Domingo ning Pamaniubling Mie ning Ginu

Ing Pamaglakad Papunta Emaus

I. Pamuklat a Panalangin

Mayupayang Ibpa, parangalan mi ya ing Anak mung I Jesus, a Ginu ming sinubling mie.. Pabustan yu pung lilungan na kami ning Banal mung Espiritu ban miyang lalung aytindyan ing grasya ning pangasubli ng mebie ning Ginung Jesus. Amen.
II. Pamamasa

Lucas 24: 13-35

13King aldo mu ring ita, ding adua karing alagad papunta la king baryung ausan dang Emaus; atin yang labing metung a kilometru dayu manibat Jeruselam. 14Pipagsalitan da ing sablang bage milyari. 15Kabang mipagsalita la at mikukutnanan, linapit ya i Jesus at mekiyagnan ya karela. 16Ikit de, oneng e re bitasang akilala. 17Kitnan na lang Jesus, Nanu ing pipagsalitan yu kabang lalakad kayu?” Tinuknang la; mitmu lang lungkut. 18Ngana kang Jesus ning metung a milagyuan Cleopas, “Ikayu na mung dili karing manuknangan Jerusalem ing e maki balu karing bage a kaybat-ibat pa mung mepalyari karin? 19Nganang kinutang, “Nanung bage?” Pekibat da, “Ding bage mepalyari kang Jesus ning Nazaret, ing propetang mayupaya king dapat at amanu king arapan na ning Dios at ding sablang tau. 20Dinemanda re ding kekaming pekapun ding pari at ding makatua na ning balen ban miyatulan kamatayan at pepapaku re king krus. 21Ya pa naman ing asahan ming magligtas king Israel! Subali pa kanita, iti ya na ing katlung aldo manibat inyang milyari ita. 22Mebigla kami king belita da ring mapilan a babaing kayabe mi. Minta la kanu king kutkutan nanding abak a maranun 23at e re disnan ing bangke na. Migbalik la at sasabian da king menakit la kanung anghel a sinabi karela king mabie ya i Jesus. 24Minta la naman king kutkutan ding mapilan a kayabe mi at makanyan pin ing disnan da; oneng e ria naman ikit i Jesus.” 25Kanita sinabi nang Jesus karela, “Kapurul yu naman a isip! Angga ngeni e yu pa paniwalan ing sablang inula da ring propeta?” 26E wari kailangan king i Cristo dumalan ya king sablang bage iti bayu ya lungub king Kayarian na?” 27At selese nang Jesus karela ing masasabi karing sablang kasulatan tungkul keya, manibat karing libru nang Moises at karing Kasulatan da ring sablang propeta. 28Miraras na la king baryung karelang pupuntalan at pepawaga nang Jesus king isundu na pa ing pamaglakad. 29Oneng pinigil de. “Ngara, “Tuki na kayu pa mu kekami, lalbug ne ing aldo at daralumdum na.” Inya tinuki yang sinalangi karela. 30Inyang kasulu da ne king pamangan, kinangwa yang tinape at pepasalamat ya king Dios; at pemirasu ne ing tinape at binie ne karela. 31Mibuklat la mata at akilala ra king ya pala i Jesus, oneng bigla yang mewala king panimanman da. 32Ngara king metung at metung, “Inya pala balamu milalablab kata pusu kabang pakisabian na kata king dalan at lilinawan na la kekata ding kasulatan!” 33Kanita mu rin linakad la at migbalik Jerusalem . Disnan da lang makatipun ding labing metung at ding aliwa pang kayabe ra 34a sasabing, “Tutu ya ping sinubling mebie ing Ginu! Pepakit ya kang Simon! 35Belita da ring adua katau ing milyari kabang dalan at nung makananu reng akilala ing Ginu inyang pemirasu ne ing tinape.

III. Turu

Metung kareng parati ng gagawan Jesus ing papuntalan na lang tidwa o paris ring kayang disipulus king misyun (Mk 6:7; Lk 10:1).Makanini mu naman ing kalakaran kareng sundalus o pulis ngeni neng atin lang misyun. Pamaglagwan de iting “buddy system” na akit at panandaman mung atin kang kayabe at kayantabe king metung a misyun. Keng 2 Timoteo 4:9-13 akit tamu na i San Pablo silatan ne i Timoteo ban agad magbalik ban atin yang akayabe king misyun na.

King Matuang Tipan o Mosaic Tradition, keng metung a pisasabyan mas kapani-paniwala ya ing metung a witnes nung atin pang metung a magpatutu king sasabyan na ning witness (Dt 19:15).

Ing Ginu tang Jesu Kristo, sinabi na naman na “Nung misan metungla ding adua kekayu keti king yatu nanumang aduan yu king panalangin, ibie na kekayu ning Ibpa kung atyu banua. Uling nukarin man ating adua o atlu kataung mitipun king lagyu ku, atyu ku libutad da” (Mt 18:20).

Atin lang tradition reng “rabbi” o pari king Israel na kasabyan karela na “Nung ating adwang makalukluk at panigaralan de ing “Torah”, o ing “Shekinah” at iti pamalagwan dya namang banal a pamitipun na atyu busal da ing Ginung Dios a mayupaya.

Kapamilatan na ning karanasan dareng adwang disipulus king ebanghelyu payabut na ning sinubling mebie Jesus na parating atyu ing presensya na, e mu keng pamipirasung tinape (vv30-31) o kaya king pamamasa, pamakiramdam o pamanigaral kareng kayang Banal a Amanu (vv25-27;32) nune araranasan taya ing kayang pangasubling mebie neng mititipun tamu king lagyu na. King amanung Griyegu, ing pamipagkwentu dareng adwang disipulu pamalagwan deng homileo o pakipagtalamitam dareng miyabe-abe. At keti re kingwa ing amanung “homily” king misa.. Amen.

IV. Pamigunam

Ating pilosopiya na kapilan man ing tau e pweding miyeng dili-dili, king amanung inglis “No man is an island”. Tutu ya ing pilosopiyang iti, uling mag dependi ta ngan king metung at metung. Mibayit ta king yatung iti e king sarili tang kaburyan o lakas. Mibayit ta king yatung iti pauli dareng pengari tamu at syempre pauli ning mamye bie, ing Apung Ginu. Potang atyu ta king atyan ning ima tamu, kilub ning syam a bulan, mag dependi tamu mu king ima tamu nung nanu ing kakanan na, iyang pamangan tamu mu naman. At ing pamangan ayni babye na ning pengari tang lalaki na ibat king kayang obra. At nung ala yu ing pamanantabe ning Ginu kareng pengari tamu, e taya siguradung akit ing malagung yatung iti.

Buri ng ipayabut ning Ginu keka tamu ngeni na king pamaglakbe ta king yatung iti kaylangan taya ing pamanantabe na. Ikit tamu king istorya dareng adwang disipulu na kabang maglakbe lang kayabe de ing Ginung Jesus papunta Emaus milalablab la ring pusu ra.
Itamu, panamdaman taya paya ing presensya ning sinubling mebie Jesus king pamaglakbe ta king yatung ite? Panamdaman taba ing penandaman dareng adwang disipulus, na milalablab la reng pusu ra king saya at tula uling kayabe re ing Ginung Jesus?

Balu tamu na masakit ampo pang malungkut ing magdili-dili, kaylangan tala reng aliwang tau ban pipagkwetuan ing lugud at lingap na keka tamu ning Apung Ginu. Pakikwanan tamung mitipun ban samban, puryan at pasalamatan taya parati at mangga man king alang angga. Amen.

V.Pamanahimik

VI Tauling Panalangin

Ibpa, dakal pung dakal a salamat king Anak yung Jesus at apakikwanan ming abalu na asne ka importanti ing presensya ning Ginung Jesus king pamaglakbe mi king yatung iti. Parati na kepu sanang abayanan ban parating aranasan ing lagablab ning lugud na kekami. Amen.

VII. Kutang

1. Paniwalan mu ba na potang reng adwa o atlu misasabi la tungkul king Apung Ginu atyu king busal da ing Ginung Jesus? Nung wa o ali, bakit?
2. Nanu lamo reng palatandanan na ing Ginung Jesus atyu ya king busal ning grupu yu o king pamilya yu?
3. Atin kabang agaganakang insidenti na penandaman me talagang atyu ing Ginung Jesus king busal ning grupu yu?

Download here:

Page 1: http://www.mediafire.com/file/vhr5kxg1yynz4n5/04.24.11%20pg.%201.doc

Page 2: http://www.mediafire.com/file/n8w7qix0l460d13/04.24.11%20pg.%202.doc

Domingo ning Palaspas ning Pamailasa ning Ginu

Ing Pamakitanguanan nang Judas karing Kalaban nang Jesus

I. Pamuklat a Panalangin

Ibpa, ing kapanyamban, kapuryan at kapasalamatan king pasibayung binye yung oras ban mikit-ikit kaming mikakapatad king lagyu ning kekang Anak i Jesus. Dinan yu kepung malam a lub at masalang kaisipan ban tumimu la kekami reng buri ng ipayabut ning ebanghelyu ngeni. Amen.
II. Pamamasa

Mateo 26:14-27:66

14Kanita ing metung karing labing adua, itang milagyuan Judas Iscariote, mekikit ya karing pamuntuk da ring pari. 15Nganang kinutang karela, “Nanung ibie yu kanaku nung saupan sa kayung makarakap kang Jesus?” Beyaranan deng atlung pulung salaping pilak. 16Manibat na kanita menintun neng oportunidad i Judas ban apagtaksilan ne i Jesus. 17King mumuna nang aldo ning Piesta ning Tinape Alang Lebadura, linapit la ding alagad nang Jesus at ngarang kinutang, “Nukarin mu buring isadia mi para keka ing apunan na ning Pamaglagpus?” 18Nganang mekibat karela, “Puntalan ye itang metung a tau king siudad, at sabian yu keya, ‘Ing Maestro sasabian na: ing oras ku miras na. Buri kung pagselebran ing Pamaglagpus king bale mu a kayabe ding alagad ku.’” 19Depat da ring alagad ing penabilin nang Jesus karela at sidia ra ing apunan para king Pamaglagpus. 20Inyang mabengi na, linukluk yang mengan i Jesus a kasulu da ring labing adua. 21Nganang Jesus kabang mamapun la, “Ing katutuan sasabian ku kekayu: pagtaksilan na ku ning metung kekayu.” 23Mebalisa la lub ding alagad kaniting sinabi nang Jesus. Ing metung karela kitang na, “Gino, ako?” Mekibat ya i Jesus, “Ing mitiltil king tinape na king pinggan abe ku, ita ya ing magtaksil kanaku. 24Arapan na ning Anak ning Tau ing kamatayan na, antimo ing sasabian ding Kasulatan, oneng makalunus ne itang taung maging kasangkapan na ning pamagtaksil king Anak ning Tau! Mayap pa ing e ne mibait!” 25Kanita i Judas, ing magtaksil kang Jesus, migsalita ya, “Aku galang ing amanuan mo, Maestro?” Mekibat ya i Jesus, “Ika na mismu ing sinabi.” 26Kabang mamangan la, kinangwa yang tinape i Jesus; pepasalamat ya king Dios, pemirasu ne ing tinape at binie ne karing alagad na. Ngana, “Tanggapan ye iti at kanan ye; iti ya ing kanakung katawan.” 27Kaybat na nita, kinua ne ing kopa; pepasalamat ya king Dios at binie ne karela. At nganang sinabi, “Minum kayu kaniti, ikayu ngan; uling iti ya ing daya a maging tanda ning kasunduan ning Dios, ing daya kung mibubu ban mipatawaran la kasalanan ding dakal a tau.

III. Turu

Adwa lang puntu reng buri ng ipayabut ning ebanghelyu ngeni kekatamu. Ing mumuna yapin ing pamagtaksil ning metung a alagad ning Ginu tang Jesu Kristo, i Judas Iscariote at ing kadwa, yapin ing pamagtatag ning Ginung Jesus king Banal a Eukaristiya na akit tamu na king tauling apunan, balu nana ning Ginung Jesus ing malyaring kasakitan at kamatayan na king Krus.
Keng Mateo 26:6-13, ikwa rang mimua ding alagad keng metung a babai, anyang tigtug na ing pabanglu king buntuk nang Jesus. Pasayangan daring alagad ing pabanglu ot e nana kanu pisaling mal ning babai ban ipamie ing abli karing pakakalulu. Kaybat ning diskusyun ayni tungkul king pera, metung pin kareng alagad, i Judas Iscariote ing minta kareng pamuntuk dareng saserdote ban magtaksil kang Jesus, At ing kapalit o kabayaran, ing atlung pulung kualtang pilak. At king panaun ayta, ing alagang atlung pulung kualtang pilak ya ing kabayaran keng metung a ipus (Nung ing segu na ning toro metung yang ipus a lalaki o babai, mamayaran yang atlung pulung pirasung pilak ing makibandi king ipus, Exodo 21:32); (Zacarias 11:12, Ngaku karela, “Nung bisa kayu, ibie yu la ding sueldu ku. Nung e kayu bisa, kekayu na la.” Inya beyaranan da kung atlung pulung pirasung pilak bilang sueldu ku.”)

King pamagtaksil ng Judas Iscariote king Ginu tang Jesu Kristo, mangabaldugan mu ing pinili na ing pamaging ipus o alipin. Mas liguran ne ing pera kesa king Ginung Jesus. Pepa ipus ya kaniti at king pamaglugud na king pera iya ing meging sangkan ning kayang kamarinayan.

Pauli ning panga-ipus ng Judas kareng pera, akalingwan ng agad ing lugud at pakamal na kaya ning Ginu tang Jesu Kristo. Balu na ning Ginu na magtaksil ya kaya, pero inabe ne pa murin king tauling apunan. Kayabe ya pa murin kareng mekumbida, e ne inatsa-pwera ning Ginung Jesus. Makayarap at dimdam na pang Judas ing sinabi ning Ginung Jesus ngana “Minum kayu kaniti, ikayu ngan”. E na sinabi ning Ginung Jesus, minum kayu kaniti, pwera i Judas, uling magtaksil ya kanaku. Amen.

IV. Pamigunam

King pamagmasusi ta king pamailasa at kamatayan ning Ginu tang Jesu Kristo. Ganakan tala reng maralas a pamikatagun na maging kawangis taya i Judas. Mas pipilinan taya ing pera o materyal a bage kesa king kaburyan ning Ginu tang Jesu Kristo. Maging ipus tamu mu naman ning materyal o pera. Nya panyawad tala reting kapatawaran king Ginu, na sana dinan na katamung masalang kaisipan ban e tamu agad akakalingwan ing kayang lugud. E ta sana kakalingwan ing binye na ing kayang sarili ban tamung milako pangagapus king panga alipin o ipus king pera o materyal, na yang maging sangkan ning pangalaut ta Kaya.

Parati ta sanang aganaka ing ala yang inatsa-pwera king pamanagkat na king kaligtasan. Binye ne ing sarili ng daya o bie keka tamu ngan. Mayap o marok taman tau, agkatan na katamu ngan. Amen.

V.Pamanahimik

VI Tauling Panalangin

Ginung Dios, dakal pung dakal a salamat king pamikatagun king pamanuru yu kekami nung makananu ing manatiling tapat keka, na e marapat ing ipagpalit raka king pera o materyal a bage. Salamat murin king kaligtasan na babie mu kekami ngan. Para kareni Ginu, Dakal pung dakal a salamat. Amen.


VII. Kutang

1. Ibye ya ing opinyun. “Ing lugud king pera o materyal ya ing amut ning dewakan.”
2. Mamye ta na mong pamikatagun na nung nukarin mas pipilinan ne ning tau ngeni ing pera kesa king Apung Ginu.
3. Ngening kasalukuyan, nanu ya kabaldugan keka ing kasakitan at kamatayan king Krus ning Ginung Jesus?
4. Makananu ta kayang makasaup ban ipabalu kareng tau na ing pera o materyal a bage kukupas, mawawala at e ta dalan iti king kutkutan?

Download here:
Page 1: http://www.mediafire.com/file/har50fz7mp9z5dy/04.17.11%20pg.%201.doc
Page 2: http://www.mediafire.com/file/5gdel6c9mi4mp3w/04.17.11%20pg.%202.doc

Kalimang Domingo ning Kuaresma

Ing Pangamate ng Lazaro

I Pamuklat a Panalangin

Malugud at mayap a Ibpa, ngeni pung kaorasan asna kami pu kapalad uling parati yu pung babie ing kekayung grasya. Dakal pung salamat king pamagkalub yu kekami king kekayung Anak i Jesus na pabalu at pepakit na ing bieng ayni manibatan ngan keka. Amen.

II. Pamamasa

Juan 11:1-45

Ating metung a taung masakit; Lazaro ing lagyu na. Tau ya Betania, ing balen nang Maria at ning kapatad nang i Marta. (2I Maria ya ing mitugtug pabanglu at menamulis karing bitis na ning Ginu king kapamilatan na ning buak na. Kapatad ne i Lazaro, ing masakit.) 3Inya pepabalita da ring mikapatad a babai kang Jesus ing anti kaniti: “Ginu, masakit ya ing kakaluguran mu. 4Inyang tinggap nang Jesus iting balita, sinabi na, “E na ikamate iting sakit; nune milyari iti para king ikaligaya na ning Dios ban mipaligayan ya ing Anak ning Dios king kapamilatan na niti.” 5Kaluguran na lang Jesus di Marta, Maria at i Lazaro. 6Inyang abalitan nang masakit ya i Lazaro, menatili ya pang aduang aldo king lugal nung nu ya karin. 7Kaybat na nita, sinabi na karing alagad. “Tara, magbalik tamu Judea.” 8Ngara ding alagad, “Maestro, bayu pamu buri da kang basibasan ding Judio; ngeni magbalik na ka na naman karin?” 9Nganang Jesus karela, “E ya wari labing aduang oras ing patingapun? E ya mitakid ing ninumang lalakad king masala uling akakit na ing sala na ning yatu. 10Oneng mitakid ya ing ninumang lalakad king bengi uling alang sala keya.” 11At ngana pa, “Matudtud ya ing kakaluguran tamung i Lazaro, oneng puntalan ke ba keng gisingan.” 12Ngara ding alagad, “Ginu, nung matudtud ya, mipaldan ya.” 13Ing buri nang sabyan Jesus, mete ne i Lazaro; bala da ring alagad ing karaniwan a pamanudtud ing amanuan na. 14Inya malino nang sinabing Jesus karela, “Mete ne i Lazaro. 15Oneng king uli yu matula ku king ala ku karin ban maniwala kayu. Tara, puntalan ta ya.” 16I Tomas a mayayaus kambal, sinabi na karing kalupa nang alagad, “Tara, tukian ta ya ing Maestro ban nung mate ya, mate tamu munaman!” 17Inyang miras ne i Jesus, abalu na king apat neng aldo mikutkut i Lazaro. 18Malapit ya ing Betania king Jerusalem; ating atlung kilometru manibat karin. 19At dakal lang Judio ding dinalo kari Marta at Maria ba da lang damayan uli na ning pangamate na ning kapatad da. 20Panamdam nang Maria king daratang ya i Jesus, tinipa ya at seganan ne. Melakuan ya i Maria king bale. 21Nganang Marta kang Jesus, “Ginu, nung atyu ka keti e ya sana mete ing kapatad ku! 22Agyang ngeni balu ku king ibie na keka ning Dios ing nanumang aduan mu.” 23Nganang Jesus kang Marta, “Mie yang pasibayu ing kapatad mu.” 24Mekibat ya i Marta, “Balu ku king mie yang pasibayu king tauling aldo.” 25Nganang Jesus, “Aku ing pamaniubling mebie at ing bie. Ing maniwala kanaku, agyang mate ya, mie yang pasibayu; 26at ing ninunamang mabibie at maniwala kanaku e mate kapilan man. Paniwalan mu ite?” 27Nganang mekibat, “Wa, Ginu paniwalan ku king ika ing Cristo, ing Anak ning Dios a datang keti king yatu.” 28Pangasabi na niti, meko ya i Marta at inaus ne i Mariang kapatad na at sinitsit na, “Atyu ing Maestro, kukutang na ka.” 29Panamdam nang Maria kaniti, memalagua yang tinikdo at selubungan ne. (30E pa miras kanita i Jesus king balen; atyu ya pa king lugal nung nu ne seganan Marta.) 31Inyang ikit deng memalaguang tinikdo at linual, tikian de i Maria ding Judiong darame keya king bale. Bala ra munta ya king kutkutan ban manangis karin. 32Miras ya king lugal nung nu ya karin i Jesus. Panakit na kang Jesus
siniklaud ya i Maria king arap na at ngana, “Ginu nung atyu ka keti e sana mete ing kapatad ku!” 33Panakit nang Jesus king i Maria manangis ya at pati ding Judiong kayabe na, mengisnawa yang malalam at metagkil ya kapanamdaman. 33Nganang
kinutang Jesus karela, “Nu ye kitkut?” Mekibat la, “Mekeni, Ginu at lawan mu.” 35Kiniak ya i Jesus. 36Inya sinabi da ring Judio, “Talagang kaluguran ne i Lazaro!” 37Oneng ngara ding mapilan, “Pepasala ne mata ing bulag! Baket pepaburen neng mete i Lazaro?” 38Pasibayu yang mengisnawang malalam i Jesus at kaybat minta ya king kutkutan. Iti metung yang kueba a makatakap batung maragul. 39Nganang Jesus karela, “Ilako ye ing batu.” Mekibat ya i Marta, kapatad na ning mete, “Ginu, mamau ne kanyan uling apat neng aldo makakutkut!” 40Nganang Jesus, “E ku wari sinabi keka king nung maniwala ka akit mu ing ligaya na ning Dios?” 41Inya leko re ing batu. Tinalanga ya banua i Jesus at ngana, “Ibpa, pasalamat ku king pakiramdaman mu ku. 42Balu ku king pakiramdaman mu ku kapilan man, oneng sinabi ku iti king uli da ring taung atyu keti ba lang maniwala king ika ing mitubud kanaku.” 43Pangasabi na niti, kinulait yang masikan. Ngana, “Lazaro, lumual ka!” 44Linual ya ing mete; makabalut la ding gamat at bitis na king telang pamburul at makabalut yang imalan ing lupa na. Nganang Jesus karela, “Kalagan ye at paburen yeng lumakad.” 45Uli na niti, meniwala la kang Jesus ding keraklan karing Judiong dinalo kang Maria at menakit king depat na.

III. Turu

Asna karagul kalam kekatamung tau ing pamikatawan ng tau ning Ginu tang Jesu Kristo. Uling king kapamilatan na niti, ikwa ng abalu at aranasan ing kapanamdaman tamu. Masala tang ikit iti king mebasang ebanghelyu nyang kinyak ya ing Ginung Jesus keng pangamate ning kaluguran nang i Lazaro. Ing Ginung Jesus, antimong kalupa tang tau, potang ating mewala bie kareng kaluguran tamu siguradu mu ing panamdaman ta iti. Nya nung nanu man ing daranasan tang kapagsubukan o problema, siguradu mung ayntindyan na katamu.

Metung mu naman kareng buri ng ipayabut ning ebanghelyu, yapin ing emu king saya o tula taya akakayabe ing Ginung Jesus, nune maski pa king mabayat o masipit a sitwasyun ta king bie. Maralas pin ing mas panamdaman taya ing presensya ning Ginung Dios neng atyu ta king mabayat a sitwasyun. Uling potang maybug tanang sumuku, karin taya ausan at pasaklolu Kaya. Iyang mamye lakas ban e tamu sumuku kareng kapagsubukan ning bie.

Ating metung a lider king Guagua, ngana pin nyang minsan, “Kaylangan ne talaga ning tau ing kasakitan”, uling kapamilatan ning kasakitan karin taya panamdaman ing ating parating pag-asa. At ing pag-asang iti yapin ing Ginung Jesus na parating sasaklolu kekatamu.” Digdag na pa, “Makananu meng abalu ing pamag-asa nung alang kasakitan? At panamdaman tamu ating malugud at mayap a Dios nung ating kasakitan king bie.” Amen.

IV. Pamigunam

King mitmung katahimikan, ganakan tala reng mangasakit a mengapalyari king bie tamu.. Ganakan tala reng kaluguran ta king bie na misan kayabe tala king tula, saya at lungkut. Suryan tala reng sarili tamu, nung makananu talang alampasan reng mangasakit a mengapalyari king bie tamu. (Limang minutung katahimikan). Ninu reng taung memye kekang sikanan ban akabyusan ing mabayat a problema? Anyang ala nang taung mekasaup ketang maragul at mabayat mung problema, Ninu ing inaus mu? Kaninu ka pesaklolu?

Siguradung metung yamu ing ausan tamu potang ala tanang akarapat, at iti yapin ing Ginu tang Jesu Cristo.. na e na katamung agyung tiisan. Mikatawan yang tau ing Ginu tang Jesus ban na katamung ayabut. Pebustan ng minta ya king sitwasyun tamu ban kanita mas lalu na katamung ayntindyan. Amen.

V.Pamanahimik

VI Tauling Panalangin

Dios a Ginu mi, dakal pung dakal a salamat king parating pamanantabe yu kekami. Abalu mi pu ngeni na kaylangan ya king tau ing kasakitan ban kanita e milako ing pamag-asa mi. Ikang parating pag-asa mi Ginu, uling nung ala ka, e maging ganap ing bie mi. Amen.

VII. Kutang
1. Nanu ya ing pekamabayat mung meging problema king bie na king kabalwan mu ing Dios ya ing ginawang paralan ban alampasan iti?
2. Para keka nanu ya kabaldugan ing kasakitan?
3. Nanung asabi mu king sinabi na nitang metung a lider king Guagua na, “Kaylangan ne talaga ning tau ing kasakitan”, uling kapamilatan ning kasakitan karin taya panamdaman ing ating parating pag-asa.”?

Download here:
Page 1: http://www.mediafire.com/file/2o3odd9x21b5kxk/04.10.11%20pg.%201.doc
Page 2: http://www.mediafire.com/file/6f6lw4ari3qinsg/04.10.11%20pg.%202.doc

Kapat a Domingo ning Kuaresma

Pepakayap neng Jesus ing Taung Mibait Bulag

I. Pamuklat a Panalangin

O Ibpa ning sala, payintulutan me y Jesus, ing sulu ning meto yatu, ing pakayapan na kami at pagkaluban kasalpantayanan at pamanalastas. Bustan mung ibalik no ring kekaming panimanman ban akit mi ya ing dalan payinturu keka at karing kapara ming tau at king kapupusan ning kekaming dalan akit daka sana. Iti yang adwan mi king lagyu ng Jesu Kristong Ginu mi. Amen.
II. Pamamasa

Juan 9:1-41

1King panaun a ita, kabang lalakad ya y Jesus ikit ne ing metung a lalaking bulag ibat pa king pangabayit na. 2Kitang da ring alagad na, “Maestro, ninu ing makikasalanan king pangabait nang bulag-ing lalaking iti o ding pengari na?” 3Mekibat ya I Jesus, “Bulag ya e uling mikasala ya o ding pengari na. Iti milyari ban king kapamilatan na mibulalag la ding dapat na ning Dios. 4Kabang aldo pa na sukat ta lang daptan ding dapat na nitang mitubud kanaku. Ing bengi daratang nung kapilan ala nang makapagobra. 5Kabang atyu ku king yatu, aku ing sulu ning yatu.” 6Inyang asabi na iti, linura ya king gabun at ginawa yang burak king kapamilatan na ning gabun at lura. At kiskas na ing burak karing mata na ning bulag. 7Ngana, “Munta ka at manimu king Sibul ning Siloe.” (Ing Siloe mangabaldugan yang “Tinubud.”) Inya minta ya at menimu at mibalik yang manakit na. 8Ngara ring keyang kasiping bale ampon ding menakit keya inyang bulag ya, “Aliwa iti ing lalaking parating makalukluk at magpalimos?” 9“Ya pin,” ngarang mekibat ding mapilan. “Aliwa ya, kalupa nia mu,” ngara naman ding aliwa. Oneng sinabi na ning bulag, “Aku ita.” 10Kitnan de, “Makananu lang mesala ding mata mu?” 11Pekibat na, “Ginawa yang burak ing taung ausan dang Jesus at kiskas na iti karing mata ku at sinabi na kanaku , ‘Munta ka king Siloe at manimu ka.’ Inya minta ku at menimu at menakit ku.” 12Ngarang kinutang, “Nu ya karin?” Nganang mekibat, “E ku balu.” 13Dela re karing Pariseo ing lalaking bulag. 14Aldo Sabbath inyang ginawa yang burak I Jesus at pepasala ne mata. 15Kitnan dia naman ding Pariseo nung makananu yang mesala mata. Nganang mekibat karela, “Kiskas na ing burak karing mata ku at menimu ku at ngeni manakit na ku.” 16Ngara ding mapilan a Pariseo, “E ya king Dios ing taung ita uling e ya tutupad king Aldo ning Sabbath.” Oneng sinabi da ring mapilan, “Makananu yang makarapat ing taung makasalanan karing anti kareting milagru?” Milaban-laban ing sasabian da. 17Inya pasibayu deng kitnan ing sadiang bulag. Ngara, “Ika naman, nanu ing asabi mu tungkul keya anti na ning pepasala na la ding mata mu?” Pekibat na, “Propeta ya.” 18E la bisang maniwala ding Judio king sadia yang bulag at ngeni manakit ne anggang e da la inaus ding pengari na. 19At kitnan da la, “Anak ye iti? Sasabian yu king mibait yang bulag. Nanu ing sangkan baket manakit ya ngeni? 20Mekibat la ding pengari na, “Balu mi king ya ing anak mi at king mibait yang bulag. 21Oneng e mi balu nung makananu yang manakit na ngeni o nung ninu ing mekapasala karing mata na. Kutnan ye; atyu ne king idad at makapagsalita ya para king sarili na!” 22Makanyan lang migsalita ding pengari na uling tatakut la karing Judio at uli na ning pikasundu da ring Judio king itiwalag de king sinagoga ing ninumang sumabi king I Jesus ya ing Cristo. 23 Inya ngara ding pengari na, “Kutnan ye; atyu ne king idad! 24Inya pasibayu deng inaus ing sadiang bulag ngara keya, “Sabian mu ing katutuan arapan na ning Dios! Balu mi king makasalanan ya ing taung ita.” 25Nganang mekibat, “E ku balu nung makasalanan ya o ali. Metung mu ing balu ku: kanita bulag ku, oneng ngeni manakit ku.” 26Kitang da, “Nanu ing depat na keka? Makananu na lang pepasala ding mata mu?”
27Pekibat na, “Sinabi kuna kekayu at e kayu bisang maniwala. Baket buri yung damdaman pasibayu? Bisa kayu namang maging alagad na?” 28At inunsultu de, ngara, Ika na sanang diling alagad na, oneng ikami alagad na kaming Moises. 29Balu mi king migsalita ya ing Dios kang Moises, oneng tungkul king taung iti, e mi man balu nun gnu ya ibat!” 30Nganang mekibat ning taung mesala mata, “Yan ing makapagmulala! E yu balu nung nu ya ibat, makanyan man ya ing pepasala karing mata ku! 31Balu tamu king e na la pakiramdaman ning Dios ding makasalanan, oneng pakiramdaman na la ding tune sasamba keya at tutupad king kaburyan na. 32Manibat na king pangalalang na ning yatu ala pang mibalitang mekapasala karing mata na ning mibait bulag. 33Nung e ya ibat king Dios ing taung iti, ala yang arapat nanuman.” 34Pekibat da, “Ikang mipanganak at meragul king kasalanan, ikang turu kekame?” At tiwalag de king sinagoga. 35Abalitan nang Jesus king tiwalag de; inyang ikit ne sinabi keya, “Maniwala ka wari king Anak ning Tau?” 36Mekibat ya, “Ninu ya, ginu, ban paniwalan ke?” 38Nganang Jesus, “Ikit mu ne at ya ing kapagsalita mu.” 37Ngana ning lalaki, “Maniwala ku, Ginu!” At sinamba ya kang Jesus. 39Sinabi nang Jesus, “Dinatang ku king yatung iti ban matul, ban manakit la ding bulag at mabulag la ding manakit.” 40 Dimdam da iti ding mapilan karing Pariseo a atyu karin kayabe na, at kitang da, “Ing buri mung sabian bulag kame?” 41Mekibat ya I Jesus, “Nung bulag kayu ala kayu sanang kasalanan; oneng sasabian yu ngeni, ‘Manakit kami,’ inya manatili kayung makasalanan.”

III. Turu
Ngening pagmasusyan taya ing Kapat ng Dumingu ning Kuaresma, tuturu na ning ebanghelyu na ing pamangilalang malalam king Apung Ginu metung yang prosesu. Dimdam taya ing istorya ning lalaking bulag, na kapamilatan ning Ginu tang Jesu Kristo meulu ya king kayang pangabulag. Mangabaldugan ing mamye murin palino o sala ban akilala tayang lubusan ing Apung Ginu yapin murin Ing Apung Ginu, grasya yang babye na iti keka tamu. At kaybat ng binye ing grasyang ayni keka tamu, kanita tapa akit na tunggal ditak akikilala tayang lubusan ing Apung Ginu. Anyang mumuna kitnan de ing lalaking bulag nung ninu ing mibalik king pamisala dareng kayang mata, ing pekibat na, “Ginawa yang burak ing taung ausan dang Jesus at kiskas na iti karing mata ku at sinabi na kanaku , ‘Munta ka king Siloe at manimu ka.’ Inya minta ku at menimu at menakit ku.” Kening dakeng ayni, ing balu namu ning bulag ing menulu kaya I Jesus. Kaybat kitnan dya naman ding Pariseo, nung ninu ing pepakayap kaya at keni ing pekibat na, “Propeta ya.” Kening dakeng ayni, ing bulag akilala na ne Ing Ginu tang Jesus na metung yang Propeta.
At king bandang tauli, anyang abalitan na ning Ginu tang Jesu Kristo na tiwalag de reng Pariseo king sinagoga. Ing mismung Ginu tang Jesu Kristo pepakilala na ing kayang sarili king dating bulag. “Maniwala ka wari king Anak ning Tau?” Mekibat ya, “Ninu ya, ginu, ban paniwalan ke?” Nganang Jesus, “Ikit mu ne at ya ing kapagsalita mu.” Ngana ning lalaki, “Maniwala ku, Ginu!” At sinamba ya kang Jesus. Amen.

IV. Pamigunam

Tutu pin kaluguran a kapatad na grasya yang manibatan king Apung Ginu ing kapagnasan tamung akilala taya. Iyang babies ala kareng mata tamu ban tayang akilala. King aldo-aldo tang pamibie-nie, ing Ginu tang Jesus ala yang sawang pakilala na ing tune ng lugud ning Dios kekatamu. Ing problema kekatamu, magbulag-bulagan tamung kalupa daring Pariseo kanita. Atin ping kasabyan na ing pekamasakit kanung gisingan yapin retang taung magtudturan. Reng masakit kanung turuanan yapin retang taung mimisip na balu danangan ing kegana-gana. Reng masakit kanung pastulan yapin retang taung sasabing balu dane ing dalan. Payabut na kekatamu ngening Jesus na reng taung sasabing kilala raneng lubusan ing Dios at lalon dalang mababa reng kalupa rang tau, makalunus la king arapan ning kayang Ibpang atyu banua. At reng taung makanini panugali, atin lapin sanang matang manakit pero king katutwanan ila ring bulag king arapan ning Apung Ginu. Amen.

V. Pamanahimik

VI. Tauling Panalangin

O malugud at maganakang Ibpa, dakal pung salamat king pigkalub mung mayap a oras kekami. Abalu mi pun a ika ing mamye grasya ban lalu rakang akilala. Parati yo pung pamasalan reng mata mi ban akit mi ing tune makaligaya Keka. Ing kapasalamatan, kapuryan at kapanyamban king Ibpa, Anak at Espiritu mangga man king alang angga. Amen.

VII. Kutang

1. Nanung gewa ng paralan ning Apung Ginu ban akilala me king bie mu? Ikwentu.
2. Panwalan mu bang kabang daralan tang kapagsubukan, mas lalu tayang akilala ing Dios? Wa o ali, paliwanag.
3. King kasalukuyan, king kekatamung komunidad, nanu la reng akakit tamung dapat midinan sala? Nanu ing dapat tang gawan?

Page 1: http://www.mediafire.com/?44tdgg834a5bh8w
Page 2: http://www.mediafire.com/?6zdxb3ah5z7v8a0