Dominggu ning Pamagbaba ning Espiritu Santo

Pepakit Ya I Jesus karing Alagad Na

I. Pamuklat a Panalangin

Ibpa, dakal pung salamat king pangasubli ng mie ning kekayung anak, pauli na niti mika bie kami namin king alang- angga. Salamat mu naman pu king pamamie na king Banal a Espiritu, na yang bibie kekaming lakas lub para labanan deng tuksu at takut ning bie mi. Lagi na ke pu sanang taryan at pamasalan ning kekayung alang kupas a lugud. Amen.

II. Pamamasa

Juan 20: 19-23

19Kanitang bengi na ning aldo mu ring ita, mitipun la ding alagad. Pakasara la ding pasbul king lugal nung nu la makatipun uli na ning takut da karing Judio. Dinatang ya I Jesus at tinalakad ya libutad da. Ngana karela, “Kapayapan keko ngan.” 20 Pangasabi na niti, pepakit na la karela ding gamat na at ing katalindikan na. Mesaya la ding alagad panakit da king Ginu. 21 Pasibayu nang sinabing Jesus karela, “Kapayapan keko ngan. Nung makananu na kung tinubud ning Ibpa, makanyan da kayu namang tutubud.” 22 Pangasabi na niti, pengisnawanan na la at sinabi na, “Tanggapan ye ing Banal a Espiritu. 23Nung patawaran yu la ding kasalanan na ning ninuman, mipatawaran la; ing e yu patawaran e ya mipatawaran.”

III. Turu

King mumuna nang libru ning Bibliya, king Genesis pepakit na ning Ginu nung makananu ya panga espesyal ing tau pangalalang. Kareng lelangan na sinabi namu mika atin sala, at mika atin sala. Oneng ing tau inubug ne ibat king alikabuk at kaybat pengisnawanan ne arung king pangisnawa ning bie, at mika bie ya ing tau (Genesis 2: 7). Paniwalan tamu na ing pangisnawa na ning Dios ya ing Banal a Espiritu at yang mamie bie at pag-asa. Ing pangisnawa e ya keng tau: sisibul ya ini keng baga ning tau uling pengisnawanan nya mu ning Dios. Ing pangisnawang atyu keng tau, ing bie ning tau, bandi ne ning Dios at ya mu bukud ing maka ibie at makabawi kaniti.Ing ebanghelyu tamu ngening Domingo, papakit na ing meging karanasan dareng alagad king pangasubling mebie ning Ginu tang Jesu Cristo. Sasalikut la keng metung a kwartu, pauli ning takut da kareng Judio.Uling lulub king kaispan da na ila dakpan da la naman. Kabud dintang ya ing Ginu king kalibutnan da dyang pakasara la ding pasbul at dininan nong kapayapan. Pepakit no reng gamat na at katalindikingan. Makatiman yang makalawe mo wari kareng kayang alagad at sasabyan karela na myari na ing sablang lungkut, myari na ing takut, at oyni ako, mabieng pasibayu. Keta muring oras ayta mesaya lang e mu nanu deng alagad. Oneng ing saya da ating kabalisan at kapikakunwan, uling ikit deng meparusa, memusan krus, mete at mikutkut ing Ginung Jesus at kaybat oyni atyu king arapan da. Ing ebanghelyu papakit na naman ing karanasan da reng alagad king

pamipatubud na karela ning Ginu. Uling balu na ning Ginu na reng kayang alagad mayna at tatakut la, na e da agyu nung ala lang kasaup, na e da agyu nung ala yu karela ing Banal a Espiritu. Kalupa na wari king Genesis nyang ing tau alikabuk ya pamu, ala yang arapat, uling ala yang pangisnawa o bie. Makanini la naman deng alagad nyang tinggap da ne ing pangisnawa o ing Banal a Espiritu kanita la pa mipamasalan at mika sikanan lub. At pauli ning Banal a Espiritung atyu karela midinan lang upayang mamatawad kasalanan kareng tau.
Oyni ing karanasan da reng mumuna nang alagad ning Ginung Jesus, ikit da reng adwa dang mata na ing karelang maestro mete ya, mikutkut at king katlung aldo sinubli yang mebie. At uli na niti adyang nanu pang kapanyiran ing gewa da reng e maniwala kang Jesus at dyang nanu pang kapagsubukan a denasan da, dyang ing bie da pa ing kapalit, e menibayu ing sasabyan da, na ing Ginung Jesus, sinubli yang mebie. Amen.

IV. Pamigunam

Pigunaman ta ya ngeni ing karanasan da reng mumuna ng alagad ning Ginung Jesu Cristo. Kalupa da, madalas itamu bisa tana mu namang magkulung king kekatamung sariling pibale-bale. E tana bisang makipag kwentu o makisalamua kareng aliwang tau. Madalas tatakut tanang mipakarine tatakut ta nang magkamali pang pasibayu at e tana bisang mayatu o miusgan da reng aliwang tau.Oneng ngeni kaluguran a kapatad, sasabyan na kekatamu ning Ginu tang Jesu Cristo, eko tatakut, akung bala kekayu. Maus ko parati kanaku at bie ke kekayu ing Banal a Espiritu, atya ing sumaup king egana-gana yung takut king bie.

At potang ing Banal a Espiritu atyu ne kekatamu, buri na ning Ginung Jesus na lumwal tamu kareng kwartu o takut ning bie. Uling manibat king kamumulan, ing buri ning Dios ing maging masaya at malaya tamung miabe-abeng lelangan na. Amen.

V. Pamanahimik

VI. Tauling Panalangin

Ibpa, maralas ke pung atin takut king bie. Ngeni pu sanang kaorasan ibie ye pu ing kekong Banal a Espiritu ban ke pung mikasikanan magsakripisyu kareng kekaming misyun ning bie. Turuanan yu ke pung parating pasaup king kekayung Banal a Espiritu. Amen.

VII. Kutang

1. Nanu la mo reng kasalukuyang pitatakutan ta king bie?

Download here:

Page 1: http://www.mediafire.com/file/nyhjiblgyrm/05.31.09%20pg.%201.doc
Page 2: http://www.mediafire.com/file/zjmlmjmdayz/05.31.09%20pg.%202.doc

Solemnidad ning Pamaitas na Banuang Jesus

Ing Pamaitas na Banuang Jesus

I. Pamuklat a Panalangin

Ibpa, king kaorasan, king lagyu na ning kekong anak, I Jesus pasalamatan at pupurian da ko pu. Abalu mi pu ngeni na e kami magdili-dili kareng kekaming misyun king bie. Ala ya pung patugut sasaup at manantabe ing kekayung anak kekami. Uling buri na pung akayabe na kami king kayang alang kaparis a tula, ing akayabe daka kapilan pa man. Amen.

II. Pamamasa

Marcos 16:15-20

15 At sinabi nang Jesus karela, ”Munta kayu king mabilug a yatu at pangaral ye ing Mayap a Balita karing sablang tau. m 16 Miligtas ya ing ninumang maniwala at pabinyag; oneng miparusan ya ing ninumang e maniwala. 17 Karetang maniwala, mayakit la deting mayupayang tanda: king lagyu ku makapalual lang demonyu; makapaniabi lang aliwang amanu; 18 ­­ e la numanu balang agyang talnan da la ring ubingan o makainum lang lasun; itumpak da la ring gamat da karing masakit at deti kumayap la.” 19 Kaybat nang migsalita karela, mitas ya banua ing Guinung Jesus, at linukluk ya king banda nang wanan ning Dios. 20 Meko la ding alagad at menaral la karing sablang lugal. Seupan na la ning Ginu king obrang iti at pepatunayan na ing panaral da king kapamilatan na ning binie nang upaya karela, ing upayang makagawang milagru. Amen.

III. Turu

Metung kareng masayang okasyun kekatamu yapin ing “graduation day” o pamagyari dareng anak tamu keng karelang pamag-aral. Balu tamu bayu ya mag-graduate ing metung a tau dumalan ya pang marakal a kapagsubukan, dakal pa mung pamag-aral ban akwa ne ing diploma. Deng aliwa naman potang aranasan at alampasan na na ing kasakitan o problema, sabyan na kanita graduate na ku ken.

Nen namang aldo na mismu ning graduation, daramdaman tamu na e ya kabud pamagyari nune pamag-umpisa ya king mas lalung maragul at mabayat a pamagsapalaran king bie. Uling bala tamu neng meyari ta nang elementari o kaya “high school” yapin nay ta. Ing e ta balu, mag-umpisa ta na naman king metung a bayung misyun na ning bie. Deng aliwa tutuluy dang anggang “college” kaybat magobra at kaybat makyasawa. Deng aliwa naman kayari dang high school, magobra na la at makyasawa. Potang mika- anak na la, panibayung misyun na naman king bie. Potang mika apu na la, panibayung misyun na naman kanita king bie.

Ing ebanghelyu tamu ngening domingu, alus kawangis ne ning metung a graduation. Na e mu pamagyari nune pamag-umpisa king bayung misyun ning bie. Ing Ginung Jesus, anti mo waring mag graduate ya, sampa ne keng “stage” o entabladu ban tanggapan ing kayang diploma. Ing diploma na ning lugud at kapamintuan na king Ibpa. Ngeni, potang tatanggapan ne ing diploma, kanita na ngan aganaka ing delanan ng problema at deng akayabe na nyang memagkasakit ya. Kaybat neng tinggap ing kayang diploma, ilukluk ne ning Ibpa king kayang dane wanan, I Jesus, ban neng dinan mayap a oras at ipakilala kareng anggang migsipatagun. Kanita na murin sabyan ning Ibpa keng kayang anak, “mission accomplished and congratulations.”

Oneng asabi tapin, na ing graduation, e ya pamagyari nune pamag-umpisa ya keng bayung misyun na ning bie. Ing Ginung Jesus, agya pang tinggap na na ing kapurian ning Ibpa, ngeni mag-umpisa ne na naman king mas maragul, mas masakit at mas mabayat a misyun. Ing misyun a pamanyaup at pamanantabe na kareng kayang tutuburan a apostoles king mabilug a yatu. Tutubud na la, ban ninumang maniwala at pabinyag miligtas la; dapot ninu mang e maniwala miparusan la. Karetang maniwala mayakit karela, ing pamibayung bie, kaligtasan at sikanang maka pagserbisyu kareng kaparang tau. Amen.

IV. Pamigunam

Ing Ginung Jesus king kaorasan, anyaran na kekatamu na sana ing e ta maging kampanti namu king bie. Na nung atin tanang masanting at mayap a agawa, e ta sana tutuknang. Buri na nung atin tang talentu at pibandyan idake tala reti, lalu na karetang milele at malalakwan king bie. Buri na naman ing idake tamu ing panaun o oras tamu kareng milalako na pag-asa king bie. Kalupa na ning Ginung Jesus sumaup at mantabe tamu kareng misyun da reng kapara tang tau.

Maging kawangis taya ing Ginung Jesus potang e tamu tutuknang gagawang mayap at dadake tamu ing sarili tamu king misyun da reng aliwa. Bista man ing Ginu atyu ne keng kapurian na ning Ibpa, e na ka tamu kakalingwan. Anya ala yang patugut sasaup at manantabe keka tamu, uling buri na akayabe na katamu king kayang dadanasan a ligaya. Ing tune at alang kaparis a ligayang kayabe ya ing Ibpa, ing Anak at ing Banal a Espiritu. Amen.

V. Pamanahimik

VI. Tauling Panalangin

Ibpa, dinan yu kami naman pung sikanan makasaup at makapanantabe kareng kapatad ming mangailangan. Lalu na karetang kapatad ming neng kayi bisa ng tuknang gawang mayap. Detang taung milalako na pag-asa king bie.Pabustan yu pung a dake miya naman ing mayap a balita, ing mayap a balitang e naka mi kalingwan kapilan man ning kekayung anak. Amen.

VII. Kutang

1. Nanu la mo reng miyayaliwa mung misyun king bie? Ot gagawan mo reti?
2. Kapilan ka mika karanasan na bisa na kang tuknang king kekang mayap a gagawan?

Download here:

Page 1: http://www.mediafire.com/file/yyne0imlmzm/05.24.09%20pg.%201.doc
Page 2: http://www.mediafire.com/file/imznfn1vod3/05.24.09%20pg.%202.doc

Kanam a Dominggu ning Pamaniubling Mie

Mikakalugud Kayu Anti ing Pamaglugud ku Kekayu

I. Pamuklat a Panalangin

Ibpa, dakal a salamat pu king mayap yung balita kekami ngeni, na nung makananu yeng liguran ing kekayung Anak, I Jesus, makanyan na kami namang liguran. Pepakit yu naman pung masala, na nung manatili kaming mamintu karing utus na, manatili kami naman king lugud na. Amen.

II. Pamamasa

Juan 15:9-17

9Nung makananu na kung liguran ning Ibpa, makanyan da kayu namang liguran. Manatili kayu king lugud ku. 10Nung tuparan yu la ding utus ku, manatili kayu king lugud ku, antimo nung makananu kung tutupad karing utus nang Ibpa ku at manatili ku king lugud na. 11“Sinabi ku la kekayu deting bage ban manatili kekayu ing tula ku at miganap ing tula yu. 12Iti ya ing utus ku: mikakalugud kayu anti ing pamaglugud ku kekayu. 13Ala nang lulugud a maygit pa kesa ketang ibie na ning metung a tau ing bie na para king kaluguran na. 14Kakaluguran da kayu, nung tuparan yu la ding utus ku. 15E da na kayu ausan ipus, uling e na balu ning ipus ing daraptan na ning panginuan na. Inya inaus da kayung kakaluguran uling pepabalu ku kekayu ing sablang dimdam ku kang Ibpa ku. 16E yuku pinili, nune aku ing memili at tinuldu kekayu ban lumual kayu at mamunga karing bungang manatili. King uli na niti, nanumang aduan yu king Ibpa king lagyu ku, ibie na kekayu. 17Iti ya ing yuyutus ku kekayu: mikakalugud kayu.

III. Turu

Ating tatang na e na augalyan ing manyabing “I love you” keng kayang asawa at kareng kayang anak, pero akit me na sasaup yang mamipi at maglinis king bale. Neng kayi akit me neng ala yang obra, paglutu no pa reng anak na. Iti ya ing paralan na nung makananu ng sabyan at pakit nung makananu no talagang kaluguran deng kayang pamilya. Kulang ya amanu, pero dakal neman king pamidapat-dapat.

Atin namang taung kapamilatan na ning “Physical Touch” o ila pin reng pamangaul, pamanapik, at pamangilik ka reng taung atyu king paligid na. Kanini no apapakit ing malasakit at lugud na kareng aliwang tau. Atin kasing taung potang tepikan me balikat, mididinan yang pag-asa. Atin namang potang kinaul me, panandaman na ing importanti ya. Ot mo potang kinilik me ing metung a anak a kikyak, tuknang yang kiyak. Atin ping metung a nars king ospital a makadistinu kareng bayung panganak. Neng lulub ya neng alas sais ning abak, agad neng tampan buldit ing paboritu na kareng anak. Oneng misan a aldo mitawli ya ing nars king pamaglub at disnan ne ing anak kikyak at ing anak panampan ne ing sarili ng buldit.

Ing ebanghelyu tamu ngening dominggu, payabut na nung makananu neng liguran ning Ibpa ing kayang anak, I Jesus, makanyan na katamu mu namang kaluguran ning Ginung Jesus. Nung ing Ibpa lugud ya at ing anak lugud ya, dapat mu na mikakalugud tamu mu naman. E wari manibat pa king kamumulan lelangan na katamung kawangis na? At potang mikakalugud tamu, karin ma akit, na atyu ya busal tamu ing Dios. Uling ing Dios manatili yamu karing taung mipapagkasya, mikakasundu at mikakalugud. Uli na niti, nanumang aduan tamu king Ibpa, kapamilatan ning lagyu ng Jesus, mipagkalub iti. Pauli na nini manatli at miganap ing tula tamu mangga man king alang angga. Amen.

IV. Pamigunam

Kaluguran a kapatad, ikit tamung masala ing lugud na kekatamu ning Ginung Jesus. Atin ping kasabyan na “Emu apamye ing ala keka” tutu ya pung tutu ini. Mamie ka waring metung a gamit na ala na kaman kaniti. Mamie ka waring lugud, nung e na kaman biyasang lugud? Ing Ginung Jesus pablasang menibat ya king Ibpang malugud, nya malugud ya naman kekatamu.

Nya ing panagkat na ning Ginu kekatamu, ing sana nung ing Tatang tamung atyu banwa lugud ya at makanyan mu rin ing kayang anak. Sana mamuli ta Kaya at king kayang anak, I Jesus. Sana itamung tau, mikakalugud tamu naman.

At potang mikakalugud tamu, at mamintu kareng kayang kautusan. Sasabyan na kekatamu ngeni na tutu ping memuli ta kaya at siguradu at garantisadu na nanumang adwan tamu king Ibpa king kagyu na, ibie na kekatamu.

Nya mag-umpisa ngeni, sabyan tamu kareng akakatagmu ta king bie, ing kaluguran tala at importanti la king bie tamu. At nung marine tang sabyan iti, isundu ta sana ing gagawan tang pamanyuyu o serbisyu karela. Kareng anak, uman tala at kaulan deng kekatamung pengari abang mabye la pa, uling potang ala no keti, e ta na agawa iti. Makanyan mu rin, e ta sana kakalingwan ing pamangaul, pamangilik at pamanapik kareng aliwang tau, ban lang mika pag-asa king bie. Kaniti mu na akit na ing Dios tutu ping lugud ya. Amen.

V.Pamanahimik

VI Tauling Panalangin

Ibpa, turuanan yu ke pung maging mamuli king kekayung anak, I Jesus, maganaka at mapamintu kareng kekayung kautusan. Dinan mu kaming espiritu ning kekang lugud ban kanita pu mika sikanan kaming makapamie lugud kareng kapara ming tau. Amen.

VII. Kutang

1. Makananu mung apapakit ing kekang lugud kareng aliwang tau?
2. Ika naman, nanu ing buri mung gawan da reng kaluguran mu king bie, para apapakit da keka ing lugud da? Wish mu lang!

Download here:

Page 1: http://www.mediafire.com/file/mzzwed0z2fz/05.17.09%20pg.%201.doc
Page 2: http://www.mediafire.com/file/ityiygmnznm/05.17.09%20pg.%202.doc

Kalimang Dominggu ning Pamaniubling Mie

I Jesus, Ing tune tanaman a Ubas

I. Pamuklat a Panalangin

Ibpa, buri mi pung manatili keng sanga ning tanaman a ubas, buri mi pung manatili king kekong anak, I Jesus. Uling balu mi pu, nung eke manatili kaya, e kami pu mamungang kayapan ampong lugud at ala ke pung arapat nanu man. Amen.

II. Pamamasa

Juan 15:1-8

¹ “Aku ing tune tanaman a ubas at ing Ibpa ku ya ing mananaman. ² Pupututan ne ing balang sanga kung e mamunga at lilinisan ne ing balang sangang mamunga ban lalu ya pang mamunga. ³ Malinis na kayu ngeni uli na ning amanung sinabi ku kekayu. 4 Manatili kayu kanaku at manatili ku kekayu. Eya makapamunga ing metung a sanga king sarili na; makapamunga ya mu nung manatili yang makataid king tanaman a ubas. E kayu makapamunga nung e kayu manatili kanaku, antimo ing sanga eya makapamunga nung e makataid king tanaman a ubas. 5 ”Aku ing tanaman a ubas, ikayu ding sanga. Ing manatili kanaku at aku keya, mamunga yang dakal; uling ala kayung arapat nanuman, nung makakawani kayu kanaku. 6 Mangari ya ing e manatili kanaku king metung a sangang miyugse at langi ya. Titipunan la ding anti kareting sanga at iyugse king api at maduluk la. 7 Nung manatili kayu kanaku at ding amanu ku manatili la kekayu, aduan yu itang nanumang buri yu at miyabie kekayu. 8 Mipaligayan ya ing Ibpa ku, nung mamunga kayung dakal at king makanyan a paralan maging alagad da kayu.


III. Turu

Atin metung a pari a menagkat atlung aldo ampong atlung benging retrit kareng kayang manungkulan keng pisamban. At iti maganap ya king marayung lugar at kaylangan lang sumaup king gastus king alagang limang dalan a pesus para saken. Ken naman kanung pamangan ampong tuknangan, ing pari mantun yang taung makasaup. Dakal kareng manungkulan ing mibulungbulungan. Sasabyan da keng bawat metung ing nukarin la kumang limang dalan a pesus, makananu la reng lakwan dang pamilya at makananu kanu ing kapanintunan da. Sinabi ning pari na kaylangan ya talaga ining retrit ayni at nung ala la talagang pamayad, lumawe nya kanung isponsor para karela.

Miras ing aldo ning pamaglako, alus deng anggang manungkulan tinuki la at sinapak la reng adwang bus. Kabang magbiyahi, mipagkwentu la king bus. Sasabyan da na ngeni la pa kanu mig retrit king marayung lugar at ngeni do pa kanu likwan malwat deng pamilya da.

Keng retrit, pipagkwentuan da ing tungkul king sari-sarili dang bie at nung makananu la mipapananggap king bawat metung. Anti mu rin nung nanu ya kabaldugan ing komunidad karela. Pigunaman da naman ing planu ning Ginu king kaligtasan na ning tau at nung nanu ing dapat dang pakibat at gawan kaniti.

Nyang pauli, alus makasake na la ngan kareng bus. Apansinan da, ala yu pa ing pari ra. At asabi na ning metung kareng kayabe dang mig retreat na e de buring palakwan ning mamahala uling atin pang problema king bayad king lugar. Nyang abalu da iti, mipaglalawe la, at memamagut lang pera at pintalan de ing pari ra at binye do reng kontribusyon da.

Ing ebanghelyu ngening dumingu sasabyan na ning Ginung Jesus na iya ing tanaman a ubas, itamu ring sanga at ing Ibpa ya ing mananaman. Payabut na kekatamu, na retang sangang e manatili kaya at e mamunga miyugse la, langi at maduluk la. Oyni ring taung mabibie mu para king sarili da at ala lang pakialam kareng taung pakakalulung malelele at malalakwan king bie.

Deta namang sangang manatili kaya kakaltasan nala ban lalu la pang mamunga. Oreni ring taung ating kapagnasang mamungang lugud at kayapan. Kalupa da wari retang mig retrit king marayung lugar, anyang mumuna kakaltasan no ning Ginu, kapamilatan da ring miyayaliwang sangkan obat ela makatuki. Oneng nyang menatili lang makataid at tapat king karelang kasalpantayanan, memungang mayap at lugud iti. Masalang meakit iti nyang abalu dang ating problema, kapamilatan namu ning lawe, mikakabalu na la, at memagkusa lang memunu king kakulangan. Amen.


IV. Pamigunam

Ing Ginung Jesus agkatan na kata parating manatili kaya. Nung manatili ta kaya antimong sanga king tanaman a ubas, balu tamu na ing mananaman (ing Ibpa) ene kapilan man paburen ing tanaman a ubas (I Jesus). Parati neng diligan iti king grasya at gambulan king pakalulu. Ing sanga kanita kuma yang sustansya king tanaman a ubas at mamunga ya iti. At deng bunga kanita (kasalpantayanan, lugud, at miyayaliwa pang bage mayap) makaibye lang lakas lub at pamag-asa kareng aliwang tau..

At potang ing mananaman (ing Ibpa) kakaltasan ne ing sanga (ing tau), ganakan tamung nya gagawan na iti ban lalu tang mamungang mayap at kumatmu king lugud at kasalpantayanan. Potang ing sanga parati yang makakaltas, sisyas ya iti, mas lalu nong adadala reng kayang bunga. At potang datang kanita ing malakas a bagyu o hangin agyu nong agyung kargan dening manyaman at masustansyang bunga ning tanaman a ubas. Amen.

V.Pamanahimik

VI Tauling Panalangin

Ibpa, dinan yu ke pung sikanan at grasya na manatili king kekong anak. Bisa ke pung mamungang lugud, kapayapan at kasalpantayanan. Turuanan yu kami mu naman pung maging matatag kareng kaltas ning bie. At pota sanang mamunga na kami, ing akit dasa ing lupa at lugud na ning kekong Anak, I Jesus, ing tanaman a ubas. Amen.

VII. Kutang

1. Nanu la mo deng meging karanasan mu ot bakit manatili ka king tanaman a ubas?
2. Nanu la ring meging bunga na ning pamanatili mu king tanaman a ubas?

Download here:

Page 1: http://www.mediafire.com/file/yjddaqg5nmm/05.10.09%20pg.%201.doc
Page 2: http://www.mediafire.com/file/ywnnmtdmjmm/05.10.09%20pg.%202.doc

Kapat a Dominggu ning Pamaniubling Mie

I Jesus Y ing Mayap a Pastul

I. Pamuklat a Panalangin

Ibpa, tune pin ing kaluguran at pakamalan mu kami. Balu mi na ngeni ing maragul mung sangkan ot bakit tinubud me kekami ing mayap a pastul, ing Ginung Jesus, ban tairan na ke pala at tipunan papunta keka. Dakal a dakal a salamat pu. Amen.

II. Pamamasa

Juan 10:11-18

11“Aku ing mayap a pastul. Makasadia yang mate ing mayap a pastul para karing tupa na. 12Ing upahan, potang akakit neng daratang ing asung-gubat, darayu ya at tatakas uling upahan ya mu at uling e na la bandi ding tupa. Inya sagmitan na la ning asung-gubat at isalbag ding tupa. 13Tatakas ya ing taung upahan uling upahan yamu at ala yang malasakit karing tupa. 14Aku ing mayap a pastul. Balu ku la ding kanaku at balu da ku ding kanaku, 15nung makananung ing Ibpa balu na ku at ing Ibpa balu ke. At babie ku ing kanakung bie para karing tupa. 16Atin kung aliwang tupa a ala pa keting kural. Kailangan ku la naming panimunan deti; at pakiramdaman da ing siwala ku. Maging metung nia mu ing kawan at metung ing pastul. 17Kaluguran na ku ning Ibpa uling makasadia kung bie ing kanakung bie ba keng tanggapan pasibayu. 18E ne akua ninuman kanaku iting bie, nune kusa keng babie iti. Atin kung upayang ibie at upayang kumang pasibayu kaniti. Iti ya ing utus na kakakung Ibpa ku.”


III. Turu

Ing gaindung ayup, kabukas lulukuban at e nala lalakwan deng sisi na. Madalumdum pa neng abak, lakwan no reng sisi na at sulagpo ne ban mantun pamangan para apapakan na la reng sisi na. Makanini na apakit ning gaindung ayup ing lugud na kareng kayang sisi. Bagkus e ne man matas a pami-isip at e ne man megaral king iskwela ining gaindung ayup ayni at oyni, atin yang kapasidad lugud.

Ing ebanghelyu tamu ngening domingu tungkul ya kang Jesus na sinabi, “Aku ing mayap a pastul.” Ing mayap a pastul a pakiwangis taya kareng pengaring e mu maranun migigising, nune disoras la pang matudtud ban manintun pagkabie kareng karelang kaluguran a anak. Ala lang sasayangan oras keng pamagobra, ban kanita akit dong atyu keng masanting a kabilyan deng karelang anak. Dening klasing pengaring a reti ila reng makasadya parating magsakripisyu para ibie ing pamangailangan da reng karelang anak.

Neng atin no man sakit o panandaman deng karelang anak, agad mong damdaman karela ing makanini, “Sana kaku na digpa ing sakit na ning anak ku, imbis na kaya.” Mas mumuna la pang manandaman deng pengari potang ati lu king masipit a kabilyan deng karelang anak. Kalupa na wari ning metung a kwentu. Atin kanung metung a ima na ating anak a lalaki, ing kayang anak melulung ya king “drugs”.

Pauli na ning bisyu na ning anak a lalaki, parati yang ala keng sarili na. Misan a aldo, ining anak a lalaki ala neng panyali keng bisyu na at dinan dya kanu deng pisasaliwan na nung paten at ibie ne ing pusu ng ima na karela. Nya misan a bengi, inyang e na na apibata ning anak a lalaki ing kayang bisyu, pete at kinwa ne ing pusu nang ima na, oneng keng pamamaligwa na, misakab ya ing anak a lalaki at atabili ne ing pusu at inyang damputan ne, bigla yang migsalita ing pusu at ngana, “Anak menasakit ka?’ Anti ya kaniti karagul a lugud ing pusu da reng pengari, mas buri da pang ilang manasakit kesa reng karelang anak.

Neng atin naming kulang kareng karelang anak, lalu na neng disoras na ning bengi, deng pengari e la mipaindatun. Magugulu la kaisipan at alang patna ing pamangadi da, na sana e la medisgrasya deng anak a ala pa king bale da. At deng pengari potang kumpletu no reng anak da, bayu la matudtud lawen da no naman. Kabang lalon do kanita reng pengari deng anak da, bendisyunan dala at sabyan da ini, “Ginu o reni reng anak kung pakamalan, lubus kung matutula karela.”

Ing ebanghelyu tamu ngeni, payabut na ing lugud at pakamal na kekatamu ning Ginung Jesus bilang mayap a pastul, makasadia ya parating midaun keng bie na para kareng kayang tupa at ding tupa itamu. At papakit na murin, na iya Dios yang manipun o manabe at e manyalbag o manabi. Buri nong tipunan detang tupa pang ala king kural. Ban kanita sabyan na naman Jesus, “Ibpa, o reni reng anak mung pakamalan, lubus at tutu kung matutula karela.” At kanita maging metung nya mu ing kawan at metung nya mi ing pastul. Amen.


IV. Pamigunam

Ing Ginung Jesus king kaorasan, anyaran na kekatamu na sana maging kawangis taya king amanu, pamanisip at pamidapat-dapat. Buri ng maging mayap tamu mu naming pastul kareng sari-sarili tang pamilya at pipagobran. Buri na namang maging tupa tang mapamintu king kaburyan na ning Ibpa, na makasadyang magsakripisyu para kareng aliwa. Buri na naman na maging instrumentu na katamu ning pamisasanmetung at pamikalugud.

At potang sasalbag da katamu reng asung-gubat, a amanuan na ning ebanghelyu, na ila pin ding kapagsubukan king bie tamu. Ganakan tamung agad, “nanu wari ing e na aibie ning Ibpa kekatamu, uling ing kayang anak, I Jesus, ing mayap a pastul binye ne kekatamu ban tairan na katamu king pamaglakbe, nanu pa mo ing e na a ibie kekatamu?” Amen.

V.Pamanahimik

VI Tauling Panalangin

Ibpa, turuanan yu ke pung maging mayap a pastul kareng kekeng pamilya at pipagobran. Turuanan yu kami naman pu sanang maging mayap a tupa, na biasang makiramdam king amanu na ning mayap a pastul, ban kanita Ginu, e kami pu malili king kekaming pamaglakbe papunta king kayarian ning Ibpang atyu banua. Amen.

VII. Kutang

1. Mamili kang atlung taung meging mayap a pastul keka, at bakit?
2. Nanu mo ing dapat mung gawan ban maging mayap at mapamintu kang tupa king mayap a pastul?

Download here:

Page 1: http://www.mediafire.com/file/d2zzm3oycdz/05.03.09%20pg.%201.doc

Page 2: http://www.mediafire.com/file/imirdyhmgzm/05.03.09%20pg.%202.doc