Sunday, July 31, 2011

Kalabingwalung Domingo ning Ordinaryung Panaun


Pepakan na lang Jesus ding Limang Libung Tau

I. Pamuklat a Panalangin

Ibpa, pasalamatan da ka uling king lugud yu at ganaka kekami. Bayu mi pa anyaran keka ing pamangailangan mi, bibie yu na kekami ing grasya yu. E makalingad kekayu ing nanu mang pamangailangan mi. King pamanantabe yu, e yu buring magkulangan kami king pamangailangan mi king aldo-aldo. Salamat pu Guinu king kekong malasakit kekami. Iya na rugu ing kakapitan mi neng mamagkasakit kami. Amen.

II. Pamamasa
Mt.14:13-21
13 Inyang tinggap nang Jesus ing balita tungkul kang Juan, sinake yang bangka at meko ya king lugal a ita. Minta ya king metung a tahimik a lugal nung nu ya makapagdili-dili. Oneng abalitan da ring tau iti at ibat karing miyayaliwang balen linakad lang tinaluki kang Jesus. 14 Inyang kuldas ya king bangka I Jesus, ikit na la ding tutung dakal a tau. Melunus ya karela at pepakayap na la ding masakit.
15 Inyang mabibengi na, lepitan de ring alagad na at ngara, “ Mikelangan a lugal iti at mabibengi na, Palakuan mu na la ding tau ba lang munta karing malapit a baryu ban makasali lang apangan da.”
16 Nganang mekibat Jesus, “ E kailangan ing mako la. Ikayu mismu ing munie pamangan karela!”
17 Ngarang sinabi, “ Lima la mung tinape at aduang asan ding darala mi.”
18 Nganang Jesus, “ Idala yu la keni. 19 Pepaluklukan na la king dikut ding tau; kinua na la ding limang tinape at aduang asan; tinalanga ya banua at pepasalamat ya king Dios. Pemirasu na ding tinape at inutus na karing alagad king pamie da la karing tau. 20 Mengan la ngan ding sabla at kinabsi la. Tinipun da la ring alagad ding mitagan, at mekakatmu lang labing aduang kaing karing pirapirasung tinape. 21 ¬Ating limang libu karing lalaking mengan; e la kabilang ding babai at ding anak.

III. Turu
Likas king kekatamung ugaling Pilipinu ing mipapagmalasakit. Matingkad ing ugaling a ini lalu na king metung a pamilya nung nukarin manuknangan ing tune lugud. Akakit tamu ining malasakit lalu na potang ating misasakitan kareng miyembru ning pamilya. Mantabe la reng kapamilya at sesen de ing masakit anggang king kumayap ya. Oneng siguru mas matingkad tamung akakit ing malasakit king pamilya lalu na potang ating kakulangan king pera. Marakal ta na dimdam a istorya da reng mikakapatad a tutuknang king pamagaral ba da lang apayari reng aliwa dang kapatad. Magsakripisyu la. Akwa dang e mayari king pamagaral da, ba da lang apayari reng aliwa dang kapamilya. Reng aliwa, isakripisyu de pa ing pamakyasawa da, ba da lang asaupan mayari reng aliwang kamiyembru da king pamilya da. Mamag-abroad la pa reng aliwa at karin pagtiisan da rugu ing lungkut ampon pamagkasakit ban midenan lang masanting a pamibiebie reng kapamilya da. At potang apayari da no mo reng kapamilya da, karin la pa painawa ban lingunan da naman ing karelang sariling pamangailangan.

Keng ebanghelyu ta ngeni, ing malasakit a kalupa ning kekatamung malasakit kareng kapamilya tamu iyang pepakit ng Jesus kareng marakal a taung tinaluki keya. Ing lunus na at ganaka na kareng marakal a taung tinaluki kaya iyang ikit tamu. Sasabian na ning ebanghelyu: “ Inyang kuldas ya king bangka I Jesus, ikit na la ding tutung dakal a tau. Melunus ya karela at pepakayap na la ding masakit.” (v. 14) At uling tutung maragul ya lunus at ganaka ing Guinu kareng tinaluki kaya, e no buring palakwan a alang kanan. (v. 16). Pauli na ning lunus at ganaka na karening alang pamangan king kaorasan a ita, pepalto na ing tutu ng malasakit karela inyang pakanan na la kapamilatan na ning milagrung gewa na inyang peparakalan no reng tinape ampon asan a binie da kaya. (v. 19).

Alang komunidad ing mabubuu nung alang lunus at ganaka. Alang makabaldugan a pamiyabe-abe ing mayayakit nung alang malasakit king bawat metung. Alang tuneng pisamban ing mabubuu nung reng miyembru ala lang masabal king bawat metung lalu na karing miyembrung milelele ampon pakakalulu. Alang tuneng lipunan ing miporma king
metung a balen nung ala lang malasakit reng tau, lalu na karetang miyembrung alang laban ampon maging biktima ding karawakan. Alang malasakit ing malyari nung alang ninuman ing bisang magsakripisyu at sumuyu ban masensu la reng aliwang miyembru. Alang malasakit ing mayakit karing taung matako pera ampon magkulangan pansin. Kareng taung e makabuklat mata ampon pusu kareng makalunus, alang malasakit ing mayakit. Kareng makasarili a kabud na ing sarili dang pigagap ing atiu king isip da, alang mayakit a malasakit. Kareng taung mapanusga at e makaintindi kareng kamalian ampon kakulangan da reng aliwang tau, alang mayakit a malasakit, lugud ampon ganaka.

Inya e tamu magtaka king ing pamisagsagan tamu keng bansa tamu malala nang tutu uling ala tamung pusung kalupa ning Guinu a mapaglunus ampon ating malasakit. E ta makabuung metung a balayan anggang e tamu mabiasang malunus kareng taung atiu king masakit a kabilianan.

Manalangin tamu king Guinu, na king keyang lugud, ganaka ampon malasakit kekatamu, akwa tamung mabiasang malunus, maging maganaka ampon mika malasakit lalu na kareng atiu king masakit a kabilianan king bie. Ilako ta mu pa agyang minsan mu sa ing atensyun tamu king sarili tamu at lawen ta la reng kapatad tamung mangailangan saup, lunus ampon ganaka.

IV. Pamigunam
Minsan Guinu, meg-BEC kami king metung a cell. Anak la ngan reng abe ku. Malambat no king BEC. Mga apat nong banwang kayabe mi king BEC. Anak la pamu inyang megumpisa la. Ngeni dalagita na la ampon baintau. Inyang mig share no rening anak a reni, ating metung karela a sinabi: “ Pasalamat ku king Guinu, uling antabayanan na kami king kasakitan mi. Agyang mamagkasakit ke king bie mi, balu ku, e na ke paburen ning Guinu. “ Uling aku ala kung kebaluan king bie na nining mag-share a dalagitang aini, mengutang ku kaya: “ Nanu mo ing sasabian mung kasakitan king bie mu?” Inyang kitang ke kaya ini, megumpisa yang menangis. “ Neng kai pu”, ngana, “ e ke pu makasaling abias. Neng kai pu, e ku mipapatudtud uling danupan kung danupan.” Inya mu rin sinabi na ita, mipakyak ku naman Guinu. Anak ya pa ining ka sister ku, balu na na ing kabaldugan na ning kasakitan. Malambat neng mamaluktut bituka uli ning danup a panandaman na uli na ning kakulangan king pera ning pamilya. Melunus ku Guinu, kalupa ning lunus a penandaman yu king ebanghelyu ngeni. E ku mipaindatun. Menangis na kung menangis uling ni minsan, e ku pa penandaman king bie ku ing danup! Inyang meyari na kami Guinu, king cell mi, inyang pauli na ku, ikit kung marakal la reng makapila Mcdo ampon Jollibee. Inyang ikit ko rening taung a reni, minisip ku. Maralas, ako, metung ku naman kareng makapilang a reni. Ala kung kamalit-malitan king marakal la pa reng kayabe kung daranup. Ika Guinu, inyang ikit mung daranup la reng marakal a tinaluki keka, e kayu kabud melunus, nune pepakanan mu la pa. King lugud yu at ganaka, pepakanan yu la at pepakabsian!

Inyang miras na ku bale, kitang ke ing sarili ku: “ Ninu ing dapat kalunusan na ning Guinu? Ining ka sister kung daranup, O akung alang masyadung pakialam kareng kabilianan da reng marakal a mamagkasakit a tau? Bayu ku metudtud, pepaisip mu Guinu kanaku, king aku pala ing dapat kalunusan. Aku ampon reng keraklan kareng tau
a alang masabal ampon alang pakialam kareng taung atiu king masakit a kabilianan, ikami dapat ing kalunusan. Malunus ko kanaku Guinu! Dinan yu kung pusung biasang malunus ampon magmalasakit kareng taung ala nang akakakit a pamag-asa king bie pauli na ning kabilian da king bie da. Amen.

V. Pamanahimik

VI. Tauling Panalangin

Ibpa, salamat pu king lunus, ganaka at malasakit yu. Balu yu pu ing pamangailangan mi. E makalingad kekayu ing kasakitan mi. Oneng uling king kekong malasakit kekami, didinan yu keng grasya ban asadsad mi ing kekaming pamibibie. Bibie yu ing grasyang kailangan mi agyang e mi man anyaran keka. Malugud ampon maganakang Ibpa, e ke pu sana milalako kapanaligan king kekong ganaka ampon malasakit kekami. Turuanan yu ke naman maging mapaglunus ampon maganaka kareng mas mangailangan kekami. Dinan yu keng pusung kalupa ning kekayung pusu ban makabuu kaming tuneng komunidad ampon balayan a mipapagmasabal king bawat metung. Amen.

VII. Kutang

1. Ikwa ku nang melunus karing taung atiu king masakit a kabilian? Nanu mo ing gewa ku inyang melunus ku karela?

Download here:
Page 1: http://www.mediafire.com/file/1zitzg32t9tezmt/07.31.11%20pg.%201.doc
Page 2: http://www.mediafire.com/file/a3bo866jnktknwb/07.31.11%20pg.%202.doc

Sunday, July 24, 2011

Kalabingpitung Domingo ning Ordinaryung Panaun



Ika Ginu ing Kayamanan ku. Ika ing Perlas a e Karaniwan a Leguan

I. Pamuklat a Panalangin

Ibpa, king lugud yu, binulalag ye kekami ing misterio ning kekayung kayarian. Pasalamat ke pu king Guinu ming Jesus a tuturu kekaming pagnasan mi ya ing kekong kayarian a migit pa king nanu pa mang bage keti king yatu. Dinan yu keng grasya Guinu ban mibusni la reng kekaming kaisipan ampon pusu ban masaya ming lakuan ampon tabili ing nanu mang makasumbagal king parasan ning kayarian yung banal. Salamat pu Guinu. Salamat. Amen.


II. Pamamasa
Mt.13:44-46
44 “Ing Kayarian ning Banua kalupa ne ning pibandian a makakutkut king gabun. Mipaintagun akulkul ne ning metung a tau at timbunan neng pasibayu. King tula na, meko ya at pisali na ing sablang pibandian na at kaybat migbalik ya at seli ne ing gabun a ita.
45 “ Antimu rin, ing Kayarian ning Banua kalupa ne ning metung a manialing mangamal a perlas. 46 Inyang menakit yang metung a perlas a e karaniwan a leguan, meko ya at pisali na ing sablang pibandian na at seli ne ing perlas.

III. Turu
Marakal ta na dimdam kwentu kareng kilala tamu nung makananu la memagkasakit reng kamag-anak da lalu na deng pengari da ban mayari la mu king pamag-aral da. Kanita, kareng matuang pelikula akakit ta la mo reng istorya da reng miyasawang ortelanu a ating anak a matni buntuk Uling ala la mong pera ban papagaral de king kolehiyu ing anak da Manila, pamisali de ing karelang damulag ban makabayad la mo keng tuition fee na ning anak dang matni buntuk. Neng kai ing gawan da pa, isangla da ing pupul da, ba dya rugung a- payari ining anak da. Balu da rugu reng miyasawang ortelanu king ing pamag-asa na ning anak dang makayari king kolehiyu atiu king gamat da. Inya makasadya lang pisali da ngan ing egana-ganang pakamalan da uling balu da king mas migit ya ing maging bunga ning karelang pamagkasakit kesa king nanu mang bage

Ngening kapanaunan tamu, e naman lalaut ing istoryang kalupa niti. Marakal la pa murin reng pengaring makasadyang kaulan da ing egana-ganang kasakitan ban apagaral da la reng anak da. Akakit ta la naman reng marakal a mamag-abroad. Bayu la makapagobra abroad reng aliwa, maragul pa mu ing gastus a ilual da. Reng aliwa, agyang e la siguradu kareng agency a pakisabian da, makasadya la rugu agyang manutang la mu ban akit da lang makapag-abroad reng kamag-anak da.” Fake” la man o ali reng kasabi dang agency, akakit tamu king ing pamilya, makasadya yang makipagsapalaran king nanu mang bage basta mu sana ing kapakanan ampon ing mas masanting a kabilianan ning kamag-anak yang mididinan kasiguraduan.

E mo masanting ing ugaling Pilipinung a ini? Malagwa tamung magsakripisyu at makipagsapalaran king nanu mang kasakitan basta akwa ta ya sa ing kapagnasan tamung masanting ampon makakayap.

King ebanghelyu ngeni, e ya lalaut ing ugali tamu bilang Pilipinu king panagkat na ning Guinu kekatamu. Ing taung mekakulkul a kayamanan king metung a gabun, ikwa ng pisali ing egana-ganang pibandian na ban nyang asali ing gabun nung nu ya ing kayamanan a ikit na. Makanyan ya naman ketang metung a taung manyaling perlas. Inyang ikit ne itang perlas a e karaniwan ing leguan, pisali niya naman ing egana-ganang pibandian na ban nyang asali ing perlas a ikit na. Dening tau king talimhaga, e no meg-adwang isip man – pisali da ngan ing egana-ganang pibandian da ba dyang akwa ing akakit dang mas maulaga pa kesa king nanu pa mang pibandian da keti king yatu. Inya potang basan ta ya ining talimhagang ini, atatandanan ta la reng marakal a Pilipinung makasadyang magsakripisyu, mamisaling nanu mang pibandian ban akwa da ing isipan dang mas maulaga pa kesa king nanu pang pibandian. Inya e taya dapat pamagkasakitan intindian ing talimhagang ini. Malapit ya king pusu tamu uling iya ing daranasan da reng kerakalan kekatamu ngeni.

Oneng ing talimhaga tamu, tungkul ya king kayarian ning Dios. Sasabian na kekatamu ning talimhaga ing ulaga na ning kayarian ning Dios. Sasabian na king ing kayarian ning Dios, pota talagang ikit me ampon asumpungan me, anti me mong asumpungan ing metung a kayamanan, anti me mong asumpungan ing metung a perlas a e karaniwan ing leguan. At ali mu ita. Ing kayarian ning Dios, potang tutung asumpungan mu ne king bie mu, e me ipagpalit king nanu man bage uling ala yang kasing ulaga, ala yang katumbas, ala yang kapante. Pauli na niti, malyari tamu ngan lakwan ing egana-ganang bageng isipan tamung maulaga king bie tamu ba tayang panikwanan ampon akamkam ing kayarian ning Dios. Malyari tala kanung pagpalit ding nanu mang bage at ninu man keti ke yatu ba tayang akwa ing kayarian ning Guinu! Nung itamung Pilipinu makasadya tamung kaulan ngan ing egana-ganang pasakit ban dasnan tamu ing masanting a parasan tamu, buri ng sabian, makasadya tamu naman lakuan ing nanu pa mang bage ban akaul at panikuanan ta ya ing Dios a iyang pekamasanting diling parasan tamu.

I Kristo iya nang sasabi kekatamu: Masanting ya ing kayarian ning Dios – ala yang kapante king nanuman keti yatu. Malyari mu ngan painggulutan ing sabla potang a sumpungan me ing Dios uling ala yang katapat ing kayarian na! Ala ng aliwa pang masanting king pamibiebie tamu kesa king pamakyabe ning Guinung Dios kekatamu! Ala ng mas migit pa king bie tamu kesa king Guinung linalang at linugud kekatamu. Ala tamu dapat pasayangnan king bie tamu kareng likuan tamu o leko tamu king bie tamu pauli na ning kapagnasan tamung akayabe at akautus ta ya ing Guinung Dios. Alang saya ing kapante na ning saya ning metung a taung atiu king Guinu. Alang kasing tahimik ing pamibiebie na ning taung mebiasa nang sinuku king kaburian ning Guinu. Ala nang tatag pa king taung magtiwala king Guinu at mamag-asa keya king nanu mang bage. Ala nang saya pa king taung balu na king kaluguran ne ning Guinu at balu nang binie ne ning Guinu ing sarili nang bie para keya.

Agkatan na katamu ning Guinu – e tamu tatakut painggulutan ing egana-gana alang-alang king keyang kayarian. Migit ya ing Guinu king nanu mang bage at king ninu mang tau.

IV. Pamigunam

Metung kung tricycle driver Guinu. Aldo aldo panikuanan keng akwa ing boundary ku mu man sa ban kanita e ya milako kanaku ing tricycle a papagamit da. Neng kai makasobra ku Guinu. Neng kai saktu yang boundary ing akwa ku. Lalu na ngeni, e ku makasobra king boundary. Uling mitas na ngan ing egana-gana, ot balamu reng tau e na la naman bisang sakeng tricycle. Oneng Guinu, salamat pu uling sasaupan yu ku. Minsan a aldo kabang mamasada ku, ating magugulu ikit ku. Bigla-bigla inabat de ing tricycle ku. Ating me- ataki pusu at pekisabi deng mayap kanaku nung adala ke ining taung me-ataki pusu king ospital. E ku meg-adwa isip Guinu. Seke ke ing me-ataki at pirapal keng dela ospital. Karas ku ospital aku pa pu ing mekisabi karin. Meglambat ku rin Guinu. Uling balamu ala yang kamag-anak ining me-ataki pusu, aku na pa ing liningun kareng egana-ganang pamangailangan na. Megisan ku pu oras. Alus magbengi na mu inyang sinabi ning doctor kanaku king ing dela kung pasyenti ala ne king peligru. Inyang minuli ku, ala kung daralan abli uling e ku na ikwa pang memasadang tricycle. Malungkut ya ing misis ku uling balu na mabawasan no naman reng tipun mi king pamamayad mung boundary. Bayu ku metudtud Guinu, api-isip-isip ke ing talimhagang sinabi mu ngeni. E ku amalayan

Guinu king ikwa kung likuan reng bageng ating ulaga kanaku ba kung akwa ing metung a bageng mas maulaga pa pala. Maulaga ya kanaku ing panakitan ku king tricycle Guinu. Oneng ikwa kung binie ing oras ku kening mangailangan a masakit a king ikit ku mas maulaga yang tutu, uling king pamanyaup ku Guinu, ika ing sinaupan ku king ka-orasan a ita. Salamat Guinu, uling dininan yu kung grasyang pagsilbian da kayu karing kapara kung tau, lalu na reng mangailangan. Migit pa Guinu ing tulang panandaman ku king pusu ku ngening benging iti uling asumpungan da kayu Guinu. Migit pa king tulang a dudulut ning metung a aldong boundary.


V. Pamanahimik

VI. Tauling Panalangin

Ibpa, turuanan yu keng manintun king tutung kayamanan a bibie yu kekami. Malagwa mi sanang painggulutan ing sabla potang asumpungan mi ing bibie yung grasya kekami a alang kapante king nanu man keti king yatu. E mi sana pasayangnan ing kailangan ming tabili o lakuan ban mi yang aranasan ing leguan na ning pamibiebie a maka yamut king pamibiebie na ning Guinu ming Jesus. Malagwa mi sanang kawani ing sarili mi king nanu mang makasumbagal king pamakyabe mi king keyang pamibiebie king kabanalan at katuliran. Ikayu Guinu ing perlas a e karaniwan ing leguan. Ikayu ing kayamanan mi a masaya ming sisinup king kekaming pusu. Salamat pu uling ikayu ing memie saya king kekaming bie. Salamat pu Guinu. Salamat. Amen.


VII. Kutang
1. Nanu ya mo para kekatamu ing perlas a e karaniwan a leguan?

Download here:
Page 1: http://www.mediafire.com/file/azga8q2qg5ecafz/07.24.11%20pg.%201.doc
Page 2: http://www.mediafire.com/file/aoox4d2vbdibg2a/07.24.11%20pg.%202.doc

Sunday, July 17, 2011

Kalabinganam a Domingo ning Ordinaryung Panaun



Magtiwala Kami Guinu King Kekayung Ustisya Ampon Katuliran

I. Pamuklat a Panalangin

Ibpa, pasalamat ke pu kekayu, king kekayung ganaka at kapagpasensyan. Maganaka ko kareng mayap ampon e mayap. Kaburian yu king miyabe-abe keng mabibie ban patingkaran ing kekong ustisya. E mi sa lalako kekayu ing kekaming kasalpantayanan agyang daranas keng kabayatnan pauli da reng dapat da reng taung e mayap. E mi sa lalako kekayu ing kekaming pamag-asa potang maging biktima kami kareng marawak dang dapat. Saupan yu kaming magtiwala Guinu king kekayung alang-anggang ustisya at katuliran. E yu ke papaburen Guinu. Maina kami. Amen.


II. Pamamasa
Mt.13:24-30
24 Sinabi nia namang Jesus karing tau ing metung pang talimhaga. Ngana, “ Ing Kayarian ning Banua kalupa ne ning metung a taung sinalbag mayap a bini king marangle na. 25 Misan a bengi, kabang matudtud la ding sabla, dinatang ya ing kalaban na at sinalbag yang bining e mayap a dikut libutad ning pale n¬ at saka ya meko. 26 Inyang tinubu at memunga ing pale, linto munaman ing e mayap a dikut. 27 Inyang linapit la ding ipus na ning sinalbag at ngara, ‘E pu wari mayap a bini ing silbag yu, ginu? Makananung mikasamut dikut a e mayap? 28 Mekibat ya, ‘Depat na yan ning kakung kalaban.’ Kitang da ring ipus na, ‘ Buri yu pung putputan mi ing dikot? 29 Nganang mekibat, ‘ Ali yu, pota king pamamutput yu pati pale tuki. 30 Paburen yung parehung tumubu angga king panaun na ning papalut. Potang oras nang palutan, sabian ku karing talapalut: Tipunan yung mumuna ing dikut at saka yu aptasan at dulukan, at tipunan yu king kanakung kamalig ing pale.’”

III. Turu
King bie tamu, as na katamu karakal a kutang a e tamu balung pakibatan. Metung ne siguru ing kutang a ini: “ Obat mo reng taung gagawang marok papaburen no ning Guinu?” “Nung tutu nang balu ning Guinu ing ustu ampon mali, obat papaburen nong manatili reni keti king yatu?”

Lalu yatang sasakit ing bie potang kayabe tala reng taung e ustu gagawan. Lalu yatang babayat ing sitwasyun tamu nung reng marawak, lalu na potang atiu la keng matas a posisyun o kabilianan, ila reng kautus tamu. Tutu ngan ing saingsing tamung ini. E tamu alingad king makapadurut tamu kareng bageng e ustu ampon kareng taung gagawang e mayap. Marakal la reng taung mamagkasakit pauli da reng taung deni a kayabe tamu kabang mabibie tamu. Marakal la reng mabibiktima kareng matsura dang paralan. Marakal no reng taung ala nang akakarapat at milalako na pamag-asa pauli da reng dapat da reng taung e mayap. Balu na kaya ning Guinu ing sitwasyun a ini? Obat balamu papaburen na mu? Ing marok na pa, neng kai, lulual lang mas matagumpe reng taung a reti kesa kekatamung mamagkasakit mamintu at tutupad king nanu ing ustu. Neng kai, ila pa reng masalapi, ila pa reng manyambut, ila pa reng mididinan pansin ampon atensyun, ila pa reng mipaparangalan! Obat makanyan Guinu? Anggang kapilan ke Guinu manenaya ban mitulid ining sitwasyun a ini?

Karakal a kutang ne? Ninu kaya ing makaibie pakibat kekatamu?

King ebanghelyu tamu ngeni, masala ya ing pakibat na ning Guinu kening sitwasyun a ini. Mumuna, balu na ning Guinu ing sitwasyun. E makalingad kaya king reng bini ng silbag ning dimonyu misalbag la naman king lugar a nung nu ya tinanam. Inya keni pamu, sasabian ning Guinu, king aliwa iya ing penibatan na ning karokan a akakit tamu, nune ing kalaban a dimonyu iyang memunla karening akakit tamung ala king matulid. At kalupa na ning bining misalbag king matabang gabun, ining bining sinalbag na ning kalaban, dinagul ya naman. Dinagul ya naman uling ating taung tatanggap king bini na ning kalaban. Ating taung ating disposisyun king bining tatanam na ning dimonyu. Inya, uling makabuklat la disposisyun king karokan, ikwa nang sinibut ing bining ibat king dimonyu king pamibiebie da.

Ing kadwa ng sasabian ning Guinu king talimhagang mebasa ya ini: Paburen nong dagul rening e mayap a dikut kayabe da reng pale ning Guinu. Bakit? Uling kanung istung leput no reng e mayap a dikut, pota pati reng pale maputput. Inya nanu ing gawan na ning Guinu? Paburen na nong dagul reng paleng tenam na kayabe da reng e mayap a dikut a tenam na ning dimonyu.

Keni akakakit tamu king ing pamiyabe da reng mayap ampon e mayap kaburian ne ning Guinu. Akakit tamu king ing bie na ning mayap makayabe yang makayabe kareng bie da reng e mayap. Inya oini ing pakatandanan tamo: e manibatan ing karokan king Guinu. Ing Guinu malugud ya. E ya marok. E na kaburian ing karokan. Ing egana-ganang karokan akakit tamu king pamibiebie tamu e na kaburian ning Guinu. Ing karokan manibatan ya king dimonyu a inaus ning talimhaga tamung: kalaban. Uling ating tatanggap king karokan a manibatan king dimonyu, lalaganap ing karokan pauli da reng taung tatanggap king bini a silbag ning kalaban. Makabusni la reng disposisyun da reng aliwang tau karing bining silbag ning kalaban, inya daragul la. Lako ta king isip tamu king ing Guinu kaburian na ing miyayaliwang malilyaring e ustu keti keng yatu. E ya masaya ing Guinu potang akakit no reng anak na maging lang biktima ning karokan. E ya matula ing Guinu potang akakit ng mamagkasakit la reng anak na pauli da reng karokan a gagawan da reng e mayap. E na kakalinguan ning Guinu reng abusung gewa da reng marok kareng mayap a tau, lalu na deng alang laban ampon pakakalulu. Inya isip tamu king ing Guinu, kabud na paburen ing e ustung malilyari kekatamo? Ali. Bayu ya meyari king kwentu ng talimhaga, siniguraduan na ning Guinu king reng e mayap a tau makibat la kareng egana-gana dang penyapat keti king yatu. Pakibatan da ing karokan a pinyapat da. Mika-ustisya king bandang tauli.

Inya e tamu dapat mababalisa potang akakit tamu ing karokan a makapalibut kekatamu. Agyang balu tamung e na kaburian ning Guinu ing karokan a mararapat, paburen nang kayabe tala king pamibiebie tamu deni anggang king kapupusan. Tutu, marakal ya kasakitan ing bie nung kayabe ta la reng marawak, oneng pauli na mu rin rening kasakitan a reni a bibitbitan tamu kayabe ning Guinu, mamunga ya ing bie tamu kalupa na ning bie ning Guinu. Neng maleldo, potang pigugunaman ta la reng pamaglasa na balat ning Guinu, metung ne ini kareng kutang tamu: Obat pepaburen na ning Dios lumasa ya I Kristo lalam da reng marawak a tau? King misteryu ning pamaglasa na balat ning Guinu, akakit tamu king ing bie ning taung mayap makayabe yang makayabe karing bie da reng marok. Agyang ing Guinu tamu e mikabus kaniti.

Mayap ya ing Dios. Agyang kareng taung marawak, atiu pa mu rin ing kayapan na. Makaba ya pasensya, pero atin yang ustisya. E tamu mimina lub potang akakit tamu ing karokan a makapadurut kekatamu. E tamu mimina lub potang maging biktima na katamu ning karokan uling ing pamag-asa tamu king ustisya mibie kekatamu king bandang tauli. Kalupa ning Guinung makaba pasensya ampon makaba kapanenayan, mabiasa tamu namang mabibie king pasensya ampon king kapanenayan a mamunga at e mabibigu. Kargan tamu ing bie tamung ating kabayatnan pauli da reng dapat da reng marok. Pero e tamu milalako pamag-asa king ing Dios ya ing magtagumpe king bandang tauli, at ing Dios iyang mitulid ngan kareng egana-ganang e mayap keti king yatu.
IV. Pamigunam
Magtinda kung manuk king palengke Guinu. Galing aldo pa migigising na ku ban magtinda king pwestu ku palengke. Masakit ing obra, pero kailangan Guinu. E ke mangan mipapamilya nung e ku magsumikap king kapanintunan mi. Malambat neng mete ing asawa ku inya aku na kabud ing asahan da reng anak ku king kekeng pamangailangan. Karas ku king obra Guinu, ating aldong matumal, ating aldong masali. Ing pagkalungkutan ku Guinu ing kompitisyun mi mismu king palengki. Reng ka-kompitisyun kung mamisali mu namang manuk gagamit lang paralan e ustu. Ba lang makatubung masalese neng kai puraytnan de ing timbangan. Neng kai naman, ing mismung manuk a pipisali da iyang pupuraytnan da. Panindyeksyunan da lang danum ba
lang mas matimbang, ba lang mas mabayat. Misasali no man Guinu agyang atin lang purayit. E ku naman agawa ing gagawan da Guinu uling balu kung labag king kekang kautusan ing e ustung paralan. Ing lugud ku kekayu dapat iya naman ing lugud ku karing sasaling manuk kanaku. Masakit man aminan Guinu, neng kai, uli na pin ning maragul a pamangailangan, matutuksu kung pakiapusan ing daraptan da. Ila manakitan la Guinu, aku rugu oini, balamu rugu e ku mamasensu king bie at mamagkasakit ku. Neng kai maralas Guinu kukutang ku king sarili ku, obat makanyan Guinu? Obat papaburen mung gagawa lang e ustu reng kapara kung tau? Obat neng kai akakit kung mas mamasensu la pa king kabiayan da kesa kanakung magpumilit gawang ustu?
Oneng ika Guinu, sasabian mu kanaku ngeni king dapat mung miyabe-abe la reng pamibiebie da reng mayap ampon marawak. At king bandang tauli, mika katuliran ngan ing sabla. Sasabian mu kanaku Guinu king maragul ing kekang kapagpasensyan. Dapat mung dagul ing kanakung kapagpasensyan kareng bageng e makatuliran. Ing kekong anak, I Kristo, linasa ya balat lalam da reng taung marok. E no inagwanta o pepatuknangan kareng e da makatuliran a balak ampon depat keya nune menalig ya king kekang ustisya ampon matulid. Dinan yu ku naman Guinu a kapagpasensyan kalupa ning kekong kapagpasensyan kareng taung e mayap a gagawan. Papamungan yu ing kakung kapaniwalan king ika kabud ing mamie tutung katuliran at ustisya king pamibiebie kung manenaya at e milalako pamag-asa king kekang lugud at ganaka lalu na kareng alang laban ampon pakakalulu. Salamat pu Guinu, Salamat. Amen.

V. Pamanahimik

VI. Tauling Panalangin

Ibpa, king kekong maragul a kapagpasensyan at ganaka, dirinan yong panaun reng taung e mayap ban magbayu. Dinan yu ke pung kapagpasensyan a kalupa ning kekong kapagpasensyan. Mabiasa ke pu sanang manupaya kalupa yu. Dinan yu keng sikanan Guinu, ban e ke mimina lub neng kayabe mi la king bie mi reng taung gagawang karokan. E ke pu sana milalako pamag-asa neng maging biktima da kami reng dapat dang e mayap. Dinan yu keng kepanenayan uling balu mi king bandang tauli, ikaming manenaya king kekang ustisya, mipakabsian kami king katuliran yu. Salamat Guinu. Salamat. Amen.

VII. Kutang
1. Pota mong meging biktima ku kareng dapat da reng marok a tau, nanu mo ing maging panugali ku?

Download here:
Page 1: http://www.mediafire.com/file/61ywr632b7rd9j5/07.17.11%20pg.%201.doc
Page 2: http://www.mediafire.com/file/284ykkbntsxl2f5/07.17.11%20pg.%202.doc

Sunday, July 10, 2011

Kalabinglimang Domingo ning Ordinaryung Panaun


Ating Metung a Ortelanung Sinalbag Bini

I. Pamuklat a Panalangin

Ibpa, ikayu mu ing alang sawang mamie grasya kekami king bie mi. Sasalbag yo ring bini na ning kekong amanu kareng pusu mi. Saupan yu keng tanggap kareng amanu yu ban mamunga la king pamibiebie mi. Lako yu ing nanu mang makasumbagal king pamananggap mi king kekong amanu at king kekong lugud. Busni yo ring pusu mi, busni yo reng isip mi. E yu papaburen masayang ing grasya yung babie kekami. Saupan yu kami potang magkulangan kami king pamanyese king bini ning kekong amanu. Papamungan yo ring bie mi Guinu. Papamungan yu ing grasya yu king bie mi. Salamat Guinu. Salamat. Amen. II. Pamamasa Mateo 13:1-9 King aldo mu ring ita, meko ya king bale I Jesus at minta ya at linukluk lele na ning dagat-dagatan. 2 Pilupungan de ring dakal a tau, inya sinake ya king metung a bangka at karin ya linukluk. Pakatalakad la ding tau king pampang. 3 Tiru na lang dakal a bage king kapamilatan da ring talimhaga. Ngana, “ Ating metung a ortelanung linual ban salbag bini. 4 King pamanialbag na, ating bining digpa king dalan-dalanan. Dinatang la ring ayup at tiktuk da iti. 5 Ati namang bining digpa king mabatu nung nu maimpis mu ing gabun. Sinibut agad iti, 6 oneng inyang sinlag ya ing aldo, melanat uling e malalam a yamut. 7 Atin namang bining digpa king dikut a masuksuk; melabung ing dikut at piputan na ing bini. 8 Oneng tinubu at memunga ing bining digpa king gabun a mataba: ating tia dinalan, at ing aliwa tianam apulu, ing aliwa titlung pulung binutil.” 9 Nganang Jesus, “ Makiramdam ya itang ating balugbug!”

III. Turu

Ing aldo ya na siguru ing pekamaragul ampon pekamalakas a pwersang balu tamu keti king yatu. Nung alang aldo, sasasabian da reng scientificu, alang nanu mang kumabie keni keng yatu. Alang tanaman a dagul nung alang aldo. Nung mawala la reng tanaman, ala nong kanan reng tau, ala nong kanan reng miyayaliwang kakabie keti king yatu. Makakayap ya kekatamu ing aldo. Oneng potang reng aliwang elementu reng mituran king sala ning aldo, miyayaliwa ing malilyari kareni. Antimo, potang mabilad la reng malan tamu, lalangi la. Pota naman mabilad ya ing metung a kandila, lalambut ya. Potang mabibilad ya ing yeru, papali ya. Pota naman ibilad me ing metung a kending chokolati king lual, malalaso ya. Potang bilad me ing pantalun a maong, manimuti ya. Potang itamu, makabilad tamu lalu na nung mag-swimming tamu, ma-sunburn tamu. Miyayaliwang reaksyun king metung a simpling aldong akakit tamu king banua. E lalaut ing bageng iti king ebanghelyu tamu ngeni. Ing bining sinalbag ning ortelanu king ebanghelyu, ya ing amanu ning Guinu. Ing amanu ning Guinu, uling ibat ya king Guinu, malakas ya pa king epektu ning aldong pisasabian tamu. Ing amanu ning Guinu, maupaya ya. Sasabian na ning biblia king ing egana-ganang akakit tamu lelangan ne ning Dios kapamilatan na ning amanu na kabud. Makanyan ya ing agagawa na ning amanu na ning Guinu! Malyari yang milalang ing metung a bage pauli na ning amanu na. Malyari yang magbayu ing metung a sitwasyun pauli na ning upayang daralan na ning amanu na ning Guinu. Ing imposibli, maging posibli pauli na ning amanu na ning Guinu! Ngeni ing atensyun ning ebanghelyu e mu keng bining misalbag, nune pati na mu naman king lugar a nung nu ya digpa ing bining iti. Pare-parehung bini, oneng inyang digpa ne, miyayaliwang reaksyun ampon resulta ing milyari. Kalupa niya naman ning aldong pisasabian tamu – metung yang aldo, oneng miyayaliwang reaksyun ampon resulta ing akakit tamu. Ala yang diperensya ing bining misalbag. Kalupa ning amanu ning Guinu, ala yang dipektu ing amanu ning Guinu. E ta a sabing ating yang dipektu ing bining digpa king dalan o king mabatung gabun o king dikut a masuksuk. Ala yang dipektu, ing bining misalbag, Ing lugar a nu ya digpa ing bini iyang ating diperensya. Ing talimhaga ng Jesus tutuldu na kekatamu, king ing lugar a nu ya digpa ing bini, iya ing pusu ning tau. Ing pusu ning tau iyang tatanggap karing amanu ning Guinu. Ing pusu ning tau iyang magdisisyun nung tanggapan ne ining amanung iti o ali. Ing pusu ning tau, iyang magdisisyun nung patubuan ne ing tinggap ng amanu o ali at nung palabungan ne o ali. Agyang makananu ya pa kaupaya ing amanu ning Guinu, nung e taya mu rin buring tanggapan at patubuan at palabungan king pusu tamu, e ya mamunga. Bakit? Uling maragul ing respetu ning Dios king kekatamung “free will” o amanuan dang disisyun a bunga ning sarili tamung kaburian. Mengari ya mo king aldong pisasabian tamu nandin, agyang makananu ya pa anti kasala o kapali ing aldo, nung sabatan mu ing salang ini kapamilatan na ning metung a payung, e ya rin tumagus ing salang iti keka. Makanyan ya naman ing amanu ning Guinu, nung e me buring tanggapan, e na ka pilitan. Nung naman tanggapan meng e laus king lub mu, akwa na namang mate ampon malanat agyang pang maragul ne ing binunga niti. Atiu kekatamu ing susi, atiu king kapagnasan na ning pusu tamu nung tanggapan ta ya o ali ing amanung sasalbag ning Guinu king nanu mang oras king kekatamung pamibiebie. Ing grasyang daratang kekatamu as na karakal, Oneng nung ing grasyang ini, kusa ta lang panyabatan, e la miras kekatamu, e la mamunga, e la mika epektu king pamibiebie tamu. Oneng nung mabuu-buu ta yang tinggap ing amanu ning Guinu king mabilug tamung pangatau, mamunga ya iti at akit tamu ing bunga na king mismung pamibiebie tamu. Ma –bless ya ing bie tamu. Mamunga ya ing bie tamung kalupa at kawangis ne ning amanung digpa kekatamu. Uling ing amanu ning Guinu mitmu yang lugud, nung pepamungan ta ya ini king bie tamu, ing bie tamu mamunga ya namang mitmung lugud. Uling ing amanu ning Guinu kayapan ya, nung pepamungan ta ya ini king bie tamu, siguradu mung mitmung kayapan ing akit da ring tau kekatamu. E ta mag-adwa lub king pamananggap king bining sasalbag ning Guinu king kekatamung pusu. E ta sana masyadung marakal a pasubali o marakal a kasangkanan obat e ta ya mo atanggap ing amanu na. E ta sana gagawang panyabat tamu king grasyang bubulus na ning Guinu karing pusu tamu. E ta sana gagawang bage a makapigil king pamagyamut ning amanu ning Guinu king pusu tamu. Ala ta dapat kakalawatan king bie tamu a makasakal king pamaglabung na ning amanu king pusu tamu. Siguru ngeni kutnan ta ya ing sarili tamu. Memunga ne ing amanu ning Guinu king pamibiebie ko? Pilan nong bini reng mepuput at mete king lugar ning pusu ku? Pilan no reng bining dinagul na oneng ngeni, e no maibug kumabie pa? Pilan no reng bining silbag ning Guinu a mesayang mu? Ika ing makibat uling ika mu ing tatalan king susi ning talimhagang mebasa.

IV. Pamigunam

Meg-attend kung house blessing Guinu. Uling bayu ya ing bale ning kakaluguran ku, pepa-bless ne. Marakal la ring dinatang. Masaya. Marakal pamangan ampon kakilala. Kaibat na ning blessing, siyempre, tradisyun na ing manatchang barya kareng taung atiu karin. Menyalbag lang marakal a barya. Aku, malagwa kung meki samsaman. Kabang yatcha do pa, maka busni no reng palad ku ba kong akwa reng sasalbag da nang barya.Bayu la menyalbag barya, atin kung tatalnan a pamepe ampon bag. Tebili ko saguli reni uling nung tatalnan ko pa kabang manyalbag lang barya, ay Guinu, ala kung akwa agyang nanu mu! Inyang meyari na marakal ku rin ikwa Guinu. Mesaya ku uling metung ku kareng mekalikum a marakal a barya. Ay salamat Guinu. Atin na kung pang-gastus pota! Pota palang manyalbag lang grasya, Guinu, kailangan pala, makabusni la reng palad ku ne? Makayabang la, manenaya la reng gamat kung makabusni king grasyang daratang. Ampon importanti pala ala kang aliwang dadalan a nanu mang bage. Nung e ko pa tebili reng pamepe ku ampon bag, siguradu mung ala kung ikwa agayang metung. Ngening mebasa ya ing ebanghelyu, makanyan mu naman sa ing kakung disposisyun Guinu potang manyalbag na kang bini king pusu ku – makabusni ku sana pilubluban, kalupa da reng makabusni kung palad inyang manyalbag lang barya. At ala kung aliwa pang tatalnan a maka sumbagal king kakung buring akwang grasya. Makabusni ku sanang makabusni pusu Guinu potang manyalbag kang bini. Ala ku sanang aliwa pang kakalwatan potang mamie kang grasya. Saupan yu Guinu, ban mamunga ya ing grasya mu king bie ku. Amen.

V. Pamanahimik


VI. Tauling Panalangin

Ibpa, king lugud yu, darake ye kekami ing kekong amanu ban tumubu kareng kekaming pusu. Ala kong sawang mamie grasya kekami kalupa ning ortelanung menialbag bini king egana-ganang lugar. Labis-labis ing kekong babie kekami agyang marakal a besis, makasaradu la ring pusu mi. Saupan yu kaming tanggap king kekong grasya a makabusni pusu at pilubluban. Busni yo reng marimla ming pusu a e mamansin kareng grasyang babie yu kekami. Lako yo pangabihag reng pusu mi kareng bageng e makasaup king pamaglabung da reng bining digpa kareng pusu mi. Lako yo reng nanu man a gagapus keng pusu mi a maging sabat king pamananggap mi kareng grasya yu kekami. Saupan yong mamunga reng bining tenam yu kareng pusu mi Guinu. Papamungan yu la ban lalu keng maging kapakipakinabang king kekong kayarian. Amen.

VII. Kutang

1. Pilan no kayang bini reng tinubo at memunga king bie ko?
2. Pilan no kayang bini reng e tinubu?

Download here:
Page 1: http://www.mediafire.com/file/0rcp49fifl3co6t/07.10.11%20pg.%201.doc
Page 2: http://www.mediafire.com/file/vmgkx3p2t1b7i2u/07.10.11%20pg.%202.doc

Sunday, July 3, 2011

Kalabingapat a Domingo ning Ordinaryung Panaun


Lumapit ko kanaku, ikayung sablang mapagal na at kababayatnan

I. Pamuklat a Panalangin

Ibpa, king kekong paralan, maging mayan ing mabayat, maging kapaynauan ing kapagalan. Turuanan yu ke king paralan yu ban midinan keng kapaynawan king bie mi. Binie ye kekami I Jesus ban lapitan mi lalu na neng kababayatnan na kami king kekaming pamaglakbe keti king yatu. Bibie ne kekami ing paud nang mayan at tuturuanan na kaming maging kalupa ng mamu ampon mababa lub. Salamat Guinu king ganaka at lugud a panandaman mi king aldo-aldo. King kekong pamanantabe, king kekong alang sawang pamakiabe king daranasan ming kabayatnan. Salamat pu Guinu, Salamat. Amen.

II. Pamamasa

Mt.11: 25-30
25 King oras a iti nganang migsalitang Jesus, “Ibpa, Guinu na ning banua at yatu! Pasalamatan da ka uling pepakilala mu karing taung musmus l ing e mu pepakilala karing mangabiasa at maisip. 26 Wa, Ibpa, uling iti ya ing sarili mung tula at kaburian. 27 “ Ing sabla binie na kanaku ning Ibpa ku at alang makakilala king Anak nune mu ing Ibpa, at alang makakilala king Ibpa nune mu ing Anak at detang birian nang makakilala keya ning Anak. 28 “Lumapit kayu kanaku, ikayung sablang mapagal na at kababayatnan at dinan da kayung kapaynawan. 29 Pusanan ye ing paud ku at magaral kayu kanaku uling mamu ku at mababa lub, at manakit kayung kapaynawan. 30 Mayan yang idala ing paud ku at e mabayat ing papusan ku kekayu.”

III. Turu
Normal kekatamu king balu tamu nung nu ta munta potang atin tang partikular a problema o pamangailangan. Alimbawa, nung mamroblema ta kareng ipan tamu, ninu mo ing pupuntalan tamu? E mo ing dentista? Nung atin tamung problema kareng mata tamu, malagwa tamung mumunta kareng espesyalista kareng mata o kaya naman kareng optometrist. Nung reng sisesen tamung babi e la masyadung tataba o kaya naman manga- salunan la, malagwa tamung pupulayi king beterinaryu. Nung biglang ating mete kareng kamag-anak tamu, automatic king puntalan ta ya ing metung a funeraria at asikasuan ta no reng papelis para king libingan na. King bawat problema o pamangailangan, balu ta no reng puntalan tamu. Balu tamu, potang puntalan ta la rening taung a reni midinan kapakibatan ing pamangailangan tamu at alang dudang milako ing kapigaganakan tamu king ka-orasan muring ita. Ngeni, ing kutang. Pota mong atin tamung mabayat a kakargan king bie, nukarin tamu pupulayi? Potang atin tamung kabayatnan king bie a e tana a dinan solusyun, ninu ing pupuntalan tamu? Potang mamagkasakit tana king pamibibie tamu at balamu ala ta nang akakit a pamag-asa, nukarin tamu mumunta? E malagwang pakibatan ing kutang a ini. Kerakalan kareng tau, potang api-isip-isip da ne ing problema, e no manintun solusyun, nune dibersyun. Manintun na lang dibersyun uling agyang maka nanu de pang arapan ing problema da, e ya rin milalako. Iyang-iya ing balik-balik a problema. Iyang-iya ing paulit-ulit a magbalik king isipan dang e mipapainawa. Pauli na niti, dibersyun pin ing panintunan da bilang pakapata king sakit a dulut ning e milalakong problema. Inya, e ta dapat magtaka nung laganap ing bisyu ngeni. Ing bisyu, nanu ya man, metung yang dibersyun kareng taung mapagal na kareng kabayatnan a e milalako karela. Metung yang paralan ing bisyu ban mitakas la, agyang saguli mu, king problemang e naman mamako agyang makananu me pang solusyunan. Ing bisyu metung yang anti mong “ferry’s wheel” o “rueda” a akakit tamu neng malapit nang mag-piyesta. Potang sake kang rueda, iyukyat na ka king makatas, idurut na ka, ma-libang ka. Anti ka mong mikakawani king yatu potang sake kang rueda, anti ka mong mipapalapit king banwa a nung nukarin akakit mu ngan ing sabla potang atiu ka babo. Oneng potang meyari na, bisa ka’t ali, mibalik na ka na naman king yatung likuan mu. Makanyan ya ing bisyu. Ilako na ka king realidad agyang saguli mu. Ilako na ing sakit a panandaman mu. Oneng potang bandang tauli, mibalik ka murin king yatu, mibalik ya murin ing sakit a pekikuanan mung takasan. Ot mo makaniti ing malilyari kekatamu? Uling e tamu balu nung nu ta mulayi potang kababayatnan ta na. Isipan tamu king ing bisyu yang solusyun karing kabayatnan tamu. Oneng nanu ing malilyari kekatamu? Lalung daragul ing problema potang ing bisyu yang gagawan tamung solusyun kareng panandaman tamung kabayatnan. King ebanghelyu tamu ngeni, metung yang panagkat ing bibie na ning Guinu kareng taung kalupa tamung kababayatnan king bie inyang ngana: “ LUMAPIT KAYU KANAKU, IKAYUNG SABLANG MAPAGAL NA AT KABABAYATNAN “(v. 28). Agkatan na ka tamu ning Guinu king lumapit ta kaya. Iya ing puntalan tamu potang atin tang kabayatnan. Iya ing dapat panintunan tamu potang mamroblema ta na. E ta na manintun pang nanu pa mang dibersyun o bisyu a king isip tamu iyang makaibieng solusyun kareng kekatamung problema. Ing pamaglapit kang Kristo iyang panagkat na ning ebanghelyo tamu bilang pakibat kareng kabayatnan a panandaman tamu. Iya mu ing makaibie kekatamung kapasnauan at painawa kareng problemang daralan tamu uling tutu na ka tamung kaluguran at gaganakan. Imbes na king nanu-nanung bisyu o dibersyun ing makaibie kapasnauan kekatamu, pabusten ta ne ing Guinu king iya ing mamie kapasnauan kekatamu. Anang Jesus king ebanghelyo: ”DINAN DA KAYUNG KAPAYNAWAN” (V. 28) Ing kapaynawan a bibie na ning Guinu, kapaynawan yang tutu, kapaynawan a iya mu kabud ing makaibie. Pengaku ning Guinu kekatamu king ing babie nang kabayatnan kekatamu a buri nang pusanan tamu, MAYAN YANG IDALA AT E MABAYAT.(v. 30). Mabiasa ta king Guinu uling iya MAMU YA AT MABABA YA LUB (v. 29). Kerakalan kasi kareng daralan tang kabayatnan, bunga no ning ketasan ta lub. Mangadi tamu king Guinu, na sana, potang atin ta nang kakargan a kabayatnan king bie, iya kaagad ing pupuntalan tamu. Iya sana ing king isip tamu at ala nang aliwa pa. E tamu manintun dibersyun o bisyu king nanu mang paralan, nune ing Guinu sana iyang panintunan tamu at kaya tamu lumapit uling ustung linapit tamu keya, ing pangaku nang kapaynawan king mapagal tang isip iyang mibie kekatamu. Amen.

IV. Pamigunam


Minsan a aldo Guinu, mesora ku uling as naku karakal a pipian. King sora ku, likuan ku pa ing dapat kung pipian. Minta ku pa king SM ban milako ku sora king katambak a pipi. Inyang minuli kung magbengi na, disnan ku pa mu rin ing likuan kung dapat pipian. Merakal la pa pin, Guinu! Makanyan ke maralas gagawang solusyun king bie mi Guinu. Isipan mi mo ing dibersyun ampon ing bisyu iyang mamie kapasnawan kareng problema mi. Oneng potang kayari ning dibersyun o bisyu, iya mu naman ing dasnan ming problema. E na ke mebiasa Guinu. Imbes na keka ke mumunta at pupulayi potang marakal na ke problema, miyayaliwang bage ing gagawan mi nang panakap. Inya, lalu keng daragul problema. Dinan yu keng katahimikan Guinu. Mapagal na kami. Mapagal na keng durut-durut. Sinawa na keng magbakasakali kareng bage a balu mi naman e mamie tutung katahimikan at kapasnauan king bie mi. Ika kabud Guinu ing makaibie kekaming tutung kapaynauan kareng mapagal mi nang isip ampon katawan. Ika kabud Guinu, ika kabud. Amen.

V. Pamanahimik

VI. Tauling Panalangin

Ibpa, Salamat pu uling binie ye kekami ing mamu at mababa lub a Guinu ming Jesus. Nanu pu ing gawan mi nung ala yu? Nukarin ke pu munta ampon mulayi nung ala yu? Marakal na ke pu sibuknan a paralan ban maging mayan ing kekaming kakargan king pamibiebie oneng mabibigu kaming mabibigu. Lalu mu pung babayat ing kakargan mi, lalu mu pung magugulu ing kekaming pamibiebie. Turuanan yu ke pung lumapit a alang takut at alang pasubali king Guinung Jesus lalu na neng e mi na agyu ing kekaming problemang daralan. Dinan yu ke pung grasya king ipirmi mi kaya ing panimanman mi kabang mabibie kami. Uling iya kabud ing mamie kapaynawan at katahimikan kareng mapagal mi nang katawan at kaisipan. Turuanan yu keng maging kalupa nang mamu ampon mababa lub, uling kerakalan kareng kabayatnan ming daranasan, bunga no ning ketasan mi lub at kesyasan a pusu. Salamat pu Guinu. Salamat. Amen.

VII. Kutang
1. Pota mong daranas kung kabayatnan, ing Guinu mo iyang pupuntalan ku kaagad?

Download here:

Page 1: http://www.mediafire.com/file/2ono1rr19qc8gl4/07.03.11%20pg.%201.doc
Page 2: http://www.mediafire.com/file/b61d56g16dmyc65/07.03.11%20pg.%202.doc

 
Powered by Blogger.