Kapat a Domingo ning Ordinaryung Panaun

Ding Tune Mapalad at Masaya

I. Pamuklat a Panalangin

O Dios a Ibpa mi, dakal pung kapasalamatan king kaorasan ning pamitipun ming kayabe raka. Biryan mung pebalu nung ninu reng tutung mapalad kapamilatan dareng amanu ning kekang Anak, I Jesus. Gawan yu kepung mapakumbaba, mapamakalulu, makatuliran, at metung a malugud king kapayapan. Amen.



II. Pamamasa

Mateo 5:1-12

Panakit nang Jesus karing dakal a tau, minukiat ya king bunduk-bundukan. Inyang mekalukluk ne, linapit la ding alagad na. 2Kaybat megumpisa yang migsalita at nganang tinuru karela: 3“Mapalad la ding pakakalulu king espiritu, uling karela ya ing Kayarian ning Banua! 4“Mapalad la ding malungkut, uling paligayan na la ning Dios! 5“Mapalad la ding mapagpakumbaba, uling tanggapan da ing pengaku ning Dios! 6“Mapalad la ding daranup at kakau king kabanalan naning Dios, uling pakabsian na la! 7“Mapalad la ding mapaglunus, uling lunusan na la ning Dios! 8“Mapalad la ding malinis a pusu, uling akit de ing Dios! 9“Mapalad la ding gagawang paralan para king pamikakasundu da ring tau, uling mayaus lang anak na ning Dios! 10“Mapalad la ding daralan kaligaligan uli na ning pamanupad da king kaburian ning Dios, uling karela ya ing Kayarian ning Banua! 11“Mapalad kayu neng insultuan da kayu deng tau at liligaligan at magsalita lang miyayaliwang kapanyiran laban kekayu king uli ku. 12Tumula kayu at magsaya uling mikamaragul kayung ablas karin banwa. Makanyan da la namang ligalig ding propetang minuna kekayu.


III. Turu

Patsa dimdam taya ing amanung mapalad, nanu mo ing mumunang lulub king kaisipan tamu? Maralas, ing mumunang lulub king kaisipan tamu yapin ing misuerti ya ing metung a tau o kaya naman mikwalta ya. Nya naman asne kausu ing amanung “Share your blessing!” na ing buri ng sabyan ing idake tamu ing tinggap tang grasyang materyal kareng aliwa. Para kekatamu ing mapalad yapin itang taung dakal a pibandyan o kaya dakal a saken. Neng kayi naman, panamdaman tamu na ing mapalad tamu potang adadake taya ing presensya ning Dios kareng aliwang tau, kalupa na neng makapamie tang pamangan, imalan o nanu mang bage kareng kapus palad. Ing mapalad a tau para kekatamu yapin itang taung ating ispesyal a gagawan king kayang komunidad. Ita bang taung atin ispesyal a panaun para kareng aliwa. Neng minsan naman, ing mapalad para kekatamu yapin itang taung ating kapayapan o kapanatagan a lub king bie.
Buri ng ipayabut ning ebanghelyu ngeni, na ing metung a mapalad yapin itang taung e na manenaya pang ispesyal a oras ban yang sumaup o kaya itang potang mikwalta ya pamu. Eya mu dapat maging mapalad ing tau potang gugugulan ne ing kayang bie kareng ispesyal a ukasyun bagkus dapat king ordinaryu nang pamibie-bie. Babie ning Dios ing bendisyun na ban tang maging mapalad nung pakikwanan tang mibie-bie king kasalpantayanan, gawang mayap agya pang daranas tang kasakitan, idake ing lugud kareng aliwa king aldo-aldo tang pamibie-bie, e mu king amanu nune king pamidapat-dapat. Amen.


IV. Pamigunam

Ngening kaorasan kaluguran a kapatad migunam tamu ban pasibayu akit ta ing tune tang pamaging disipulu ning Ginu tang Jesu Kristo. Mayayakit la ba king aldo – aldo tamung pamibie-bie rening amanuan na ning Ginu tang Jesus mapalad? Panaligan taya ba ing Apung Ginu o reng aliwang bage ilang kekatamung panaligan? Antimo ing kabyasnan, pusisyun o kaya ing pibandyan. Mapagpakumbaba at mapaglunus tamu ba panugale? O, mapagmatas at e tala man pakiisip reng taung makapadurut keka tamu. Pagnasan tamu bang tupad kareng kautusan ning Dios? O, angga na la keng buntuk reng kautusan ning Dios at ala no king pamidapat-dapat. Maging instrumentu na katamu ba ning kapayapan? O, itamu ing maging sangkan ot bakit ating sigalutan o pamikamwa king kekatamung komunidad.

Nung namang maging mayap at maganaka tamu mu neng ala tang problema, neng maayus ing kegana-gana, neng atin pamikatagun o ispesyal a ukasyun karin tala agagana reng kekatamung kalupang tau, e tapa kabilang king kayarian ning Apung Ginu. At ini mangabaldugan ing e tapa mapalad. Ganakan tamu ing sinabi ng St. Therese of the Little Way, ngana, “E mayayakit ing pamaging mapalad neng gagawa tang mayap a bage kareng ispesyal a panaun ning bie tamu nune ing mapalad yapin itang atin tang maragul a pusu kareng kalupa tang tau king aldo-aldo o ordinaryu tamung pamibie-bie. Amen.

V.Pamanahimik

VI Tauling Panalangin

Ginu ming mayupaya, pepakit mu kekami ing tune kabaldugan ning pamaging ganap a tau. Ing tutung pamaging mapalad na mayakit king aldo-aldo o ordinaryu ming pamibie-bie, na aliwa mu king asbuk nune king pamidapat-dapat. Amen.

VII. Kutang

1. Kareng amanuan ng mapalad ning Ginu tang Jesu Kristo, sanu ta kareni mayna at malakas? Bakit?
2. Nanung asabi tamu king kasalukuyan a panlalawe ning tau tungkul king pamaging mapalad.
3. Nanu kaya ing pwedi tang agawa ban apabalu kareng kalupa tang tau, lalu na kareng kayanakan ing tune pamaging mapalad?

Download here:
Page 1: http://www.mediafire.com/?gvls40iivu04lty
Page 2: http://www.mediafire.com/?5c0ia0uvblf12c6

Katlung Domingo ning Ordinaryung Panaun

Ing Pamagumpisa nang Jesus king Obra Na Galilea

I. Pamuklat a Panalangin

Ibpa dakal pung salamat king pamamie yung oras ban mitipun kami king lagyu mu. Agkatan na ke pu ning kekayung Anak ban maging magliligo ning tau, tatangwanan miya pu kening panaus ayni. Pabustan yu pung maging malalam ing kekaming kasalpantayanan ban kanita pu maging epektibu kaming talatuki na. Amen.


II. Pamamasa

Mateo 4:12-23

12Inyang abalitan nang Jesus ing sinukul de i Juan, meko ya at minta ya Galilea. 13E ya menatili Nazaret nune minta ya at menuknangan Capernaum; metung yang balen ing Capernaum king lele ning Dagat-dagatan ning Genesaret, king sakup ning Zabulun at Neftali 14ban matupad itang ula ning propeta Isaias, 15“Gabun nang Zebulun, at gabun nang Neftali banda king dagat, kangatba ning Jordan, Galilea da ring paganu! 16Ding taung manuknangan king kadalumduman menakit lang maragul a sala! Karing manuknangan king anino ning kamatayan karela sunlag ya ing sulu!” 17Manibat na kanita megumpisa yang menaral i Jesus. Ngana: “Sumisi kayu at painggulut karing kasalanan yu uling malapit ne ing Kayarian ning Banua!” 18King pamaglakad nang Jesus king lele ning Dagat-dagatan ning Galilea, ikit na la ding mikapatad a manasan, i Simon a meyaus Pedro, at i Andres a kapatad na; mibabaldug lang lambat king dagat-dagatan. 19Ngana karela, “Tara, tuki kayu kanaku, at gawan da ka yung manasan tau.” 20Kanita mu rin likwan da la ring karelang lambat at tinuki la kang Jesus. 21Sinulung na pa ing pamaglakad na at ikit na la ding adwa pang mikapatad a anak nang Zebedeo, i Santiago at i Juan; atyu king karelang bangka at kayabe re i tata ra. Sasadia da la ring karelang lambat. Inaus na la naman deti. 22Kanita mu rin likuan de ing bangka at i tata ra, at tinuki la kang Jesus. 23Leganasan neng pintalan Jesus ing mabilug a Galilea, tinuru ya karing karelang sinagoga at penaral na ing Mayap a Balita tungkul king Kayarian ning Banua. Pepakayap na la naman ding tau king miyayaliwa rang sakit at kapanamdaman.


III. Turu

Nung buri meng ipakit king metung a lupa ing sitwasyun ning yatu, akit ta ya kaya ing lupang iti na makatiman, mitatakutan, o kaya naman mimwa? Nanu wari ing kasalukuyang sitwasyun? King America , king aldo-aldo migit king 5,000 pengaring lalaki ing panasakitan doreng karelang asawa. Ing World Health Organization sasabyan na 5 million a kayanakan king pabanwa mamate la pauli ning danup. Na ing buri ng sabyan 13,700 kada aldo reng mamate. Dakal kareng pamilya ing lalakwan doreng karelang tuknangan pauli ning gera . Sasabyan na ning United Nation High Command for Refugees na 20 million a tau makanini ing problema ra. Dakal karela ing ala lang balung puntalan. Reng aliwa naman e la meko kareng tuknangan da, oneng atyu noman reng bie da king panganib. Sasabyan na ning UNICEF na manga 100 million la reng kayanakan kareng mangaragul a siyudad ning yatu na matudtud mu king dalan. Dakal karela ing gagamit droga at
king bandang tauli maging kriminal la pa. Ing peka maragul diling problema ngeni ning yatu yapin deng terorista. Na nyang mumunang panaun patsa dakal ka baril siguradu ra kang pitatakutan, oneng ngeni lulusub lang e mu balu at gagamit na lang bomba ba lang makapate. Ing masakit, alus deng manasakit at mamate sibilyan la.

E ya milalako pag-asa ing tau, nya naman pagsikapan dareng mangabiyasang tau na makadiskubring miyayaliwang bage na makasaup kareng problemang areni. A diskubri de ing computer na pweding pisabyan ing problema dyang marayu la pa reng misasabi. A diskubri dareng doctor nung nanu ing panulu kareng malalang sakit. Oneng akakit tamu na dyang adiskubri no pa ning tau rening teknolohiyang areni, e la milako reng problemang areni. Ing sangkan, rening problema tang areni e no man scientific problem nune moral problem la. Ot bakit dakal lareng daranup? Ing pakibat, uling kalulu la. Dakal kareng tau na sobra-sobra ing karelang pibandyan. Oneng e ra a ibye iti kareng kalulu. Bakit? Uling dening kalulung areni ala noman pera at e dana naman agyung bayaran ing pamangan. Ini e scientific problem, nune moral problem ya.

Dimdam taya king mebasang ebanghelyu nung makananu ing Galilea kanita atyu ya king lilung ning kamatayan at ing metung a sulu sinlag ya! At iti yapin ing Anak ning Dios, I Jesus. Penagkat na ning Anak ning Dios ing sisyan la at payinggulutan reng kasalanan uling ing pamag-ari ning Dios malapit ne! Kekatamu mu naman king kasalukuyan, iti ya ing panulu kareng amanuan tang moral problem. I Jesus, ing Sulu, ing Amanu ya ing sagut karening problema tang areni. Amen.


IV. Pamigunam

King kekatamung pamigunam, ituun tala reng kekatamung kaisipan kareng sari-sarili tamung komunidad. Nanu la kaya reng dapat midinan sala ning Sulu ning yatu? Apapagmasdan tamu na neng aldo Dumingu mas excited lapa reng pamilya king pamamunta kareng mall o kaya king Jollibee kesa king pamanyimba. Akakalingwan tana na mas importanti ya ing kapanyamban, kapurian at kapasalamatan king Apung Ginu kesa king nanu mang bage. Uling ya ing bukud babie bie at tune lulugud keka tamu. Maralas tala namang akakit ngeni na ing aldo Dumingu, aldo ne ning pamaglasing o pamagsaya dareng mibabarkada. Neng kayi atin tapang akakit na reng mi tatang abe la pa keng inuman at neng malasing nala mipag-apir at mipanaus la pang pari. Dakal la pang madalumdum a sitwasyun kareng keka tamung komunidad. At ngening kaorasan, minsan pa ausan na katamu ning Ginung Jesus na maging talasuyu ning kayarian ning banwa. Agkatan na katamung magliligo karing tau ban ing sala ning Ginu tang Jesu Kristo salangi ya karing sari-sarili tamung komunidad. Amen.

V.Pamanahimik

VI Tauling Panalangin

Ginu, king pinandit a binye yu king metung at metung kekami. Ikit mi pu ing maragul a problema ning yatu. Pabustan yu pung maging instrumentu na kami ning kekayung sala. Dinan yu kepung sikanan ban agya mu pu kareng sari-sarili ming komunidad a ibye miya ing babie bie, yapin ing babie sala king dalumdum, I Jesus. Amen.


VII. Kutang

1. Nanu la pareng aliwang akakit tamung madalumdum a sitwasyun kareng kekatamung komunidad?
2. Nanu la reng dapat tang baywan kareng sarili tamu ban mas lalu tayang ayatad ing Sala kareng tau?
3. Nanu la reng programang pwedi tang gawan ban ayatad ya ing sala kareng pibale-bale dareng kapatad tamu?

Download here:
Page 1: http://www.mediafire.com/?jg4a22vwd80ydk7
Page 2: http://www.mediafire.com/?1covbb2vp9bibcu

Kapiestan ning Sto. Niño

Ing Anak a Jesus Kilub ning Templo

I. Pamuklat a Panalangin

Ibpa ing kapanyamban, kapuryan at kapasalamatan kareng e gana-ganang bageng pagkalub mu kekami. Pamasalan at bendisyunan yu kami pu ban mas lalu miyang lubus ayntindyan ring amanu ning kekang Anak y Jesus. Antabayanan mu kami ning kekang Banal a Espiritu ban mas maging ma grasya ing kekaming pamitipun ngeni. Amen

II. Pamamasa

Luke 2:41-52

41Balang banua pupunta la Jerusalem ding pengari nang Jesus ban tumagun king Piesta ning Pamaglagpus. 42Inyang labi neng aduang banua tua I Jesus, mekipamiesta la antimo ing sadia rang daraptan. 43Kaybat na ning piesta minuli la, oneng pepailakuan ya Jerusalem ing anak a I Jesus. E ra apansinan iti ding pengari na; 44inisip da king kayabe da ne king grupu ra. Pepatingapun na lang maglakad inyang apansinan da king e re kayabe. Penintun de karing kamag-anak da at kakaluguran, 45oneng e re ikit. Inya migbalik la Jerusalem ban panintunan de. 46King katlung aldo, ikit de kilub ning Templo; makalukluk yang kayabe da ring Judio a talaturu, makiramdam ya at mangutang karela. 47Mengapamulala la ding sablang mekaramdam kang Jesus king kabiasnan na at pakibat. 48Mipamulala la ding pengari na inyang ikit de at nganang ima na, “Anak, obat depatan mu kekami iti? I tatang mu at aku migaganaka kami king pamanintun keka.” 49Pekibat na karela, “Bakitt penintun yuku? E yu wari balu king kailangan kung atyu king bale nang Ibpa ko?” 50Oneng e ra aintindyan ing buri nang sabian. 51Kayabe reng mibalik Nazaret I Jesus. Meging mapamintu ya karela. Sinikap na ngang Maria iting bage king pusu na. 52At dinagul ya I Jesus king masanting a pamikakatawan ampon king kabiasnan at katanggap-tanggap ya king Dios at karing tau.

III. Turu

Pagmasusyan taya ngening kayaldawan ing Kapiyestan ning Santo Niño, na keka tamung Pilipinu asne ka ispesyal ing ukasyun ayni. Ispesyal ya, uling likas king keka tamung panugali ing malugud kareng anak tamu. Metung pang sangkan nya didinan tayang maragul a importansya iti, uling king malalam tang kapanwalan na ing anak na ning Dios mikatawan ya naman tau at meging anak ya pang kalupa tamu. King kasalukyan tang panaun, tuturing talang pag-asa ning keka tamung bansa reng keka tamung kayanakan. Nya naman pagsikapan tamung a ibye karela ing pamangailangan da antimo ning edukasyun. Pero nyang panaun ning Ginu tang Jesus e makanini ing turing da kareng anak. Kanita reng anak tuturing dalang antimong pibandyan. Ala lang kwenta king lipunan, e la pweding makyabe king nanu mang pisasabyan, king makuyad a amanu ala lang karapatan king nanu mang bage. Maging atin yamung kwenta ing kayang pangatau potang miras ne ketang ustung idad at pwedi ne kanitang makyabe king nanu mang pisasabyan. Para kareng Judio, ing metung a anak ala yang pakinabang o ala yang kwenta. At kanini ne prinisinta ning Ginu tang Jesus, na reng anak na sasabyan dang alang pakinabang ila ring pekamarangal king kayarian ning banwa. Payabut na keka tamu ning ebanghelyu, na nung bisa tang maging tune disipulu king kayarian ning Dios, lawen tala reng keka tamung panugali. Reng disipulu mengutang la, “Ninu ing marangal dili king kayarian ning banwa?” Pekibatan no ning Ginung Jesus kapamilatan ning pamangana na king metung a anak king busal da. Ing metung a anak mangailangan yang lugud at lingap, na kalupa na ning metung a disipulu kaylangan nya naman ing lugud at patnube ning Apung Ginu. Kaylangan manaliwa la pulayi pamanisip ring alagad – ing isipan pa ing ikakayap dareng aliwa bayu ing sarili. Kalingwan ing pamagparangalan, nune maging kawangis ning metung a anak: simpli, e tatanam a mua, makabuklat a palad, mapagtiwala at mapakumbaba. Amen.

IV. Pamigunam

King kaorasan, anyaran ning Ginu tang Jesus ing keka tamung pakibat. Agyu tamu ba ing maging disipulus na? Agyu talabang iyuna reng aliwa kesa king sarili tamu? Agyu tala bang dinan lugud at lingap ring mangalating anak na king keka tamung komunidad. Reng anak Na aliwa mu reng anak a mangalati nune ren munamang kalulu, reng mangailangan saup, reng taung e ra balu nung ninu ing karelang pisabyanan kareng karelang problema. Kaylangan paramdam ne ning tune disipulu ing lugud at presensya ning Apung Ginu king kayang komunidad, sopan lareng mimina king kasalpantayanan at ibalik lareng taung mengalingwan na ating malugud at mayap a Apung Ginu. Amen.

V.Pamanahimik

VI Tauling Panalangin

Ginu, dakal pung dakal a salamat king pamanantabe yu kekami. Mamaus kami pu parati kekayu antimong metung a anak. Balu mi pu na ala kaming arapat nung ala ka king bie mi. Manyawad kaming sikanan ban dening apisabi mi mamunga lang kayapan keng kekaming komunidad. Amen.

VII. Kutang
1. King kekatamung komunidad, ninu-nino mo reng akakit tamung mangalating anak ning Dios?
2. Nanu ing planu tamu para karela?
3. Nanu la reng pwedi tang maging programa karela?
4. Kapilan tala gawan rening programang areni?
5. Ninu reng pweding makasaup karening planung areni?

Download here:
Page 1: http://www.mediafire.com/?h5jfyo4cbecp69e
Page 2: http://www.mediafire.com/?fn2vhvk0lrs8gpe

Kapiestan ning Pangabinyag ning Ginu

Ing Pangabinyag nang Jesus

I. Pamuklat a Panalangin

O Dios a Ibpa mi, kayabe nang Jesus ausan mu kaming maging pakamalan mung anak at kambe na babye me kekami ing misyun maging mapakumbaba at makatalagang talasuyu. Dakal pung salamat. Amen.



II. Pamamasa

Mateo 3:13-17

13Kanita dinatang ya i Jesus king ilug ning Jordan; menibatan ya Galilea. Dinatang ya ban pabinyag kang Juan. 14Tatanggian ne sanang Juan, uling ngana, “Aku ing sukat pabinyag keka, oneng ngeni ika pa ing lalapit kanaku!” 15Nganang mekibat Jesus kang Juan, “Paburen mung makanyan ing malyari, uling iti ya ing kailangan malyari at sukat tang daptan ban matupad ing kaburian ning Dios.” Panamdam nang Juan kaniti, menusig ya kang Jesus. 16Kabinyag nang Jesus, agad yang sinaka king danum at mibuklat ya ing banua. Ikit ne ing Espiritu ning Dios at kukuldas yang balamu metung a pati-pati, at tinuklu ya keya. 17Migsalita yang ibat banua ing metung a siwala ngana, “Iti ya ing Anak kung pakamalan a tutu kung katulan.”


III. Turu

Pagmasusyan taya ngening kayaldawan ing Kapiyestan ning Panga-binyag ning Ginung Jesus na nung nukarin atlu lang puntu reng buri ng ipayabut keka tamu na pwedi tang maging giya king bayung banwa. Ing mumuna yapin kapakumbaban ning Ginung Jesus na e man dapat pabinyag uling ala nemang dyang ditak mung kasalanan. Ikit tamung ala yang bakas kasalanan kapamilatan ning pamananggi ng Juan para binyagan ya. Oneng nanung pekibat ning Ginung Jesus king mitmung kababan lub, ngana “Sukat tang daptan ban matupad ing kaburyan ning Dios. Potang ing yuyuna tamu ing kaburyan ning Apung Ginu at aliwa ing sarili tang kaburyan, kailangan taya ing alimbawa ning kapakumbaban ning Ginu tang Jesu Kristo.

Ing kadwang puntu yapin ing pamikiagum o pamikisanmetung. Pebustan ning Ginung Jesus ing pabinyag kang Juan ban ipayabut na iya makisanmetung ya keka tamung palpikasala, karing sikwil ning lipunan, karing kalulu, ban ayatad na kekatamu ing kapatawaran na at bie


ning Dios. E naka tamu kokondena kareng kasalanan tamung agawa, bagkus pabalu na ing Dios makasadya ya parating mamatawad kareng taung lalapit na ating kababan lub at biasing makiagum o makisanmetung kareng alang akarapat king bie.

Ing katlung puntu yapin ing misyun na bibie ning binyag na nung nukarin ya ing udyat ning pamaging talasuyu tamu king Dios at king tau. King pangabinyag ning Ginu tang Jesus tinggap na ing tutung mabayat a misyun. Ing misyung ipabalu na atin tang Dios a malugud na makasadya parating mamatawad at manantabe keka tamu. King keka tamu mu namang pangabinyag meging kametung tamu munaman king misyun ayni. Anyang mebinyag ya ing Ginung Jesus mibuklat ya ing banua at meramdam ya ing siwala ning Dios Ibpa ngana, “Iti ya ing Anak kung pakamalan a tutu kung katulan.” Mararapat mu naman ing grasyang ayni nyang mebinyag tamu king lagyu ning Ibpa, ning Anak at ning Banal a Espiritu. Amen.

IV. Pamigunam

Ngening bayung banwa agkatan na katamu ning Dios na migunam king grasyang pagkalub ning binyag. Antimong Kristiyanu, bakalan tala sana rening grasyang pagkalub ning pangabinyag ning Ginu tang Jesu Kristo, na ila pin ding kababanlub, pamakisanmetung o pamikiagum kareng kapara tang tau lalu na kareng milele, malalakwan at malili. E tamu naman sana kakalingwan ing tune ng misyun ning panga Kristiyanu tamu, iti yapin ing abe-abeng mipapanantabe ban maging matibe kareng kapagsubukan ning bie. Parati tang ilage karing pusu’t kaisipan tamu na mayakit mu ing keka tamung panga-Kristiyanu nung akit do keka tamu rening grasya ning binyag. Tandanan tamu pu na patsa mababa ta lub malam yamu rin lub keka tamu ing Apung Ginu. Tandanan tamu pu na patsa makiagum ta kareng pakakalulu, kayabe taya ing Ginu at pakantandanan tamu pu sana, patsa mikyabe tamu king misyun ning Ginu tang Jesu Kristo, maging anak na katamung pakamalan a tutung katulan ning Ibpang atyu banua. Amen.


V. Pamanahimik

VI. Tauling Panalangin

O Ginu, malugud ming Dios, dakal pung salamat keng grasya ning binyag. Pabustan yu pung mayakit kareng kekaming pamidapat-dapat ing tatak ning pamaging Kristiyanu mi. Saupan mu kaming parating sumuyu king panig ning katuliran, maging dalan ning lugud mu kareng taung pakakalulu at maging mapibabata king kapagsubukan ning bie. Iti ngan pu anyaran mi king lagyu ning kekang Anak y Jesus. Amen.

VII. Kutang

1. Nanu ya keka kabaldugan ing binyag?
2. Nanu lapa reng bage mayap na pweding bakalan para king pamaglakbe tamu king bayung banwa?
3. Nanu ing pwedi mung ipangaku ngeni king Ginu na gawan mung misyun ngening bayung banwa?

Download here:
Page 1: http://www.mediafire.com/?i7dpa3rz2w0l6hy
Page 2: http://www.mediafire.com/?domzxhgla2qivd1

Solemnidad ning Pamipahayag ning Ginu

Ing Pamandalo da ring Taung Mangabiasa

I. Pamuklat a Panalangin

O Dios ding sablang bansa, balayan at kultura, Iti ya pu ing aldo gewa mung masala kapamilatan ning kekang lugud at salang makatagulaling king ketawan. Antabayanan mu kami karing bayu nang dalan ning kekang Anak. Bustan mung ing matimyas mung sala sunlag ya nukarin pa man. Amen.


II. Pamamasa

Mateo 2:1-12

Mibait ya i Jesus king Betlehem, Judea, kanitang panaun nang Aring Herodes. E melambat dinatang la Jerusalem ding mapilan a Mangabiasa, ding taung magaral king pangimut da ring batuin; menibatan la king Aslagan 2at kukutang da: “Nu ya karin ing bayung bait a Ari da ring Judio? Ikit mi yang sinlag ing batuin na king aslagan at dinatang kami keti ba mi yang samban.” 3Inyang dimdam nang Aring Herodes iti tutu yang megulu isip, antimu rin ing mabilug a Jerusalem. 4Pepayaus na la at tinipun ding pamuntuk da ring pari at ding talaturu ning Kautusan at kitang na karela, “Nu ya mibait ing Cristo?” 5Ngarang mekibat, “King Betlehem, Judea uling sinulat na pu ning propeta: 6“Ika Betlehem, king sakup nang Juda, e ka mitauli king makananu pa man karing manimuna nang balen ning Juda: uling keka ya manibatan ing metung a pamuntuk a manibala king balen kung Israel.”7Inya pepayaus na lang Herodes at pinulung pasalikut ding Mangabiasa; inusisa na at abalu karela nung kapilan de ikit ing batuin. 8Kaybat pepalakuan na na lang papunta Betlehem a kayabe na niting panabilin: “Munta kayu at panintunan yeng masalese ing anak. Potang ikit yu ne, ipabalu yung agad kanaku ban aku man munta ku at samban ke.” 9Meko la kaybat dang dimdam ing panabilin na ning ari. Kabang dalan ing batuin –ing mismung batuin a ikit da king Aslagan- minuna ne naman karela angga king miras ya at tinuknang tulid na ning lugal a kabilian ning Anak. 10Metula lang e mu nanu ding Mangabiasa panakit da king batuin. 11Kalub da king bale, disnan de ing Anak king siping nang Mariang ima na; sinaklaud la king arapan na at simban de. Kaybat biklat da la ring regalung darala da, at dininan deng gintu, insenso, at mira. 12Meyaus ing karelang pansin king kapamilatan ning metung a paninap king e na la magbalik pa kang Herodes. Inya menaliwa lang dalan ding Mangabiasa king pamagbalik da king karelang bansa.


III. Turu

Pagmasusyan ta ya king aldo iti, ing maula nang Kapiyestan ning Epifania o ing Solemnidad ning pamipahayag ning Ginu. Payabut na ning mayap a balita na I Jesus ya ing mipangakung menibat king Ibpa ban datang king kabubusalan tamu ban na katamung iligtas king kasalanan o king karalumduman.

Inaus no ning Dios rening atlung Mangabiasa ning Aslagan ban ipakit na ing bugtung ng Anak, I Jesus e yamu Ari dareng Judio nune ari de reng sablang tau. E la ari rening atlung Mangabiasang menibatan king Aslagan nune manula at pari la ning paganung reliyun. Kabang ala lang balita king kapanganakan na ning Niño Jesus deng pari dareng Judio at deng manungkulan king Jerusalem, biryanan na ning Dios na ipabalu iti kareng mangarayung taung ala pa king tune kasalpantayanan. King e gana-ganang panaun ing turu yapin ing : I Jesus ya ing Tagapagligtas ning tau at e mu iti mipagkalub kareng miyembru ning pisamban nune kareng sablang tau king yatu.

Kening bayung banwa, ausan na katamu ning Ibpa ban ipasyag ing kasalpantayanan tamu king bugtung ng Anak, I Jesus. Pakyapusan tala reng atlung Mangabaiasa king karelang pamaglakbe, mapibabata, magsikap at magkapilit miras king pupuntalan. E biru-biru ing gewa rang pamaglakbe king mapanganib a disyertu lalu na ning bengi. Itamu man king kasalukuyan a panaun, e ta alaku ing kapagsubukan king pamaglakbe ta king yatung iti. Kalupa dareng atlung Mangabiasa, itamu man atin tang buring puntalan at iti yapin ing banua o ing kayarian ning Dios. Amen.


IV. Pamigunam

King pamaglakbe king bayung banwang pigkalub ning Apung Ginu kekatamu. Pakyapusan tala reng atlung Mangabiasang menibatan king Aslagan na e milako king karelang panimanman ing tala o sala ning Ginung Jesus. Dakal la reng denasan dang kapagsubukan o kasakitan. Dakal meging sumbagal king karelang kapagnasan at metung ne kareni I aring Herodes. Pero, e la meko king dalan, king pamanuki king tala o sala na iyang mamie direksyun karela king Niño Jesus.

Itamu man e ta dapat milalako “focus o panlalawe” king Ginung Jesus, uling ya ing sala o tala king karalumduman ning bie tamu. Amen.


V. Pamanahimik

VI. Tauling Panalangin

Pasalamatan taya ing Apung Ginu at Ikanta ya ing “Give Thanks” kabang mitatalnanan gamat at sabe talang ipangadi reng katalnanan tang gamat. At “Tandanan tamu pung mas pakiramdaman na ning Dios ing anyaran tamu nung ing anyaran tamu para kareng aliwa.”

Give thanks with a grateful heart, give thanks to the Holy one
Give thanks because He’s given Jesus Christ His son

CHORUS:
And now let the weak say I am strong, let the poor say I am rich
Because of what the Lord has done for us.
(Repeat 1st Stanza and Chorus)

Give thanks, give thanks, give thanks


VII. Kutang

1. Nanu la reng bage mengapalyari king bie tamu king banwang 2010 na buri tanang kalingwan?
2. Nanu la reng bayu tang planu king bie kasalpantayanan?

Download here:
Page 1: http://www.mediafire.com/?epxccvg9njsugf4
Page 2: http://www.mediafire.com/?b0h2f71pzj63c06