Kapiestan ning Sagrado Pamilya

Ing a Jesus Kilub ning Templo

I.    Pamuklat a Panalangin

Ibpa, ing papuri at kapasalamatan na minsan pa pu pitipun yu kami king lagyu ning kekayung Anak, I Jesus. Pabustan yu pung, maging malino ya kekami ing pamanintun kang Jesus kalupa da ring Indung Maria at San Jose. Dinan yu kepung malino pamanatindi king buri yung malyari king kekaming kasalpantayanan. Sopan na ke pu sana ning kekayung Banal a Espiritu, ngeni at king kapilan paman. Amen.
II. Pamamasa

Luke 2: 41-52

Balang banua pupunta la Jerusalem ding pengari nang Jesus ban tumagun king Piesta ning Pamaglagpus. Inyang labi neng aduang banua tua I Jesus, mekipamiesta la antimo ing sadia rang daraptan. Kaybat na ning Piesta minuli la, oneng pepailakuan ya Jerusalem ing anak a I Jesus. E ra apansingan iti ding pengari na; inisip da king kayabe da ne king grupu ra. Pepatingapun na lang maglakad inyang apansingan da king e re kayabe. Penintun de karing kamaganak da at kakaluguran, oneng e re ikit. Inya migbalik la Jerusalem ban panintunan de. King katlung aldo, ikit de kilub ning Templo; makalukluk yang kayabe da ring Judio at talaturu, makiramdam ya at mangutang karela. Mengapamulala la ding sablang mekaramdam kang Jesus king kabiasnan na at pakibat. Mipamulala la ding pengari na inyang ikit de at nganang ima na, “Anak, obat depatan mu iti?” I tatang mu  at aku migaganaka kami king pamanintun keka.” Pekibat na karela, “Baket penintun yu ku? E yu wari balu king kailangan kung atyu king bale nang Ibpa ko? Oneng e ra aintindian ing buri nang sabian. Kayabe reng migbalik Nazaret I Jesus. Meging mapamintu ya karela. Sinikap na ngang Maria iting bage king pusu na. At dinagul ya I Jesus king masanting a pamikakatawan ampon king kabiasnan at katanggap-tanggap ya king Dios at karing tau.


III. Turu

Ing mayap pung balita ngeni iya ing panlima at tauling misteryu ning Rosaryu ning Tula , “Ing pangayakit ng Jesus king Templo.” Tula yang masasambitla, pero nung pitutuliran metung yang istorya ning kapigaganakan o ning kapikakunwan dareng miyasawa, Indung Maria at San Jose. Labi yang adwang banua I Jesus anyang malyari iti, misan king pabanua na dapat deng kegana-ganang Israelita munta la king Templo para pagmasusyan ing Piyesta ning Pamaglagpus. Ing Piyesta ning Pamaglagpus yapin ing kapigaganakan king panga lako da king panga alipan kareng Ehipsyo, king saup ning Apung Ginu. 

Anyang apansinan dareng miyasawa na alayu ing karelang Anak, I Jesus king pamaglakbe dang pauli iba’t Jerusalem, melingasngas la at memublema. Memaligwa lang migbalik king karelang delanan, pangutang de kareng karelang
kamag-anak at kakaluguran, atlung aldo ing karelang pamanintun. Anyang e dane talaga akit, ing tauli dang solusyun ing munta king Templo ban pasaup la king Apung Ginu. At menga pamulala la king ikit da, ing karelang Anak atyu ya king korti ning Templo at makalukluk yang kayabe dareng talaturu ning Batas. Pangutnan de at pekibatan na ngan ing sablang kutang dareng talaturu ning Batas. Mengapamulala at mengabilib la kaya. King pamitagun a ita, pepakit na ning Anak, I Jesus ing upaya na, na e ya ordinaryung tau bista man musmus ya pamu.

“Baket penintun yu ku?  E yu wari balu king kailangan kung atyu king bale nang Ibpa ko? Iti metung yang pamipalino at pamagbulalag na i Jesus tutu yang Anak ning Dios, na anyang minuna sewalat nana niting Anghel Gabriel, ing anghel na kayabe ng maglakad ning Apung Ginu (Lukas 1:35). Amen


IV. Pamigunam

Potang ing ebanghelyung ayni ya ing pisasabyan, e milako king isip ku ing sitwasyun dareng miyasawa i Maria at Jose. Lalu na ing Indung Maria, na bukud mung anak na, mawala ya pa king siping na. Ing metung a Indu, e talaga mipaydatun nung reng kayang anak alalu pa lalu na neng bengi. Atlung aldong kapigaganakan at kapikunwan king pangabating o pangawala ning karelang Anak, E mu basta Anak, nune ing talapagligtas ning Israel at ning meto yatu (Messiah). Mawala ya ing Anak ning Dios, at posibleng e na malaus ing planu king pamagligtas ning Dios king tau. Matutuliru la nung akit de pa kaya, kaybat ning metung a aldo pamanintun, neng bengi siguradu mung e la mipapatudtud. Atlu dang aldo panandaman iti.

Atin mu naman insidenting mewala yang atlung aldo  I Jesus, anyang mete ya at mikutkut ya. Likwan ne ing kayang ima at deng kayang disipulu king sitwasyun a alang kapaga-pagasa. Makananu la kaya reng atlung bengi na alayu king siping da ing karelang maestro?

Ing pangayakit ning Ginu tang Jesu Kristo king Templo, metung yang masalang patutu na ning kayang resureksyon at kaybat ning kegana-ganang kasakitan king yatung iti akit tayang makalukluk king trono I Jesus king Templo ning Kakataskatasan a Diyos. Amen.

V.Pamanahimik

VI Tauling Panalangin

Ginung malugod at mayupaya, dakal pung dakal a salamat kareng kabyasnan a pebalu yu pu ngening kaorasan. Dinan yu ke pung parating matibe kapagnasan at kasalpantayanan na  panintunan ing kekang kaburyan. Parati ye pung padala ing kekayung Banal a Espiritu ban kanita pu king pamanintun mi king kakang Anak, I Jesus, asumpungan miya parati. Amen.

VII. Kutang

1. King kaorasan atin kabang araranasan kapagsubukan king pamanintun at pamanyapat king kaburyan ning Dios?

2.  Ikwentu, maralas king bie, disgrasya yang akakit king mumuna ngeni pala grasya yang menibat king Dios.

3.   Makananu tayang panintunan I Jesus, king bie tamu?

Ika-apat a Dominggu ning Adbiyento

Delawan neng Maria i Elizabeth

I.    Pamuklat a Panalangin

Ibpa, salamat pu king Indung Maria king pamagdalo na king kayang pinsan I Elisabet. Tiru na kekami ing kapagmalasakitan at ing ispiritu ning tula ning pamiabe-abe. Pabustan yu pung apakyapusan miyang dadake na ing kayang tula karing  aliwang tau. Kalupa na ning Indung Maria, mikasikanan kami pu sanang  dalan miya I Jesus karing aliwang tau,  Amen.

II. Pamamasa
Luke 1:39-45
39 E melambat, ginayak ya I Maria at mamalagua yang minta king metung  a balen king kabundukan na ning Judea. 40 Minta ya king bale nang Zacarias at dininan  neng mayap a oras I Elizabeth. 41 Inyang dimdam nang Elizabeth ing pamagmananu g nang Maria, ginalo h ya ing anak king atian na. At i Elizabeth, kitmuan king Banal a Espiritu, 42 migsalita yang masikan. Ngana, “Mapaladi  ka karing sablang babai! At mapalad ya ing anak a mibait keka! 43 Makananu kung pengaintuliran ing dalawan na ku ning ima na ning kanakung Ginu? 44 Uling kabud dimdam ku ing kekang pamagmananu ginalo ya ing anak king atian ku king tula. 45 Mapalad ka uling paniwalan mu king ing balita na keka ning Ginu mipaltutu!”

III. Turu
King Misteryu ning Tula, ning Banal a Santo Rosaryo akit tayang kayabe ya ing Pamagbisita na ning Indung Maria kang Santa Isabel. Tutu yang maragul a misteryu at malam keka tamung kristiyanu ing pamitagpu dareng adwang pengaring babaing areni (Maria at Elisabet). E mapalyari ining malam at magrasyang pamitagpung iti, nung e tinangu ing Indung Maria king planu na ning Ibpang atyu banua. Ing tangu na ning simpling babaing ayni (Maria) ya ing umpisa na ning pamagbalik king orihinal ng lugar ning tau at iti yapin ing mabibie tamung kayabe taya ing miglalang keka tamu (Emmanuel). Balu ta naman na king kamumulan, ding mumuna tang pengari I Adan at Eba, kayabe de ing Dios king paraiso. Mabiebie lang mitmung kapayapan at bibie na ngan ning Dios ing anggang kailangan da.

King pamanangu ning  Indung Maria king planu ning Ibpa, meging  kalupa na la ring Patriarka (Tatang o Ninuno) da ring Israelita, I Abraham, Isaac at Jacob. Uling ila man tingwanan de at migtiwala la king Dios. Pebustan dang ing Dios ya ing miral king bie da, nya naman tikman de ding Israelita ing pengakung gabun para karela. At ing .Indung Maria, king  kapamilatan na ning kayang pamanangu at pamagtiwala king Ibpa, beit ne I Jesus, ing Emmanuel, ing mamye kapayapan at kaligtasan keka tamung  tau.

King pamanangu ning Indung Maria king planu ning Ibpa, meging kalupa na la reng propeta. Ding propetang pabalu  da parati ing kaburyan ning Dios. At kalupa da rening propeta, ing Indung Maria king ebanghelyu ngeni, marapal yang minta king bale da reng pinsan nang Zacarias at Elisabet ban ipabalu at ikwentu karela ing grasyang binie ning Ibpa kaya. Dinalo ya karing pinsan na, ban ng sabyan karela  ing planu ng kaligtasan ning Dios king tau. Dinalo ya karin ing Indung Maria ban nang gampanan ing misyun na.  Ing misyung e mu ipamalita ing planu na ning Ibpa, nune idake at ipakit yay Jesus kareng sablang tau, ing keka tamung Dios at tagapagligtas. Inyang dimdam nang Elisabet ing pamagmananu nang Maria, ginalo ya ing anak king atyan na. At y Elisabet, kitmuan king Banal a Espiritu, migsalita yang masikan, ngana, “Mapalad ka karing sablang babayi! At

mapalad ya naman ing Anak a mibayit keka! Makananu kung pengaituliran ing dalawan na ku ning Ima ning kanakung Ginu? Uling kabud dimdam ku ing kekang pamagmananu ginalo ya ing anak king atyan ku king tula. Mapalad ka uling paniwalan mu king ing balita na keka ning Ginu mipaltutu!”

King pamanangu ning Indung Maria, kalupa da ring Patriarka, at ding propeta. Pakyapusan taya ba ing Indung Maria king pamagtiwala king kaburyan ning Ibpa?Gagawan ta kaya ing tingwanan tamu  king Dios bilang kristiyano? Pamalita o dadake taya kaya ing Ginung Jesus  kareng aliwa, ing kayang lugud at pamagligtas keka tamo? O, magbulag-bulagan at magmaklak-maklakan ta king keka tamung bie kasalpantayanan? Amen.

IV. Pamigunam
King ebanghelyu, ikit tang masala ing maragul ng ulaga ning pamimisita kareng keka tamung kaluguran king bie. Pupuntalan tala reng kamag-anak tamu uli na ning buri talang kumustan. Neng kayi naman buri tang ipabalu karela nung nanu na ing mangapalyari king bie tamu. Ngeni sanang kapaskuan, pakikwanan talang apuntalan deng malwat tanang e bibisitan, Deng apu tamung e dana rugu agyung bumisita keka tamu, nya dapat mung pasyalan tala. Ding keka tamung pengari, bapa, dara, pinsan at pangunakan puntalan tala, ikwentu ta karela ing bie tamu, kawlan talang mitmung igpit, uling ya ing tune ng diwa ning Pasku. Kalupa na ning indung Maria, pekikwanan ng bumisita king kayang pinsan ban idake ing mayap a gewa ning Dios kaya. Buri na ning Indung Maria na idake ne ing kayang Anak I Jesus kareng aliwa, buri ng idake ing lugud na ning Dios.

Keti king yatung maging materyalismu, kailangan tamu ing mipapagdalakit ban panamdaman pasibayu ing ligaya ning pamiyabe-abe. E tamu marineng sabyan kareng kamag-anak tamu ing importanti la keng bie tamu. E tamu marineng kawlan lang maigpit at ban tamung mikalakas lub ing sabyan at kawlan lang maigpit, ing lagi tang isipan ing e ta tatalnan ing bukas, e ta balu nung kapilan ing bie ning tau. Nya anggang ating pagkakataun gawan ta iti e mu ngening pasku nune king bawat yugtu ning bie tamu. Tandanan tamu na minuna yang dinalo keka tamu ing Anak ning Dios, ban atbusan na ing keka tamung dewakan, ban ibie na ing sarili ng bie keka tamu. “Uli na ning maragul nang lugud ning Dios king yatu binie ne ing bugtung nang Anak ban ing ninumang maniwala keya e ya mate nune mirinan yang bie alang angga (Juan 3:16).

Kapamilatan napu ning Banal a Espiritung bibie lakas lub ban tang lugud kaparang tau. Pabustan yupung ngening pasku na sabyan ta ngan na ing Dios kaluguran na katamung kaluguran. Maigpit talang kawlan ding kamag-anak tamu at sabyan karela ing “ Masayang Pasku pu at Masaplalang Bayung Banwa keka apo, tatang, ima, koya, ate, bapa, dara, pisan at pangunakan.” Amen.

V.Pamanahimik

VI Tauling Panalangin
Ibpa, dakal a dakal a salamat pu king keka yung presensya. Aintidyan mi pu ngeni ing maragul a tula ning Ispiritu ning pamiabe-abe. Kanyaman na po ning mayap yung balita kekame. Ngeni pung Pasku, pakikwanan mila pung puntalan ding kaluguran mi king bie ban sabyan ming kaluguran mila at kawlan maigpit.Amen.

VII. Kutang

1.    Ninu kareng kamag-anak mu ing e muna apupuntalan neng pasku?
2.    Ninu deng buri mung pasyalan ngening pasku? Bakit?

Katlung Dominggu ning Adbiyento

Ing Pamanaral nang Juan a Maminyag

I.    Pamuklat a Panalangin

Ibpa, dakal a salamat pu at pitipun mu nake na naman . Masaya ke pung alang patna neng miyabe-abe kami king presensya yu. Ikami ngan ngeni pu  makasadya kaming makiramdam keka ngeni, nung nanu ing buri ning kekang Kayarian. At ing kaburian  mu yang masunud at aliwa ing kekami. Amen.

II. Pamamasa
Luke 3:10-18
10 Ngarang kinutang kang Juan “ Nung makanyan, nanu ing sukat ming daptan?”
11 Nganang mekibat, “Ninuman ing ating aduang kapiblas a imalan sukat neng idake ing metung ketang ala, at ing ninumang ating pamangan sukat na lang dinan ding aliwa.”
12 Linapit la kang Juan ding mapilan a talapanyingil buis ban pabinyag at kitnan de, “ Maestro, nanu ing daptan mi?”
13 Pekibat na karela, ’ E kayu sisingil sobra king sukat yung singilan.”
14 Kitnan dia naman ding mapilan a sundalus. Ngara, “ Ikami naman , nanu ing kekeng sukat daptan?”
Pekibat na karela, “ E kayu kakuang salapi kaninu man king kapamilatan na ning puersa o king uli na ning pamamatakut. Managyu na kayu king sueldung tatanggapan  yu.”
15” Meragul ing kapanayan ding tau at pigmulalan  de i Juan. Inisip da king ya na siguru ing Cristo. 16  Inya nganang Juan karela ngan, ” Bibinyagan da kayu king danum, oneng ing metung a maygit kesa kanaku datang ya. E ku man karapatdapat agyang kalag mu karing tali nang sandalyas. Binyagan na kayu king Banal a Espiritu ampon king api. Darala ne ing  sabungke na ba nang daran at ikawani ing pale king sepu at tipunan na ing pale king bangan at dulukan na ing sepu king aping e matatda kapilan man.”
18 King miyayaliwang paralan agkatan na lang Juan ding tau kabang panaral na karela ing Mayap a Balita. 

III. Turu
Nanu ya kayang klasing bie ing keka tamung panwalan at bibyayan? Ing bie ta kaya metung yang makasarile o bie yang lulugud at manintun kareng mangailangan a saup? (Roma 13:8).

Ating metung a kagawad, ning metung a baryu na asna kasipag susuyu kareng kayang kabaryu. Neng abak, maranun yang migising  ban sopan deng estudyanting lilipat king dalan ban lungub king iskwela. Lunis anggang biyernis, sosopan no reng estudyanting lumipat neng abak ampong gatpanapun. Neng atin namang kalamidad, pilmi yang atyung sasaup, lalapit yang agad king mayor ban mipaabut nung nanu ing pamangailangan da reng tau. Neng aldo na naman ning Dumingu, alang sala yang sisimbang kayabe ning asawa na  at makiagum kareng miyembru na ning pisamban.

Misan a aldo, abalu na ing atin ya palang sakit. Sinabi na ning doktor kaya na bawal na kaya ing paypagal. Pero uling paintunan na ning kayang katawan ing pamanyuyu, e ya pa murin tinuknang king kayang gagawan, pero bewasnan na namu iti. Neng mititipun lang kayabe no reng kayang mabilug  a pamilya ampong kakaluguran, agad ng sabyan karela na “patsa mete ku, buri ku miburul ku king bale matua” (bale matua, yapin ing bale da reng kayang pengari). Dintang ing oras, ing mete ya at king kaorasan pin makaburul ya king bale da reng matua na.

Ing ebanghelyu ta ngeni, tungkul ya king nanu ing buri tang biyayan king bie tamu. Bie makasarile (kawangis na wari ning metung a kambing na alang patugut sasabing “me, me, me….uling ing balu na mu ing makakayap king sarili na!) o biyeng lulugud a susuyu kareng mangailangan?


Dintang ya I Juan a maminyag king panaun ayta, ban isadya ya ing dalan o panyatang ning Ginu tang Jesu Kristu. Pauna nana kareng tau nung makananu ya ing maging metung a kristiyanu, nung nanu ing kaburyan na ning Apung Ginu. Pangulait nane ing kaburyan na ning kayaryan ning banua. Pangulait nane I Jesus, (ing Mesiyas, ing Kristu) pablasang balu nane manibat pa nyang atyu ya pa king sinapupunan ng ima ng I Elisabeth. Pangulait nane, nung nanu ing buri ng sabyan ning maging metung a kristiyanu. Na buri na sabyan, yapin ing maging talatuki king kaburyan ning Kristu o tukyan nanuman ing gawan ning Kristu.

At pepatilip nong Juan  de niping  mapilan a kaburyan  na ning kayaryan ning banua. “Ninuman ing maki adwang kapiblas a imalan sukat neng idake ing metung ketang ala, at ing ninumang ating pamangan sukat na lang dakayanan ding aliwa.” Antina nemong buring payabut ing tune ng kabaldugan ing turung pangadi ning Ginu tang Jesu Kristo. “Dinan mu kaming pamangan aldo-aldo” e na tiru ning Ginu ing “Dinan mu kung pamangan aldo-aldo” Keni papakit na ing pamangan na dapat tang anyaran ing e mu para keka tamu nune para king komunidad at nya dapat ing  sobrang atyu keka tamu dapat ipamye at e dapat isalikut.

 Kareng ating katungkulan naman king gubyernu antimo reng tagapanyingil buis, ngana karela “E ko sisingil sobra king sukat yung singilan” anti namo waring sasabyan na e ta dapat mamurayit, ing pante-pante ta dapat  panlalawe kareng kapara tang tau.

King kutang da naman deng sundalus, pekibat ng Juan karela ing “ E la kukwang kuwalta kaninu man, king kapamilatan ning puwersa o king uli ning pamamatakut.” Na king kasalukuyan, nung metung kang taung ating katungkulan e me dapat iti gamitan king marok a kararaptanan. Uling king pamanyatang ning Ginu king busal tamu, ing sablang kayupayan atyu kaya ban daran at ikawani ing trigu king sepu at tipunan na ing trigu king bangan at dulukan na ing sepu king aping e matatda. At ing sepu, ila pin ding kambing, me, me,me…., na alang balu nune mu ing sarili da,  na deti ilang maduluk king api ning impiyernu. At ing trigu, ila pin ding tupang mapamintung mitmung katapatan  king pangakristiyanu da, na muli king Ibpang atyu banuang alang patnang sasamba, pupuri at magpasalamat, ngara “Banal, banal, banal ya ing Ginu.” Amen.

IV. Pamigunam
Ating metung a lider na sinabi na kareng kayang miyembru na “manibat ngeni  e tane sasabyan ing amanung, itamu.” Nune ing parati tanang sabyan ing amanung Aku, uling nung ing amanung ayni, Aku, iya namung sabyan tamu at  takman ta ing kasikatan, kayamanan at itamu na ing malyari buri.

Nanu kaya ing maging bunga na ning klasing pamibiebieng aku, aku, aku…? Pweding pagmaragul iti king sarili, pwedi ping takman ing kasikatan, kayamanan at ing buri mu yang masunud. Pero ing metung a bieng alang malasakit at pamigaganaka kareng aliwa, bie yang alang kagalakan at kapayapan. At balu tamu na ing parati tang anyaran king Ginu kilub ning misa yapin ing kapayapan, “O Ginu ming Jesu-Kristo, a sinabi karing kekang apostol: Ing kapayapan lalakwan ku kekayu, ing kapayapan ku babye ku kekayu.”

Atin ping pinuna karening grupung “Aku” at asabi na ing makanining amanu, “King persunal ku mung opinyun, dening taung areni  ilang peka makalunus at pekamulungkut. Ing prinsipyung bieng makasarili  yang eksaktung kabaligtaran ning Amanu ning Dios. Ing prinsipyung manyaman a bie yapin ing lugud king kaparang tau antimo nung makananu meng luluguran ing sarili mu. Nanu wari ing araranasan ning taung ating lugud kaparang tau? Kabanalan, kapayapan at ganap a tula king Banal a Espiritu. Metung a bie ating Lugud- na mas importanti iti!

Ing lugud na mamie at magsakrapisyu, uling yang kaylangan ning yatu( I Jesus) . Ing lugud na makayandang dumame (Ing Banal a Espiritu).Ing lugud na parating makayandang sumaup at magmalasakit king kikyak a yatu (Ing Tatang tamu). Amen

V.Pamanahimik

VI Tauling Panalangin
Ginu ming Dios, pabustan yu pung maging tune at tapat kaming kristiyanu. Sopan yu kami pung makasadyang dumame kareng mangailangan. Parati yu pung paganaka kekami ing kuburyan yu at aliwa ing kekaming kaburyan. Amen

VII. Kutang
1.    Ibye ing sariling upinyun, “Ing lugud yang dalan ban ing makasariling bie maging bie yang pamanyuyu.”

2.    Nanu pamo ing buri tang gawan na e ta pa agagawa? Bakit?

Kadwang Dominggu ning Adbiyento

Ing Pamanaral nang Juan a Maminyag

I.    Pamuklat a Panalangin
Ibpa, pabustan yu pung ibuklat mila reng pusu ban ing nanu mang kaburyan mu yang matupad. Dinan yu ke pung masalang kaisipan ban mas lalu miyang aintidyan ing kekang amanu. Dinan yu ke pung kababan lub ban tanggapan mila at biyayan deti king aldo-aldo ming pamibie-bie. Iti ngan pu adwan mi king lagyu na ning keka yung Anak, I Jesus kayabe yu at ing Banal a Espiritu, mangga man king kapupusan. Amen.


II. Pamamasa

Luke 3:1-6
1 Labi neng limang banuang Emperador kanita i Tiberio; i Poncio Pilato ya naman ing gobernador king Judea, at i Herodes ya ing pamuntuk ning Galilea. I Felipe a kapatad na pamuntuk ne man king sakup na ning Iturea at Traconite. I Lisanias ya ing pamuntuk king Abilinia. 2 I Anas at i Caifas naman ila ding pekapun ding pari. King panaun a ita atyu king disyerto i Juan a anak nang Zacarias. Kanita dinatang kang Juan ing amanu na ning Dios. 3 Inya linual ya i Juan at linibut king mabilug a sasakupan ning Ilug ning Jordan.  At panaral na, “Sisian yu la at painggulutan ding kekayung kasalanan at pabinyag kayu ban ing Dios patawaran na kayu.” 4 Antimo ing makasulat king libru nang propeta Isaias,

    “Ating metung a taung kukulisak king disyerto:
    ‘ Isadia ye ing dalanan ning Guinu;
    tuliran ye ing dalan a dalanan na!
    5 Tambunan yu la ding kulkul, s at bunduk-bundukan.
    Tuliran yu la ding dalan a bukut,
    At samasnan yu la ding matsurang dalan.
    6 Ding sablang tau akit da ing pamagligtas na ning Dios!’”

III. Turu
Itamung kristiyanu, apikawangis da katamu king metung a timba. Timbang nung e me itulid king metung a posu e mika danum. Kalupa ta wari nung e taya itulid ing bie tamu, kapilan man e taya atanggap ing Ginu king pusu tamu. Neng kayi naman nya e taya atatanggap ing Ginu, kalupa na wari ning timba, busbus ya lalam, anya adyang nanung amanu at grasya ning Ginu, miuugse mu.  Neng kayi naman nya e taya atatanggap ing Ginu, antimong timba atin yang takap, makasara ya, makanyan mu rin adyang nanung gawan ning Ginu e milub king bie tamu.  Madalas naman nya e taya atatanggap ing Ginu, antimong timba sapak ne. Katmu neng basura ing pusu tamu, nya dyang nanung gawan ning Ginu, e ne makalugar king pusu tamu bilang Dios at tagapagligtas.

Ing ebanghelyu ngeni tungkul ya king metung a propetang kukulayit, I Juan Bautista. Kukulayit na ing malapit na mu ing pamag-ari ning Dios. Papasadya ne at patulid ing dalan ning Ginu. Na buri na waring payabut keka tamu ing ating kapagsadyan keng pamananggap king kayarian ning Ginu. Mumuna yapin ing tune pamanyisi at pamagbalik lub king Ginu. Dapat ta ngan sisyan ing agawa tang pamikasala, “commision” yamang pamikasala o “ommision” yaman. Deng kasalanan a “commsion” ila pin deng pemamanyapat tamung e masanting king Apung Ginu at king kalupa tang tau. Ing “ommision” naman yapin deng kasalanan na ating tang dapat gawan mayap pero  e tamu depatan iti
Ing kadwa namang kapagsadyan king pamananggap king kayarian ning Ginu yapin ing kababan lub. Kalupa na wari ning propetang kukulait ban isadya ya ing dalan ning Ginu. Ing imalan na megawa mu king buwak kamelyu at makababat yang megawa king balat animal. Ing pamangan na durun ampon pulut panilan. At sinabi na pa nyang paratang ne ing Ginung Jesus para pabinyag kaya, ngana, “E ku man karapat-dapat mamitbit karing keyang sandalyas.” Amanung mapagkumbaba, amanung dapat ilele ing sarili ban ing Ginu yang miral king bie tamu.

Ing katlung kapagsadyan king pamananggap king kayarian ning Ginu, yapin ing nung tune tang sisisi kareng kasalanan a agawa tamu, ipakilala ta dapat king pamagbayu king keka tamung bie. Wa, masakit gawan iti, pero nung ing Ginu yang paburen tang manigobra king bie tamu, alang duda na marapat iti. E nana katamu man pamiraplan ning Ginu, basta ing mumuna tang gawan yapin ing sumisi at magbalik tamu lub Kaya at king mitmung kapakumbaban dagdagan tamu ing pamagtiwala kaya. At akit tamu, kalupa na wari ning metung a timbang e busbus, e makasara at e sapak  a sukal,  ing grasya ning Ginung Jesus yang magdatun king pusu tamu Amen.

IV. Pamigunam
King saup ning Banal mung Espiritu Ginu, sopan yu kaming sumisi at magbalik keka. Turuanan mu kami pung tutung sumisi, kareng e gana-gana ming agawang e mayap keka at kareng kaparang tau. Detang kasalanan ming “commision” antimo ning  pamamamurayit, pamaglaram, pamaglasing, pamanalipusta at miyayaliwa pa. Deng kasalanan ming  “ommision” antimo ning alang pakyalam o pamanahimik mi, adyang akakit minang e na ustu ing gagawan da reng aliwang tau, uling mas buri mi ing komportabling bie. “Ginu, dinan yu keng sikanan lub ban asabi karela ing e ustu ing gagawan da, asabi mi pu sana iti karela, itang e la sana manamdaman, nune taglus sana kareng karelang pusu’t kaisipan iti, ban ing kekang kayarian yang mag luid.

King saup ning Banal mung Espiritu Ginu, sopan yu kaming maging mapagkumbaba. Parati yu pung paisip keka mi na, e ka magdatun king taung matas a lub, uling ika mismu Ginu, malam at mababa ka lub. Kuturan at iyugse mu king api ing katasan mi lub, ban ing kekang kayarian yang mag luid.

King saup ning Banal mung Espiritu Ginu, sopan yu kaming ditak-ditak, bagya-bagya ing akit da ring aliwang tau ing pamagbayu mi panga tau. Iti ya pu ing maragul a grasyang buri ming  tanggapan  king banwang iti, ban ing kekang kayarian yang mag luid. Amen.

Mumunang Dominggu ning Adbiyento

Ing Paniatang na ning Anak ning Tau

I.    Pamuklat a Panalangin

Ibpa ming atyu banua, misamban ya ing lagyu mu; ika ing mag-ari keka mi. Mipamintuan ing kaburyan mu keti sulip anti banua. Ibie mu kekami ngeni ing pamangan a kailangan mi king aldong iti. At patawaran mula ding kasalanan mi keka, anti mo ing pamamatawad mi karing mikasala kekami. At e mu ke paisaul king mabayat a kapagsubukan, nune ikabus mu kami king marawak. Amen.

II. Pamamasa

Luke 21:25-28, 34-36

25 'Mika ating palatandanan king aldo, king bulan at karing batuin.  Magulu la ding bansa keti king yatu at malitu uli na ning dagat at ning alun. 26Mabungsul la ding tau king takut at king pamanisip da karing bage mapalyari king yatu; uling mayugun la at milisia la dalan ding planeta at ding aliwa pang bage king banua. 27King panaun a ita, akit deng daratang ing Anak ning Tau libutad na ning biga at kayabe ning maragul a kayupayan at kamalan. 28Kabud magumpisa na lang mapalyari deting bage, tumula kayu uling malapit na ing pangaligtas yu.' 34 ”Mingat kayu! E yu paburen ing mipasoso kayu king katakawan at pamaglasing, at e kayu paibalisa king pamanintun kabiayan, pota dasnan na kayu ning Aldong ita a e kayu makasadia. 35Uling datang ya ing aldong ita king e ra piadian ding sablang tau king mabilug a yatu. 36 Inya, magsadia kayu king balang oras; manalangin alang patugut ban mika sikanan kayu at aligtasan yu ing sablang mangapalyari at ban makayarap kayu king Anak ning Tau.”

III. Turu

Inyang banwang 1970’s  ating metung a grupu  (sekta) keti Pilipinas na pangalat da na datang na kanu ing kawakasan ning panaun. Ginawa lang kampu da king Tagaytay at memagdala lang delata, kaban-kaban a abias at imalan a kaylangan da. Memagdala la namang helmet ampong parulang saken banta kanu nung mayun atin lang pangober kareng karelang buntuk at katawan ban e la manasakit. Pero megisan na ngan ing karelang dakal a dadalan, meinip nala at ing pamalita da e mepalyari.

Ing ebanghelyu tamu ngeni yang mumuna ng Dumingu ning Adbiyentu. At ing buri ng sabyan ning adbiyentu, yapin ing  kapagsadyan ning balang  katolikung kristiyanu king kadwa ng panyatang ning Ginung Jesus. Datang yang pasibayu antimo ing pengaku na kareng kayang alagad ngana “ E cayu pailingasngas at paigulu isip. Paniulan ye ing Dios, at paniulan yu ku naman. Dakal lang kuartu king pibale-bale nang Ibpa ku, nung e mu makanyan, e ku sukat sabian kekayu iti. Mamako ku ban isadya ra kong lugal, at kaybat kung mekalako at mekapagsadyang lugal para kekayu, magbalik ku ba ra kong ituking kayabe ku: kanita nu karin ku man, karin kayu naman (Juan 14:1-6 ).”

Malingasngas tamu at magulu pin isip kening sasabyan na ning ebanghelyung kawakasan ning panaun nung itamu angga ngeni e taya aytindyan at gagawan ing tirung pangadi ning Ginung Jesus. Mas mumuna taya pang didinan pansin o ulaga ing “Dinan mu kaming pamangan aldo-aldo” kesa king “samban ya ing lagyu mu at mipamintuan ing lub mu”. E man pamangan aldo-aldo ing buri tang anyaran, ing  buri tamu pabulan at neng kayi pin pabanua pa. Oyni ing sasabyan na ning ebanghelyung “ Mingat kayu! E yu paburen ing mipasoso kayu king katakawan. At  king amanung inglis naman “ Give us our daily bread” tinape mu dapat , pero ing anyaran tamu “cake” a marakal a aysing.  At dapat ing sobra e dapat isalikut nune dapat ipamye (“Extra loaf is not for storing but for sharing”).

Mitakutan tamu pin king kawakasan ning panaun nung e taya kilala ing Ibpa, ing Tatang tamung malugud, na pilit nang pakilala ning Ginu tang Jesu Kristu (“Ibpa mi atyu ka banwa, misamban ya ing lagyu mu keti sulip anti banua.”) “Ninung pengari kekayu ing munie batu king anak nang maniawad tinape? Dinan ye kayang ubingan, nung maniawad yang asan kekayu ing anak yo? Nung ikayung palpikasala balu yu lang dinan mayap a bage ding anak yu, e di lalu na kayung balung dinan ning Ibpa yung atyu banua?(Mt. 7:9-11).”

E taya pin buring akit daratang ing Anak ning Tau busal na ning biga kambe ning maragul a kayupayan at kamalan, uling tatakut tamung marap kaya kasi e taya talaga depatan ing pangading tiru ning Ginung Jesus, “ Patawaran mu kami kareng kekaming kasalanan keka, antimo ing pamamatawad mi karing mikasala keka mi.’’ E tamu tutung manyawad kapatawaran kareng agagawa tang kasalanan at ing kasalanan pa ing e ta byasang mamatawad, neng kayi naman petawaran taya pin sana ing taung mikasala keka tamu, e tanaman kakalingwan ing gewa na.

“Mingat kayu” ana ning Ginu, lalu na itamung taung ala ng gewa nung e magpasasa king kasikatan at kapalaluan na yapin ing pangalasing ta king pibandyan  a mawawalang  antimong bula. Mingat tamu! Uling datang ya ing Ginung Jesus king e tabalung aldo o oras. Parati tang magsadya king balang oras; pangadian taya at gawan parati ing tiru ng pangadi ning Ginu tang Jesu Kristo ban e ta marine at tumakut  marap kaya . Amen.

IV. Pamigunam

Suryan ta ing sarili tamu. Dapat ta bang mitakutan king pangawakas ning yatu o ning bie tamo? Nung pangadian taya parati ing Ibpa mi at  e ta neman pagsumikapan gagawan iti king bie tamu dapat tamu ping mitakutan. Pero nung ing Dios ya ing maging Tatang tamu, ala yang bage na e na aibye, uling balu ta nama ya ing   panibatan ning Lugud. “ Tatang ko, ika ng bala king bie ku, manibat ngeni panibala ku na ngan keka ing egana-gana. Ing kaburyan mu yang masunud, aliwa ing kanakung kaburyan. Uling parati namu neng ing sarili ku o ing kaburyan ku ing masusunud alang  masalese malilyari. Balu ku Ginu, ing buri mu parati ing mipakayap ku, uling bina mu kung kaluguran. Alang kaparis ing lugud mu kana ku. Adyang dakal a besis ing e daka pamintuan, lilingapan mu ku parin. Karine kung karine keka, o Ginu. Turuanan mu kung maging matatag kareng kapagsubukan king bie, e ku agyu Ginu, nung ala ka king bie ku. “ E mu ku sana paysaul king tuksu nune ikabus mu ku king sablang marok, Amen.

V.Pamanahimik

VI Tauling Panalangin

Ginu ming Dios dakal pung salamat king lugud mu kekami. parati mu ke sanang lilungan ning kekang Banal a Espiritu ban lalu kami pung mipalapit at mas lalu da kang akilala. Uling keka ing kayarian, ing kayupayan at ing ligaya mangga man king alang angga. Amen.

VII. Kutang

1. Nung malilyari namo ing kawakasan ning panaun, nanu mo ing mumuna mung gawan? Ot bakit?

2. Nung sabyan namo keka ning anghel ning Ginu, na bukas buri na nakang akayabe ning Ginu king kayang kayaryan, nanu ing kekang pakibat? Ot bakit?