na ning Guinu ming Jesus. I Jesus iyang mayupayang tutu. Agyang reng marawak a espiritu, pamintuan de. Mabiasa ke pu sanang magpa-ilalam keya ban lukuban na kami at panyanggalang na kami king nanu mang karokan. Ilako na pu sana ing nanu mang espiritu ing manalipan kekami ban milako na pu ing nanu mang pabayat a bibitbitan mi king bie. Kekayu Jesus papailalam kami. King kekong upaya manalig kami. Amen.

VII. Kutang

1. Pepailalam ku ne kaya ing pamibiebie ku king upaya nang Jesus? Nanu pa kaya ing dapat na pang ilakong pabayat king bie ko?

Download here:
Page 1: http://www.mediafire.com/?6gemgbn9bdym9dm
Page 2: http://www.mediafire.com/?s0nqdbzu5oddd6q

Katlung Domingo ning Ordinaryung Panaun

Ing Pamaniaus nang Jesus karing Apat a Manasan

I. Pamuklat a Panalangin

Ibpa, salamat king kekong pamanagkat kekami. E yu kami mu inagkat ban maging kayabe da kayu king pamaglakbe mi keti yatu. Agkatanan yu kami naman ban magbayu kami bie. King pamanyatang ning kekong kayarian, agkatanan yu kaming sumisi kareng kasalanan mi at painggulutan mi la reng ugali ming e ustu. Malagwa mi sanang kaulan ing bie a tuturu yu Guinu ban kayabe yu ampon reng santos king banua, apilasan mi ing pamibiebie banal a manibatan mu kekayu. Matatag ke kapaniwalan king didenan yong grasya reng taung makibat king kekayung pamanyaus. E yu na ke man kumbiran king metung a bageng e mi naman agyu. Kapamilatan ning grasya yu, mididinan lang lakas agyang reng maina, maging lang banal reng makasalanan at mididenan lang bie reng malambat nang mete king kasalanan. Salamat Guinu. Salamat. Amen.

II. Pamamasa

Mk. 1:14-20

14 Inyang mesukul ya i Juan minta ya i Jesus king Galilea at penaral na ing Mayap a Balita a ibat king Dios. 15 ”Miras na ing mituldung panaun,” nganang sinabi, ”at malapit ne ing Kayarian ning Dios! b Sisian yu la at painggulutan ding kekayung kasalanan at maniwala kayu king Mayap a Balita!” 16 Kabang maglakad ya i Jesus king lele na ning Dagat-dagatan ning Galilea, ikit na la ding mikapatad a manasan, k i Simon at i Andres; yatsa re king danum ing karelang lambat. 17 Nganang Jesus karela, ” Tuki kayu kanaku at gawan da kayung manasan tau. ” 18 Kanita mu rin likuan da la ring karelang lambat at tinuki la kang Jesus. 19 E ya pa makaing mirayu king pamaglakad na, ikit na la ding mikapatad a Santiago at Juan, ding anak nang Zebedeo. Atyu la king karelang bangka; sasadia da la ring karelang lambat. 20 Inaus na la namang Jesus; kanita mu rin likuan de king bangka i tata ra a kayabe da ring makiupa at tinuki la kang Jesus.

III. Turu

Neng lalbug kekatamu, normal na mu ing mamie lang relief goods reng mapilan a organisasyun kareng pamilyang mi-albugan a bale. Nung e da man a-announce kareng memalen ini, mamie lang ticket ba lang makakuang relief goods reng miririnan tickets. Natural mu nung anti mong me-announce ngeni king ating mamie relief goods king plaza, mabilis ta sigurung mulayi papunta king plaza ba tamung makakuang relief king plaza. Makanyan mu naman nung midinan tamung ticket. Agyang midinan ta nang ticket, buri tamu maranun ta mu naman keng pila king pamangwang relief goods. Nung pate-pate tamu, marakal la reng muna kekatamu. Nung e tamu mabilis makibat king pamanyaus ning pamamie relief, muli tamung alang akwa. Agyang atin ta nang ticket a tatalnan, neng kai, kakapaltan ta mu pang relief uling mabagal tamung kinimut. King ebanghelyu ta ngeni, anti ya mong storya da reng mekibat king pamanyaus relief goods ing milyari. I Jesus, menaral ya Galilea. Kabang menaral ya, ing pamanyaus na ini: “Sisian yu na at painggulutan yu na la ding kekayung kasalanan at maniwala na kayu king Mayap a Balita. “(v.15) Kening pamanyaus nang Jesus, balamu mamirapal ya king pamangailangan nang mipasiag ya ing balitang aini, at balamu mo e na ne malyari pang i-delay ing pamipasiag niti. At nung makaniti ya ka-urgent, o ka-pirapal ing pamipasiag nang Jesus, buri na sabian king importanti ya ini. At nung importanti ya ini, buri na naman sabian king dapat mung mabilis ta yang pakibatan ing pamanyaus a ini. Inya e tamu magtaka obat inyang inaus nong Jesus di Simon ampon Andres, mabilis lang mekibat king pamanyaus nang Jesus. “Kanita mu rin,” ngana ning ebanghelyo, “likuan da la ring karelang lambat at tinuki la kang Jesus.”(v.18) Makanyan mu naman kareng mikapatad a Santiago at Juan, inyang inaus na la namang Jesus. “Kanita mu rin”, ngana ning ebanghelyo pasibayu, “likuan de king bangka I tata ra a kayabe da…” (v. 20) Ing pamanyaus a ating pirapal, kailangan ya naman mipakibatan king pirapal. Buri nang Jesus king magbayu ta na pamibiebie, buri na paingulutan ta na ing matua tamung pamibiebie. At buri na, gawan ta na ini – ngeni na, at e bukas o kapilan pa man. Ing mabilis dang pamakibat ding disipulus iyang sasabi kekatamu king mabilis dya naman pekibatan ing pamanyaus nang Jesus a ini. Inya mabilis la naman memagbayu pamibiebie. Ing dati dang gagawan, likuan da. Ing dati dang estadu o kabilian, menaliwa ketang oras muring ita, inyang inaus nong Jesus. Ing pamanyaus na ning Guinu, kalupa nya naman ning pamanyaus king relief goods. Nung e ta ya pakibatan ora mismu, e ta mitaganan king bibie nang grasya a mibibie karetang mabilis makibat king keyang pamanyaus. Inya ngeni, mamaus ya ing Guinu kekatamu, bayuan ta na ing pamibiebie tamu! Kukulisak na kekatamu : Painggulutan ta na ing kasalanan a manalipan kekatamu! At agkatan na ka tamu: “ Maniwala ta na king keyang mayap a balita.” Mabilis ta kayang makibat kareting pamanyaus a reni? Mabilis ta la kayang lakuan reng ugaling iyang-iya ing papakit tamu? Mabilis ta la kayang painggulutan reng bisyu, reng kasalanan, reng ugaling a lumon ta na a e makakayap kekatamu ampon kareng kautus tamung tao? Misip tamu. Nu anti kabilis ku kayang makibat king pamanyaus ning Guinu? Tandanan tamu, reng pate-pate king pamangwa karing relief goods, e la mididinan relief king bandang tauli uling e la mabilis mekibat king pamanyaus. Agyang retang atin nang tickets para king relief e la makasiguradung makakuang relief nung e la mabilis makipila king relief. Sana, e tamu naman kakawalan grasya potang ing Guinu iyang mamaus. Mabilis ta sanang makibat king keyang pamanagkat. Amen.

IV. Pamigunam

Obat kaya makanyan tamu. Potang atiu ta king restaurant, buri tamu potang manorder tamu, dapat ora mismo, atiu ya ing waiter. Potang meyari ta nang manorder, buri tamu, kaagad-agad, sisilbi da na ing pamangan a inorder tamu. Nung pipila ta naman king linia king counter ning Jollibee o McDo, makanyan mu naman ing reaksyun tamu. Potang mabagal ing galo ning pila, sasabi tamu. E ta na bisa king mabagal a pakibat kareng magsilbi kekatamu. Buri tamu mabilis ing karelang pakibat kareng kekatamung kaburian. Makanyan ya naman anyaran kekatamu ing Guinu. Mabilis dapat ing pakibat tamu potang iya ing mamaus. Nung ing anyaran na kekatamu king atin tamung itabiling pamanugali, e ta na dapat magpakabagal king dapat tang gawan. Potang atin tamung bisyu a dapat ilako, at anyaran na kekatamu ning Guinu king ituknang ta na ini, e ta na dapat mag-adwang isip. Ilako ta na ing bisyung ini ban mabilis ing kekatamu pakibat king anyaran ning Guinu. Balu tamu king ing Guinu, nung iya ing mamaus kekatamu, bibie na naman ing grasyang kailangan tamu ban saupan na ka tamu king pamagbayung bie a anyaran na. Inya, kailangan mu talaga, mabisa tamu, at tutung painggulutan tamu ing dapat tamung painggulutan. E ta masisira lub nung magkasakit tamu ustung magumpisa tamu king pamagbayung bie. Makanyan naman dapat pin ing mumunang epektu ning pamamintu king Guinu – king magbayu ya ing bie tamu. Siyempre, king umpisa, manibayu tamu king bayung bie, mamagkasakit pang bagya, pero, king lambatan, akit tamu king ing grasya ning Guinu, palakasan na katamu, at e tamu amamalayan king megbayu nya pin tutu pala ing pamibiebie tamu. E tamu tatakut painggulutan ing lumang ugali tamu. Mas masanting ya at mas salese ya ing pamibiebie tamu king bieng anyaran na ning Guinu. Kareng taung mabilis a mekibat king pamanyaus ning Guinu king pamagbayu tamung bie, ila ring maka-enkwentru king Dios king karelang pamibiebie. E tamu magdili-dili potang pekibatan ta ya ing pamanyaus ning Guinu. Kayabe ta ya. E tamu milalako pamagtiwala, agyang mamagkasakit tamu king bayung bie a panagkat ning Guinu tamu. Amen.

V. Pamanahimik

VI. Tauling Panalangin

Ibpa, e yu ke buring manatili king kabilian a e masanting lalu na nung ing pamibiebie mi manatili ya king kasalanan. Ing kekong pamanagkat ban sisian mi la ampon painggulutan ing kasalanan mi, metung yang panagkat king pamagbayu ming bie. Saupan yu kami Guinu ban pakibatan mi ya ing kekong pamanagkat. E na ke pu sana kakapit king nanu mang kasalanan a iyang magsilbing sumbagal king pamagbayu ming bie. Dinan yu ke pung grasya ban painggulutan mi ing pamibiebie a makasalanan at e masanting. Ikayu ing managkat kekami, at uli na niti, maniwala kami king ikayu mu naman ing mamie kekami king grasyang kailangan mi ban makapagbayu na keng bie. Patawaran yu kami Guinu king kesyasan mi pusu. Patawaran yu kami king paulit-ulit ming pamikasala. Gawan yu keng banal a kalupa yu ban apilasan mi na ing bayung pamibiebie a tutung manibatan kekayu. Salamat pu Guinu. Salamat. Amen.

VII. Kutang

1. Nu anti ku kabilis makibat king pamaniaus ning Guinu?

Download here:
Page 1: http://www.mediafire.com/?54wj2g8nrg5mx3a
Page 2: http://www.mediafire.com/?qtlj72bw40amzri

Kadwang Domingo ning Ordinaryung Panaun

Kadwang Dominggu ning Ordinaryung Panaun

I. Pamuklat a Panalangin

Ibpa mi pung mayupaya, babie mi pu ing kapanyamban, kapurian at kapasalamatan king kaorasan. Pabustan yu pung lilungan na kami ning Banal a Espiritu para minsan papu ituru na kekami ing pamaging kristiyanung tutung makatuliran at mayap. Kapamilatan da pu ring mayap yung amanu, apakikwanan mi pung mas lalung aintindyan ing bage-bage mangapalyari king kasalukyan a panaun. Tumimu la sana rening amanung babie bie, ban adake mila mu naman deti kareng kalupa ming tau. Iti adwan mi pu king lagyu ning kekayung Anak, I Jesus, Amen.

II. Pamamasa

Juan 1:35-42

Kabukasan, atyu ne naman karin I Juan; kayabe na la ding adua karing alagad na. Ikit neng lalabas I Jesus at nganang sinabi, “Oyan ing Kordero na ning Dios!” Dimdam da ring aduang alagad ing sinabi nang Juan at tinuki la kang Jesus. Melikid ya I Jesus at kitnan na la inyang ikit nang tutukian de, “Nanu ing panintunan yu?” Mekibat la, “Rabbi (ing buri nang sabian niting amanu, ‘Maestro’). Nukarin ka manuknangan?” Nganang mekibat Jesus karela, “Tara lawan yu. Tinuki la kang Jesus at ikit de ing tuknangan na; menatili lang kayabe na king aldong ita. (Mag-a-alas kuatro na ning gatpanapun kanita). Ing metung karing aduang mekaramdam king pamagsalita nang Juan at tinuki kang Jesus ya I Andres a kapatad nang Simon Pedro. Kanita mu rin penintun neng Andres I Simon a kapatad na. Inyang ikit ne, sinabi na kang Simon, “Atagpuan mi ya ing Mesiya” (ngana wari, ing “Crsito” ). At tiki neng Andres I Simon kang Jesus. Linawe neng Jesus at ngana, Ika I Simon a anak nang Juan. Mayaus kang Cefas.” (Ngana wari, “Pedro.”)

III. Turu

Mumuna pu, pabustan tamung idake ing lugud ning keka tamung Apung Ginu kareng kayabe tang makatipun ngeni . Sabyan tang mitmung timan karela na ing lugud at kapayapan ning Apung Ginu manatili kaya king banuang iti. “Ing lugud at kapayapan ning Apung Ginu manatili keka king banuang iti.”

Ngeni, pag-umpisan taya pung pagaralan nung nanu ing papasyag ning mayap a balita.

materyal, lilipas la at angga la king yatung iti, pero rening bage ispiritwal ala lang kapupusan, manatili la mangga man king alang angga.

Kabuklat ning bayung banua, siguradu mu ing mimisip tamu nung nanu ing mangapalyari king banuang iti , at nung nanu ing masanting tang daptan ban maging masanting at masensu tamu king banuang iti. Mangarap tamu na sana mika atin ta kareng bage ala pa keka tamu, anti mo saken o kaya sariling bale.Reng aliwa naman, anyaran da, na sana mika atin nong obra o kaya akit dane sana ing maging akayabe da king bie da-asawa. Dakal ta siguradu pigagap king banuang iti. At maralas kareti materyal lang bage. E naman marok ing migagap materyal a bage, uling kailangan la reti ban mie king yatung iti. Oneng e mu materyal a bage ing kailangan tamu ban mie king yatung iti. At iti ing tuturu na ning ebanghelyu ngene, ing ispiritwal na manyadsad keka tamu angga na king kapupusan ning yatu. Reni kasing bage materyal, lilipas la at angga la king yatung iti, pero rening bage ispiritwal ala lang kapupusan, manatili la mangga man king alang angga.

Nya ngening banuang iti, isundu tamu ing pamanuki king Ginu tang Jesus. Makananu? Kapamilatan king lugud at pamangawang mayap kareng kalupa tang tau. Kapamilatan na niti, siguradu mu ing maging mabunga at masaya ya ing bayung banuang iti. Iti ya ing bage ispiritwal, a mas importanti king materyal a bage. Ngana ping San Juan, “Oyan ing Kordero na ning Dios!” At itamu naman igulisak tamu king bayung banuang iti, Na ing Ginung Jesus, ya ing e kukupas a lugud a anak ning Dios, ya ing bage ispiritwal na manyadsad keka tamu king kapupusan, Amen.

V. Pamigunam

King kekatamung pamigunam, pabustan talang balikan deng dininan tang maragul a panaun king milabas a banua. Migkulangan ba ing pamamie tang oras king bie ispiritwal? Mas marakal ba ing oras tamu king materyal. Nukarin ta ikit ing tune saya at tula? Materyal o kareng bage ispiritwal? Nung dininan talang maragul a pansin deng bage materyal nyang milabas a banua, pakikwanan tamung dinan tayang pansin ngening banuang iti at king daratang pang banua ing panagkat ng San Juan, ing kilalanan ya ing tinubud ng tagapagligtas ning Dios Ibpa, ing Kordero ning Dios, ing Ginung Jesus.” Makasiguradu mung maging mabunga ngan reng aldo ning bayung banuang iti. Iyuna taya ing Ginung Jesus at ing kegana-gana maging mayap ngan. Amen.

V. Pamanahimik

Keng pamanahimik tamu,isipan talang balikan reng mengapalyaring masanting at e masanting king banuang milabas. Ot kaya milabas ngan, nanu la ngan kaya din sangkan? Ninu la reng dapat tang pasalamatan? Bakit kaya makanyan kupa murin pamibie-bie? Nanu kaya ing planu ning Apung Ginu kanako?

VI. Tauling Panalangin

Ibpa, karakal mi pu daprat ipagpasalamat, mumuna pu ing kekaming bie, na angga ngening bayung banua ati ke pa king yatung iti, kayabe reng kaluguran mi king bie. Sopan yu ke pung mas dinan importansya ing bage ispiritwal kesa king bage materyal ngening banuang iti. Paganaka yu pung parati kekami na ing materyal a bage e kakablas angga king banua. Iti ngan pu pasalamatan at anyaran mi king lagyu ning Ginu ming Jesus. Amen.

VII. Kutang

1.Nanu la reng meging aktibitis mu nyang milabas a banua?

2. Sanu la reng ispiritwal, at nanu la reng penamdaman mu nyang gagawan mo reti?

3.Nanu la reng planu mung ispiritwal ngening banuang iti?

Download here:

Page 1: http://www.mediafire.com/?239sogr7a9w5q3g

Page 2: http://www.mediafire.com/?sq8p24vg3lt2244

Solemnidad ning Epifanio

Ing Pamandalo da ring Taung Mangabiasa

I. Pamuklat a Panalangin

Ibpa, ngening aldong iti, pepakilala ye ing kekong anak a I Jesus kareng taung e makakilala keya. Kapamilatan na ning sala yu, ikit de ing sala ning bie, ing aslag ning meto sicluban. Pakilala mya naman kekaming manintun keya ban mipaldan kami king nanu mang dadalan ming problema king bie. Pakilala mya naman kekami ing kekong pakamalan a anak ban panandaman mi ing lugud yu kekami Guinu. Ikayu ing mamie pamag-asa kareng taung manatili king dalumdum. E yo lalako reng batwin yu king banwa ban e mu naman milalako ing pamag-asa ming manatili pauli nang Jesus. Salamat Guinu. Salamat. Amen.

II. Pamamasa

Mateo 2:1-12

1 Mibait ya I Jesus king Betlehem, Judea, kanitang panaun nang Aring Herodes. E melambat dinatang la Jerusalem ding mapilan a Mangabiasa, ding taung magaral king pangimut da ring batuin; menibatan la king Aslagan 2 at kukutang da: “ Nu ya karin ing bayung bait a Ari da ring Judio? Ikit mi yang sinlag ing batuin na king aslagan at dinatang kami keti ba mi yang samban.” 3 Inyang dimdam nang Aring Herodes iti tutu yang megulu isip, antimu rin ing mabilug a Jerusalem. 4 Pepayaus na la at tinipun ding pamuntuk da ring pari at ding talaturu ning Kautusan at kitang na karela,: Nu ya mibait ing Cristo” 5 Ngarang mekibat, “ King Betlehem, Judea uling sinulat na pu ning propeta: 6 ‘Ika, Betlehem, king sakup nang Juda, e ka mitauli king makananu pa man karing manimuna nang balen ning Juda; uling keka ya manibatan ing metung a pamuntuk a manibala king balen kung Israel.’ “ 7Inya pepayaus na lang Herodes at pinulung pasalikut ding Mangabiasa; inusisa na at abalu karela nung kapilan de ikit ing batuin. 8 Kaybat pepelakuan na na lang papunta Betlehem a kayabe na niting panabilin: “Munta kayu at panintunan yeng masalese ing anak. Potang ikit yu ne, ipabalu yung agad kanaku ban aku man munta ku at samban ke.” 9 Meko la kaybat dang dimdam ing panabilin na ning ari. Kabang dalan ing batuin-ing mismung batuin a ikit da king Aslagan-minuna ne naman karela angga king miras ya at tinuknang tulid na ning lugal a kabilian ning anak. 10 Metula lang e mu nanu ding Mangabiasa panakit da king batuin. 11 Kalub da king bale, disnan de ing anak king siping nang Mariang ima na; siniklaud b la king arapan na at simban de. Kaybat biklat da la ring regalung darala da, at dininan deng gintu, insenso, at mira. 12 Meyaus ing karelang pansin king kapamilatan ning metung a paninap king e na la magbalik pa kang Herodes. Inya menaliwa lang dalan ding Mangiabasa king pamagbalik da king karelang bansa.

III. Turu

Neng manalbe tamung telebisyon, neng kai atin tamung apapanalbeng istorya a milyari king tune a bie, a nung nukarin ing metung a tau, meragul yang e no kilala reng matua na. Inyang anak ya siguru, uli ning kakaluluan, mengapilitan la reng pengari na a ipayampun da nya mu ba da nya rugung a dinan a masanting a pamibiebie. Ngening dinagul ne ining anak, panintunan no rening matuang e na pa akilala. Ating storya a neng kai magtagumpe dong apanyaliksikan nung ninu at nukarin la reng matua da. Reng aliwa naman, e la magtagumpe at akwa dang mate rugu a e do ikit rening matua dang buring akit. King ebanghelyu tamu ngening domingu, ating mapilan a mangabiasa a manintun kang Jesus. E de kilala I Jesus oneng buri deng akilala. Balu da mu na kapamilatan da reng batuin king banua, ating taung mibait a tutung maulaga ampon mayupaya king yatu. Kalupa da reng istoryang sasabian tamung panalben ta king telebisyon, ila mu naman, e la tinuknang menyaliksik anggang e de ikit at akilala nung ninu ing taung mibait a ini a marangal ampon mayupaya. Pengutang de, meglakbe la. As na kalaut ing penibatan da. Megdala-dala la pang regalu a ibat king karelang penibatan ba dya rugung akit ining panintunan dang e da kakilala. Kaybat, inyang meging malino na ing direksyun ampon sinyalis nung nukarin de atabmuan, pintalan de. At inyang ikit da ne nung nukarin ya mibait, mengapamulala la king karelang ikit. Ing isipan dang ari a mibait a tutuldu da ring batuin king banua, metung ya pa lang maluka a mibait king metung a ordinaryung bale. Ing isipan dang mayupayang tau a sisinyal da reng batuin, megpakilala yang e makualta o marangal, nune metung a taung kalupa da ring marakal a ordinaryung tau a mibait keti yatu. E da siguru isip-isipan a dasnan de ing ordinaryu ampon simpling kebaitan ning taung isipan da king iya ing amanuan dang Cristo. Nung marakal la reng taung manintun kareng matua dang e da akilala, mas marakal la reng taung bisang makakilala kang Kristo. At potang bukal talaga king lub da king buri deng akilala ing Guinu, e la mabibigu uling ing Guinu mismu iyang, magpakilala king sarili na kareng taung tutung manintun keya. Marakal kekatamu, manintun tamung kapayapan, katahimikan king bie, lugud ampon lingap. Nung reni reng panintunan tamu king bie, akit ta la ngan reni potang tutu ta neng ikit ing Guinu king pamibiebie tamu. Anggang ing panintunan tamu aliwa I Kristo, e tamu tuknang durut-durut king bie at malilili kareng pangawan tamung e maka Dios. Anggang aliwa ing Guinu iyang sentru ning pamibiebie tamu, e tamu mipaindatun, e tamu mika katahimikan, e tamu midinan sala, e tamu panandaman ing tutung lugud a manibatan mu keya. Mapalyaring panintunan tamu ing sarili tamung kanuanan at ligaya kareng miyayaliwang bage o tau, pero reni ngan, lalabas la ampon mamako kalupa ning danum a mamagus king ilug. E tamu mipapakabsian king saya a manibatan kareng tau o nanu mang bage. Kulang mung kulang iti. Oneng nung ing Guinu iyang tutung panintunan tamu king bie, iya na mismu ing sinabi kekatamu king pakabsian na ka tamung e mu nanu. Ing bie na iyang maging bie tamu, ing lugud na iyang lugud tamu. Buri ta ya talagang takman ing masayang pamibiebie? Buri ta ya talagang akit ing bieng mitmung lugud, mitmung pamag-asa ampon mitmung kasalpantayanan at pamagtiwala? Akit ta ya ini nung tutu ta yang panintunan king bie tamu ing Guinung Jesus. Iya ing dalan a binie ning Ibpa ban tukyan tamu. E masakit panintunan ing Guinu. E ya malaut. Ing Guinu malapit ya kareng taung misasakitan. Malapit ya kareng kalulu. Malapit ya kareng milalako na pamag-asa king bie, karing malilili ampon mababalisa. Kareng taung lulungkut ampon mangulila, kareng taung mamagkasakit at kababayatnan. Kareng taung milelele uling karing ugali dang e da atanggap ning komunidad, malapit ya ing Guinu. Kareng tuneng manintun keya, ing Guinu, ipapasiag na ing sarili na kalupa na mo nung makananu na pepasiag ing sarili na karening mapilan a mangabiasang manintun keya, a binasa tamu king ebanghelyo. Inya nung metung tamu karetang taung manintun a kayabe ampon lugud king bie, malagwa ta yang akit ing Guinu at malagwa ta ya naman panandaman ing keyang presensya king bie tamu. Kayabe ta ya king balang akbang a gagawan tamu king pamaglakbe tamu keti yatu. Ngening bayung banwa na, e ta ya patugutnan panintunan ing presensya ning Guinu king bie tamu. Agyang madalumdum na ing akakit tamu, mamie ya pa murin a sala kalupa da ring batuin king bie tamu ban magsilbing guiya king bie tamu. Panintunan ta ya ing Guinu. Iya ing bili tamu king sentru ning pamibiebie tamu. Amen.

IV. Pamigunam

Mahilig tamung gagawang New Year’s Resolution king bie tamu. Balang bayung banwa, buri tamu atin tamung akit a pamagbayu king bie. Uling marakal la kekatamu reng mamagkasakit king bie, neng kai, e na milalako ing atensyun tamu kareng pigagap at problema tamung pampinansyal. E naman marok ini. Agyang ninu makaniti ya ing isipan da. Masakit ing bie ngeni. Ating mapilan kekatamu, e da man balu nung nukarin la kumang kanan da potang bengi. Oneng, lauen ta ne mo ing pamibiebie tamung pasibayu? Libutad da rening kasakitan a panandaman tamu, akakit ta ya pa kaya ing Guinu? Panintunan ta ya pa kaya king bie tamo libutad da rening kapagsubukan a daratang kekatamo? Potang talanga tamu banwa neng bengi ning pamibiebie tamu, madalumdum ngan kaya ing akakit tamo? Nung e taya panintunan ing Guinu king bie tamu, balang talanga ta babo banwa, madalumdum ngan ing akakit tamu. Oneng nung panintunan ta ya ing Guinu, balang talanga ta babo banwa, manakit tamung batwin a kislap-kislap king libutad ning banwang madalumdum. Reng taung manintun king Guinu, e la kakapaltan batuin a kislap-kislap king bie da. E ya ngan madalumdum ing bie da. Manakit la pang batuin a mamie direksyun karela papunta kang Jesus. E yo papaburen matatda reng batuin a mamie pamag-asa kekatamu king bie. E tamu papaburen matatda la reng batuin ning pamag-asa tamu, agyang makapadurut pa ing dalumdum ning bie tamu. E tamu tutuknangan panintunan ta ya ing Guinu uling ipasiag na kekatamu ing sarili na nung manatili tamung tapat ampon magtiwala keya. Amen.

V. Pamanahimik

VI. Tauling Panalangin

Ibpa, ngening aldong iti, pepakilala ye ing Guinung Jesus kareng taung manintun king anak yu. E miya naman pu sana akakalinguan panintunan ing Guinu ming Jesus. Libutad ning marakal a pigagap king bie, e mi ya sana kakalinguan panintunan ing tutung sibul ning kekaming kapayapan at katahimikan king bie. Panalangin mi pu, king ipakilala ye pu ing kekong anak kareng e pa makakilala keya. Kareng taung manintun katahimikan ampon kapayapan. Kareng taung manintun lugud ampon lingap. Kareng taung mayap a pilubluban, ipakilala ye pu ing kekong anak. Amen.

VII. Kutang

1. Pota kayang daralumdum ya ing bie ku karing problema, manakit ku pa kayang batuin a mitutuldu kanaku king Ginu?

Download here:
Page 1: http://www.mediafire.com/?ecqjx4c57flctaw
Page 2: http://www.mediafire.com/?d1920idqucotlt6

Solemnidad ning Birhen Maria, Indu ning Ginu

Solemnidad ning Birhen Maria, Indu ning Ginu

I. Pamuklat a Panalangin

Ibpa, ngening aldong iti, a nung nukarin pagmasusian mi ya ing panga indu nang Maria, pasalamat kami kekayu uling dinenan yu keng metung a indu a malalam a kasalpantayan karing egana-ganang sinabi yu. Panalangin mi pu, king lumalam kami naman kasalpantayanan kalupa na. Panalangin mi naman, king mabiasa kaming migunam karing malilyari kekami king bie mi aldo-aldo ban lalu mi lang aintindian reng kaburian yu king pamibiebie mi. Dinenan yu keng indu a malinis at mapamintu kekayu. Kalupa na, gawan yu ke pung malinis ampon mapamintu king kaburian yu kekami. Salamat Guinu. Salamat. Amen.

II. Pamamasa

Lk. 2:16-21

16 Inya memalagua lang meko at atagpuan de i Maria at i Jose, at ikit de ing bingut a makakera king lilibangan. 17 Panakit da ring pastul king bingut, belita da karela ing sinabi na ning anghel tungkul keya. 18 At mipamulala la ding sablang mekaramdam king belita da ring pastul. 19 Mitanam la deting bage king pamisip nang Maria at migunamgunam ya tungkul kareti. 20 Mibalik la king marangle ding pastul a pupuri king Dios uli na ning sablang dimdam da at ikit; makayakma ngan king sinabi na ning anghel karela. 21 Kalabas na ning paruminggu, inyang miras na ing aldo masirkunsisyun p ya ing bingut, pemalagyuan deng Jesus, ing lagyung binie na ning anghel bayu ya pa mipangagli.

III. Turu

Ing metung a babai, balu na ing sinyalis nang babie ning katawan na potang mabuktut ne. Balu na nung makananu ing kakagli, nung makananu manaliwa ing gana na king pamangan. Balu na naman king paminsanminsan, ating oras a makasumpung ya kabuysitan. Mas kalakalale ya. Ing dati nang gagawan inyang e ya pa mabuktut, e na ngan agagawa ngeni uling mabuktut ne. Ing bie na king kilub ning siyam a bulan manaliwa yang bagya. At siguru lalu yang manaliwa potang ibait na ne ing anak na. Ing kekatamung ebanghelyu, tungkul ya kang Maria, a indu nang Jesus. E na kalupa karing aliwang babai a binanggit tamu, I Maria, mapalyaring e na ngan aintindian ing malilyari keya. Oneng siguru pagpilitan nang aintindian ing malilyari keya. Nung ika mo ing babaing mabuktut, makananu me mong dalan king kekang sinapupunan ing anak a balu mu anak ne ning Dios? Makananu me mong aintindian ing pangabuktut mu ngening ala ka pa naman a karelasyun king ninumang lalaki? Makananu mo ing panandaman mu ngening ing anak a atiu king sinapupunan mu, milalang ya lalam ning upaya ning Banal a Espiritu? At makananu meng sesen ing mibait a anak mu a balu mung anak ne ning Dios? At kabang daragul ya mo, malyari me kayang kamuanan ining anak a ini a balu mung anak ne ning Dios? Makananu meng pakiutusan ing anak mu nung balu mung anak ne ning Dios? Masakit a bage para aintindian ne ning metung a babai rening kutang tamu. Inya ana ning ebanghelyu kekatamu tungkul kang Maria:” Mitanam la deting bage king pamisip nang Maria at migunamgunam ya tungkul kareti.” (v. 19) Tinggap na king kasalpantayanan ining egana-ganang milyari keya, migunam-gunam ya ban lalu na pang aintindian ining malilyari keya. Ing kekatamung kasalpantayanan e na buring sabian tatanggapan ta nang tatanggapan ing egana-ganang sasabian da kekatamu king pisamban agyang e tamu aintindian ini. Ing tutung kasalpantayanan, manyad ya naman pamipalino ban lalu ta yang aintindian ing paniwalan tamu. Kuntoru aintindian ta ya kasi ing metung a bage, lalu yang lilino kekatamu at lalu ta lang anamnaman rening bage a tinggap tamu king kekatamung kasalpantayanan. Oneng makananu ta no man aintindian rening paniwalan tamu nung e tala pigunaman? Nung atin tamung ababalung apapalino da tungkul king kasalpantayanan tamu, manintun ta pa kayang panaun ban pigunaman ta la rening bageng apapalino da kekatamo? King bandang tauli, ing taung mitmung kasalpantayanan ya ing taung manahimik neng daramdaman na ing pamipalino ning amanu ning Guinu. Ing taung biasang manahimik ban migunam ya kareng bageng dimdam na, iya bandang tauli ing tutung makaintindi kareng amanu ning Guinu at ing mensahi na para keya. Kalupa nang Maria, a mitmung kasalpantayanan, reng taung lalalam a kasalpantayanan, ila reng taung biasang migunam kareng malilyari karela king bie. Uling nung e tamu biasang migunam kareng amanu ning Guinu at karing malilyari kekatamu king bie, palampasan tamu ing oportunidad a lalu yang lumalam ing kekatamung kasalpantayanan. Palampasan ta ya ing oportunidad ban turu na katamu ning Espiritu king malilyari king bie tamu. I Maria, indu ne ning Dios, uling indu neng Jesus. E ta ya apikawani ing panga-Dios nang Kristu king panga-tau na. Uling e ta ya pin apikawani iti, paniwalan tamu king I Maria, tutu neng indung Jesus a tutung Dios ampong tutung tau. Inya makanyan neng ausan ning Santa Iglesia I Maria bilang indu ning Dios, uling indu ne I Jesus. Reng Kristianu karing aliwang sekta, e da atanggap king I Maria indu ne ning Dios. Sasabian da king I Maria, indu niya mung Jesus – itang pangatau namung Jesus, at aliwa ing panga-Dios na. Imposibli kanu king mika indu ya ing Dios! King pamisip da, kakawani de ing panga-tau nang Jesus king panga-Dios na. E ya makanyan kekatamung katoliku. Uling I Jesus e me apikawani ing panga-Dios na king panga-tau na, ausan ta yang indu ne ning Dios I Maria. Metung yang maragul a karangalan para kang Maria iti. Alang taung lelangan keti yatu ing mika karangalan a ausan dang indu ning Dios nune kang Maria. Manalangin tamu king Indu tamu. Ngening magumpisa ya ing banua, anyaran ta keya king turuanan na katamung Maria nung makananung migunam kalupa na. King turuanan na katamu sanang makiramdam at manahimik neng magsalita ya ing Guinu king pamibiebie tamu at pigunaman ing gagawan na ning Dios kekatamu king balang aldo. I Maria ya ing modelo ning kasalpantayanan tamu. Pauli ning maragul nang kasalpantayanan, mika katuparan ing egana-ganang planu na ning Dios para keya ampon kekatamu. Maria, indu ning Dios, ipanalangin mu kaming makasalanan! Ilapit yu kami king anak yung Jesus! Amen.

IV. Pamigunam

Pagumpisan ta ya ing banwa king aldong ausan tamung New Year’s Day. Wa, ustu ya ini. Oneng kekatamung Kristiyanu, oini ing aldo a nung nukarin, pagmasusian ta ya ing panga Indu nang Maria – I Maria bilang indu ning Dios. Masakit yang pagumpisan ing bie nung alang indu. Makaniti ya naman king bie spiritual. Masakit tamung magumpisa king bie spiritual, nung ala mu namang indu. I Jesus, inumpisan ne ing pamibiebie na keti king yatu, kapamilatan na ning indu na, a I Maria. At inyang inari neng Jesus ing misyun na keti king yatu king kalbaryu, inari neng kayabe ne ing indu na, I Maria. Masakit ta yang aintindian ing bie kristiyanu tamu nung ala yu I Maria ban mantabe kekatamu. E ya Dios I Maria, e ya diwata. Kalupa tayang tau. Mibait ya naman. Memagkasakit ya naman. Oneng agyang mipadurutnan ya king sitwasyun a masakit kalupa tamu, ing tetagan na ning kasalpantayanan na iyang kapuri-puri keya. Ing linis ning kaladua na iyang lalauen tamu anti mong modelu king kekatamung pamibiebie. At ing pamaglakbe na king bie na, a kayabe ne ing anak na iyang buri tamu mu naman gawan neng tutukyan ta ya ing Guinu tamung Jesus. Ngening aldong iti, bayung banwa, ausan ta ya I Maria. Anyaran ta keya king saupan na ka tamu ngening bayung banwang iti. Saupan na katamu ban lumalam pa sana ing kasalpantayanan tamu, ban mabiasa ta pang migunam king malilyari kekatamu king bie, ban mabiasa tamung maglakbe kayabe ta ya I Kristo a tikyan nang Maria anggang king kalbaryo. I Mariang indu ning Dios, indu ta ya naman. Sana, kalupa ning metung a anak, e tamu tatakut munta king indu tamung Maria. E tamu sana mag-alinlangan manyad saup keya, lalu na potang magkasakit tanang tutu king pamibiebie tamu. Anyaran ta kang Maria, king antabayanan na katamu ngeni, at king oras ning kekatamung kamatayan. At sana, lalu na katamung ilapit king anak na a I Jesus. Amen.

V. Pamanahimik

VI. Tauling Panalangin

Ibpa, inaus ye I Maria ban maging indu ning anak yu I Jesus. Pinili ye I Maria uling kalugud-lugud ya kekayu. Uling mitmu ya king grasya, pinili ye bilang indu ning anak yu at indu mi ngan. Megumpisa ya pu ing pamibiebie ning Guinu mi keti yatu, kayabe ne I Maria, meyari ya naman pu kayabe na. Ibie ye pu kekami ing indu mi bilang mamantabe king kekaming pamibiebie. Ban kanita, agyang king oras ning kekaming kamatayan, atiu ya king lele mi, mamantabe kekami. Pasalamat ke pu kekayu Guinu, uling kang Maria, aintindian mi king ing kasalpantayanan mi, metung yang grasyang binie yu kekami, king ing pamigunam mi kareng malilyari king bie mi, ilang paralan ban lalu mi yang aintindian ing kaburian yu para kekami. Salamat Guinu. Salamat. Amen.

VII. Kutang

1. Migunam tamu karing milyari kekatamu inyang milabasan a banwa. Nanu mo ing mensahi ning Guinu kekatamu king milabasan a banwa?

Download here:
Page 1: http://www.mediafire.com/?2jf2o966b1jz9d7
Page 2: http://www.mediafire.com/?lc211eq1vdm5d4q