Kadwangpulu’t anam a Domingo ning Ordinaryung Panaun

Ing Talimhaga tungkul karing Adwang Mikapatad a Lalaki

I. Pamuklat a Panalangin

Ibpa, uling ikayu ing Dios a tutupad kareng egana-ganang amanung sasabian yu kekami, buri yu naman maging tapat kami kareng amanung sasabian mi. Turuanan yu kami ban balu ming daptan reng pangaku mi. Turuanan yu kami ban reng amanung manibatan karing asbuk mi, maging tutu la ampon midinan lang kaganapan karing pamibiebie mi. Potang magkulangan ke king dapat Guinu, ibalik yu kami king ustung dalan ban e mu kabud king salita ing gagawan ming kapurian king kekang lagiu nune pati na king dapat da ring pamibiebie mi. Salamat Guinu. Salamat. Amen.


II. Pamamasa

Mt.21:28-32

28 “Nanu ing pamalak yu kanini? Ating metung a taung ating aduang anak a lalaki. Lepitan ne ing pangane at ngana, ‘Anak, munta ka king mulahan ubas at magobra ka karin.’ 29 Pekibat ning anak, ‘E ku biasa.’ Oneng kaybat, minaliwa ya isip at minta ya king mulahan ubas. 30 Kaybat na nita, minta ya ing tata king kadua at makanyan munaman ing inutus na. ‘Opu, munta ku,’ nganang mekibat. Oneng e ya minta. 31 Ninu karing adua ing tinupad king kaburian na ning tata?” Ítang pangane,” ngarang mekibat. “Sasabian ku ngeni kekayu,” nganang Jesus karela, “muna la pang lungub king Kayarian ning Dios kesa kekayu ding talapanyingil buis ampon ding babaing magtinda king katawan da. o 32 Uling dinatang ya i Juan kekayu at tiru ne kekayu ing dalan na ning kabanalan at e kayu meniwala keya; oneng meniwala la ding talapanyingil buis at ding babaing magtinda king katawan da. Agyang ikit yu na iti, e kayu pa mu rin migbayung bie at e meniwala kang Juan.

III. Turu

Kareng lumang Tagalog films, ating metung a pelikula king direksyun ning metung a kilalang director a mediu balamu meging yang “criticism” o puna kareng ugali tamung pilipinung e mitutugmatugma. Ketang pelikulang ita, pepakit ne ning director ing metung a doktor a biasa king propesyun na ampon aktibu king debosyun king Sacred Heart. Pepakit ne ning direktor ning pelikula ing bale ning doktor a maragul. Karin king bale ng maragul pepakit no ngan reng imahen ning Sacred Heart a makakalat kareng balang suluk ning bale pati na king banyu na. Kaybat na nita, pepakit ne ing klinika na ning doktor. Karin mu naman maka sabit ya ing letratu ning Sacred Heart agyang king operating room. Talagang maragul ya debosyun king Sacred Heart ing doktor. Oneng mabigla na la reng manalbe inyang pakit ne ning direktor ning pelikula ing metung a eksena nung nukarin gagawa yang operasyun a “abortion” ing mesabing doktor. Maglaglag yang anak. Gagawan na ini king mismung operating room a nung nukarin makasabit ya ing letratu ning Sacred Heart. Ing letratu ning Sacred Heart, a simbolo ning lugud ning Dios, meging yang testigu kening operasyun a abortion. Kening pelikulang ini, pepakit ne ning direktor ing pangayaliwa ning buring nang ipabalu kareng tau ning doktor at ning tutung laman ning keyang pusu. Aliwa ya ing lual king kilub. Aliwa ya ing amanu na king amanuan na. Aliwa ya ing dapat na king salita na.

Oini ing tuturu ning ebanghelyu tamu ngeni. Deng adwang anak king talimhaga, parehu lang megkulangan. Ing kaduang anak, agyang mebisa yang gawan na ing inutus ning tatang na, e nya naman gewa king bandang tauli. Aliwa ya ing amanu na king amanuan na. Ing pangane anak, megkamali ya naman uli pin tambing na neng peinggulutan ing papagawa na kaya ning tata na. Oneng inyang bandang tauli, api isip-isip na siguru king migkamali ya, inya makanyan yang megbayu lub at ikwa nang gewa ing kaburian ning tata na.

Oneng agyang parehu lang megkamali reng adwang anak, ikit na pa murin ning Guinu king mas mayap at mas ustu ya ing guewa ning panganeng anak uling iya ing tinupad king kaburian ning tata. At iya ing megbayu lub at meka isip king e ustu ing sinabi na kang tata na.

Akakit tamu king ing Guinu, mas didenan nang ulaga ing gagawan tamu kesa king sasabian tamu. Reng amanung sasabian tamu e la neng kai garantiya king katutuan ning laman ding pusu tamu. Marakal a amanung mayayabusu, marakal a amanung makalinlang kareng kapara tang tau. Inya makanyan ta na karagul respetu kareng taung ating palabra de honor, uling balu tamu reng taung a reti, nung nanu ing sinabi da iya mu naman ing daptan da at e la paisira kareng tau uling tuturing dong sagradu reng balang amanung sasabian da. Kening talimhaga mu naman, akit ta ya ing Guinu, king e la matimbang keya reng amanu mu kabud. Aus na ning Guinu kareti, “lip service” mu, uling angga mu salita at ala king dapat ing balu da. Mumuli mu king kakulangan king dapat ing egana-ganang sasabian da. “I love you Lord”, nga dang parati reng taung reni, oneng ala no mang tutu mong gagawan bilang patutu king lugud da king Guinu. Karening taung deni, agyang metung la pang kilometru kakapal reng novena booklets ampon orasyun a pangadian da, ala ngan iti king Guinu, nung anggang amanu mu ing lugud da at alang tutung dapat a mayap at lugud kareng pamibiebie da. Inya ing panagkat ning ebanghelyo ngeni metung yang kayausan ban kumilus tamu ampon gawang mayap. Ing kasalpantayanan tamu dapat yang mamunga king pamibiebie tamu kapamilatan na ning mayap tang daraptan ampon gagawan. Nung ing kekatamung kapaniwalan king Guinu e ya magbungang kayapan king bie tamu kapamilatan da reng dapat tang mayap, nanu pa mo ing kabaldugan ning kasalpantayanan a ini? Asabi ta waring tutung kaluguran ta ya ing Guinu ngening paglokuan ta la reng kapara tamung tao? Asabi ta waring panaligan ta ya ing Guinu king nanu mang bage king bie tamu ngening panakawanan ta la rening aliwang tao? Ing tutung kasalpantayanan mamunga yang dapat a mayap. Nung e ya mamungang dapat a mayap, mete ya ining klasing kasalpantayanan a ini.

Kalupa ning panganeng anak king talimhaga, itamu ngan misip tang pasibayu. Atin kung dapat gawan a utus ning Guinu a e ku pa agagawa? Misip tamu. Nung atin man, e pa tauli ban bayuan ta la reng pamisip tamu at magbayu lub. Kareng kekatamung kulang king dapat a mayap, e pa tauli ban magbayu tamu lub. E pa tauli ban ing kekatamung bie kasalpantayanan mamunga yang kayapan kareng pamibiebie tamu at karing pamibiebie da ring kapara tamung tau. Amen.

IV. Pamigunam

Guinu, kalulu ku mu pu. E ku pu tiga keti Guagua. Oneng uling meka pakiasawa kung tiga keti, keti na ku megdatun. Kawani na ku Guinu. Likuan na ku ning asawa ku. Likuan na keng mipapamilya para keng aliwang babai. Pauli na niti, megsumikap kung manintun kapanintunan ban ke rugung kumabie ikeng mipapamilya. Ala kung masyadung balung negosyu Guinu. Inya api isip-isip ku Guinu king magpasugal na ku mu king banda kekami. Tutal marakal no man reng bisang susugal keta kekami. E naman mo mangaragul ing susugal da oneng makasaup ya mu rin kekaming mipapamilya. Aldo aldo, marakal no man reng susugal keng lugal ku. Mamialung lang tong-its. Datangan da na ku reng susugal potang e ne mapali ing aldo. Adwa ampon neng kai atlu lang lamesa reng regular a susugal at aku mo ing peka bangka ning pasugal a iti. Makanyan man Guinu, magkasakit kung aku mu ing manintunan king pamilya. Agyang ating kung a tatanggap king pasugalan a iti, masakit ing maging tata ampon ima king pamilya. Minsan a aldo, atin lang tetag a BEC keng lugar mi. Mekiabe ku. Regular kung mumunta kareng cell miting mi kanita. Pero agyang megluat ku king BEC, e ke pa murin tiknangan ing pasugalan ku. Pasugal ku keni balang aldo, mag-BEC naman once a week. Masaya ne Guinu? Oneng minsan a aldo, api isip-isip ku king balamu yata e maka saup kaku ampon kareng kayabe kung susugal ining gagawan ku. (Reng customers ku pa mo, BEC la naman! Ay Guinu ko!) Inya, agyang balu kung milako na ku kapanintunan, tiknangan ku na ing pasugalan ku. E ustu ing daraptan ku. Mag-BEC ku Guinu, tuturuanan yu ku nung nanu ing mayap, kaybat e naman ustu ing daraptan ku. Inya makanyan kung meg-desisyun king isara ku ne ing pasugalan ku. Inyang gewa ku ini, Guinu, memagkasakit ku. E ku balu nung nu ku manintun pera para king pamilya ku. Mipapunta ku Menila ban makipagobra. Likuan ko pamu reng anak ku at penilas ko karing katwangan ku ban makapagobra ku sa at asadsad ko reng pamilya ku. Kalupa ning ebanghelyu yu ngeni Guinu, guewa ku nung nanu ing dapat gawan. Masakit, wa tutu, oneng balu ku, e yuk u paburen at e mo paburen rening anak ku. King guewa kung ini, balu ku Guinu, adinan yu na kung maragul a grasyang tukyan da kayu. Ngeni pu migbalik na ku keti Guagua. Makanyan pa mu rin. Mamagkasakit manintunan. Oneng ing saya kung kayabe da kayu at ning pamilya ku iyang e na atumbasan ning nanu mang akakwa ku kanita king pasugalan ku. Ikayu ing sasandalan ku Guinu. Ngeni, reng customers ku a dati king pasugalan ila nang ka sisters ku king cell ku. E na la susugal. Mipagkwentu keng masaya neng mikit-ikit keng balang dominggu at pisasabian mi ing gagawan yung kayapan king bie mi Guinu. Memunga ne pung mayap a dapat ing kekaming pamibiebie. Salamat Guinu. Salamat.

V. Pamanahimik

VI. Tauling Panalangin

Ibpa, ikayu ing Dios a tutupad karing amanu yu kekami. Alang amanu a manibatan kekayu a e yu tutuparan. Tapat ko karing sasabian yu kekami. Turuanan yu keng maging tapat munaman kareng sasabian ming mayap kekayu ampon karing kapara ming tau. E kami sana angga mu king salita nune agyang king kekaming dapat, mayakit ing tune ming kaburian sumuyu kekayu. Saupan yu kaming gawang mayap ban ing kasalpantayanan mi tutu yang mamungang kayapan. Saupan yu kami ban mabiasa keng magbayu lub nung e ustu ing daraptan mi. Iti anyaran mi kapamilatan ning Guinu ming Jesus. Amen.


VII. Kutang

1. Nanu pa mo ing buri ng pagawa kanaku ning Guinu a anggang ngeni e ku pa a gagawa?

Download here:

Page 1: http://www.mediafire.com/file/ja1krlz5xl7cetp/09.25.11%20pg.%201.doc
Page 2: http://www.mediafire.com/file/ja1krlz5xl7cetp/09.25.11%20pg.%201.doc

Kadwangpulu’t limang Domingo ning Ordinaryung Panaun

Ding Talapagobra king Mulahan Ubas

I. Pamuklat a Panalangin

Ibpa, ikayu ing mayupayang Dios a alang pamangailangan king saup a manibatan kekami. Oneng uling king kaburian yung idake yu kekami ing obra ning kekong ubasan, inaus yu kami ban maging talapagobra yu kening ubasan a iti. King pamanyaus yu, darake yu kekami ing saya at ligaya yu kabang pagobran ye ing ubasan yu. Dinan yu keng grasyang makibat king kekayung pamanyaus ban lalu mi yang aintindian ing kekong marangal a parasan para king yatu. Ikayu ing tapat at maganakang mikibandi king ubasan, a mamie kareng talapagobra niti king ustu ampon matulid a kayablasan. E ke pu sana tatabili king kekong papaobra agyang daranas keng pamagkasakit. Anggang king katataulian sana pu Guinu, manatili kaming tapat a talapagobra yu ngeni at mangga na king alang angga. Amen.


II. Pamamasa
Mt.20:1-16a
1 “ Ing Kayarian ning Banua kalupa ne ning metung a taung ating mulahan ubas. Linual ya inyang abak a maranun ban manintun a-upahan nang magobra king mulahan ng ubas. 2 Kaybat dang mikasundu king upang metung a salaping pilak, pepapuntan na la king mulahan nang ubas. 3 Linual yang pasibayu itang mag-a-alas nuebi na ning abak at minta ya king palengki, at disnan na la ding mapilan a taung talatalakad Karin a alang daraptan. 4 Ngana karela, ‘Munta kayu naman makipagobra king mulahan kung ubas at dinan da kayung sapat a upa.’ 5 At minta la karin. Pasibayu yang linual bandang kaugtuan aldo at bandang alas tres ibat meugtu, at makanyan munaman ing depat na. 6 Linual yang pasibayu inyang malapit na mung alas singku at menakit yang aliwa pang taung pakatalakad karin.’ Baket sisiran ye ing patitingapun keti a ala kayung daraptan?” nganang kinutang karela. 7 Ngarang mekibat, ‘Kasi pu alang mananggapan obra kekami.” ‘Nung makanyan, munta kayu at magobra munaman king mulahan kung ubas,’ ngana karela.
8 “Inyang mabengi na, ngana ning makibandi king katiwala na, ‘Ausan mu na la deng magobra at bayaran mu la king karelang upa. Magumpisa ka karing tauling meyakua at itauli mu la ding minuna,’ 9 Inyang linapit la ding meyakuang megobra itang gatpanapun, tinanggap lang metung a salaping pilak. 10 ¬Inyang linapit la ding minunang grupu isipan da king tanggap lang maygit; makanyan man tinanggap la namang metung a salaping pilak. 11 Inyang tinggap da la ring upa ra, migreklamu la king makibandi. 12 Ngarang sinabi, ‘ Metung la mu pung oras megobra dening tauling mekipagobra, baket pekilupa yu la upa kekaming megobrang patingapun a mibata king pali na ning aldo?’ 13 Ba, abe, ‘ ngana ning mikabandi king metung, ‘ e ra ka piperhuisyuan. E wari mekipagkasundu kang mibayaran metung a salaping pilak? 14 Tanggapan mu la ding upa mu at muli na ka. Buri keng upahan kalupa na ning upa mu ining tauling megobra. 15 E ku wari arapat ing buri kung daptan karing salapi ko? Pota galang mangalalu ka mu uli na ning maganaka ko?’”
16 Nganang memupus migsalitang Jesus,” Makanyan lang maging mumuna ding tauli at maging tauli ding mumuna.”

III. Turu

Keti Kapampangan, madalas ta lang akakit reng mipapamilyang misaup saup king negosyu da. Nung ing pamilya atin yang sari-sari store, akit ta la reng mikibandi ilang magmandu king tindahan. Akit ta la naman reng anak o kaya reng aliwang kamag-anak a sasaup o kayabeng mag-manage keng tindahan. Makanyan tamu. King metung a negosyung pamilya, agyang nu ya pa anti karagul o kalati, pisaup-saupan ta ya ba yang manakitan at misadsad. Atiu ing malasakit ding miyembru ding pamilya king negosyung pibandian da uling keni da kukuanan ing gagastusan da king aldo-aldo. Marakal lang tutu reng mengayari kekatamu pauli da rening family businesses a reni a pigmalasakitan dang miyabe-abe reng mipapamilya.

King ebanghelyu tamu ngeni, anti ya mong makaniti ing mebasang talimhaga. Ing mikibandi king ubasan ya ing Guinu. Kaya ya ini anti mong metung a negosyung pamilya. Uling kaya ya, balu tamu e ne paburen. E na paintulutan king masira ya tanam ing ubasan. E na paintulutan king e la mamunga reng ubas na king makatakdang panaun. E na paintulutan king e ya mupul. Kalupa ning metung a mikibandi king metung a sari-sari store, gawan na ngan ing egana-ganang kapagpursigyan ban e ya mangalugi ing tindahan na. Makanyan ya ing Guinu tamu. Mayap ampon masinup ampon responsabli yang mikibandi. Oneng atin tamung akakit a ugali ning mikibanding ini a ating pangayaliwa kareng ating sariling negosyu. Imbes na reng kapamilya na ilang kingwa na ban magobra king ubasan, kinangwa yang talapagobra ibat king lual. Inaus no ring alang gagawan king palengki at mekitratus yang masalese kareni. Pengakuanan nong ustung kabayaran king obra da potang meyari la. At reni namang inaus na para magobra, mebisa no man karening kondisyonis na ning mikibandi king ubasan.

Itamu ngan, ausan na ka tamu ning Guinu ning ubasan ban magobra king keyang ubasan –itamu ngan! Managkat ya ing Guinu kareng egana-ganang tau a bisang maging talapagobra na. Uling guewa na na katamung kapamilya ning Guinu, kapamilatan na ning kekatamung pangabinyag, buri na mika malasakit tamu king keyang ubasan. Kalupa da mo reng anak da reng ating sari-sari store a sasaup king palakad ning tindahan ning pamilya, itamu dapat sasaup tamu naman king paobra king ubasan ning Guinu uling abe tamu king pamilya. Kayabe ya dapat karing metung kareng pigagap tamu king bie nung makananu tamu maka saup king ubasan ning Guinu at makananu ta yang apalaganap ing keyang kayarian. Nung nanu man ing agawa tamung mayap para kening ubasan ning Guinu, makasadya tamu sanang makasadyang sumaup ampon magobra para kaniti. Uling nung nanu man ing masanting a aibunga ning ubasan ning Guinu, siguradu mung midakayanan tamu karening bungang a reni uling ing Guinu tamu e ne man maimut nune mapamie ya ampon masaya yang makirake kareng keyang grasya.

Simpli mu naman ing obra king ubasan. Malyari tamung magumpisa kareng kapamilya tamu bale uling ila reng mumunang dapat tanggap king mayap a balita. Kapamilatan ning pamibibie tamung maka Dios ampon maka sentru kang Kristo, reng kapamilya tamu dapat ilang mumunang manakit king bayung bie tamu king Guinu. Kapamilatan ning tutung lugud, lingap at kababan ning pamibibiebie tamu, reng kapamilya tamu ila dapat reng mumunang manakit, agyang sulyap mu man sa king upaya ning Guinu king kekatamung pamibiebie.

Malyari tamu naman magumpisang magobra para king ubasan na ning Guinu kareng kasiping tamung bale. Pakit tamu king ing lugud tamu king Guinu e ne masyadung aliwa king lugud tamu kareng siping tamung bale. King pamananggap tamu kareng kakulangan da ampon king pamaglingap kareng pamangailangan da, lalu na kareng kasiping tang baleng atiu king kakaluluan, e tamu sana magkasakit akit ing aske na ning Guinu kareng mamagkasakit, makakalinguan ampon milelele.

At nung atin tamung paralan maka saup king kekatamung parokya, agyang makananu ya pa sa ka simpli ing malyari tang gawan, ibie ta ya sana ing serbisyu tamu ban makasaup tamu king bie tamung abe-abe bilang metung a balayan a talatuki ampon mituburan.

Kareng lugar a nung nu tamu magobra, gawan tamu ing kayapan, ing kasipagan ampon ing katapatan kareng papagawa da kekatamu itamung makipagobra.

At potang makipagobra ta king ubasan na ning Guinu kareng lugar at paralan a mebanggit, malyari da na ka tamung ausan “talapagobra king ubasan ning Guinu”. At siyempre, nung talapagobra tamu, ninu mo ing kautus tamu nune ing Guinu tamu mismu? Nung ing talapagobra e ne pakiramdaman ing utus ning papaobra keya, maging mayap ya pang talapagobra? Ali ya. Inya dapat mung makiramdam yang makiramdam ing talapagobra king panginuan na ban nang agampanan masalese ing papaobra na. Kaniti ta ya akakit ing importansya ning pangadi. Kapamilatan ning pangadi, itamung talapagobra na, lalu ta yang apapalino nung nanu ing buri na at aliwa ing buri tamu. Kapamilatan ning pangadi, mas lilino ing kautusan a manibatan king papaobra king ubasan. Inya, e ta ya kakalinguan ing pangadi nung tutu tamung bisang sumaup king ubasan ning Guinu.

Kalupa ning mebanggit king talimhaga, reng egana-ganang inaus nang megobra ning Guinu king keyang ubasan, midinan lang ustung suweldu. Itamu naman, mamag-asa tamung tanggap grasya kabang magobra tamu king ubasan ning Guinu. Balu tamu king tapat ya ing Guinu at e na paimburisan king e tamu tanggap grasya nung tiparan tamu ing pepagawa nang obra at misyun kekatamu. E tamu tutuknang king obra king ubasan agyampang neng kai mamagkasakit tamu. Agyampang neng kai, ala tang bungang akakit. E ta dapat masisira lub o mababalisa lalu na potang sasakit ing bili tamu. Balu taya dapat nung ninu ing tagapagobra tamu. Iya ing Guinu a manatiling tapat karing ninuman kekatamung susuyu keya anggang king katataulian ning panaun.

IV. Pamigunam

Guinu, masalese na ku bili king bie ku. Meyari no ring anak ku. Maranun kung meg retire Guinu. Pauli ning masanting a retirement package a binie ning kumpanya mi kanita, a disisyunan ku nang mag-retire kung maranun. Tutal, ala na ku ring papagaral ampon ing Misis ku atiu ne Amerika. King ditak nang panaun, ma petisyun na ku naman king Amerika ban akayabe ku ne ing asawa ku ampon reng anak ku. Inyang ka retire ku, e ku balu nung nanung gawan ku. Madalas, susugal ku kayabe da ring kaluguran ku, mag good time at neng kai, saup saup king pisamban. Mekapakiabe ku king BEC. Inyang mekiabe ku, dinenan da kung assignment kaagad. Binie de kanaku ing obrang manintun doktor ampon panulu para kareng masakit king BEC. Aldo aldo binie ku ing oras ku para king misyun a ini uling tutung marakal a kalulu kareng miyembru mi king BEC a mangailangan saup ban ma-ospital ampon makasaling panulu. Ayagkat ko ring mapilan a doktor keti Guagua ban mamie lang libring konsultasyun karening re-refer ku. Pamuntalan ko reng mapilan a memalen ban mag-pledge balang bulan ban mamie lang agyang magkanu ba ke rugung makasaling panulu karening masakit. Neng kai, aku pa ing magdala kareng masakit a mumunta kanaku ban midala la Menila. Pauli na niti Guinu, ot balamu meging masaya ya ing bie ku. Balamu inaus yu kung talaga ban sumaup king kekong ubasan ban mamie lingap ampon lugud karening mamagkasakit a kayabe ku king BEC. King obrang binie yu Guinu, penandaman ku ing lunus a bibie yu kareng masakit, karening kalulung malapit nang mate, karening taung alang balung puntalan potang mangailangan saup. Makanyan pala ing maging talapagobra king kekong ubasan Guinu. Agyang masakit ing obra, masaya ing panandaman ku uling ikayu ing tagapagobra ku. At uling tapat kayu Guinu, binie yu pa kanaku ing katahimikan ning bie ku. E ku na penintunan ing sugal o nanu mang bisyu pauli ning obrang binie yu kanaku.
Ngeni, atiu na ku States. Kayabe ku no reng pamilya ku. Agyang ala na ku Pilipinas, sasaup ku pa mu rin keni king parokya mi uling buri ku pa mu rin maging talapagobra yu king kekong ubasan. Gawan yu kung instrumentu Guinu, gamitan yu ku ban mipatupad ing kaburian yu keti yatu, ban ing parasan yung lugud ampon kayapan keti yatu mipalaganap kapamilatan ning ditak a ambag ku king kekong ubasan. Amen.

V. Pamanahimik

VI. Tauling Panalangin

Ibpa, masaya ke pu sanang makibat king pamanyaus yu kekami ban magobra king kekong ubasan. E ke pu sana tutuknang o kaya milalako gana king obrang bibie yu kekami agyampang potang daranas keng kabayatnan ampon kasakitan king pamibiebie mi. Dinan yu ke pung grasya ban dasnan yu ke pung magobra king ubasan yu angga na king aldo ning kekaming kamatayan ban ming apilasa ing bibie yung saya at katahimikan kareng taung manatiling tapat king kekong misyun at parasan keti yatu. Pabanalan yu ke pu ban kanita, kabang magobra kami king kekong ubasan, lalu da kong akilala at lalu ming panandaman ing kekong katapatan kareng taung bisang sumuyu kekayu. Kaluguran da kayu Guinu. Salamat pung tutu. Amen.

VII. Kutang
1. King makananung paralan ku mo makapagobra king ubasan ning Guinu?

Download here:

Page 1: http://www.mediafire.com/file/c701lixtibl6a7m/09.18.11%20pg.%201.doc
Page 2: http://www.mediafire.com/file/dvu786vb2qsuq58/09.18.11%20pg.%202.doc

Kadwangpulu’t apat a Domingu ning Ordinaryung Panaun

Ing Talimhaga tungkul king Ipus a E Bisang Mamatawad

I. Pamuklat a Panalangin

Ibpa, uling kilala yu ing kekaming keinan, makabusni yang makabusni ing pasbul ning kekayung kapatawaran kekaming palpikasala. King lunus yu at lugud, binura yo reng kamarinayan mi a dulut ning kekaming kamalian ampon pamikasala. Ikayu ing bibie kapatawaran kekami agyang paulit-ulit ing pamikasala mi. E yu pagkaimut ing kekong kapatawaran potang anyaran mi iti keka. Turuanan yu keng mabiasang magpatawad kareng mikakasala kekami. Kareng taung sinugat kareng pamibiebie mi, dinan yu keng grasyang patawaran mi la at kalinguan ing karelang kakulangan. Lako yu pu ing tatanam ming sukal lub ban midinan keng kanauan kareng kabayatnan a dudulut da rening kikimkiman mi kabang bie. Saupan yu kami Guinu. Amen.

II. Pamamasa

Mt.18:21-35
21 Kanita linapit ya I Pedro kang Jesus at kitang na, “ Ginu, makatapilan ke patawaran ing kapatad kung mikasala? Makatapitung beses?”
22 Nganang mekibat Jesus, “Ali, e makatapitung besis, nune pitung pulung besis a tia pitu. 23 Uling ing Kayarian ning Banua kalupa ne ning metung a ari a mibalak manyingil king utang da ring ipus na. 24 Mapilan la pa mu ding ayaus na inyang detang de ing metung karela a maki utang a milyun a salaping pilakb keya. 25 Ala yang apamayad king utang na, inya inutus na ning ari king pisali re at pati na ing asawa na at ding anak da at ing sabla nang pibandian ba yang makabayad utang. 26 Siniklaud ya ing ipus king arapan ning ari at nganang mekisabing mayap, ‘ Dinan yu ku pa pung ditak a panaun, at bayaran da kayu king sablang utang ku!’ 27 Melunus ya ing ari, inya pepatawad na ing utang na at pepaburen neng meko.
28 “Oneng kalual na niting ipus asalubungan ne ing metung karing kalupa nang ipus a maki utang limang dalan a salaping pilakk keya. Kinuelyu ne at saka ne sekal a batal. Nganang sinabi, ‘ Bayaran mu ing utang mu kanaku!’ 29 Sinaklaud ya ing kalupa nang ipus king arapan na at nganang mekisabing mayap, ‘Dinan mu ku pang panaun at bayaran da ka!’ 30 Oneng e ya mebisa; nune pepasukul ne anggang e ya mekapamayad king utang na. 31 Panakit da kaniti ding aliwang ipus, menandaman la; inya minta la king ari at simbung da ing sablang milyari. 32 Uli na niti, pepayaus ne ning ari ing ipus at nganang sinabi, ‘Taung alang kwenta! Pepatawaran da ka king kabilugan mung utang kanaku uli na ning mekisabi kang mayap. 33 Sukat ka naman sanang mika lunus king kalupa mung ipus antimo nung makananu da kang linusan!’Mikalabkab ing mua na ning ari at pepasukul ne ing ipus ba yang magdusa anggang e ya makabayad king kabilugan a alagang inutang na.”
35 Nganang memupus Jesus king pamagsalita na, “ Makanyan munaman ing daptan na kekayu ning Ibpa kung atyu banua, nung ing balang metung kekayu e ya biasang mamatawad maniaman king lub na king kapatad na.”

III. Turu

King bie pamilya ating panaun a masaya tamu ngan, ating panaun a malungkut tamu. Ating panaun a mamagkasakit tamu ngan, ating panaun a marakal ta naman tatanggapan a grasya. Makanyan na siguru ing bie pamilya. Nanu pa man ing daratang kekatamu, basta miyabe-abe tamu mu sa, OK ta na. “ Sa hirap at ginhawa” a da pin, “ sa lungkot at ligaya” magkasama pa rin tayo. Ining pamisanmetung ning pamilya tutu yang metung a grasyang bibie na ning Guinu kareng pamilyang mikakalugud. Oneng nung lauen ta no man reng pamiabe-abe da rening pamilyang mikakalugud, akit tamu king ing pami-abe da e naman makanyan ka lagwa. Marakal a besis, dadalan la naman kapagsubukan reni, lalu na king aspeto ning pami-utus da. King bie pamiyabe-abe kasi, lunto at lunto ing kakulangan ning bawat metung. Lunto ing e masanting a ugali, lunto ngan ing natural a ugali a e da malyaring pisalisalikut ding miyembru king pamilya da. Lunto ngan ini potang miyabe-abe na ko king pamilya. Oneng obat mo, agyang makiniti ing malilyari, obat mo manitili la pang miyabe-abe reng tutung mikakalugud a pamilya? Ing susi na ning tagumpe ning pamisanmetung atiu ya king pamipatawad.

King ebanghelyu tamu ngeni, memie yang talimhaga ing Guinu tungkul king pamipatawad. King istoryang mebasa, pepakit na ning Guinu ing adwang bage: Mumuna, ing pamangailangan tamu king keyang kapatawaran. Ninu mo kekatamu ing e mangailangan kapatawaran king Guinu? Itamu ngan mikasala tamu. Kalupa ning alipin a mipatawaran kareng utang na, itamu ngan mangailangan ta mu ngan kapatawaran kareng kasalanan guewa ta king Dios at karing kapara tamung tau. Ing kadwa, uling mipatawaran tamu kareng kasalanan tamu, dapat mung magpatawad tamu kareng mikasala kekatamu. King mebasang talimhaga, lalto ya pang anti mong obligasyun ing pamamie tamung kapatawaran kareng ating atrasu kekatamu. Inya e tamu magtaka ot king storyang mebasa, pepakulung ne ning ari ing alipin a e biasang megpatawad, ngening mibie naman kaya ing kapatawaran.

Nung nukarin ing tutung lugud, karin akit tamu naman ing tutung pamipatawad. Nung akit mo reng pamilyang mikakalugud, karin akit ta mu naman ing tutung pamipatawad da reng bawat miyembro karing kakulangan da reng aliwa dang kapamilya. E tutu ing lugud nung a la yang kakambal a pamipatawad a bunga ning lunus at lugud. Itamu ngan magkamali tamu. Itamu ngan mangailangan tang kapatawaran. Itamu ngan obligasyun tamung magpatawad at mangalinguan kareng atrasu da reng aliwang tau kekatamu. Marakal no ngeni reng mikakawaning pamilya uling e la biasang magpatawad reng miyembru kareng kamalian ampon kakulangan da reng kayabe da king pamilya. Marakal la reng mikakaluguran ampon miyabe-abe king metung a komunidad a metabang na lub king bawat metung uling e la biasang mamatawad reng miyembru niti kareng kakulangan da reng aliwang kayabe da. Kekatamung kapampangan, malagwa tamung a balu nung mematawad ta na o ali. Nung tatanam ta pa sukal lub, buri na sabian, e ta pa tutung mematawad kareng mika atrasu kekatamu. Nung marakal ta pa kasiran sasabian kareng mikasala kekatamu, buri na sabian, e ta pa mematawad king pusu tamu kareng taung mekapanasakit kekatamu. Nung e ta no bubularan reng dati tang kabasa at atin ta pang kikimkiman a sukal lub karela, indikasyun ne ini king e ta pa tutung mematawad karela. Itamung mahilig tatabug uling mengasugat ta kareng amanu at dapat da reng aliwa, dapat ta nong kalinguan deng sugat tamu at mabiasa ta nang mamatawad kareng kamalian da reng aliwa. Ipaubaya ta no king Guinu reng milabasan a sugat ban nong kumayap reni at magumpisa tamung pasibayung lulugud agyang karening taung mekapanasakit kekatamu.

Lawen ta ya ing Guinu potang mamagkasakit tamung mamatawad. Lawen ta ya nung makananu na ka tamu pepatawaran kareng kasalanan tamu agyang paulit ulit tamung mikakasala keya. Nung ing Guinu agyu na ka tamung patawaran, itamu pa kayang talatuki na? King bandang tauli, reng taung e biasang mamatawad ila reng kababayatnan ampon mamagkasakit uling king kakargan dang bagahi ning sukal lub. Nung tatanam kang sukal lub, mamupul ka naman sukal lub. Anyaran ta ing grasya king Guinu ban mabiasa tamung mamatawad kalupa na.

IV. Pamigunam

Metung kung karpinteru Guinu, ating asawa, adwa anak. Makatuknang ku Sto. Nino, kayabe da reng aliwang pamilyang squatter mu naman kalupa ku. King lugar mi, ala kang a sisinup a sikretu. Uling marakal kami ampon misisiksikan king metung a lugar, balu mi ing bie ning bawat metung kekami, lalu na reng buluk ning bawat metung kekami. Pauli na pin niti, e makasalikut king lugar mi king pegtaksilan na ku ning asawa ku. E ku maniwala kanita kareng kasiran da anggang minsan a aldo, a rakap ku la mismu king pibale-bale ku inyang minuli kung maranun metung a aldo. Ing ka relasyun na pala ning misis ku ing pinsan kung alang pilatan a kasiping mi bale. Masakit pala Guinu. Lalu na potang ikang lalaki ing pagtaksilan ning asawa mu. Pikatulan da ku ngan reng kayabe ku kekami. Makanyan man, e ke kewanian ing asawa ku. Pepatawaran ke at miyabe ke pa mu rin agyang pigtaksilan na ku. Kanita, mika BEC king banda mi. Mekiabe ku king BEC. At uling buri ku magbayu ne bie ing misis ku, tiki ke at inabe kya naman king BEC mi Sto. Nino. Masaya king BEC Guinu. Akilala da ka. Ika pa la ing makasadyang magpatawad mung magpatawad kareng kasalanan mi agyang balik-balik keng mikakasala. E naku man pala migkamali ngening petawaran ke ing asawa kung mikasala kanaku. Buri kung panandaman na king kaluguran keng tutu at mimigit ing lugud ku kaya agyang pegtaksilan na ku. Milabas ing panaun, at bala ku masalese na ngan ing sabla, anggang minsan a aldo, a balitan ku king tinuki ya ketang pinsan ku a minuli karela king bisayas a ya mu naman ing dating karelasyun na kanita pa. Likuan na ku ampon ring anak ku. Pegtaksilan naku na naman. Mibulgar na naman ing milyari kekami. King milyaring iti, e da na apibata ring kapatad ku ing sitwasyun. Penyabyanan da ku at binugnus da ing mwa da kaku uling pauli king milyari, mi dame la naman king kamarinayan a dinulut ning asawa kung megtaksil. E na ku man mimua karela uling aintindian ku ing panandaman da. Masakit Guinu, masakit. Bala ku micabus ne ing asawa ku keng pangayalipin na kening matsurang relasyun na king pinsan ku. Ali pa la.

King isip ku, makaniti na talaga ing kapalaran ku king bie. Dagul la reng anak ku a alang ima uling likuan na la. Oneng inyang milabas ing mapilan a aldo, migbalik ya kekami ing asawa ku. Inyang mumuna, e ku balu ing gawan ku. Tanggapan kya o palayasan ke? Pintalan ke ing metung kareng leader mi king BEC at sinabi ku kaya ing sitwasyun. Kitnan na ku nung kaluguran ke pa ing asawa kung megtaksil at nung makasadya keng patawaran. Sabi ku keya king kaluguran ke pa ing asawa ku at makasadya keng patawaran agyang pilan na nakung besis pigtaksilan. E ya mekapakibat ing kitnan kung leader mi king BEC. Mengapamulala ya king pekibat ku keya at ngana kanako: “Gawan mu ing keng lub mu. Metung mu ing buri kung gawan yu. Lumipat na kong bale king aliwang lugar ban makapag-umpisa kong bayung bieng miyasawa a alang kasiran ampon intriga.” Guewa mi naman pu ita Guinu. Menaliwa keng balen. Meg-umpisa keng pasibayu king pamiyabe mi. Petawaran ke Guinu. Angga ngeni, iya pa ing abe ku. Masaya kami Guinu. King kekang lugud at lunus, dinenan yu kung grasyang mebiasang magpatawad Guinu. Dinenan yu kung kababan ban isundu ku ing bie kung bala ku ala ng pamag-asa. Petawaran yu kami kareng kasalanan mi keka Guinu. Anyaran mi, king mabiasa kaming mamatawad, agyang makananu pa kasakit. Amen.

V. Pamanahimik

VI. Tauling Panalangin

Ibpa, mahilig ke pung tatanam sukal lub. Mahilig ke pung kikimkim mwa ampon maglista kareng kamalian da reng kapara ming tau. E mi pa siguru aintindian ing kapatawaran a tinggap mi kekayu inya e kami mapagpatawad. Marakal la reng mikakawaning pamilya Guinu uling e la biasang magpatawad reng bawat miyembru. Marakal a komunidad a misasalbag uling e la biasang magpatawad. Marakal la reng taung mamablas uling e la biasang magpatawad. Patawaran yu kami Guinu uling magkasakit kaming mamatawad. King paulit-ulit ming pamikasala, e yu pigkaimut ing kekong kapatawaran. Sana mabiasa na kami Guinu. Turuanan yu ke pung magpatawad ban midinan keng kanauan karing pibekut-bekut ming sukal lub kabang mabibie kami. Salamat pu Guinu. Salamat. Amen.

VII. Kutang
1. Atin ku pang kikimkiman a sukal lub uling e ku bisang magpatawad?

Download here:
Page 1: http://www.mediafire.com/file/8gjobgcju5ajnci/09.11.11%20pg.%201.doc
Page 2: http://www.mediafire.com/file/a87x5i8mt80vp0t/09.11.11%20pg.%202.doc

Kadwangpulu’t atlung Domingo ning Ordinaryung Panaun

Nung Mikasala Ya ing Metung a Kapatad

I. Pamuklat a Panalangin
Ibpa, binili yu ke king metung a komunidad a dapat ming luguran anti mong metung a pamilya. Dinan yu keng lugud at masabal kareng kayabe mi ban tumibe ing kekaming pamiabe at lalung lumalam ing pamisanmetung mi. Guewa yu keng metung a pamilya. Tinggap yu kami bilang anak yu pauli ning pangabinyag mi kang Jesus. Misanmetung ke pu sana king pamisip at king pamibiebie. Saupan mi la sana reng abe ming magkamali at lilisya king dalan. Gawan yu ke pung metung a komunidad a ating masabal king bawat metung ban kanita, lalu keng maging matatag a sakramento ning kekong presensya keti king yatu. Kayabe ning kapatad at Guinu ming Jesus, antabayanan yu ke pu ban ikayu Ibpa ing tune mag-ari karing pusu mi. Salamat pu Guinu. Salamat. Amen.

II. Pamamasa
Mt.18:15-20
15 Nung mikasala ya keka ing kapatad mu, lapitan me at ipakilala mu ing pamikasala na. Oneng daptan mu king makalihim, ita sanang ikayu mung adua. Nung pakiramdaman na ka, ikua meng abalik a lub keka ing kapatad mu. 16Nung e na ka pakiramdaman, mituki kang metung o aduang tau ban ing nanumang pisasabian yu malyaring mipatutuan king amanu da ring adua o atlung tau antimo ing sasabian na ning kasulatan. 17 Nung e ya makiramdam karela, isumbung mu ing sabla king iglesia. At nung e ya naman makiramdam king iglesia, iyapus mu nia mung anting dayuan o talapanyingil buis. y 18 “Sasabian ku kekayu: nanuman ing e yu paintulut keti king yatu e munaman mipaintulut Karin banua; nanuman ing paintulut yu keti king yatu, mipaintulut munaman Karin banua. a 19 “Antimu rin, sasabian ku kekayu: nung misanmetung la ding adua kekayu keti king yatu king nanumang aduan yu king panalangin, ibie na kekayu ning Ibpa kung atyu banua. 20 Uling nukarin man ating adua o atlu kataung mititipun king lagyu ku, atyu ku libutad da.”

III. Turu

King metung a pamilya, ing saya ning metung, saya ne ngan ning mabilug a pamilya. Anti mo neng ating mag-graduate king pamilya, e mu kabud ing mag-graduate ing masaya. Pelalung tatang, ima, apu ampon kamag-anak masaya mu na man. Anti la mong meg-graduate mu naman. Oneng ing kabaligtaran na niti, tutu mu naman. Ing lungkut ning metung, lungkut niya naman ning mabilug a pamilya. Nung ating me-ospital kareng metung keng pamilya, malisuasan la ngan reng mabilug a pamilya at akit mu king bakas ding lupa da ing kapigaganakan .. Nung atin yang gewang e masanting ing metung kareng miyembru ning pamilya, kamarinayan ing panandaman da reng mabilug a pamilya. Nung mibibili ya king peligru ing metung kareng miyembru ning pamilya, e la ngan mipaindatun reng mabilug a pamilya.
Ing sasabian ning ebanghelyu ta ngeni, e ta ya aintindian nung ala yu king kontexto ning pamiyabe-abe tamu king metung a pamilya. Ing pisamban, ing iglesia, itamung balayan ning Dios, metung tamung pamilya. Kapamilatan ning pangabinyag tamu, meging anak na katamu ning Dios. Metung tamu kasalpantayanan, metung tamu Dios, metung tamu king pangabinyag. Uli na niti, itamu king pisamban, ituring ta nong tutung kapatad ring kayabe tamu king pisamban. Nung ing ABS-CBN Channel 2, a e ta mu kananu nanu, tuturing na ka tamung KAPAMILYA NA, nanu pa mo itamung tutung mibait king metung a pangabinyag, at meging tutung anak ning Dios at miyabe king metung a balayan a ausan tamung Pisamban? King pisamban, mikakapatad tamu ngan e mu king amanu, nune king katutuan. Nung makaniti ta ya aintindian ing pisamban, mas malagwa ta ya ngening aintindian ing ebanghelyo.
Sasabian ning ebanghelyo tamu, nung kanung migkamali ya ing metung a kapatad, lapitan taya at ipakilala tamu ing pamikasala na. E mo makanyan ing gagawan tamu king pamilya tamo? Nung anti mong megkamali ya ing metung a kapamilya, sasabian tamu kaya ing pamagkamali na. Sasabian ta kaya uling e tamu buring lilisya ya king mayap. Gagawan tamu iti uling concerned tamu. Masakit ing sasabing kamalian king metung a kapatad nung e mimiral kekatamu ing masabal ta keya. Nung ing mimiral kekatamu e lugud nune pamanusga o mwa, mayapang e ta ne pa sasabian keya ing keyang kamalian uling lalu mung mipakarok ing sitwasyun. Mimigit ya dapat ing masabal tamu king kapatad tamung migkamali uling e ta ya buring lilisya king dalan. Nung ala ya ining masabal tang ini, muli la king pamipate ampon pamisagsagan reng amanu tamu king metung a kapatad a migkamali. Nung tutung metung tang pamilya, ing pamiyabe-abe tamu, matimbang ya pa king nanu pa man bage. King bandang tauli, ngana ning ebanghelyo, ing masabal ning metung a tau king pamipalino na king metung a kapatad king keyang kamalian, muli ya dapat king masabal ning mabilug a iglesia o komunidad, kalupa king metung a pamilya. Pauli na niti, ating yang matulid ing pisamban ampon reng abe ta king komunidad a pakilala da ing kamalian tamu nung magkamali tamu, pauli na pin kayabe ta na la bilang antimong kapamilya. Nung e ta la akakit bilang kapamilya, lunto na lang pakialameru reng kayabe ta komunidad ampon king pisamban king pamibiebie tamu.
As na kaulaga king ituring ta la reng abe ta king pisamban o king basic ecclesial community (BEC) tamu bilang kapatad. Miral sana king pamiyabe-abe tamu ing lugud at lingap a as na kaulaga king pamibiebie tamu bilang komunidad. Sasabian ning ebanghelyo : “nung misanmetung la ding adua kekatamu keti king yatu king nanu mang aduan tamu king panalangin, ibie ne kekatamu ning ibpa tamu king banua.”(v. 19) Ing pamiyabe-abe tamu bilang metung a pamilya, metung yang grasya. Pauli ning pamiyabe-abe tamu at lugud tamu king bawat metung, mikakagrasya ta na, at mikaka upaya tamung anyaran ing nanu mang bage king Ibpa. (Karagul a grasyang tutu ini!) King pamiyabe-abe tamu, ing lugud at masabal tamu king bawat metung iyang makapagmulalang milagrung tutu, uling karin king busal tamu, atiu ya ing Guinu. (v.20)
Masakit ta yang akit ing pisamban bilang metung a pamilya nung ala tang masabal king bawat metung. Nung tutung metung tamung pamilya, ing saya ning metung, saya taya ngan dapat. Ing lungkut ning metung, lungkut ne ngan ning mabilug a pamilya. King BEC, panikuanan tamung tuparan ing masabal at lugud ning metung a pamilya karing kayabe tamu king cell. E no dapat aliwa kekatamu. Ing pigagap da iya dapat ing pigagap tamu. Ing saya da, iya dapat mu naman ing maging saya tamu. Nung makaniti tamu pamiyabe, e na masakit ing magpalinong kamalian king metung a kapatad a magkamali, uling nung nukarin ing lugud at masabal, karin la maligwang manaliwa at magbayu reng pusu da reng taung lilisya king dalan. IV. Pamigunam
Guinu, metung yu ku pung talapagobra king kekong ubasan king BEC. Metung ku pung cell leader a masayang manaral king mayap yung balita. Manibat inyang miyabe ku king BEC, mas lalu da kayung akilala, menaliwa ne ing bie ku, meging masanting ing egana-gana pauli yu Guinu.
Atin ku pung bayung tetag a cell kekami. Malambat ku no pung tatalnan. Balang domingo mikikit kami. Mag Jesucentro kami at karin, mag-share kami king nanu man ing karanasan mi king bie. Akakit ku naman pu magbayu la bie. Pauli na niti, masaya ku. Kuntoru darakal la reng kikilala keka Guinu, mas sasanting ya ing bie mi king komunidad. Minsan a aldo, ikit ko rening mismung tetag kung cell a misiping-siping a bale a susugal. Mag tong-its la pu Guinu! Kamua ko Guinu! Manibat kanita, e ku no buring puntalan. Ot balamu ala lang abalu king pamag-BEC mi! Malambat a panaun, megtampu ku Guinu, at sinukal ku lub. Akwa da pang susugal rening tuturuanan ku. Ot balamu ala lang ababalu king cell mi.
Malambat ku ring megtampu Guinu. Oneng inyang api-isip-isip ku. Nung lakuan ku lang minsan reni, makananu la pang magbayu reni? Ninu pa ing sumaup karela ban milako la king makaniting bisyu? Karin ku a malayan Guinu, king atin ku rin palang masabal karela. Agyang e ustu ing guewa da, atin ku pa lang lunus karela, uling tutung tinuring ku nong kapatad ampon kapamilya reng abe ku keng cell a iti. Pauli na niti, belikan ku la at penikuanan kung sundu mi pa ing pamipulung-pulung mi baling domingo. Pota palang tinuring mu nong kapamilya reng komunidad mu Guinu, e mu akwang takasan ing responsibilidad mu a saupan mu la at ituldu karela nung nanu ing mayap ampon ustu. Ngeni pu, kayabe ku la pa pu. Masaya ke pa pung miyabe-abe. Ditak-ditak, milalako na ing bisyu dang totong-its deng ka cell ku. Balu ku Guinu, king panaun a kalugud-lugud, milako la rin pu king bisyung a iti. Nung tutu mo pu palang tinuring kapatad ampon kapamilya reng komunidad yu Guinu, ditak-ditak miras kami murin king pamagbayu da ugali, at pauli na nita, mitulid murin ing kamalian da reng kapatad ku. Salamat Guinu. E ku sana agawang lakuan ko reng ka cell ku uling king kamalian dam u. Dinan yuk u pung tune a masabal karela at king karelang kapakanan ban akwa kung atulid ing pamagkamali da baling aldo.

V. Pamanahimik

VI. Tauling Panalangin

Ibpa, dinan yu ke pung tuneng lugud at masabal kareng ka komunidad mi. Kapamilatan ng Jesus, gewa yu keng kapamilya yu. Uli ning lugud at masabal yu kekami, e ko sasawang papakilala yu ing kamalian mi ban e ke lilisya king mayap. Inabe yu kami king pamilya yu ban malagwa ming a tukyan ing mayap at malagwa ming a itulid ing nanu mang kamalian mi. Panalangin mi la ngan pu reng kayabe mi king komunidad, reng taung binie yu kekami bilang kapamilya. King pamibiebie mi, turuanan yu keng lugud king bawat metung ban mipasiknangan ing kekaming pamiyabe. Amen

Download here:
Page 1: http://www.mediafire.com/file/k5pc8eagnhpqe8k/09.04.11%20pg.%201.doc
Page 2: http://www.mediafire.com/file/s6wa0lqzh493z3l/09.04.11%20pg.%202.doc