Monday, February 23, 2009

Ikapitung Dominggu ning Ordinaryung Panaun

Pepakayap neng Jesus ing Paralitiko


I. Pamuklat a Panalangin

Ibpa, matatagkil ko kekami potang akakit yung mipapanyaup kami. Tutu kong matutula potang akakit yu keng mikakalugud at potang laus king lub mi ing masabal mi kareng kabayatnan da reng pakakalulu kekami. Gawan yu ke pung kalupa yu a melunus at ginawang paralan ban micabus kami karing kasalanan at kabayatnan mi. Ilako yu Guinu ing kekaming pigagap a pansarili mu, uling magsilbi lang sumbagal reni king pamanyaup mi karing kapara ming tau a mangailangan. E yo pu kakalinguan reng taung pangadi mi. Saupan yo pu at ilako yo kabayatnan. Salamat pu Guinu, Salamat. Amen.

II. Pamamasa

Marcos 2:1-12


1 Kalabas da ring mapilan a aldo, mibalik ya I Jesus king Capernaum at mikalat ing balita king atyu ya bale. 2 Inya mitipun la ding tutung dakal a tau; e la mipagyu agyang king tulid na ning bale. Kabang aralan na lang Jesus ding tau, 3 detang de ing metung a paralitikong bubuat da ring apat a tau. 4 E re alapit kang Jesus uli na ning keraklan da ring tau, inya bikbak de ing bubung ning bale king tulid na. Inyang mekabusbus na lang pidalanan na, beba re ing paralitiko. 5 Inyang ikit nang Jesus ing maragul dang kasalpantayanan, sinabi na king paralitiko, ”Anak ko, mipatawaran la ding kasalanan mu.” 6Ngara king lub da ring mapilan a talaturu ning Kautusan a pakalukluk karin, 7 ”Obat makanyan ya sasabian ing taung ini? ”Obat makanyan ya sasabian ing taung ini? Kalapastanganan king Dios yan, ah! E wari ing Dios mung bukud ing malyaring mamatawad kasalanan?” 8 Agad nang balung Jesus ing atyu king pilubluban da; inya ngana karela,” Obat mimisip kayung makanyan? 9 Isanu ing mas mayan sabian king paralitiko,' Mipatawaran la ding kasalanan mu' o 'Talakad ka, idala me ing pagkeran mu at saka ka lumakad'? 10 Patutuan ku ngeni kekayu king ing Anak ning Tau atin yang upayang mamatawad kasalanan keti king yatu.” Ngana king paralitiko, 11 “Talakad ka; idala me ing pagkeran mu at muli na ka!” 12 King akakit da ring sabla, tinalakad ya kanita mu rin ing paralitiko; biwat ne ing pagkeran na at meko ya. Mengapamulala la ngan at megumpisa lang minie kapurian king Dios, Ngarang sasabi, ”E ta pa ikit kapilan man ing anti kaniti!”

III. Turu

Reng bayung generasyun ngeni daramdaman de pa ing ausan tamung “bayanihan” . Ing problema mu kaniti, agyang daramdaman de pang magagamit ining terminung aini kareng miyayaliwang proyektu ning gubyernu o barangay, e ne masyadung malino karela ing penibatan ning terminung aini karela. Ing original a terminung bayanihan mas masala yang aintindian inyang kanitang mumunang panaun, bubuat do reng bale a gawa king kawayan ampon sawali ( a ausan tamung bahay kubu). Pota kasing ating bisang lumipat bale, e mu gamit ing lilipat da, nune pati bale da lilipat da naman. Agawa da ini uling yari la mung kawayan ampon sawali reni. Reng lalaki kanita king baryu o king metung a balen, datang la ngan ban ibuat de ing bale king bayu nang pilipatan. Ining serbisyung aini libri. Abe ne ning kultura tamu ini king misaup saup tamu at mamie serbisyu a alang kapalit. Oini ing ausan dang bayanihan. Kareng mapilan pang baryu akakit ta pa ini, e mu king pamaglipat at pamamuat bale nune pati na king pamisaup-saup da ring malda kareng miyayaliwang bage.

Ing ebanghelyu tamu ngeni mala “bayanihan” ya naman. Oneng imbes na bale ya ing pikarga-karga da reng apat a katau, paralitiku ya ing bibitbitan da. Bibitbitan de uling buri deng ipa-ulu kang Jesus. At uling e re alapit kang Jesus uling tiktak a karakal a tau, menik la babo ning bale at karin, sinira de ing bubungan ning bale ban aibaba dya rugu ing taung paralitiku ban aipa-ulu de kang Jesus.

Sasabian ning ebanghelyu tamu king metagkil ya I Jesus king ikit nang kasalpantayan da rening taung megpumilit miras keya. Pauli na ning kasalpantayanan da, e ya mu me-ulu ing paralitiko, mipatawaran ya naman kasalanan .

Masaya ya ing Guinu potang akakit na ka tamung miyabe-abe. Potang tutung mititipun tamu at mikakalugud, mipapagmalasakit ampon misaup-saup king bawat metung, tutu yang matula ing Guinu. Potang akakit na ning Guinu king e ta la papaburen reng mamagkasakit kekatamu, at pilit ta lang sasaupan ban misulung la rugu ring karelang pamibiebie, matatagkil yang tutu ing Guinung Jesus. Potang akakit na ning Guinu king bibitbitan ta la e mu reng sarili tamung kabayatnan nune pati na ring kabayatnan da reng kasiping tamung bale ampon reng kayabe tamu king komunidad, matula ya ing Guinu uling makanyan tamu talaga dapat mabi-bie king komunidad mikakalugud, mipapagmasabal, at misaup-saup. Ing kabayatnan ning metung, kabayatnan de ngan reng miyembru ning komunidad. Ing saya ning metung, saya dya naman reng aliwang miyembru ning komunidad.

Inya at ne kalakas ing panalangin tamu potang miyabe-abe tamung manalangin king Guinu para king metung a bage a anyaran tamung saup o grasya king Guinu. E mo makanyan ing Santa Misa nung nukarin ing mabilug a balayan ning Dios, agnan agnan lang manyawad grasya king Guinu e mu para king sarili da, nune para karing kapara dang tau mu naman?

Ikit tamu king reng taung mamitbit king paralitiko, ikwa da pang menyirang bubung uling king karelang kapagpursigyan. E la rugu tinuknang anggang e da ikwa ing kapagnasan dang kayapan para kening kayabe dang paralitiku. Nung e la siguru migpursigi, me-discourage no siguru inyang ikit da no reng tiktak a karakal a taung makapadurut kang Jesus. Oneng e la tinuknang, at menintun lang aliwang paralan.

Sana makanyan mu naman kekatamu, itamung sasaup kareng kayabe tamu king BEC, king e tamu tutuknang ampon sasawang sasaup ampon susuyu potang mangailangan la. Siguradu mung matagkil ya ing Guinu kekatamu potang akakit na king reng pigagap tamu, ila reng pigagap da reng kayabe tamung mangailangan a saup king komunidad. At akit tamu man, king pakiramdaman na ka tamu ning Guinu potang ing anyaran tamu keya para la kareng taung mamagkasakit king bie. Amen.

V. Pamigunam

Keng ebanghelyu tamu ngeni, pupurian ne ning Guinu ing mayap a ugaling mipapanyaup. Kutnan ke pa ing sarili ku nung ikwa ku nang sinaup kareng kayabe ku king komunidad a akakit kung mamagkasakit? Pota kayang balu ku na ing pamangailangan da, nanu mo ing asasaup ku karela?

O pota galang potang balu kung mamagkasakit ne ing metung a tau, lalu ke pang papagkasakitan? Pota galang potang balu ku nang mamagkasakit ne ing metung a tau, lalu ke pang panyiran kareng aliwang tau? Imbes na mo sasaupan ke, lalu ke pang dirinan pabayat kapamilatan da reng kasiran a panyabian ko karing aliwang tao?

O pota galang naman, agyang balu ku na ing pamangailangan ning kayabe ku, ala na ku mang gagawan a kasaupan?
Ing pamanyaup e naman dapat mu pera. Marakal a paralan ban makasaup ku. Nanu man ing paralan ing gamitan ku, ing importanti keni, bisa kung sumaup. Ing kabayatnan ning kapatad, anti ku ne mong maging sariling kabayatnan, inya sasaup na ku namang mangarga king kabayatnan a ita.

Potang mebiasa ta nang magsaya karing mayap a malilyari karing kayabe tamu, sinyalis na ita, king ating ta nang pamisanmetung king komunidad. Potang ing kabayatnan da reng abe tamu, guewa ta na lang antimong sarili ta nang kabayatnan, metung neng maragul a sinyalis ita, king misasanmetung ta na king komunidad. Sana, tumula ya ing Guinu potang akakit na ka tamung misasanmetung king pamanyaup. Matagkil ya sana ing Guinu, potang akakit na king anyaran tamu ing nanu ing makakayap kareng kayabe tamu lalu na reng mangailangan.

V. Pamanahimik

VI. Tauling Panalangin

Ibpa, masaya kayu potang akakit yu kaming misaup-saup. Matatagkil kayu potang akakit yung mipapagmasabal kami at mikakalugud. Iporma ye ing komunidad mi Guinu, ban akit mi karing balang metung kekami ing tune a masabal ampon kasaupan lalu na kareng kababayatnan kekami. Ala sana pu kekaming daranup, uling nung tutu keng mipapagmasabal, ala ninu man kekami ing kumulang king pamangan. Ala sana pu kekami reng lulungkut, uling nung tutu keng mikakalugud, ala ninu man dapat kekami ing manandaman lungkut. Ika ing tatagkil karing balang pusu mi, palambutan yo pu ban mikatmuan keng lunus ampon lugud kareng kapara ming tau. Kalupa yu a melunus karing kabilian mi, turuanan yu ke pung malunus kareng kabilian da reng kayabe ming mamagkasakit. Salamat Guinu. Salamat. Amen.

VII. Kutang

1. Nanu mo ing gagawan ku potang akakit kung mamagkasakit ya ing kayabe ku king BEC?



Download at:

http://rapidshare.com/files/202255047/02.22.09_Ikapitung_Dominggu_ning_Ordinaryung_Panaun.doc

Sunday, February 15, 2009

Kanam a Dominggu ning Ordinaryung Panaun

Pepakayap neng Jesus ing Lalaking Leprosuan


I. Pamuklat a Panalangin

Ibpa, ala kayung sasakwil kareng ninumang lalapit kekayu. Agyang e ya man katanggap-tanggap ing metung a tau kareng kapara nang tau, tatanggapan yu la king mitmung lugud at lunus. Pauli na niti, ilako yu kekami ing takut mi potang lalapit ke kekayu. Lalapit mi la pu kekayu reng kasalanan mi, reng kakulangan mi ampon reng egana-ganang depat mi a e mayap king kekong mata. Kalupa ning leprosuan ning ebanghelyu ngeni, papakit mi la pu ngeni kekayu reng egana-ganang kakulangan mi ban ipa-uli king kekong mayap a upaya. Turuanan yu keng matiwala kekayu Guinu ban mabiasa mi lang ipanibala reng pamibiebie mi kekayu. Salamat Guinu. Salamat. Amen.

II. Pamamasa

Marcos 1:40-45

40 Lepitan ne ning lalaking leprosuan i Jesus; siniklaud ya king arapan na at nganang migpakalunus, ” Nung burian mu apakayap mu ku.”
41 Melunus ya I Jesus; tigkilan ne at nganang sinabi, “Buri ku kumayap ka!” 42 Kanita mu rin mewala ing lepra na ning tau at kinayap ya. 43 Agad-agad neng pepalakuan Jesus kaybat neng maigpit penabilinan . 44 ”lawan mu,” nganang sinabi, ”e mu pamalita iti kaninu man. Mako na ka at munta ka at ipakit king pari, kaybat miyain kang ain agpang king utus nang Moises ban patunayan karing tau king kinayap na ka.”
45 Oneng meko ya at pemalita na ing milyari. Uli na nita, e ne milub hayagan i Jesus king balen. Makagyu na mu ing atyu king lual na ning balen, karing lugal a tahimik at karin de pagsarian ding taung manibat karing miyayaliwang lugal.


III. Turu

Menakit na kayung taung masakit a midinan nang taning king bie na? Kerakalan kareng taung a reni, magbakasakali la pang kumayap. Mangadi nong mangadi, mangaku nong mangaku, gawa lang panata da ban apakisabi da mu king Guinu king pakayapan na la, at ikabus na la king kamatayan a malapit nang datang karela.

King kekatamung ebanghelyu ngeni, ating metung a leprosuan a linapit kang Jesus at sinabi na kang Jesus: “ Nung buri yu pu, pakayapan yu ku pu.”. Ing sakit a lepra inyang kapanaunan nang Jesus, anti ne mong 'death sentence' kanita. Alang panulu king sakit a ini. Malalaso ya ing balat mu ampon butul kabang susubi ya ing sakit. Nung meging kang metung a leprosuan, ikalilwa da ka. Ilako da ka king siyudad ban manuknangan king lual karin kareng kuebang malaut kareng tau. At potang daralan ka, kailangan magdala-dala ka pang malating kuliling ban ipabalu mu king ika, a metung a leprosuan, daralan ka. Kulisak mu pa karela king “e ya malinis” ing daralan, at kailangan lang lumaut reng asasaganan mung tau. Masakit ya talaga ing kabilian ning metung a leprosuan inyang panaun a ita. Anti na ka mong mete uling e na ka malyaring maki-agnan karing kalupa mung tau.

Oneng nanung ikit tamu king leprosuan a ini a linapit kang Jesus? Megpumilit ya? Mengaku ya? Megpanata ya at mengaku ya kang Jesus ban uluan neng Jesus? Pemilit ne mo I Jesus? Ali ne. E ne pemilit i Jesus, nune, pepakit ne ing sarili na kang Jesus at pepaubaya na kang Jesus ing keyang kabilian inyang ngana : « Nung buri yu pu…. ». E ya memilit king Guinu, nune, pepaubaya na king Guinu nung nanu man ing buri nang gawan keya ning Guinu.

I Jesus naman, uling ikit ne at melunus ya king leprosuan, sinabi na: “ Wa, buri ku…maulu ka”.

E taya dapat pipilitan ing kaburian tamu king Dios. Pota rugung mag-panic tamu, nung nanu nanu na ngan ing pangaku tamu keya, uling king kaburian tamung palitan na ning Guinu ing buri nang malyari kekatamu. Ing ikit tamu king leprosuan, e ya memilit, nune megtiwala. Ing metung a tanda ning pamagtiwala yapin ya ing kapasidad tamung ipaubaya king Guinu ing nanu man malyari a kaburian na. E tamu ngan kontroladu ing malilyari ampon malyari kekatamu. Ing Guinu balu na ngan ing nanung makakayap kekatamu. Nung tutung magtiwala tamu keya, e ta na dapat tatakut nung nanu man ing malyari kekatamu uling balu tamu, king iya, ibpa ta yang malugud a mikibalu king nanu mang mayap para kekatamu.

Mebiasa ta na kayang manalig keng Guinu? Kapilan ta pa kayang mabiasang panibala ta ya keya ing kekatamung kabilianan king bie. Ilako ta na ing takut. Ing Guinu mayap at maganaka ya, e tamu dapat migaganaka potang keya ta na ngan penibala ing mabilug tamung pamibiebie. Amen.

V. Pamigunam

Balang mangadi kung “ibpa mi”, panalangin ku karin king” matupad na sana ing kaburian na keti yatu”. Manalangin tamung makaniti uling king kapaniwalan tamu king ing Guinu kaburian na ing nanu mang makakayap kekatamu. Uling balu tamung mayap ya ing Guinu, e mu kaya ustu nung keya ta na ipanibala ing mabilug tamung pamibiebie? Nung ing kasalpantayanan tamu sasabian na king kaluguran na ka tamu ning Guinu, at tutu naman a kaluguran na ka tamu, nanu pa kaya ing kapigaganakan ku, ngening balu ku naman king ing pamatupad ning kaburian na iya ing makakayap kanaku?

Ing taung kulang king pamagtiwala king Guinu, e ya mika katahimikan ampon kapanatagan king bie na. Migaganaka yang migaganaka. E ya milalako kapigaganakan uling e ya pa malalam ing pamagtiwala na king Ibpa.

Nung lauen ta ya ing leprosuan king ebanghelyu tamu ngeni, akit tamu, king agyang atin ya pang sakit a mabayat, e ya megpumilit. Panatag ya pa mu rin lub uling penibala na na ing kundisyun na kang Jesus. At tanu mong e ne inulung Jesus ing leprosuan? Masira ya kaya lub? Siguru ali ya pa murin, uling ketang datang na king kekatamung ebanghelyu, inyawad na ing kaburian na king metung a pasubali: “Nung buri yu Guinu…”. King bandang tauli, ing kaburian na pa mu rin ning Guinu, iyang isipan na.

Itamu marakal tamu pigagap king bie. Marakal tamu buring anyaran king Guinu. Neng kai, buri ta nang ipilit king Guinu nanu itang buri tamung malyari kekatamu. Tanda ne ini ning kakulangan tamu king pamagtiwala king ibpa. Nung magtiwala tamu king ibpa, agyang makarate tana malapit nang mate, mitahimik ta pa mu rin king pilubluban tamu, uling balu tamu king agyang ing pangamate tamu, agyang malungkut man, atin yang ibungang kayapan para kekatamu. Ing ibpa mayap ya, inya, nung mebiasa ta nang penibala keya ing sabla, buri na sabian, mebiasa ta neng peniwalan ing lugud at lunus na ning ibpa kekatamu. Balu tamu king e na ka tamu buring mibili king e masanting a kabilianan ning ibpa tamu. Inya, sabian ta king sarili tamu: “ matupad Guinu, ing kekang kaburian king kakung bie…Amen. Ipanibala ku na pu kekayu ing mabilug kung pamibiebie…Amen. ”

V. Pamanahimik

VI. Tauling Panalangin

Ibpa, balu yu ing pamangailangan mi. At maniwala kami king bibie yu kekami ing nanu mang makakayap kekami. Patawaran yu ke pu uling king kakulangan mi king pamagtiwala king kekong kayapan. Patawaran yu ke pu potang pagpilitan ming pagawa mi kekayu ing kaburian mi, reng sarili ming planu, reng sarili ming pigagap. Malugud kayu kekami Guinu, at alang nanu man a e makakayap kekami ing buri yung malyari king pamibiebie mi. Panatilian yong panatag a lub ring pusu mi agyang atiu ke king busal ning kasakitan. Balu mi king agyang atiu kami libutad niti, ing makakayap pa mu rin iyang pagnasan yung ibie kekami. Salamat Guinu king kekong lugud. Saupan yu kami king kakulangan mi lalu na neng e mila balung ipanibala kekayu reng mabilug ming pamibiebie. Salamat Guinu. Salamat. Amen.

VII. Kutang

1. Nanu la mo reng pagpilitan kung anyaran king Guinu? Agyu ku kayang asabi king Guinu king iya nang bala nung buri nong ibie reni o ali?
Download here:

Sunday, February 8, 2009

Kalimang Dominggu ning Ordinaryung Panaun

Pepakayap na lang Jesus ding Dakal a Tau


I. Pamuklat a Panalangin

Ibpa, ing kekong anak a I Jesus tiruanan na keng mangadi. Balu na nung makananu ka-importante ing mangadi. Inya agyang iya, menintun ya naman oras ban mangadi ya kekayu king tahimik a lugal. Agyang marakal ya pa dapat gawan, menintun yang panaun ban akasabi na kayu king pangadi. Saupan yu keng mangadi Guinu. Lumalam sana ing kabanalan mi kapamilatan ning pangadi. Salamat Guinu. Salamat. Amen

II. Pamamasa

Marcos 1:29-39

29 Kanita mu rin meko ya king sinagoga I Jesus at ding alagad na at tinaglus la king bale da ri Simon at Andres. Kayabe da la ri Simon at Andres. Kayabe da la ri Santiago at Juan. 30 Makarate ya kanita ing babaing katuangan nang Simon uli na ning matas ya lagnat, at sinabi reng agad kang Jesus. 31 Lepitan neng Jesus; telanan ne gamat at seupan neng tinalakad. At likuan ne ning lagnat ing matuang babai migsilbi ya karela.
32 Inyang silim-silim na, limbug ne ing aldo, dela da la ring tau kang Jesus ding sablang masakit at ding alipnan da ring demonyu. 33 Mitipun la ding sablang memalen king tulid na ning pasbul ning bale. 34 Pepakayap na la ding dakal a taung masakit a maki miyayaliwang kapanamdaman. Penabi na la naman ding dakal a demonyu at e na la pepaburen migsalita uling balu ra nung ninu i Jesus.
35 Ganingaldo pa mibangun ne i Jesus. Minta ya king metung a lugal a tahimik lual ning balen at karin ya menalangin. 36 Penintun neng Simon at ding kayabe na; 37 ngara inyang ikit de, ”Panintunan da kayu ding sabla.”
38 Oneng nganang Jesus karela, ”Kailangan tamung munta karing aliwang balen ba kung makapanaral munaman karin uling iti ya ing sangkan nung inya meko ku Capernaum.” d
39 Inya linibut ya king mabilug a Galilea; manaral ya karing karelang sinagoga at panabi na la ding demonyu.

III. Turu

Deng saken a dadalan marakal la. Ating saken a mangasanting, ating saken a e masyadung masanting. Ating saken a bayu, ating luma. At siyempre, inya mamandar ya ing saken uling ating driver a magpa-andar kaniti. Ating driver a biasang mag-drive, ating ali. Pero ing saken, agyang nanu ya pa kasanting o katsura, o agyang nanu ya pa kagaling ing driver, e ya mandar nung ala yang gasolina. Mengari mu naman kareng cellphones tamu. Agyang nanu ya pang modelu, ke bayu ya o luma, nung e ya maka-charge ing bateria na, e me agamit ing cellphone. Ing ballpen, agyang nanu ya pa ka kamal, nung ala nya ring tinta, ala ya mu ring silbi.

Ing ebanghelyu tamu ngening domingu tungkul ya kang Jesus a asna karakal uluan a tau. Marakal la reng pepaulu kang Jesus. Magumpisa king babaing katuangan nang Pedru a makarate uli na ning matas a lagnat na. Kaybat, marakal la pa reng miyayaliwang masakit a dela da kang Jesus. Sasabian ning ebanghelyo king menulu ya I Jesus angga pa inyang silim-silim na. Siguru bengi na inyang mayari yang menulu I Jesus. Mapagal ne siguru inyang meyari yang menulu. Makanyan man, agyang as ne kapagal I Jesus inyang mayari yang manulu, migising yang maranun. “ Ganingaldo pa,” ngana ning ebanghelyo, “ inyang mibangun ne I Jesus.” At nukarin ya minta I Jesus? Minta ya king metung a lugal a tahimik, lual ning balen at karin ya menalangin.

Keni akakit tamu king agyang ing Guinu tamung Jesus, kailangan nang manalangin, kailangan nang mangadi. Balu na marakal ya pa dapat gawan. Marakal ya pa dapat uluan. Nganapin ning ebanghelyo, panintunan de ring tau, uling marakal la pa reng bisang paulu keya. Oneng, ikit tamu king i Jesus, minta ya king metung a lugal a tahimik ban mangadi ya.

As ne kaulaga ing pangadi kekatamu. Kalupa ne mo ning metung a saken, agyang nu ya pa kasanting o modelu ing metung a saken, nung ala yang gas, e ya mandar. Reng cellphone tamu,agyang nu la pa ka modelo ampon kasanting, e la malyaring gamitan nung e la maka-charge bateria. Makanyan mu naman king pamibiebie tamu. Nung e tamu mangadi, e tamu misadsad king bie kabanalan a panagkat ning ebanghelyo. Agyang nu pa anti ing kayapan a gagawan tamu king bie, nung e ta naman mangadi, mumuli mu king ala ini. Ing pangadi yang sibul ning tutung kabanalan, iyang pagmulan ning tutung kayapan a daraptan tamu. Kalupa nang Jesus, itamu man sana, neng as na ka tamu karakal a gagawan a king palage tamu as na ka-importanti ngan, manintun tamu sanang panaun ampon lugal a nung nukarin tamu makapanahimik ban makapangadi king ibpa tamu a atiu banwa. Nung tutung as na ka tamu ka busy king bie tamu, kalupa nang Jesus, manintun tamung panaun. Nung ala tamung panaun, gawa tamung panaun, ba kanita makapangadi tamu.

Ing pamanalangin iyang pekamabilis a paralan ban aranasan ta ya ing Guinu, ing presensya na king bie tamu. Potang mangadi tamu, balu tamu ating makiramdam. Ing Dios makiramdam ya. Alang pangadi a e na daramdaman. Kapamilatan ning pangadi, lalu ta yang aintindian ing relasyun tamu king ibpa, king iya ing panaligan at pagtiwalan tamu kareng egana-ganang gagawan tamu king bie. King ibpa ta la papailalam reng kapagnasan tamu, at ing mabilug tamung pamibiebie uling balu tamu, kaluguran na ka tamu at e na ka tamu paburen kapilanman. Potang didinan tamu ing sarili tamung panaun ban mangadi, mika katahimik ampon katatagan ing kekatamung pamibiebie uli na pin mabibiasa tamung manalig king metung a ibpa a balu tamung migaganaka kekatamu king kekatamung kabilian king bie. At pauli na mu rin ning pangadi, mikaka sikanan tamu, kalupa nang Jesus, ban isundu ampon isadsad ta ya ing misyun a bibie na ning ibpa kekatamu king bie.

Reng taung e mangadi, e re asasadsad ing misyun a bibie ning Guinu. Mamagkasakit la king bie uling e la mididinan direksyun, lalu na potang masakit na ing kabilianan king bie. E la mikakatahimikan. Magugulu la isip, uling ala lang maging santungan kareng kabayatnan da king bie. At ala lang sikanan ban daptan da ing nanu mang kayapan a dapat dang gawan. Marakal tamu gagawan king bie. Pero atin ta pa kayang panaun ban aitas ta ya ing isip tamu king Guinu?

Tandanan ta ya ing saken a alang gasolina. Ing cellphone a e maka- charge bateria. Makanyan ing malyari kekatamu potang e ta manintun panaun ban mangadi. E tamu mandar. E tamu magsilbi.

V. Pamigunam

Obat itamu mo, mangadi tamu mu potang atin tamung kailangan ? E kaya malyaring mangadi agyang ala tamung kailangan ? Potang mikaka-problema tamu, obat mo kanita ta pamu manalangin king mayap a Guinu tamu? Obat mo anggang e tamu maka danas kasakitan, e tamu mangadi king Guinu?

Sana, ilako tamu king isip tamu king apakisabian ta ya ing Guinu king pangadi nung atin tamung problema mu. Ke atin tamung problema o ala, malyari ta yang pakisabian ing Guinu. Neng minsan, agyang manahimik tamu mu saguli at sindian ta ya ing kandila, at ipyak ta la reng mata tamu ban panandaman ta ya ing keyang presensya, ustu na ita ban panandaman ta ya ing buri na sabian ning pangadi. Potang magumpisa ne ing aldo, malyari kung siklaud agyang king mapilan mung minutu, at karin, purian at pasalamatan ke ing Guinu king milabas a aldo, at malyari kung idaun keya ngan ing egana-ganang gawan ku king patingapun. Potang bayu ku mangan, i-bless ke pa ing pamangan ban pasalamatan ke pa ing Guinu kareng grasyang bibie na kanaku. At potang bayu ku matudtud, pasibayu kung siklaud ban pasalamatan ke ing Guuinu kareng grasyang binie na. Panalangin ku king e no sa papaburen reng pamilya ku at iligtas na kami king nanu mang e mayap.

King makaniting paralan, potang king balang okasyun, manahimik ku ampon manalangin king ibpang malugud, misasane ku king metung a bieng mapanalangin. Pauli na niti, mas panandaman ke ing presensya ning Guinu a atiu kanaku. Mipapanatag ya ing bie ku, at palakasan na ku ning Guinu king nanu mang kabayatnan a datang king bie ku. Mikaka saya ku king pusu ku. Ing sayang ini, e ke akwa king nanu mang pera o bage, pero balu ku panandaman ku ing saya a ini a ing Dios mu ing makaibie.

Inya, kalupa nang Jesus, mantun tamung panaun ban mangadi. E ta sana sasabian king sarili tamu king masyadu tamung marakal a gagawan at ala ta nang oras mangadi man. Kailangan ta ya ing panalangin. E ta ya sana lilele ining tiru ning Guinu kekatamu. Amen.

V. Pamanahimik

VI. Tauling Panalangin

Ibpa, turu yu ke pung mangadi. Marakal ke pu kasangkanan obat malagad kami mu pung mangadi. Neng pung atin keng problema, kanita da kayu pu atatandanan, inya maralas, mimina kami lub potang ating daratang a kapagsubukan king bie mi. Turuanan yu ke pung mangadi at manatili king kekong presensya king balang oras ning kekaming bie. Patawaran yu ke pu uling maralas, akakalinguan ming mangadi, akakalinguan ming magpasalamat kareng grasyang e yu pigkaimut kekami. Salamat pu Guinu king kekong pamanantabe kekami. Antabayanan yu ke pa sana, ngeni at kapilanman. Amen.

VII. Kutang

1. Makananu ku kadalas mangadi king patingapun?

Download here:

http://www.mediafire.com/file/yy0lywmojiz/02.08.09Kalimang Dominggu ning Ordinaryung Panaun.doc

Sunday, February 1, 2009

Kapat a Dominggu ning Ordinaryung Panaun


Ing Lalaking Ating Espiritung Marawak


I. Pamuklat a Panalangin
Ibpa, pepakilala ye kekami I Jesus bilang metung a talapagsalita yung mitmung kayupayan. Karing amanu na at dapat na, ikit mi ya ing upaya yu. Ing anak yu ing tinubud yu ban ituru na kekami ing mayap a dalan papunta kekayu. Ilako na pu sana ing nanu mang bage a maka-alipan kekami. Leko no kabayatnan reng ma-aalipan kareng marawak a espiritu, ilako na naman sana reng bageng maging kabayatnan king pamibiebie mi. Maniwala at magtiwala kami pu kekayu. Mabiasa mi la pu sanang pailalam reng kekaming pamibiebie king kekong mayupayang anak. Salamat pu Guinu. Salamat. Amen.


II. Pamamasa


Marcos 1:21-28

21 Minta la Capernaum , at kabukasan, Aldo ning Sabbath kanita, linub ya I Jesus king sinanoga at tinuru ya karin. 22 Pigmulalan de ring tau, uling tinuru ya karelang mitmung kayupayan; e re kalupa ding talaturu ning Kautusan.
23 Kabud-abud linub ya king sinagoga ing metung a lalaking alipnan na ning marawak a espiritu; kukulisak ya. Ngana, 24 “Nanung pakialam mu kekami, Jesus ning Nazaret? Minta ka keti ba mu kaming gisanan? Balu ku nung ninu ika: ika ing Banal a menibatan king Dios!”
25 Oneng sebianan neng Jesus ing marawak a espiritu. Ngana,”Tahimik ka!Lual ka keya!”
26 Pepagalgalan ne ning marawak a espiritu ing tau at kukulisak yang linual keya. 27 Mengapamulala la ding sabla, inya ngarang mipapangutang, “ Nanu iti? Ngeni ta pa dimdam yan! Agyu na lang utusan Jesus pati na ding marawak a espiritu – at mamintu na la man!”
28 At mabilis mikalat king mabilug a Galilea ing balita tungkul kang Jesus.

III. Turu



Inyang magumpisa ne I Jesus manaral king Galilea, e re pa masyadung kilala. Malambat a panaun, e ya migsalita king publiku, e ya linibutad agyang karing miyayaliwang aktibidades da king komunidad. Balu da king anak de ri Maria ampon I Jose a kilala dang metung a karpinteru. Inyang milabas a domingu, ikit ta ya, megumpisa neng menaral king Galilea at sasabian na karing tau, king malapit ne ing kayarian ning Dios at king kailangan nong magsisi reng tau kareng kasalanan da.

Ing ebanghelyu tamu ngeni, katuglung ne ning ebanghelyu inyang milabasan a domingu. Papakilala ne pang San Marko king ebanghelyu na nung ninu I Jesus. Marakal la pa reng e makakilala keya inya, ditak ditak papakilala ne nung ninu ing tutung Jesus. Inya e tamu magtaka obat inyang magsalita ya I Jesus king metung a sinagoga king aldo ning Sabat, mengapamulala la reng taung mekiramdam keya uling kanung tinuru ya karelang mitmung kayupayan; e re kalupa ding talaturu ning kautusan. Keni pamu, ikit de I Jesus anti mong metung a propeta, a aliwa kareng balu dang talaturu.

Oneng ing pekasentru ning ebanghelyu ngeni ya ing pangalako ning metung marawak a espiritu king katawan ning metung a tau. Ing makapagtaka, reng mismung marawak a espiritu ilang magsalita kareng tau nung ninu I Jesus. “Balu ku”, ngana ning marawak a espiritu, “nung ninu ika: ika ing banal a menibatan king Dios!” Reng marawak a espiritu ila pang mas makakilala kang Jesus. Balu da king iya, menibatan ya king Dios!

Inya ring tau, uling e la saneng manakit king kaniting bage, mengapamulala na lamu at sinabi ra:”Nanu iti? Ngeni ta pa dimdam yan! Agyu na lang utusan Jesus pati na ding marawak a espiritu – at mamintu na la man!

Metung ya ing tutuldu ning ebanghelyo kekatamu: I Jesus menibatan ya king Dios. Anak ne ning Dios. Mitmu yang kahyupayan I Jesus, e mu king pamanyalita na, nune king dapat na mu rin. E ya kabud propeta a biasang magsalita tungkul king Dios, nune, iya mismu, makagawa yang dapat a magpatutu king iya menibatan ya king Dios, at ating yang upaya kalupa ning Dios!

Agkatan na ka tamu ning ebanghelyo ban migunam king pangatau ning Guinu. Ing Guinu, mayupaya ya e mu king amanu, nune king dapat mu naman. Alang e malyari keya. Agyang reng marawak a espiritu, mamintu la keya. Inya nung tutu ta yang kilala i Jesus, karapat dapat mu king keya mibili ing mabilug tamung kasalpantayanan, ing mabilug tamung pamagtiwala ampon ing kapamintuan a bibie tamu king Dios. Buri ning ebanghelyo king iyagkas ta yang pasibayu king sarili tamu ing kapaniwalan tamu tungkul kang Jesus, king iya anak ne ning Dios, king iya tutu yang mayupaya at alang nanu man, agyang reng egana-ganang karawakan keti king yatu ing magtagumpe laban keya.

Ing kapaniwalan tamu dapat kang Jesus magbunga yang metung a pamibiebie a panatag. Ing bie tamung mitmung tiwala king Guinu dapat mamunga yang metung a pamibiebieng ating kapanatagan uling makapailalam ya ini king metung a Guinu a tutung mayupaya agyang king nanu mang karawakan king yatu. Alang kasakitan, alang dalumdum, alang kasalanan, alang nanu mang problema ing mas migit pa king upaya ning Guinu. Nung makapailalam tamu kareni, at ma-aalipanan kareni, manalig tamu mu king Guinu, at ipakit ta la rening kabayatnan tamu keya, ban ing Guinu na mismu iyang mutus karening kabayatnan a reni a mako at mabating karing bie tamu. Magpailalam tamu king upaya at lugud ning mapakumbabang Jesus a iyang liligtas kekatamu lalu na potang atiu ta king oras ning kagipitan. Amen.

V. Pamigunam

Kilala ku ne kaya I Jesus? Ninu iya para kanaku? Nanu ing agyu nang gawan king bie ku? Reng kutang a reni lalu lang makalitu king kekatamung kasalpantayanan nung e ta ya kilala I Jesus. Tuturu na ning ebanghelyo tamu ngeni king I Jesus metung yang talapagsalita a mitmung kayupayan kareng amanu na. Metung yang propeta a sasabi karing amanu na ning Guinu. Paniwalan ta naman kaya ing sasabian na? Nung iya ing magsalita karing kaburian na ning Ibpa, pakiramdaman ta naman kaya ing sasabian na kekatamu? O pota angga ta na mung pupuri king keyang kayupayan? Manintun ku kayang panaun king sarili ku ban pigunaman ko reng amanu nang Jesus? Pabusten ke kayang magsalita king pusu ku ing Guinu a bisa mu namang makipagsalita kanako? At nung pabusten keng magsalita ing Guinu king pusu ku, lalu ke kayang akikilala ining Guinung ausan kung Jesus. Lalu ke kayang buring tukyan? Lalu ke kayang tatanggapan king pamibiebie ku? Lalu ke kayang paniwalan king atiu yang atiu king bie ku?

Guinung Jesus, ika ing talapagsalita ning Ibpa a mitmung kayupayan, magsalita ka king pusu ku ban mi-ukit la king isip at kaladua ku reng amanu mung makakayap king kakung bie.

At ngening balu ku king I Jesus atin yang upaya kareng marawak a espiritu, paniwalan ku kaya king alang nanu mang dewakan ing mimigit keya? Nung mamintu la agyang reng marok a espiritu keya, atin kaya pang aliwang e mayap king bie ko a migit pa keya? Balu nong kontrolan reng karokan, nanu pa kayang karokan ing malyari kung katakutan king bie ko? Atin pa kayang e makapailalam king upaya nang Jesus? Ala na. Ing egana-gana keti king yatu maka-pailalam keya. Inya nung makapailalam na ing sabla king bitis na, nanu pa kaya ing kanakung katakutan nung atiu ngan king keyang upaya ing sabla? Buri na ning Guinu ing nanu mang mayap kanaku. Ing nanu mang e makakayap, lalako na king bie ku. Nung ma-aalipanan ku man king nanung bage keti yatu, buri neng ilako ning Guinu ing kanakung panga-alipan king nanu mang e mayap – ke kasalanan ya ini, ke kabayatnan, ke kasakitan, ke kakaluluan, ke nanu ya pa ta, atiu king upaya ning Guinu king milako la reti king kanakung bie. Inya nung makaniti ya kayupaya ing Guinu, ot e ku mo ibie keya ing mabilug kung kapaniwalan ampon tiwala? Balu ku, nung binie ku ne ing mabilug kung kapaniwalan at kapanaligan, midinan kung katatagan king bie. Alang nanu man ing makatomba kening katatagan ku, uling alang nanu mang e mayap ing magtagumpe king Guinu. Nung pepa-ilalam na ku keya, at sinuku ku na king Guinu ing mabilug kung pamibiebie, alang nanu man ing kanakung katakutan uling e na pabusten ning Guinu king mipailalam ku king dewakan o nanu mang e maka-kayap king bie ku.

Ika, Guinung Jesus ing mayupayang tutu. Papailalam ku na kekayu ing bie ku ban mipanatag ku bie. Uling balu ku, e yu pabusten king ing bie ku, mipailalam ya king nanu mang marok o e mayap. Keka ing mabilug kung kapaniwalan at pamagtiwala. Amen.

V. Pamanahimik

VI. Tauling Panalangin

Ibpa, binie ye kekami I Jesus bilang metung a talapagsalita yung mitmung upaya. Ibuklat yo ring pusu mi ban makiramdam king keyang amanu a mitmung upaya. Miras sana ing upaya da reng amanu na kareng pamibiebie mi. Magbayu ke pu sana pamibiebie potang damdaman mi la reng amanu na ning Guinu ming Jesus. I Jesus iyang mayupayang tutu. Agyang reng marawak a espiritu, pamintuan de. Mabiasa ke pu sanang magpa-ilalam keya ban lukuban na kami at panyanggalang na kami king nanu mang karokan. Ilako na pu sana ing nanu mang espiritu ing manalipan kekami ban milako na pu ing nanu mang pabayat a bibitbitan mi king bie. Kekayu Jesus papailalam kami. King kekong upaya manalig kami. Amen.

VII. Kutang


1. Pepailalam ku ne kaya ing pamibiebie ku king upaya nang Jesus? Nanu pa kaya ing dapat na pang ilakong pabayat king bie ko?


Download here:


 
Powered by Blogger.