Sunday, January 25, 2009

Katlung Dominggu ning Ordinaryung Panaun

Ing Pamaniaus nang Jesus karing Apat a Manasan


I. Pamuklat a Panalangin

Ibpa, salamat king kekong pamanagkat kekami. E yu kami mu inagkat ban maging kayabe da kayu king pamaglakbe mi keti yatu. Agkatanan yu kami naman ban magbayu kami bie. King pamanyatang ning kekong kayarian, agkatanan yu kaming sumisi kareng kasalanan mi at painggulutan mi la reng ugali ming e ustu. Malagwa mi sanang kaulan ing bie a tuturu yu Guinu ban kayabe yu ampon reng santos king banua, apilasan mi ing pamibiebie banal a manibatan mu kekayu. Matatag ke kapaniwalan king didenan yong grasya reng taung makibat king kekayung pamanyaus. E yu na ke man kumbiran king metung a bageng e mi naman agyu. Kapamilatan ning grasya yu, mididinan lang lakas agyang reng maina, maging lang banal reng makasalanan at mididenan lang bie reng malambat nang mete king kasalanan. Salamat Guinu. Salamat. Amen.


II. Pamamasa
Mk. 1:14-20
14 Inyang mesukul ya i Juan minta ya i Jesus king Galilea at penaral na ing Mayap a Balita a ibat king Dios. 15 ”Miras na ing mituldung panaun,” nganang sinabi, ”at malapit ne ing Kayarian ning Dios! b Sisian yu la at painggulutan ding kekayung kasalanan at maniwala kayu king Mayap a Balita!”
16 Kabang maglakad ya i Jesus king lele na ning Dagat-dagatan ning Galilea, ikit na la ding mikapatad a manasan, k i Simon at i Andres; yatsa re king danum ing karelang lambat. 17 Nganang Jesus karela, ” Tuki kayu kanaku at gawan da kayung manasan tau. ” 18 Kanita mu rin likuan da la ring karelang lambat at tinuki la kang Jesus.
19 E ya pa makaing mirayu king pamaglakad na, ikit na la ding mikapatad a Santiago at Juan, ding anak nang Zebedeo. Atyu la king karelang bangka; sasadia da la ring karelang lambat. 20 Inaus na la namang Jesus; kanita mu rin likuan de king bangka i tata ra a kayabe da ring makiupa at tinuki la kang Jesus.

III. Turu
Neng lalbug kekatamu, normal na mu ing mamie lang relief goods reng mapilan a organisasyun kareng pamilyang mi-albugan a bale. Nung e da man a-announce kareng memalen ini, mamie lang ticket ba lang makakuang relief goods reng miririnan tickets. Natural mu nung anti mong me-announce ngeni king ating mamie relief goods king plaza, mabilis ta sigurung mulayi papunta king plaza ba tamung makakuang relief king plaza. Makanyan mu naman nung midinan tamung ticket. Agyang midinan ta nang ticket, buri tamu maranun ta mu naman keng pila king pamangwang relief goods. Nung pate-pate tamu, marakal la reng muna kekatamu. Nung e tamu mabilis makibat king pamanyaus ning pamamie relief, muli tamung alang akwa. Agyang atin ta nang ticket a tatalnan, neng kai, kakapaltan ta mu pang relief uling mabagal tamung kinimut.

King ebanghelyu ta ngeni, anti ya mong storya da reng mekibat king pamanyaus relief goods ing milyari. I Jesus, menaral ya Galilea. Kabang menaral ya, ing pamanyaus na ini: “Sisian yu na at painggulutan yu na la ding kekayung kasalanan at maniwala na kayu king Mayap a Balita. “(v.15) Kening pamanyaus nang Jesus, balamu mamirapal ya king pamangailangan nang mipasiag ya ing balitang aini, at balamu mo e na ne malyari pang i-delay ing pamipasiag niti. At nung makaniti ya ka-urgent, o ka-pirapal ing pamipasiag nang Jesus, buri na sabian king importanti ya ini. At nung importanti ya ini, buri na naman sabian king dapat mung mabilis ta yang pakibatan ing pamanyaus a ini.

Inya e tamu magtaka obat inyang inaus nong Jesus di Simon ampon Andres, mabilis lang mekibat king pamanyaus nang Jesus. “Kanita mu rin,” ngana ning ebanghelyo, “likuan da la ring karelang lambat at tinuki la kang Jesus.”(v.18) Makanyan mu naman kareng mikapatad a Santiago at Juan, inyang inaus na la namang Jesus. “Kanita mu rin”, ngana ning ebanghelyo pasibayu, “likuan de king bangka I tata ra a kayabe da…” (v. 20)

Ing pamanyaus a ating pirapal, kailangan ya naman mipakibatan king pirapal. Buri nang Jesus king magbayu ta na pamibiebie, buri na paingulutan ta na ing matua tamung pamibiebie. At buri na, gawan ta na ini – ngeni na, at e bukas o kapilan pa man. Ing mabilis dang pamakibat ding disipulus iyang sasabi kekatamu king mabilis dya naman pekibatan ing pamanyaus nang Jesus a ini. Inya mabilis la naman memagbayu pamibiebie. Ing dati dang gagawan, likuan da. Ing dati dang estadu o kabilian, menaliwa ketang oras muring ita, inyang inaus nong Jesus.



Ing pamanyaus na ning Guinu, kalupa nya naman ning pamanyaus king relief goods. Nung e ta ya pakibatan ora mismu, e ta mitaganan king bibie nang grasya a mibibie karetang mabilis makibat king keyang pamanyaus. Inya ngeni, mamaus ya ing Guinu kekatamu, bayuan ta na ing pamibiebie tamu! Kukulisak na kekatamu : Painggulutan ta na ing kasalanan a manalipan kekatamu! At agkatan na ka tamu: “ Maniwala ta na king keyang mayap a balita.” Mabilis ta kayang makibat kareting pamanyaus a reni? Mabilis ta la kayang lakuan reng ugaling iyang-iya ing papakit tamu? Mabilis ta la kayang painggulutan reng bisyu, reng kasalanan, reng ugaling a lumon ta na a e makakayap kekatamu ampon kareng kautus tamung tao? Misip tamu. Nu anti kabilis ku kayang makibat king pamanyaus ning Guinu? Tandanan tamu, reng pate-pate king pamangwa karing relief goods, e la mididinan relief king bandang tauli uling e la mabilis mekibat king pamanyaus. Agyang retang atin nang tickets para king relief e la makasiguradung makakuang relief nung e la mabilis makipila king relief. Sana, e tamu naman kakawalan grasya potang ing Guinu iyang mamaus. Mabilis ta sanang makibat king keyang pamanagkat. Amen.

V. Pamigunam

Obat kaya makanyan tamu. Potang atiu ta king restaurant, buri tamu potang manorder tamu, dapat ora mismo, atiu ya ing waiter. Potang meyari ta nang manorder, buri tamu, kaagad-agad, sisilbi da na ing pamangan a inorder tamu. Nung pipila ta naman king linia king counter ning Jollibee o McDo, makanyan mu naman ing reaksyun tamu. Potang mabagal ing galo ning pila, sasabi tamu. E ta na bisa king mabagal a pakibat kareng magsilbi kekatamu. Buri tamu mabilis ing karelang pakibat kareng kekatamung kaburian.

Makanyan ya naman anyaran kekatamu ing Guinu. Mabilis dapat ing pakibat tamu potang iya ing mamaus. Nung ing anyaran na kekatamu king atin tamung itabiling pamanugali, e ta na dapat magpakabagal king dapat tang gawan. Potang atin tamung bisyu a dapat ilako, at anyaran na kekatamu ning Guinu king ituknang ta na ini, e ta na dapat mag-adwang isip. Ilako ta na ing bisyung ini ban mabilis ing kekatamu pakibat king anyaran ning Guinu. Balu tamu king ing Guinu, nung iya ing mamaus kekatamu, bibie na naman ing grasyang kailangan tamu ban saupan na ka tamu king pamagbayung bie a anyaran na. Inya, kailangan mu talaga, mabisa tamu, at tutung painggulutan tamu ing dapat tamung painggulutan. E ta masisira lub nung magkasakit tamu ustung magumpisa tamu king pamagbayung bie. Makanyan naman dapat pin ing mumunang epektu ning pamamintu king Guinu – king magbayu ya ing bie tamu. Siyempre, king umpisa, manibayu tamu king bayung bie, mamagkasakit pang bagya, pero, king lambatan, akit tamu king ing grasya ning Guinu, palakasan na katamu, at e tamu amamalayan king megbayu nya pin tutu pala ing pamibiebie tamu.

E tamu tatakut painggulutan ing lumang ugali tamu. Mas masanting ya at mas salese ya ing pamibiebie tamu king bieng anyaran na ning Guinu. Kareng taung mabilis a mekibat king pamanyaus ning Guinu king pamagbayu tamung bie, ila ring maka-enkwentru king Dios king karelang pamibiebie. E tamu magdili-dili potang pekibatan ta ya ing pamanyaus ning Guinu. Kayabe ta ya. E tamu milalako pamagtiwala, agyang mamagkasakit tamu king bayung bie a panagkat ning Guinu tamu. Amen.


V. Pamanahimik

VI. Tauling Panalangin
Ibpa, e yu ke buring manatili king kabilian a e masanting lalu na nung ing pamibiebie mi manatili ya king kasalanan. Ing kekong pamanagkat ban sisian mi la ampon painggulutan ing kasalanan mi, metung yang panagkat king pamagbayu ming bie. Saupan yu kami Guinu ban pakibatan mi ya ing kekong pamanagkat. E na ke pu sana kakapit king nanu mang kasalanan a iyang magsilbing sumbagal king pamagbayu ming bie. Dinan yu ke pung grasya ban painggulutan mi ing pamibiebie a makasalanan at e masanting. Ikayu ing managkat kekami, at uli na niti, maniwala kami king ikayu mu naman ing mamie kekami king grasyang kailangan mi ban makapagbayu na keng bie. Patawaran yu kami Guinu king kesyasan mi pusu. Patawaran yu kami king paulit-ulit ming pamikasala. Gawan yu keng banal a kalupa yu ban apilasan mi na ing bayung pamibiebie a tutung manibatan kekayu. Salamat pu Guinu. Salamat. Amen.

VII. Kutang
1. Nu anti ku kabilis makibat king pamaniaus ning Guinu?


Download here:


Sunday, January 18, 2009

Kadwang Dominggu ning Ordinaryung Panaun


Kapiestan ning Sto. Niño


I. Pamuklat a Panalangin

Ibpa, kaluguran yo reng anak inya buri yong lumapit kekayu. Kaluguran yu kami, uling guewa yu keng anak yu. E ke pu sana milalako kapanaligan ampon pamagtiwala kekayu. Dinen yu keng disposisyun a kalupa da reng anak a buu a kapanaligan ampon tiwala kareng matua da. Ausan da kayung ibpa. Kekayu ke sana mumulai neng mikakaproblema kami. At kekayu ke sana mipapaindatun, lalu na king kekong presensya king bie mi, agyang makapadurut kami king miyayaliwang kasakitan. Salamat Guinu. Salamat. Amen.


II. Pamamasa


Marcos 10:13-16


13 Lalapit da la ring mapilan a tau kang Jesus ding anak ba na lang itumpak karela ding gamat na, oneng pengamanuan da la ring alagad ding magdala. 14 Inyang apansin nang Jesus iti, mimua ya at sinabi na karela, “Paburen yu lang lumapit kanaku ding anak; e yu la babawalan, uling para king anti kareti ya ing Kayarian ning Dios. w 15 Tandanan yu: ing ninumang e tanggap king Kayarian ning Dios kalupa na ning pamananggap na ning anak a malati, e ya milub karin.” 16 At kinaul na la ding anak a mangalati; timpak na la ding gamat na king balang metung karela, at binendisyunan na la.

III. Turu


Itamung Pilipinu, metung ta na karing bansang mahilig kareng anak. Kareng aliwang bansa, lalu na kareng mangakwaltang bansa, metung yang pabayat ing mikaka-anak. Para karela kasi, maging sumbagal ya king pamanyulung king karelang pangabiayan ing mikaka-anak. Inya uling sigurung e la bisang mika-anak reng tau karin, malaus yang e daragul ing populasyun da. Pauli na niti, ing kerakalan kareng memalen da, tutua ampon mangatua na la. Inya e tamu magtaka obat marakal la kailangan care-givers reng bansang a reni. Uling e do pin masyadung katulan reng anak, diritak ya ing populasyun da.

Ing pamamasa tamu king ebanghelyu, kalupa nya naman ing malilyari karing bansang binanggit tamu. Reng mapilan a taung makapadurut kang Jesus, e da la naman katulan reng anak masyadu, lalu na uling as no karakal reni a dadalan da kang Jesus. King isip da, anti la mong istorbu kang Jesus reni. Oneng keni ta ya akit ing pusu nang Jesus lalu na para kareng kayanakan. Kaluguran nong Jesus reng kayanakan. E la pabayat. E la Istorbu. E la sumbagal king misyun na. At uling kaluguran no reni, pepalapitan no rening anak a buri dang itabi. Kinaul na la ampon binendisyunan at sinabi na, king kailangan tamung maging kalupa da rening anak a reni, uling kareng anti kareni ya mibie ing kayarian ning Dios.

Potang manalangin tamung “Ibpa mi”, e tamu sana kakalinguan, king itamu, anak na katamu ning Dios. At buri na ning Dios king manatili tamung anak na. Uling buri na ausan ta yang Ibpa, kaburian na king e ta milalako tiwala ampon kapanaligan keya, kalupa na mo ning pamagtiwala at kapanaligan ning metung a anak king keyang tata o ima. Ing disposisyun tamu, disposisyun ya dapat ning metung a anak, a magdipendi mu at maniwala mu king tatang na. Reng anak e la masyadung komplikadu pami-isip. Simpli la balu. Simpli la kapaniwalan. Potang magtiwala la, buu ya ing lub da. Potang ala yu i tata o i ima, siguradu mung panintunan da la. Potang atiu la ri ima ampo ri tata, ala yang kapigaganakan ing metung a anak. Ing simpling disposisyun a ini, iya mu naman ing buri nang malyari kekatamu ning Guinu. Simpling disposisyun. Simpling kapaniwalan. Buu ing kapanaligan king Dios a ausan tamung ibpa.

Ing maging modelu tamu king simpling disposisyun a ini, ya I Jesus. Ing Guinu tamu, kaluguran ne ing Ibpa na. Guewa na ngan ing inutus ning ibpa keya. Ing kapaniwalan ning Guinu king Ibpa, kapaniwalan yang alang pasubali, alang pamagduda. Buu ya ing lub na karas king Ibpa na uling balu na, ing lugud ning Ibpa tutung mibie keya. E ya milako kapanaligan I Jesus king Ibpa na uling keya na ngan peubaya ing sablang malilyari keya. Ing Ibpa iyang mibie kang Jesus king misyun na, iya mu naman ing memantabe king Guinu ban apatupad ne ing keyang misyun. Ing pamangan na, ing susulud na, ing miyayaliwang pamangailangan nang Jesus, binie na ning ibpa keya. Inya I Jesus mismu ing managkat kekatamu king pagtiwalan ta ya ing Ibpa. Keya menibatan ing egana-gana, at ibie na kekatamu ing nanu mang pamangailangan tamu king balang aldo ning pamibiebie tamu.

Ngening aldong iti, pagmasusian ta ya ing Sto. Niño. Ing Sto. Niño, yapin ya I Jesus, bilang metung a anak. Bilang metung a anak, denasan na naman ing pamangailangan na karing matua na. Denasan na naman ing takut potang ala lu. Denasan na naman ing pamangailangan na king lugud at lingap da. Denasan na naman ing pamagtiwala ampon kapanaligan kareng mangatua na. At uling aintindian na ing simpling disposisyun na ning metung a anak, tiru na kekatamu king ing relasyun a dapat miral kekatamu ampon king Dios metung ya dapat a relasyun kalupa ning metung a anak ampon tata.

Marakal tamu pigagap king bie. Uling pin mangaragul na katamu, milako na ining simpling disposisyun tamu a atiu inyang anak ta mu. Balu ta na ing gawan tamu. E ta na mangailangan saup. Neng atin tang problema, sasarilinan ta na mu. Kelinguan ta na ing simpling disposisyun tamu anti mong anak. E ta ya sana lalako ing kapanaligan ampon tiwalang alang pasubali king ibpa tamu. Ke nanu pa ing idad tamu, manatili ya sanang manatili kekatamu ing simpling disposisyun ning metung a anak, a magtiwala ampon manalig mung manaling king keyang Ibpa a makibalu ngan king egana-ganang makakayap ampon makasaup king bie . Amen.

V. Pamigunam

Nandin, sinabi tamu king metung ta na siguru kareng bansang mahilig kareng anak. Agyang tutu ya ini, makalungkut mung bagya king as no karakal reng anak a mayayabusu king kekatamung bansa. Uli na ning kakaluluan, marakal la reng anak akakit tamung magpalimus kareng dalan. Imbes na magaral la, magpalimus la rugu ba lang milako danup. Neng kai, sasarian dong papaglimusan deng matua reng anak da, uling mas marakal la reng malulunus kareng anak kesa kareng matuang magpalimus. Marakal la reng anak mu naman a maglayas karing pamilya da uling mamaltratuan da la. Muli lang palabuy-labuy reng anak a reni, at karin, apupulut da ing miyayaliwang bisyu. Marakal la naman reng anak a biktima king sexual harassment agyang king bale. Neng kai, maragul na la potang amamalayan da king e pala ustu ing daraptan da karela. Marakal la reng daranup a anak, uling king kakaluluan da reng pengari. Marakal la reng anak a e makapagaral agyang libri na ing public school. Marakal la reng anak a mamamate uling ala lang perang pamayad king ospital o kaya e makasaling panulu. King kekatamung BEC, makaspak salu ing dimdam ku king metung a ima inyang sinabi na king panenayan na niyang mate ing anak na, uling ala la kanung perang pang-opera king anak na. Milyari na king komunidad tamu iyan, at malilyari pa. At uling as na kasakit ing bie da ring anak ngeni, e tamu magtaka obat marakal karela biasa nong mag-drugs king murang idad. Inyang minsan, ating metung karing kayanakan tamu ing sinabi king servant leader na: “ obat kasakit pu ing bie?”


Ing utus na ning Guinu kekatamu : “ Paburen yong lumapit reng anak kanaku “. Utus ya ini, e ya request. Sana, tukyan ta ya ing utus a ini, king ilapit ta la reng anak king Guinu. Sana gawan tamu ing dake tamu, ban ilako ta la reng anak a maging biktima ning lipunan tamu king nanu mang e masanting a kabilianan. Panikuanan ta lang ilapit king Guinu. Ilako ta la king e mayap a sitwasyun. Nung akakit ta lang mayayabusu, gawa tamung paralan ban e la mayayabusu. Nung akakit ta lang daranup ampon mangailangan, gawa tamung paralan ban apakanan ampon a saupan ta la. Gawan tamu ing agyu tamu ban agawa tamu ing anyaran na ning Guinu kekatamu king ilapit ta la keya. Kaluguran no ning Guinu reng anak. Luguran ta la naman. Nung kaluguran ta ya ing Sto. Niño, luguran ta la naman reng egana-ganang anak antimo ing lugud tamu king Sto. Niño. Amen.

V. Pamanahimik

VI. Tauling Panalangin
Ibpa, pakamalan yo ring anak uling ila ring sasalamin king lupa nang Jesus. Ing anak yu, meging yang kalugud lugud kekayu. King keyang bieng mitmung tiwala ampon kapanaligan kekayu, pepakit na kekami nung makananu dapat ing relasyun mi kekayung Ibpa mi. Patawaran yu ke pu uling king kawalan ming tiwala king kekong kayapan. Ikayu ing Ibpang e mangalinguan kareng anak yu. Patawaran yu kami uling masyadu lang marakal reng anak a mayayabusu king kekaming bansa. Dinan yu ke pung lakas ban makagawa keng akbang ban milako ing makalunus dang kabilian. Dinan yu keng pusu ban ilapit mi la reng egana-ganang kayanakan kekayu uling balu mi, kaluguran yo reng anak at buri yong ilapit mi la kekayu. Salamat pu Guinu king pamanantabe yu kekami. E yu ke pu papaburen, ngeni ampon kapilanman. Amen.

VII. Kutang


1. Nanu mo ing akbang a gagawan ku ban santing la kabilian reng kayanakan king kanakung lugar?

Nung makaniti ing kabilian da reng anak ngeni, makananu ta la pang aidala king Guinu, ban bendisyunan na la ampon kaulan? Ninu pa kareng kayanakan ing makakilala king Guinu tamu, ngening agyang rening matua da e do apagkatiwalan? Ninu pa karela ing maniwalang atin lang Ibpang lulugud ampon lilingap karela, ngening, e da pa penandaman king mismung pamilya da ing lugud ning metung a tata o ima? Makananu ta lang turuanan a magtiwala ampon manalig king Ibpa, ngening ni kanan, ni libru, ni panulu, ni pang-operasyun, e mabibie at alang mamie karela? At potang dagul la reni, isipan tamu mo, lugud la kareng kapara dang tau ? Isipan tamu mo king kilalanan de ing Guinu ?

Download here:




Sunday, January 11, 2009

Ing Pangabinyag nang Jesus


Ing Pamanaral nang Juan a Maminyag


I. Pamuklat a Panalangin

Ibpa, king pamanyatang ning kekong Anak, I Jesus, tinubud ye I Juan Bautista ban ituru na kaming maging mapagkumbaba. Pasalamat ke pung dakal uling pauli ning kapamintuan ning kekang Anak, I Jesus lalung meging matimid ing dapat mu pu maging mapakumbaba kami at mapamintu king kekang kaburyan. Amen.


II. Pamamasa

Marcos 1:7-11

7Nganang menaral Juan, “Lalu yang mayupaya kesa kanaku ing daratang a katuki ku; e ku man karapatdapat agyang kalag mu karing tali nang sandalyas. 8Bibinyagan da kayu king danum, oneng binyagan na kayu king Banal a Espiritu.” 9E melambat dinatang ya i Jesus ibat Nazaret, Galilea, at bininyag neng Juan king Ilug ning Jordan. 10Kabud kasaka nang Jesus king danum ikit neng mibuklat ing banua at ikit ne ing Espiritu titipa ya keya antimo ing metung a patipati. 11Meramdam ya ing metung a siwalang ibat banua. Ngana, “Ika ing pakamalan kung Anak; keka tutu kung matutula.”

III. Turu

Meyari ne ing pekamalambat a ukasyun keti kekatamu at iti yapin ing Pasku. Siguradu mung mig enjoy tang ustu, uling asne tutung kakaba ing pamagselebra tamu kaniti. Masaya at mabsing tutu, agya pang mapagal at dakal tamu megastus. Pero e tamu binang isipan ing gastus, nune mas isipan tamu ing makapamye saya uling misan mu iti king pabanua. Nya atin ping kanta na “Sana kanu aldo-aldo Pasku”, Uling aliwa ya talaga ing Pasku keti kekatamu. Akit mu talaga ing tutung pamikalugud at kapayapan kareng lupa dareng tau.

At ngeni arapan tane man ing bayung banua, pero ing kutang, ustu bang sabyan tamung bayung banua. E wari dapat lumang banua uling metua ne naman ing yatu at metua tamu namang pabanua. “Old Year instead na New Year”. Pero ing akamulatan at talagang gagamitan tamu yapin ing bayu yang banua. At uling bayu ya, pwedi tang pasibayung mag-umpisa, at kalingwan na ing mapait a milabas, ing luma. Dirinan na katamung mayap a oras ning bayung banua ban lalung magpursiging maging masanting a pamibie-bie e mu king materyal a bage nune kin mu namang ispiritwal.

At king bayung banuang iti, malyari tayang maging giya o tuntunan ing mebasang ebanghelyu. I Juan, bista man pisan ne ing Talapagligtas, ing Ginu tang Jesu Kristo, e na pigmaragul iti. E na pigmaragul ing kayang pusisyun, bagkus migpakumbaba yang e mu nanu. Nung itamu mu I Juan, ing igulisak tamu siguru, makaniti “Pakilala kekayu ing pisan ku ing talapagligtas, Pisan ke yan, malakas ku kanyan.” Pero e makanyan ing tutung Juan, uling ing sinabi na makaniti “Lalu yang mayupaya kesa kanaku ing daratang a katuki ku; e ku man karapatdapat agyang kalag mu karing tali nang sandalyas.”


Nanu ngeni ing giyang akwa tamu? “KAPAKUMBABAN” byasang manupaya, uling ing byasang manupaya tutu yang mayupaya. Iti sana ing miral kekatamu ngening banuang iti.

Ing Ginu tang Jesu Kristo, bista man ya ing Bugtung Anak ning Dios Ibpa, masala tang ikit king ebanghelyu ing kayang “KAPAMINTUAN at PAMAGING TUNE LIDER o ARI” peintulutan ne ing kayang pisan na binyagan ne agya pang ala yang nanu mang bakas a kasalanan, uling iti yang kaburyan ning kayang Ibpa. Memintu yang mitmung kababan lub. At dening adwang giyang areni, kapakumbaban at kapamintuan king kaburyan ning Ibpa ila ring pwedi tang maging armas ban maging mayap tang lider, mayap a pengari, mayap a manager, mayap a titser at mayap a tau.

At nung rening giyang areni ilang biyayan tamu king bayung banuang iti, tutu ping maging banua ya iti, o “Heaven ya iti”. Iti ya ing panagkat ning Ginu kekatamu at miral sa iti busal tamu. Uling makasiguru tamu maramdam aldo-aldo king bie tamu na ing Dios Ibpa tutu yang matula kekatamu. “Ika ing pakamalan kung Anak; keka tutu kung matutula.” Amen.

V. Pamigunam

Nyang bayu ya mamakbung ing bayung banua, tradisyun na king mabilug a yatu ing awsan dang “Count Down”. Panayan taya ing alas dosi ning 31 ning Disyembri, at mamilang tamung 9, 8, 7, 6, 5, 4, 3, 2, 1, 0 at kanita tamu maglundag, magsaya at mipapag grit Happy New Year! Kabuklat ning Bayung Banua makalawe ta ngan king oras, uling tutu yang importanti ing oras king bie tamu. We always look our watch. At sana king bayung banua at king daratang pang dakal a Heaven/Banua, parati tayang lawen ing WATCH tamu. Watch always our WATCH.

W - watch our Words,
A - watch our Actions,
T - watch our Thoughts,
C - watch our Character,
H - watch our Heart and Health.

Ing kutang ning Ginung Jesus kekatamu ngeni. King banuang milabas, linawe me bang miyamas-amas ing WATCH mo? Atin ka bang KAPAKUMBABAN at KAPAMINTUAN king KABURYAN NING APUNG GINU? Amen.


V. Pamanahimik

VI. Tauling Panalangin

Ginung Dios, dakal pung dakal a salamat king binie yung grasya king matuang banua. Manalig kepu kekayu na sopan yu kepung lumawe at mibule kareng kekaming kanya-kanyang WATCH. Pabustan yu pung king bayung banuang iti, ing parati milang Watch our Watch. Iti pu anyaran mi at pasalamatan mi king lagyu ning keka yung Anak, I Jesus at king pamanantabe ning Banal yung Espiritu. Amen.


VII. Kutang

1. Nanu lamo reng pepalwal tamung amanung memye pag-asa o tula kareng kalupa tang tau nyang milabas a banua?
2. Nanu la kaya reng planu tamung gawan ngening bayung banua?



Download here:



Sunday, January 4, 2009

Solemnidad ning Epifanio


Ing Pamandalo da ring Taung Mangabiasa


I. Pamuklat a Panalangin

Ibpa, ngening aldong iti, pepakilala ye ing kekong anak a I Jesus kareng taung e makakilala keya. Kapamilatan na ning sala yu, ikit de ing sala ning bie, ing aslag ning meto sicluban. Pakilala mya naman kekaming manintun keya ban mipaldan kami king nanu mang dadalan ming problema king bie. Pakilala mya naman kekami ing kekong pakamalan a anak ban panandaman mi ing lugud yu kekami Guinu. Ikayu ing mamie pamag-asa kareng taung manatili king dalumdum. E yo lalako reng batwin yu king banwa ban e mu naman milalako ing pamag-asa ming manatili pauli nang Jesus. Salamat Guinu. Salamat. Amen.


II. Pamamasa


Mateo 2:1-12


1 Mibait ya I Jesus king Betlehem, Judea, kanitang panaun nang Aring Herodes. E melambat dinatang la Jerusalem ding mapilan a Mangabiasa, ding taung magaral king pangimut da ring batuin; menibatan la king Aslagan 2 at kukutang da: “ Nu ya karin ing bayung bait a Ari da ring Judio? Ikit mi yang sinlag ing batuin na king aslagan at dinatang kami keti ba mi yang samban.”
3 Inyang dimdam nang Aring Herodes iti tutu yang megulu isip, antimu rin ing mabilug a Jerusalem. 4 Pepayaus na la at tinipun ding pamuntuk da ring pari at ding talaturu ning Kautusan at kitang na karela,: Nu ya mibait ing Cristo”
5 Ngarang mekibat, “ King Betlehem, Judea uling sinulat na pu ning propeta:
6 ‘Ika, Betlehem, king sakup nang Juda, e ka mitauli king makananu pa man karing manimuna nang balen ning Juda; uling keka ya manibatan ing metung a pamuntuk a manibala king balen kung Israel.’ “
7Inya pepayaus na lang Herodes at pinulung pasalikut ding Mangabiasa; inusisa na at abalu karela nung kapilan de ikit ing batuin. 8 Kaybat pepelakuan na na lang papunta Betlehem a kayabe na niting panabilin: “Munta kayu at panintunan yeng masalese ing anak. Potang ikit yu ne, ipabalu yung agad kanaku ban aku man munta ku at samban ke.”
9 Meko la kaybat dang dimdam ing panabilin na ning ari. Kabang dalan ing batuin-ing mismung batuin a ikit da king Aslagan-minuna ne naman karela angga king miras ya at tinuknang tulid na ning lugal a kabilian ning anak. 10 Metula lang e mu nanu ding Mangabiasa panakit da king batuin. 11 Kalub da king bale, disnan de ing anak king siping nang Mariang ima na; siniklaud b la king arapan na at simban de. Kaybat biklat da la ring regalung darala da, at dininan deng gintu, insenso, at mira. 12 Meyaus ing karelang pansin king kapamilatan ning metung a paninap king e na la magbalik pa kang Herodes. Inya menaliwa lang dalan ding Mangiabasa king pamagbalik da king karelang bansa.

III. Turu

Neng manalbe tamung telebisyon, neng kai atin tamung apapanalbeng istorya a milyari king tune a bie, a nung nukarin ing metung a tau, meragul yang e no kilala reng matua na. Inyang anak ya siguru, uli ning kakaluluan, mengapilitan la reng pengari na a ipayampun da nya mu ba da nya rugung a dinan a masanting a pamibiebie. Ngening dinagul ne ining anak, panintunan no rening matuang e na pa akilala. Ating storya a neng kai magtagumpe dong apanyaliksikan nung ninu at nukarin la reng matua da. Reng aliwa naman, e la magtagumpe at akwa dang mate rugu a e do ikit rening matua dang buring akit.

King ebanghelyu tamu ngening domingu, ating mapilan a mangabiasa a manintun kang Jesus. E de kilala I Jesus oneng buri deng akilala. Balu da mu na kapamilatan da reng batuin king banua, ating taung mibait a tutung maulaga ampon mayupaya king yatu. Kalupa da reng istoryang sasabian tamung panalben ta king telebisyon, ila mu naman, e la tinuknang menyaliksik anggang e de ikit at akilala nung ninu ing taung mibait a ini a marangal ampon mayupaya. Pengutang de, meglakbe la. As na kalaut ing penibatan da. Megdala-dala la pang regalu a ibat king karelang penibatan ba dya rugung akit ining panintunan dang e da kakilala. Kaybat, inyang meging malino na ing direksyun ampon sinyalis nung nukarin de atabmuan, pintalan de. At inyang ikit da ne nung nukarin ya mibait, mengapamulala la king karelang ikit. Ing isipan dang ari a mibait a tutuldu da ring batuin king banua, metung ya pa lang maluka a mibait king metung a ordinaryung bale. Ing isipan dang mayupayang tau a sisinyal da reng batuin, megpakilala yang e makualta o marangal, nune metung a taung kalupa da ring marakal a ordinaryung tau a mibait keti yatu. E da siguru isip-isipan a dasnan de ing ordinaryu ampon simpling kebaitan ning taung isipan da king iya ing amanuan dang Cristo.

Nung marakal la reng taung manintun kareng matua dang e da akilala, mas marakal la reng taung bisang makakilala kang Kristo. At potang bukal talaga king lub da king buri deng akilala ing Guinu, e la mabibigu uling ing Guinu mismu iyang, magpakilala king sarili na kareng taung tutung manintun keya. Marakal kekatamu, manintun tamung kapayapan, katahimikan king bie, lugud ampon lingap. Nung reni reng panintunan tamu king bie, akit ta la ngan reni potang tutu ta neng ikit ing Guinu king pamibiebie tamu. Anggang ing panintunan tamu aliwa I Kristo, e tamu tuknang durut-durut king bie at malilili kareng pangawan tamung e maka Dios. Anggang aliwa ing Guinu iyang sentru ning pamibiebie tamu, e tamu mipaindatun, e tamu mika katahimikan, e tamu midinan sala, e tamu panandaman ing tutung lugud a manibatan mu keya. Mapalyaring panintunan tamu ing sarili tamung kanuanan at ligaya kareng miyayaliwang bage o tau, pero reni ngan, lalabas la ampon mamako kalupa ning danum a mamagus king ilug. E tamu mipapakabsian king saya a manibatan kareng tau o nanu mang bage. Kulang mung kulang iti. Oneng nung ing Guinu iyang tutung panintunan tamu king bie, iya na mismu ing sinabi kekatamu king pakabsian na ka tamung e mu nanu. Ing bie na iyang maging bie tamu, ing lugud na iyang lugud tamu.
Buri ta ya talagang takman ing masayang pamibiebie? Buri ta ya talagang akit ing bieng mitmung lugud, mitmung pamag-asa ampon mitmung kasalpantayanan at pamagtiwala? Akit ta ya ini nung tutu ta yang panintunan king bie tamu ing Guinung Jesus. Iya ing dalan a binie ning Ibpa ban tukyan tamu.

E masakit panintunan ing Guinu. E ya malaut. Ing Guinu malapit ya kareng taung misasakitan. Malapit ya kareng kalulu. Malapit ya kareng milalako na pamag-asa king bie, karing malilili ampon mababalisa. Kareng taung lulungkut ampon mangulila, kareng taung mamagkasakit at kababayatnan. Kareng taung milelele uling karing ugali dang e da atanggap ning komunidad, malapit ya ing Guinu. Kareng tuneng manintun keya, ing Guinu, ipapasiag na ing sarili na kalupa na mo nung makananu na pepasiag ing sarili na karening mapilan a mangabiasang manintun keya, a binasa tamu king ebanghelyo. Inya nung metung tamu karetang taung manintun a kayabe ampon lugud king bie, malagwa ta yang akit ing Guinu at malagwa ta ya naman panandaman ing keyang presensya king bie tamu. Kayabe ta ya king balang akbang a gagawan tamu king pamaglakbe tamu keti yatu.

Ngening bayung banwa na, e ta ya patugutnan panintunan ing presensya ning Guinu king bie tamu. Agyang madalumdum na ing akakit tamu, mamie ya pa murin a sala kalupa da ring batuin king bie tamu ban magsilbing guiya king bie tamu. Panintunan ta ya ing Guinu. Iya ing bili tamu king sentru ning pamibiebie tamu. Amen.

V. Pamigunam

Mahilig tamung gagawang New Year’s Resolution king bie tamu. Balang bayung banwa, buri tamu atin tamung akit a pamagbayu king bie. Uling marakal la kekatamu reng mamagkasakit king bie, neng kai, e na milalako ing atensyun tamu kareng pigagap at problema tamung pampinansyal. E naman marok ini. Agyang ninu makaniti ya ing isipan da. Masakit ing bie ngeni. Ating mapilan kekatamu, e da man balu nung nukarin la kumang kanan da potang bengi. Oneng, lauen ta ne mo ing pamibiebie tamung pasibayu? Libutad da rening kasakitan a panandaman tamu, akakit ta ya pa kaya ing Guinu? Panintunan ta ya pa kaya king bie tamo libutad da rening kapagsubukan a daratang kekatamo? Potang talanga tamu banwa neng bengi ning pamibiebie tamu, madalumdum ngan kaya ing akakit tamo? Nung e taya panintunan ing Guinu king bie tamu, balang talanga ta babo banwa, madalumdum ngan ing akakit tamu. Oneng nung panintunan ta ya ing Guinu, balang talanga ta babo banwa, manakit tamung batwin a kislap-kislap king libutad ning banwang madalumdum. Reng taung manintun king Guinu, e la kakapaltan batuin a kislap-kislap king bie da. E ya ngan madalumdum ing bie da. Manakit la pang batuin a mamie direksyun karela papunta kang Jesus. E yo papaburen matatda reng batuin a mamie pamag-asa kekatamu king bie. E tamu papaburen matatda la reng batuin ning pamag-asa tamu, agyang makapadurut pa ing dalumdum ning bie tamu. E tamu tutuknangan panintunan ta ya ing Guinu uling ipasiag na kekatamu ing sarili na nung manatili tamung tapat ampon magtiwala keya. Amen.

V. Pamanahimik

VI. Tauling Panalangin


Ibpa, ngening aldong iti, pepakilala ye ing Guinung Jesus kareng taung manintun king anak yu. E miya naman pu sana akakalinguan panintunan ing Guinu ming Jesus. Libutad ning marakal a pigagap king bie, e mi ya sana kakalinguan panintunan ing tutung sibul ning kekaming kapayapan at katahimikan king bie. Panalangin mi pu, king ipakilala ye pu ing kekong anak kareng e pa makakilala keya. Kareng taung manintun katahimikan ampon kapayapan. Kareng taung manintun lugud ampon lingap. Kareng taung mayap a pilubluban, ipakilala ye pu ing kekong anak. Amen.

VII. Kutang


1. Pota kayang daralumdum ya ing bie ku karing problema, manakit ku pa kayang batuin a mitutuldu kanaku king Ginu?


Download here:



Thursday, January 1, 2009

Solemnidad nang Birhen Maria, Indu ning Guinu


Ing Pangarinan nang Lagyung Jesus


I. Pamuklat a Panalangin

Ibpa, ngening aldong iti, a nung nukarin pagmasusian mi ya ing panga indu nang Maria, pasalamat kami kekayu uling dinenan yu keng metung a indu a malalam a kasalpantayan karing egana-ganang sinabi yu. Panalangin mi pu, king lumalam kami naman kasalpantayanan kalupa na. Panalangin mi naman, king mabiasa kaming migunam karing malilyari kekami king bie mi aldo-aldo ban lalu mi lang aintindian reng kaburian yu king pamibiebie mi. Dinenan yu keng indu a malinis at mapamintu kekayu. Kalupa na, gawan yu ke pung malinis ampon mapamintu king kaburian yu kekami. Salamat Guinu. Salamat. Amen.


II. Pamamasa


Lucas 2:16-21


16 Inya memalagua lang meko at atagpuan de i Maria at i Jose, at ikit de ing bingut a makakera king lilibangan. 17 Panakit da ring pastul king bingut, belita da karela ing sinabi na ning anghel tungkul keya. 18 At mipamulala la ding sablang mekaramdam king belita da ring pastul. 19 Mitanam la deting bage king pamisip nang Maria at migunamgunam ya tungkul kareti. 20 Mibalik la king marangle ding pastul a pupuri king Dios uli na ning sablang dimdam da at ikit; makayakma ngan king sinabi na ning anghel karela.
21 Kalabas na ning paruminggu, inyang miras na ing aldo masirkunsisyun p ya ing bingut, pemalagyuan deng Jesus, ing lagyung binie na ning anghel bayu ya pa mipangagli.

III. Turu


Ing metung a babai, balu na ing sinyalis nang babie ning katawan na potang mabuktut ne. Balu na nung makananu ing kakagli, nung makananu manaliwa ing gana na king pamangan. Balu na naman king paminsanminsan, ating oras a makasumpung ya kabuysitan. Mas kalakalale ya. Ing dati nang gagawan inyang e ya pa mabuktut, e na ngan agagawa ngeni uling mabuktut ne. Ing bie na king kilub ning siyam a bulan manaliwa yang bagya. At siguru lalu yang manaliwa potang ibait na ne ing anak na.

Ing kekatamung ebanghelyu, tungkul ya kang Maria, a indu nang Jesus. E na kalupa karing aliwang babai a binanggit tamu, I Maria, mapalyaring e na ngan aintindian ing malilyari keya. Oneng siguru pagpilitan nang aintindian ing malilyari keya. Nung ika mo ing babaing mabuktut, makananu me mong dalan king kekang sinapupunan ing anak a balu mu anak ne ning Dios? Makananu me mong aintindian ing pangabuktut mu ngening ala ka pa naman a karelasyun king ninumang lalaki? Makananu mo ing panandaman mu ngening ing anak a atiu king sinapupunan mu, milalang ya lalam ning upaya ning Banal a Espiritu? At makananu meng sesen ing mibait a anak mu a balu mung anak ne ning Dios? At kabang daragul ya mo, malyari me kayang kamuanan ining anak a ini a balu mung anak ne ning Dios? Makananu meng pakiutusan ing anak mu nung balu mung anak ne ning Dios? Masakit a bage para aintindian ne ning metung a babai rening kutang tamu. Inya ana ning ebanghelyu kekatamu tungkul kang Maria:” Mitanam la deting bage king pamisip nang Maria at migunamgunam ya tungkul kareti.” (v. 19) Tinggap na king kasalpantayanan ining egana-ganang milyari keya, migunam-gunam ya ban lalu na pang aintindian ining malilyari keya.

Ing kekatamung kasalpantayanan e na buring sabian tatanggapan ta nang tatanggapan ing egana-ganang sasabian da kekatamu king pisamban agyang e tamu aintindian ini. Ing tutung kasalpantayanan, manyad ya naman pamipalino ban lalu ta yang aintindian ing paniwalan tamu. Kuntoru aintindian ta ya kasi ing metung a bage, lalu yang lilino kekatamu at lalu ta lang anamnaman rening bage a tinggap tamu king kekatamung kasalpantayanan. Oneng makananu ta no man aintindian rening paniwalan tamu nung e tala pigunaman? Nung atin tamung ababalung apapalino da tungkul king kasalpantayanan tamu, manintun ta pa kayang panaun ban pigunaman ta la rening bageng apapalino da kekatamo? King bandang tauli, ing taung mitmung kasalpantayanan ya ing taung manahimik neng daramdaman na ing pamipalino ning amanu ning Guinu. Ing taung biasang manahimik ban migunam ya kareng bageng dimdam na, iya bandang tauli ing tutung makaintindi kareng amanu ning Guinu at ing mensahi na para keya. Kalupa nang Maria, a mitmung kasalpantayanan, reng taung lalalam a kasalpantayanan, ila reng taung biasang migunam kareng malilyari karela king bie. Uling nung e tamu biasang migunam kareng amanu ning Guinu at karing malilyari kekatamu king bie, palampasan tamu ing oportunidad a lalu yang lumalam ing kekatamung kasalpantayanan. Palampasan ta ya ing oportunidad ban turu na katamu ning Espiritu king malilyari king bie tamu.

I Maria, indu ne ning Dios, uling indu neng Jesus. E ta ya apikawani ing panga-Dios nang Kristu king panga-tau na. Uling e ta ya pin apikawani iti, paniwalan tamu king I Maria, tutu neng indung Jesus a tutung Dios ampong tutung tau. Inya makanyan neng ausan ning Santa Iglesia I Maria bilang indu ning Dios, uling indu ne I Jesus. Reng Kristianu karing aliwang sekta, e da atanggap king I Maria indu ne ning Dios. Sasabian da king I Maria, indu niya mung Jesus – itang pangatau namung Jesus, at aliwa ing panga-Dios na. Imposibli kanu king mika indu ya ing Dios! King pamisip da, kakawani de ing panga-tau nang Jesus king panga-Dios na. E ya makanyan kekatamung katoliku. Uling I Jesus e me apikawani ing panga-Dios na king panga-tau na, ausan ta yang indu ne ning Dios I Maria. Metung yang maragul a karangalan para kang Maria iti. Alang taung lelangan keti yatu ing mika karangalan a ausan dang indu ning Dios nune kang Maria.

Manalangin tamu king Indu tamu. Ngening magumpisa ya ing banua, anyaran ta keya king turuanan na katamung Maria nung makananung migunam kalupa na. King turuanan na katamu sanang makiramdam at manahimik neng magsalita ya ing Guinu king pamibiebie tamu at pigunaman ing gagawan na ning Dios kekatamu king balang aldo. I Maria ya ing modelo ning kasalpantayanan tamu. Pauli ning maragul nang kasalpantayanan, mika katuparan ing egana-ganang planu na ning Dios para keya ampon kekatamu. Maria, indu ning Dios, ipanalangin mu kaming makasalanan! Ilapit yu kami king anak yung Jesus! Amen.

V. Pamigunam
Pagumpisan ta ya ing banwa king aldong ausan tamung New Year’s Day. Wa, ustu ya ini. Oneng kekatamung Kristiyanu, oini ing aldo a nung nukarin, pagmasusian ta ya ing panga Indu nang Maria – I Maria bilang indu ning Dios. Masakit yang pagumpisan ing bie nung alang indu. Makaniti ya naman king bie spiritual. Masakit tamung magumpisa king bie spiritual, nung ala mu namang indu. I Jesus, inumpisan ne ing pamibiebie na keti king yatu, kapamilatan na ning indu na, a I Maria. At inyang inari neng Jesus ing misyun na keti king yatu king kalbaryu, inari neng kayabe ne ing indu na, I Maria. Masakit ta yang aintindian ing bie kristiyanu tamu nung ala yu I Maria ban mantabe kekatamu. E ya Dios I Maria, e ya diwata. Kalupa tayang tau. Mibait ya naman. Memagkasakit ya naman. Oneng agyang mipadurutnan ya king sitwasyun a masakit kalupa tamu, ing tetagan na ning kasalpantayanan na iyang kapuri-puri keya. Ing linis ning kaladua na iyang lalauen tamu anti mong modelu king kekatamung pamibiebie. At ing pamaglakbe na king bie na, a kayabe ne ing anak na iyang buri tamu mu naman gawan neng tutukyan ta ya ing Guinu tamung Jesus. Ngening aldong iti, bayung banwa, ausan ta ya I Maria. Anyaran ta keya king saupan na ka tamu ngening bayung banwang iti. Saupan na katamu ban lumalam pa sana ing kasalpantayanan tamu, ban mabiasa ta pang migunam king malilyari kekatamu king bie, ban mabiasa tamung maglakbe kayabe ta ya I Kristo a tikyan nang Maria anggang king kalbaryo. I Mariang indu ning Dios, indu ta ya naman. Sana, kalupa ning metung a anak, e tamu tatakut munta king indu tamung Maria. E tamu sana mag-alinlangan manyad saup keya, lalu na potang magkasakit tanang tutu king pamibiebie tamu. Anyaran ta kang Maria, king antabayanan na katamu ngeni, at king oras ning kekatamung kamatayan. At sana, lalu na katamung ilapit king anak na a I Jesus. Amen.


V. Pamanahimik

VI. Tauling Panalangin
Ibpa, inaus ye I Maria ban maging indu ning anak yu I Jesus. Pinili ye I Maria uling kalugud-lugud ya kekayu. Uling mitmu ya king grasya, pinili ye bilang indu ning anak yu at indu mi ngan. Megumpisa ya pu ing pamibiebie ning Guinu mi keti yatu, kayabe ne I Maria, meyari ya naman pu kayabe na. Ibie ye pu kekami ing indu mi bilang mamantabe king kekaming pamibiebie. Ban kanita, agyang king oras ning kekaming kamatayan, atiu ya king lele mi, mamantabe kekami. Pasalamat ke pu kekayu Guinu, uling kang Maria, aintindian mi king ing kasalpantayanan mi, metung yang grasyang binie yu kekami, king ing pamigunam mi kareng malilyari king bie mi, ilang paralan ban lalu mi yang aintindian ing kaburian yu para kekami. Salamat Guinu. Salamat. Amen.

VII. Kutang

1. Migunam tamu karing milyari kekatamu inyang milabasan a banwa. Nanu mo ing mensahi ning Guinu kekatamu king milabasan a banwa?
Download here:

 
Powered by Blogger.