Sunday, November 29, 2009

Mumunang Dominggu ning Adbiyento


Ing Paniatang na ning Anak ning Tau

I. Pamuklat a Panalangin

Ibpa ming atyu banua, misamban ya ing lagyu mu; ika ing mag-ari keka mi. Mipamintuan ing kaburyan mu keti sulip anti banua. Ibie mu kekami ngeni ing pamangan a kailangan mi king aldong iti. At patawaran mula ding kasalanan mi keka, anti mo ing pamamatawad mi karing mikasala kekami. At e mu ke paisaul king mabayat a kapagsubukan, nune ikabus mu kami king marawak. Amen.

II. Pamamasa

Luke 21:25-28, 34-36

25 'Mika ating palatandanan king aldo, king bulan at karing batuin. Magulu la ding bansa keti king yatu at malitu uli na ning dagat at ning alun. 26Mabungsul la ding tau king takut at king pamanisip da karing bage mapalyari king yatu; uling mayugun la at milisia la dalan ding planeta at ding aliwa pang bage king banua. 27King panaun a ita, akit deng daratang ing Anak ning Tau libutad na ning biga at kayabe ning maragul a kayupayan at kamalan. 28Kabud magumpisa na lang mapalyari deting bage, tumula kayu uling malapit na ing pangaligtas yu.' 34 ”Mingat kayu! E yu paburen ing mipasoso kayu king katakawan at pamaglasing, at e kayu paibalisa king pamanintun kabiayan, pota dasnan na kayu ning Aldong ita a e kayu makasadia. 35Uling datang ya ing aldong ita king e ra piadian ding sablang tau king mabilug a yatu. 36 Inya, magsadia kayu king balang oras; manalangin alang patugut ban mika sikanan kayu at aligtasan yu ing sablang mangapalyari at ban makayarap kayu king Anak ning Tau.”

III. Turu

Inyang banwang 1970’s ating metung a grupu (sekta) keti Pilipinas na pangalat da na datang na kanu ing kawakasan ning panaun. Ginawa lang kampu da king Tagaytay at memagdala lang delata, kaban-kaban a abias at imalan a kaylangan da. Memagdala la namang helmet ampong parulang saken banta kanu nung mayun atin lang pangober kareng karelang buntuk at katawan ban e la manasakit. Pero megisan na ngan ing karelang dakal a dadalan, meinip nala at ing pamalita da e mepalyari.

Ing ebanghelyu tamu ngeni yang mumuna ng Dumingu ning Adbiyentu. At ing buri ng sabyan ning adbiyentu, yapin ing kapagsadyan ning balang katolikung kristiyanu king kadwa ng panyatang ning Ginung Jesus. Datang yang pasibayu antimo ing pengaku na kareng kayang alagad ngana “ E cayu pailingasngas at paigulu isip. Paniulan ye ing Dios, at paniulan yu ku naman. Dakal lang kuartu king pibale-bale nang Ibpa ku, nung e mu makanyan, e ku sukat sabian kekayu iti. Mamako ku ban isadya ra kong lugal, at kaybat kung mekalako at mekapagsadyang lugal para kekayu, magbalik ku ba ra kong ituking kayabe ku: kanita nu karin ku man, karin kayu naman (Juan 14:1-6 ).”

Malingasngas tamu at magulu pin isip kening sasabyan na ning ebanghelyung kawakasan ning panaun nung itamu angga ngeni e taya aytindyan at gagawan ing tirung pangadi ning Ginung Jesus. Mas mumuna taya pang didinan pansin o ulaga ing “Dinan mu kaming pamangan aldo-aldo” kesa king “samban ya ing lagyu mu at mipamintuan ing lub mu”. E man pamangan aldo-aldo ing buri tang anyaran, ing buri tamu pabulan at neng kayi pin pabanua pa. Oyni ing sasabyan na ning ebanghelyung “ Mingat kayu! E yu paburen ing mipasoso kayu king katakawan. At king amanung inglis naman “ Give us our daily bread” tinape mu dapat , pero ing anyaran tamu “cake” a marakal a aysing. At dapat ing sobra e dapat isalikut nune dapat ipamye (“Extra loaf is not for storing but for sharing”).
Mitakutan tamu pin king kawakasan ning panaun nung e taya kilala ing Ibpa, ing Tatang tamung malugud, na pilit nang pakilala ning Ginu tang Jesu Kristu (“Ibpa mi atyu ka banwa, misamban ya ing lagyu mu keti sulip anti banua.”) “Ninung pengari kekayu ing munie batu king anak nang maniawad tinape? Dinan ye kayang ubingan, nung maniawad yang asan kekayu ing anak yo? Nung ikayung palpikasala balu yu lang dinan mayap a bage ding anak yu, e di lalu na kayung balung dinan ning Ibpa yung atyu banua?(Mt. 7:9-11).”

E taya pin buring akit daratang ing Anak ning Tau busal na ning biga kambe ning maragul a kayupayan at kamalan, uling tatakut tamung marap kaya kasi e taya talaga depatan ing pangading tiru ning Ginung Jesus, “ Patawaran mu kami kareng kekaming kasalanan keka, antimo ing pamamatawad mi karing mikasala keka mi.’’ E tamu tutung manyawad kapatawaran kareng agagawa tang kasalanan at ing kasalanan pa ing e ta byasang mamatawad, neng kayi naman petawaran taya pin sana ing taung mikasala keka tamu, e tanaman kakalingwan ing gewa na.

“Mingat kayu” ana ning Ginu, lalu na itamung taung ala ng gewa nung e magpasasa king kasikatan at kapalaluan na yapin ing pangalasing ta king pibandyan a mawawalang antimong bula. Mingat tamu! Uling datang ya ing Ginung Jesus king e tabalung aldo o oras. Parati tang magsadya king balang oras; pangadian taya at gawan parati ing tiru ng pangadi ning Ginu tang Jesu Kristo ban e ta marine at tumakut marap kaya . Amen.

IV. Pamigunam

Suryan ta ing sarili tamu. Dapat ta bang mitakutan king pangawakas ning yatu o ning bie tamo? Nung pangadian taya parati ing Ibpa mi at e ta neman pagsumikapan gagawan iti king bie tamu dapat tamu ping mitakutan. Pero nung ing Dios ya ing maging Tatang tamu, ala yang bage na e na aibye, uling balu ta nama ya ing panibatan ning Lugud. “ Tatang ko, ika ng bala king bie ku, manibat ngeni panibala ku na ngan keka ing egana-gana. Ing kaburyan mu yang masunud, aliwa ing kanakung kaburyan. Uling parati namu neng ing sarili ku o ing kaburyan ku ing masusunud alang masalese malilyari. Balu ku Ginu, ing buri mu parati ing mipakayap ku, uling bina mu kung kaluguran. Alang kaparis ing lugud mu kana ku. Adyang dakal a besis ing e daka pamintuan, lilingapan mu ku parin. Karine kung karine keka, o Ginu. Turuanan mu kung maging matatag kareng kapagsubukan king bie, e ku agyu Ginu, nung ala ka king bie ku. “ E mu ku sana paysaul king tuksu nune ikabus mu ku king sablang marok, Amen.
V.Pamanahimik

VI Tauling Panalangin

Ginu ming Dios dakal pung salamat king lugud mu kekami. parati mu ke sanang lilungan ning kekang Banal a Espiritu ban lalu kami pung mipalapit at mas lalu da kang akilala. Uling keka ing kayarian, ing kayupayan at ing ligaya mangga man king alang angga. Amen.

VII. Kutang

1. Nung malilyari namo ing kawakasan ning panaun, nanu mo ing mumuna mung gawan? Ot bakit?

2. Nung sabyan namo keka ning anghel ning Ginu, na bukas buri na nakang akayabe ning Ginu king kayang kayaryan, nanu ing kekang pakibat? Ot bakit?
Download here:

Sunday, November 22, 2009

Solemnidad ning Kristong Ari

I Jesus King Arap nang Pilato


I. Pamuklat a Panalangin

Ibpa, ing kapuryan at kapasalamatan king binye yu na namang mayap a oras kekami ban mitipun king lagyu mu. Salamat pu king aldo ayti, na dapat kaming magsaya, magkanta at lundag uling ya ing aldo na ning Kristong Ari. Ing Aring makayandang magsakripisyu para kareng e gana-ganang tau. Amen.


II. Pamamasa

Juan 18:33-37

Pasibayu yang linub king palasyu i Pilato at inaus ne I Jesus. Nganang kinutang kang Jesus, “Ika ing Ari da ring Judio?” Mekibat ya I Jeus, “Ibat keka yan o ating aliwang sinabi keka tungkul kanaku?” “Judio ku wari?” nganang kinutang Pilato. “Dela ra ka kanaku ding sarili mung balen at ding pamuntuk da ring pari. Nanu waring depat mu?” Pekibat nang Jesus, “E ya king yatu ing kanakung kayarian. Nung ing kayarian ke keti ya king yatu, makilaban la ding kanakung talasuyu ban e ku miyabie karing Judio. Oneng e ya king yatung iti ing kanakung kayarian!” Nganang Pilato, “Ing buri mung sabian, metung ka ping ari?”


III. Turu

Ating metung a talaturu king metung a kolehiyu na parati nang paganaka na dapat nung nanu ing panugali da reng kayang estudyanti kilub ning iskwela makanyan mu naman dapat ing panugali da king pibale-bale da at king sanu pa mang lugar. Uling nanuman dapat dang abalu king iskwela, dapat mu ing maakit iti karela. Parati ng sasabyan kareng kayang estudyanti na patsa linwal la king iskwela, lalu na nneg susulud ing unipormi da na dapat ing maging maganaka at mayap la pa mu rin panugali. Nung iti e magagawa, ing buri ng sabyan nya mayap la king iskwela, tatakut la mung midinan mababang gradu o tatakut la mung mibagsak king karelang pamagaral. Ulit-ulit ng sasabyan ning karelang talaturu ing amanung iti, “Aliwa mu ing sarili yu ing dadalan yu king luwal nune dadalan ya naman ing lagyu na ning iskwela.

Pagmasusyan taya ngening Domingu ing Solemnidad ning Kristong Ari, I Jesus, ing kekatamung talapangabus, ing kekatamung Diyos. Dapat mung ing bawat metung kekatamu ing magsaya, tumerak at lundag king aldo ayti. Uling kapamilatan na ning aldo ayti pabalu na ing sangkan nugn bakit mibayit ya at dinatang ya king yatung iti at iti yapin ing ipakit at patutuanan na kekatamu ing katutwan. Ing katutwan na kaluguran na katamung kaluguran. Ing katutwan na metung yang aring magsakripisyu para kareng kayang sasakupan. Metung yang aring bayu ikang manasakit iya na pamu ing salu kaniti. Ing aring e na pemilit ing kayang sariling kaburyan (Mateo 26:39). E ya pesaup o pesaklolo man kareng dakal a anghel (t.53). E na pegtanggul ing sarili at e no binantaan deng memaratang kaya (Mt. 27:12-14). E na linigtas ing sarili na (Marcos 15:31). E ya tinuknang lulugud at magligtas kareng kekatamung kasalanan (Lucas 23:43). Pwedi na naman e gawan iti, pwedi nane mang gamitan ing kayang pangadios, oneng ena gewa iti, ban ng apakit kekatamu na agyu ng ibaba ing sarili na ban pakyapusan iti.


Ing kutang, nanu ta kayang klasing liligtas at sasakupan? Nanu ta kayang klasing Kristiyano? Nnau ta kayang klasing talasunud ning Ari? Lubus ing ganaka ning kekatamung Ari, dadaun ne ing sarili na kekatamu parati. Pero madalas, e tala tutukyan deng kayang tuntunan a bibye kekatamu. Madalas pagtaksilan taya. Dininan na katamung imalan o uniporming kalupa king iskwela, ban milub king kayang kayaryan, at iti yapin ing pangakristiaynu tamu. Oneng nanung madalas tang gagawan? E taya didinan importansya ing imalan o uniporming ayti (kristiyanismu)didinatan taya, malinis yamu kilub ning pisamban pero potang king luwal e ta ne pakiisip ing Aring memye king imalan a susulud tamu. Ing e ta balu, makataya ya lagyu ing memye king imalan, makataya ya lagyu ing kekatamung Kristong Ari. Tandanan tamu ing sinabi ning Ibpa kang Jesus nyang bayu ya mag-umpisa king kayang misyun, “Ini ya ing Anak kugn pakamalan, a tutu kung pakamalan.” Sinabi naning Ibpa iti, uling tutu yang mapamintu ing kayang Anak, I Jesus (Mt. 3:17). Meulit ing pamamuge ning Ibpa inyang bayu na arapan Jesus ing kasakitan at kamatayan king krus, “Iti ya ing anak kung kaluguran; makiramdam kayu keya!” (Mk.9:7) Tiwala ya ing Ibpa king kayang Anak, uling kapilan man e ne dungisan Jesus ing lagyu ng Tata na. Itamu agyu ta kayang etaya dungisan o dinatan ing lagyu na ning kekatamung Kristong Ari? Parati ta sanang tandanan, aliwa mu ing sarili o lagyu ing dadalan tamu king luwal nune dadalan taya naman ing lagyu na ning kekatamung Kristong Ari. Amen


IV. Pamigunam

King mitmung katahimikan, kutnan tala reng kekatamung sarili. Nung e taya kaya kilala i Jesus, nanu kaya ing bie? Nung e dintang i Jesus keti king yatung ite, nanu ya kaya sitwasyun ing yatung iti? Ginu, makasiguradu kami pu na e antini kanyaman ing mabibie. Malungkut at magulu kepu siguradu, uling nung alayu ing Kristong Ari, ing maging ari mu pu ing sarili mi. Ala na kepung siguradung pakyalam kareng aliwa, ala na kepung kapasidad lugud at magsakripisyu. Inya dapat mung magsaya kami ngeni Ginu, uling kapilan man e yuke pu kakalingwan. e yuke peburen mebaldug king karalumduman at kamatayan. Dininan yu kepung bayung bie kapamilatan na ning kekaming Kristong Ari.

Pakalulu pu Ginu, madalas ing dudungisan mi ya ing kekang panga-Ari. E mi la tutukyan deng kekang tuntunan. Didinatan mi ing kekaming panga-kristiyanu. Akakalingwan mi ing kekang alimbawa antimong metung a aring lulugud at makaandang magsakripisyu pare kareng aliwa. Sopan na ke sana ning kekang Banal a Espiritu na adyang nukarin kepa, mayakit sana ing pangakristiyanu mi at ban ing lugud at kaburyan mu bilang Kristong Ari yang parating miral. Amen.


V.Pamanahimik

VI Tauling Panalangin
Ginu ming Dios dakal pung salamat king lugud mu kekami. parati mu ke sanang lilungan ning kekang Banal a Espiritu ban lalu kami pung mipalapit at mas lalu da kang akilala. Uling keka ing kayarian, ing kayupayan at ing ligaya mangga man king alang angga. Amen.

VII. Kutang

1. Nung malilyari namo ing kawakasan ning panaun, nanu mo ing mumuna mung gawan? Ot bakit?
2. Nung sabyan namo keka ning anghel ning Ginu, na bukas buri na nakang akayabe ning Ginu king kayang kayaryan, nanu ing kekang pakibat? Ot bakit?


Download here:



Sunday, November 15, 2009

Katlung pulu't atlung Dominggu king Ordinaryung Panaun


Ing Paniatang na ning Anak ning Tau



I. Pamuklat a Panalangin


Ibpa, mumuna pu, patawad pu kareng kekaming kakulangan at kasalanan keka. Patawad pu na madalas ing panyukad o panlalawe ning yatung iti yang kekami mu namang daraptan.E mila sikasu ding taung pakakalulu, ding taung alang sasabyan king lipunan. Mas didinan mi lang pansin ding taung makasaup kekami at aliwa ding taung pwedi ming asopan. Baliwala keka mi ing kekang tune sangkan ot bakit binye me ing kekang Anak, I Jesus ban iligtas mu kami king kasalanan. Amen.




II. Pamamasa

Mk.13:24-32

24” Pangalabas na ning kasakitan da ring tau, dalumdum ya ing aldo, e na ibie ning bulan ing sala na, 25 at manabu la ding batuin at mangatugun la ding upaya ning banua. 26 Kanita re akit ing Anak ning Tau, daratang ya libutad ding biga a kitmuan upaya at kamalan. 27 Itubud na la ding anghel na karing apat nang suluk ning yatu at tipunan da la ring pinili ning Dios ibat karing mingatba-ngatbang wakas ning yatu.
26 “Pagaralan yu ing malilyari king tanaman a higera. Kabud sasagiwa la ding sanga na at sisibut ne bulung, balu yu king malapit na ing kaleldo. 29Makanyan munaman, kabud akit yu lang malilyari deting bage, balu yu king malapit na ing oras na ning paniatang na magumpisa na. D 30 Tandanan yu:mapalyari la ngan deting bage bayu la mate ding taung mabibie ngening kasalukuyan. 31Ing banua at ing yatu lumipas la, oneng ding amanu ku kapilan man ali la.
32” Alang makibalu metung man king paniatang na ning aldo o oras a ita ni ding anghel ning banua ni ing Anak. Ing bukud mung makibalu ya ing Ibpa.

III. Turu



Ating metung a anak a lalaking idad pitong banwa na mahilig manalukyat kareng mangaragul a tanaman. Misan a aldo kabang mamasyal la ning kayang tatang king metung a “park” menakit yang metung a maragul a tanaman ing anak a lalaki. E na amalayan ning tatang ing minukyat ya ing kayang anak a lalaki king maragul a tanaman. Meliswas ya ing tatang king pamanintun king kayang anak. King pamanintun na ning tatang, iksaktu neng apagmasdan makasabit king tanaman ing kayang anak a mamaus at kukulayit ngana “Tatang ko, sopan yu ku, eku na pu agyu, mabaldug ku”, memaligwa ya ing tatang ban neng saklolwan ing kayang anak, oneng bayu ya pa miras ing tatang menabu ne ing anak. Melilyu ya ing anak king kayang pangabaldug at ing asabi na namu bayu ya milako male ing “Tatang ko”. Migising nya mu ing anak king bale da, makakera king supa, makalawe at makaantabe ring mabilug ng pamilya.

Ing ebanghelyu ngeni lalarawan ne ing pangawakas ning yatung iti. Na datang ing oras ing ibalik ne ning Ibpang mayupaya ing tau at ing yatung iti nung makananu ya king kamumulan. Alang kasakitan at kamatayan. Mikakalugud ngan pati na ring mabangis a ayup. Ala ng makamate king kayang kalupang tau. Ala ng mipanyira dangalan. Ala ng dakurak king karapatan na ning bawat metung. Ala ng taung pangalandakan na mas matas ku keka pegaralan, na mas matas ku keka pusisyun, at ala na munamang manamanung “aku dakal ku kilalang matas a pusisyun king gubyernu.” At oyni ing katuparan na ning propesiya ng Juan king Kapahayagan 21:3-4 ngana “ Ngeni ing tuknangan na ning Dios atyu libutad da ring tau! Manuknangan yang kayabe da ring tau at maging balen na la. Akayabe re ing Dios at ya ing maging Dios da. Pulisan na ing lua karing mata ra. Mawala na ing kamatayan, ing kalungkutan, ing tangis, at ing kaplas, uling linipas na la ding bage matua.” Oyni ing makasulat king libru na ning Ginu at nanu mang makasulat mipatupad at mangapalyari ngan iti. Alang labis, alang kulang.


Dapot itamu king kasalukuyan mas didinan tang pansin ing keka tamung kamatayan at pangasira ning yatung iti. Pitatakutan tamu ing kasakitan at kamatayan, na e tamu buring aranasan. E tamu mu naman buring akit ing dalumdum ya ing aldo, ipagkayit na ning bulan ing keyang sala at manganabu la ring batwin at mangatugun la ring upaya ning banwa (V24-25). King malagwang salita, tatakut tamung mawala ing bieng ayti. Na balu ta naman na ing bieng ayni pansamantala mu, na ing bieng ayni andam ya mu.

Ot e ta mas dinan pansin at ulaga ing kaybat ning kasakitan, kaybat ning kamatayan at pangasira ning yatung iti. Midinan tang bayung bie. Bieng kalupa na ning pangasubli ng bie ning Ginu tang Jesu Cristo,bieng alang angga. At nung tanggapan at panwalan tamu iting bageng ayni, akit ta king adwa tang mata ing makasulat king propesiya ng Daniel 7: 13-14 king Matuang Tipan ing “ Ikit ke ing Anak ning Tau, makapadurut ya king biga at minta ya ketang mabie king kapilan pa man at midinan yang kayupayan, dangalan, at upayang ari ban suyuan de ring tau da ring bansa, lahi at salita. Manatili king kapilan pa man ing kayupayan na at e ya miwakasan ing kayaryan na.” Oyni ing makasulat king libru na ning Ginu at nanu mang makasulat mipatupad at mangapalyari ngan iti. Alang labis, alang kulang.

At iti yang buri ng payabut kekatamu ning Ginu Jesus, bilang kristiyanu, na dapat tang maging payapa dyang dumalan ta pa king anino ning kamatayan. Para keka tamung maniwala Kaya, ing mawala yaman ing yatung iti at mabating taman king kekatamung katawan, mangabaldugan mu ing buri ta neng akayabeng lubus ing Apung Ginu ( 2 Corinto 5:8).Parati ta sanang isipan, na mie ta man aldo-aldo o mate man, keng Apung Ginu ta pa murin. Na Yamu bukud tatalan king bukas o king daratang a panaun, na Yamu bukud tatalan king bie o king kekatamung pangisnawa. Nya karapat dapat mung kaya ta dapat manalig at muli antimo ing anak king istorya, mebaldug king maragul a tanaman, melilyu at milako male pero pangagising na atyu ne king pibale-bale ng tata na. Itamu man kayari ning bie keti king yatung iti, muli tamu naman king pibale-bale ning Ibpa tamung atyu banwa. At iti ing makasulat king libru na ning Ginu at nanu mang makasulat mipatupad at mangapalyari ngan iti. Alang labis, alang kulang. Uling ing kegana-gana lumipas ngan dapot ing amanu ning Ginu kapilan man ali. Amen.

IV. Pamigunam


King mitmung katahimikan, migunam tamu. Suryan ta ing keka tamung sarili.Aminan tamu king Apung Ginu, na madalas magduda at dakal ing takut tamu king bie. Tatakut tamung marap at tanggapan ding katutuan at metung kareni yapin ing datang ing oras ing lakwan ta ngan ining sablang akakit ta king yatung iti. Kegana – gana lumipas ngan, mawala ngan kabyasnan, pibandyan, kasikatan, kalakasan at ing mung mitagan yapin ing amanu na ning Ginu. Ing amanung parati ng sasabyan keka tamu na kaluguran na katang kaluguran. Nya nung maniwala tamu mu kaya, ala taman dapat pitakutan at piguluan a isip. E wari pepakit na na kekatamu ”2000 years ago” ing kayang kayupayan, deng bulag menakit la, deng pipi mekapanyalita la, deng pile mekalakad la, deng masakit kinayap la at deng mete kinabye lang pasibayu. At ini gewa na ngan pauli na ning maragul at espesyal ng lugud king tau ning Ginu.

Nya dapat tamu mung gawan ing kaylangang mabyasa ta mung iduku ta la reng keka tamung buntuk bilang tanda na ning pamanyuku ta ngan king egana-gana. Sabyan ta king Ginu itang sinabi na ning anak a mahilig manalukyat kareng maragul a tanaman, nyang malapit neng manabu, nyang e nana agyu ing pamagkasakit makabitin king tanaman, “Tatang ko, sopan yu ku, eku na pu agyu”. Makanini ing buri ng panugali ning keka tamung Tatang, ing Ibpang atyu banua. Na kailangan parati ta sanang makatatang, parati tang makalawe at makalele Kaya ban eta mipahamak kalupa na ning anak king istorya.Anya dyang nanu pa ing sitwasyun masalese man o kawakasan na na ning panaun, makasiguradu tamung atyu yang lulugud at lilingap keka tamu ing Ginu. Amen.

V. Pamanahimik

VI. Tauling Panalangin



Ginung mayupa, ing kapuryan at kapasalamatan king kegana-ganang kalam a pagkalub mu kekami bista man e ke man pu karapat-dapat kareti. Dinan yu ke pu sanang maragul a kasalpatayanan king kekong anak, I Jesus. Sana pu patsa miras na ing oras ning bie mi, ing muna ming akit ing lupa na ning kekayung Anak. Amen.

VII. Kutang

1. Nung datang namo ing kawakasan ning panaun, ninu mo reng buri mung kayabe kabang malilyari ita? Bakit?
2. Potang metupad na mo ing egana-ganang propesiya king pamanyatang ng pasibayu ning Ginu, nanu mo ing muna mung sabyan kang Jesus? Bakit?

Download here:


Page 1: http://www.mediafire.com/file/zhnzznmkwiw/11.15.09%20pg.%201.doc
Page 2: http://www.mediafire.com/file/wdzyzwcmyyt/11.15.09%20pg.%202.doc

Sunday, November 8, 2009

Katlung pulu't adwang Dominggu king Ordinaryung Panaun

Ing Babala Laban karing Talaturu ning Kautusan at Ing Babaing Mebalu




I. Pamuklat a Panalangin



Ibpa, mumuna pu, patawad pu kareng keka ming kakulangan at kasalanan keka. Patawad pu na madalas ing panyukad o panlalawe ning yatung iti yang keka mi mu namang daraptan.E mila sikasu ding taung pakakalulu, ding taung alang sasabyan king lipunan. Mas didinan milang pansin ding taung makasaup keka mi at aliwa ding taung pwedi ming asopan. Baliwala keka mi ing kekang tune sangkan ot bakit binye me ing kekang Anak, I Jesus ban iligtas mu kami king kasalanan. Amen.




II. Pamamasa



Mk.12:38-44



At matula lang mekiramdam kang Jesus ding dakal a tau. 38 Ngana pang tinuru karela, “Mingat kayu karing talaturu ning Kautusan a maburing lalakad makasulud makabang imalan a at pupugayan da ring tau king palengki. .39 maburi lang lulukluk karing piling luklukan karing sinagoga at kabisera karing bangketi. 40 Ila ding magsamantala king kabiayan da ring babaing mebalu at magparangalan king pamanalangin dang makaba! Lalung mabayat ing parusang miras karela!”
41Linukluk ya i Jesus arapan ning pibabaldugan ain kilub ning Templo at pegumasdan na la ding taung babaldug salapi. Dakal la ding mabandi a minie maragul a alaga. 42 Linapit ya naman ing metung a babaing mebalu at mildug yang malati mung alaga. 43Inaus na la pansin Jesus ding alagad na at ngana karela,” Balu yo, iting pakakakululung mebalu ya ing minie maygit kesa karing aliwa. 44 Uling minie la ding aliwa ketang labis labis a atyu karela, oneng iting pakakakalulung mebalu, agyang pakakalulu ya, binie na ngan ing sabla nang pangabiayan.”

III. Turu
Ating metung a pari na miniting no ngan ding sablang organisasyun king parokya. Pipagmitingan da na balang miyembru na ning metung a organisasyun na mika oras la king pamaglinis king pisamban. Apikasunduan da iti at mika schedule lapin king pamaglinis. Nyang deng E.M.D.C. ila ng makatutuk maglinis king pisamban, apansinan na ning pari na atin metung kareng E.M.D.C. na ala at kabang maglinis la reng E.M.D.C kayabe de ing pari ating dintang a limang lalaki na tinubud na kanu nitang EMDC na ala king pamaglinis. Kitnan no ning pari ding lima nung bakit ala yupin ing EMDC,mekibat la at ngara “Busy ya pu kasi at ikami namu pu kanu ing palit kaya king pamaglinis.

King ebanghelyu tamu ngeni adwa lang klasing tau reng pwedi tamung pag-aralan. Mumuna dening amanuan ng Jesus a eskriba. Dening eskriba maburi lang lalakad makasulud mangakabang imalan at pupugayan da ring tau. Buri da waring ipabalu kareng tau na e la mu kabud pangkaraniwang tau nune somebody la. Maburi lang lulukluk karing piling luklukan karing sinagoga at kabisera kareng bangketi. Buri da waring sabyan ing e la mu kabud somebody nune importanti la pang tau. Maburi lang magparangalan king panalangin dang mangakaba, papakit da waring banal at mayap la oneng ing sakit ila pang magsamantala king kabiayan ding babaying mebalu.Mas imporartanti ing karelang sarili kesa karing aliwa.

Ngening kapanaunan tamu dakal la pa keka tamu ding makanini pamanisip at pamanugali. Alimbawa, uli mong megaral tamu, maburi tamung makakabit ya parati nung nanu ta pusisyun at nung nanu ing ayari tamu king lagyu tamu. Buri tang ipabalu na atin tamung ayari at apagmaragul. Madalas potang akalingwan deng binggitan o sinulat ing titulu o pusisyun tamu agad tang mimwa. Maging title and position conscious tamu. Potang atin tamung binye kareng kabaryu, buri tamu ing mipabalu pa mu kareng sabla. Neng atin tang binye o asaup king pisamban, buri tamu ing mibulalag pa mu mo iti king misa. Agad tamung pangalandakan ing agagawa tamu. Aganaka ke ing metung a kwentu, atin kanung metung a lalaking akasabi ne I Jesus king kayang paninap King paninap sinabi na kanu ning lalaki kang Jesus “ Ginu sumaup ku king pamipagawa ning bisitas, dening pera ku ibye ku la ban mayari ya ing bale mu”, mekibat ya kanu I Jesus ngana “ O anak, ing bibye mu kanung bage aren ibat la naman kanaku, E wari?” Mekibat ya kanung agad ing lalaki “ O sige pu, uling yari ku pung arkitektu, ing sabla kung balu king pamag-disenyu ibye ku keka Ginu”, mekibat ya kanu ing Ginu kaya ngana “ O anak, ibat mu naman kanaku ing talentu mung yan, E wari? Mekibat ya kanu ing lalaki at biral ne ing salu na ngana “ O sige Ginu, ing buu kung bie idaun ke keka”, mekibat ya kanung agad ing Ginu at ngana “ E wari anak, pati ing biye mu bat ya naman kanako?”

Ing kadwang klasing taung pag-aralan tamu, yapin ing babaying mebalu na mibaldug adwang barya a maki alagang dyes sentimus. Nyang panaun na ning Ginung Jesus ding babai kanita palaguan da la mung 2nd class citizen o ordinaryung tau. Deng babai kanita, ala lang karapatang makiumpukan keng pisasabyan patungkul king problema ning lugar o ning bansa. E la naman pweding makyabe tungkul king pulitiku o pamangubyernu. Alus ing bie da dudurut ya mu king kayang pamilya. Lilingap kareng kayang anak at king asawa ng lalaki. E ya naman manintunan, nya king maligwang pangasabi ala yang sariling pera. Nya manenaya ya mung dinan ng pera ning kayang asawang lalaki. Nya patsa mebalu ka kanitang panaun ayta makalunus ka, siguradung mabilang ka kareng pakakalulu.

Inaus no pansin Jesus ding kayang alagad at sinabi na karela na “Mas migkalub ya pang maygit ing mebalung babayi kesa kareng anggang aliwang memye labis-labis.” Uling adya pang balu na ning byudang kalulu na rening binye ng limus king templu na ila na kabud ding pera na at ila na kabud ding pagkabiye na. Payabut na keni ning babaing balu na pati ing kayang bie agyu ng ibye king Apung Ginu. Papakit na ning ebanghyelyu na mumuna lang mayayaus deng pakakalulu king kayaryan ning Dios uling agyu dang ibye pati na ing karelang sarili.Amen.

IV. Pamigunam
King mitmung katahimikan suryan tala reng sarili tamu. Sanu kaya itamu karening adwang klasing taung mebanggit king ebanghelyu? Metung ta kayang taung magparangalan kareng keka tamung agagawang mayap? O kaya naman ma buri tamung atwan da reng tau potang atin tang asasaup king keka tamung komunidad? O buri tamung ing agagawa tang mayap mibulalat pamu karing sabla? Maralas ing istorya ning ebanghelyu ngeni yang mararapat king keka tamung komunidad. Dakal la pa keka tamu deng susuyung kunwari pero atin lang aliwang pake kaniti. Parati ta sanang tandanan na ing Ginu e lalawe keng dakal a abibye tamu, nune mas tatanggapan no reng bibye tamung manibat king pusu tamu. Ala yu king dakalan nune atyu king kalidad ning keka tamung bibye.

Parati ta sanang ilage kareng pusu’t kaisipan tamu na mas importanti nung nanu ing sabyan na ning Ginu keka tamu at aliwa nung nanu ing sabyan da reng aliwang tau. Dakal ing tuksung makapadurut king yatung iti., materyal a bage, pusisyun at titulu. Na madalas kareni tamu mababaldug king tuksu. E ta sana makyapus king panlalawe o panyukad ning yatung iti. Madalas lalawe tamu nung nanu ya istadu ing buri tang pakyabayan. Mas buri ta lang pakyabayan deng atinan, deng sikat a tau, deng mangabiyasa uling balu tamu makasaup la o kaya atin lang a ibye keka tamu. E tala buring pakyabayan deng ala king biye, uling mumuna tang isipan na ala tanamang apala king pamakyabe ta karela. Oneng e makanini ing panlalawe ning Apung Ginu, mas didinan nong mayap a oras o panaun ning Ginu reng pakakalulu, reng alang sasabyan na makapadurut keka tamu king keka tamung komunidad.Parati ta sanang isipan na rening taung pakakalulu, deng mangmang, deng sasabyan tamung alang kwentang tau ilang sangkan ot bakit pebustan na ning Ibpa na binye ne ing kayang bugtung a anak ban itamu miligtas ta king kasalanan. Buri na ning Ibpa na maging kawangis ta ya, buri ng pakyapusan ta ya, na agyu tayang ibye ing pekaimportanti keka tamu at ini pin ing sarili tang bie. Amen

V. Pamanahimik

VI. Tauling Panalangin

Patawad pu Ginu, maralas metung kaming taung magmaragul king keka ming gagawan a mayap. Turuanan yu kami pung maging mababa lub. Parati yu pu sanang paganaka keka mi na ing tune pamamye alayu king dakalan nune atyu king kalidad a bibye. Amen..

VII. Kutang

1. Nanu la mo reng buri mung gawan ban lalu me pang a ibye ing sarili mung bie king Ginu?




Download here:


Sunday, November 1, 2009

Solemnidad da reng Santo


Ding Tune Mapalad at Masaya


I. Pamuklat a Panalangin

Ibpa, sasamban, pupuryan at pasalamatan daka pauli ning lugud mung alang kupas king meto yatu. Ngeni pung kaorasan, anyaran mi pu ing ibuklat yo pu ring pusu at kaisipan mi bang kanita maging malino la kekami ring buri nang ipasyag ning kekang Anak, I Jesus, kapamilatan ning kausukan ning Banal a Espiritu. Amen.

II. Pamamasa

Mt. 5:1-12

Panakit nang Jesus karing dakal a tau, minukyat ya king bunduk-bundukan. Inyang mekalukluk ne, linapit la ding alagad na. Kaybat, megumpisa yang migsalita at nganang tinuru karela:
“Mapalad la ding pakakalulu king espiritu, uling karela ya ing Kayarian ning banua!”
“ Mapalad la ding malungkut, uling paligayan na la ning Dios!”
“Mapalad la ping mapagkumbaba, uling tanggapan da ing pengaku ning Dios!”
“Mapalad la ding daranup a kakau king kabanalan na ning Dios, uling pakabsian na la!”
“Mapalad la ding mapaglunus, uling lunusan na la ning Dios!”
“Mapalad la ding malinis a pusu, uling akit de ing Dios!”
“Mapalad la ding gagawang paralan para king pamikasundu da ring tau, uling mayaus lang anak na ning Dios!”
“Mapalad la ding daralan kaligaligan uli na ning pamanupad da king kaburian ning Dios, uling karela ya ing kayarian ning banua!”
“Mapalad kayu neng insultuan da kayu deng tau at liligaligan at magsalita lang miyayaliwang kapanyiran laban kekayu king uli ku” “Tumula kayu at magsaya uling mikamaragul kayung ablas karin banua. Makanyan da la namang ligalig ding propetang minuna kekayu.

III. Turu

Ngeni pung kayaldawan, pagmasusyan taya pu ing “All Saints Day” na nung nukarin ing akaugalyan tamu ing pamamisita king sementeryu ban pagdalang bulaklak, kandila at mangadi para kareng kekatamung mangubye. Masanting a paganaka kekatamung atyu pa king yatung iti ing ukasyun a ini. Paganaka na kekatamu na ing mabibie king yatung iti, pansamantala mu, kalupa dareng mangubye na titirikan tang kandila na dati atyu lamurin king yatung iti. Masala ng papakit ning Ginu, na datang ing oras itamung tirikan dang kandila, ipangadi at dinan bulaklak. Atin ping metung a sementeryu, king entrada na ning pasbul, ing makasulat ya ing metung a katutuan a kataga, ngana, “Aku Ngeni, Bukas Ika”. Nya nanu ing dapat tamung ipagmaragul o ipagmatas? Nanu ing dapat tang ikagulu isip? Nanu ngan ing paninapan tamu? Nanu ngan ing paralan a gagawan tamu ban tang masensu? Nung bukas ing mate tamu mu pala. Sasabyan na pin ning libru ning Ecclesiastes, Kapitulu 1: 2-11 ngana, “Alang kabaldugan ing sabla, wa, alang kabaldugan, ngana ning Talapanaral. Nanu mo ing pakinabang na ning taung alang patugut magobra? Salasalisi ing paniatang da at paglako ding tau, oneng ing yatu manatili ya antimo ing sadia. Saslag ya ing aldo at kaybat lumbug ya; makanyan ing parati Nang daraptan. Tutiup ing angin king mauli at tutiup munaman king norte; durut-durut alang patugut ing angin. Mamagus ing danum da ring ilug king dagat, oneng angga man ngeni e ya pa mitmu. Kaybat magbalik ing danum karing ilug nung nu menibatan, at mabaldug na naman king dagat. Miyangganan ing sablang bage king kapagalan. E ya sasawa ing mata king pamaglalawe na at ing balugbug king pamakiramdam na.

Itang milyari king panaun a milabas ya naman ing mapapalyari ngeni, at ing milyari ya naman ing miyulitan. Alang bitasang bayu king mabilug a yatu. Ngarang sasabi ding aliwa, “Lawan mu ini bayu ya.” Oneng e ra balu king ita malambat nang milyari bayu ta pa linto keti king yatu. Alang makaganaka karing bage milyari na king milabas, at ing mapapalyari ngeni makalingwan ngan king panaun a daratang.”

Maygit adwang libung banwa ing milabas nyang misulat ya iting karanasan na ning Talapanaral a ini. Para kaya alang kabaldugan ing mabibie, uling nanu para mie kaybat mate ka murin. Ing mayap a balita na panaral ning Ginu tang Jesu Kristo ya ing masalang babie pakibat kaniti , na ing bie atin yang kabaldugan nung atyu la keka reng katangian ning metung a mapalad. Reng amanuan nang mapalad yapin retang taung parating makabuklat palad. Makabuklat palad para mamye nung nanu itang atyu karela. Makabuklat palad para parating tanggap king grasya at pakalulu ning Apung Ginu. Makabuklat palad uling bisa kang pataid king Apung Ginu. Makabuklat palad uling buri mu ngan paubaya king Apung Ginu ing e gana-gana. Kalupa ning Indung Maria, anyang sinabi na ning kayang pisan a Elisabet , ngana “Mapalad ka karing sablang babai!” (Lucas 1:42). Amen.

IV. Pamigunam

“Mapalad ka karing sablang babai!” (Lucas 1:42). Iti ya ing sinabi ng Santa Isabel kang Maria nyang binisita ya kaya. Ing kutang, tutuya bang mapalad ing Indung Maria? Masakit at masalimuut ing meging bie ning Indung Maria. E ya paman kinasal kang San Jose mibalita neng mabuktut. Maragul a kamarinayan iti kareng kayang mabilug a pamilya. King tradisyun dareng Hebreo, pag mebuktut kang alang asawa pamaronggan dakang bato angga king mate ka. Ibilad daka kamarinayan kareng aliwang tau.

Agad yang mete i San Jose, nya ing Indung Maria iyang tinalakad ima ampong tatang kang Jesus. Anyang mag-umpisa neng menaral ing Ginung Jesus parati yang makayantabe ing Indung Maria. Anyang erapan na na ning Ginu tang Jesu Kristo ing kasakitan at kamatayan atyu ing Indung Maria, tatangis, at maybug maspak a salu uling balu nang ing kayang anak ala yang matsurang depatan kareng tau. Kutang pasibayu, mapalad ya bang asabi ing Indung Maria?

Opu, mapalad yang mapalad ing Indung Maria, uling binye na king Dios ing kayang kegana-ganang lakas, isip, katawan, puso at kaladwa. Itamu ba babye ta ngan kegana-gana king Dios? Potang ing kegana-gana babye at daraun mu ngan kaya, kalupang ning Indung Maria, maging mapalad tamung tutu king arapan ning Dios. Amen.

V. Pamanahimik

VI. Tauling Panalangin

Ginung Dios, dakal pung dakal a salamat kareng amanu yu pung babie bie. Salamat kareng kabyasnan a pebalu yu pung king kaorasan. Mapalad kami pu pala nung reng kekang kaburyan ilang pairal mi keti king bie mi. Mapalad ke pu pala agya mang dakal a kapagsubukan ing kekaming daranasan, ing importanti, ing atyu kang kayabe mi. Dakal pung dakal a salamat. Amen

VII. Kutang

1. Atin na bang milyari king bie mu, na pwedi mung ikwentu, na meging mapalad ka?
Nanu la reng bage makaibye kekang tula? Bakit?

Download here:

Page 1: http://www.mediafire.com/file/2xuygnzmquw/11.01.09%20pg.%201.doc
Page 2: http://www.mediafire.com/file/ay4j3xwdngq/11.01.09%20pg.%202.doc

 
Powered by Blogger.