Pasku, Solemnidad ning Pangabait ning Ginu

Ing Pangabait nang Jesus

I. Pamuklat a Panalangin Ibpa, magsaya ya ing mabilug a yatu pauli ning pamanyatang na ning kekong anak a I Jesus keti king yatu. Ing pamag-asa da reng egana-ganang tau mibie ne kekami. Salamat kekayu Ibpa, uling king maragul yung lugud kekaming makasalanan, e ye pigkaimut ing kekong bugtung a anak. Dinenan yu keng tula a e mi a sukad. King pangabait na, ikang mayupayang tutu, meki-agnan ka at mekiabe ka king pamibiebie mi. Antabayanan yu kami king balang oras ning pamaglakbe mi keti king yatu. Ikang kekaming Imanuel, a e bisang lumaut kareng pamibiebie mi, saupan yu kami lalu na neng mamagkasakit kami. Ing saya mi ngening aldong iti ala na sanang kapupusan ban matula da kayung purian at pasalamat, kalupa da reng anghel king banwa a megkantang “ Ligaya king Dios king kakatas-katasan!” Salamat Guinu. Salamat. Amen.

II. Pamamasa

Lk. 2:1-14
1 King panaun a ita, inutus nang Emperador Augusto king magpalista la ding sablang atyu king sasakupan na ning Imperyo ning Roma. 2 Iting mumunang pamipalista merapat inyang i Quirino ya ing gobernandor na ning Syria. 3 Inya minuli ya ing balang metung king sarili nang balen ban palista. 4Manibat Nazaret, Galilea, minta ya I Jose king Betlehem, Judea, ing balen a beitan nang David, uling ibat ya i Jose king lahi nang David. 5 Kayabe neng minuli i Maria a maging asawa na ban palista munaman. Miyaldo ne kanita. 6 Kabang atyu la karin, miras ing oras ning pamanganak nang Maria. 7 At beit ne ing pangane nang anak a lalaki. Binalut neng lampin at kinera ne king lilibangan, uling alang lugal para karela king pipaglayunanan. 8 King sakup na mu rin ning lugal a ita, ating pastul king marangle. Lalamayan da lang babanten ding tupa ra. 9 Bigla yang pepakit karela ing anghel ning Ginu. At linaganap king makapatulug ing makasilo nang ligaya ning Ginu. Tiblan na la ning maragul a takut! 10 Oneng ngana ning anghel karela, “ E kayu mitatakutan! Uling pagdala da kayung mayap a balita a munie maragul a tula karing sablang tau.11 Uling king benging iti king balen nang David mibait ya ing kekayung Talapagligtas, ing Cristo a Ginu. 12 Ing tanda kaniti ya ini:manakit kayung metung a bingut a makabalut lampin at makakera king lilibangan.” 13 At bigla yang meyakit siping na ning anghel ing metung a maragul a grupu ding anghel banua. Ngarang pupuri king Dios,14”Ligaya king Dios king kakataskatasan, at keti sulip kapayapan karetang taung katulan na!”

III. Turu

Pasku na! Ninu mo kekatamu ing e manenaya king pasku? Agyang king telebisyun ampon radiu, bibilangan da ing aldo bayu magpasku ba tamung panandaman ing excitement ning kapaskuan. Ngeni, oini na ing pasku! Masaya ta ngan. Masaya la reng mipapamilya,masaya la reng taung menenaya king pasku.Makwalta o kalulu masaya la ngan king pamanyatang ning kapaskuan uling balu da yapin ya ing aldong kebaitan ning Guinung Jesus. King ebanghelyu tamu, makaniti mu naman ing saya ning yatu inyang mibait ya I Jesus. Mesaya la ri Jose ampon I Maria uling mibait ne ing anak a mipangaku karela. Mesaya la ring pastul a mekabalita king mibait ne ing Kristo. Mesaya ya naman ing banwa kabang migkanta lang “Ligaya king Dios king kakataskatasan” ring anghel. Inya akit tamu ing saya ning mabilug a meto sicluban inyang dinatang ya I Kristung Guinu tamu. Mengari tamung anti mong metung a pamilya a manenaya king pamanyatang na ibat abroad ning tata o ima a meg-abroad. Milabas ing malambat a panaun a ala lu. Ngeni datang na la ban pakiabayan da na katamu. Mengari tamu mong metung a tau a melili king bunduk. Disnan ne ning bengi king bunduk, alang sulu, madalumdum, ala yang akakit nune ring batwin king banwa. Kaybat, bigla, bigla, atin yang akit sala libutad ning dalumdum. E ya malyaring e magsaya uling buri na sabian atin taung daratang a malyaring makasaup keya. Kalupa nya mu naman neng ating brown-out o alang sulu. E tamu balu nanung oras la misindian reng sulu. Pero potang mibalik na ing sulu, panandaman ta mu ing saya agyang malambat pa ing penenaya tamu. Makanyan ta ya naman dapat panandaman ing pamanyatang na ning Guinu ngening kapaskuan. I Kristo iyang sangkan ning saya at tula tamu. Iya ing panenayan tamung datang. At ngening dinatang ne, aintindian ta na obat kailangan ta ya king bie tamu. Nung ala yu ing Guinu, maragul a lungkut ing panandaman tamu uling nung ala yu ing Guinu, makananu tamu rugu king pamibiebie tamu? Nung ala yu ing Guinu, makananu ta pa rugung mamag-asa? Makananu ta la pang dinan katuliran reng panandaman tamung pamagkasakit king bie, nung ala na mu rin pamag-asa a I Kristu mu ing makaibie kekatamu? Nung ala ya ing Guinu king bie tamu, nanu pa ing sangkan obat mikakalugud ta pa, ngeni ing Guinu iya mu kabud ing memie at tinuru kekatamu nung nanu ya talaga ing kabaldugan ning lugud?

Pauli nang Kristo, dapat tamung aintindian, king kaluguran na ka tamung tutu ning Dios!Ala yang pasubali, alang yang pigkaimut ing Dios. Ala yang e isakripisyu ing Dios nung pisasabian ya ing kaligtasan tamu. E na paimburisan ning Dios king manatili tamu king e mayap a kabilianan. E na buri ing milalako tamu pamag-asa king bie. E na kaburian king manatili tamung alipanan da reng miyayaliwang sitwasyun, lalu na nung ma-aalipan tamu lalam ning upaya ning kasalanan a iyang tutung sisira king masanting nang kabilian ning pangatau tamu. I Kristo dinatang ya kekatamu anti mong sala. Pauli na,lilino ing mayap a planu ning Dios para kekatamu ngan. Pauli na, e ya kabud planu ing guewa na ning Dios para king kanauan tamu – tiparan ne ing planung a ini agyang marakal pa ing sumbagal kaniti. Makaplanu na king Dios king ilako na katamu king upaya ning nanu mang makakarok king pamibiebie tamu. Karin,makasadya ya ing Dios agyang nanu pa ing kailangan nang sakripisyung gawan basta mu midinan tamung kanauan at katahimikan karing pamibiebie tamu. Ngening kapaskuan, lumalam sana ing amagtiwala tamu king Dios. E na ka tamu paburen ning Dios. E na ka tamu lakuan. E ya masaya nung ing pamibiebie tamu atiu ya king karalumduman. Magtiwala tamu keya. Ing pamanyatang nang Jesus, metung yang maragul a sangkan ning kekatamung pamagtiwala king Dios a tutung lulugud kekatamu. Ing pamanyatang ng Jesus metung yang maragul a tanda kekatamu king ing pamag-asa tamu atiu ya talaga king lugud ning Dios. At pauli na niti, balu tamung e tamu mabigu king pamag-asang tatalnan tamu pauli nang Jesus. Amen.

IV. Pamigunam

Obat mamie tamu mong regalu neng pasku? E mu uling tradisyun iti. Ing pekamaragul a regalung tinggap tamu king Guinu ngening aldo ning pasku yapin I Jesus a binie ning Ibpa kekatamu. E ya ordinaryung regalu ing binie ning ibpa. Binie ne ing keyang pakamalan a anak a kaluguran nang kaluguran. Nung itamu ing pangutnan da. Atin tamu kayang mayan a pamie a maulaga kekatamo? Siguru nung e ya masyadung maulaga kekatamu ing metung a bage, malagwa ta yang aipamie. Oneng nung maulaga ya para kekatamu at ya kabud yang pibandian tamu, masakit ya sigurung pamie ini. Ing Ibpa, binie ne ing bugtung nang anak kekatamu. Ing kaluguran nang anak, ing pakamalan nang anak ban iya ing mituru kekatamu king ustung dalan. Ing kaligtasan tamu, kang Kristu ya kabud manibatan uling pauli na, pauli ning keyang sakripisyu king krus, metubus ing kekatamung kasalanan. Inya e nya mu kabud kaluguran ning Ibpa ing keyang bugtung a anak, kaluguran na ka tamu naman. E na buri ning Ibpa king malili tamu king dalan. E na buri king maglakbe tamu king yatu a magdili-dili. Kapamilatan na ning anak na, mabibiasa tamung maglakbe king dalan a tuturu ning Guinung Jesus. Neng lawen ta ya ing belen, akit tamu karin king reng binisita kang baby Jesus, magdala-dala lang regalu da para keya. Oini ing spiritu ning kapaskuan – ing atin tamung pamie kareng aliwang tau, ban midinan lang saya. E naman mo kailangan regalu ya ini, o pera, o nanu mang bage. Agyang nanu ya pa ta, mayap yang dapat, o amanung masanting, ot e tamu mo gawan ban panandaman ta ya ing espiritu ning kapaskuan a nung nukarin, reng tau, manibat pa king Dios, mipamie lang regalu ampon miyayaliwang bage, ban midinan lang sigla ampon saya reng aliwang tau. E ta naman kailangan gumastus nung ala tamung pera. Ing importanti siguru king atin tamung buring ibie kareng aliwang tau a makaibie saya karela. Nung apasaya ta la kareng amanu tamu reng aliwang tau, gawan tamu ini. Nung abisita ta la mo reng aliwang masakit a tau, ban panandaman da rugu ing lugud a manibatan kekatamu, ot e tamu mo gawan ita? Marakal a paralan ban apasaya ta la reng tau. Nung makananu tamung mesaya king pamanyatang na ning Guinung Jesus king kapaskuan a iti, sana, iya mu naman ing agawa tamu kareng kapara tamung tau.

V. Pamanahimik

VI. Tauling Panalangin

Ibpa, pasalamatan da kayu uling king maragul a lugud a pepakit yu kekami. Binie ye kekami ing kekong bugtung a anak a I Jesus. Agyang e ke pu karapatdapat keya, anyaran mi king lumalam ke lugud kekayu pauli na. Dinenan yu keng saya a e mi a sukad kening pamanyatang na ning Guinung Jesus. Dinenan yeng sala ing pamibiebie mi pauli na. Manatili pu sana ing saya ming aiti. Ilako yu ke pu king nanu mang e makasanting king kekaming pamibiebie ban e milalako ing sayang binie yu king bie mi. Kaluguran yu ke pu Ibpa. Sana, aibalik mi ing lugud yung pepakit kekami. Salamat pu Guinu. Salamat. Amen.

VII. Kutang
1. Nanu mo ing aibie kung regalu, o agawa ku para kareng kapara kung tau ban apasaya ku la kalupa ning sayang binie na ning Guinu kanaku ngening kapaskuan?

Download here:
Page 1: http://www.mediafire.com/?datywfqj0b719dp
Page 2: http://www.mediafire.com/?ifcc1t1vhpdt4ev

Kapat a Domingo ning Adbiyento

Mipabalu ing Pangabait nang Jesus

I. Pamuklat a Panalangin

Ibpa, tinubud ye ing kekong anghel a I Gabriel king Birhen Maria ban ipasiag na ing mayap a balita keya. Magsaya kami ngan uling tinupad yu ing pengaku yu karing pipumpunan mi king e ye paburen ing yatu at iligtas me iti. Magsaya kami uling kapamilatan ning pamananggap ning Birhen Maria king planu mung maging indu ne ning Guinu ming Jesus, mika-katawan ya ing Guinung Jesus, a Dios na ibat pa king ibat. Kaluguran yu keng tutu Ibpa, uling e ye pegkaimut ing kekong sariling anak a kaluguran yu ban miligtas kami king upaya ning kasalanan. Ngening kapaskuan, magsaya kami uling balu mi, manatili mi yang kayabe ing Guinung Jesus a mekisanmetung king bie mi. E mi na panandaman ing pamag-dili-dili mi, uling kayabe mi ya ing Guinung Jesus king balang galo mi king bie. Balu mi e na ke paburen at e na paintulutan king mibili ke king karokan at king upaya ning kasalanan. Amen.

II. Pamamasa
Lk. 1:26-38
26 Inyang kanam na nang bulan Elizabeth, tinubud ne ning Dios ing anghel Gabriel karin Nazaret, ing metung karing balen na ning Galilea. 27 Atin yang balita para king metung a babaing birhen a makapangakung kasal king lalaking milagyuan Jose a ibat king lahi nang Aring David. k Maria ing lagyu na ning babaing birhen. 28 Dinatang ya kang Maria ing anghel at ngana, “Ing kapayapan manatili keka! d Ing Ginu atyu keka at binendisyunan na kang e mu nanu!”
29 Tutu yang melingasngas a lub i Maria uli na niting amanung sinabi na ning anghel at isip-isipan na nung nanu ing kabaldugan na niti. 30 Ngana ning anghel, “Maria e ka mitatakutan uling meging malam ya lub keka ing Dios. 31 Milamnan ka at ibait me ing metung a anak a lalaki at pamalagyuan meng Jesus. 32 Maging marangal ya at mayaus yang Anak ning Kakataskatasan a Dios. Gawan neng ari ning Ginung Dios, antimo i David a makatua na. 33 Ya ing maging ari da ring lahi nang Jacob king sablang panaun at e ya mapupus ing kayarian na kapilan man!”
34 Nganang sinabing Maria king anghel, “Makananung mapalyari iti kabang ala na ku mang asawa?” e
35 Pekibat na ning anghel, “Datang ya keka ing Banal a Espiritu at lilungan na ka ning upaya na ning Dios. Uli na niti, mayaus yang Anak ning Dios ing banal a mibait keka. 36Lawan me i Elizabeth a kamaganak mu. Sasabian da ring tau king e ne manganak, oneng ngeni kanam na na, agyamang matua ne. 37Uling alang bage a e na apapalyarian ning Dios.”
38Nganang Maria,” Talasuyu na ku ning Ginu, marapat sa kanaku antimo ing sinabi mu.” At likuan ne ning anghel.

III. Turu
Potang ating masanting a milyari king bie tamu, malagwa ta yang babalita ini kareng kakilala tamu. E tamu akwang asalikut ing saya a panandaman tamu potang ating milyaring masanting kekatamu. Neng kai, uling as na ka tamu kasaya, akwa tamung magtau bilang pasalamat king milyaring masanting kekatamu. Reng mikakaluguran, neng kai mipapaglibri la mong pamangan ban makapagsaya la king bageng milyari karela. E tamu asalikut, e tamu a sinup ing tutung masanting ampon mayap a balita king bie tamu. Alang makapigil kekatamu ban idake ta ya ing saya tamu potang tutung masaya tamu.

King ebanghelyu tamu, atin mu naman e mekapagpigil king saya na. Ninu ining e mekapagpigil king saya na? – Ing Dios. E na asalikut rugu ing saya nang panandaman king ipadala na ne ing keyang bugtung a anak kekatamu. E na na a pigil ing saya a panandaman na ngening magumpisa na ing pamagligtas na kekatamu a balen nang luluguran kapamilatan na ning anak na a I Jesus, ban mikabus ta na king kasalanan.Uling e na napin a salikut ini, memalita ya kening as na kasanting a balita a ini, inya tinubud ne ing anghel na, I Gabriel king metung a Birhen a lagiu na Maria. Inyang tinubud ne I Gabriel kang Maria, pepasiag ning anghel ing saya ning Dios kang Maria at ing planu nang maging indu ne ning keyang bugtung a anak a I Jesus. At aliwa mu ita. Pepasiag na naman ning anghel kang Maria ing mayap a balita tungkul king pinsan na a I Elisabet, a atiu king kanam na nang bulan a pamagbuntis.

At ing peka masayang diling milyari kening ebanghelyung iti, iya ing pamananggap nang Maria karing egana-ganang sinabi ning anghel keya. Kapamilatan ning pamananggap a iti, mipatupad ngan kang Maria ing kaburian na ning Dios a makaplanu na king ibat pa. Pauli ning tangu a binie nang Maria king Dios, kinagli ya lalam ning upaya ning Espiritu. At uli na pin niti, megumpisa neng meging tutung tau ing kadwang persona ning Santissima Trinidad.

Kalalam a misterio! Ing Dios migkatawan yang tau, pauli ning pamananggap na ning metung a malinis a babae a ausan tamung Indung Maria. Ing Dios, plinanu nang pakiabayan na ka tamu bilang tutung Dios ampon tutung tau. Ing Dios, mekisanmetung ya kekatamu, king kekatamung pangatau! Pauli na niti, makananu tamung a sabi king ing tau marok yang tutu, nung ing Dios mismu mebisa yang maging tau! Keni tamu aintindian ing dignidad ning balang metung kekatamu. Itamu, lelangan na katamu ning Dios a kawangis na. Pauli na ning pangawangis ta keya, itamu ngan, atin tamung dignidad. Ing dignidad a iti, e manibatan king nanu man a kebaluan tamu, o kaya kayatinan tamu. Ing dignidad a iti, manibatan ya king Dios mismu. Inyang meging yang tau ing Guinung Jesus, tinaid na ne ing balang metung kekatamu king sarili na. Ing egana-ganang saya tamu, ing egana-ganang lungkut tamu, ing egana-ganang pamag-asa tamu, ing kasakitan, ing kabayatnan, inaku na at guewa nang tutung keya uling mekisanmetung ya rugu ing Dios kekatamu. Inaku na naman ing egana-ganang kasalanan tamu, agyang iya mismu, ala yang guewang kasalanan. Mebisa ya rugung tipa ibat banwa ing Dios king pangatau ning Guinu tamung Jesus ban makisanmetung kekatamu.

Ngening kapaskuan, imaginan ye ing Dios, mebisa yang maging bingut! Mababa niya lub tutu ing Guinung Jesus nung isipan ta yang masalese, king iya Dios ne manibat pa king ibat. Oneng uling bisa yang makisanmetung kekatamu, tinggap na ing limitasyun ning kekatamung pangatau ban maging kalupa ta ya king egana-gana pwera mu king kasalanan.

Inya makananu ta pang asabi king malaut ya ing Dios kekatamu? Makananu ta pang asabi king ala yang masabal ing Guinu king daranasan tamung kasakitan king bie? King ala yang pakialam king malilyari kekatamu? Tandanan tamu, ing saya tamu, guewa na nang saya na. Ing lungkut tamu, guewa na nang lungkut na. Ing kabayatnan tamu, kabayatnan na naman. Ing pamag-asa tamu, iya mu naman ing pamag-asa na. Potang maragul ing takut tamu king bie, migaganaka ya naman ing Guinu, uling e na buri king panandaman tamu king magdili-dili tamu keti yatu. Ing pangabait na keti yatu, metung yang katutuan a e tana ailako at dapat tanang tanggapan king ing Dios, e na katamu lakuan at kalingguan. Daramdaman na ing gaga tamu, ing balang kiyak tamu king bie. Migit pa kareng panandaman tamu, panandaman na naman ing bayat da ring kasalanan tamu.

Pasalamatan ta ya ing Guinu ngening kapaskuan. Pauli mu, pauli ku, mebisa yang maging tau ban makisanmetung ya kareng egana-ganang pigagap tamu. Manibat ngeni, e ta na dapat milalako pamag-asa king bie uling abe ta ya ing Guinu, ngeni at kapilan pa man. Amen.

V. Pamigunam

Ngening kapaskuan, marakal tamu akakit a belen. Karin akit ta ya I Jose, I Maria, reng atlung ari, reng pastul a magdalang regalung tupa. At ing sentru ning belen, ya I baby Jesus. Minsan, tuknang tamu at lauen ta ya I Baby Jesus. Isipan tamu, obat mo mebisa yang pakiabayan na ka tamu keti yatu? King kasaya na na king banwa kayabe ning Ibpa na, obat mebisa ya pang makiabe kekatamu? Ot mebisa yang pakiabayan na katamu, ngening manyaman ne bili king banwa? Ot bisa ya pang magsakripisyu ampon mibait king kalulung kapaligiran? Sasabian na kekatamu ning amanu ning Guinu, king ing Ibpa, pepadala ne ing bugtung nang anak king yatu uling kaluguran ne ing yatu. Kaluguran na ka tamu ngan! Ngening pasku, lauen ta yang pasibayu ing belen, at sabian tamu king sarili tamu king binie ne ning Ibpa I Jesus, uling kaluguran na ka tamu. I Jesus iyang binie na kekatamu. Kapamilatan na, e mu milalako ing kasalanan tamu, nune uling keya, ating
tamung kayabe king bie tamu. E ta na kailangan lungkut pa, o panandaman ing pamagdili-dili tamu. E ta na dapat milalako pamag-asa uling pauli nang Jesus, atin tamung pamag-asang e mabibigu.
Pasalamatan ta ya ing Dios. Kapamilatan nang Jesus, mika pamibiebie tamung ating saya, ating pamag-asa, ating mamantabe. E ta asabi ngeni king ala ta mung kayabe potang mamagkasakit tamu. Ing Guinu, kayabe ta yang kayabe. Nung e meg-adwa isip king pamanipa na, atin ya pa kayang ipagkaimut a kayapan a e na aibie at agawa para kekatamo? Salamat Guinung Jesus king pangabait mu. Tutung kaluguran yu kami uling pinili mung mibait ka bilang tau ban makisanmetung ka kekami. Amen.

V. Pamanahimik

VI. Tauling Panalangin
Ibpa, pasalamatan da ka uling melunus ko king kekaming sitwasyun. Uling e yu buring manatili kami king upaya ning kasalanan, tinubud ye ing kekong bugtung a anak a I Jesus bilang talapagligtas mi. King pangabait na king Birheng Maria, tinaid at inabe na na ing sarili na king balang tau. Meging kalupa mi ya pwera mu king kasalanan. Mekisanmetung ya kekami, karing kekaming saya, lungkut, kabayatnan at miyayaliwang pigagap ban agnan agnan na kami icabus king egana-ganang karokan kapamilatan ning pangamate na king krus. Ngening kapaskuan Ibpa, pasalamatan da kayu uling pepakit yu kekami king ala kong ipagkaimut kekami, agya ing luluguran yung anak, e ye pegkaimut kekami ban midinan ya sanang sala ing pamibiebie ming atiu mung atiu king karalumduman. Manatili ya pu sanang sala kekami ing Guinung Jesus ngening kapaskuan ban e ke malili king bie, ban manatili ing kekaming pamag-asa, ban miyabe kami king bieng alang-anggang pengaku na ngan karetang manatiling tapat at lulugud keya. Salamat pu Guinu. Salamat. Amen.

VII. Kutang
1. Patune ya ing pangabait nang Jesus king lugud ning Ibpa kekatamu. Nanu kaya ing patune tamu king Ibpa na kaluguran ta ya naman?

Download here:

Page 1: http://www.mediafire.com/?at4w4twz3y28yvm
Page 2: http://www.mediafire.com/?datywfqj0b719dp

Katlung Domingo ning Adbiyento

Ing Patutu nang Juan a Maminyag

I. Pamuklat a Panalangin

Ibpa, king pamipatutu nang Juan Bautista, akilala mi ya ing tune a sulu at dalan ning bie. Kapamilatan na, ikwa mi yang akilala at alapitan ing Guinung Jesus a iyang sangkan ning saya ning pamibiebie mi. Palakasan yu pa pu ing kasalpantayanan mi ban lalu mi ya pung akilala. Pauli na pu ning Guinung Jesus, mika kayapan ing pamibiebie mi. Dininan na keng pamag-asa kareng pamibiebie ming milalako na pamag-asa. Kang Kristo, midinan keng bayung pamibiebie. Kapamilatan na, mika katahimikan ing bie mi agyang makapadurut ke pa king miyayaliwang mangabayat a problema. Penandaman mi ing lugud na king bawat metung kekami a iyang mamie lakas king pamaglakbe mi keti yatu. Salamat pu Ibpa kang Jesus. E ke pu sana maririneng papakilala mi ya kareng aliwa pang taung malaut a pamibiebie keya. Salamat Guinu. Salamat pu. Amen.

II. Pamamasa
Jn. 1:19-28
19 Iti ing patutu nang Juan kanitang mitubud lang pari at Levita ding Judio ning Jerusalem ban ikutang da keya: “Ninu ika?”
20 Pigtapat nang Juan at e na pepayalian, nune sinabi nang malino, “Aliwa aku ing Cristo.”
21Kitnan deng pasibayu, “Nung makanyan, ninu ika? Ika i Elias?”
Pekibat nang Juan, “Aliwa aku.” Kitnan da ne naman, “Ika ing Propetang panenayan me?”
“Aliwa,”nganang mekibat Juan.
22 Ngara pa, “Ninu wari ika? Sabian mu ban atin keng apakibat karetang mitubud kekami. Nanu ing asabi mu tungkul king kekang sarili?”
23 Mekibat ya i Juan, “
Aku ing siwala nitang kukulait king disyerto;
‘Itulid ye ing dalan a dalanan ning Guinu!”
(Iti ya ing sinabi ning propeta Isaias)
24Ding taung deti tubud lang ibat karing Pariseo. 25 Kitnan da ne naman i Juan, “ Bakit maminyag ka ngening aliwa pala ika ing Cristo o i Elias o ing Propeta?”
26 Nganang mekibat Juan, “Maminyag ku king danum, oneng libutad yu ating metung a e yu akikilala. 27 Ya ing daratang kaybat ku at e ku karapatdapat agyang kalag mu karing tali da ring sandalyas na .”
28Iti mepalyari karin Betania, king kangatba ning Ilug ning Jordan nung nu ya maminyag i Juan.

III. Turu
Neng ating kakasal king pisamban, ing lalaking kakasal manenaya ya king lele ning altar. Karin panenayan ne ing kakasal nang babae a magprusisyun kayabe ding marakal a tau a kayabe king ausan dang ‘entourage’. King prusisyun a ini a manibatan king pasbul arap ning pisamban, atiu la ring flower girls, ring bearer ampon reng damas na ning kakasal a babae. Ing pekatauli king prusisyun a iti ya ing kakasal a babai. At ninu ing kayabe na ning kakasal a babai kabang prusisyun? Ing tata na ning babai. Nung mete ne o ala yu ing tata, ing magsilbing anti na mong kayabe, metung ya kareng kapatad o kamag-anak a lalaki a iyang manalakaran bilang mong tatang. Kayabe ne ning kakasal a babai ing lalaking aini a makatalan keya. Potang malapit ne ing kakasal a babai king kakasal a lalaki, ibie na ne ning tata king lalaking kakasal ing babaing pakasalan na. Potang agawa na na ning tata ini, lakuan na ne ing babai at lukluk ne uling meyari na ing obra na.
King ebanghelyu tamu ngeni, anti ya mong metung a kwentu tungkul king “job description” nang Juan Bautista. Uling e pa malino kareng tau, lalu na kareng pari ampon levita nung ninu talaga I Juan Bautista, pengutnan da neng pengutnan. Bala da iya I Elias, o kaya ing propetang panenayan da o kaya ing Mesias a magligtas karela. Ing pekibat nang Juan Bautista karela :” None of the above” ngana. “Aliwa aku I Elias, aliwa aku ing panenayan yung Propeta, aliwa aku ing Mesias”,
Nung lawen ta ya ing obra o “job description” nang Juan Bautista, anti ya mong Job description o obra na ning tatang a binanggit tamung istorya ning metung a prusisyun king kasalan. Ing tata, aliwa iya ing kakasal da. Iya ing mamantabe king anak nang kakasal a babai. Ing obra na antabayanan ne ing anak nang kakasal ban aibie ne king lalaking kakasal. At potang aibie na ne ing antabayanan nang kakasal a anak king lalaking kakasal, masaya ne kanita, uling meyari na ing obra na. Makaniti ya ing obra nang Juan Bautista. Menantabe ya kekatamu ban aisadya na ka tamu ban apitabmu nakatamu - itamung balayan ning Dios, king panenayan tamung Guinu a I Jesus. I Juan iyang migsadya ban karapat dapat ta yang aenkwentru ing Guinu. At potang agawa na na iti, mako ne king eksena uling masaya ne king pamitabmu ning Guinu king balayan a pakamalan na a itamu.

Inyang milabasan a dominggu, ing mensahi ng Juan Bautista kekatamu oini: “Painggulutan tamu ing kasalanan ban maging karapat dapat tamu king pamanyatang ning Guinu.” Ngening dominggung aiti, aliwa na itamu ing tatanggap kang Jesus bilang anti mong bisita, nune itamu na dapat ing magpakilala kang Jesus kareng aliwang tau, kalupa ng Juan Bautista. Kalupa nang Juan, marapat mung pakilala ta ya I Jesus kareng aliwang tau. Kalupa nang Juan, aliwa ing sarili tamu ing tutuldu tamu nune ing Guinung Jesus a iya dapat ing parasan ning bawat tau keti yatu. Kalupa nang Juan, dapat mung magpakumbaba tamu ban apakilala ta yang masalese ing Guinung Jesus karing taung makapadurut kekatamu. Ing pigagap tamu ngeni ya ing pigagap nang Juan Bautista – ing magpakilala kang Jesus kareng taung e pa makakilala keya. Ana ning ebanghelyong binasa tamu: “ Dinatang ya I Juan ban munie patutu tungkul king sala ban king kapamilatan na ning pamipatutu na manaliwa la ding sabla.” (v. 7) Ing pamipatutu nang Juan ya ing meging dalan king pamananggap tamu king Guinu. King pamipatutu nang mitmung kababan ampon simpling pamibiebie, ikwa neng apakilala ing Guinung Jesus kekatamu. Meniwala tamu kang Jesus uli na ning pamipatutu nang Juan.
Sana, itamu man mabiasa tamung magpatutu king Guinu ban kalupa nang Juan Bautista marakal la reng taung maniwala king Guinu. Kalupa nang Juan, sana maging pigagap ta ne king bie tamu king ipakilala ta ya ing Guinu kareng e pa makakilala keya. Kapamilatan ning pamipatutu ning bie tamu, akwa ta la sanang papaniwalan kang Jesus reng taung makapadurut kekatamu. Amen.


IV. Pamigunam

Mabilis mumulayi ing indredus. Kapamilatan da reng sarili tamung amanu, mikakalat ing indredus. Kapangan da reng kerakalan kekatamu ing indredus a makasira at e makakayap. Pasitsit tamung sasabian ing indredus, oneng agyampang pasitsit ini, ing epektu na as na kalaganap. Pauli ning indredus, marakal la reng masisirang relasyun. Marakal la reng masisirang komunidad. Marakal la reng masisira lagiu pauli ning indredus. Ing dok na pa, ala naman bisang umamin ampon magpatutu king iya ing mikakalat king indredus.!
Obat kaya makanyan ya ing ugali tamu? Potang ating kasiran ampon e masanting, misisiglulu tamung panyabian kareng aliwang tau ing kasiran a iti? Reng aliwa, dela da nang metua ing matsurang ugaling a iti. Anggang ngeni, king katwa da na, mahilig la pang mangalat king tutung makasira at e makasaup king komunidad.
King ebanghelyu tamu ngeni, ikit ta ya I Juan Bautista, magpatutu king kayapan, king katutuan, king lugud a mibie kekatamu a I Jesus tamung Guinu. Imbes na mo ing makasirang indredus ing kakalat tamu, ot e tamu mo ipangalat ing nanu mang makakayap, ing nanu mang makasaup king pamiyabe ning komunidad! Imbes na magpatutu tamu karing kasiran a matsurang panandaman, ot e tamu mamie patutu king nanu man ing masanting a akakit tamu a malilyari kareng kautus tamu?
Ngening ikatlung dominggo ning adbiyentu, agkatan na ka tamu ning pisamban king ipasiag ta ya ing kalugud lugud a pangatau nang Jesus kareng memalen. Kalupa nang Juan Bautista, magpatutu tamu para king Guinung panenayan tamung datang. King mitmung kababan a lub, kalupa nang Juan Bautista, ipabalu taya ing Guinu, lalu na ing nanu mang kayapan a guewa na kekatamu. Ipamalita tamu kareng kayabe tamu ing bayung bie a binie na ning Guinu kapamilatan na ning amanu nang daramdaman tamu. King pamagbayung lub ampon pamibiebie a ating katahimikan, pasalamatan ta ya ing Guinu. Ikwentu tamu kareng aliwang tau ing kayapan a guewa ning Guinu kekatamu. Kalupa nang Juan Bautista, e tamu maririneng magpatutu king Guinu. Kalupa nang Juan Bautista, magbaba tamu lub ban lalu ta yang apakilala ing Guinu kareng akakayabe tamu king bie.
Ilako ta na ing magpatutu kareng kasiran ampon indredus a e makasaup. Ilako ta na manibat pa ngeni ing e makasaup a pisasabian kareng kapara tamung tau. Imbes na kasiran, magpatutu tamu king kayapan at lugud a tinggap tamu king Guinu. Ngening kapaskuan, pasalamatan taya ing Guinu, uling pebusten nang akilala ta ya kapamilatan na ning amanu na. Pasalamatan ta ya uling kapamilatan na, memagbayu tamu pamibiebie, melalam ing pamiabe tamu king BEC. Mika komunidad tamu a nung nukarin, penandaman tamu ing tutung lingap at lugud ning bawat metung kekatamu. Magpatutu tamu kareng masanting a malilyari a reni king bie tamu. Kapurian ampon pamipasalamat keka Guinung Jesus! Pauli yu, mika katahimikan ya ing bie mi, agyang libutad na pa ning marakal a kapagsubukan ampon kabayatnan! Sana, mabiasa keng magpatutu king kayapan mu, king arapan da reng tau! Amen.

V. Pamanahimik

VI. Tauling Panalangin
Ibpa, tinubud ye kekami I Juan Bautista ban mabiasa kami naman magpatutu kang Kristo. Ing mayap a balitang tinggap mi kapamilatan ng Jesus, iya sanang alang sawa ming papasiag kareng makapadurut kekami. Akit da sana king pamibiebie mi ing saya ning panandaman mi. Panandaman da sana ing lugud mi karela a bunga ning lugud yu kekami. Asiuala de sana kekami ing siuala yu Guinu potang kayabe da kami king bie da. At akit da sa ing kababan a ikit mi kekayu. Guinu, gawan yu keng instrumentu ban mipalaganap ing kebaluan da reng tau king Guinung Jesus. Kapamilatan ning pamipatutu mi, lalu la pu sanang mipalapit reng taung malaut kekayu. Marakal pung salamat Guinu. King grasya, king kayapan, king katahimikan ning bie, sumangid ning kapagsubukan ampon kabayatnan, ika at ika mu ing balu ming sandalan. Salamat Guinu. Salamat. Amen.

VII. Kutang
1. Maging dalan ku kaya kareng aliwang tau ban akilala de ing Guinung Jesus?

Download here:
Page 1: http://www.mediafire.com/?f1dosm3sougp6z3
Page 2: http://www.mediafire.com/?hlg1owcng83acf9

Kadwang Domingo ning Adbiyento

Ing Pamanaral nang Juan a Maminyag

I. Pamuklat a Panalangin

Ibpa, king pamanyatang ning kekong anak a I Jesus, tinubud ye kekami I Juan Bautista. King pamibiebie nang Juan, tuturu yu kekami ing ustung paralan a pamagsadya king pamanyatang ning kekong anak a I Jesus. King pamibiebie nang simpli ampon mitmung kababan a lub, ikwa neng tildung masalese ing Guinung Jesus. Dinan yu ke mu naman a grasya ban a tuldu kareng kapara ming tau ing Guinung Jesus a iyang tutung talapagligtas mi. Datang na kayu Guinu, datang na kayu. Panenayan mi ne ing pamanyatang ning kekong anak ban mipatupad na ing kaburian yu keti yatu. Datang na kayu Guinu. Amen.

II. Pamamasa
Marcos 1:1-8
1 Iti ya ing Mayap a Balita tungkul kang Jesu-Cristo, ing Anak ning Dios. 2 Megumpisa ya iting balita kanitang matupad ing ula nang Isaias a propeta:
“Oyan ing kakung tubud a parala kung makauna keka, isadia na ing kekang dalanan.’
3 Sasabian na naman ning metung a kukulisak king disyerto,
‘Isadia ye ing dalanan na ning Ginu, itulid ye ing dalan a tuntunan na!”
4 Dinatang ya king disyerto i Juan, maminyag ya at manaral. Ngana karing tau, “Sumisi kayu at painggulut karing kekayung kasalanan at pabinyag kayu ban patawaran na kayu ning Dios.” 2 Minta la king disyerto ding sablang tau ning mabilug a Judea at Jerusalem ban makiramdam kang Juan. Kimpisal da la ring kasalanan da at bininyag na lang Juan king Ilug ning Jordan.
6 Megawa king buak kamelyu ing imalan a susulud nang Juan, kapirasu yang balat animal ing sinturun na. Durun at pulut-panilan ing pamangan na. 7 Nganang menaral kanaku ing daratang a katuki ku; e ku man karapatdapat agyang kalag mu karing tali nang sandalyas. 8 Bibinyagan da kayu king danum oneng binyagan na kayu king Banal a Espiritu.”

III. Turu
Potang ating datang a bisita king bale tamu, magsadya tamu. Linisan ta ya ing bale. Ing egana-ganang kalat ugse tamu. Nung atin mang masisira nang gamit, lalarinan ta la. Buri tamu masalese ngan. E tamu bisang mipakarine king daratang a bisita lalu na nung importanti yang tau ini. Reng kubyertus tamung gamitan king okasyun a ini ila reng bayung kubyertus a e tana man gagamitan neng aldo simpli. Reng paka-plastic tamung sala-set o dining set, lalako ta la panga-plastik ban akit ning bisita king lupa la pang bayu reng furnitures tamu. Ini gagawan tamu ngan uling ating datang a importanti king bale.

Ing kadwang domingu ning Adbiyentu kalupa niya naman ing malilyari kekatamu neng atin tamung daratang a bisita. Ing bisitang daratang tamu, iya ing Guinu, I Kristo a iyang panenayan tamung datang a pasibayu. Ngeni, nung panenayan ta yang datang, kailangan magsadya tamu. Makananu tamu mong magsadya king pamanyatang na? Maglinis tamung bale? Manyindi tamung Christmas lights? Makiabe tamu king simbang bengi? Magtau tamung marakal ampon manyaman para king kapiyestan na ning pasko? Malyari ta no man gawan deni ban panandaman ta ne man bagya ing Christmas. Oneng nanu talaga ing dapat tang gawan ban aisadya tayang tutu ing pamanyatang na ning Guinu?
Ing ebanghelyu tamu ngeni, didinan na katamung metung a masanting a paralan ban makapagsadya tamung masalese king pamanyatang ning Guinu. Papakilala ne kekatamu I Juan Bautista. Balu tamu king I Juan Bautista kamag-anak neng Jesus. Oneng ing misyun nang Juan Bautista yapin ya ing pamagsadya king dalan ning Mesias a I Jesus. Makananu neng pigsadyan Juan Bautista ing dalan para kang Jesus? Menaral ya karing tau.

Ing penaral na oini: “ Lakuan ta na at painggulutan ta na ing pamibiebie kasalanan. “ Nung itamu maglinis tamu kareng pibale-bale tamu potang ating datang a bisita, makanyan mu naman ing pamanyaus nang Juan Bautista potang datang ne ing Guinu – maglinis tamung sarili, painggulutan ta na ing pamibiebieng e ustu. Gawan ta yang karapat-dapat ing sarili tamu ban tanggap king pamanyatang na ning Guinu kekatamu. Oini na siguro ing pamagsadyang anyaran na ning ebanghelyu kekatamo. Panikuanan ta mung dasnan na katamung malinis ampon e ma-aalipanan king nanu mang bageng marok king bie tamu. At nung atiu tamu man king kabilianan a nung nukarin alipan na ka tamu pa ning kasalanan, paingulutan ta na ini ban kanita akwa tamung maging karapat-dapat king pamanyatang ning Guinu.

I Juan Bautista as ne kasimplian a tau. Sasabian na ning ebanghelyu king metung yang taung simpli mu gayak- gawa la king buak ning kamelyu reng imalan na. Atin yang kapirasung balat animal bilang sinturun. Simpli mu ing pamangan na – pulut panilan (honey ) ampon durun. Ala yang luhu, e ya magarbu. Mitmu ya pang kababan uling agyang marakal la reng minta keya (mabilug a Judea at Jerusalem) king disyerto ban makiramdam keya, tildu ne I Jesus at aliwa ing sarili na iyang tinas na, inyang ngana: “ Lalu yang mayupaya kesa kanaku ing daratang a katuki ku; e ku man karapatdapat agyang kalag mu karing tali nang sandalyas”. Sumangid ning keyang simpling pamibiebie, iya pa ing tutung makaturu kekatamu nung makananu tamu makapagsadya king pamanyatang ning Guinu. Lako ta na king isipan tamu king e tamu makapagsadya king kapaskuan nung e tamu gagastus. Lako ta na king isip tamu king e tamu malyaring magsaya neng kapaskuan nung e tamu makasaling bayung imalan o makasaling pang noche Buena. E ya makanyan ing tuturu nang Juan Bautista. Simpling pamibiebie, simpling pamangan ampon imalan at migit keni, kababan a lub. At ing importanting dili ban makapagsadya ta king kapaskuan, - ing pamanyakwil king nanu man e makakayap kekatamu, lalu na king kasalanan.
Pagsadyan ta ya ing pamanyatang na ning Guinu kalupa ning pamagsadya a guewa nang Juan Bautista. King mitmung kababan ampon kalinisan ning pusu, tanggapan ta ya ing pamanyatang na ning Guinu ngening kapaskuan. Amen.

IV. Pamigunam
Inyang bayu ke pa makiabe king BEC Guinu, balami mo e ke saya king pasku nung ala lang imalan a bayu reng anak mi. E ke saya nung ala keng pamangan a manyaman. E la saya reng anak nung ala lang a tatanggap a regalu o pera kareng tegawan da. Bayu pa magpasku, marakal na ke sasaliuan a palamuti king bale. Atin nang Christmas lights, atin nang parul ampon miyayaliwang palamuti a lalage mi king bale ban panandaman mi ya mo ing kapaskuan. Kanita ita Guinu. Akwa mi pa kanitang manutang ban akwa mi ngan ing buri nang akit ning mata mi. Kanita e mi ya panandaman ing pasku nung ala ngan ini. Agyang mika-utang-utang kami pauli da rening gastusan a reni, ok mu kekami, uli na pin iya ing malilyari king makapaligid kekami.

Oneng Guinu, keng ebanghelyu yu ngeni, aliwa ya ing sasabian yung paralan ba mi yang apagsadyan masalese ing kapaskuan. E king paralan a pigagastusan pala ing dapat malyari kekami potang pagsadyan mi ya ing kapaskuan. E pala king bayung imalan o king manyaman a noche Buena ing paralan a tuturu yu nune king paralan a pamanaliwa o pamagbayu king pamibiebie mi. Kanita, potang datang ne ing pasku, mababalisa na kami, magugulu na ke isip nung nukarin mi panguanan ing perang kailangan mi ban makapagsadya ke para king pasku. Ing kagugulu ning isip mi ya ing palamuting buri ming akit. E pala makanyan ne Guinu?

Kapamilatan nang Juan Bautista a iyang pinili yung magsadya king kekong dalanan king pamanyatang yu, tutuldu ye kekami ing tutung paralan nung makananu ke makapagsadya king pamanyatang yu. Ilele mi ngan dapat ing pigagap king pigagastusan at lauen mi ya pamu ing sarili ming pamibiebie nung makayagpang ya king kaburian yu. Oini ing paralan ban tutu mi yang panandaman ing saya ning kapaskuan. Jesus ika ing saya ning bawat metung kekami. Nung malinis ya ampon atin yang kababan ing pusu mi, matula da kang tanggapan at panenayan king pamanyatang yu ngening kapaskuan! Dinan yung sala ing dalumdum ning bie mi. Ilako yu ing pagnasan ming luhu ampon ketasan potang datang ing kapiyestan ning pasku. Datang na ka Guinu. Datang na ka. Dasnan yu ke sanang malinis ampon mababa lub kalupa ning kekong tiburan a I Juan Bautista!


V. Pamanahimik

VI. Tauling Panalangin

Ibpa, pasalamatan da kayu uling binie ye kekami I Juan Bautista. Iya ing taung tuturu kekami nung makananu ke magsadya king pamanyatang ning Guinu. Kapamilatan ning bie nang simpli ampon mitmung kababan a pilubluban, mabiasa ke pu sanang migunam king sarili ming pamibiebie ban ailako mi ing nanuman e makakayap king bie mi, lalu na ing kasalanan a e mi buring ilako. Binie ye pu kekami I Jesus bilang sulu ampon aslag ning pamibiebie mi. Kapamilatan na, midinan pu sanang sala ing pamibiebie mi. Makaranas ke pu sanang tutung saya, a e manibatan king nanumang material a bage ngening kapaskuan. Makaranas ke sanang tutung kanauan, a e manibatan king asasali ning kekaming pera. Makaranas ke pu sanang kapayapan at katahimikan king bie mi a dulut ning bie a banal a ikamu Guinu ing makaibie. Datang na ka Guinung Jesus, datang na ka. Maghari na ka king kekaming pusu ban panandaman mi ing tutung saya ning kekong pamanyatang ngening kapaskuan. Amen.

VII. Kutang

1. Obat kaya pinili ne ning Guinu I Juan Bautista ban misadya king pamanyatang nang Jesus? Nanu la mo kaya reng kaguian nang Juan a dapat tang pakiapusan?

Download here:
Page 1: http://www.mediafire.com/?08tvm2zdv5915qr
Page 2: http://www.mediafire.com/?tkqjd9h6qb4rocj