Sunday, March 29, 2009

Kalimang Dominggu ning Kuaresma

Kailangan yang Mate ing Binutil Pale ban Mamunga yang Dakal


I. Pamuklat a Panalangin

Ibpa, e ya tinakut ibie na ing sarili ng bie ning Guinung Jesus uling balu na, mamunga ya ing keyang sakripisyu king kaligtasan para kekami. Dinan yu kami pu naman lakas lub ban milako ing takut mi potang anyaran yu na kekami ing sakripisyung dapat ming ganapan. Ilako yu kami takut king nanu mang kabayatnan a mibiebie kekami ban e ke rugu milalako pamag-asa agyang libutad ning kapagsubukan. Salamat pu Guinu. Salamat. Amen.

II. Pamamasa

Juan 12:20-33

20­­­­Ating mapilan a Griego karin a minta king piesta ban samba, 21Linapit la deti kang Felipe a tau Betsaida, Galilea. Ngara, “Malyari mi yang akit e Jesus?” 22Pintalan neng Felipe i Andres at sinabi na iti keya. At linapit la ilang adua kang Jesus at sinabi ra iti. 23Pekibat nang Jesus, “Dinatang na ing oras ban mipaligayan ya ing Anak ning Tau. 24Ing katutuan sasabian ku kekayu: subali mu nung manabu ya king gabun ing binutil pale at mate, manatili yang dili-dili, nung mate ya, mamunga yang dakal. 25Abating ne ning taung malugud king bie na ing bie na; oneng ing tanggi king bie na king yatung iti apapanatilian ne iti. Ninumang bisang sumuyu kanaku kailangan yang tuki kanaku; nung nu ku karin, karin ya naman ing talasuyu ku. Parangalan neng Ibpa ku ing ninumang sususyu kanaku. 27”Ngeni mababalisa ku pamiisip. ‘Ibpa, iligtas mu ku king oras a iti?’ Ali, uling iti yang sangkan nung inya dinatang ku – ban dikilan ing kasakitan a iti. 28Ibpa, parangalan me ing lagyu mu.” Kanita ing metung a siwalang ibat banua sinabi na, “Peparangalan ku ne at parangalan ke pang pasibayu.” 29Dimdam da ring taung atyu karin iting siwala at ngara, “Menuldu!” Sinabi da naman ding aliwa, “Ating anghel a mekipagsalita keya!” 30Mekibat ya I Jesus, “meramdam ya ing siwalang iti e king uli ku, nune king uli yu. 31Panaun na ban atulan ya ing yatung iti. Mitabi ne ngeni ing pamuntuk na niting yatu. 32At potang itas da na ku babo ning yatu, ilapit ku la kanaku ding sablang tau.” (33Sinabi na iti ban ipakilala na nung makananu deng ipapate.)

III. Turu

Ing “sipag at tiyaga”, ya ing paralan ning pamanyalita tamung pilipinu king amanuan tamung sakripisyu. Balu tamu king alang mayapo a malyari king bie tamu nung e taya pipagalan ing metung a bage at nung e taya pigpursigan ing metung a bage. Para kekatamu, ala yang ibungang masalese ing katamaran ampon ing ugaling sasamal.

Ing ebanghelyu tamu ngeni, makanyan mu naman ing sasabian ning Guinu kekatamu inyang ngana: “subali mu nung manabu ya king gabun ing binutil pale at mate, manatili yang dili-dili. Nung mate ya, mamunga yang dakal. “ (v. 24) Ala yang ibunga pin naman ing pale anggang e ya manabu king gabun at mate. Manatili ya pa murin a pale, at ala yang ibunga. Nung alang sakripisyu, ala tamung pupulan masalese king bie.
Malino ya ini king Guinu tamung Jesus uling kaya man, balu na king ing bie na, dapat yang midaun para king kaligtasan tamu. Ban midinan tamung kaligtasan, kailangan ya pa mung midaun antimong metung a sakripisyu ing sarili nang bie ban aicabus na kekatamu kareng kaparusan da reng kasalanan tamu. Ing Guinu, e ya me pwersang magsakripisyu. Tinggap ne ing sakripisyu king krus a kusa at e sapilitan. Alang ninu man ing memilit kaya ban i-ain ne ing sarili na para king kekatamung kaligtasan

Tutung masakit ampon e malagwa ing magsakripisyu. Kalupa ning amanuan tamung “sipag at tiyaga”, ing sakripisyu, metung yang mabayat a bage. Potang magsakripisyu ya ing metung a tau, kailangan neng painggulutan ing sarili nang kaburian ampon kanauan. Kailangan neng gulutan pa mu ing egana-ganang makasarili ban aisadsad ne ing pamagsakripisyu na.

Oini ing kabaldugan ning “sipag at tiyaga” kekatamu. At makanyan naman ing gewa ning Guinu king sarili na. Nganang San Pablo king sulat na kareng taga Filipos tungkul kang Kristo: “Linubas na ing sarili king sablang kamalan; mekilupa ya karing tau, at kinua na ing aske ning metung a ipus. At king pamakiwangis na karing tau, migpakumbaba yang maygit karing sabla….” (Phil. 2:7-8) Ing Guinung Jesus , likuan , kelinguan at peinggulutan na ing egana-ganang pansarili na ban ailigtas na katamu kareng kekatamung kasalanan.

Oneng ing amanuan tamung “sipag at tiyaga”, balamu e ya kumpletu. E ya kumpletu uling ing akakit tamu mu ing kabayatnan ampon pamagkasakit. Kekatamung Kristiyanu, ing pamagsakripisyu aliwa ya ya ing tutung parasan tamu. Ing pamagsakripisyu tamu, metung yamung paralan ban miras tamu king tutung parasan tamu. Ing paralan ning pamagsakripisyu, magbunga ya dapat king metung a panibayung kabilianan. Para kekatamung Kristianu, ing pamagsakripisyu, metung yang paralan a dapat tamu ngan dalanan ban miras tamu king panibayung bie a amanuan na ning Guinu.

Itamung Kristianu, e tamu tutuknang keng kabayatnan ampon pamagkasakit, uling balu tamu aliwa ya ini ing parasan tamu. Ing tutu tamung parasan ya ing panibayung pamibiebie a bunga ning pamagsakripisyu. Ing tutu tamung parasan ya ing ligaya ning banwa, a akwa tamu mu nung dumalan tamu king kalbaryu. Inya para kekatamung kristianu, e ya kabud “sipag at tiyaga”. Makarugtung ya dapat keni mu naman ing “tagumpay at ginhawa”. Uling itamung kristianu, agyang makananu ya pa kabayat ing krus a dadalan tamu, e tamu milalako pamagasa agyang kapilan man, uling karugtung ning pamamusan krus, ya ing pamag-asang akwa tamung ligaya a Guinu mu iyang maka-ibie kareng meging tapat keya.

E ta sana kakalinguan na ing parasan ning metung a binutil a pale a ban mate at manabu king gabun, nune ban mamunga at mamie bayung bie. Ing pamagsakripisyu tamu paralan ya mu ban akwa ta ya ing ligaya ampon bayung bie. Inya, makanyan na ka tamung agkatan ning Guinu - na e tamu dapat tatakut lalu na potang daranas tamung kasakitan ampon miyayaliwang kabayatnan uling balu tamu, e malaut ing ligaya ampon tagumpe kekatamung mamagkasakit king bie. Ing pamag-asa tamu iyang kakapitan tamu potang bibitbitan ta ne ing krus tamu. Amen


VI. Pamigunam

Pigunaman ta ya ngeni ing sulat ng San Pablo kareng taga Filipos. Kening sulat ng aini, sasabian ng Pablo king I kristo, tutu neng beba ing sarili na, tinggap ne ing kamatayan king krus uling king kapamintuan na king kaburian ning Ibpa. Oneng pauli na ning keyang pamananggap king sakripisyung mibie keya, mibie mu naman ing ligaya keya. Sana, itamu man, e tamu tatakut kumaul king krus uling balu tamu, mibie yang pasibayu ing bieng tebili tamu. E tamu tatakut magsakripisyu. Kalupa ng kristo, pupulan tamu naman ing ligaya a makarikil kareng e milalako pamag-asa agyang libutad ning kasakitan.

“Makilupa kayu panandaman kang Cristo Jesus:
Agyamang atyu keya ing panga-Dios, makanyan man e na pinilit ing makipante ya king Dios. Nune linubas na ing sarili na king sablang kamalan; mekilupa ya karing tau, at kinua na ing aske ning metung a ipus. At king pamakiwangis na karing tau, migpakumbaba yang maygit karing sabla at meging mapamintu ya angga king kamatayan, wa, angga king kamatayan king krus.

Uli na niti, pepaygit ne ning Dios at dininan neng lagyu a mimigit karing sablang lagyu. Inya king lagyu nang Jesus, Kailangan lang siklaud ding sabla, ding king banua, ding keti king yatu at ding king lalam ning yatu. At ding sabla, karelang ipasiag king I Jesu-Cristo Guinu ya, king ikaligaya na ning Dios Ibpa.” (Phil. 2:5-11)


V. Pamanahimik

VI. Tauling Panalangin

Ibpa, maragul ing takut mi king kasakitan. Maragul ing takut mi king pamagsakripisyu uling e ke bisang misakitan king bie. Oneng nanu rugu ing apupul mi nung e ke magmasipag ampon magtiyaga? Nanu rugu ing pupulan mi nung matamad kami ampon alang kapagpursigian? Tatakut ke king krus, Guinu. Tatakut keng mamagkasakit. Masyadu kaming makasarili, inya e mi ailako ing makapit ming talan karing pansarili ming pigagap. Turuanan yu kami, malugud ming Guinu, ban milako ing takut mi lalu na nung kailangan kaming magsakripisyu. Ilako yu ing takut mi kareng kabayatnan king bie ban e ke milalako pamag-asa. Turuanan yu keng mamag-asa ban e kami tutuknang king pamaglakbe mi king kalbaryu, kayabe yu Guinu. Amen

VII. Kutang

1. Atiu pa mu rin ka ya ing kanakung pamag-asa agyang libutad ning maragul a kapagsubukan?
Download here:

Sunday, March 22, 2009

Kapat a Dominggu ning Kuaresma

Binie ne ning Dios ing Bugtung nang Anak

I. Pamuklat a Panalangin

Ibpa, tutung kaluguran yu kami uling binie ye kekami ing bugtung yung anak a I Jesus ban kapamilatan na, miligtas kami kareng kekaming kasalanan. E ye pigkaimut ing kekong anak para midinan kaming katimauan king bie. King kekong lugud, mididinan yang pamag-asa pasibayu ing mabilug a yatu, king kekong lunus, mididinan kaming lakas lub ban maus ampon mangadi kekayu. Balu ming e yu ke paburen. Balu ming gawan yu ngan ing sabla ban aibili yu kami king mayap a kabilianan. Salamat Ibpa king kekong lugud at lunus. Antabayanan yu kami pu, ikaming talatuki ning Guinung Jesus king kekaming pamaglakbe. Salamat Guinu. Salamat pu. Amen.

II. Pamamasa

Juan 3:14-21

14At nung makananu neng tinas Moises ing ubingan a tangsu king disyerto, makanyan ya namang sukat itas da ing Anak ning Tau 15ban ing ninumang maniwala keya mika bie yang alang angga. 16Uli na ning maragul nang lugud ning Dios king yatu binie ne ing bugtung nang Anak ban ing ninumang maniwala keya e ya mate nune mirinan yang bie alang angga. 17Uling tinubud ne ning Dios ing anak na king yatu e ban atulan ne at parusan ing yatu, nune ban miligtas ya ing yatu king kapamilatan na. 18E ya miyatulan kaparusan ing ninumang maniwala keya oneng miyatulan ne ing e maniwala keya, uling e ya meniwala king bugtung nang Anak ning Dios. 19Ing kayatulan ya iti: dinatang ya ing sala keti king yatu, oneng aliwa ing sala ing liguran da ring tau, nune ing dalumdum uling e mayap ing dapat da. 20Uling kasaman da ring darapat e mayap ing sala at e la lalapit king sala ban e mayakit ing karelang dapat. 21Oneng lalapit ya king sala ing darapat king katutuan ban masalang mayakit king ding dapat na daraptan na la agpang king kaburian ning Dios.

III. Turu

Potang ating malulunud king ilug o dagat, atsanan ta yang salbabida ing malulunud ba yang ating akapitan. Kapamilatan na ning salbabida, malyari yang gumato ing malulunud at miligtas ya king panga lunud na. Potang ating masisilab lalu na potang bale ya, atsanan ta yang danum ing masisilab a bale ban mituknang ing silab ampon ban e kumalat. Potang ating mabubungsul, pipepen ta ya ing mabubunsul ban mibalik ya animu. Atin tamung sari-sariling solusyun kareng problemang daratang kekatamu. Balu tamu potang guewa ta la reng solusyun a reni, micacabus tamu kareng problemang daratang a reni. King binasa tamung ebanghelyu, anti ya mong menintun paralan ing Ibpa nung makananu na katamung iligtas king kekatamung pangawala pauli da reng kasalanan tamu.

Ing ebanghelyung dimdam tamu ngeni, metung ne karing makatagkil a mensahi ning kasalpantayanan tamu. Kening binasa tamu, sasabian na kekatamu king ing Ibpa, binang kaluguran na katamu. At uling kaluguran na katamu, e na buring mawala tamu king bie. E na buring mibili tamu king marok a sitwasyun, lalu na ing pangawala tamu pauli da ring kasalanan tamu. Itamu, mikasala tamu ngan. Pauli da ring kasalanan tamu, mangaintuliran mu kekatamu ing kaparusan. Dapat mung mibie kekatamu ing parusa ning kamatayan at alang-anggang api ampon kasakitan a makarikil kareng egana-ganang lelangan keti yatu uli na pin mikasala tamu ngan. E tamu memintu, e tamu mekiramdam at e tamu depatan ing inutus ning Guinu. Kamatayan ing karapat-dapat mung pupulan ning pamibie-bieng makasalanan. Oini na ing manenaya kareng egana-ganang e mamintu kareng kaburian ning Guinu.

Oneng nanu ing milyari? Imbes na paburen naning Ibpa king mibie kekatamu ing karampatang parusa kareng guewa tamu, nanu ing guewa na? Pepaburen nang mibie ing makaintuliran a kaparusan a ini? ALI NA.

Uli na pin kaluguran na katamu ning Ibpa, e na pepaburen king mibie ta nang makanyan king kapalaran a kaparusan a iyang karapat-dapat mu kekatamu. Nune, ginawa yang paralan ing Ibpa, uli ning maragul nang lugud kekatamu ban alako na katamu kening makalunus tamung kapalaran a kaparusan. Ngeni, nanung paralan ing guewa na, ban milako tamu king kaparusan a ini?

Ngana ning ebanghelyu kekatamu: “…binie ne ing bugtung nang Anak…” (v.16). Oini ing meging paralan na ning Ibpa ban aicabus na katamu king alang-anggang kamatayan. Binie ne ing bugtung nang anak, ban kapamilatan na, miligtas tamu. (Manahimik tamu sagli ban pigunaman ta ya ing misteriong aini…)

Inya binie ne ning Ibpa I Jesus, ban micabus tamu kening kaparusan a ini a bunga ding kasalanan tamu. I Jesus iyang talapagligtas tamu. Iya ing talapangabus tamu. Iya ing tinubus kareng kekatamung kasalanan. Inaku na ngan ing kaparusan a dapat kekatamu. Kingwa na ngan ing kabayatnan da reng kekatamung kasalanan at binitbit no king krus. Kapamilatan ning keyang sakripisyu king krus, milako tamu king pangaalipan tamu karing kasalanan tamu at karing kaparusan a dapat mibie kareni. Pauli na ning sakripisyu na ning Guinu, mibayaran ngan ing dapat bayaran, mipakibatan ngan ing dapat pakibatan da reng guewa tang kasalanan, midinan hustisya ing kelan a hustisya a bunga da ring karawakan tamu ngan. Mibayu ngan ing sabla pauli ning sakripisyu ng Kristo. Mibayu ing bie tamu, pauli ning sakripisyu na.

At e tamu kakalinguan king ing Ibpa, uling king lugud na kekatamu, e ne pigkaimut ing bugtung nang anak. Iya na rugu ing pakamalan nang anak, e ne pa pigkaimut. Guewa na ini, uling kaluguran na katamu ning Ibpa. Gawan na ngan ing sabla ban aicabus na ka tamu king nanu mang karokan. Gawan na ngan ing agyu na ban mibili tamu king masanting a kabilianan, agyang nung buri na sabian niti king isakripisyu ne ing sarili nang anak. Kalugud na ning Ibpa kekatamo! E na katamu paburen. E Na katamu lalako pamag-asa agyang atiu ta na king kabilianan a lang pamag-asa.

Ngening panaun ning kuaresma, manintun tamung sariling panaun ampon oras ban pigunaman ta ya ing sakripisyu na ning Guinung Jesus para kekatamu. Pigunaman ta ya naman ing maragul na muring sakripisyu ning Ibpa inyang binie ne ing bugtung nang anak ban midinan tamung kaligtasan.

Minsan sana, magpasalamat tamu king Guinu. Sabian tamu keya ing maragul tamung kapasalamatan kening binie ng kaligtasan kekatamu. Pota kasing magpasalamat tamu, mititimid mu naman ing kamatutuan ning kekatamung pamikasala. Pauli niti, mididenan tamung kababan uling tatanggapan tamu king maina tamu at kailangan ta ya ing Guinu bilang talapangabus tamu king bie.

Kapasalamatan ampon kababan ing dapat ibunga ning kekatamung ebanghelyu ngeni. Salamat Guinu king kekang lugud! Salamat kang Jesus ing kekaming talapangabus! Salamat uling linigtas yu kaming makasalanan king alang-anggang kamatayan! Amen.

IV. Pamigunam

Ing istorya ng Maximilian Kolbe, a metung a Fransiskanung pari dimdam ta ne siguru. Inyang guera king Europa, sinukul do reng marakal a tau kareng ausan dang concentration camps. Reni kampu la a nung nukarin la pakakulung reng e da buring tau reng ausan dang Nazis ning Germany. Mesukul ya I Maximilian Kolbe keni, agyang pari ya e uling atin yang gewang e mayap, nune uling agyang ninu namung isipan dang kalaban, kukulung da, lalu na reng Hudyu. Minsan a aldo, ating mekatakas karing makakulung. Kinabukasan, inyang mamilang no reng sundalung maka-assign king kulungan, ikit dang kulang la bilang. Kanita, meging patakaran king kulungan, nung atin mang tumakas kareng makakulung, mamayaran la reng makakulung. E la mamayaran pera para ketang mekatakas, nune mamayaran lang bie. Nung metung ya ing mekatakas, kuma lang metung kareng makakulung at ipa-pate de. Guewa da ini ban e no tatakas reng tau. Basta ating tinakas karela, atin siguradung makibat kareng melakuan.

Inyang abak a ita, inyang abalu da na ring sundalung gwardya king ating metung a mekatakas karing makasukul, tildu de ing metung a lalaki ban magsilbing bayad king bie ning mekatakas. Inyang katuldu da king lalaki, mengyak neng mengyak. “Reng anak ku,” ngana, “makalunus no man reng anak ku nung paten da ku! Ali na pu sana aku!” Kabang manangis ya at kakalilua da ne, linapit ya I Maximilian Kolbe king peka lider da reng gwardya. At sinabi na karela king iya pari ya at ala ne mang pamilya. At sinabi na pa king iya namu ing kuanan da imbes na itang lalaking tildu da at menangis. Ora mismo, kingwa de I Maximilian Kolbe. Itang menangis a tildu da, micabus ya at binalik deng pasibayu keng kampu. Kilung de I Maximilian kolbe. E de pepakanan. Meyayat neng meyayat anggang meging butul ampon balat nya mu. Makarate nya mu king kulungan na uling masyadu neng maina katawan. Uling mabie ya pa agyang maina ne, ininjeksyunan deng lasun ba neng tuluyang mate. Kaybat, silab de katawan kalupa da reng aliwa.

I Jesus, makaniti mu naman ing guewa na kekatamu. Itamu ing dapat miparusan. Itamu ing dapat makibat kareng kasalanan tamu. Oneng I Jesus, kingwa na ing lugar tamu ban mikabus tamu king kaparusan. Binie ne ing sarili nang bie ban kapamilatan na ning sakripisyu na king krus, midinan tamung bayung pamibiebieng ating katimauan at alang takut. Amen.

V. Pamanahimik

VI. Tauling Panalangin

Ibpa, marakal pu salamat. Pauli ning maragul yung lugud kekami, binie ye ing bugtung yung anak ban miligtas kami. E ye pigkaimut ing kekong anak. Ban miligtas kami king kasalanan, tinggap ne ning anak yu ing kamatayan king krus. Kapamilatan na ning dayang mibubu para king kapatawaran da reng kasalanan mi, midinan keng bayung bie. Salamat pu Guinu. Salamat. Patawaran yu ke pu lalu na potang e mi pakamalan ing bayung bieng binunga ning sakripisyu yu. Patawad Guinu, patawad. Saupan yu ke pu lalu na potang papailalam kami pasibayu king kasalanan. Panatilian yu keng maging malinis ampon karapat-dapat king kekong arapan. Salamat pu Guinu. Salamat. Amen.

VII. Kutang

1. Nung ing Ibpa e ne pigkaimut ing anak na, atin ku pa kayang pagkaimut a bage king Guinu a anyaran na kanako?
Download here:

Sunday, March 15, 2009

Katlung Dominggu ning Kuaresma

Ing Pamunta nang Jesus king Templo

I. Pamuklat a Panalangin

Ibpa, kapamilatan ning pangamate ampon pangasubling mebie ning Guinu, midinan keng pamag-asang e milalako. King bayung bie mibie kekami kapamilatan na ning pangamate na king krus, inabe yu ke king pamibiebie yung banal ampon makatuliran. Salamat pu Guinung Jesus king kekong sakripisyu para kekami. Pauli yu, mibie kekami ing kaligtasan. Panatilian mi pu sanang maging karapat-dapat king bayung bieng binie yu, ngeni ampon kapilan man. Amen.

II. Pamamasa

Juan 2: 13-25

13Malapit na mu ing Piesta ning Pamaglagpus da ring Judio inya minta ya Jerusalem I Jesus. 14Disnan na la king templo ding magtindang baka, tupa at patipati ampon ding maglibe salapi a karin pakalukluk. 15Ginawa yang pamarug a lubid at tinabi na la ngan king Templo ding magtinda, pati na ding tupa at baka. Piniambulat na la ding salapi da ring maglibe salapi at penuag ding karelang lamesa. 16Nganang Jesus karing magtindang patipati. “Ilako yu la keti ren! E yu gagawan palengki ing bale nang Ibpa ku!” 17At aganaka da ring alagad na ing sasabian na ning kasulatan, “Ing pamagmalasakit ku para king bale mu balamu api a mikakaluku king pusu ku.” 18Uli na niti, kitang da ring Judio kang Jesus, “Nanung tanda a pagmulalan ing gawan mu ban apakit mu kekami king atin kang matulid dapat kaniti?” 19Mekibat ya I Jesus, “Lasakan ye iting Templo at kilub ding atlung aldo italakad keng pasibayu.” 20Ngara ding Judio, “Megawa ya ing Templo kilub ding apat apulu at anam a banua at ika italakad me kilub na mu ning atlung aldo?” 21Oneng ing Templong amanuan na ya ing katawan na. 22Inya inyang sinubli neng mie, aganaka da ring alagad na king sinabi na iti; at meniwala la king kasulatan at karing amanung sinabi nang Jesus. 23Kanitang atyu Jerusalem I Jesus king Piesta ning Pamaglagpus, dakal lang tau ding meniwala keya inyang ikit da la ring makapagmulalang tanda a depat na. 24Makanyan man e migtiwala I Jesus karela uling balu na la ding tau. 25E na kailangan pa ing damdaman na king aliwa ing tungkul king ninumang tau uling ya mismu balu na ing atyu king pusu na ning tau.

III. Turu

Itamu malinis tamu pibale-bale. Nung munta tamu kareng matuang bale, e do lulub man reng tsinelas da. Pota kasing lulub la reng tsinelas, lulub mu naman ing dinat ampon alikabuk. Neng kai akit ta la pa reng sala o dining set tamu, paka plastic la uling buri tamu e la mididinatan. Makanyan mu naman king sarili tamung katawan. Kalupa ning kalinisan tamu bale, makanyan ta la naman buring maging malinis reng kekatamung katawan. Mandilu tamu, malinis tamu imalan, neng kai magpabanglu ta mu pa ban babau tamung malinis mu naman. Inya, as na ka tamu kaselan lalu na potang kalinisan na ing pisasabyan king sarili tamung pibalebale ampon sarili tamung katawan.

King ebanghelyu tamu, ikit ta ya I Jesus, mimua ya. Mimua ya uling guewa deng marinat ampon magulu ing templu. Guewa deng anti mong palengki ing bale ning Dios. Mimua ya uling ing templu bale ne ning Dios. Ing templu iyang lugar a nung nukarin mangadi la reng tau, ampon nung nukarin do ia-ampang reng miyayaliwang ain agpang king batas da ring Hudyo. Ing templo, metung yang banal a lugar a nung nukarin ya manuknangna ing Dios. Uling banal ya ing lugar, dapat mung panatilian yang banal. Oneng I Jesus, imbes na kabanalan ing ikit na, palengki ampon miyayaliwang komersyu ing ikit na, inya mimua yang melaus at penabi no reng taung mag-negosyu karin.

Kalupa tamu,potang miririnatan ya ing malinis tamung bale, miminua tamu. Potang atin kang masabal king bale mu, talaga naman mimua ka potang ating mamulkirya king kekang bale.

Oneng kang Jesus, ing templu e ya kabud ing bale ning Ibpa na. ing templung amanuan na yapin ya ing katawan na mismu. Kening bageng aiti, e re aintindian inyang nganang Jesus karela: “Siran ye ing templung aini, at italakad keng pasibayu kaybat ning atlung aldo.” Uling ing amanuan na king templu ya ing templu ning keyang katawan, e de aintindian at bala da e ya sasabing katutuan inya mimua la naman keya.

Madalas ing panakit tamu king templo, o pisamban, metung yang istrukturang batu a nung nukarin tamu sisimba. Ustu ya ini. Ing pisamban, istruktura ya. Keni sisimba tamu. Keni ya manuknangan I Jesus king blessed sacrament. Oneng e ya kabud makanyan ing pisamban. Ing pisamban, e ya kabud sementu, konkretu ampon batu. Mabie ya naman ini, uling katawan ne ning Guinu. At ing peka-importanting pakatandanan tamu, itamu ing pisamban. Uling miyembru na katamu ning pisamban, itamu ngan abe tamu king katawan a ini a sasabian tamung katawan ning Guinu. Kapamilatan ning pangabinyag tamu miyabe tamu kening katawan a ini a katawan ng Kristung tutu. Inyang mebinyag tamu, kalupa ng Kristo, mete tamu naman king kasalanan, at midinan tamung bayung bie kapamilatan na ning keyang pangamate king krus.

E ya siguru masyadung simpling aintidian ini, pero oini ing kamatutuan – king itamu, miyabe tamu king katawan ning Guinu pauli ning pangabinyag tamu. Inyang mebinyag tamu, midinan tamung bayung bie pauli na pin ning pangamate na ning Guinu king krus. Ing pamiyabe-abe da ring egana-ganang mengabinyag ya ing ausan tamung pisamban. Mabie ya ini, uling itamu – ing makayabe keni.

Ngening panaun ning kuaresma, pigunaman ta ya ing kekatamung pangayabe king bie ning Guinu. Inabe na katamu ning Guinu king sarili nang bie. E ta na malyaring mikawani pa keya, uling tinubus na nakatamu kareng kasalanan tamu kapamilatan na ning pangamate na king krus. Ing bayung bie a mibie kanaku, bie ne mismu ning Guinung migsakripisyu para kanaku.

Itamu mismu, guewa na katamung templo ning banal ng espiritu. Panatilian ta yang katanggap tanggap king Guinu ing templung iti. Kapamilatan na ning kalinisan isip ampon pusu, panikuanan tamung karapat-dapat tamung maging templo ning Guinu. Kalupa nang Jesus, panintunan ta ya ing kalinisan, katahimikan ampon kabanalan king templu ning katawan tamu ban, agyang nanu mang oras ampon panaun, karapat-dapat tayang tanggapan king katawan a ini ing Guinung Jesus a bisang manuknangan king pusu tamu. Amen.

IV. Pamigunam

Minsan king metung a lugar, minukyat la king metung a matarik a bunduk ing tata, kayabe ne ing anak ng lalaki ampon ing anak ng babai. Inyang minukyat la bunduk, pakatali la reng balang metung karela king katuki ng mumukyat. I tata, makataid ya king anak a lalaki kapamilatan na ning lubid a matibe. Makanyan mu naman ing anak a babai makataid ya king anak a lalaki kapamilatan ning lubid. Kailangan lang manik a mitataid king balang metung karela ban kanita, nung akwa nang managbag ning metung karela, kabang paukyat, e ya managbag malaus king bangin uling makataid ya pa kareng adwa nang kayabe kapamilatan ning lubid. Maka-una ya ing tata. Kinadwa ya ing anak a lalaki. Ing tauling dili, anak a babai. Minukyat lang abak a maranun ban e mapali kabang mumukyat la. Inyang atiu no paukyat at malapit king tuktuk, mag-slide ya ing tata. Inyang ka-slide na, menagbag ya. Uling makatali ya king anak ng lalaki, e ya menagbag king bangin lalam. Pinilit neng abitan ning anak a lalaki ing tata na ban aibalik ne, oneng inyang abitan ne, iya man meg-slide ya. Menagbag ya naman kalupa ng tata na. Oneng uling makatali ya pa king lubid ing anak a lalaki king anak a babai, e la menagbag king bangin I tata ampon ing anak a lalaki. Makabitin la I tata ampon ing anak a lalaki king lubid a makatali pa king anak a babai a makatalan pa king metung a maragul a tanaman. Pinilit nong abitan ning anak a babai reng adwa. Oneng kabang abitan na la, ing lubid a maka konekta king anak a babai ampon anak a lalaki, bisa yang mapaklud uling king bayat da reng adwa. Nanu ing gawan na ning anak a babai? Kabang abitan na la, lalu yang balamu bisang mapaklud ing lubid a iya namung mitataid karela ban e la manabu king bangin. Inyang ikit na ning tata ita, ngana king anak ng lalaki: “Pakluran me ne ing lubid a makatali keka ampon kaku. Mabayat kung masyadu. Nung e me pakluran manabu katang adwa. Mayapa, pakluran mu ne ban aiabit na ka pa ning kapatad mung babai.” E ne buring pakluran ning anak a lalaki ing lubid a makatali keya ampon king tata na. Istung gewa na ini, tuluyan neng manabu I tata na king bangin lalam. King bandang tauli, uling malapit niyang mapatad ing lubid a makatali king anak a babai, ing mismung tata pinaklud ne ing tali a makataid kaya king anak ng lalaki. Inyang pinaklud ne, menagbag ya king bangin. Pauli na nita, ayabit ne ning anak a babai ing kapatad a lalaki. Meligtas la ring adwang mikapatad pauli ning sakripisyung guewa ng tata ra.

E mo makanyan ing milyari king pangamate na ning Guinu king krus? Ing bie tamu ngeni, mibie ya kekatamu pauli na ning sakripisyu nang guewa king krus. Tianaid na katamu king bie na. Guewa na ka tamung metung a balayan, metung a pisamban. Pauli ning pangamate na, itamu ngan mikabus tamu king kamatayan a alang angga. Amen.

V. Pamanahimik

VI. Tauling Panalangin

Ibpa, guewa yu keng templo ning kekong espiritu. Guewa yeng tuknangan ing katawan mi uling kapamilatan yu, guewa yu keng miyembru ning kekong katawan. Salamat Guinu uling king kekayung sakripisyu king krus, midinan kaming bieng mitmung pamag-asa. E yu pepaburen manatili king kabilianan mi king dalumdum. Linigtas yu kami ban miyabe kami king kekong ligaya. Salamat Jesus king kekong sakripisyu. Salamat pu. Amen.

VII. Kutang

1. Nanu mo ing kabaldugan na para kanaku na ing bie ku makataid ne king bie ng Kristo?

Download here:

http://rapidshare.com/files/207832562/Katlung_Dominggu_ning_Kuaresma.doc

Monday, March 9, 2009

Kadwang Dominggu ning Kuaresma

Ing Pamanaliwa ng Itsurang Jesus

I. Pamuklat a Panalangin

Ibpa, pepasiag nang Jesus ing keying panga-Dios king bunduk. Pepakit na kekami ing parasan ning ligaya. E yu ke buring milako pamag-asa. Reng kasakitan a dadalanan mi, makaina la lub king pamaglakbe mi. Salamat pu kekayu uling pasiknangan yu ke lub kabang maglakbe kami kayabe yu papuntang kalbaryu. E yu ke papaburen magbalag potang tutukyan mi ya ing Guinung Jesus papunta kalbaryu. Paintindi yu kekami king ing paralan king ligaya banwa yapin ya ing paralan ning krus. E ke pu sana tatakut potang bibitbitan mi la reng krus mi ban kayabe yu, miras ke king kalbaryu a mitmung lakas ampon kapanaligan king kekong upaya. Salamat pu Guinu. Salamat. Amen

II. Pamamasa

Marcos 9:2-10

2Kalabas da ring anam a aldo minukyiat ya i Jesus king matas a bunduk. Ding bukud mung tiki na ila di Pedro, Santiago at i Juan. Samantalang makalawe la ikit deng minaliwa itsura. 3Meging maslag king puti ing imalan na; alang makapalto king makanyan a puti keti king yatu. 4Kanita mu rin ding atlung alagad ikit da la ri Elias at i Moises; makipagsalita la kang Jesus. 5Nganang Pedro kang Jesus, “Maestro, masanting ing keti ta na. Gawa keng atlung kubu, metung para keka, metung para kang Moises, at metung para kang Elias.” 6Mitakutan yang e mu nanu i Pedro at ding abe nang alagad inya e na balu ing sukat nang sabian. 7Linto ya ing metung a biga at tikpan na la at meramdam ya ing siwalang ibat king biga. Ngana, “Iti ya ing Anak kung kaluguran; makiramdam kayu keya!” 8Kanita mu rin miglawe la king makapadurut, oneng ala lang ikit a aliwa; i Jesus ya na mung kayabe ra. 9Samantalang kukuldas la king bunduk, nganang maigpit menabilin Jesus karela, “E yu paniabian kaniku man iting ikit yu anggang e ya subling mie ing Anak ning Tau.” 10Pemintuan da ing penabilin na, oneng ila-ila pisasabian da ing bage mepalyari. Ngara, “Nanu ing buri nang sabian king ‘pamaniubling mie?’”

III. Turu

Kening ebanghelyu tamu ngening kadwang domingu ning kuaresma, anti ya mong meg-BEC ing Guinu. Tiki no reng atlu nang disipulus king bunduk. Balamu kalupa ne ning small caring group tamu a ausan tamung cell king BEC. At inyang miras no king bunduk, pepakilala nang Jesus karela nung ninu iya. Kalupa ning keng BEC, papakilala tamu king small caring group nung ninu itamu. Keni, i Jesus man, pepakilala na ing sarili na kareng tiki nang disipulus bunduk. Pepakilala na karela ing panga-Dios na. Inya, bigla yang menaliwa aske ing Guinu, at ing keyang imalan as ne kaputi. Ing lupa na tutu yang makasilo. Anti na mong sinabing Jesus – “oini ako, tutung Dios, ibat pa king ibat a menuknangan kayabe da ring tau.” Mekiabe la pa king eksena ri Moises ampon Elias. King kapaniwalan da ring Hudyu, i Moises iyang memie karela kareng amanuan dang batas da reng Hudyu a atiu kareng mumunang limang libru ning Biblia a ausan dang Torah. I Elias naman iyang menalakaran da ring batas a binie nang Moises ampon ing katuparan da reng propesiya a sinabi da reng propeta.

Agyang ninu kekatamu, mangataranta siguru nung ikit tamu ing ikit da reng atlung didipulos. Malisuasan tamu kalupa nang Pedro a bisa nang mitatag a housing project king bunduk. King sobra dang panga-excited, e da na balu man ing panyabian da.

Kaybat nang pepasiag ing sarili nang panga-Dios, igkat na nong tinipa king bunduk at inutus na karela king e da paniabian kareng tau ing ikit dang ligaya angga king subli yang mie. Inyang banggitan na nang Jesus ing tungkul king pangasubli nang mebie, e da aintindian. Kalupa da reng apostoles, mas malagwa ta yang aintindian ing ligaya kesa king kasakitan. Ing pamipasiag nang Jesus king keyang panga-Dios, kapamilatan naning ligayang pepakit na, makataid ya king keyang kasakitan king krus. Kang Kristo e me apikawani ing ligaya na, king keyang kasakitan.

Muli tamu ngan king ligayang pepakit nang Kristo king bunduk. Itamu ngan, iya ing parasan tamu king muli tamu banwa at makiabe king ligaya ning Guinu. Itamung inaus ning Ibpa manibat pa inyang mebinyag tamu, makarikil na para kekatamu ing bieng mitmung ligaya uli na pin kapamilatan na ning pangabinyag tamu, inabe na na katamu ning Guinu king sarili na ban mabiasa tamung mabibie kalupa na. At potang meging tapat tamu keya, e malyaring e na katamu dinan king ligayang makaparikil kareng meging tapat kaya at menenaya keya libutan ning miyayaliwang kapagsubukan keti king yatu.

Oneng nung ing ligaya king banwa iyang parasan tamu, ing kasakitan kalbaryu naman iya ing paralan tamu. Ala nang aliwang paralan king ligaya ning banwa, nune ing paralan ning kalbaryu. Itanam tamu king isip tamu, bilang talatuki nang Kristo, itamu man kailangan tamung dumanas kasakitan kalupa na. nung iya kinaul ne ing krus, dapat ta yang kaulan ing krus a mibibie kekatamu. Nung iya, tinggap na ing parusang e makaintuliran keya, itamu man, mabiasa ta lang tanggapan reng pamagkasakit a neng kai, e no man dapat mibie kekatamu. Nung ing Guinu, miglakbe ya papuntang kalbaryu, agiu ta ya kayang alakuan ing guinu ban magdili-dili king kalbaryo? Inya masasabing Kristiyanu tamu uling talatuki na ka tamu ning Guinu.

Nung mamag-asa tamung miras king ligaya banwa, e tamu kakalinguan mu naman king ing paralan papunta king ligaya, yapin ya ing paralan ning krus. Ala nang aliwang paralan pa ban akayabe ta ya ing guinu king banwa. Ing sakripisyu ning Guinu, iya mu naman ing sakripisyung kailangan tamung gawan ban midakayan tamu naman king keyang ligaya.

Ngening panaun ning kuaresma, manatili sanang milalablab king pusu tamu ing pamag-asa tamung mipunta banwa. Karin akit ta ya ing masala ampon makasilong aske ning Guinu kalupa ning ikit da ring disipulus na inyang menaliwa ya aske king bunduk. At potang atiu ta na banwa kayabe ta ne ing Guinu, lapitan ta ya, ban lalu yang akit ing keyang aske. Pota galang mangabigla tamu, uling akit tala reng sugat na a menibatan king keyang kasakitan king kalbaryo? Wa, ing ligaya ning Guinu, makataid ya king keyang pamagkasakit. Anti ya naman ing bie ning metung a talatuki ning Guinu.

E tamu mimina lub. E tamu masasaul. E ta la lalako reng lawe tamu king Guinu a mitmung ligaya. Iya ing magsilbing inspirasyun kekatamung mamagkasakit ampon mimina lub keti yatu. Balang aldo, apalto ta la naman keya reng sugat ding kekatamung pamagkasakit king bie ban kalupa na, agyang atiu ta na banua, makabakas la pa murin ring sugat ning kekatamung sariling kalbaryo. Amen.

IV. Pamigunam

Keng ebanghelyo ngeni, buri na ning Guinu king e tamu milalako pamag-asa. Marakal kekatamu, milalako na pamag-asa uli na pin kareng miyayaliwang problemang atiu na. Marakal la reng kababayatnan kekatamu uli na pin ning kakaluluan. Kayabe na kasi ning kakaluluan, daratang ing mangalalam a problema a bunga ning kakaluluan. Marakal kekatamu atiu na kening sitwasyun a ini. Masaya lang akakit reng kalulu uling mipata no siguru king pamagkasakit da aldo-aldo oneng potang silipan ta la reng pamibiebie da, e mu aintindian nung nukarin manibatan ing saya sa, ngening puru na pamagkasakit ing pamibiebie da. Ing makapagtaka pa, ila pa reng taung as na kalalam kasalpantayanan ampon maragul a pamag-asa king bie. Ila reng tau, a alodo-aldo, bibitbitan de ing krus da papuntang kalbaryu.

Kareng kalulung kapatad tamu a mamwat nang krus, e malaut ing ligayang pepakit ning Guinu king ebanghelyu tamu. Nung nukarin ta ya akakit ing kasakitan, akit ta ya naman karin ing aninag ning ligaya a pepakit nang Jesus kareng atlu nang disipulos. E ta dapat milalako pamag-asa agyang libutad pa ning maragul a kapagsubukan ampon kasakitan. Paniwalan tamu king e lalaut ing ligaya ning banwa kareng biasang mamitbit kareng kasakitan a mibibie kareng tau. E tamu milalako pamag-asa. Ngening panaun ning kuaresma, ing kekatamung pamagpenitnsya ampon pamag-ayunu, mibuklat sana ing bayung pamibiebie kekatamu a iyang maging susi tamu king bayung pamag-asa. E tamu tatakut potang daranas tamung kasakitan uling siguradu ta yang kayabe ing Guinu a magdala mu naman krus na. Balu tamu king ing Guinu, turu niya naman kekatamu ing bie papunta banua itamung talatuki na. Amen.

V. Pamanahimik

VI. Tauling Panalangin

Ibpa, agyang daranas kaming miyayaliwang kasakitan king bie, e yu buring milalako kami pamag-asa. King pamipasiag nang Jesus king keyang ligaya king bunduk, pepakit yu kekami ing parasan mi. Buri yung miras ke ngan banwa inya e yu buring milalako ke pamag-asa lalu na potang mamagkasakit kami. Pasiknangan yu kami Guinu lalu na potang bisa na keng tuknang taluki kekayu. E sana pu milako ing pagnasan ming miras ke banwa kayabe yu agyang daranas keng pamagkasakit kening bie mi ngeni. Ika ing kekaming pamag-asa. O Jesus, keka mididinan lang lakas reng mimina, mididinan lang pamag-asa reng milalako na pamag-asa. Salamat Guinu. Salamat. Amen.

VII. Kutang

1. Nanu ing mamie kanakung pamag-asa sumangid ning kasakitan king bie?

Download here:
http://rapidshare.com/files/202228350/Kadwang_Dominggu_ning_Kuaresma.doc


Monday, March 2, 2009

Mumunang Dominggu ning Kuaresma

Ing Pamanuksu na ning Diablo kang Jesus


I. Pamuklat a Panalangin

Ibpa, patawad pu kareng egaganang pamagkulang. Patawad king alang pamagmasabal king kekang maragul a lugud king tau. Patawad pu na maralas ing e mi didinan ulaga reng grasyang pagkalub mu kekami. Amen.

II. Pamamasa

Marcos 1: 12-15

12Kaybat na nita, agad neng tinaid ning Espiritu king disyerto. 13Karin ya menatili kilub ding apat apulung aldo; tiksuan neng Satanas. Malyap lang animal ding manuknangan karin, oneng e re pepaburen ding anghel I Jesus nune sinilbian de. 14Inyang mesukul ya I Juan minta ya I Jesus king Galilea at penaral ne ing Mayap a Balita a ibat king Dios. 15“Miras na ing mituldung panaun,” nganang sinabi, “at malapit ne ing Kayarian ning Dios! Sisian yu la at painggulutan ding kekayung kasalanan at maniwala kayu king Mayap a Balita!”

III. Turu

Pagmasusyan taya ngeni ing mumuna ng Dumingu ning Kwaresma na nung nukarin agkatan na katamu ning Ginung Jesus ing sisian tala reng agawa tamung kasalanan at gulutan la reti at maniwala king Mayap a Balita.

Metung karing katutuan yapin ing itamu ngang tau daranas ta ngan kapagsubukan king bie. Mimina tamu ngan king kekatamung kasalpantayanan. At maralas murin ing pangabaldug tamu king kasalanan. Mayna tamu pauli ning panga-naturalesa tamu bilang tau. Meging mayna ya ing tau manibat nyang lebagan na ing kaburyan na ning Dios. At ikit tamu na uling tau ya namang tutu ing Ginu tang Jesus denasan na naman ing pamanuksu ning Dyablu, I Satanas. Oneng ikit tamu ing pamanagumpe ning Ginu tang Jesus laban king kalaban, at ing kayang panlaban yapin ing pamaging malugud at kapamintuan king kayang Tatang, ing Ibpang atyu banua.

Daranasan tamu ing potang atin tamung agawang kasalanan king Apung Ginu, marine tamung maus kaya at neng kayi iti pa ing maging sangkan ning mas lalu tang pamagdayu kaya. Lalaut tamu ing sarili tamu potang atin tamung agawang kasalanan. Atin tamu kasing ausan dang “guilty feelings’ na amana kareng mumuna tang pengari, kang Tatang Adan at Inang Eba. Anyang mikasala la king Dios, sinalikut la. Malilyari iting “guilty feelings” ayni king ordinaryu tang pamibie-bie. Ing metung a anak, potang reng kayang grades asno kababa, nanung reaksyun na potang kutang me ing kayang card, e wari marine ya at neng kayi lingad ne pa na e de pa kanu binye ning titser na. Neng mekabalbal yang metung a bage mamaspak ing metung a anak, nanu ing kayang gagawan? E wari sasalikut ya kareng kayang pengari, pauli ning kayang takut. Potang mikakasala tamu agad tamung kakawani ing sarili tamu. At iti ya ing buri ng idayu kekatamu ning Ginu tang Jesus. Buri ng ibalik ing kekatamung dignidad bilang Anak ning Dios. Buri na katamung ausan ban lumwal king pangasalikut tamu pauli ning takut at kamarinayan. Buri na katamung lumwal king dalumdum ban kawlan at ibalik ing tune saya at tula. At iti ya ing Mayap a Balita. Amen.

IV. Pamigunam

Ing Panalangin Maniawad Kasaupan
(Dalit 143)

Tingiran mu ing panalangin ku, O Ginu; pakiramdaman mu ining kakung panalangin uli ning makatuliran ka; pakibatan mu ku uling tapat ka! E mu ku yayarap keka ban kekang litisan; tau ke ngan makasalanan king kekang arapan. Kalaban ku e na ku tiknangan tutukian at lubus na kung deigan. Binili na ku king madalumdum a sukulan, at meging kawangis ko ding mete king panaun a milabasan. Inya maibug na kung sumuku; milako ing kakung kapanayan. Gaganakan ku la ding aldo milabas; gaganakan ku ing sablang kekang depat, isip-isipan ku ing sablang gewa mu. Tatas ku la keka dening kakung gamat king panalangin; kalupa ning malanging gabun kakau ya keka ining kakung kaladua. Amen.

V. Pamanahimik

VI. Tauling Panalangin

Dios, Ibpang malugud, dakal pung dakal a salamat king pamitagun na binye mu kekami. Salamat king pamanaus kekami ban lumwal king kamarinayan, takut at king dalumdum. Salamat king penandit na buri yu pu talagang ibalik ing kekaming dignidad antimong anak ning Dios. Dakal pung dakal a salamat. King lagyu ning kekayung Anak, I Jesus at ing pamanantabe ning Banal a Espiritu. Amen.

VII. Kutang

1. Atin na bang maragul a tuksu king bie mo na apagtagumpayan mu ite? Nanu ing gewa mung paralan?
2. Kapamilatan ning pamanagumpe king tuksu, nanu ing bage meging aral keka?




Download here:


 
Powered by Blogger.