Katlung Dominggu ning Pamaniubling Mie

Pepakit Ya I Jesus Karing Alagad Na

I. Pamuklat a Panalangin

Ibpa, salamat king lugud at pakamal mu kekami, na neng atyu kami pu keng sitwasyun na mitatakutan, magugulu at mikakunu king biye, atyu ya ing anak mung I Jesus king busal mi ban paramdam at ipakit kekami na e ke dapat mag-alinlangan king kayang lugud at pamanantabe kekami. Amen.

II. Pamamasa

Lucas 24:35-48

35Belita da ring adua katau ing milyari kabang dalan at nung makananu reng akilala ing Guinu inyang pemirasu ne ing tinape. 36Kabang babalita da pa iti karela. Kabud-kabud atyu I Jesus libutad da. Ngana karela, “Kapayapan keko ngan!” 37Oneng mitakutan la at mengilabut uling bala ra multu ya ing akakit da. 38Inya nganang Jesus karela, “Baket magugulu kayu at mikakunu? 39Lawan yu la ding kanakung gamat at bitis at kilalanan yu king aku at alang aliwa. Salatan yuku ba yung akit. Ala yang laman at butul ing multu, oneng atin ku antimo ing akakit yu.” (40At pangasabi na niti, pepakit nala karela ding gamat na at bitis.) 41E la pa mu rin maniwala uli na ning maragul dang tula at pangasdan. Inya kitang na karela, “Atin kayung nanumang apangan keti?”42Dininan deng kapirasung ningnang a asan; 43Kinua ne iti at pengan king akakit da. 44Kaybat ngana karela, “Ing amanuan ku kanitang kayabe yuku pa ya pin iti: kailangan ing matupad ing sablang misulat tungkul kanaku king kautusan nang Moses, karing libru da ring propeta, at karing dalit.” 45Kanita biklat na la pamisip bada lang aintindian ding kasulatan. 46at sinabi karela, “Anti kaniti ing makasulat: kailangan yang dumalan kasakitan ing Cristo at subli yang mie king katlung aldo, 47at king lagyu na, ing pamanisi at kapatawaran ding kasalanan sukat mipanaral karing sablang bansa, magumpisa keti Jerusalem. 48Ikayu ding testigu kareting sablang bage.


III. Turu

Atin metung a sikat a monasteryu na dadaywan da reng tau pauli na ning katahimikan na ning lugar at kabanalan da reng paring atyu ka rin. Aldo-aldo daramdaman dong magkanta deng kayanakan a pari at akit mu karela ing pamikalugud king bawat metung. Oneng dintang ing oras na ing lugar e dane pupuntalan deng tau, puli na ning ala na keng pusu ra reng pari ing sablang gagawan da. E mu na akit itang dating mipagmalasakit la keng bawat metung. Matamad nong magkanta at mangadi king Guinu.

Misan a aldo, king metung a bakanting loti, lele na ning monasteryu, atin metung a lalaking ausan dang Rabbi na menalakad kubu ban Karin mag-ayunu at manalangin. Neng atyu Karin pisasabyan de ring pari king monasteryu at kabang akakit deng mangadi, panamdaman da ing maging payapa la lub. Misan a aldo ing pekamatas karing pari pisyalan ne para makipagkwentu. Disnan neng makatalakad king pasbul, masayang makabuklat adwang gamat, ing balamu wari ing talagang panenayan ne ing pari. Kalapit na ning pari kinaul ne, na balamu wari ring adwang mikaluguran na malwat nang e mikikit.

Inagkat ne ing pari na lungub king kubu at keng kilub ikit ne ning pari ing metung a lamesang dutung na ating makabuklat a libru. Linukluk la reng adwa king arap na ning libru at karin mu rin mig-umpisa yang kinyak ing Rabbi at makanyan mu rin ing pari. Kaybat na nita, metahimik, migsalita ya ing Rabbi “niya minta ka keti bisa kang paturu, oyni ing sabyan mu karela, ing Mesiyas metung ya karela.”

Kaybat na nita, minuli ne king monasteryu at inaus no reng pari ban sabyan ing turu na ning Rabbi. “Ing Mesiyas kayabe taya keti , metung ya kekatamu.”

Manibat kanita , mibalik ing pamikakalugud at kabanalan ketang lugar a ita. Uling balu da na kayabe re ing Mesiyas, I Jesus.

Ing ebanghelyu tamu ngening domingu payabut na ning Ginung Jesus na atyu parati king busal tamu, kalupa da reng adwang alagad a kabang kukwentu da ing mepalyari karela nyang papunta la Emmaus na akilala dya mu ing Ginung Jesus nyang pemirasu ne ing tinape, at kabang babalita da iti, kabud ing Ginu atyu king busal da, mengapamulala la at mitakutan, ing bala da ating multu, oneng pepakit nong Jesus deng sugat na at menyawad ya pang apangan at mekisalu ya karela.

Kaybat na nita, pemasalan no ning Ginu tungkul king banal a kasulatan, na ing Anak ning tau dapat yang dumalan kasakitan at mate at king katlung aldo subli yang mie. At kaybat na nita tiburan na lang ban miye patutu tungkul king kayarian na ning Dios.

Keng ebanghelyu masala nong payabut ning Guinu deng adwang sangkap na ning kekatamung biye kasalpantayanan, ing Eukaristiya at ing Banal a Amanu, na deng adwa atyu la king Banal a Santa Misa. Na deng apostoles akilala dya mu I Jesus nyang memirasu yang tinape at kaybat pemasalan na la kareng banal a kasulatan at kanita da pamu ayntindyan deng apostoles ing sablang mengapalyari.

Nya neng makiagum tamu king Banal a Santa Misa, agaganaka at mipamasalan tamu kareng Banal a Kasulatan, na ing Guinu tune ping Emmanuel ya, na ing Guinu tyu parati king busal tamu. Amen.


IV. Pamigunam

Obat itamu mo, parati tamung sasaingsing king biye, agad tamung sasabyan, ana kasakit ngeni ing biye. Samantalang nung pitutuliran mu mas masakit ing biye niyang minunang panahun. Kanita maglakad la mu ban munta king marayung lugar, oneng ngeni, ana karakal ding asaken para miras king pupuntalan, kanita potang maglakbe la tuknang la para paynawa la, oneng ngeni tuknang tamu keng pamaglakbe ban paynawa ampong mag Jollibee at kabang paynawa tamu, pa text text ta pa. O sanung masakit ing biye ing ngene o ing kanita?

Madalas a sasabi tamu ing masakit ing biye, kasi magkulang tamu pamangilala kang Jesus, akakalingwan tamung agad ing kayang sakripisyung gewa para king pangaligtas na ning kekatamung kaladua. E wari king ebanghelyu, deng apostoles mengatakutan, magugulu at mikakunu la, kalupa na ning sitwasyun tamu king biye, oneng nanung sinabi ng Jesus, ”keni lumapit ko kanaku at lawen yu la ring kakung gamat at bitis”, keni pepakit no ning Guinu ding sugat na, ban patutuanan ing lugud na kekatamu, na sasabyan na kaku at keka, ”atin pa waring migit a lugud ing ain ne ing biye na ning metung a tau para king kayang kakaluguran?” Sana e ta kakalingwan iti, na kayabe taya ing Guinu, na e sasawang lulugud kekatamu, na parati yang atyu busal tamu. Amen.

V.Pamanahimik

VI Tauling Panalangin

Ibpa, turuanan yuke pung maging kawangis na ning kekong anak I Jesus, na ating masabal, na makasadyang manantabe kareng taung mangatakutan, magugulu at mikakunu king biye. Ban kanita Ginu, abalu da reng sablang lelangan na ika atyu ka parating lulugud at manantabe kekami. Amen.

VII. Kutang

1. Kapilan tamu mikaalinlangan na ing Ginu ala yu king busal tamu?

Download here:

Page 1: http://www.mediafire.com/file/4zh4j23micl/04.26.09%20pg.%201.doc

Page 2: http://www.mediafire.com/file/5jjoydttyye/04.26.09%20pg.%202.doc

Kadwang Dominggu ning Pamaniubling Mie

Pepakit Ya I Jesus Karing Alagad Na

I. Pamuklat a Panalangin

Ibpa, salamat pu king bie, a pigkalub mu kekami. Salamat pu keng pangasubli ng mebie ning kekong anak, I Jesus. Pauli na niti mibalik ing kekaming bie at midinan kaming kapayapan. Kapayapan na makasiguradu na kayabe miya, nanu man ing kekaming araranasan king bie. Salamat pu Guinu. Salamat. Amen.

II. Pamamasa

Juan 20:19-31

19 Kanitang bengi na ning aldo mu ring ita, mitipun la ding alagad. Pakasara la ding pasbul king lugal nung nu la makatipun uli na ning takut da karing Judio. Dinatang ya i Jesus at tinalakad ya libutad da. Ngana karela, “Kapayapan keko ngan.” 20 Pangasabi na niti, pepakit na la karela ding gamat na at ing katalindikan na. Mesaya la ding alagad panakit da king Ginu. 21 Pasibayu nang sinabing Jesus karela, “kapayapan keko ngan. Nung makananu na kung tinubud ning Ibpa, makanyan da kayu namang tutubud.” 22 Pangasabi na niti pengisnawanan na la at sinabi na, “Tanggapan ye ing banal a Espiritu. 23 Nung patawaran yu la ding kasalanan na ning ninuman, mipatawaran la; ing e yu patawaran e ya mipatawaran.”
24Oneng i Tomas (ing mayayaus kambal), ing metung karing labing-adua, alayu inyang dinatang ya I Jesus. 25Inya sinabi da ring aliwang alagad kang Tomas, “Ikit mi ya ing Guinu!” Nganang mekibat tomas, “E ku maniwala anggang e ku la akit ding bakas ding paku karing gamat na at itagkil ing taliri ku king bakas da ring paku at ing gamat ku king katalindikingan na.” 26Pangalabas da ring walung aldo, makatipun lang pasibayu ding alagad king bale at kayabe re i Tomas. Makasara la ding pasbul, oneng linub ya I Jesus at tinalakad ya libutad da. Nganang Jesus karela, “Kapayapan keko ngan.” 27At saka na sinabi kang Tomas, “lawen mu la deng gamat ku at itagkil me keni ing taliri mu. Dala me keni ing gamat mu at itagkil me king katalindikingan ku. E na ka mag-alinlangan, maniwala na ka!” 28Mekibat ya i Tomas, “Guinu ko at Dios ko!” 29Nganang Jesus kang Tomas, “Maniwala na ka uling ikit mu ko? Mapalad la detang maniwala kanaku agyamang e ra ku ikit!” 30Ginawa yang dakal at miyayaliwa pang milagru I Jesus king akakit da ring alagad na, oneng e la makasulat keting libru. 31Misulat la ding atyu keting libru ban maniwala kayu king I Jesus ya ing Cristo, ing Anak ning Dios at king pamaniwala yu mika bie kayu king kapamilatanan na.

III. Turu

Atin metung a anak a babai, idad 12 anyos a mekasake keng bus a papuntang Olongapo. Apagmasdan ne ning metung a makasake a lalaki, na e ya mipaindatun, lawe-lawe ya keng kayang lalabasan at lupa yang balamu malilili. Kitnan ne ning lalaki nung minanu ya, oneng ing anak pala tagalug ya at kitang na ning anak, “kuya papuntang Cubao ba ito?” mekibat ya ing lalaki, “Ah! Hindi, papuntang Olangapo ito”. Inyang abalu na ning anak na melili ya pala, maybug yang kumyak. Inaus ne ning lalaki ing kondoktor at sinabi na melili ya ing anak. Kitnan ne ning kondoktor nung nu karin ya munta at mekibat ya ing anak Cubao. Kanita na aganaka ning kondoktor na minaus yang Lubao kareng pasaeru, inya ing anak bala na Cubao ing gugulisak na ning kondoktor. Ing gewa na ning kondoktor, beba ne Sta. Rita ban saguli yang makasake pang Cubao. Oneng bayu ita, ing lalaki kinwentuan ne pa ing anak kabang ala la pa Sta. Rita at pepakit no reng bale ampong pisamban na timbunan na ning lahar at biniru ne pa ing anak bayu ya kinuldas. At ikit ne ning lalaki na mesaya at melwalas ya lupa ing anak. Pangaras king karela, ena na kinwentu na melili ya, nune memasyal ya king Bacolor.

Ing ebanghelyu tamu ngeni, makanyan mu naman ing payabut na. Ding alagad na ning Ginung Jesus atyu la keng metung a kwartu, pakasara la ding pasbul uli na ning takut da karing Judio. Atyu la naman king sitwasyun na e la mipaindatun. E da balu nung nukarin la munta, nung nanu ing gawan da.

At dinatang ya ing Ginung Jesus king kalibutnan da at kayakit na karela e nala sebyanan, kimwanan o penyumbatan keng karelang keynan nune mengamanung ya pang, “kapayapan keko ngan”. Kaybat nong dininan kapayapan, kanita na sinabi ning Ginung Jesus “Nung makananu na kung tinubud ning Ibpa, makanyan da kayu namang tutubud.” At kaybat ng sinabing tutubud na la, kanita na la pengisnawan king kayang Banal a Espiritu.

Keni, pasibayu papakit ning Ginu ing pamaglalang na king tau, balu tamu king libru ning Genesis, na ing tau pengisnawanan ne ba yang mika bie, a kalupa na ning milyari kareng alagad, pengisnawan na la ban kanita milako na ing lungkut, pangabalisa at ban kanita mibalik karela ing bie, na bukud mung manibat king Ginu.

Payabut na ning Ginu, nung makananu tang dapat mabibiye anti mong metung a talatuki o alagad na, ing atin tamung dapat kapayapan king pilubluban tamu, ban kanita kalupa na ning Ginung Jesus, makapamie tamu naman kapayapan kareng aliwa at ini metung yang tanda, na pwedi na nakatamung itubud at pangisnawanan ning keyang Banal a Espiritu, at keni masala nang pepakit na ing Espiritu ning Dios, manatili ya karetang payapa lub. Uling king Dios, deng payapa lub ilang dapat ating upaya.

Ing kapayapan na sana ning Ginung Jesus, a sinubling mebie, ya sana ing miral king balang metung kekatamu. Balikdan tala reng banda tang kayli, wanan, keng arap at gulut tamu at sabyan tamu pung lubus a sigla at saya, kapayapan pu!

IV. Pamigunam

Migunam tamu ngeni, kalupa da reng apostol anyang pigtaksilan de ing Ginu, tatakut la, marine la, ela mipaindatun, maralas makanini tamu naman, pagtaksilan at lilingad taya ing Ginung Jesus king biye tamu. Pipilit tamu nung nanu ing buri tamu, nung nanu ing buri ning yatu, anya nung maging bunga na niti, kasiran, lungkut at alang kapayapan. Sana, itamung kristiyanu parati ta sanang mamaus at manyad king keyang kapayapan, ban kanita asundu tamung mitmung tetagan ing misyun a pigkalub na kekatamu. Pangisnawanan na kata sana ning keyang Banal a Espiritu ban abalu tamu, nung nanu ing buri o planu na kekatamu, nung nanu ing buri nang pagawa kekatamu, ban kanita akawangis taya, a sinabi “Ibpa aliwa ing kaburyan ku nune ing kaburyan mu ing masunud.”

At potang atyu tamu sana ketang mabayat a sitwasyun, mamaligwa ta sanang manyawad kapayapan king Ginu. Kalupa na ning Keyang Indu i Maria a Indu tamu mu naman na bista man aranasan na ing penasakit at pete de ing kayang bugtung a anak, I Jesus, meging payapa ya pa mu rin lub at alang patnang magtiwala parati king ibpang atyu banwa. Amen.

V.Pamanahimik

VI Tauling Panalangin
Ibpa, kapamilatan ning tiburan mung Espiritu Santo, akakabyusan mi ing nanu mang kapigaganakan, kasakitan, karalumduman at kapahamakan king bie mi. Iyang manantabe kekami king pamaglakbe mi at maging sala king dalan ning bie. Salamat pu. Salamat pu king kekong alang anggang lugud kekami na araranasan mi king kapamilatan ning Espiritu Santo. Amen.

VII. Kutang

Maging dalan na katamu kaya ning kapayapan o ning kapahamakan?


Download here:

Page 1: http://www.mediafire.com/file/tymdgzlntzd/04.19.09%20pg.%201.doc
Page 2: http://www.mediafire.com/file/ijmtjbixyzy/04.19.09%20pg.%202.doc

Dominggu ning Pamaniubling Mie

Alleluia! Alleluia!
Sinubli Yang Mebie I Jesus

I. Pamuklat a Panalangin

Ibpa, king pangasubling mie ning anak mu, midinan keng maragul a tula ampon lakas lub. Alang karokan ing magtagumpe ampon migit pa king kekong upaya. Pauli niti, mididinan keng pasibayung bayung pamag-asa king kekong lugud ampon upaya na balang aldo, ilako yu ngan pu ing egana-ganang maging pabayat king bie mi. Salamat pu Guinu! Salamat pu. Amen.

II. Pamamasa

Juan 20:1-9

1­­­­King abak a maranun na ning mumunang aldo ning paruminggu, maralumdum pa, minta ya king kutkutan I Maria Magdalena. Ikit na king makalako ya ing batung takap ning kutkutan. 2Inya milayi ya at minta kang Simon Pedro at king aliwang alagad a pakamalan nang Jesus. Ngana karela, “Kinua re king kutkutan ing Guinu at e mi balu nung nu re binili!” 3Inya linual ya I Pedro at itang aliwang alagad at minta la king kutkutan. 4Milayi la oneng itang aliwang alagad milayi yang mabilis kesa kang Pedro, at minuna yang miras king kutkutan. 5Dinuku ya at kilub ning kutkutan ikit na ing telang pamburul a makabili karin; oneng e ya linub. 6Kanita dinatang yang katuki na i Simon Pedro at taglus-taglus yang linub king kutkutan. Ikit nang makabili karin ing telang pamburul 7at ing panyung penakap king buntuk nang Jesus. Iti e makakayabe ning telang pamburul, nune makakalilua yang makatuklip king metung a lugal. ­­­­8Linub ya naman itang aliwang a minunang dinatang at ikit na at meniwala ya. (9E ra pa aintindian kanita ing sasabian na ning kasulatan king kailangan yang subling mie I Jesus.)

III. Turu

Ating minsan a telenovela a meging sikat king TV. Ing istorya na tungkul ya king metung a ordinaryung babai. Ing istorya dudurut ya king pamangawang mayap ampon marok. Inyang anak ya pa ing bidang babai, mete ya i ima na at iya mismu ing mikutkut king ima na. Inyang megaral ya, pisasanmetung de reng kaklasi na pauli ning mas biyasa ya kesa karela, ikwa ng meging tagapaglutu king kusina ning palasyu na ning hari, karin murin dakal a mimwa keya, pauli na ning biyasa ya at manyaman yang maglutu. At king inggit da kaya, singkanan deng e tutu, iya at ing kayang tuturing a ima penasakit dala at pelayasan da la king palasyu. Kabang papunta la keng lugar, a nung nukarin do iugse, kabang pupusanan ne ning bidang babai ing tuturing ng ima, mete ya at keni ya maybug a maspak a salu ing bidang babai, kasi agaganaka na ing mengapalyari keng bie na. At minsan asabi na king sobra na ing dadalanan ng kapagsubukan at mapagal ne, ampon bisa neng sumuku, at bisa neng mate.

Itamu naman, maralas daratang keng bie tamu ini, bisa tamu namang sumuku, bisa tang paynawa o tuknang gagawang mayap, kasi neng gagawa tamung mayap dakal lang mimwa at e maka-intindi kekatamu.

E tamu sana kakalingwang na ing Guinu tang Jesus, makanyan mu naman ing milyari keya keti king yatu. Mas marakal at mas masakit ing delanan na, sikwil de ring kabalen na, buri deng paten, pauli na ning tutu nang sasabyan. Maiinggit la keya, uling mayap ya, uling ing sasabyan na akakit dang gagawan na. At ing pekamabayat a karanasan na ya ing pagtaksilan de reng keyang alagad, inyang lingad deng kilala de. Pero nanung gewa na, menatili yang mapamintu king Ibpa angga king pangamate na king krus. Inya naman pauli ning kapamintuan na, pepasubliyan neng mie king katlung aldo ning Ibpa.

Makanyan mu naman ing anyaran ning guinu kekatamu, ing mabiasa tamung makiramdam at mamintu, bista man masakit at mapagal ing gagawang mayap, e ta dapat susuku, uling ikit tang masala na kaybat ning kasakitan atin tamung panayan a kanawan, kaybat ning krus akit tamu naman ing ligaya.

Ing pangasubling mie ning Guinu iyang mamie pamag-asa kekatamu, king keyang pangasubling mie, sasabian na kekatamu ning Guinu king e magtagumpe ing karokan, king ing paralan ning kayapan iya pa murin ing miral king katataulian.

Para kekatamu, buri ng sabian niti, atin yang angganan ing dewakan at e malyaring manatiling mag-ari ini karing pamibie-bie tamu. Ing upaya ning Guinu, migit ya pa kareng nanu mang upaya. Migit ya pa mismu king kamatayan a pitatakutan tamu.

Kumatmu ya sanang pamag-asa ing bie tamu. Nung balu tamu na ing kayapan ya ing tagumpe king katataulian, malyari ta nang mamag-asa ngeni pa, king kayapan a makadikil na kekatamung meging tapat king Guinu sumangid ning maragul ampon mabayat a kapagsubukan.

Inya kulisak tamu: ”Alleluia! Alleluia! Alleluia! Sinubli yang mebie ing Guinu! Alleluia! ” Amen.

IV. Pamigunam

Ngening aldo ning pangasubling mie ning Guinu, Purian ta ya ing Dios, Kayabe da ring egana-ganang santos ampon angeles king banwa at ring tau keti yatu! Purian ta ya I Kristo, ing kordero ning Dios a megtagumpe sumangid ning kasakitan at kamatayan. Iyagkas ta ya ing himno a makasulat king libru ning kapahayagan a nung nukarin pupurian de ring marakal a tau king banwa at yatu, I Kristo bilang metung a matagumpe.

“Kekaming Guinu at Dios! Karapatdapat kang tanggap
Kapurian, dangal at upaya. Alleluia! Alleluia!

Uling ika ing linalang karing sablang bage at lelangan mu la,
at dininan bie ketang kekang kaburian. Alleluia! Alleluia!

“Ika ing karapatdapat kuma king libru, at mibuklat karing tatak na.
Uling pete ra ka at king kapamilatan na ning kekang kamatayan
Keka lang linigtas para king Dios ding taung manibat king balang
Lahi, salita, balen at bansa. Alleluia! Alleluia!

Gewa mong metung a kayarian ding pari para sumuyu king
Kekatamung Dios, at ilang mag-ari king yatu.” Alleluia! Alleluia!

“Ing Korderong pete ra karapatdapat yang tanggap upaya, pibandian,
Kabiasnan, at sikanan, dangal, ligaya at kapurian!” Alleluia! Alleluia!

“King makalukluk king tronu at king Kordero, miyabe ing dangal,
ligaya, kapurian at upaya angga king kapilan pa man!” Alleluia! Alleluia


V.Pamanahimik

VI Tauling Panalangin

Kapurian keka O Dios, ngening aldo ning pangasubling mie nang Jesus. Matula kami at magsaya uling milabas na ing kasakitan a denasan na. King upayang pepakit na, maging panatag ke lub uling iya ing megtagumpe ngeni, ampon kapilanman. Amen.

VII. Kutang

1. Nanu mo para keka ing kabaldugan ning pangasubling mie ning Guinu?

Download here:

Page 1: http://www.mediafire.com/file/ygw4yvznkmh/04.12.09%20pg.%201.doc

Page 2: http://www.mediafire.com/file/ytyzhieonn2/04.12.09%20pg.%202.doc

Dominggu ding Palaspas ning Pamailasa ning Guinu

Dominggu ding Palaspas ning Pamailasa ning Guinu

I. Pamuklat a Panalangin

Dios, Ibpang mayupayang tutu, sasamban, pupurian at pasalamatan da kopu king bawat pinandit ning bie mi. King aldo ning pamiganaka mi king pamaglub mu king Jerusalem, ituru yu pu kekami ing grasya ning kasakitan at kamatayan yu pu king krus. Sopan yu kami pung makaintindi king kabyasnan yu, na ot bakit kailangan pang dumanas kayung kasakitan at kamatayan king makarine paralan? Ing sana pung Banal yung Espiritu lilungan na kami. Amen.

II. Pamamasa

Marcos 15: 1-39

Kabukasan ning a abak a maranun, mipulung la ding pamuntuk da ring pari, ding makatua na ning balen, ding talaturu ning Kautusan, at ing kabilugan a Sanhedrin. Pepagapus de I Jesus at dela re kang Pilato. 2“Ika pin ing Ari da ring Judio?” nganang kinutang Pilato. “Ika mismu sasabian mu,” ngana namang mekibat Jesus. 3Dakal ing sumbung a inarap ding pamuntuk da ring pari laban kang Jesus, 4inya kitnan neng pasibayung Pilato, “Ala kang ipakibat karela? Lawan mu, tutu lang dakal a susumbung laban keka!” 5Oneng e bitasang mekibat I Jesus, inya mengapamulala ya I Pilato. 6Balang daratang ing Piesta ning Pamaglagpus, mibubulus yang metung a preso I Pilato, itang aduan da ring tau. 7Makasukul ya kanita ing metung a lalaking ausan dang Barabas, kayabe de ring aliwang rebelding mekamate tau king milabas a rebolusyon. 8Linapit la ding tau at inawad da kang Pilato king daptan na na ing sadiang pamibulus metung a preso. 9Kitang na karela, “Buri yeng ibulus ku ing Ari da ring Judio?” 10Malino nag balung Pilato king ding pamuntuk da ring pari inarap de keya I Jesus uli na ning diria. 11Oneng ding pamuntuk da ring pari sitsutan da la ring tau ban aduan da king I Barabas ya ing ibulus na. 12Nung makanyan,” nganang Pilato, “nanu ing daptan ku kaniting ausan yung Ari da ring Judio?” 13“Ipaku ya king krus!” ngarang kinulisak ding dakal a tau. 14“Baket, nanung kasalanan ing depat na? nganang kinutang Pilato. Lalu rang pekasikan ing kulisak, “Ipaku ya king Krus!” 15King kapagnasan nang apamatulan na lang Pilato ding tau, papabulus ne I Barabas; pepabarug neng latiku I Jesus at kaybat binie ne karela ban ipaku re king krus. 16Dela re ding sundalus I Jesus king patyu kilub ning pretorio (ing palasyung tuknangan na ning Gobernador) at inaus da la ring abe rang sundalus. 17Belabalan de I Jesus king metung a malutung imalan; ginawa lang koronang suksuk at binili de king buntuk na. 18Pisunu-sunu reng sasaluduan. Ngara, “Luid ya ing ari da ring Judio!” 19Pemukpuk de buntuk king kapirasung timbu, pigluran de, siniklaud la arapan na, at pisunu-sunu reng pupugayan. 20Kaybat deng gewang pikaylian, likas de kang Jesus ing pepasulud dang malutung imalan at sinulud dang pasibayu ing sarili nang imalan. Kaybat, linual de ban ipaku king krus. 21Ating metung a lalaking lalabas ibat king baryu. Pinilit de ring sundalus ban papusan keya ing krus nang Jesu. Simon ing lagyu na; tau ya Cirene, at tata re di Alexander at Rufo. 22At dela re I Jesus king lugal a ausan dang Golgota, ing kabaldugan na “Lugal ning Bungu. 23Dininan deng alak a semutanan mira, oneng e na ininum. 24Pinaku re king krus at piparti-parti da ring sundalus ing imalan na. Mibagutan la ban abalu ra nung isanung dake ing katuliran ning balang metung. 25Alas nuebe na ning abak inyang pinaku re king krus. 26Ngana ning misulat a dalum laban kang Jesus: “Ing Ari da ring Judio.” 27Kayagnan na lang mipakung Jesus ding aduang tulisan, ing metung king banda nang wanan at ing metung king banda nang kayli. 28Makanyan yang metupad ing sasabian na ning kasulatan: “Binilang de karing criminal.” 29Ininsultu de ring lalabas at pipiling-piling da la ring buntuk da. Ngara, “Aha! Ika ing lasak king Templo at italakad me kilub ding atlung aldo? 30Iligtas mu ngeni ing sarili mu! Kuldas ka keng krus! 31Pisunu-sunu dia naman ding pamuntuk da ring pari at ding talaturu ning Kautusan. Ngara king metung at metung, Linigtas na la ding aliwa, oneng e na aligtas ing sarili na! 32Paburen yeng kuldas ngeni king Krus ing Cristo, ing Ari ning Israel! Nung akit mi yang kuldas, maniwala kami.” Insultuan dia naman ding tulisan a makapakung mingatba keya. 33At medalumdum king mabilug a bansa manibat king kaugtuan aldo anggang alas tres ning gatpanapun. 34Inyang alas tres na, kinulisak ya I Jesus, Ngana, “Eloi, Eloi, lema sabachthani?” ngana wari, “Dios ko, Dios ko, baket pepaburen mu ku? 35Dimdam de ring mapilan a taung karin, Ngara, “Lawan yu, ausan ne I Elias! 36Milayi ya ing metung karela, sinoso neng aslam ing metung a espongha at tinali ne king punta na ning metung a timbu ban pasipsip ne kang Jesus. At nganang sinabi, “Lawan tamu nung tipa ya pin I Elias ba neng ikuldas!” 37At kinulisak yang masikan I Jesus at mepatad ya pangisnawa. 38Megabak ya ing kortina ning Templo manibat king babo angga king lalam. 39Panakit ning kapitan da ring sundalus a makatalakad tulid na ning krus nung makananu yang mepatlud a pangisnawa I Jesus, sinabi na, “Tune ing taung iti Anak ne ning Dios!


III. Turu

Pagmasusyan taya pu ngeni ing Dumingu de Ramus na nung nukarin gaganakan tamu ing pamaglakbe at pamaglub ning Ginung Jesus king Jerusalem. Ing Jerusalem e yamu maging simbulu ne ning kasakitan at kamatayan ning Ginu tang Jesu Kristo nune simbulu nya naman ning tagumpe laban king kasalanan.

Keng mebasang ebanghelyu pepamilyan nong Pilato reng tau nung ninu ing ibulus na, i Jesus o i Barabas? At ing pinili da reng keraklan yapin i Barabas, a metung a taung rebolusyunaryu na lalaban at makamate kareng Romano. Pinili reng ibulus i Barabas at aliwa ing Ginung Jesus pauli darening makatuking kasangkanan. Mumunang kasangkanan yapin ing dirya, na king pang-umpisa balu na nang Pilato na marilya la ring pamuntuk da reng pari kang Jesus. Marilya la uling e mu kabud manaral ing Ginung Jesus patungkul king kayarian ning Dios nune akakit ra pang gagawan na ing kayang panaral. Sinabi nang Jesus na dapat lang luguran reng pakakalulu, reng mabababa, at reng makasalanan. At gewa na iti, nya naman mas meging popular o sikat ya pa ing Ginung Jesus kesa karela. Marakal keka tamu ngening kasalukuyan, ing marilya tamu mu naman karetang taung masanting at mayap gagawan. Dakal keka tamu ing e mipaindatun potang ing metung a tau maging popular o sikat ya pauli ning tutu at mayap nang pamagserbisyu. At potang ing dirya mimiral ya king bie ning metung a tau, pagnasan na ing sana ating matsurang malyari ketang kayang pandiryan. Nya kadalasan, ing dirya maging bunga ne ning pamipate at neng kayi pa pin mumuli king pamipatayan.

Ing pangadwang kasangkanan, yapin ing sutsut da reng pari kareng tau. Sitsutan dala na ing ibulus i Barabas at i Jesus naman ipaku ya king krus. King kasalukuyan mu namang panaun, dakal la naman keka tamu ing makakwa keng sutsut ban ing panigan ing marok at aliwa ing mayap.E tamu atalakaran nung nanu ing mayap, mas pakiramdaman tala pa reng aliwang tau kesa nung nanu ing bubulung ning utak at pusu tamu.

Ing katlung kasangkanan, i Pilato tikyan no buri ring tau na ipaku ya king krus i Jesus. Iti pauli ning kapagnasan ng apamatulan na la reng tau. Maralas makanini tamu mu naman panugali, ban tala mung apamatulan reng aliwang tau, tutukyan ta ing buri da, agya pang mali at makakarok iti keng tau. Amen.

IV. Pamigunam

Metung at metung keka tamu atin tamung Jerusalem king bie. Miyayaliwa lamu pin reti. Ing Jerusalem tamu ila pin reng miyayaliwa tamung misyun keti king yatu. E malyaring ala tamung misyun keti king yatu. Mapa mang-mang o biyasa, mapa-makwalta o kalulu. At ing metung a taung mamarap king kayang misyun, siguradu mung atin yang sangkap a kasakitan o problemang danasan.

King kaorasan, kutnan tala reng sarili tamu. “Keng Jerusalem o misyun ku king bie, e ku kaya marilya kareng aliwa nya gagawan ku ite?” “E ku kaya, mekwa king sutsut nya gagawan ku ing pamagsilbi kareng aliwa?” O, buri kulang pamatulan reng tau, at aliwa ing Ginung Jesus nya gagawa kung mayap?” Dakal sangkan, ot bakit arapan tala reng Jerusalem ta king bie. Sana pakyapusan taya ing Ginung Jesus king kayang Jerusalem. E ya pe-sutsut kareng akayabe na ban isundu ing kayang misyun. Kusa neng binye ing kayang sarili o bie para kareng aliwa. At e na inisip mu ing kapakanan da reng tau nune ing pamintuan at pamatulan ya ing kayang Tatang, ing Ibpang atyu banua. Amen.

V. Pamanahimik

VI. Tauling Panalangin

Ginung Dios, dakal pung dakal a salamat king pamanantabe yu kekami. Meging malino la pu kekami reng sangkan ot bakit mas pinili re I Barabas kesa king kekayung Anak, I Jesus ban ibulus. Makanini mu rin pu king kasalukuyan ming panaun, papamilinan mu kami, ika o ing kalaban(ing marok). Neng kayi pu ing marok yang pipilinan mi uli na ning sitsit at buri milang pamatulan reng aliwa, para kareni Ginu, patawad pu. Amen.

VII. Kutang

1. Nanu mo kaya ing sangkan ot dakal keka tamu ing atin panugali ning dirya?
2. Bakit kaya, maralas paydala ta kareng sutsut dareng aliwang tau?
3. Nanu ing dapat tang gawan o asaup kareng aliwa ban milako ing dirya at pamisutsutan king komunidad?

Download here:

Page 1: http://www.mediafire.com/file/gxwndtxwzjz/04.05.09%20pg.%201.doc

Page 2: http://www.mediafire.com/file/li5xwcwzn1n/04.05.09%20pg.%202.doc