Kapat a Domingu ning Pamaniubling Mie ning Guinu

I Jesus Ya ing Mayap a Pastul

I. Pamuklat a Panalangin

Ibpa, dakal pung salamat king kaorasan at pitipun mu nake naman antimong metung a kawan. Ing pamaging Mayap a Pastul na ning Ginu ming Jesus Kristu kekami yang mamie lakas lub agya pang atyu kami kareng kapagsubukan ning bie. Aldo man o bengi balu ming kayabe miya ing kekang Anak, I Jesus. Amen.

II. Pamamasa

Jn 10:27-30

27“Makiramdam la king siwala ku ding kanakung tupa at akilala ku la at tutuki la kanaku. 28Dirinan ku lang bie alang angga at e la mipahamak kapilan man. Alang makasamsam kareti kanaku. 29Ing Ibpa ku a minie kareti kanaku maygit ya karing sabla at alang makasamsam kareti king gamat nang Ibpa ku. 30Aku at ing Ibpa metung kami mu.”

III. Turu

Atin metung a ima at ing kayang apat a banwang anak na magsadya na king karelang pagkeran ban nong matudtud. Anyang pitda no reng sulu ning ima apansinan ne ning anak ing masalang bulan na lulub ing aslag kareng awang.”Ima,” ana ning anak, ninu pu ing ginawa keng maragul a sulung yan? Ing Apung Ginu, anang mekibat ning ima. Mengutang yang pasibayu ing anak, ana “ima patdan nya naman ing sulung yan kaybat matudtud ya ing Apung Ginu? Mipatiman ya ing ima at kinaul neng maigpit ing kayang anak at ngana “E ya matudtud ing Apung Ginu, uling babanten na katamu kabang matudtud. Kaybat na nita biglang metahimik at ngana ning anak “E ku dapat mitatakutan neng bengi dyang madalumdum at adya pang matudtud ku, balu ku kasi babanten na ku ning Apung Ginu, At manibat kanitang abalu na ning anak na parati yang magbante ing Apung Ginu, adyang yang dili mu king kayang kwartu at adya pang alang sulu mipapatutud ya.


King ebanghelyu tamu ngeni makanini ing kayang tuturu. Sasabyan na kekatamu na dapat e ta mitatakutan agya pang atyu tana ketang e masalese kabilyan. E ta milalako pamanalig king Apung Ginu uling balu na ngan ing malilyari. Akakit no reng taung mayap ampo reng taung magnasang gawang marok kareng aliwa. Wa, metung karing katutuan na ing marok manyambut ya naman, oneng ing kayang pamanyambut e lalambat, sasaguli mu at e manatili. Oneng ing mayap, lalambat at manatili iti, uling manibat iting mayap king pinaka, pinaka, pinaka, mas mayap dili yapin ing Apung Ginu, I Jesus, ing Mayap a Pastul.

Kapilan man ana ning Mayap a Pastul, “ding kanakung tupa e la mipahamak at alang makasamsam kareti.” Kapilan man itamung tupa alang makasamsam at e ta mipahamak, uling balu tamu ing magpastul na manyese at magbante keka tamu parati yang atyu king busal tamu. E naka tamu lalako king kayang panimanman at potang ating daratang a sakuna kalupa daring mabangis a ayup, mumuna ya pamung makilaban, mumuna ya pang manasakit at parati yang makasadyang idaun na ing kegana-gana, ing panga Dios na at ing kayang sariling bie. Aliwa ya talaga ing keka tamung mayap a Pastul, uling ing sabla ng laman ning kayang kaisipan at pusu yapin ing pagsilbiyan at luguran na katamu. Parati yang mimisip nung makananu na katamung dinan masalese at manyaman a bie, sagana e mu king materyal a bage nune pati na ing ispiritwal a bage. Oyni, ing e na agyung gawan ning karalumduman (I Satanas) na bayu no isipan ding tupa ing sarili na pung kapakanan ing kayang yuyuna. Agyu nong lakwan, paburen deng tupa at neng kayi agyu no pang pisali ban yang makinabang. E na agyu ing magbante a itaya ing kayang sarili. Ala king bokabularyu na ing tune pamagsilbi at tune lugud karing kayang tupa. Marayu ya talaga king keka tamung mayap a pastul na agyang nanung oras at panaun parati yang atyu king busal tamu. Amen.

IV. Pamigunam

King kaorasan, kaluguran a kapatad kang Kristu, migunam tamu at mibule nung nanu ta klasing tupa. Makiramdam tamu king siwala ning keka tamung Mayap a Pastul? Tutuki ta kaya king kayang kaburyan, o ing kaburyan tamu yang masusunud at pota mung atyu tana king pilagrosung sitwasyoun karin taya ausan at pamintuan? Ing tune tupa, dapat yang makiramdam at tuki king tune mayap a pastul. Uling balu tamu, dakal ta daramdaman na ila kanu ing tutung mayap a pastul. Agyu dang agyu mu naman nung nanu ing sasabyan ning tune mayap a pastul dapot ing pamialiwa damu e da agawa ing gewa at gagawan na pa ning tune mayap a pastul, I Jesus.

Ing tune tupa dapat yang mabibieng kayabe daring kalupa ng tupa king kawan. Itamu kaya, tutu ta kayang makiagum o mabibieng kayabe ning metung a grupung Kristyanu na parating makiramdam king Apung Ginu? Dadake ke ba ing sarili kung kagiywan king kawan? Pagmalasakitan ko ba ring kalupa kung tupa king keka ming pamaglakbe? O, mas panwalan kuna ing kanya-kanya namu king sarili da. Oyni ing maralas tang pamiisip at pauli na niti e ta man karapat-dapat mangurus o maus king Ibpa, anak a Banal a Espiritu. Uling ing Ibpa, anak at Banal a Espiritu, atlu lang masasabi pero metung lamu, metung lamu kapagnasan ing midinan tang tune bie, ing bie alang angga. Amen.

V.Pamanahimik

VI Tauling Panalangin

Ginu ming Mayap a Pastul panwalan mi pu na emu kami paburen. Panwalan mila pu reng amanu yu, panwalan mi pu na parati kang makaantabe at makalawe kekami agyang nanung oras at panaun. Panwalan mi pu ing makasulat king Dalit 4:8 “Payapa kung magkera at agad-agad mipatudtud ku uling ika mung bukud O Ginu, ing makapanatag king lub ku.” Ika ing kanakung Mayap a Pastul. Amen

VII. Kutang

1.Nanu la reng amanu na ning Mayap a Pastul na e mu akakalingwan at parati mung babyayan?
2.Keng palage mu, nanu ing buri ng sabyan Jesus na “ Kapilan man e dala asamsam kanaku ring kanakung tupa?
3.Nanu mo ing asaup tamu king keka tamung sariling komunidad, lalu na ning panaun na mamili tamung maging lider na ning keka tamung komunidad?

Download here:

Page 1: http://www.mediafire.com/file/zhhnbmynijn/04.25.10%20%20pg.%201.doc

Page 2: http://www.mediafire.com/file/yhm3li5zzlz/04.25.10%20pg.%202.doc

Katlung Dominggo ning Pamaniubling Mie ning Ginu

Pepakit ya I Jesus karing Pitung Alagad

I. Pamuklat a Panalangin

Ibpa, ing kapanyamban, kapuryan at kapasalamatan king binye yu na namang grasya king pamitipun mi pu king arapan yu. Panwalan mi pu na ing kekayung Anak, I Jesus sinubli yang mebie ban dinan na kaming pamag-asa na misan a aldo akwa ming maniwala kaya, mitipun kaming magsaya at magpuri king banwa. Ngeni pung pagmasusyan miya ing katlu nang Dominggu ning pamanyubling mebie ning kekang anak, apakikwanan mi pu sanang ikami man subli kami naman mie king mayap a pamibie-bie. Amen.

II. Pamamasa

Juan 21:1-14

Kaybat na nita, pasibayu yang pepakit I Jesus karing alagad na king pampang na ning Dagat-dagatan ning Tiberias. Pepakit ya king anti kaniting paralan. Miyabe-abe la di Simon Pedro, Tomas (ing mayayaus kambal), Nathaniel a tau Cana, Galilea, ding anak ng Zebedeo, at ding adua pa karing alagad nang Jesus. “Manasan ku,” nganang sinabing Simon Pedro karela. “Tuki kami keka,” ngara naman kang Simon Pedro. Meko la at sinake king bangka. Oneng ala lang arakap nanumang asan king kabukas a ita. Inyang saslag ne ing aldo, atyu I Jesus king pampang; oneng e re akilala ding alagad king ya I Jesus. Ngana karela, “Anak, atin kayung ikua?” “Ala,” ngarang mekibat. Sinabi na karela, “Ibaldug ye ing lambat king dane nang wanan ning bangka at manikua kayu,” Bildug de ing lambat at e re agyung isaka uli na ning keraklan sa ring asan. Ngana ning alagad a pakamalan nang Jesus kang Pedro, “Ya ing Ginu!” Panandaman ng Simon Pedro king ya pala ing Ginu, sinulud na ing imalan na (uling lubas ya) at linuksu ya king danum. Oneng sinadsad lang makabangka king pampang ding aliwang alagad at guguyud de ing lambat a mitmung asan. E la masiadung malaut king pampang: manga dinalan a yarda mu ing dayu ra. Kasaka da king pampang menakit lang uling a mibabaya at asan a makaderang ampon tinape. Nganang Jesus karela, “Magdala kayung mapilan keni karing asan a arakap yu.” Inya sinake ya king bangka I Simon Pedro at ginuyud ne papunta king pampang ing lambat a mitmung mangaragul a asan; dinalan la at limang pulu’t atlu eganagana. E ya mesira ing lambat agyang marakal la. Nganang Jesus karela, “Me kayu keni at mag almusal kayu.” Oneng ala metung man karela ing mengangas kinutang nung ninu ya uling balu ra king ya ing Ginu. Linapit ya I Jesus at kinua ne ing tinape at binie ne karela at antimurin ding asan. Iti ya ing katlung pamipakit ng Jesus karing alagad kaybat nang sinubling mebie.

III. Turu

I Jean Paul Sarte (1905-1980), metung a pilosopu na parating kukutya king kasalpantayanang Kristiyano. Parati ng sasabyan na ing bie na ning tau alang kabaldugan at e tutu ing pamag-asa da reng Kristiyano na atin sumangid kaybat na ning bie ayti. Matapang ng patutwanan na alang Apung Ginu at e sinubling mebie I Jesus. Paulit-ulit ng sasabyan king sarili na at kareng tau, na matsura, makasalanan at ala ya talagang pag-asa ing yatu.

Ing bie nang Sarte meging tune malungkut at niyang mibibina ne pauli ning sakit, asabi na king sarili na “Balu kung mate kung ating pag-asa, pero kaylangan ing pamag-asa kung iti atin yang pundasyun o panibatan.” Pangalabas na ning metung a bulan I Sarte mete ya. Ing kutang, apakikwanan ne kayang akilala o ikwang Sarte ing amanuan ng pundasyun ning kayang pamag-asa?

Ing ebanghelyu ngeni tungkul ya king katlung pamipakit ng Jesus karing alagad kaybat nang sinubling mebie. I Simon Pedro at ding kayang kalupang alagad apikayaryan dang manasan, king kabukas dang pamanasan ala lang ikwa dyang metung mu man. Inyang saslag ne ing aldo, atsu ya ing Ginung Jesus king pampang, oneng e de agad akilala deng alagad, ana karela “Anak, atin kayung ika?” Mekibat la reng alagad na ala lang ikwa at sinabi na karelang Jesus na “Ibaldug de ing lambat king dane ng wanan ning bangka at manikwa la.” At keta muring pinandit ayta menikwa lang mangaragul at dakal a asan. At keta mu ring oras ayta, akilala neng Pedro at asabi na karing kayabe na “Iya ing Ginu!”

Tuturu na ngeni kekatamu ning ebanghelyo na ating parating pamag-asa nung biyasa tang parating makiramdam at mamintu karing amanu ning Ginu. Nyang sinabi na karela na ibaldug ye ing lambat king dane wanan ning bangka, at menikwa lang asan mekiramdam at memintu la. E ta ikit at dimdam kareng alagad ing pamagreklamu bista man e re akilala agad ing Ginu, antimo pwedi dang sabyan ing kabukas nalang manasan, pero ala nomang ikwa dyang metung mu man. Pwedi la naman mangutang ot king dane wanan pamu ning bangka ot e king kayli o king arap. King sobra dang pagal at puyat pwedi la namang mangutang pabalang kang Jesus nung ninu ya para iutus na la. Ala tang dimdam amanu karing alagad, nune mas dininan dang pansin ing pamakiramdam at pamamintu king metung a taung e dane man kayabe king bangka kabukas. Mekiramdam at binye da ing tiwala da king metung a kalpinteru ne e naman ekspertu king pamanasan. King karelang pamakiramdam keng amanu mika pag-asa la at king pamamintu da memunga iting grasya. Amen.

IV. Pamigunam
Ngening pagmasusyan taya ing katlu nang dominggu ning pamayubling mebie ning Ginu tang Jesus Kristu pakikwanan tamung suryan ing kekatamung pamibie-bie. Atin ya bang maragul a bage king bie tamu ing pangasubling mie ning Ginu? O, metung yamu iting bage na angga ya king utak at ala ne man king pamidapat-dapat? Ikit tamu na e sapat ing pamakiramdam o pamaniwala king Ginung sinubling mebie kailangan talaga ing biyayan taya mismu king bie tamu. Itamung talasunud na o disipulu na ing kailangan ing e ta milalako pamag-asa at parating ikabit king pusu’t kaisipan tamu na kailangan ing gumusal para king pamagtatag ning kayaryan ning Ibpang atyu banua.

Anyaran tamu king Ginung Jesu Kristo na parati na katamung turuanan mapamakiramdam, na parating isipan na ing sangkan ot bakit gewa na lang adwa deng balugbug tamu ban kanita pakiramdaman taya ing bandang wanan at kayli at ing sangkan na gewa nya mung metung ing asbuk tamu ban mas marakal ing pamakiramdam kesa king pamag-salita. Uling ing taung mapakiramdam king amanu na ning Ginu ilang pamag-asa na at iti manibatan la king pamaniwala na ing kutkutan ala neng laman at sinubli neng mebie ing Kristo (1 Cor 15). Uling karing sablang amanu na ning Apung Ginu magdalang pag-asa at kapayapan; balu tamu na parati yang atyu king busal tamu. Ing importanti ing ilako tana sana ing pamag-alinlangan Kaya.

Anyaran tamu parati ing grasya ning Ginu na parati ta sanang makasadyang mamintu karing kayang kaburyan. Uling ikit tang masala king ebanghelyu na nyang memintu la kang Jesus memunga iting grasya. Kalupa ng Pedro inyang tinggap na ing grasya ning kapamintuan akilala neng agad ing Ginu tang Jesu Kristo at ketamuring oras ayta sinulud ne ing imalan na uling lubas ya tanda na ing pamagbalik na ning kayang dignidad at linundag ya pa king danum papunta king ginung sinubling mebie. Amen.

V. Pamanahimik

VI Tauling Panalangin
Malugud a Ginu mi, dakal pung dakal a salamat king oras a pigkalub mu kekami. Bista man pung maralas mangalingwan kami kareng kekang amanu parati yu ke pung antabayanan at luluguran. Dinan yu ke pu sanang parating adwang balugbug na parating makiramdam kareng kekang amanu ban kanita e milako ing kekaming pamag-asa. Parati yu kepung sopan ning Banal yung Espiritu ban e kami mu kabud makiramdam nune ban gumusal ing dimdam mi keka. Dinan mu kaming sikanan na maging inspirasyun da kami ding aliwa at akit da na tune pin sinubli kang mebie. Amen, Alleluia, Alleluia.

VII. Kutang

1. Atin tamu kayang karanasan keng bie na penandaman tamu na milalako ta pag-asa?
2. Ninu mo reng taung akakit mu lamu, panandaman me ing Ginu na atyu kaya o karela na magdalang pamag-asa?
3. Paniwalan tamu nung ing metung a Kristiyano kabud ya makiramdam king amanu ning Apung Ginu pero ala ne mang gagawan mayap king kayang dimdam alang kwenta ing kayang pamakiramdam? Ibye ing sariling upinyun.

Download here:

Page 1: http://www.mediafire.com/file/unyimtyqy0z/04.18.10 pg. 1.doc

Page 2: http://www.mediafire.com/file/nwqyruz1uq4/04.18.10 pg. 2.doc

Kadwang Domingo ning Pamaniubling Mie ning Ginu

Pepakit ya I Jesus karing Alagad na

I. Pamuklat a Panalangin

Ibpa, ing pung kapuryan at kapasalamatan keka king binye yung oras ban akayabe daka at ding keka ming kapatad at kakaluguran. Antabayanan yu kami pu ning Banal yung Espiritu ban la pung maging malino ring amanu ning keka yung anak. Dakal pung dakal a salamat. Amen.

II. Pamamasa

Juan 20: 19-31

Kanitang bengi na ning aldo mu ring ita, mitipun la ding alagad. Pakasara la ding pasbul king lugal nun gnu la makatipun uli na ning takut da karing Judio. Dinatang ya i Jesus at tinalakad ya libutad da. Ngana karela, “Kapayapan keko ngan.” Pangasabi na niti, pepakit nala karela ding gamat na at ing katalindikingan na. Mesaya la ding alagad panakit da king Ginu. Pasibayu nang sinabing Jesus karela, “Kapayapan keko ngan. Nung makananu na kung tinubud ning Ibpa, makanyan da kayu namang tutubad.” Pangasabi na niti, pengisnawanan nala at sinabi na, “Tanggapan ye ing Banal a Espiritu.” Nung patawaran yu la ding kasalanan na ning ninuman, mipatawaran la; ing e yu patawaran e ya mipatawaran.” Oneng i Tomas (ing mayayaus Kambal), ing metung karing labing adua, alayu inyang dinatang ya i Jesus. Inya sinabi da ring aliwang alagad kang Tomas, “Ikit miya ing Ginu!” Nganang mekibat Tomas, “E ku maniwala anggang e ku la akit ding bakas ding paku karing gamat na at itagkil ing taliri ku king bakas da ring paku at ing gamat ku king katalidikingan na.” Pangalabas da ring walung aldo, makatipun lang pasibayu ding alagad king bale at kayabe re i Tomas. Makasara la ding pasbul, oneng linub ya i Jesus at tinalakad ya libutad da. Nganang Jesus karela, “Kapayapan keko ngan.” At saka na sinabi kang Tomas, “Lawen mu la deng gamat ku at itagkil me keni ing taliri mu. Dala me keni ing gamat mu at itagkil me king katalindikingan ku. E na ka mag-alinlangan, maniwala na ka!” Mekibat ya I Tomas. “Ginu ko at Dios ko!” Nganang Jesus kang Tomas, “Maniwala na ka uling ikit mu ko? Mapalad la detang maniwala kanaku agyamang e ra ku ikit!” Ginawa yang dakal at miyayaliwa pang milagru la ding aty keting libru ban maniwala kayu king i Jesus ya ing Cristo, ing Anak ning Dios at king pamaniwala yu mika bie kayu king kapamilatan na.

III. Turu

Manibat pa king Matuang Tipan ikit tamung ala yang patugut mamaus king tau ing Apung Ginu. Ausan ne parati ing tau ban neng maging kayabe king ganap a pamibiebie. At king pamanaus na memili yang taung maging instrumentu na, kalupa dareng propeta.

Akit taya naman ing pamanyaus ning Ginu tang Jesus king Bayung Tipan. Bayu ne erapan ing kasakitan at kamatayan king krus inaus no reng kayang disipulus ban nong ituru tungkul king kaburyan ning Ibpang atyu banua. Pepakit na naman kareng disipulus nung makananu ing pamibie-bie na ning taung atin takut king Apung Ginu. Masala na naman pepakit na ing taluktuk na ning pamaging lider yapin ing kasuywan, ing magserbisyu at aliwa ing serbiswan.

Ngening king ebanghelyu kaybat ng erapan Jesus ing kasakitan at kamatayan king krus sinubli yang mebie at pepakit ya karing kayang disipulus. Mipamasalan at milako ing takut da reng disipulus nyang kayakit da kaya. Asabi da karing sarili da ”Tutu pin ing sinabi na, subli yang mie”, tutu pin yapin ya, ing Ginung Jesus.” Bisa lang lundag king tula, oneng e da agawa uling marine la king pamaglingad at pamaglakwan da king Ginu. At ban milako ing kapikakunwan da reng disipulus sinabi na karela ”kapayapan keko ngan” at pepakit na la karela ding gamat na at ing katalindikingan na at pasibayu sinabi na karela ”kapayapan keko ngan.” Nung makananu na kung tinubud ning Ibpa, makanyan da kayu naman tutubud.” Tutuburan no ring kayang disipulus ban da naman ituru ing tiru na karela. Tutuburan nala ban gawan mu naman nung nanu ing gewa ng lugud Jesus karela.

At ngening kasalukuyan ausan at tutubud na katamu mu naman ning Ginu ban ituru ing kaburyan ning Ibpa at pakyapusan ya i Jesus nung makananu ing lulugud. Inyang mebinyag tamu nilang kristiyanu, ketang oras ayta inaus nana katamu ning Ginu at king pangakumpil tamu naman iti ya ing oras ning pamanubud na kekatamu. Tutubud nana katamu king sari-sarili tang pamilya ban maging mayap a anak, ban maging responsabling pengari. Tutubud nana katamu ban ibayu ya ing lupa na ning kekatamung komunidad. Komunidad a ating masabal king metung at metung, komunidad a ating respetu king sarili at kareng aliwang tau. Komunidad a ating prinsipyung makilaban king ustu at katutuan. At potang agawa tana iti, iti ya ing oras para itubud nana katamu king mabilug a yatu ban ituru ya ing mayap a balita at ipakit ing lugud ning Dios king tau. Amen.

IV. Pamigunam
”Balayan a talatuki, balayan a mituburan.” Iti ya ing tema na ning kekatamung Kadwang Plenaryo Konseho na yang kayausan at pakibat ning Katolikong Pilipinu king Kadwang Vaticano. King pamigunam at pamangadi para king temang iti, adwa lang katutuan a ikit da king kekatamung lipunan. Ing kakaluluan at ing pamisagsagan. King kakaluluan, atlu lang klasi ring ikit da, ing mumuna ing kakaluluan king materyal a bage, ing kadwa ing kakaluluan king moral o panugali at ing katlu ing kakaluluan king Ispiritu na yapin ing pamangawa king amanu at lugud ning Dios. Ken namang pamisagsagan, ikit da iti kareng e da pamikaintindi ning kalulu at ning atinan, ning megaral at ing e megaral. At para kekatamu ngening ausan ning Ginu at tutuburan para king misyun a ayti, kaylangan ing atin ta dapat gawan. Keng sarili tang pamilya, ipakit tamu na ing Ginung Jesus yang sentru. I Jesus ya sana ing maging inspirasyun tamu king pamikakalugud. Ken namang kekatamung komunidad aparandam taya sana ing gamat mapaglingap ning Dios. E tamu tatakut tatalakad kareng keka tamung misyun king bie. E tamu tatakut mamarap kareng katutuan ning bie. Na ing katutuan balu tane man, na ing katutuan atyu king sarili tamung pusut kaisipan. Ing katutuan na kapilan man ing mayap e ne sambutan ning marok. Na ing katutuan kaluguran na katamung kaluguran ning Katutuan, I Jesus. At nung mimina ta lub ganakan taya ing mayap a balita ngening aldo ayti, nyang tinubud no reng alagad ng Jesus pigkalub ne karela ing Banal a Espiritu na yang mantabe karela king karelang misyun. Amen.

V. Pamanahimik

VI Tauling Panalangin

Ginu ming mayupang tutu, dakal a salamat king pamamantabe. King pamanuli mi kareng sari-sarili ming pamilya at komunidad gawan yu kepung instrumentu ning kekayung lugud. Parati yu keng sopan ning Banal yung Espiritu at iti pu pasalamatan at anyaran mi king lagyu ning kekang Anak, I Jesus. Amen.

VII. Kutang

1. Nanu lamo reng bage akakit tamu king komunidad na kaylangan mibayo?
2. Bilang Katolikong Pilipinu nanu kaya ing agawa tamo king sarili tang komunidad ban ibayu ya iti?

Download here:

Page 1: http://www.mediafire.com/file/yjz2ij25n21/04.11.10 pg. 1.doc

Page 2: http://www.mediafire.com/file/1d22z31t0kd/04.11.10 pg. 2.doc

Domingo ning Pamaniubling Mie ning Ginu

Sinubli yang Mebie I Jesus

I. Pamuklat a Panalangin

Ibpa, salamat king pamamye yu pung mayap a oras kekami ban makikit pasibayu keka. Apakikwanan mi pu sanang apilasan ing tune kabaldugan ning pamanyubling mieng Jesus a Ginu mi. King kapamilatan na ning kayang pamanyubling mie apakikwanan mi pu sanang apatatagan ing kekaming kasalpantayanan ban adake iti kareng aliwa. Amen.

II. Pamamasa

Juan 20:1-9

King abak a maranun na ning mumunang aldo ning paruminggu, maralumdum pa, minta ya king kutkutan I Maria Magdalena. Ikit na king makalako ya ing batung takap ning kutkutan. Inya milayi ya at minta kang Simon Pedro at king aliwang alagad a pakamalan nang Jesus. Ngana karela, “Kinua re king kutkutan ing Ginu at e mi balu nung nu re binili.” Inya linwal ya I Pedro at itang aliwang alagad at minta la king kutkutan. Milayi la, oneng itang aliwang alagad milayi yang mabilis kesa kang Pedro, at minuna yang miras king kutkutan. Dinuku ya at kilub ning kutkutan ikit na ing telang pamburul a makabili karin; oneng eya linub. Kanita dintang yang katuki na i Simon Pedro at taglus taglus yang linub king kutkutan. Ikit nang makabili karin ing telang pamburul at ing panyung penakap king buntuk nang Jesus. Iti e makakayabe king telang pamburul, nune makakalilua yang makatuklip king metung a lugal. Linub ya naman itang aliwang alagad a minunang dinatang at ikit na at meniwala ya. (E ra pa aintindian kanita ing sasabian na ning kasulatan king kailangan yang subling mie I Jesus.)

III. Turu

Sasabian da reng minunang disipulus ng Jesus king libru na ning Dapat 2:32-33 na “Binangun ne at pepasublian mie ning Dios iti mismung I Jesus, at ikami ngan testigu kami kaniti. Mitas ya king banda nang wanan ning Dios at tinggap ne kaya ing Banal a Espiritu, antimo ing pengaku na ning Ibpa na at ing akakit yu at daramdaman ngeni ya itang kalam a tigtug nang labis-labis kekami.”

Iti ya pu ing pagmasusyan tamu ngeni, ing pamanyubli ng mie Jesus. Ing pangasambut ning karulumduman king sala, ing pangasambut ning kasalanan keng mayap at mengapalyari iti kapamilatan ning kasakitan at kamatayan ng Jesus king Krus. Sasabyan napin San Pedro karing tau Corinto na e taya apikawani ing lasa’t pangamate ampo ing pamanyubling ng mie ning Ginung Jesus. Uling e ya maging ganap ing kekatamung panga kristiyanu nung alalu reng adwang areni, “At nung I Kristo e ya sinubling mebie, ing kasalpantayanan yu alang kabaldugan at atyu kayu pa king pamikasala. Nung ing kekatamung kapanayan kang Kristo para king bie iti, itamu ding taung dapat kalunusan dili keti king yatu (1 Cor 15:17,19). Mangabaldugan ing nung panwalan tamung ing Ginung Jesus sinubli yang mebie, makanyan mu naman ing malyari kekatamu potang arapan tana ing kamatayan. Ala na dapat ing takut king kamatayan at mitakutan tamu mu king kamatayan nung ing bie tamu ala yu pa kang Kristo. Oyni ing meging katatalakaran da reng minunang Kristiyano, erapan dang alang takut ing kamatayan uli na ning pamaniwala da king Ginung Jesu Kristo na minyambut na king kamatayan at kasalanan. Silaban dala, tinalip dala balat, pepakan dong leun, pete dala at kabang malilyari karela iti pupuryan depa murin ing Dios kapamilatan ning karelang pamagkanta.

Ngening panahun, na e na bawal ing pamanyamba kang Jesus antimong kekatamung Dios at tagapagligtas. At misan king pabanwa pagmasusyan tamu ing lasa, kamatayan at pamanyubling mie na ning Ginung Jesus. Ing kutang, atin pa bang kabaldugan ing kapagmasusyan ayni king bie tamo? Tutu ta kayang maniwala na tutu pin sinubli yang mie I Jesus? O maging kalupa tane ing metung kareng apostoles (Tomas) na bayu ya maniwala kaylangan akit at atalnan ne pa ing Ginu tang Jesus. Ban apatunayan tamung maniwala tamu king pamanyubli ng mie ning Ginu tang Jesus kaylangan ing akit da king bie tamu ing kekatamung kapanwalan. Nung nanu dapat ing paniwalan tamu, na ya naman ing parati tang sasabyan, sana akit da mismu karing pamidapat-dapat tamu. Paglokwan tala kasi reng sarili tamu neng kabud tala sasabyan deng kapanwalan pero e ta noman gagawan.

Metung yang amun kekatamu ngeni ing kapagmasusyan ning pamanyubli ng mie Jesus. Sana sunlag ya king bie tamu ing Ginung sinubling mebie ban kanita kapamilatan na ning mayap tang pamagbayu aramdaman dareng aliwa ing pag-asa, kasalpantayanan at lugud. Amen.

IV. Pamigunam

Linasa at mete ya king krus ing Ginu tang Jesus. Oneng tiparan na ing makatatlu ng sinabi karing kayang apostoles “Ing anak ning tau, lumasa at mate ya king krus pero king katlung aldo subli yang mie”, metupad iti at matupad mu naman ing sinabi na datang yang pasibayu ban na katamung idala ketang lugar na nung nukarin pulisan na ing kekatamung luwa at papagpaynawan na katamu kareng kekatamung kapagalan keti king yatung iti. At kabang panenayan taya king kayang kadwang panyatang sumaup tamung dakal la sanang ituki na king banwa. Uling malino ing kayang kaburyan na dinan na katang bie alang kapupusan, uling tutu na katnag kaluguran. Ing kutang, makananu tang makasaup ban e maging sayang ing krus at pamanyubli ng mie ning Ginu tang Jesus. Marakal ng besis ing dakal na lang mipahamak king kekatamung matsurang pamanugali. Marakal tana sinira at penasakit pauli ning pamag-iganti tamu. Pauli na niti ing pamanyubli ng mie ning Ginung Jesus manatili nya mu king krus ning kalbaryu. Manatili nya king kalbaryu uling manatili yang magkasakit neng atin taung mangarabyadu at magagarabyadu. Malinong malino na e na buri iting bage ayti. Nya nung mipanyaup at mabyasa tamung magsakripisyu para kareng aliwa, na parati tang isipan nung nanu ing a ibye tang mayap at ali nung nanu ing akwa o atanggap tamu. Karin pwedi tanang kawlan at sabyan na tutu ping sinubli yang mebie ing Ginu. Tara, kaluguran at kapatad ku king Ginu, lundag, terak at magkanta tamu “Ing Ginung Jesus sinubli yang mebie, Alleluia, ing Ginung Jesus sinubli yang mebie, Alleluia tara purian at pasalamatan taya, Alleluia, Alleluia, Alleluia, Amen.

V. Pamanahimik

VI Tauling Panalangin

Ginu, dakal a salamat pu king krus at pamanyubli yung mebie. Abalu mi pu ngeni na iti pu pala ing kaganapan ning kekaming panga Kristiyanu. Balu mi na pu ngeni na ing krus at ing kekang pamanyubling mie e la dapat pikawani, uling nung kabud na ing kekang krus yang king pusu mi, e ya matupad ing kaburyan mu. Uling buri mung buring tamasan mi ing bie alang-angga. Amen.

VII. Kutang

1. Nanu ya kabaldugan keka ing Pamanyubli ng mebie Jesus?
2. Makananu taya pagmasusyan ing pamanyubli ng mebie Jesus?
3. Nanu lareng planu tang gawan ban panamdaman de reng aliwa ing pamanyubling mebie ng Jesus at e nya mu manatili king krus?

Download here:

Page 1: http://www.mediafire.com/file/lldmkymzzjg/04.04.10 pg. 1.doc
Page 2: http://www.mediafire.com/file/iwjzzoniwij/04.04.10 pg. 2.doc