Ikalabing-atlung Dominggu ning Ordinaryung Panaun

Ing Anak nang Jairo at ing Babaing Tinagkil king Imalan nang Jesus

I. Pamuklat a Panalangin

Ibpa, pasalamat ke pu king mayap a balita ngening aldo ayni. Sasabyan na pu kekami ning kekayung anak, I Jesus na e kami migaganaka, basta magtiwala kami mu kaya. Pauli na pu niti midinan kaming maragul a pag-asang kumayap kareng kekaming kapanandaman. At ing sablang kapuryan at kapasalamatan king Ibpa, king Anak at King Banal a Espiritu. Amen.

II. Pamamasa

Mk 5:21-43

21Pasibayu yang dinalakit i Jesus king kangatba. Atyu pa king lele na ning dagat-dagatan pilupungan da ne ding dakal a tau. 22 Dinatang ya ing metung a lalaking mayayaus Jairo, ing metung karing talapanibala na ning sinagoga. Panakit na kang Jesus, siniklaud ya king arap na 23 at nganang mekisabing mayap, “Mamamate ya pu ing anak kung dalagita. Nung malyari tuki kayu pu kanaku at itumpak yu la ding gamat yu king anak ku ba yang kumayap at e mate!” 24 Tinuki ne man i Jesus. At tikian de ring dakal a tau. Misisiksikan lang lelele kang Jesus. 25 Ating metung a babai karin a labi nang aduang banuang kayayagasan daya 26 at tutu yang magkakasakit. Dakal na lang doktor ding linawe king sakit na at megisan na ing pibandian na king pamipaulu. Oneng e re apakayap ditak man; nune lalu ya pang misubi sakit. 27 Abalitan na ing sasabian da ring tau tungkul kang Jesus, inya mekisiksikan ya karing taung milulupung kang Jesus angga king ikua nang milapit king kagulutan na. Tigkil ne imalan 28 uling nganang sasabi king lub na, “ Atagkil kia mu imalan kumayap na ku.” 29 Kanita mu rin tinuknang ing agus ning dayda nang mayayagas at dimdam nang kinayap ya. 30Inyang dimdam nang Jesus king ating upayang linual keya belikdan na la ding tau at nganang kinutang, “ Ninu ing tinagkil king imalan ku?” 31Ngarang mekibat ding alagad na, “ Akakit mung dakal lang tau ding sisiksik keka at saka mu kukutang nung ninung tinagkil king imalan mo?”32Oneng sindu nang miglawe-lawe Jesus; panintunan ne itang tinagkil keya. 33 Uling balu na ning babai ing mepalyari keya, gagalgal yang linapit kang Jesus; siniklaud ya king arap na at pigtapat na ing mabilug a katutuan. 34 Sinabi nang Jesus, “Anak, pepakayap na ka ning kasalpantayanan mu kanaku. Muli na ka ngeni at ipanatag mu ing lubmu. Mayap na kang lubus. 35Kasalukuyan na pang magsalitang Jesus inyang ating mapilan a dinatang ibat king bale nang Jairo. Ngara, “ Mete ne pu ing anak yu, ba't pangabalanan ye pa ing Maestro?” 36E na pinsingan Jesus ing karelang sinabi, nune ngana kang Jairo, ” E ka migaganaka , maniwala ka mu.” 37 Ala yang aliwang tiki nune mu i Pedro at ding mikapatad a Santiago at Juna. 38 Inyang miras na la king bale nang Jairo, ikit nang Jesus ing magugulu la ding tau; dimdam na la ding tatangis at managulele. 39 Kalub na king bale ngana karela, “Ba't magugulu kayu at manangis? E ya mete ing anak; matudtud ya mu!”


III. Turu

Ing Apung Ginu, manibat pa king kamumulan, king libru ning Genesis pepakit na kekatamu ing kayang naturalesa. Ing naturalesa na ing maglalang, ing mamie bie at balu tamu iti nyang lelangan ne ing tau. Oneng nanung milyari? Dintang ya king yatu ing tuksu, ing mapangandirya, ing mapanyira at yapin ing diyablu. At ing tau mebaldug ya kaniti, at iti memungang kasakitan at kamatayan kekatamu.

Ing ebanghelyu tamu ngening domingu, tungkul ya kareng adwang kataung ating mabayat a problema. Ing metung I Jairo, na ating anak a maghingalu at kabang papunta lang Jesus para sopan ne, belita da reng mapilan a tau bat king bale ng Jairo na mete ne ing anak na. Ing metung naman yapin ing metung a babaing labi nang adwang banwang kayayagasan gaya, tigkil ne imalan I Jesus, uling nganang sasabi king lub na, “atagkil kya mu ing imalan na kumayap na ku.”

Papakit na ning ebanghelyu na ing daranasan da rening adwang taung areti ing daratang mu naman kekatamu ining sitwasyun a makanini. Ana king kasakit ing ating manandaman o masakit king pamilya lalu na nung ala ta pang perang pampalawe keng doktor. Neng kayi maralas pa ing kukutnan taya ing sarili tamu, nanu kaya ing agawa kung mali ot balamu paparusan naku ning Dios? Neng kayi naman neng kematen tamu, asasabi tamung karakal naman mangarok a tao ot bakit aliwa ila ring mete. Dakal tamu kutang, a alang kapakibatan at potang deng mangapalyari keng bie tamu, e ta na aintindyan, kanita tana sabyan “bala naka kekami Ginu, dadaun mina keka ing egana-gana.” Makanini kalalam ing kekatamung kasalpantayanan king Dios. Ing e tamu ayntindyan panibala ta na ngan king Apung Ginu. Kalupa na wari ning babaing labi nang adwang kayayagasan daya. Dakal na lang doktor ding linawe kaya, pero e ya kinayap at nyang abalitan na ing tungkul kang Jesus, pekikwanan neng akatagpu ing Ginu, oneng dakal lang masyadung taung tutuki king Ginu, anya ana king sarili na “atagkil kya mu man imalan, kumayap na ku.” Pepakit na ning babai keni ing kayang maragul a kasalpantayanan, at sinabi ng Jesus “Pepakayap na ka ning kekang kasalpantayanan kanaku.”

I Jairo naman, adya pang belita da kaya na mete ne ing kayang anak, e pamurin minina lub, lalu na nyang sabyan ng Jesus kaya na “E ka migaganaka, magtiwala kamu.” At uling migtiwala ya king Ginung Jesus; ikit na reng adwa ng mata ing kayupayan ning Ginung Jesus; binalik ne biye ing kayang anak. Pepakit na keni ning Ginung Jesus na iya, kalupa keta pa king kamumulan, na iya ing bie at ing mamie bie. Amen.


IV. Pamigunam

King mitmung katahimikan, pigunaman taya ing ebanghelyu ngeni. Ing Ginung Jesus sasabyan na ngeni kekatamu, lalu na reng atyu king kapanandaman ing tatagan ta sana ing kasalpantayanan ta kaya. Payabut na kekatamu na iya man nyang atyu ya keti yatung iti, migkasakit at menandaman ya naman. Oneng pepakit na kekatamu na e tinabili king kekatamung Ibpang atyu banua. Nya ita mu naman, pakikwanan ta sanang e mababaldug king tuksu, king mapanlinlang, na iya pin ing dyablo. Pakyapusan taya sana ing babaing ating kapanandaman, na ating maragul a kasalpantayanan kang Jesus. Tandanan tamu ing gewa na at sinabi na king mitmung kababan lub, “Atagkil kya mu man imalan kumayap na ku.” Pepakit na kekatamu na ing kasalpantayanan atin yang kaakibat a kababan lub.

V. Pamanahimik

VI. Tauling Panalangin

Ibpa, dinan yu ke pung maragul at malalam a kasalpantayanan king kekong anak, I Jesus. Kasalpantayanang ating kaakibat a kababan lub ampong kapamintuan. Turuanan yu ke pu sanang maging matatag at parating magtiwala kaya.

Ligaya king Dios Ibpa, king Anak at king Banal a Espiritu. Anti mo ing sadya rang ligaya, manibat king kamumulan, mangga man king alang angga. Amen


VII. Kutang


1. Kapilan mu mo sinabi, “bala naka kekami Ginu, dadaun mina keka ing egana-gana king bie mi?

Download here:

Page 1: http://www.mediafire.com/file/mddtwnjf4ol/06.28.09%20pg.%201.doc
Page 2: http://www.mediafire.com/file/ygxkdnkwomj/06.28.09%20pg.%202.doc

Ikalabing-adwang Dominggu ning Ordinaryung Panaun

Pepatuknangan nang Jesus ing Bagyu

I. Pamuklat a Panalangin

Ibpa, pasalamat ke pu ngeni king kekayung anak, I Jesus king kayabe miya pu pala king pamaglakbe mi king yatung iti, pepakit na kekami na dyang nanu mang malyari, iyang bala kekami. Pepakit nang masala kekami na agyu nong dinan solusyun ding pagsubuk ning bie, kening yatung iti. Amen.

II. Pamamasa

Marcos 4:35-41

35 Inyang mebengi na, nganang Jesus karing alagad na, “Tara, dalakit tamu king kangatba na ning dagat-dagatan.” 36 Inya likuan da la ring dakal a tau; sinake la king bangkang sasaken nang Jesus at delakit de. Atin lang kayagnan a aliwa pang dakal a bangka. 37 Dinatang ing tutung masikan a angin;sasapulan de ring maragul a alun ing bangka, halus kakatmu ne king danum. 38 Makasandal ne man i Jesus king metung a ulun king banda nang tauli ning bangka; matudtud ya. Ginising de ring alagad na. Ngara, “Maestro, ala nanuman keka nung mangamate tamu ngan?”
39 Tinalakad ya i Jesus at inutus na king angin, “Tuknang ka!” at inutus na king alun, “Tahimik ka!” Tinuknang ing angin at mika maragul a katahimikan. 40 Kaybat ngana karing alagad na, “Baket mitakutan kayu? Ala kayu pang kasalpantayanan?”
41 Detangan na la ning maragul a takut at kilabut, at ngana king metung, “Ninu ya? Pati na ing angin at ing alun mamintu keya!”

III. Turu

Atin taung ing pamanisip makaniti “kanyaman ing mabibie keti king yatu adya pang masakit ing bie.” Wa, karening taung areni, manyaman at masaya na kanu ing bie nung kumpletu la keng pamilya, dyang kapus keng pera, ala musa kanung masakit kareng miyembru na ning pamilya. Atin namang taung basta maka pagserbisyu ya kareng tau at king pisamban, masaya ne at kumpletu ne ing bie na. Atin namang taung parating sasaingsing, sasabyan da parati, “kasakit ning bie.” Wa, karening taung areni, e ayus ing sabla-sabla, parating ating kulang. Neng kayi sabyan da pa, “mapagal na ku, bisa na kung paynawa.” Dening klasing taung areni parati lang malingas-ngas at magulu isip.

Ing ebanghelyu tamu ngeni tungkul ya king karanasan da reng alagad ning Ginung Jesus. Misan a bengi, ding disipulus abe deng makasake I Jesus keng metung a bangka. Kabang dadalakit la king kangatba ning dagat-dagatan, dinatang ing tutung masikan a angin; sepulan ne pa ning mangaragul a alun ing bangka. Halus kinatmu ne king danum ing bangka. Makasandal ne man I Jesus kanita king metung a ulunan king banda nang tauli ning bangka; matudtud ya. Ginising de ring keyang alagad. “Maestro,” ngara, “ala nanuman keka nung mangamate tamu ngan?”

Papakit ning mayap a balita na kalupa tala pamanugali at pamanisip ding mumuna ng disipulus ning Ginung Jesus. Ot asabi tamung kalupa ta la pamanugali at pamanisip? Itamu kasing kasalukuyang talatuki ning Ginu, makanyan tamu mu naman. Potang daratangan na katamu ning masikan a angin, na ila pin ding problema, agad tang paytaranta, agad tang milalako dispusisyun. Neng namang sasapulan na katamu ning mangaragul a alun, na ila pin ding kapagsubukan king kekatamung kasalpantayanan, agad tamung tatabili at mangayna lub. Pota namang kakatmu ne king danum ing bangka, na ila pin ding konsumisyun king kekatamung bie, agad tamung magwala at nanungan kanita ing marok a lulwal king asbuk tamu. Imbis na manahimik at misip tamung paralan nng makananu lang arapan deti at nung makananu lang dinan solusyun, mumuna pa ing pali buntuk ampong pamarsala kareng aliwang tau. Ing maragul ta pang kamalyan, kalupa da rening alagad nyang sabyan da kang Jesus na “Maestro, ala nanuman keka nung mangamate tamu ngan?” Maralas makanini tamu mu naman panugali, ing imbis na maus at pasaup tamu king Ginu, sisyan ta ya pa at milalako ta kasalpantayanan kaya. Amen.

IV. Pamigunam

Pepakit na kekatamu ning Ginu nung makananu neng inutus ing masikan a angin para tuknang at ing dayatmalat ing tahimik ya. Payabut na kekatamu ning Ginu na agyu nong dinan solusyun deng problema tamu at atin yang upayang pasikanan na katamu kareng pagsubuk at keinan ning bie tamu.

Balu tamu na ngeni panahun a iti, masakit ing kabyayan. Lalu na pa siguru nung ating manandaman kareng pamilya tamu. Sasabyan na ngeni kekatamu ning Ginu, “E kayu paylingas-ngas! Kayabe yu kung maglakbe at agyu kung dinan sulusyun ing problema yu.” E tana sana sasabyan ing “mapagal na ku, bisa na kung paynawa.” Maralas oyni kase ing bukang bibig tamo, ing bisa tanang paynawa. Ing sakit mu kekatamu, ana katamu kaburing paynawa, tatakut ta namang mate!

Ngeni, ing dapat tamu mung daptan ing parati tang maus at pasaup kaya. At poyang atyu tamu king masipit a kabilyan, pakikwanan tamung magsandal kaya at aliwa ing sisyan taya ampong milako ta kasalpantayanan kaya. Amen.

V. Pamanahimik

VI. Tauling Panalangin

Ibpa, dinan yu ke pung maragul a kasalpantayanan king kekong anak, I Jesus. Buri mi pu kasing magsandal kaya at mipanatag a lub king e gana-ganang pagsubuk ning bie. Paganaka yu pu parati kekami na e na kami pu paburen, dyang nanung malyari king pamaglakbe mu king yatung iti. Amen

VII. Kutang

1. Nanu la mo reng dinanas mung kapagsubukan king bie?
2. Makananu mo mong erapan deti?

Download here:

Page 1: http://www.mediafire.com/file/kgtmlnnmm5m/06.21.09%20pg.%201.doc
Page 2: http://www.mediafire.com/file/mmyw2jnno3n/06.21.09%20pg.%202.doc

Solemnidad ning Katawan at Daya ng Kristo

Ing Pamakisulu nang Jesus karing Alagad Na king Apunan ning Pamaglagpus

I. Pamuklat a Panalangin

Ibpa, marakal pung salamat uling binie ye kekami I Jesus, ing tinape ning bie. Binie ye kekami ing Guinung Jesus ban maging kanan mi at inuman king pamaglakbe mi keti yatu. Uling keya, lalu mi yang aintindian ing kaburian yung mantabe kekami kapamilatan na ning presensya na king banal a Eukaristiya. King keyang presensya king Banal a Eukaristiya, ikit mi ing keyang alang sawang kapanenayan at pamagpasensya kekami a maralas mangalinguan kareng grasyang bibie yu kekami aldo aldo. Potang tatanggapan mi ya, Ibpa, pabanalan yu kami, pasiknangan yu kami ban ing bie ning Guinung Jesus maging yang mismung pamibiebie mi. Salamat Ibpa king kekong presensya. Salamat pu. Amen.

II. Pamamasa

Marcos 14:12-26

12 King mumuna nang aldo ding Piesta ning Tinape Alang Lebadura, ing aldo ning pakamate biserung tupa para king Pamaglagpus, kitnan de i Jesus ding alagad. Ngara, “Nukarin mu buring isadia mi ing apunan para king Pamaglagpus?” 13 Tiburan na lang Jesus ding adua karing alagad na kayabe niting panabilin:”Munta kayu king siudad. Salubungan na kayu karin ning metung a lalaking magdalang bangang danum. Tukian ye 14 king bale salangian na, at sabian yu king makibale, 'Pakutang ning Maestro: Nu ya karin ing kuartu a pipanganan mi ding kanakung alagad king apunan ning Pamaglagpus?' 15 At ituru ne kekayu ing malualas a kuartu babo; maka-ayus ya at kumpletu gamit. Karin yu isadia ing apunan tamu.” 16 Meko la ding alagad at minta la king siudad, at ikit da ing sablang lerawan nang Jesus karela. At sidia ra ing apunan na ning Pamaglagpus. 17 Inyang bengi na, dinatang ya i Jesus, kayabe na la ding labing adua. 18 At nganang migsalita kabang mamangan la, “ Ing katutuan sasabian ku kekayu:pagtaksilan na ku ning metung karela at kitnan de,” Ako?” 20 Mekibat ya i Jesus, “Metung ya kekayung labing adua at kayabe keng titiltil tinape king pinggan. 21 Mate ya ing Anak ning Tau agpang king misulat; oneng makalunus ya itang taung magtaksil king Anak ning Tau! Mayap pa ing e ne mibait!” 22 Kabang mamangan la, kinangwa yang tinape i Jesus, at pepasalamat ya king Dios. Pemirasu ne ing tinape, at binie ne karing alagad na. Ngana, “ Tanggapan ye; iti ya ing kanakung katawan.” 23 Kaybat na nita, kinua ne ing kopa, at pepasalamat ya king Dios, at binie ne ing kopa karela at mininum la ngan. 24 Nganang Jesus karela, “Iti ya ing kanakung daya, ing daya ning kasunduan, ing dayang mibubu para karing dakal a tau. 25 Ing katutuan sasabian ku kekayu, e na ku pasibayung minum kaniting alak angga king aldo a inuman ku ing bayung alak king Kayarian ning Dios.” 26 At kaybat deng kinta ing metung a kanta, minta la king Bunduk ning Olibo.

III. Turu

Nyang memakbung ya ing Pinatubu at dintang ing lahar king Bacolor dakal ing pibandyan ing mengasira at dakal ing bie mewala. Linipat no kanita ning gubyernu kareng matas at ligtas a lugar ding kekatamung kabaryung mirasnan king lahar. Tengisan da at pigkalungkutan da kanita ing aranasan da king lahar. Deng aliwa maybug lang mamurit uling mitambunan la alus deng bale da at ing mas pigkalungkutan da pa kanita ing mikawani la kareng kamag anak ampong siping dang bale. Aganaka do reng siping dang bale, na king ado-aldo kayabe da ampo pang kakwetuan at ngeni oyni ala no keng panimanman da.

Ing pisamban kanita pepatubud yang pari para magdalang pamangan at imalan para kareng kapatad tamung mesalanta king lahar. Kabang deng pari memye lang pamangan, dakal kareng tau ing minyad ing magmisa la reng pari. Kanitang mekiramdam lang misa ding tau, tunggal ditak pupulisan da ing luwa da at mababawas ing lungkut kareng lupa da. Miyari ini uling penamdaman de keng misa na ing Ginu kayabe at kayantabe de nanu man ing malyari king bie da.

Ing ebanghelyu tamu ngening dumingu tungkul ya king misteryu at grasya ning Banal a Eukaristiya o ing Banal a Katawan at Daya ning Ginu tang Jesu Cristo. Misteryu ya ampong grasya atang asasabe, uling kapamilatan namu ning Banal a Espiritu Santo, kanita ta yamu mas lalung aintindyan na ing tinape maging katawan ne ning Ginu tang Jesu Cristo at ing alak maging daya ne. Pebustan ng malyari ining misteryu at grasyang ayni ban king pamaglakbe ta king yatung ayti malyari ta yang akayabe at akayantabe ing Ginung Jesus papunta king Ibpa.

Ing Ginung Jesus biryan na ing tinape maging katawan ne, uling king karanasan tamu ing tinape apipirasu ya at apapamie ya kareng tau. Nya andat atin misa, pamiraswan ne ning Ginu ing sarili na kapamilatan na ning pamimirasung tinape ban ta yang akayabe ampo pang pakyapusan king aldo aldo tang pamibie-bie.

Biryan na naman ning Ginung Jesus na ing alak maging daya ne, uling keng balu tamu na ing daya, simbulu ne ning bie. Keni papakit na ning Ginung Jesus na e ta dapat kalingwan na ing daya o ing bie na, dinaun ne para king kaligtasan tamu king kasalanan. Nya andat ating misa, dadaun ne ning Ginung Jesus ing daya o ing bie Na, antimong metung a sakripisyu king altar. At ing dayang minagus king kayang katawan king krus yapin mu naman ing grasyang mamagus king pisamban o king Sta. Iglesia, uling ing pisamban o ing Sta. Iglesia ya ing katawan na ning Ginu tang Jesu Cristo. Amen.

IV. Pamigunam

Pakikwanan tamu pu sanang mi abe-abe king lugud at metung mu king kasalpantayanan king Banal a Eukaristiya. Nung alang Banal a Eukaristiya, e tamu asundu at asadsad ing pamangawang mayap kareng kapara tang tau. Uling king Banal a Sta. Misa, kanini tamu mu mididinan pamigaganaka king gewa nang kaligtasan ning Ginu tang Jesu Cristo. Ing Eukaristiya ya mu rin ing bibie lakas lub ban asundu at asadsad tamu ing bie mayap keti king yatu. Kapamilatan ning misa, paramdam na parati keka tamu na, I Jesus ing Kordero ning Dios, ing milalako king kasalanan ning yatu, pipirasuan at bibie ne ing bie na para kekatamu.

Ngening kaorasan anyaran na kekatamu na pakyapusan ta ya, na pagkapilitan tamu sanang idake o pirasuan ing sarili tamu para kareng aliwa. At potang biasa tanang mamie keng binye ng grasya kekatamu, kanita pa mu mayayakit,na maging kawangis taya I Jesus..

Anyaran na naman ning Ginu, na e ta sana pagkatamaran ing munta tamu king dulang ning bie, yapin ing Eukaristiya. Ban pagkaluban na katamu parating sikanan isundu at isadsad ing pamanyuyu kareng aliwang tau lalung lalu na kareng pakakalulu. Amen.

V. Pamanahimik

VI. Tauling Panalangin

Ibpa, biryan na pu ning kekong anak, I Jesus na dinaun at binye ne ing bie na para kekami. Pabustan yu pu, king saup na pu ning Banal yung Espiritu na apakyapusan mi ya ing Ginung Jesus king pamanyuyu at pamaglingap kareng aliwang tau. Dinan mu ke sanang malalam a pamanintindi nung nanu ya kabaldugan ing Banal a Eukaristiya king bie mi. Amen.

VII. Kutang

1.Nanu mo ing panamdaman mu neng e ka meka simba at e me tinggap ing Banal a komunyon?

Download here:

Page 1: http://www.mediafire.com/file/i5bmnu5giuw/06.14.09%20pg.%201.doc
Page 2: http://www.mediafire.com/file/mfz1mozwjzm/06.14.09%20pg.%202.doc

Solemnidad ning Santisima Trinidad

Pepakit a I Jesus karing Alagad Na

I. Pamuklat a Panalangin

Ibpa, dakal pung salamat king lugud at pakamal yu kekami. Salamat pu king Ginung Jesus king pamanubud na kareng keyang alagad ban ituru da kami kareng kekang kautusan at mabinyag kami king lagyu ning Ibpa, ning Anak at ning Banal a Espiritu. Amen.

II. Pamamasa

Mateo 28:16-20

16 Minta la ding labing metung a alagad king Galilea at tinaglus la king bunduk a tildu nang Jesus karela. 17 Panakit da kang Jesus, siniklaud la’t simban de agyamang magduda la pa ding aliwa. 18 Lepitan na lang Jesus at ngana karela, “Miyabie kanaku ing sablang kayupayan karin banua at keti king yatu. 19 Inya munta kayu at gawan yu lang alagad ku ding sablang bansa. Binyagan yu la king lagyu ning Ibpa at ning Anak at ning Banal a Espiritu 20 at ituru yu lang tupad king sablang inutus ku kekayu. Tandanan yu: kayabe yu ku kapilan man angga king kawakasan na ning panaun!”

III. Turu

Metung kareng katuruan o kapaniwalan bilang kristiyanung katoliku yapin ya ing Banal a Trinidad. Ing Banal a Trinidad yapin ing kasalpantayanan tamu na atin mung metung a Dios, at ing Dios a ayni atin yang atlung persona, ing Dios Ibpa, Anak, at ing Banal a Espiritu. Dening atlung persona king metung a Dios mipantepante la, mipaparehu la king alang angga, mayupaya at pare – parehu lang mabibie king sarili da. “Atyu ne ing Amanu bayu ya melalang ing yatu. Kayabe ne ning Dios ing Amanu at nung nanu ya ing Dios makanyan ya naman ing Amanu” (Juan 1:1-2), anang sinulat San Juan king keyang ebanghelyo, Metung a alimbawa kaniti, yapin ing misteryu ning pamaglalang ning Dios king tau, lelangan ne ning Dios ing tau king wangis na (Gen. 1:26). Nya ing tau atin yang atlung dake, ing espiritu, kaladwa ampong katawan. Metung a tau pero ating yang atlung dake (1 Tesalonica 5:23).

Ing ebanghelyu ngening domingu payabut na kekatamu na mig luid ne ing Ginung Jesus laban king kasalanan at kamatayan. Uling meging mapamintu ya i Jesus king Ibpa, ngeni ing kayupayan king banwa at keti king yatu mibie na ngan kaya. Pauli na niti inutus no reng kayang alagad, na gawan dong alagad ding sablang bansa. Inutus na la namang binyagan la ngan reng egana-ganang tau kapamilatan na ning metung mung Dios a ating atlung persona. Ing mumunang persona yapin ing Dios bilang Tatang o Ibpa, tagalalang ampong taga bie keng kailangan tamu. Ing kadwang persona yapin ing Dios bilang anak, mikatawan tau ban bayaran ing kekatamung kasalanan. Ing katlung persona yapin ing Dios bilang Banal a Espiritu, manuknangan kareng pusu tamu ban mie lakas at pamipalino king bawat bage. Oyni ing malugud tamung Dios a atin atlung persona na parati tamung kayabe at e naka tamu lakwan angga king kawakasan ning panaun. Amen.

IV. Pamigunam

Pigunaman tamu nung makananu ta ka importanti king Dios bilang tau. E tamu a sukad ing lugud na keka tamu. Atin tamung Tatang o Ibpang parating makiramdam king e gana-ganang panamdaman tamu. Atin tamu mu namang tagapagligtas at kaluguran a yapin ing Anak at atin tamung Banal a Espiritu na parating dadame kekatamu at tuturu nung nanu ing mayap tang daptan.
Anyaran na kekatamu ning Ginu ngening kaorasan ing maging tapat tamu king kasalpantayanan tamu bilang katolikung kristiyanu at pagkapilitan ta sanang e dudungisan ing pangabinyag tamu king lagyu ning Dios Ibpa, Anak at king Banal a Espiritu. Teya ne ing lagyu na ning Dios kekatamu at balu tamung masakit ing pamanaya king lagyu. Neng gagawa tang mayap ampo neng mikakasala tamu, ing lagyu ning Ginu yang makataya. Ing Ginung Jesus yang akakit da kekatamu at ing panga kristiyanu tamu yang mayayatu.

Neng pagkapilitan ta lang tutuparan deng kautusan ning Ginu, sasabyan na kekatamu ngeni na e naka tamu paburen, e naka tamu lakwan angga king kapupusan ning yatu. Potang datang na ing kapupusan ning yatu, potang ing sablang bage ganap na at potang itamung tau atyu tana ketang alang anggang bie, Agnan agnan tamung lundag at igulisak “manibat king kamumulan ing kapasalamatan, ing kapurian at ing ligaya king Ibpa, king Anak, at king Banal a Espiritu mangga man king alang angga. Amen.

V. Pamanahimik

VI. Tauling Panalangin
Ibpa, dinan yu ke pung sikanan maging tapat king kekaming kasalpantayanan at apakit mi pu sa ing kekaming panga kristiyanu e mu king amanu nune munaman king pamidapat-dapat. Pabustan yu pu sanang ing pangabinyag mi king lagyu ning Ibpa, ning Anak, at ning Banal a Espiritu e mi dudungisan, uling balu mi pu na patsa pinili mi ya ing dalan ning kasalanan, ing makataya pu ing lagyu ning kekayung anak, I Jesus. Amen.

VII. Kutang
1. Atin kang meging mayap at matsurang karanasan na pegamit o teya me ing lagyu mo keng metung a kaluguran?

Download here:

Page 1: http://www.mediafire.com/file/1tomnoehivo/06.07.09 pg. 1.doc
Page 2: http://www.mediafire.com/file/yijg2yrmhzu/06.07.09%20pg.%202.doc