Dios Ibpa, ing kapanyamban at ligaya Keka manga man king kapupusan. Patawad pu kareng kasalan mi keka at kareng kapara ming tau. Maralas pu ing ala kaming pakyalam nung nanu ing malilyari king kekaming komunidad. Ala kaming tutung lugud at malasakit kareng mangailangan. Para kareni ngan Ginu, patawad pu. Amen.
II. Pamamasa
Lucas 16:19-31
19”Ating metung a taung mabandi a mimalan mal at ating labis-labis a pamangan aldo-aldo. 20At atin munamang pulubi a milagyuan Lazaro; mitmu yang sugat at atyu lele nang pasbul ning mabandi. 21Bisa yang makapangan agyang king mugmug a mananabu ibat king lamesa na ning mabandi. Aliwa mu ita, lalapitan de pa ding asu at didilatan da la ring sugat na. 22Mete ya ing pulubi at dela de ring anghel king siping nang Abraham. Mete ya naman ing mabandi at mikutkut. 23Kabang magdusa ya king Hades, tinalanga ya ing mibandi at ikit ne king marayu i Abraham at i Lazaro a atyu siping na. 24At nganang kinulait ning mabandi, ‘Tatang Abraham, malunus kayu kanaku. Utusan ye I Lazaro ba neng basan danum ing sepu na ning taliri na at parimlan ne ing dila ku uling magkasakit ku king aping ini! 25Oneng nganang Abraham, ‘Anak ko, ganakan mu king kanitang atyu ka king yatu migpakasawa ka king mangayap a bage at mibata yang kasakitan I Lazaro. Oneng ngeni mipaligayan ya keni kabang ika naman magdusa ka. 26Bukud pa king sablang yan, atyu pilatan tamu ing metung a maragul a bangin. Inya e la makapunta keni ding atyu ken, at ding atyu ken e la makapunta keni.’ 27At ngana ning mabandi, ‘Nung makanyan, tatang Abraham, ipakisabi kung mayap king papuntan ye I Lazaro king bale nang tatang ku 28uling atin kung limang kapatad a lalaki. Itubud ye karin ba na lang dinan babala, kanita ila mu man e la miras keting lugal ning pamagdusa.’ 29Oneng sinabi nang Abraham, ‘Atyu ya karela I Moises at ding propeta; paburen mu lang makiramdam karela.’ 30Nganang mekibat, ‘E sapat ita, nung puntalan na la ning metung a sinubling mebie, sumisi la at painggulut karing kasalanan da.’ 31Sinabi nang Abraham, ‘Nung e la makiramdam kang Moises at karing propeta e la munaman maniwala agyang king mete a sinubling mebie.’”
III. Turu
Ating metung a religious brother na iyang makatutuk manahi kareng imalan dareng kayabe na king komunidad. Ikwa na ng metua king miatang a obligasyun a ayni kaya at misan a aldo ikwa ng mikasakit grabi. Peyaus no ngan ning lider reng kayang ka brother ban deng ipangadi. Nyang ati no ngan makapadurut, migsalita ya ing matuang masakit ana, “Bie ye kanaku ing susi ku para king banua!” Mipaglalawe langan deng makapadurut a mangadi uling e da ayntindyan ing kayang sasabyan. Migsalita ne namang pasibayu ing masakit a matua ngana, “Bie ye kanaku ing susi ku para king banua!” Mekibat ya ing metung kareng ka brother ngana, “In Jesus name, patawaran yu ne pu kareng kayang kasalanan!” Atin munaman metung ngana, “mag ingalu ne at enana balu ing panyabyan na!” Oneng king katlung besis migsalita ne na namang pasibayu ing matuang masakit ngana, “Bie ye kanaku ing susi ku para king banua!” At ketang penandit ayta, atin metung kareng ka brother a linwal king kwartu at kingwa ne ing karayum a gagamitan na parati ning masakit king kayang pamanahi. Binye ne king matua ing karayum, katalan na ning matua king karayum tiniman ya at ngana, “Pauli ning karayum ayni, ikwa kung mekapagobra at mekasuyu aldo-aldo, Ngening lakwan ku ne ing yatung iti, king ikarangal at ikaligaya ning Ginu, oyni ing susi ku king banua.” At mepatlud ne bie ing matua.
Ing ebanghelyu ngeni tungkul ya king metung a lalaking makwalta at i Lazaru. Anyang mete la reng adwa, ing mabandi miras ya king impiyernu; i Lazaru, king banua.
Ala namang mababanggit king istorya na ing mabandi metung yang marok a tau. Mabibye yang masanting a bie, misusulud a mangasanting a imalan at mikakamanyaman parating pamangan
Nung pitutuliran mu ala yang gagawan marok ing makwalta kang Lazaru. Alang marok nung sasali yang imalan a mangasanting at mangamal ing mabandi. Ala munamang marok ing mangan yang manyaman king aldo-aldo. Ing meging kakulangan na o kasalanan na ning mabandi yapin ing atyu pin sana king manyaman a kabilyan e nane man mo dininan adya mu man ditak a pansin i Lazaru. E ne man mo ginamit adya muman ing metung ng daliri para sopan i Lazaru. Ni minsan ala yang sinabi kareng kayang ipus ing dinan deng pamangan at inuman i Lazaru. I William Barclay, metung a talapagaral king Bibliya, sinabi na, “Ing kasalanan na ning mabandi ing ala ne mang gewang marok nune ing ala yang gewa adyang nanu man.”
Dakal kekatamung Kristiyanu ing kaugali taya ing mabandi. Makapokus tamu mu nung nanu mu ing makasaup king sarili tamu. Agya pang arapan akakit tana ing atin pamangailangan king kasaupan tamu, lilisya tala reng mata tamu. Babalikid tamu at bala mu wari ing ala tang akakit.
Ing mayap ng balita ning Ginu ngeni kekatamu ing e na naman anyaran ing mangaragul a bage na e tana man agawa kareng kapara tang tau. E na naman anyaran ning Apung Ginu kekatamu ing e ta naman agyung a ibye. E ya mag expect mangaragul at makapagmulalang bage, ing buri namu simple at iti yapin ing atyu ing sarili tamu kareng mangailangan.
Dakal tamu talentu at regalu na binye ning Apung Ginu na pwedi tang agamit para apanyaup. Nung atin tang pera para apanyaup, mayap. Pero nung ala naman, makasiguradu tamung e nakatamu usgan ning Apung Ginu. Nung atin namang taung mangailangan para makiramdam kareng problema da, ibye tamu ing sarili para makiramdam karela. Ing pamakiramdam metung neng maragul a bage karela. Itamu mang panamdaman da ing atyu ka king siping da potang atin lang problema mididinan nong lakas lub kanita. Lalu na pa sigurung mayap at masanting nung atyu tana king siping da at abe-abe ta pang mangading pasaup king Apung Ginu.
Ganakan taya ing istorya ning metung a matuang brother na ing kayang susi para mukyat ya banua yapin ing kayang karayum na ginamit na king aldo-aldo. Asna ka simple ing bie na at ing gewa na. Susulsiyan namu deng sirang malan dareng kayang ka brother. Gagawan na iti king simple paralan pero mitmung lugud, uling paniwalan na ing pamagsilbi na kareng kayang ka brod, mipapaligayan ya ing Ibpa, ing Anak at ing Banal a Espiritu. Amen.
IV. Pamigunam
Payabut nang Jesus kekatamu ngeni ing nung bisa ta talagang maging talatuki na ing kaylangan ing dinan talang maragul a pansin ding kapatad tamung mangailangan. At balu ta naman ing e mu kabud materyal ing pamangailangan ning metung a tau. Kaylangan ning tau ing lingap at lugud. Ing tau kaylangan ne ing kayang kalupang tau, uling alang taung asabi na ing e ne kaylangan ing kaupa ng tau. Kapilan pa man parati tamung mag dependi king metung at metung. Ing ima kaylangan ne ing komadrona o doctor ban yang manganak. Mangailangan ya namang panulu na ing ginawa ing tau, at bitamina para king kayang anak. Potang magaral ne ing anak kaylangan ne ing talaturu para mabyasa at potang yari ne king pamagaral na kaylagan nane man ing obra na ing makapamie ing papagobra. Potang magpamilya ne kaylangan no reng tau para magobra para king kayang bale at potang mete ne kaylangan no reng taung mamuat kaya para king kayang kutkutan. Nya alang taung sabyan na ing e ko kaylangan deng kalupa kung tau. Amen.
V. Pamanahimik
VI. Tauling Panalangin
Ginu, dakal pung salamat king lugud at pakamal mu king metung at metung kekami. Parati yu kami pung dinan pusung mapaglunus at parating makirame kareng aliwang tau. Amen.
(Ikanta taya pu ing Pananagutan)
1. Walang sinuman ang nabubuhay para sa sarili lamang
Walang sinuman ang namamatay para sa sarili lamang
Koro; Tayong lahat ay may pananagutan sa isa’t isa
Tayong lahat ay tinipon ng Diyos na kapiling niya
2. Sa ating pagmamahalan at paglilingkod sa kanino man
Tayo ay nagdadala ng balita ng kaligtasan (Koro)
3. Sabay sabay ngang mag-aawitan ang mga bansa
Tayo’y tinuring ng Panginoon bilang mga anak (Koro).
VII. Kutang
1. Ibye mu ing sariling upinyun. “Alang taung independent!”
2. Nanu la kaya reng susi tamu papunta king banua?
3. Nanu la reng planu tamu para kareng kapatad tamung mangailangan king daratang a kapaskuan?
Ibpa, buri miya pung suywan ing kekayung Anak I Jesus, kapamilatan ning pamaglingap kareng kapara ming tau. Pero, madalas pu ing mikakasala kami keka. Mas didinan mi papung pansin ing kekaming sarili kesa king ikaligaya Mu. Dinan yu kepung grasya ning kekayung sala ban min akit na ing bage pigkalub mu kekami ing dapat ing ipamiye ming mitmung lugud karing kaparang tau. Amen.
II. Pamamasa
Lucas 16:1-13
Nganang Jesus karing alagad na, “Kanitang misan, ating mabandi a ating metung a katiwala. Simbung da king ing pibandian na panyiran na mu ning katiwala. Inya pepayaus ne at kitang na, ‘Nanu ing ababalitan ku tungkul keka? Munie kang kwenta kanaku tungkul king kekang pamanibala king pibandian ku uling e na ka malyaring maging katiwala ku.’ Ngana ning katiwala king sarili na, ‘Lalako na na ku ning panginuan ku king pangakatiwala. Nanu ing daptan ku? E ku agyung sarul; makarine naman nung magpalimus ku. A, balu kuna ing daptan ku! Milako ku man king obra atin naming tanggap kanaku karing pibalebale ra.’ Tunggal-tunggal na lang pepayaus ding ating utang king panginuan na. Ngana king minuna, ‘Nu anti ing utang mu king kanakung panginuan?’ Pekibat na, “Dinalan a barilis a larung olibo.’ Ngana ning katiwala, ‘Oyni ing kasulatan na ning utang mo. Lukluk ka at gawan meng limang pulu. Mamalagwa ka!’ Kitnan ne ing kadua, ‘Ika, nu anti ing utang mu?’ Pekibat na, ‘Dinalan a kaban a trigu.’ Ngana ning katiwala, ‘Oyni ing kasulatan na ning utang mo. Walung pulu ing isulat mu.’ Pinuri ne ning panginuan ing mapamirait a katiwala uli na ning pepakit ng katosuan. Uling maygit lang biasing mamahala ding taung maka-yatu kesa karing taung maka-Dios.” At sindu nang Jesus ing pamagsalita na. Ngana, “Inya sasabian ku kekayu: gamitan yu king pamakikaluguran ing pibandian keti king yatu. Magisan man iti, matanggap na kayu man king tuknangan a alang angga. Ing tapat king malating bage a mipagkatiwala keya, tapat ya naman king maragul a bage a mipagkatiwala keya, ing e mu apagkatiwalan king malating bage, e mia naman apagkatiwalan king maragul a bage; apagkatiwalan king maragul a bage. Nung e ra kayu apagkatiwalan king pibandian na niting yatu, ninu ing magkatiwala kekayu king tune pibandian? At nung e ra kayu apagkatiwalan king pibandian da ring aliwa, ninu ing munie kekayu king tune mangaintulid kekayu? Alang ipus a makasuyung aduang panginuan uling pikasaman ne ing metung at luguran ne ing metung; maging tapat ya king metung at pikasaman ne ing metung. E kayu makasuyung agnan king Dios at king pibandian.”
III. Turu
Ating metung a istorya tungkul kareng adwang misiping bale. Ing makwalta at ing metung a kalulung mangawang sapatus. King aldo-aldo ing pamibie-bie ning makwalta, ala yang gewa neng bengi nung e mimisip nung makananu nong isalikut ampo pang parakalan ding kayang pera. Ing kalulu naman, ala neng gewa nung e magkanta aldo’t bengi kabang mangawa yang sapatus. King pamagkanta na kabang mangawang sapatus, ding sablang anak king banda da, alben de.Misan a aldo king kapuyatan ning makwalta king pamanisip kareng kayang pera, e ya mipatudtud aldo uli na ning pamagkanta na ning sapateru at pamipalakpak daring manalbeng anak. Nya pintalan ne ning makwalta at igkat neng mangan king kayang pibale-bale. Kaybat dang mengan, ing makwalta dininan ne ing kalulung sapaterung metung bag a sapak a pera. Mipatalakad yang e mu nanu king tula ing kalulu at aisip na ing e nana kaylangan ing mangawa ya pang sapatus.Dintang ing bengi, ing kalulu e mipatudtud, e na balu nung nokarin no isalikut ding pera na. Kebit no king cabinet, oneng e pamurin mipatudtud. Kebit no king kisami ning bale na, at e pamurin mipatudtud. At aisip na bandang tawli ing mangulkul nyamu king gabun king tagiliran ning bale na at ban Karin no tambunan ding pera na. Mipatudtud nesa na, nyang bigla nang aisip ing pota ating menakit kaya nyang mangulkul ya, nya tinalakad yang pasibayu at kingwa no pasibayu reng pera at sinakbit na nalamu king gulut na ing bag na sapak pera. Bandang tauli ala neng gewa ining datingmangawang sapatus nung e lawen deng pera na. E ne mangawang sapatus, e ne magkanta at ala nala naman deng anak a makiramdam at papalakpak kaya neng magkanta ya. Bandang tauli mebayat ya katawan, uling pantunan na ning katawan na ing dati ng gagawan. Bandang tauli melungkut ya, uling pantunan at a mis-mis no reng anak a makiramdam at papalakpak kaya neng magkanta ya. Nya a isip na ing puntalan ne ing makwalta ng siping bale ban isubli ding perang binye na kaya.King katatauli-taulyan, mibalik ya ing mangawang sapatus king pamagkanta na kabang magobra ya. At kabang magobra ya, atyu lang pasibayu deng anak a makiramdam at alang patnang papalakpak kaya. At ing makwalta ng siping bale ala ne naming paynawang paypuyat king kakaisip nung makananu nong parakalan at isalikut ding pera na.Ing ebanghelyu ngeni tungkul ya king metung a lalaking katiwala ning metung a mabandi. Ing mabandi o panginwan na ning katiwala king istorya, iya ing mikibandi ngan king kegana-ganan keti king yatu at king banwa at iti yapin ing Apung Ginu. Ing naming katiwala yapin deng taung dininan ng upaya, pusisyun at pibandyan ning Apung Ginu. Oneng nanu ing gewa na ning katiwala king istirya? Panyiran namu ing pibandyan na ning kayang panginwan. Ala yang pamiyaliwa kareng taung midinan mu naming grasya ning upaya, pusisyun at pibandyan. Masisilo la kareng bage kukupas o mababating. Bala da reng bageng arena permanenti la. Nya nanu ing aisip na ning katiwala nyang sabyan na ning panginwan na miye yang kwenta king pibandyan na? Aisip ng bigla ing dapat maging maganaka ya kareng taung ating utang king kayang panginwan ban kanita potang ala na ngan ing pigkalub ng upaya o pibandyan kaya, sopan de rening taung sinopan na. Kening gewa na ning katiwala pinuri ne ning kayang panginwan. Pinuri ne uli na ning pamagdake na king pibandyan na menibat mu naman king kayang panginwan. At kanita na sinabi ning Ginu ing “gamitan ya king pamakikaluguran ing pibandyan keti king yatu.”Ing sablang atyu kekatamu menibat mu kaya, pigkalub namu kekatamu iti bilang katiwala na ban gamitan kin gmayap, ban idake iti kareng kalupa tang tau. E tamu paylinlang king upaya ning pusisyun, at pibandyan. Uling kapamilatan na reti milako ing kekatamung responsibilidad kareng kapara tang tau pati na ing relasyun king kekatamung panginwan. Akalingwan taya siguradung dinan oras ing Apung Ginu, pauli ning masyadu tang ukupadu king kekatamung obra, overtime o kaya naman kareng miyayaliwa tang sidelines. Malingas-ngas tamu king kapanintunan, uling pagnasan tamu ing asali ta ngang ing bage-bage buri tamu na ing tutu e ta naman kailangan. “Alang ipus a makasuyung adwang panginwan; uling pikasaman ne ing metung at luguran ne ing kadwa; maging tapat ya king metung at iwasan ne ing kadwa.” Amen
IV. Pamigunam
Itamu ngan ausan na katamu ning apung Ginu na maging katiwala na king kayang pibandyan. Ing pibandyan na kapilan man e magigiusan, nya e ta dapat ipagkaymut ipamie nung nanu man ing pigkatiwala na kekatamu. Nung dininan na katamung upaya ning pusisyun at pibandyan, paganaka na ngeni kekatamu na iyang migkalub kaniti. Pigkalub na iti, uling balu na ing gamitan ta iti king pamakipagkaluguran at nung e ta naman gamitan iti king sutung paralan, siguradu mu ing kwanan ng pasibayu ini, “Ing tapat king malating bage a mipagkatiwala keya, tapat ya naman karing mangaragul a bage a mipagkatiwala keya; ing e mu apaniwalan king malatinf bage, e mya naman apaniwalan king mangaragul a bage.”Kutnan ta ing sarili tamu, nung makananu talang gagamitan ding oras, reng regalu at talentu, at pibandyan a pigkalub ning Dios kekatamu. Gagamitan tala reti king ikaligaya ning Dios o king sarili tang ikatula? Mamili ta dapat kareng adwang panginwan. Pilinan ta ing bage-bage na akakit tamo? O, pilinan taya ing Dios a linalang king sablang bage-bage na akakit tamo at eta akakit? Ing pakibat atyu kekatamu. Amen.
V. Pamanahimik
VI. Tauling Panalangin
Ginu, dakal pung salamat kareng kekang paganaka. Balu mi pu na kaylangan ing baywan mi ing panlalawe mi kareng bage pigkalub mu kekami. Dapat pala ing gamitan mila reti king pamakipakaluguran. Palakasan yu pu ing kekaming kasalpantayanan. Amen.
VII. Kutang 1. Nanu lamo reng mangalati ampong mangaragul a bage na pigkatiwala na keka ning Apung Ginu? 2. Kapilan taya mo mas yuyuna ing materyal kesa king Apung Ginu? 3. Mika karanasan na kang apaglabanan mu ing tuksu ning materyal a bage? Ikwentu?
I. Pamuklat a PanalanginGinu, dakal pung dakal a salamat king kekayung lugud kekami. Dakal pu ing besis na panandaman mi ing kekang kapatawaran. Neng dadayu kami king kekang kawan ban panintunan ing kekaming pansariling kaburyan, ala kang sawang manintun kekami ban ibalik king tune mung lugud at pakamal. Amen.
II. Pamamasa
Lucas 15:1-10
Kanitang minsan, linapit la kang Jesus ding dakal a talapanyingil buis at makasalanan ban makiramdam. 2Mibubulungan la ding Pariseo at ding talaturu ning Kautusan. Ngara “Makisalamuha ya ing taung iti at makisulu karing makasalanan!” 3Inya ing sinabi neng Jesus karela iting talimhaga: 4”O nu mong ing metung kekayu atin yang dinalan a tupa at mebating ya ing metung kareti, nanu ing daptan na? Lakuan na la ding siam apulu’t siam keng pastulan at panintunan ne ing mewala anggang e ne akit. 5At nung akit na ne, masaya neng pusanan karing pago na 6at ayuli ne. Kaybat kumbiran na la ngan ding kakaluguran na at kasiping bale. Sabian na karela, “Matula kung tutu uling ikit ke ing tupa kung mebating; munta kayu keni; magsaya tamu!” 7Sasabian ku kekayu king makanyan munamang mika maygit a kasayahan karin banua uli na ing makasalanan a sisisi at ginulut king kasalanan na kesa karing siam apulu’t siam a banal a e kailangan sumisi. 8“O nung ing metung a babaing ating apulung salaping pilak kebatingan yang metung kareti, nanu ing daptan na? Sindi yang sulu; palisan ne ing bale at panintunan neng masalese anggang e ne akit. 9Nung akit na ne iti, kumbiran na la ding kakaluguran na at kasiping bale. Sabian na karela, ”Matula kung tutu uling ikit ke ing mewala kung salaping pilak! Munta kayu keni; magsaya tamu!” 10Sasabian ku kekayu king makanyan munamang mika kasayahan karing anghel na ning Dios uli na ning makasalanan a sisisi at painggulut king kasalanan na.”
III. Turu
Metung kareng kukutang tamu king kasalpantayanan, ing nung bakit pinili ne ning Ginung Jesus i Judas Iscariote na maging metung kareng mumuna ng disipulu. Balu na naman ning Ginu tang Jesus na iyang magtaksil kaya, pero inaus, pinili at liguran nepa. Pero, nung tutu tamung talatuki ning Ginu tang Jesu Kristo, e makanini dapat ing kekatamung kutang. Ing dapat tang ikutang, ing obat aku pa ing inaus, pinili at liguran ning Ginung Jesus? King ebanghelyu ngeni, reng eskriba at pariseo mibubulungan at mipangutang la ot bakit i Jesus makisalamuha at makisulu ya karing talapanyingil buwis at palpikasala. Balu da kasi reng eskriba ampo reng Pariseo na patsa ing metung a Judio makiyabe ya kareng taung areni, marinat at makasalanan ya naman. Nya selita ne ning Ginu tang Jesus ing talimhaga ning mebating a tupa. Dinalan la kabilangan ding tupa na ning magpastul, oneng ing metung mebating ya. Ing Ginu yang pastul at ing mewalang tupa ila pin ring talapanyingil buwis at makasalanan, na ilang tatakwil na ning lipunan kanita.Ngening kasalukuyang panaun, masasabi ping Kristiyanu tamu, pero neng kayi maralas kalupa tala pami-isip deng eskriba at pariseo kanita. Uli mong mapanyimba tamu, lalawen tanalang marok deng taung e sisimba. Neng kayi naman deng taung e sisimba, ing sasabyan da, nya e la kanu sisimba uling mas marok la pa panugali deng sisimba. Atin namang kapanwalan na patsa e ka makabilang karela, e ka kanu miligtas. Pero king kekatamung dimdam a talimhaga, ing kaburyan na ning Ginu ing ala dapat ing mababating karing tupa, dapat iuli no ning magpastul na kumpletu la.Parati ng payabut ning Ginu tang Jesus ing alang anggang lugud na kekatamu. E na lalawen ing kekatamung kakulangan, nune ing buri namu ing parati tang mamaus Kaya at mikalugud king metung at metung. Parati tamung ilage king pusu’t kaisipan, na dintang Ya king busal tamu para kareng masakit, makasalanan, at alang akarapat king bie. Nya nung metung tamu karetang taung maging sangkan ning pamibating ning metung kareng tupa (tau) maging kalaban na katamu ning kaburyan ning Ginu tang Jesus. Amen.
IV. Pamigunam
King pinandit, buri na ning Ginung Jesus ing suryan tang pasibayu ing relasyun ta Kaya. Kutnan ta ing sarili tamu, ot aku pa ing inaus at pinili ning Ginu? Ot panintunan na kupa, neng malili ku? E wari tau kung masalanan, tau kung mapanusga at tau kung alang pakyalam kareng aliwa? “ Mangutang ku keka ngeni Ginu, ot aku pin kaya ing inaus mu at pinili? Balu ku e ku man karapat-dapat panintunan, uling palpikasala ku. Maralas ing e daka man adidinan oras para paksabyan, mas maralas pa pin ing cellphone ya ing sikasu ku ban maus at mag txt kareng kakaluguran ku. Akakalingwan ku ing ala namang bayad o low bat neng mamaus Keka. E ku sikasu ing lugud at pakamal mu kanaku. E ku sikasu na ika ing Mayap kung Pastul na parating manantabe king pamaglakbe ku king yatung iti. Amen.
V. Pamanahimik
VI. Tauling Panalangin
Ginung Jesus dakal pung salamat king lugud at parati yung pamanintun kekami neng malili kami. Dakal ing bage na dapat ming ipagpasalamat Keka. Nya oyni mu pu ing apakibat mi Keka. “Ginu e kami man karapat-dapat tanggap Keka, dapot igkas miya ing amanu mu at kumayap na kami. Amen.
VII. Kutang 1. Aranasan muna ing melili o mebating king kawan? Nanu ing meging sangkan? 2. Nanu ing mengapalyari nyang ala ka king kawan ning Ginung Jesus? 3. Makananu at nanu ing meging sangkan ning pamagbalik mu king kawan ning Ginu?
iyang gagamitan da reng Basic Ecclesial Community (BEC) cells potang mikit-ikit la balang Dominggu. Iya ing gagawan dang guiya ban lalu deng aintindian ing Amanu na ning Ginu at lalu lang miyabe-abe at mabibie king lugud king balang metung.
*images were taken from servicioskoinonia.org
