Katlung pulu’t metung a Domingu ning Ordinaryung Panaun

I Jesus at i Zaqueo

I. Pamuklat a Panalangin

Ibpa, babie mi pu ing sablang kapuryan at kapasalamatan kekayu. Anyaran mi pu king kaorasan na antabayanan na kami ning kekang Banal a Espiritu. Palino na kekami ing kaburyan yung mitatag ya ing kayarian yu kareng pusu mi. Iti pu pasalamatan at anyaran mi king lagyu ning kekang Anak I Jesus. Amen.

II. Pamamasa

Lucas 19:1-10 Linub ya at linabas i Jesus karin king Jerico. 2Ating metung a mabandi karin a pamuntuk da ring talapanyingil buis, ing lagyu na Zaqueo. 3Pilit neng buring akit nung ninu i Jesus. Oneng pandak ya i Zaqueo at e ne agyung lawen uli na ning keraklan da ring tau. 4Inya migpauna yang milayi at minukiat ya king metung a tanaman a sikamoro ba neng akit dumalan i Jesus karin. 5Pangaras nang Jesus king lugal a ita, tinalanga ya at sinabi na, ”Zaqueo, kuldas kang malagua uling kailangan kung salangi ngeni king bale mu.” 6Memalagua yang kinuldas at matula neng tinggap i Jesus. 7Mibubulungan la ding sablang menakit king mepalyari. Ngara, ”makipagbisita ya king metung a makasalanan!” 8Tinalakad ya i Zaqueo at sinabi na king Ginu, ”Ginu, ing kapitna king pibandian ku ipamie ku karing pakakalulu. At nung sakaling atin kung pirait ninuman, isubli kung makatapat a besis keya.” 9Nganang Jesus kang Zaqueo, ”Dinatang ngeni ing kaligtasan king pibalebaleng iti; ing taung ini lahi nia namang Abraham. 10Uling dinatang ya ing Anak ning Tau ban panintunan na la at iligtas ding mebating.”

III. Turu

Ing istorya ning ebanghelyu ngeni yang preparasyun ning pamaglub ning Ginung Jesus king Jerusalem, ing lugar ning kayang destinasyun na mig-umpisa king 9:51. Ing istorya tungkul ya kang Zaqueo na metung kareng lider dareng talapanyingil buis. I Zaqueo, kalupa nya naman ing istorya ning bulag king Jericho (18:35-43), dyang king keraklan dareng tau buri nya namang akit ing Ginu tang Jesu Kristo. Oneng ing problema pandak ya I Zaqueo at e ne akwang akit ing Ginu. Nya king maragul ng kapagnasan, minukyat ya keng metung a tanaman ban neng akit ing parati dang pipagkwentuan deng tau, na magpakayap kareng masakit, na papasubling mebie kareng mete, na magsalita tungkul king kayarian ning Dios. Keni papakit na nung bisa taya talagang akilala ing Ginu kaylangan ing atin tang maragul a determinasyun at dakal a pamagtsaga. Pauli ning kayang panga lider dareng talapanyingil buis mababa ing panlalawe dareng tau kaya. Pangilagan at tuturing reng makasalanan, uling ing sablang isip da, ing pibandyan na ibat ngan king kapamuraytnan. Keni papakit na ning istorya na metung yang maliling tupa, na e nane balu ing kural papunta king kawan. Mangailangan yang kasaupan ban yang makapagbalik king kawan at ing Ginung Jesus mu yang makasaup kaya. Nya inaus ne ning Ginung Jesus at pepakuldasan ne king tanaman ban salangi at mangan king kayang bale. Migbayu ing panlalawe ng Zaqueo king bie at iti pauli na ning pamanaus na kaya ning Ginung Jesus. Sinalpantaya ya I Zaqueo kareng amanu ning Ginu tang Jesus at ikwa ng meging maganaka at malam a lub. Ngening kasalukuyan, tutung dakal la reng bisang tuki king Ginu, ing sakit agyang makananu na katamung ausan ning Ginu, e tamu bisang baba king tanaman, uling matas tamu lub, buri tamu ing atyu tamu king pedestal. Nya ngening kaorasan, ausan at agkatan na katamung Jesus na baba kareng ketasan ta lub ban yang lungub king kekatamung pamibie-bie. At patsa milyari ini, kalupa ng Zaqueo ating maragul siguradung pamagbayu king bie tamu. Amen.

IV. Pamigunam

King mabilug a yatu, ing sangkan ot bakit dakal la reng kalulu, masakit at daranup yapin ing dakal pa kekatamu ing alang kakuntentuan. Atin tana pagkapilitan ta pang kunan ing kareng aliwa. Buri tamu itamu mung mikaswelu. Magkapilit tamung panintunan ing tune saya at maralas ing bala tamu king materyal ta akit iti. At potang ing sablang bage atyu na ngan kekatamu, karin tamu rin akit na atin pa murin prublema at karin ta aisip ing maus king Apung Ginu. Ing e ta balu, aliwa itamu ing mamaus king Ginu nune malwat na nakatamung ausan ban baba kareng ketasan tamu lub. Parati yang mamaus kekatamu ing Ginu, buri na katamung dinan tutung tula at saya at iti yapin ing maging kayabe taya king pamibie-bie tamu. Amen.

V. Pamanahimik

VI. Tauling Panalangin

Ginu, dakal pung dakal a salamat king pamanantabe yu kekami. Sopan yu kaming parating magpursiging panintunan ing kaburyan mu. Turuanan yu kami pung parating makiramdam king aus yu ban kanita maging parati kami naman baba kareng ketasan mi. Amen. .

VII. Kutang

1. Nanu ing panlalawe mu kareng taung mikakasala?
2. Makananu dapat ing tratu ta kareng ginawang e ustu kekatamu?
3. Nanu kaya ing maging bunga nung lugud at pamanintindi ing isukli ta kareng mikasala kekatamu?
4. Kaybat ning pamitipun tamung ayni, ninu mo ing pwedi tang puntalan at paksabyan ban ipakit na pagkalungkutan tamu ing agawa tang e ustu kaya?
5. Nanu kaya ing masanting gawan kareng kilala tamu king komunidad, na angga man ngeni makaukyat la pa murin king tanaman?

Download here:

http://www.mediafire.com/file/byb95qdl7m4pppe/10.31.10 pg. 1.doc

http://www.mediafire.com/file/6d11vcc6x6bav3v/10.31.10 pg. 2.doc

Katlungpulung Domingu ning Ordinaryung Panaun

Ing Talimhaga tungkul king Pariseo at king Talapanyingil Buis

I. Pamuklat a Panalangin

Ibpa, tatas mi pu ing kegana-ganang kapuryan at kapasalamatan king banal yung tronu. Pabustan yu pung maging malino ing buri ng ipayabut kekami ning kekayung Anak, I Jesus, at kapamilatan ning Banal a Espiritu agyu ming gawan ing turu na kekami ngening kaorasan. Amen.

II. Pamamasa

Lucas 18:9-14

9Selita nia naman iting talimhaga karing taung tutungge mayap king sarili da at maninsultu naman karing aliwa. 10Ngana, ”Ating aduang lalaking menik king Templo ban manalangin: ing metung Pariseo ya at ing metung naman talapanyingil yang buis. 11Tinalakad ya ing Pariseo at nganang menalangin king sarili na, ’O Dios, pasalamat ku keka king e ra ku kalupa ding aliwang tau; e ku mapanako, e ku mapamirait, e ku makipangalugud o kalupa na ning talapanyingil buis a ini. 12Makatadua paruminggu mag-ayunu ku; ibabie ku keka ing kapulung dake na ning sablang panakitan ku.’ 13Oneng makatalakad yang marayu ing talapanyingil buis; a ya man bisang matna banua, nune durugdugan ne ing salu na at sasabian na: ’O Dios, malunus ka kanaku; metung kung makasalanan!” 14Sasabian ku kekayu,” nganang Jesus, ”Ing lalaking iti ya ing minuling mekilalang banal arap ning Dios at aliwa itang metung. Uling ing ninumang mitatas king sarili na mibaba ya, at ing ninumang magpakumbaba mitas ya.”


III. Turu

Nung nyang milabasan a Dumingu tiru nakatamu ning Ginung Jesus nung makananung mangading alang patna, anggat e na pagkalub ning Ibpa ing keka tamung kayadwanan. Ngeni king kekatamung ebanghelyu, pamangadi mu naman ing buri ng ituru, pamangading kalupa naning metung a talapanyingil buis at aliwa ing pamangadi ning metung a Pariseo. Ing kutang, nanu wari ing pamiyaliwa ning pamangadi ning talapanyingil buwis ampo ning Pariseo?

King talimhaga, ing pamangadi ning Pariseo diretsu mu rin king Apung Ginu pero ing laman ning kayang pangadi yapin ing sarili na. Ala yamang simbitla tungkul king kapuryan at ganaka ning Apung Ginu. Pepasalamat yapin sana, pero ing pinuri na pa murin ing sarili na at ikwa na pang menusgang kalupa ng tau.

Ing pamiyaliwa na naman ning talapanyingil buis, makatalakad yang marayu, e ya man bisang matna banua, nune durugdugan ne ing salu na at sasambitlan ne ing simpling pangading daraun na king Dios: “O Dios, malunus ka kanaku; metung kung makasalanan!”Aminan na ala yang dapat ipagmaragul, uling ing lawe na king


king sarili na marinat (makasalanan), nya naman makarayu ya king altar at ala yang lupang iatna king banwa. Durugdugan ne ing salu na, tanda ning kayang pamanyad tawad kareng kayang agagawang kasalanan. Pepakit na kailangan ne ing Apung Ginu king bie na.

Ating metung a paring kukwentu ne ing matagumpe at masayang pamaglub ning Ginung Jesus king Jerusalem. Sinabi ning pari karing sisimba na mistula yang antimong asnu, na tagapagdala kang Kristo kareng tau. Sinabi na pa ning pari na manibat nyang mig-umpisa ya king parokya at angga na ngening kasalukuyan, makatatak pa murin king kayang pusu’t kaisipan na mistula ya talagang asnu. Digdag na pa na ala yang dapat ipagmaragul at ing sablang kapuryan at kapasalamatan king Apung Ginu mu. Amen.



IV. Pamigunam


King mitmung katahimikan, suryan tala reng sarili tamu. Ninu ing tatas tamu neng mangadi tamu? Durugdugan tala pa ba deng salu neng sisimba, bilang tanda ning makasalanan tamu?

King kaorasan, payabut ning Ginu tang Jesu Kristo ing ulaga ning pamangading ating kababan lub. Neng mangadi tamung ating kababan lub papasyag tamu na ala tang dapat ipagmaragul. At ing kababan lub mangaituliran mung e ta mie nung ala ing lunus at lugud ning Dios keka tamu.

Atin ping metung a kutang tungkul king pamaglub ning Ginung Jesus king Jerusalem. Onumong, ing asnung seken ning Ginu tang Jesus linub king kaisipan na para kaya lareng palaspas, kapuryan at saya dareng tau? Onumong ing asno a isip na nung e kaya e milub I Jesus anting marangal a panayan dang ari ring tau? Onumong sasabyan na ning asno king sarili na “aku ing migdala kang Jesus ba yang milub king Jerusalem?” Nung king kasalukuyan, makanini tamu pamanisip, ala tamung pamiyaliwa king pamangadi na ning Pariseo. Amen.

V. Pamanahimik

VI. Tauling Panalangin

Ginu, patawad pu kareng e gana-gana ming kakulangan, uling maralas maging kalupa miya ing pamangadi ing Pariseo. Sopan yu ke pung mas lalung akilala mi ing sarili mi ban lalu kaming mas maging mababa lub. Iti ngan pu anyaran at pasalamatan mi king lagyu ng Jesus na Ginu mi. Amen.


VII. Kutang

1. Nanu ing asabi tamu king metung a tau na mayap ing lawe na king sarili na pero asna karakal ing matsurang sasabyan na kareng aliwa?
2. Keng palage tamu, pwedi ta bang ipagmaragol ing agagawa tang kayapan o pamagserbisyu kareng kapara tang tau? Nung wa o ali, paliwanag.
3. Nanu ing pwedi tang gawan king pamilya at king keka tamung komunidad bilang tanda ning kababan tamu lub?

Download here:

http://www.mediafire.com/file/4h2u9ggwrr1tssb/10.24.10 pg. 1.doc

http://www.mediafire.com/file/bvhv28b1g9t712c/10.24.10 pg. 2.doc

Kadwang pulu’t siyam a Domingu ning Ordinaryung Panaun

Ing Talimhaga tungkul king Babaing Mebalu at ing Ukum

I. Pamuklat a Panalangin

Banal a Espiritu, dakal pung salamat king parati yung pamanantabe kekami. Paramdam mu pu parati kekami ing lugud at ibye yu parati ing sala ban akit mi ing tune sitwasyun ning sarili mi at ing kekaming komunidad. Dinan yu kepung sikanan ban maging matibe king kasalpantayan at dakal a kapibabatan. Amen.
II. Pamamasa

Lucas 18:1-8

Selita neng Jesus karela ing metung a talimhaga ban ituru na karela king sukat lang parating manalangin at e la kapilan man mimina lub. 2Ngana, ”king metung a siudad, ating metung a ukum a alang takut king Dios at ala yang gagalangan a tau. 3King siudad mu ring ita, ating metung a babaing mebalu a maralas pupunta king ukum at parati nang sasabian, ’Saupan yu ku pu laban king kanakung kalaban!’ 4E ya mebisa ing ukum kilub ning makabang panaun. Oneng king katataulian ngana king sarili na, ’Agyang ala kung takut king Dios at e gagalang kaninu man, 5saupan keng manakit katuliran ing babaing iti ban tuknangan na kung pangabalanan, pota abuysit na ku pa keng pamamunta na keti!’” 6At ngana ning Ginu, ”Dimdam yu ing sinabi na ning marawak a ukum. 7Ngeni, ipagkaimut na kaya ning Dios ing katuliran karetang sariling pinili na a mamaus pasaup keya aldo’t bengi? E na la kaya agad saupan? 8Sasabian ku kekayu, agad-agad na lang dinan katuliran. Oneng paniatang na ning Anak ning Tau, manakit ya kayang taung sasalpantaya keya keti king yatu?”

III. Turu

Dakal a pamagaral king tau, na ing maralas maging sangkan ning e pamikaintindi yapin ing kulang ing pamisabi o pamitalamitam. Kalupa dareng mikaluguran, nung ala ng pamiakit at pamisabi ning metung at metung, maralas ing milalako na ing matibe rang pamikaluguran. Kareng miyasawa, akakit tamung maging mabunga ing pamiyabe da neng pisasabyan da parati nung nanu ing malilyari king pamibie-bie da. Ing karelang pamisabi alang patna, at balu ning metung at metung nung nanu ing malilyari karelang adwa.

Sasabyan da pa reng ekspertu king pamagaral king tau, na kailangan ing misabi la ring miyasawa dyang metung mu mang oras king patingapun ban maging matatag ing karelang pamiyabe. Nya nung milako na ing pamisabi, kanita na mag-umpisa ing e da pamikaintindi at maralas mumuli king pamikawani.

King ebanghelyu ngeni, Ing Ginung Jesus sinabi ne ing metung a talimhaga ban ituru na ing pamagtiwala at kapibabatan king pamanalangin. E na payabut kekatamu na ing Dios kalupa ne ing ukum, marayu ita. Ing buri ng ituru yapin ing maging kalupa taya ing balung babai, na e ya sinuku anggat e ya mipakibatan king
kayang anyaran. Menyawad at mirinan ya, menintun at menakit ya at kinatuk
ya at mibuklatanan ya (Mt 7:7-8).

Maralas, nya ala tamung kapibabatan king pamanalangin uling isipan tamu na e na naman pagkalub ing anyaran tamu. Ing e ta balu, nya e na pagkalub iti, uling maralas ing anyaran tamu itang buri tamu mu at aliwa ing kailangan tamu. Neng kayi naman, pauli ning kulang ta talaga king kapanenayan king kapakibatan, agad tang susuku at potang buklat nane ning Ginu ing pasbul ala tana. Kalupa ng Daniel king Matuang Tipan na alang patnang mig ayunu at menalangin kilub ning makabang panaun at ing Anghel Gabriel yang mismung midala king kapakibatan ning Apung Ginu (Dan. 10:12). I Moises nyang mekilaban la kareng Amalekita, potang manikal yang mitatas kareng gamat na, masasambut la (Ex 17:17-18). I San Pablo sinulat ya kareng tau Collosas ngana, “Manatili kayung manalangin at e kayu mamatukba neng manalangin kayu at pasalamat kayu king Dios (Col. 4:2). Amen.


IV. Pamigunam

Kaluguran a kapatad aminan tamu na maralas ing ala tamung kapibabatan king pamanalangin. Agad tang susuku pauli ning marakal tapa oras king miyayaliwang bage. Akakalingwan ta parati na ing Ginu yang bibie keng kegana-ganang bage. Akakalingwan tamu na ing metung kareng peka importanti king yatu at king banwa yapin ing pamanalangin. Na king pamanalangin apakikwanan tayang pikikit ing banwa ampo ing yatu. Akakalingwan tamu na iti ya ing pitatakutan ng Satanas. Akakalingwan taya neng kayi ing sinabi na mismu ning Ginu tang Jesu Kristo, “Ibye ya ing para king Dios ing mangaintulid king Dios (Mt 22:21). E tamu pu sana agad susuku, nune maging matiya ta sanang makisabi king Ginu, anggang ipadala no kareng kayang anghel deng kekatamung kayadwanan. E taya pu sana gagawan bala mu basan ing Ginu, na potang atin dinat na ila pin ding agagawa tang e ustu karin taya mu dadamputan king suluk ban panguskus.

Ngening kasalukuyan, metung pang bage na nya e ta mikakaoras king pamanalangin yapin ing panga sobra ta ilig king pamag text keng cellphone. Nanu mu ti text o iyaus tamu. Gagastus tang maragul kaniti uling buri talang akasabi deng keka tamung kakilala. Akakalingwan tamu na e na kailangan ing load potang buri tayang paksabyan, 24 hrs yang makasadyang makiramdam at makibat kekatamu. Amen.

V. Pamanahimik

VI. Tauling Panalangin

Ginung Jesus, sinabi yu pung e kami dapat sumawa king pamanalangin. Patawad pu uling maralas ala ke pung kapibabatan king pamakisabi keka. Dinan yu ke pung matibe kasalpantayan ban mika pamag tiyaga kaming mamaus keka. Amen.

.
VII. Kutang

1. Nanu la reng maging sangkan ot ala tang kapibabatan king pamanalangin?
2. Atin nakang karanasan, na pauli ning kapibabatan mu king pamanalangin mipagkalub ing anyaran mo?
3. Nanu ing pwedi tang gawan ban apayabut tamu kareng kekatamung kapatad ing ulaga ning ating tiwala at kapibabatan king pamanalangin?

Kadwangpulu’t walung Domingo ning Ordinaryung Panaun

Pepakayap na lang Jesus ding Apulung Leprosuan

I. Pamuklat a Panalangin

Ibpa, pupuryan at pasalamatan da kayu pu king balang pinandit ning bie mi. Salamat pu king lakas ning pamikakatawan mi at kareng grasyang pagkalub mu parati king aldo-aldo pamibie-bie mi. Dakal a dakal mu rin pung salamat king dignidad a pigkalub mu kekami. Amen.

II. Pamamasa

Lucas 17:11-19

11King pamaglakad nang Jesus papunta Jerusalem, dinalan ya king angganan na ning Samaria at ning Galilea. 12Inyang lulub ya king metung a baryu, selubungan de ring apulung leprosuan, tinuknang lang makarayung bagya 13at kinulait la. Ngara, “Jesus! Maestro! Malunus ka kekami!” 14Ngana karela inyang ikit na lang Jesus, “lumakad kayu at pakit karing pari.” Kabang dalan, kinayap la. 15Inyang apansingan na ning metung karela king kinayap ya; migbalik yang kukulisak kapurian king Dios. 16Migsakab ya arap nang Jesus at pepasalamat ya keya. Samaritano ya ing taung iti. 17“E la wari apulu ding kinayap?” nganang kinutang Jesus. “Nu la karin ding siam? 18Ala waring migbalik at minie kapurian king Dios subali mu kaniting dayuan?” 19At nganang Jesus king Samaritano, ”Talakad ka at mako na ka; kinayap ka uli na ning kasalpantayanan mu.”


III. Turu

Para kareng Samaritano ampo pang Judio, ing ketung e yamu kabud sakit na kalupa dareng aliwang sakit. Kanitang panaun ayta, ing sakit ayni tuturing deng metung a tanda ning kaparusan ning Apung Ginu kareng agawa dang kasalanan. At ing bunga na nini yapin pangalako na dignidad ning metung a tau antimong anak ning Dios at ya naman ing sangkan nung bakit makakawani la reng taung areni kareng tau. Para kareng Judio, ampo na itamung mamasang Bibliya, ing ketung iyang maging simbulu ning pangakayap tamu king ispiritwal tang sakit. King pangakayap dareng apulung leprosuan, pepakit ning Ginung Jesus ing pamanyalese at pamamalik na ning kekatamung dignidad antimong anak ning Dios.

I San Pablo sasabyan na ing “kaligtasan atyu kang Kristo…Nung atyu ta Kaya mie tamu… Nung atyu ta Kaya managumpe tamu… Manatili yang tapat, agya mang itamu e tamu maging tapat, uling e na atanggian ing sarili na’ (2Tm 2:10-13). Iti ya ing buri ng ipayabut ning Ginu tang Jesu Kristo, king pamipakayap na kareng apulung leprosuan. Na, nanu man ing sitwasyun o katatalakaran tamu king bie, mayap o pekamarok tamu man, ing Ginu e na gawan ing e maging tapat king lugud at obra na. Parati yang makasadyang manyalese, pakayap at magligtas. Agya pang balu na katamu at nung nanu ta klasi pangatau, parati yang makasadyang magligtas.
Ing Samaritanung leprosuan mehulu ya, migbalik ya king Ginung Jesus, binye na ing kapasalamatan, binye na ing kapuryan king Apung Ginu. Pepakit na ing kayang tapat a dapat at midinan yang kaligtasan. Binalik na ing tinggap ng regalu, kapamilatan ning kayang sarili. E na sinabing Jesus ing, “Linigtas da ka” nune sinabi na, “Linigtas naka ning kekang kasalpantayanan.” Ing leprosuan akilala na ing lugud at pakamal ning Dios pauli ning matibe ng kasalpantayan. Nya naman tinggap na ing kaligtasan at ing tune saya na manibat mu kang Kristo Jesus. At deng siyam a leprosuan, na kinayap mu naman, tinggap da naman ing grasya ning Apung Ginu pero meging makasarili la at akalingwan dane ing Dios a mibalik king karelang dignidad bilang tau. Tinggap da ing kapasnawan ning sakit ning pisikal a katawan at aliwa ing kapasnawan ning pilubluban. Amen.


IV. Pamigunam

King bie ning Ginu tang Jesu Kristo, e milalako ing pamamie ng kapuryan king Kayang Ibpang atyu banua. King pamamie ng kapuryan Jesus king kayang Ibpa mangabaldugan ing pamamie ng pamipasalamat Kaya. ”Ibpa, Ginu na ning Banua at yatu! Pasalamatan da ka uling e mula pepabalu reng bage-bageng areni kareng mangabyasa nune pemulat mula kareng mangalating areni” (Lk 10:21).

Ketang panaun ayta, ing sakit a ketung yang maging sangkan ning pamikawani ning metung a tau kareng kayang kalupang tau. Niyang pekayap nong Jesus deng Apulung leprosuan, e lamu melinis balat nune midininan la naman pasibayung aktibung bie king karelang komunidad. E nala patapun a pamibie-bie. Midinan pasibayung kule ing karelang pamibie-bie. Agyu tayang pakyapusan ing Ginung Jesus? Dakal kareng tau ing e katanggap-tanggap pauli ning sitwasyun da ngeni king bie. Siguru atin lang sakit, deng aliwa ibat la siguru king sukulan, o kaya atin lang matsurang panugali. Makasiguradu tamu ngeni na e na kaburyan Jesus ing e tala tanggapan deng taung makanini kabilyan. Ala king dapat ning Ginu ing palayasan at amakan tala reng makanining tau. Patsa makanini tamu pamidapat-dapat, kalupa tala retang siyam a meyulung leprosuan na e mekakilala king lugud at pakamal ning Apung Ginu. Amen.


VI. Tauling Panalangin
Ginu ming Dios, salamat pu keng e gana-ganang grasya. Parati yu ke pu sanang banten ban e mangalingwan pasalamat king e gana-ganang bage pagkalub mu kekami. Ing pamipasalamat at kapuryan king lagyu ning kekang Anak, I Jesus. Amen

(Ikanta)

Salamat Ginu Salamat

KORO:
Salamat, Ginu, salamat
Salamat king lugud mu at lingap
Salamat king pakamal mu’t pamaningat
Salamat pu, salamat pu.

1. Para king bie pigkalub mu kekami
Pamangan mi aldo-aldo babie mu ngan
Tuknangan mi, imalan mi, nanu man ing kailangan mi?
Salamat pu, Ginu, Salamat pu.

2. Karing banal mung amanu, salamat pu
Ikang sulu mi, Ikang kaligtasan mi
King kasakitan, kamatayan, ika ing kapanayan
Salamat pu, Ginu, Salamat pu.

VII. Kutang
1. Nanu mo ing penandaman mu nyang ing metung a tau dininan meng oras ban sopan at nyang kayi e nakaman pinansin at pesalamatan?
2. Nanu mo ing asabi mu keng taung alang kapasalamatan?
3. Nanu mo ing masanting tang gawan ban deng taung alang pasalamat king bie midinan la kaniti?

Download here:

http://www.mediafire.com/file/jtc7v12b27y9brt/10.11.10 pg. 1.doc

http://www.mediafire.com/file/az8b20jwnai6q5h/10.11.10 pg. 2.doc

Kadwang pulu’t pitung Domingu ning Ordinaryung Panaun

Ing Kasalpantayanan king Dios

I. Pamuklat a Panalangin

Ibpa king kaorasan kaylangan miya pu ing Banal yung Espiritu. Balu mi pu nung e nakami antabayanan ning kabyasnan at kaburyan mi pu yang miral. Dinan na kami sanang sala ban miyang aytindyan ing buri ng ipayabut ning kekayung Anak, I Jesus. Amen.

II. Pamamasa

Lucas 17:5-10

5Ngara ding apostol king Ginu, “Dagdagan mu ing kekaming kasalpantayanan!” 6Pekibat na ning Ginu, ”Nung atin kayung kasalpantayanan a kasing dagul na mu man ning butul mustasa, asabi yu kaniting tanaman a sikamoro, ’Mabagut ka at iyalis mu ing kekang sarili king dagat!’ at mamintu ya kekayu. 7“O nu mong ing metung kekayu atin yang ipus a sasarul o magpastul tupa, nung muli neng ibat king marangle, sabian yu wari keya, ‘Mekeni at mangan na ka? 8Agyang makananu e yu sabian ita; ing sabian yu, ‘Isadia mu kung apunan; kaybat miblas ka at silbian mu ku kabang mamangan ku. Kaybat na nita, saka na ka mangan.’ 9Pasalamatan ya wari ing ipus uling tiparan na ing inutus mu keya? 10Makanyan munaman kekayu; nung arapat yu na ing sablang inutus da kekayu, sabian yu, ‘Mistula kami mung ipus tinupad kami mu king kekaming katungkulan.’”


III. Turu

Malapit na naman ing eleksyung pambarangay. Panaun na naman ning pamamili nung ninu reng karapat-dapat manungkulan kareng kekatamung barangay. Metung yang importanting bage ini, uling deng milukluk kareng pusisyun areni ila ring misip at gumusal nung makananu do iangat ding kabilyan dareng peka mababang estadu ning kekatamung lipunan at ini pin deng tau king baryu o barangay. E ya simpling bage ing eleksyun a pambarangay uling alus atyu la keni reng mangaragul a problema, kalupa na wari ning dakal a bisyu at alus ala lang obra at kulang la pa pegaralan deng tau.

Nya king ebanghelyu ngeni, pakikwanan tayang abalu at panamdaman nung makananu ing tune pamagserbisyu karing tau na ating matibe kasalpantayanan king Apung Ginu.

Deng apostoles manyawad la king Ginu tang Jesus na dagdagan ing karelang kasalpantayanan. Anyaran da iti pauli ning sinabi na karela nung nukarin manibat ing kasalanan. Nganang Jesus karela, E la kapilan man mawala ding panibatan na ning pamikasala, oneng makapangilabut ing kararasan na ning taung panibatan na niti! Mayap pa ing isabit ya king batal na ing metung a maragul a gilingan a batu at iyatsa ya king dagat kesa king maging sangkan ne ning pamikasala na ning metung karing mangalating deti. Inya mingat kayu! Digdag na pa ning Ginu na, “Nung mikasala ya ing kapatad mu, sabianan me; patawaran me nung sumisi ya. Nung makatapitung besis yang mikasala keka kilub ning patingapun, at makapitung besis yang linapit keka at sinabing, ‘Sisisi ku, sukat meng patawaran” (Lk.17:1-4).

Oyni ing maragul a sangkan ot bakit manyawad lang karagdagan a kasalpantayanan deng apostoles. Mengabigla la king sinabi Na, abalu da ing e pala biru-biru at e pala mayan ing maging talatuki ning Ginu tang Jesu Kristo. Nya pekibatan na la
ning Ginu kareng adwang kutang o istorya. Ing mumuna yapin ing butul a mustasa na nung nukarin ya ing pekamalating diling butul ning metung a tanaman. Ginamit neng alimbawa ning Ginu ining pekamalating butul ban ipakit ing mag-umpisa ngan ing anggang mangaragul a bage king malati o simpling bage. Ala king bokabularyu ning Ginu tang Jesus ing singkadagul at singkadakal. Mas importanti Kaya ing kalidad na kalupa na ning malating butul mustasa.

Antimong talasalpantayang Kristiyanu, tuturu na ing gawan tamu itang mangalati, simple at posibling bage at ing Ginu yanang bala at gawa karetang mangaragul at imposibling bage.

Ing kadwang kutang o istorya yapin ing katungkulan na ning metung a ipus. Digdag ne ning Ginu ini, ban ipabalu kareng apostoles na potang bisa kang tuki king kaburyan ning Ginu, ituring tanang ipus ing sarili tamu. Ing ipus kaybat ng ayari ing metung ng obra, e na asabi ing meyari ne kanita. Siguradu mung kayari ning metung atin na namang kasunud a obra. Ing ipus kayari na king obra na, e na puryan o ipagmaragul ing agawa na king panginwan na. Dapat parating makakabit king pusu’t kaisipan na ing patsa atin yang agawang mayap a obra, siguradung atin na namang kasunud a utus. Ing ipus o ing metung a Kristiyanu e dapat mimisip o manenaya yang ablas king sabla ng daraptan. Ing bisang maging tune talatuki ng Kristo kaylangan ing maging mababa ya lub a ipus. Amen.


IV. Pamigunam

King ebanghelyu ng San Mateo ing butul a mustasa yang pekamalating diling butul a tanaman (Mt. 13:32). Ngeni sasabyan na kekatamu ning Ginu tang Jesu Kristo nung maging kasindagul mu man ning butul mustasa ing kekatamung kasalpantayanan siguradu mu ing makagawa tamung makapagmulalang bage. Basta gawan tamu itang posibli at ing Ginu yanang bala karetang imposibling bage.

Ing kutang, atin tamu kaya gang ditak mu mang kasalpantayanan? Buri tayang baywan ing kekatamung lipunan. Buri tayang gawan a lipunang atin pamikakalugud at pamisasanmetung king lagyu ning Apung Ginu. E biru-biru at e mayan ing kapagnasan a ayni. E ta agyu at agawa ini nung ala tang kasalpantayan king amanu ning Ginu tang Jesus. Dapat mabyasa tang kalingwan ing sarili tamu antimong metung a ipus, na makasadya parating utusan adyang nanung oras. Nung magobra tamu at ing sarili tang kapakanan ing isipan at aliwa ing kaburyan ning Apung Ginu, magobra tamu mu king sarili tang marangle. At nung potang matwa at ala tanang lakas karin tapa a isip ing sumuyu Kaya, the best pa kaya ing ayampang ta Kaya o itanang latak-latak? Amen.

V. Pamanahimik

VI. Tauling Panalangin

Ginu, dakal pung dakal a salamat king pamanantabe yu kekami. Dakal mu rin pung salamat kareng pabalu yung kaburyan yu. Dinan yu kepung parating lakas lub ban agampanan mi ing yuyutus kekami. Sopan yu kepu parating mikakalugud at misasanmetung. Parati yu kaming sopan ban ing imposible agawa mi pu. Amen.

VII. Kutang

1. Nanu ing minunang linub king isip mu nyang damdaman me ing amanung “Mistula kami mung ipus, tinupad kami mu king kekaming katungkulan?”
2. Atin na kabang meging karanasan na gewa me ing malating bage kaybat meging yang maragul a bage ite?
3. Nanu lamo reng pwedi tang gawan king kekatamung komunidad, adya mu man mangalating bage ban makasaup king pangatatag ning kaburyan ning Apung Ginu? Kapilan tala gawan deti?

Download here:
Page 1: http://www.mediafire.com/file/r55dw6gc9jlcrwm/10.03.10 pg. 1.doc
Page 2: http://www.mediafire.com/file/9a854t42f9pya9c/10.03.10 pg. 2.doc