Kadwang pulu’t siyam a Domingu ning Ordinaryung Panaun

Ing Talimhaga tungkul king Babaing Mebalu at ing Ukum

I. Pamuklat a Panalangin

Banal a Espiritu, dakal pung salamat king parati yung pamanantabe kekami. Paramdam mu pu parati kekami ing lugud at ibye yu parati ing sala ban akit mi ing tune sitwasyun ning sarili mi at ing kekaming komunidad. Dinan yu kepung sikanan ban maging matibe king kasalpantayan at dakal a kapibabatan. Amen.
II. Pamamasa

Lucas 18:1-8

Selita neng Jesus karela ing metung a talimhaga ban ituru na karela king sukat lang parating manalangin at e la kapilan man mimina lub. 2Ngana, ”king metung a siudad, ating metung a ukum a alang takut king Dios at ala yang gagalangan a tau. 3King siudad mu ring ita, ating metung a babaing mebalu a maralas pupunta king ukum at parati nang sasabian, ’Saupan yu ku pu laban king kanakung kalaban!’ 4E ya mebisa ing ukum kilub ning makabang panaun. Oneng king katataulian ngana king sarili na, ’Agyang ala kung takut king Dios at e gagalang kaninu man, 5saupan keng manakit katuliran ing babaing iti ban tuknangan na kung pangabalanan, pota abuysit na ku pa keng pamamunta na keti!’” 6At ngana ning Ginu, ”Dimdam yu ing sinabi na ning marawak a ukum. 7Ngeni, ipagkaimut na kaya ning Dios ing katuliran karetang sariling pinili na a mamaus pasaup keya aldo’t bengi? E na la kaya agad saupan? 8Sasabian ku kekayu, agad-agad na lang dinan katuliran. Oneng paniatang na ning Anak ning Tau, manakit ya kayang taung sasalpantaya keya keti king yatu?”

III. Turu

Dakal a pamagaral king tau, na ing maralas maging sangkan ning e pamikaintindi yapin ing kulang ing pamisabi o pamitalamitam. Kalupa dareng mikaluguran, nung ala ng pamiakit at pamisabi ning metung at metung, maralas ing milalako na ing matibe rang pamikaluguran. Kareng miyasawa, akakit tamung maging mabunga ing pamiyabe da neng pisasabyan da parati nung nanu ing malilyari king pamibie-bie da. Ing karelang pamisabi alang patna, at balu ning metung at metung nung nanu ing malilyari karelang adwa.

Sasabyan da pa reng ekspertu king pamagaral king tau, na kailangan ing misabi la ring miyasawa dyang metung mu mang oras king patingapun ban maging matatag ing karelang pamiyabe. Nya nung milako na ing pamisabi, kanita na mag-umpisa ing e da pamikaintindi at maralas mumuli king pamikawani.

King ebanghelyu ngeni, Ing Ginung Jesus sinabi ne ing metung a talimhaga ban ituru na ing pamagtiwala at kapibabatan king pamanalangin. E na payabut kekatamu na ing Dios kalupa ne ing ukum, marayu ita. Ing buri ng ituru yapin ing maging kalupa taya ing balung babai, na e ya sinuku anggat e ya mipakibatan king
kayang anyaran. Menyawad at mirinan ya, menintun at menakit ya at kinatuk
ya at mibuklatanan ya (Mt 7:7-8).

Maralas, nya ala tamung kapibabatan king pamanalangin uling isipan tamu na e na naman pagkalub ing anyaran tamu. Ing e ta balu, nya e na pagkalub iti, uling maralas ing anyaran tamu itang buri tamu mu at aliwa ing kailangan tamu. Neng kayi naman, pauli ning kulang ta talaga king kapanenayan king kapakibatan, agad tang susuku at potang buklat nane ning Ginu ing pasbul ala tana. Kalupa ng Daniel king Matuang Tipan na alang patnang mig ayunu at menalangin kilub ning makabang panaun at ing Anghel Gabriel yang mismung midala king kapakibatan ning Apung Ginu (Dan. 10:12). I Moises nyang mekilaban la kareng Amalekita, potang manikal yang mitatas kareng gamat na, masasambut la (Ex 17:17-18). I San Pablo sinulat ya kareng tau Collosas ngana, “Manatili kayung manalangin at e kayu mamatukba neng manalangin kayu at pasalamat kayu king Dios (Col. 4:2). Amen.


IV. Pamigunam

Kaluguran a kapatad aminan tamu na maralas ing ala tamung kapibabatan king pamanalangin. Agad tang susuku pauli ning marakal tapa oras king miyayaliwang bage. Akakalingwan ta parati na ing Ginu yang bibie keng kegana-ganang bage. Akakalingwan tamu na ing metung kareng peka importanti king yatu at king banwa yapin ing pamanalangin. Na king pamanalangin apakikwanan tayang pikikit ing banwa ampo ing yatu. Akakalingwan tamu na iti ya ing pitatakutan ng Satanas. Akakalingwan taya neng kayi ing sinabi na mismu ning Ginu tang Jesu Kristo, “Ibye ya ing para king Dios ing mangaintulid king Dios (Mt 22:21). E tamu pu sana agad susuku, nune maging matiya ta sanang makisabi king Ginu, anggang ipadala no kareng kayang anghel deng kekatamung kayadwanan. E taya pu sana gagawan bala mu basan ing Ginu, na potang atin dinat na ila pin ding agagawa tang e ustu karin taya mu dadamputan king suluk ban panguskus.

Ngening kasalukuyan, metung pang bage na nya e ta mikakaoras king pamanalangin yapin ing panga sobra ta ilig king pamag text keng cellphone. Nanu mu ti text o iyaus tamu. Gagastus tang maragul kaniti uling buri talang akasabi deng keka tamung kakilala. Akakalingwan tamu na e na kailangan ing load potang buri tayang paksabyan, 24 hrs yang makasadyang makiramdam at makibat kekatamu. Amen.

V. Pamanahimik

VI. Tauling Panalangin

Ginung Jesus, sinabi yu pung e kami dapat sumawa king pamanalangin. Patawad pu uling maralas ala ke pung kapibabatan king pamakisabi keka. Dinan yu ke pung matibe kasalpantayan ban mika pamag tiyaga kaming mamaus keka. Amen.

.
VII. Kutang

1. Nanu la reng maging sangkan ot ala tang kapibabatan king pamanalangin?
2. Atin nakang karanasan, na pauli ning kapibabatan mu king pamanalangin mipagkalub ing anyaran mo?
3. Nanu ing pwedi tang gawan ban apayabut tamu kareng kekatamung kapatad ing ulaga ning ating tiwala at kapibabatan king pamanalangin?