Ika-labing-atlung Domingu ning Ordinaryung Panaun

Ding Bisang Maging Talatuki nang Jesus

I. Pamuklat a Panalangin

Kaluguran a Ibpa, dakal pung dakal a salamat king e gana-ganang bage. Pabustan iyo pung abayanan na kami ning kekang Banal a Espiritu ban ming lubus aintindyan ing kekang kaburyan. Dinan mu kaming dakal a lugud king metung at metung ban miyabe-abe kaming mipanantabe kareng kekaming tingwanan a misyun. Amen.
II. Pamamasa

Lucas. 9:51-62

51Inyang milalapit na ing aldo ning pangaukiat na banua, inari nang Jesus king lub na king marap ne Jerusalem. 52Pepadala yang tubud a makauna keya at minta la deti king metung a baryu ning Samaria at sidia re ing sabla para keya. 53Oneng e re tinggap karin ding tau uling apansingan de king papunta ya Jerusalem. 54Inyang ikit da iti di Santiago at Juan a alagad na, sinabi ra, “Ginu, buri mu ing patipa kaming api ibat banua ban masilab la dete?” 55Belikdan na lang Jesus at sebianan na la, 56at sinulung na la king aliwang baryu. 57Kabang lalakad la king dalan, ngana ning metung a lalaki. “Tukian da ka nu ka man munta.” 58Nganang Jesus, “Atin lang lungga ding asung-gubat at sale ding ayup, oneng ing Anak ning Tau ala ya mang lugal ban pipagpaynawan na.” 59Sinabi na king metung, “Tuki ka kanaku.” Oneng pekibat na niting lalaki, “Tuki ku keka, Ginu, oneng paburen yuku pa mung ikutkut ke I tatang ku.” 60Nganang Jesus, “Paburen mung ding mete ing ikutkut da la ring karelang sariling mete. Oneng ika tuki ka at ipanaral me ing Kayarian ning Dios.” 61Ngana ning metung pang lalaki, “Tuki ku keka, ginu, oneng paburen mu ku pa mung makapamun karing pamilya ku.” 62Sinabi nang Jesus, “Ing ninumang magumpisang sarul at balabalikid ya king kagulutan na e ya maging karapatdapat king Kayarian ning Dios.”

III. Turu

Ing kekatamung arsubispu, I Apung Setu agad ng sabyan kareng bisang magpari ing saguli mu ing mag-umpisa pero masakit ing manyadsad o manari. Sasabyan na parati ini kareng seminaristang bisang mag-pari uling potang mumuna asno karakal pero potang kataulitaulyan adwa o kaya atlu lamu reng misadsad o mayayari.

Aga-ganaka tamu na naman ing kasabyan dareng matua, na ing pamakyasawa e ya nasing kaybat meng sinubu, patsa mepali ka iapsa meng pasibayu. Sasabyan da parati ini karing kayanakan uling king kaba ning karelang karanasan ikit da na dakal kareng lulub king sakramentu ning kasal ing e la lalambat o mikakawani la. King kalambatan kasi ring miyasawa akikilala da ing metung at metung. At potang atin lang adiskubring e masanting king metung at metung kanita no mipate at muli king pamikawani. E da asasad ing karelang tingwanan king arapan ning Apung Ginu nyang kinasal la. Saguli mu ing tatangu king arapan ning Apung Ginu pero masakit at mabayat ing manyansad king obligasyun at responsibilidad.

Ing mayap a balita ngeni tungkul ya king pamagpursiging aryan o isadsad ing bage tingwanan tamu. Kalupa na ning Ginu tang Jesu Kristo na malino ng pepakit ing pamanyadsad na king kayang tingwanan a misyun king kayang Ibpa. Ing Ginung Jesus menibat ya Galilea at bayu ya miras king Judea (Jerusalem) dapat mu ing dumalan ya Samaria. Uling ing Samaria makalibutad ya karening adwang probinsya. Samaritano la reng makatuknang karin at e la Judio. At balu ta naman na deng adwang lahing areni pikasaman da ing metung at metung. Uling reng Samaritano sasamba lang miyayaliwang dios at den namang Judio sasamba la king metung a Dios. Nya inyang apansinan dang papunta ya Jerusalem ing Ginung Jesus mengabaldugan kareng Samaritano ing Judio Ya at
deng kayang kayabe. Kanita, patsa deng Samaritano apansinan dang  Judio la reng dadalan agad dong sara reng karelang pasbul antimong tanda ning kamwa da karela.  Pauli ning e ra pamananggap karela, dening adwang alagad I Santiago at Juan king kamwa da buri da ing gumanti la. Nya sinabi ra king Ginung Jesus na patipa lang api iba’t banua ban masilab la. Buri rang pakyapusan  ing gewa ng Propeta Elias ing menyawad ya king Dios ban  pauran api karing kayang kalaban ( 2 Ari 1:9). King kasing kasaysayan  perusan no ning Dios kapamilatan ning uran a api reng e memye pansin kang Propeta Elias. Oneng sibyanan no ning Ginung Jesus na e makanyan dapat ing karelang panugali. Agya pang matsura ing gewa da reng Samaritano karela e mayap ing sukliyan dang mua ini. At nung pauran lang api karin metung ya pang maging sangkan ning pangayantala ning misyun ning Ginu tang Jesu Kristo papunta Jerusalem. At nung pepayna no man lub keng e da pamananggap karela metung ya naman maging sangkan ini para e matupad ing kaburyan ning Dios. Oneng e makanini ing pusu at kaisipan ning Ginung Jesus, e ya mamatras king laban. E ya byasang mamatras king kayang misyun dyang nanu pang maging sumbagal. Parati yang laban king misyun at kapilan man e menyalitang bawi. Parati yang manyadsad at manari king tengwanan Na. Amen.

IV. Pamigunam

King mitmung katahimikan pabustan talang balikan king kaisipan tamu ding tenguanan tamu king Ginu. Nanu la reng bage tingwanan tamu king aus Na? Nanu la reng bage sidsad tamu? Nanu la reng  sasadsad tapa? At nanu lareng bage tingwanan tamu na e tana sidsad? Dakal a bage-bage ing  tingwanan taya pero e ta menyadsad. Ala tamung pamagpursigi at meging mayna ta lub. Pauli nani king kalibutnan ning keka tamung tingwanan a misyun dakal a bage-bage ing meging sumbagal. Pepadala tamu kareng tuksu. E taya pekyapusan ing Ginung Jesus na mas dininan ng pansin ing kaburyan ning Ibpa. Maralas kasi mas intindyan tapa ing sabyan ning tau kesa nung nanu ing sabyan ning Ginung Jesus. Nya saguli mimwa tamu kareng taung e da ayntindyan ing gagawan tamu. Buri tamu ing gumanti tang matsura kareng taung e tatanggap o e maniwala kekatamu. Buri talang pakyapusan deng adwang alagad “Buri mu bang maus kaming api bat banwa? Mayap namu e naka tamu dininan pwersang gawang milagru ning Ginu. Nung ali mas dakal pang gamitan tala reni king e ustung dapat. Pauli nanini yang maging kasangkanan ning pangayantala ning keka tamung misyun o tingwanan king Ginu at ya murin ing pangayantala ning e na pangakalat ning mayap a balita.

Bilang metung a Kristiyanu, pasibayu ausan at kukumbiran na katamu ning Ginu tang Jesus.  Biyayan ta sana ing pamaging pursigidu at pamanyuguradu kareng tingwanan tang misyun king bie. Sana, kareng miyasawa, parati la sanang mipangatmu king metung at metung kareng karelang kakulangan. Kareng bisang mag-pari, e la mu sana mag-umpisang dakal nune manyadsad at mayari la sanang dakal mu naman. Ban kanita dakal ing sumaup karing tau king bie kasalpantayanan. Kekatamu ngan, e ta sana milalako kasalpantayanan ban tang manyadsad king misyun. Misip at manintun tang paralan ban lalung lumabung ing kapagnasan tang aryan ing kekatamung misyun, kapamilatan ning alang patna tang pamangadi king kasaupan ning Banal ng Espiritu, asadsad at ayari ta ini para king lubus ng ikaligaya ning Apung Ginu. Amen. 

V. Pamanahimik

VI. Tauling Panalangin

Kaluguran a kapatad, pasalamatan taya ngeni ing Ginu tang Jesus uling tiruanan na katamung magpursiging manyundung kalupa na king misyun. Tas tala kaya ring kekatamung kakulangan, ring kekatamung kayadwanan at parati no sanang lingapan ding kekatamung pamilya, komunidad at parokya. Metung at metung kekatamu sabyan tala reng buri tang sabyan Kaya. King balang panalangin,  pakibat tamu: “Ginu ming malugud, sopan yu kepu.”

VII. Kutang

1.    Nanu ya kabaldugan keka ing misyun?
2.    Nanu la reng meging misyun mu king bie na king palage mu apagtagumpayan muna la?
3.    Nanu no man deng misyun mu king bie na e muna sinundu? Bakit?

Ika-labing- adwang Domingu ning Ordinaryung Panaun

Ing Sinabi nang Pedro tungkul kang Jesus

I. Pamuklat a Panalangin

Ibpa, king kaorasan, pabustan yu pung pamasalan na kami ning kekang Banal a Espiritu, pasikanan ban lubus miya pung apilasan at ayntidyan ing buri mung ipasyag king kaorasan. Iti ngan pu anyaran mi king lagyu ning kekang Anak, I Jesus. Amen.
II. Pamamasa

Luke 9:18-24

Misan, kabang manalangin yang dili-dili I Jesus, lepitan de ring alagad. “Ninu aku agpang king sasabian da ring dakal a tau? Nganang kinutang Jesus karela.

Mekibat la, Sasabian da ring mapilan king ika kanu I Juan a Maminyag. Ding aliwa sasabian da king ika kanu I Elias. Ding aliwa naman sasabian da king sinubli yang mebie ing metung karing propeta ning minunang panaun. Nganang kinutang karela, O ikayu naman para kekayu, ninu aku?

Mekibat ya I Pedro, Ika ing Cristo ning Dios.:

Pekapanabilinan nang Jesus king e ra paniabian iti kaninu man. Ngana pang tinuglung, Sukat yang dumalan dakal a kasakitan ing Anak ning Tau. Tanggian de ring pamuntuk da ring pari, at ding talaturu ning Kautusan, at paten de; oneng subli yang mie king katlung aldo.

At sinabi na naman karela ngana, Nung ing ninuman bisa yang tuki kanaku, kalinguan na ing sarili na, pusanan ne ing krus na aldo-aldo, at tuki ya kanaku. Uling ing ninumang bisang magligtas king bie na, abating ne iti; oneng ing ninumang mibating king bie na king uli ku, akit ne iti.

III. Turu

Agpang keng Johari Window Model, atin ya kanung apat a pweding panlalawe keng metung a tau. Ing mumuna yapin ing “Open Area” o ing bage balu tamu king sarili  at ing balu daring aliwa kekatamu. Iti lareng bage isipan, panlalawe, panandaman, pamangailangan, amanung parati tamung sasambitlan at bage gagawan. At deni akakit at daramdaman dala reng aliwang tau kekatamu. Ing kadwa yapin ing “Hidden Area” iti la reng bage-bage pisasalikut tamu kareng tau, reng mengapalyaring e mangasanting king bie tamu o kaya karanasan na makarineng pabalu kareng aliwang tau. Ing katlu yapin ing “Blind Area” iti la reng bage-bage akakit at balu da reng aliwang tau kekatamu, pero reni e tala balu o akakit man. Atin pin metung a kwentu king iskwela king metung a mestra, asne kanu kamwang kamwa king metung ng kayabeng  mestra. Panyiran ne kanu ning kayabe ng mestra, panyabyan na asne kanu katyura ugali at asne kanu kapanagkas, anya bubusuk ya king  kamwa. Nya balang akakit na  kareng kayabe ng mestra, sasabi ya at ngana, “ot makanyan neman ing kayabe tang mestrang yan, pangwentu na asna ku kanu katyura ugali at asna ku kanu kapanagkas, agyang dirit e ku man mapanagkas, e ku kalingwan ing gewa na kanaku nyan, punyeta ya.” E ya pin kanu mapanagkas.  Ing kapat yapin ing “Unknown Area” o ing bage itamu at ding aliwa e ta balung pareu. Paminsan dening bageng areni kabud nala lulto at mipapakirut o mamangha tana mu na atin ta palang makanining talentu o kaya ugali. At kadalasan ing Apung Ginu ing mikibalu kareti.

King ebanghelyung mebasa dininan nong “oral test” ning Ginung Jesus deng kayang alagad. Kitnan no reng kayang alagad nung ninu Ya agpang king sasabian daring aliwang tau. Mekibat la reng alagad, at alus mayap lang tau ring segut o pekiwangis da king Ginung Jesus. At kitnan nala reng alagad nung para karela ninu iya.  At I San Pedro ya ing “first honor” uling istu ya ing pekibat na tungkul king Ginu tang Jesus. Penabilinan nala na e ra sukat panyabyan iti, uling makarikil yang dumalan kasakitan at kamatayan ing Ginung Jesus.


Adwa lang puntu reng buri ng ipasyag ning mebasang ebanghelyu, mumuna yapin ing pamanuri king kekatamung sarili o ausan tamung “self-reflection”. King pamanuri ta king sarili tamu, pakyapusan taya ing Ginu king kayang paralan, kutnan tala reng sarili tang pamilya nung nanu ing asabi da kekatamu reng aliwang tau. Kalupa na kaya ning Ginu tang Jesus na mayap ing pekibat dareng kayang kitnan? Kaybat kutnan tano man deng sarili tang pamilya, anti mo reng anak tamu o pengari. Ing kayang sasabian at balu dareng aliwang tau tungkul kekatamu makanyan mu naman ing asabi dareng sarili tang pamilya? Ngening modernung panaun, kadalasan makayaliwa ya ing bie tamu king luwal at king sarili tang pamilya. Marakal at malwalas tamu kapagpasensyan kareng aliwang tau kesa kareng sarili tang pamilya. Atin pin metung a pengari na kayabe ne ing kayang anak a malati na makasapupu kaya uling makasake la king dyip a pamasada. Bigla nya mung  menyuka ing kayang malating anak, at ing gewa ning pengari, pengamwanan ne at pemalu ing kayang anak. At kabang pamalwan ne ing kayang anak, suka ne man suka ing anak at lalu na neman pamalwan ning kayang pengari. Ing kutang bakit kaya ing pengari, pengamwanan at pemalu ne ing kayang anak? Manyuka ne at malilyu ne ing kayang anak, pangamwanan at pemalu ne pa. Ing pengari marine ya kareng taung makasake king dyip, pero e ya merine at melunus king kayang anak. Ing dapat sanang gewa ning pengari ing kinaul ne ing kayang anak, agya pang mangasna neng suka, e baling mangarnatan at buluk ya, basta a paramdam namu ing lugud na king kayang anak. At kaybat sabyan na king kayang anak, “sige anak isuka mu, mipasno ka kanyan, e ka marine, e ka tatakut, atyu ku keni.”

Ing kadwang puntung buri ng ipayabut ning ebanghelyu yapin ing sukat tang mapibabata nanuman ing daranasan ta king bie. Uling ing kegana-ganang bageng iti, lumipas ngan. Nung tutu tamung talatuki ning Ginu tang Jesu Kristo dapat kalupa taya panlalawe at pamanisip. Balu na ing dumalan yang kasakitan at kamatayan king krus, pero e ya peysaul kaniti. Penibala na ngan king kayang Ibpa nanu man ing mapalyari king kayang pamaglakbe king yatung iti. Positibu yang e ne paburen ning kayang Tatang. Itamu kaya, positibu at malalam ba ing kekatamung kapanwalan na e naka tamu paburen ning Apung Ginu? Nung alipa, e ta ya pa binating ing sarili tamu. Patsa mebating ne ing sarili tamu, ing buri ng sabyan, aliwa na ing sarili tamu ing malilyari buri, nune itang sasabing “sige anak isuka mu, mipasno ka kanyan, e ka marine, e ka tatakut, atyu ku keni.” Amen.

IV. Pamigunam

Kaluguran a kapatad, malwat ng panaun na ing Banal a Espiritu, binayu no reng pusu tamu, anyang mebinyag tamu king lagyu ning Ibpa, ning Anak at ning Banal a Espiritu binayu nano reng pusu tang batu, pelitan nong kalupa ning pusu ning kayang Anak  I Jesus. Oneng, maralas gagawan tayang “Blind Area” balu at akakit dareng aliwang tau, pero king sarili tamu e ta balu o e tamu babyayan. Nya agkatan na ka tamu ning Tatang tamu, ing Ibpa, na sana nung nanu ing mayap tamung gagawan kareng aliwang tau makanyan muna naman sana king kilub ning pamilya. Katulang katula ning kekatamung Ibpa nung nanu sana ing sasabyan tamu ya ing gagawan ta king bie.

At e ta dapat migaganaka, agyu ta ing panagkat ng ayni. Nung madalas daralan tang kapagsubukan o kasakitan, okey mu yan, dapat maging positibu tamu. Uling ing bie disipulu kang Kristo bie yang makisanmetung o makibahagi king sakripisyu at lugud kareng aliwang tau. Ninu mo ing taung alang daralanan problema o kasakitan king bie? Pare-pareu tamu mung atin problema o kasakitan, ing e tamu pamipareu, reng aliwa sasarilinan da ing problema, e ra balu na king pamaglakbe king yatung iti, atin tamung kayabe at kayantabe at iti yapin ing Banal a Espiritu. Amen.

V. Pamanahimik

VI. Tauling Panalangin

Ginung Dios, mayupaya at malugud kekami ngan, dakal pung dakal a salamat kening pinandit. Mipamasalan at midinan kaming sikanan pauli ning mayap yu pung amanu. Ing sablang kapuryan at kapanyamban king lagyu ning Ibpa, ning Anak at ning Banal a Espiritu. Amen.


VII. Kutang

1. Ninu itamu keng pamibalu dareng aliwang tau at ning sarili tang pamilya?
2. “Ninumang bisang magligtas king bie na, abating ne iti; oneng ing ninumang mibating king bie na king uli ku, akit ne iti.” Makananu yang ikonekta  iting sinabi ng Jesus king bie tamu?

Ika-labing-metung a Domingu ning Ordinaryung Panaun

I Jesus king Bale nang Simon a Pariseo

I. Pamuklat a Panalangin

Ibpa ming malugud, salamat pu king grasyang pigkalub yu kekami king kaorasan. Tuturu na kekami  ngeni ning Ginu ming Jesu Kristo nung nanu ing apala mi neng biyasa kami namang mamatawad kalupa na. Tapukanan mu ke sana pung grasya ning kekang Banal a Espiritu ban mas lalu mi pung ataruk ing kekang kaburyan. Amen.
II. Pamamasa

Lucas 7: 36-8:3

36Kimbiran ne ning metung karing Pariseo I Jesus ban makipangan king bale na. minta ya I Jesus king bale na at linukluk ya ban mangan. 37King balen a ita ating metung a babaing mabibie king pamikasala. Abalitan neng atyu makipangan king bale na ning Pariseo I Jesus. Uli na nita, migdala yang metung a alabastrung lulanan mitmung pabanglu. 38Linukluk ya lele nang bitis Jesus. Tatangis ya at besa na la king lua nang tutulu ding bitis nang Jesus. At kiskusan na la deti king buak na; penuma na la at saka na la tigtugan pabanglu. 39Inyang ikit na iti ning Pariseong mengumbira kang Jesus, sinabi na king sarili na, “Nung ing taung ini tune yang propeta, sukat nang balu nung ninu at nung nanu yang uring babai ining tatagkil keya – metung yang babaing palpikasala!” 40Migsalita ya I Jesus at ngana, “Simon, atin kung buring sabian keka.”  Nganang mekibat, “Maestro, nanu pu ita?” 41Nganang Jesus, “Ating aduang lalaking maki utang king metung a mamaram salapi. Ing utang na ning metung limang dalan a salaping pilak, at ing metung naman limang pulung salaping pilak. 42Ala lang pamayad deting adua, inya parehu na lang pepatawaran king karelang utang. Ninu kareting adua ing lalung lugud king mematawad?” 43Nganang Simon, “Isipan ku pu, itang pepatawaran nang dakal.” Sinabi nang Jesus, “Ustu ing pakibat mu.” 44Kanita belikdan neng Jesus ing babai at saka na sinabi kang Simon, “Akakit me ing babaing ine? Dinatang ku king bale mu at e mu ku dininan danum ini besa na la ding bitis ku king lua na at papalangi na la king buak na. 45E mu ku selubungang inuma, oneng ya e na la tiknangan penuma ding bitis ku kabud dinatang ku. 46E me tigtugan laru ing buntuk ku, oneng ya kitmu na lang pabanglu ding bitis ku. 47Uli na niti, sasabian ku keka: linugud yang dakal a dakal uling mipatawaran la ding dakal nang kasalanan. Ninumang tinanggap ditak a kapatawaran, ditak mung lugud ing papakit na.” 48Kanita sinabi nang Jesus king babai, “Mipatawaran la ding kasalanan mu.” 49Ngara king sarili da ring aliwang kasulu na king lamesa, “Ninu kaya ining mangangas mamatawad kasalanan?” 50Oneng sinabi nang Jesus king babai, “Linigtas na ka ning kasalpantayanan mu; sulung, mako na kang payapa.”
 8Kaybat na nita, minta ya I Jesus karing balen at karing baryu. Panaral na ing Mayap a Balita tungkul king Kayarian ning Dios. Kayabe na la ding labing adua, 2at ding mapilan a babaing likuan da ring espiritung marawak at meulu king sakit a miyayaliwa: i Maria (a mayayaus Magdalena) nung kenu na la pepalualan ding pitung demonyu; 3i Juana a asawa nang Cuza a katiwala nang Herodes; I Susana at ding aliwa pang babai. Gagamitan da reti ing sarili dang pibandian king pamaniaup da kang Jesus at karing alagad na.

III. Turu

Maralas daratang king bie tamu ing mabayat a kapagsubukan, na neng kayi madadaig tamu king tuksu at yang maging sangkan ning pangabaldug tamu king kasalanan. Pero atin pang mas grabi king pangabaldug king kasalanan, ini  yapin ing pamagbabad king kasalanan. Maralas, isipan da reng mangarok a tau na e nala misaka king pangabaldug king kasalanan, nya naman e dana pansin  ing makababad  no pala king kasalanan.  Pero kekatamung ating malalam a kasalpantayan antimong Kristiyanu ali makanini. e tamu mipaindatun anggat e tamu misaka king pangabaldug king kasalanan. Gagawa tang kapaglarinan ban misaka tamu king kulkul ning kasalanan. Wa, tutu e tamu aiwasan ing mikasala uling panwalan tamu ing sasabyan ning Banal a Kasulatan na  “Nung sasabian tamung ala tamung kasalanan, pipiraitnan tamu ing kekatamung sarili at ala yu kekatamu ing katutuan. Nung ikumpisal tamu ing kekatamung kasalanan, ayasahan tamu king ipatawad na la kekatamu ning Dios at linisan na katamu king sabla tamung kasalanan uling tapat ya” (1Jn 1:8-9).


Ing ebanghelyu ngeni tungkul ya king kapatawaran, at akit tamu na ing kapatawaran  didyan na  katamung kapasidad para lugud king mapamatawad a Dios at kareng kalupa tang tau. Tuturu na keka tamung Jesus na nung ding dakal tamung kasalanan petawaran nala, mangabaldugan mu ing dapat dakal mu naman ing lugud a ibalik tamu Kaya na mematawad (Ing Dios).

King Banal a Kasulatan, ing kabaldugan na ning kapatawaran yapin ing “pamaglagpus o pamangalingwan king utang o parusa”. Ing tuturu na ning Sta Iglesia kekatamu tungkul king pamamatawad yapin ing “Forgive and Forget”, mamatawad at kalingwan ing agawang marok dareng aliwa kekatamu. Kokonekta taya ini king libru nang Jeremias 31:34, na sinabi ning Ginu “Patawaran ku ing karelang kasalanan at kalingwan ku ing karelang kasalanan.” At nung buri tang mibalik king wangis na, dapat mu ing mipamamatawad tamu kareng keynan ning metung at metung. At ini yang e na atanggap Simon a Pariseo king mebasang ebanghelyo, Para kasi king relihiyung Hudyo, ing yatu mapipitna ya kareng mayap ampong  makasalanan. Deng mayap yapin deng tutuki kareng utus ning Dios at ding marok yapin deng gagawang e ustu. Kaluguran nala ning Dios ding mayap pero ding marok kasaman nala. Mayap yang tau I Simon, nya naman kakawani ya karing sasabyan dang mangarok a tau. At oyni ing Ginu tang Jesus, kasabi ne ing metung a babaing makasalan na e na abut isipan Simon na gagawan nang Jesus ini.

Ing pamanisip ng Simon e ne kalupa ning pamanisip ning Dios. Uling ing Dios na bukud ya ing mayap, e na masyadung didinan pansin ing kekatamung keynan, nune mas didinan nang pansin ing tutu tang pamanyawad tawad. Buri nang ibye kareng e gana-ganang tau ing kapatawaran at didinan na katamung panaun ban misip at migunam kareng kapagsubukan ban tang maging malulut at maging matatag king kekatamung kasalpantayanan. Paburen na katamung mikakasala uling balu na king bandang tauli aisip-isip tamu murin ing matsura ing gewa tamu at iya mu  bukud ing kaylangan tamu. Kalupa ng Rahab na metung a harlot, I David na mekipangalugud, I Moises na mekamate tau, I Abraham na miglaram, I San Pablo na mekamate kareng mumunang Kristiyanu at kang San Pedro na lingad neng mekatatlu ing Ginu at migsalita pang amanung makadiyablu. Deni ngang taung areni na atsu king Kasulatan petawaran nala at inaus no pa para maging kasangkapan ning kaligtasan ning tau. Nya e masakit king Ginu ing patawaran at kalingwan no reng kasalanan tamu uling kapamilatan na nini akit ta neman ing tune lugud ning Dios. Amen.

IV. Pamigunam

King mitmung katahimikan, paksabyan taya ing Apung Ginu king pusu at kaisipan tamu. Panyawad talang tawad deng kekatamung marok a pamanisip ampong pamidapat-dapat. (Ditak a minutu para king katahimikan)

Anyaran ta ngeni king Banal a Espiritu ing antabayanan na katamu ban lubus tang atanggap ing itamu makasalanan tamu at ing Ginung Jesus yang kaylangan tamu king bie tamu. Tanggapan tala sana reng keynan tamu, panyawad talang grasya reni ban talang alabanan. Lako na sana ing kabalisan ning pusu tamu at midinan ta sanang lakas lub pagsisyan tala reti king arapan na. Bayu ya mete ing Ginu tang Jesu Kristu king babo ning krus, balu na ing e pa meyari ing pamikalaban king marok. Nya, anyaran na kekatamu na pag-umpisan ta king aldo-aldo tang pamibie-bie ing kapaglarinan kareng agawa tang e ustu at parating manyawad parating kapatawaran. Parati tang isipan na ala tang agawang mayap nung e ta payantabe king Banal a Espiritu. Amen.

V. Pamanahimik

VI. Tauling Panalangin

Ginung Jesus dakal pung dakal a salamat naneng atyu kami king kulkul ning kasalanan, sasaka yu ke pu at tatalakad pasibayu ban pasibayung mag-umpisang lumaban king bie. Dinan yu kepung lakas lub mangumpisal kareng keynan mi, kareng apanasakit mi kapanamdaman, patawad pu. Dinan yu kepung grasya na maging instrumentu ning pamisanmetung dareng pamilya at iti king kapamilatan yu. Amen.

+ Ibpa mi… +

VII. Kutang

1.    Aranasan muna ing mematawad? Ikwento.
2.    Nanu mo ing penamdaman mu nyang mematawad ka?
3.    Aranasan mumu na naman ing petawaran daka king agawa mung e usto? Ikwento.
4.    Nanu mo ing penamdaman mu nyang petawaran daka?
5.    Nanu lamo reng a ibye tang “tips” ban tang saguling mamatawad at manyad tawad?

Solemnidad ning Katawan at Daya ning Ginu tang Jesu Kristo

Pepakan na lang Jesus ding Limang Libung Tau

I. Pamuklat a Panalangin

Ibpa, pagmasusyan miya pu ngeni ing Solemnidad ning Katawan at Daya ning kekayung Anak, I Jesus. Maralas pu ing tatanggapan miya king Banal a  Misa at panwalan mipu na kapamilatan ning Banal a Espiritu, ing ordinarying tinape at alak  maging katawan at  daya ning kekayung anak ban iyang mamye lakas kekami king pamaglakbe papunta keka king banwa. Maragul pung grasya kekami ini, pero balu mi pung atin munamang maragul a responsibilidad ini. Ing Katawan at daya na pu ning kekayung Anak atyu kekami ban mie kami mu naman pung metung a katawan. Metung a katawan, metung a komunidad, metung a kapagnasan, metung a kasalpantayanan king metung a Diyos. Amen.
II. Pamamasa

Lukas 9:11-17

11Migbalak la ding apostol at belita ra kang Jesus ing sablang depat da. Tiki na la at ila mung kayabe nang minta king balen ning Betsaida. 12Inyang abalu ra iti ding dakal a tau tinuki la kang Jesus. Tinggap na la at selitanan tungkul king Kayarian ning Dios, at pepakayap na la ding sablang sukat pakayapan. Inyang malapit neng lumbug ing aldo lepitan de ring labing adua at ngara, “Palakuan yu na la ding tau ban mipunta la karing balen o baryung malapit da lang manintun apangan da at apitudturan, uling mikelangan iting lugal.” 13Oneng nganang Jesus karela, “Ikayu mismu dinan yu lang apangan da.” Ngarang mekibat, “Lima la mung tinape at aduang asan ding bakal mi. Buri mung mako kami ban saling pamangan para karing dakal a taung dete” 14(Ating manga limang libu katau karing lalaking atyu karin.) Nganang Jesus karing alagad na, “Paluklukan yu lang makagrupung tia limang pulu katau.” 15Memintu la ding alagad at pepaluklukan da la ring sabla. 16Kinua na lang Jesus ding limang tinape at aduang asan; tinalanga ya banua at pepasalamat ya king Dios para kareti. Pirasu na la at saka na la dinwang karing alagad ban ipamie da la karing tau. 17Mengan la ngan at kinabsi la. Labi lang aduang kaing ding akatmu da ring alagad inyang tinipun da la ring tagan karing mengapirasung tinape.

III. Turu

Makasabit ya ing metung a saku king batal ning metung a ortilanu king marangle. Bining pale ing laman na ning saku at maglakad yang alang patugut ing ortilanu ban kumang bini kilub ning saku ban isalbag king gabun ning marangle. King pamanyalbag ng bini ning ortilanu, bala mu mo wari ing masasayang mu iti, uling miyuyugse mu king angin. Pero ali, uling datang ing makatakdang oras ing tumubu iti at mibalik king mas marakal pa.

Makanyan mu naman itamung talatuki kang Jesu Kristu, daratang  neng kayi asasabi tamung sayang mu yata ing pamanuki ta king Ginu. Pero ali, uling sasabyan nang Jesus kekatamu ing “Mawala ya ing ninumang sasagip king sariling bie na; akit ne ning ninuman ing mibabating king bie na alang –alang kanaku (Mateo 10:39).” Payabut na kekatamu na mas dinan tang maragul pansin ing pamagdaun  king sarili karing aliwa antimo ing pamanyuyu o pamagsilbi kesa king pakinabang ban kapamilatan na niti panamdaman dareng tau king paligid tamu na atin talagang lulugud a Diyos.

Ing ebanghelyu tamu ngeni tungkul ya king  Solemnidad ning Katawan at Daya ning Ginu tang Jesu Kristo. Patsa sinabi tamung Katawan at Daya ning Ginu tang Jesu Kristu agad lungub king kaisipan tamu ing Tauling Apunan o ing palagwan tamung Banal a Eukaristiya o Banal  a Misa. Nanu kaya ing tune ng kabaldugan ning Misa o Eukaristiya king bie tamu? Balu tamu itang Katoliku na metung ya karing pekaimportanti ning bie tamu ing pamamunta king Misa. Ing misa ya ing paralan king pamanyamba tamu antimong makisanmetung king Katawan nang Kristo, ing Pisamban.  Iti metung yang paganaka keng  pamagsakripisyu at  panga-
mate ning Ginu tang Jesu Kristu king krus o ing pamagdaun na king sarili nang bie para keka tamu. Iti ya naman ing  maging sentru ning presensya  ning Ginu tang  Jesu Kristo king busal  tamu. Ing tinape at alak na  tatanggapan tamung  maging Iya (Jesus), Iya ing “Paskuwa at ing Tinape ning bie  na bibie bie keka tamu kapamilatan ning sarili nang laman, ing laman na ating bie at bibie bie kapamilatan ning  ning Banal a Espiritu. Neng makiagum tamu king pamamamirasu ampong pamananggap king tinape ning bie, mangabaldugan mung makisanmetung tamu kang Kristo at kareng  balang metung a taung tatagun kaniti. Tatagun tamu kening importanting ukasyun ayti pablasang metung tamu mu kasalpantayanan. King pamanagun tamu king Misa mangabaldugan ing apakiyabut ta king yatu na ating pisamban a mikakalugud at misasanmetung.

E taya  pweding gawan magdili-dili ing Banal a Eukaristiya uling metung ya iting kapagmasusyan a pangkomunidad “Gawan yu iti king kapigaganakan kanaku”. Inayin ne ing kayang sariling bie e mu keng metung a tau nune kareng komunidad, kekatamu ngang taung kaluguran na. Parati na katamung  agkatan king Misa ban pakyapusan taya king pamagdaun na king sarili na. At iti  ya ing maging paralan ban  abayu tayang  paditak-ditak king aldo-aldo ing bie tamu ban maging makabaldugan ing pamagsilbi ta Kaya at kareng kalupa tang tau.  Amen.

IV. Pamigunam

Ing kapagmasusyan king Solemnidad ning Katawan at Daya ning Ginu tang Jesu Kristo amunan na katamung maging kawangis na king pamamie king sarili na at pamaglingap karing tau “Dininan da kayung alimbawa ban daptan yu naman ing anti ing depat ku kekayu (Jn. 13:15).” At sinabi na pa ing “Balu yu la deting bage at mapalad kayu nung tuparan yu la! (Jn. 13:17).” Uling king pamisasanmetung at pamikakalugud tamu bubuuan taya ing Katawan ning Ginu tang Jesu Kristo. I San Pablo paganaka na karing minunang Kristiyanu ing masampat a panugali neng tatagun king “pamamirasung tinape” o ing Banal a Eukaristiya. I San Pablo sinabi na “Ating pamisagsagan king balang metung at metung…ing metung at metung kakanan na ing sariling daralan na. Inya deng mapilan daranup la at ding mapilan lalasing la.”  Sinabi na king kapamilatan ning karelang pamidapat-dapat, “pakarine do reng alang akarapat king bie” (I Cor. 11:17-34). Kang San Pablo maging tune yamu ing pamigaganaka king Eukaristiya ning Ginu tang Jesu Kristu nung ding tatagun kaniti biasa lang mamie nung nanu ing atin da kareng aliwa at mas lalu na  nung ating dakal a ganaka ampong lugud karing aliwa. Nung malilyari iti, ing Banal a Eukaristiya maging tutu tayang gaganakan at ing presensya ning Ginu tang Jesu Kristo na malugud ampong dakal a pakalulu karing dakal a tau mamye yang milagru ban baywan lareng pusu tamu ampo ing buu tang pangatau. Amen.
V. Pamanahimik

VI. Tauling Panalangin

( Talnanan tapung gamat at ikanta taya ing Ibpa mi ban panamdaman ing pamikakapatad tamu king metung mung Tatang at kaybat mipapangaul tamu tanda ning lugud at pakamal  king balang metung.)

+ Ibpa mi… +

VII. Kutang

1.    Aranasan muna ing dinanop pauli ning ala ka talagang apangan? Nanu ing penamdaman mu? Nanu ing gewa mu? Ikwentu.
2.    Keng palage mu, dakal bang klasing danop? Paliwanag.
3.    Ot kaya, ating dadanup a tao? Kulang wari ing gabon? Ing pamangan?
4.    Atin bang dadanop king kekatamung komunidad? Nanung klasing danup ing akakit tamu?
5.    Nanu ing masanting tang gawan ban sumaup dyang king malatik mung bage ban asopan tala king karelang danop?