Kapiestan ning Banal a Pamilya

Ing Pamamunta da Ehipto di Jesus, Maria at Jose

I. Pamuklat a Panalangin

O Dios a Ibpa mi, binye me king Anak mung y Jesu-Kristo ing pali na’t kapanatagan ning metung a pamilya kambe na ning Indung Maria at San Jose karin Nazareth. Bustan mung ing Anak mu makirake ya naman king bie ring sabla ming pamilyang Kristiyana at gawan de ing kekang Iglesya metung a kapimisanan as nung nu ke mabyasang tanggap at sumaup king metung at metung anting galame na ning metung a pamilya. Iti ngan pu adwan at pasalamatan mi king lagyu nang Kristong Ginu mi. Amen.


II. Pamamasa

Mateo 2:13-15, 19-23

13Kalako ra ding Mangabyasa, pepakit ya ing anghel ning Ginu kang Jose king kapamilatan na ning paninap. Ngana, “Mibangun ka, idala me ing Anak ampon i ima na at munta kayu Ehipto. E kayu mamako karin anggang e ku sabian, uling papaintun neng Herodes ing Anak ba neg ipapate.” 14Mibangun ya i Jose, at kanita mu ring benging ita, dela na la ding mi ima at minta la king Ehipto. 15Menatili la karin angga king mete ya i Herodes. Makanyan metupad ing amanung sinabi na ning Ginu king kapamilatan ning propeta, “Inaus keng lumwal ibat Ehipto ing kanakung Anak.” 19Inyang mete ne i Herodes, pepakit ya ing angel ning Ginu kang Jose karin Ehipto king kapamilatan ning paninap. 20“Mibangun ka,” ngana, “iyuli mu na la king bansa ning Israel ding mi-ima, uling mete na la ngan detang bisang makamate king anak.” 21Mibangun ya i Jose at tiki na la ding mi-ima; migbalik la king Israel. 22Oneng inyang abalitan nang Jose king i Arkelao ya ing menalili kang Herodes a tata na bilang ari ning Judea, mitakutan yang taglus karin. Pasibayu yang tinanggap amanu king kapamilatan ning paninap; inya king sakup ning Galilea karin ya migbanda. 23Karin na la tiknang ding mi-ima, king metung a balen a mayayaus Nazaret. King anti kaniting paralan karin metupad ing amanung mesabi king kapamilatan da ring propeta. ”Meyaus yang Nazareno.”


III. Turu

Pagmasusyan taya ngeni ing Kapiyestan ning Sagrada Pamilya na nung nukarin didinan neng maragul importansya ning mabilug a Santa Iglesia Katolika. Iti ya ing oras ning pamamie parangal ning pisamban kareng pengari, pauli ning pamikakalugud ra at king masanting dang pamiparagul kareng karelang anak. Paniwalan ning pisamban na nung e masalese o alang lugud at respeto king kilub ning pamilya makanyan murin e maging masalese o e maging mayap ing komunidad, At patsa e meging masalese ing komunidad e ya naman masalese ing bansa. Nya mag-umpisa ngan king pamilya ing nanumang bage masanting king keka tamung kapaligiran.

Reng gaganap king mebasang ebanghelyu ila pin ding Sagrada Pamilya, I San Jose, Indung Maria at ing Anak, I Jesus. LInikas nong San Jose reng mi-inda pauli ning babala ning angel ning Ginu kapamilatan ning paninap. At patsa dimdam taya ing amanung paninanap, agad tayang agaganaka ing mapaninap mu namang I Jose king Matuang Tipan. I Jose king Matuang Tipan iyang inaus ning Dios ban iligtas no ring kayang balayan king danup ampo ning kasakitan. Pero e milyari ining misyon nang ayni king maligwang paralan, dakal ya pamu delanan kasakitan o kapagsubukan king bie; mipisali ya, meging utusan ya at ikwa na pang mekulung

Makanyan murin kang San Jose ning Bayung Tipan na meyaus king Dios kapamilatan na naman ning paninap. Dakal ya naman kapagsubukan a delanan bayu meging matagumpe ing kayang misyun; pigsisti re reng kayang kabalen uling ing babaing pakasalan na mabuktut ne kaagad, mesakit ya lub at ena lubus a isip ot agawa ng Maria kaya na pigtaksilan ne, uling e na balu nyang mumuna na milamnan ya ing Indung Maria kapamilatan ning upaya ning Banal a Espiritu. Ngeni ikit ta king ebanghelyu nung makananu yang memintu king Dios ban nong isalba kareng bisang makamate kareng mi-indu.

I Jose ning Matuang Tipan, at I San Jose ning Bayung Tipan ila ring sasalamin kareng keka tamung pengaring lalaki na alang patugut maninap o mangarap ban dinan lang masanting a pamibie-bie ring karelang pamilya. Maragul a misyun ing makayatang king metung a pengari lalu na king metung a tatang. Ing tatang na malagad mung magsalita pero dakal ing dapat. Ing tatang na e parating mimwa pero patsa iya ing apamwa salikut na ka ikang anak. Ing tatang na agyang ala neng kaya basta atin ya sana ing kayang pamilya.

Kaluguran a kapatad dinan talang parangal king pusu tamu reng keka tamung pengari. Igulisak tamu na pagmaragul tala, uman tala tanda ning pamipasalamat ta karela, paramdam tamu ing lugud at pakamal ta karela kabang maybe lapa. Uling potang ala nala king yatung iti, e tana agawa pang kawlan at pagsilbyan tala. Amen.


IV. Pamigunam

Ngening lakwan tane ing banwang 2010 at munta tana king banwang 2011. Nanu la kaya reng paninap o pangarap tamu king daratang a banwa. Makasiguradu mayap ngan ing buri tang malyari king bie tamu. Buri ta ngan ing masensu ta ngan pamibie-bie. Siguru alus ing pangarap o paninapan tamu yapin ing bage materyal. E marok ing paninapan o ing pangarap tang iti, uling buri na ning Dios Ibpa ing mipakayap tamu ngan. Ing buri namung payabut keka tamu ning Apung Ginu ngening kaorasan ing nanu man sanang paninap o pangarapan tamu makaayun sana king paninap ning kayang Anak, I Jesus. Uling ing sabla ng paninap o pangarap Jesus keka tamu siguradung mayap ngan. Pabustan tamung mas dinan talang mas maragul a pansin reng paninap o pangarap ning Dios para keka tamu. Uling agya pang nang gwan tamu reng pangarap o paninap na para keka tamu ila pa muring mapalyari. Anya king banwang daratang, pangadi tamu king Apung Ginu na sopan na katamu kareng paninap ta king biie. Maging mipnu ta sana king grasya king banwang paratang kalupa ning Sagrada Pamilya. Amen.

V. Pamanahimik

VI. Tauling Panalangin

O Dios a Ibpa mi, babye mi keka ing sablang kapuryan king pamamili mu king metung a maka-taung pamilya para king kekang Anak. Kapamilatan ning alimbawa ri Maria at Jose, mabyasa kami mu naman sanang maninap at mangarap para kareng aliwa at ali mu king sarili mi. Antabayanan at bendisyunan yu ke pu king daratang a banwa. Amen.

VII. Kutang

1. Para keka ot meyaus lamong Sagrada Pamilya ri San Jose, Indung Maria at ing Anak, I Jesus? Paliwanag.
2. Nanu ing e mu akalingwan a mayap a amanung sinabi ra keka reng kekang pengari?
3. Nanu la reng dapat a mayap na emu akalingwan king bie mu na gewa ra keka reng pengari mu?
4. Nanu la reng paninanap mu o pangarap king paratang a banwa?
5. Kaybat na ning pamipulung tang ayni, nanu ing masanting tang gawan para apakit ing lugud ta kareng pengari tamu?

Download here:

Page 1: http://www.mediafire.com/file/u80bbil5bqy5bz3/12.26.10%20pg.%201.doc

Page 2: http://www.mediafire.com/file/s535ynie94ca0oo/12.26.10%20pg.%202.doc

Kapat a Domingo ning Adbiyento

Ing Pangabait nang Jesus

I. Pamuklat a Panalangin

Ibpa ming malugud impung kapanyamban, kapuryan at kapasalamatan Keka ngeni at king kapilan paman. Ngeni pung kaorasan, pabustan yu pung abalu at panamdaman mi parati ing kekang presensya. Paniwalan mi na partati kang atyu ka king siping mi. Amen.

II. Pamamasa

Mateo 1:18-24

18Anti kaniti ing pangabayit nang Jesu-Cristo: I Mariang ima na at i Jose atin lang pamitangwanan kasal. Bayu ra ikuang mikasal, meyakit king i Maria mebuktut ne. (Iti milyari king upaya ning Banal a Espiritu.) 19I Jose a maging asawa na metung yang banal a tau. E ne buring misalbag a marine i Maria, inya binalak nang kawanian na nia mung lihim. 20Kabang isipan na ing makanyan, pepakit ya king paninap ing metung a anghel ning Ginu. Ngana, “Jose a lahi nang David, e ka tatakut balausnan pakasalan i Maria, uling ing kagli na milyari ya king kapamilatan na ning upaya ning Banal a Espiritu. 21Ibait ne ing metung a anak a lalaki, at ausan meng Jesus uling ya ing magligtas king balen na king pamikasala na.” 22Milyari iting sabla ban matupad ing sinabi na ning Ginu king kapamilatan na ning propeta: 23“Kumagli ya ing metung a dalagang birhen at ibait ne ing metung a anak a lalaki, at mayaus yang Immanuel” (ngana wari, “Ing Dios kayabe taya.”) 24Inyang migising ya i Jose, tiparan na ing inutus na ning anghel ning Ginu: pekasalan ne i Maria.


III. Turu

Itamung tau ngening kasalukuyan asna katamu ka dependi king “advance technology”. Aldo-aldo, pakikwanan na ning tau na atin yang atin adiskubri. Gagawan na ning tau ini ban yang mika masanting at mayan a bie. Reng pengari pin king Japan , papagaral do reng anak ra kareng iskwelang kabang atyu la karin akakit dala kareng cellphone ra nung nanu ing gagawan da reng anak ra. Pagaral do reng anak ra karening klasing iskwelang areni ban lang makasiguradu na parati lang atyu king mayap a sitwasyun reng karelang anak.

Pagmasusyan taya pu ngeni ing kapat nang Domingo ning Adbiyentu na nung nukarin didinan na katamung mayap a pamikatagun na suryan reng sarili tamu nung kaninu ta maralas magtiwala, kareng amanuan tang “advance technology” o king Apung Ginu na atyu parati king siping tamu ban lumingap o dumame keka tamu. Akakalingwan taya ing propesiya ng propeta Isaiah 7:14: “Ing metung a birhen a babai ibait ne ing metung a anak a lalaki at pamalagwan neng Immanuel.” Na ing buri ng sabyan ning Immanuel, “Ing Dios atyu king busal tamu.”

King kasalukuyan mas maralas taya pang pagtiwalan ing “advance technology” o materyal a bage at tatauli tanya mu ing Apung Ginu. Metung a alimbawa kaniti neng atin biglang sakit kareng pamilya tamu, uli mong atin tang kilalang doktor o

kaya atin tang dakal a pera ilang mumuna tamung aiisip at maralas pota ng ala yang agawa ing doctor o reng pera tamu karin tanya aganaka ing Apung Ginu at karin tana mu pasaklolu.

Dakal pa kareng kapatad tamu na ing sablang isip ra ing Apung Ginu asne karayu. Uling dakal pa kareng kapatad tamu na ing paburitu rang kakanta yapin ing “From a Distance” na ing tema ning kanta yapin ing Dios atyu yang maka distansyang makalawe kareng e gana-ganang gagawan tamu. From a distance na ing buri ng sabyan midyu makarayu yang bagya, o kaya atin pilatan. At king kamatutwanan ditak la kekatamu reng mika paboritu king kantang “Yahweh, You are Near” na ing buri ng sabyan atyu parati ing Apung Ginu king siping tamu, tandanan tamu e mu makalawe kekatamu nune kayantabe taya pa kareng e gana-gana tang daralanan a kapagsubukan. Ing kutang kaluguran kung kapatad, nanu ya ngeni ing paburitu mung kanta? From a Distance o ing Yahweh, I Know You are Near. Amen.


IV. Pamigunam

King mitmung kababan lub, suryan tala ngeni reng pusu tamu. Kutnan miamas-amas ing sarili tamu tungkul king bie tamung kasalpantayanan. Paniwalan tamu ba na ing Apung Ginu atyu king siping tamo? Ban lalu tayang panamdaman ing presensya na ikanta taya ing paboritu tang kanta.

Refrain: Yahweh I know you are near
Standing always at my side
You guard me from the foe
And You lead me in ways everlasting

1. Lord You have searched my heart and You know when I sit and when I stand
Your hand is upon me protecting me from death
Keeping me from harm (Refrain)

2. Where I can run from your love? If I climb to the heavens You are there
If I fly to the sunrise or sail beyond the sea
Still I’d find You there (Refrain)

3. You are my heart and its ways
You who formed me before I was born
In the secret of darkness before I saw the sun
In my mother’s womb (Refrain)

V. Pamanahimik

VI. Tauling Panalangin

Ginu ming Dios na parating atyu king kekaming siping, dakal pung dakal a salamat king kekayung parating pamanantabe. Parati yu kami pung dinan ning kekayung grasya ban apamalita miya ing kekang alang kupas a lugud. Iti ngan pu daraun mi ngan at anyaran king lagyu ning kekang Anak, I Jesus. Amen.


VII. Kutang

1. Nanu ing panamdaman tamu neng balu ta keng sarili na ing Apung Ginu atyu ya king siping tamu?
2. Nung paniwalan tamu na ing Apung Ginu atyu king siping tamu, akokontrol taya ba ing sarili tamo king pamangawang e ustu?
3. Nanu ing masanting ilage kareng kaisipan tamu o apayu ban e ta mangalingwan na ing Dios atyu king siping tamung manakit king e gana-gana tang gagawan?

Download here:

Page 1: http://www.mediafire.com/file/44gszf5ww2fhpov/12.19.10%20pg.%201.doc

Page 2: http://www.mediafire.com/file/rua0pkeghwcpy5a/12.19.10%20pg.%202.doc

Katlung Domingo ning Adbiyento

Ding Tubud nang Juan a Maminyag

I. Pamuklat a Panalangin

O Ginu, Dios dakal pung salamat king binye yu namang oras kekami ban mitipun king lagyu mu. Payintulutan mu pung akit at panandaman mi ing alang kupas a lugud mu kekami. Dinan yu kami pung kamasalan ban ming lubus ming aytindayn reng kekang amanu. Amen.

II. Pamamasa

Mateo 11:2-11

2Inyang atyu king sukulan i Juan a Maminyag, abalitan na ing daraptan nang Cristo. Mitubud yang mapilan karing alagad na at pepapuntan na la kang Jesus. 3Ngarang kinutang kang Jesus, ”Sabian yu na mo kekami nung ikayu itang datang a amanuan nang Juan o kailangan ke pang manayang aliwa?” 4Nganang mekibat Jesus, ”Magbalik na kayu at sabian yu kang Juan ing kekayung daramdaman at akakit: 5manakit la ding bulag, makalakad la ding pile, kakayap la ding leprosuan, makaramdam la ding maklak, susubli lang mie ding mete, at mipanaral ya ing Mayap a Balita karing kalulu. 6Mapalad ya ing taung e magduda kanaku!” 7Kalako da ring alagad nang Juan, migsalita ya i Jesus karing tau tungkul kang Juan. Ngana, ”Kanitang minta kayu kang Juan king disyerto, nanu ing panenayan yung akit? Ing metung a timbung babayuntuk na ning angin? 8Nanu ing liwalan yung alben? Ing metung a taung makaimalan masanting? Ding taung pakaimalan masanting karing palasyu la mu mayayakit! 9Inya sabian yu kanaku, nanu pin ing buri yung akit? Ing metung a propeta? Wa, sasabian ku kekayu, maygit ya pa king metung a propeta ing ikit yu. 10Uling i Juan ya itang sasabian na ning kasulatan: ’Oyan ing tubud ku, ngana ning Dios, itubud keng makapaunan keka ba nang isadia ing dalanan mu.’ 11Sasabian ku kekayu, karing sablang taung linto keti king yatu, ala pang linto lalung marangal kesa kang Juan. Makanyan man, ing pekamababang tau king Kayarian ning Banua maygit ya karangal kesa kang Juan.


III. Turu

King katlu nang Domingo ning Adbiyentu payabut na ning Ginung Dios ing malalam at alang kupas ng lugud karing kalulu at karetang daralan kasakitan. Ikit tamu king Matuang Tipan nung makananu ng pepakit YHWH, ning Ginung Dios ing malasakit at lugud na kareng Israelita. Inaus ne I Moises at pepakit ya kaya kapamilatan ning metung a milalab a tanaman, at minyalita ya ing Ginu kaya ngana “Ikit ku nung makananu lang mipasakitan ding memalen kung Israelita karin Ehipto; Dimdam ku ing saingsing da king gamat da ring babie kasakitan karela at balu ku ing kasakitan a daralanan da. Inya tinipa ku ban iligtas ku la king gamat da ring tau Ehipto at idala ku lang lual Ehipto king gabun a malualas at mataba nung nukarin labis-labis ing kabiayan” Exodo 3:7-8).

Masala tang ikit at abalu king karanasan dareng Israelita, na ing Apung Ginu akakit na ngan ing sablang malilyari, at daramdaman na ngan ing sablang saingsing dareng taung magkasakit. Dios yang ating panamdam at malasakit lalu na kareng taung mayayalapusta o mangadakurak a karapatan. At ing sablang sinabi ning Dios

kang Moises mepalyari ngan, uling ikwa dareng Israelita na miras king lugar nung nukarin labis-labis ing kabiayan.

King ebanghelyu tamu ngeni, masala tang apatutwanan na ing Ginung Dios e ya magbayu kapilan pa man, nyang Matuang Tipan angga na king Bayung Tipan. Papakit na atin ya parating kapanamdaman at malasakit kareng pakakalulu. Anyang abalitan ng Juan Bautista ing daraptan nang Jesus, mitubud yang mapilan kareng kayang alagad ban yang makasiguradu nung iya napin ing kayang panenayan a talapanatbus na tinipa ibat banwa ban iligtas ding pakakalulu. At e ya pin migkamali I Juan Bautista uling kabalik dareng kayang alagad makanini ing karelang daralan a balita, ngara, dimdam at ikit mi: ding bulag manakit lang pasibayu, ding pile makalakad la, ding leproswan kakayap la, ding maklak makaramdam la, ding mete susubli lang mie at ing Mayap a Balita mipanaral kareng kalulu.

Dintang ya ibat banwa ing bugtung ng Anak ning Dios Ibpa keti king yatu ban pasibayu ipakit na ing lugud na kareng pakakalulu, kareng taung alang apanaligan nune ing Apung Ginu. King panaun tamung iti, dakal la pa murin reng magkasakit, deng manamdaman at deng pakakalulu keng kekatamung komunidad. Payabut ta karela na ing Ginung Dios e ya magbayu kapilan pa man, nyang milabas, nganing kasalukuyan at king daratang pang panaun. Akakit na ngan ing sabla, at daramdaman na ngan ing kekatamung saingsing. Paniwalan tala reng kayang amanu, na datang ing panaun na e nakatamu mu idala king lugar na nukarin dakal ing kabiayan nune ganap ing tula at saya. Amen.

IV. Pamigunam

King mitmung kababan lub iduku tala reng buntuk tamu at isara lareng kekatamung mata. Magbalik tamu king bie tang milabas at lawen tamu nung nukarin ing panaun na peramdam na ning Ginu ing lugud at pakamal na kekatamu. Dakal ing kapagsubukan a alampasan tamu, neng kayi pagtakan tamu nung makananu ta iti alampasan. Daratang pa neng kayi bisa tanang sumuku, uling ing panakit tamu bala mu alang pamagbayu keti king kekatamung lipunan. Deng atinan lalu la pang miraragdagan pibandyan at reng pakakalulu lalu la pang mamilipit. At kening penandit na e tana lubus aytindyan iti, metung yamu ing kekatamung panaligan, alang aliwa nune ing tinipa ibat banwa, I Jesus ing Anak ning Dios na iya mismu dinalan ya naman maragul a kapagsubukan at kasakitan. Pero uli na ning kayang misyun mayap at atin lugud menagumpe ya kaniti. Nya itamu mu naman, dagdagan tamu ing kekatamung kapibabatan, tandanan tamu ing sinabi ning Ginung Jesus ngana “ Mapalad ya ing taung alang pamikakunu tungkul kanaku. Amen.

V. Pamanahimik

VI. Tauling Panalangin

Ginung Dios, a parating tapat karing kekang pangaku at kapilan man e magbayu. Dinan yu kepung maragul a kasalpantayanan ban mi pung apanagumpen ing sablang kasakitan keti king yatung iti. Parati ye pung ipagkalub ing kekayung Espiritu ban mapalit ing lua king tula. Amen.


VII. Kutang

1. Nanu lamo reng akakit tapang e ustung panugali keng kekatamung komunidad ?
2. Dakal la pa bang balu tang tau na magmaltrato kareng pakakalulu?
3. Nanu ing agawa tamu kareng taung mimisip na ala neng pag-asa ing kekatamung komunidad para masensu?
4. Keng palage mu buri na bang ning Ginung Jesus ing sumanting la pamibie-bie reng pakakalulu? Bakit?
5. Makananu ta makasaup ban ipayabut ing tune ng lugud at pakamal ning Ginung Jesus kareng pakakalulu?

Download here:
Page 1: http://www.mediafire.com/file/hzdzdmeszgdyf2s/12.12.10%20pg.%201.doc
Page 2: http://www.mediafire.com/file/44gszf5ww2fhpov/12.12.10%20pg.%202.doc

Kadwang Domingo ning Adbiyento

Ing Pamanaral nang Juan a Maminyag

I. Pamuklat a Panalangin

O Dios a mapamakalulu at tapat, magsalita ko pu kareng pusu mi, bustan mung ing Ginu ming Jesu Kristo idala na kekami ing Mayap a Balita ning kekang pamamatawad at tapat a lugud. Bustan mung agyagan na kami ning kekang Banal a Espiritu ban miya naman a iyatad ing balita karing anggang bisang makiramdam. Amen.


II. Pamamasa

Mateo 3:1-12

King panaun a ita, linual ya at menaral I Juan a Maminyag king disyerto karin Judea. 2Nganang menaral: “Sumisi kayu at painggulut karing kasalanan yu, uling malapit ne ing Kayarian ning Banua.” 3I Juan ya ing taung amanuan ning propeta Isaias inyang nganang sinabi, “Ing siwala king disyerto kukulait na: ‘Isadia yu ing dalanan ning Ginu, itulid yu la ding dalan a tuntunan na!’” 4Gewa king buak kamelyu ing imalan a susulud nang Juan at makababat yang gewa king balat animal. Durun at pulut-panilan ing pamangan na. 5Migsaria la kang Juan ding tau Jerusalem at ding sablang tau Judea at ding manuknangan king sakup ning Ilug ning Jordan. 6Sinabi da la ring kasalanan da at bininyag na lang Juan king Ilug ning Jordan. 7Oneng panakit na karing dakal a Pariseo at Saduseo a daratang ban pabinyag, ngana karela, ”Ikong lahing ubingan, ninu ing minutus kekayu ban takasan yu ing daratang a kaparusan? 8Nung tune kayung sisisi karing kasalanan yu, ipakilala yu king pamagbayu yung bie. 9E yu pangangas sasabian king lahi na kayung Abraham. Sasabian ku kekayu, agyang karing batung deni ing Dios makapalto yang tune nang lahing Abraham. 10Ngeni pa makasadia neng dugpa ing palakul karing yamut da ring tanaman a e mikakabungang mayap, makatud ya at miyugse king api. 11Bibinyagan da kayu king danum ban mipakilala king sisisian yu la at painggulutan ding kasalanan yu; oneng ing daratang katuki ku lalu yang bmayupaya kesa kanaku. E ku man karapatdapat mamitbit karing sandalyas na. Binyagan na kayu king Banal a Espiritu at king api. 12Atyu king gamat na ing sabungke na; linisan na ing pidadaran na at tipunan na ing pale king kamalig na, oneng dulukan na ing sepu king aping e matatda kapilan man.”


III. Turu

Nyang milabasan a Dumingu, peyabut na kekatamu ning ebanghelyu na mas dapat tang dinan pansin ing pamagsadya king pamanyatang ning Anak ning Tau, kesa king midinan tang takut king kapupusan ning yatu. Dininan na katamung mayap a oras ning Ginu ban suryan tala reng sarili tamu ban kanita nanu mang oras malyari iti, makasadya tamung marap kaya. Kaybat ning pamanyuri, at ikit nung nanu ing tutung sitwasyun ning relasyun tamu king Apung Ginu, ngening aldo ayti, king kadwa ng Dumingu ning Adbiyentu. Y Juan a Maminyag dinatang ya ban isadya no ring Judio king panyatang ning Talapagligtas, Y Jesu Kristo. Ing mensahi na kanita, at angga man ngeni para kekatamu: Magbayu kong bie, ibuklat yo ring pusu yu king keyang Espiritu.

Kaybat ning pamanyuri ta king relasyun tamu king Apung Ginu, agkatan na katamu ngening mamin kareng kekatamung kakulangan at panyad tala rening tawad kalupa na waring Dimas na kayabe ng mipaku ning Ginu tang Jesu Kristo king kalbaryu, (“Ing parusang tinggap mu kaparehu ne ning keya.Matulid para kekata ing magdusang anti kaniti uli na ning depat tang marawak” Lk. 23:40-41). King pamanamin na kareng kayang agawang kasalanan, itamu ring oras ayta mipakibatan ing kayang kayadwanan king Ginu tang Jesu Kristo, (“Jesus, e mu ku sana kakalingwan potang datang na ka king kekang kayarian!“, at mekibat ya ing Ginu ngana “Ing katutuan sasabian ku keka: ngeni mu rin akayabe da ka king Paraiso” Lk. 23:42-43).


Kaybat ning pamanamin at pamanyawad tang tawad kareng kekatamung kasalanan, ing katuki yapin ing pamaglarin kareti. Ing parati tang kukutang nung makananu, kasi balu tamu masaguli mu ing pamanamin at pamanyawad tawad, ing masakit ing pamanigobra king kapaglarinan. Atlu la reng pweding paralan king kapaglarinan. Ing mumuna yapin ing pamiganaka king amanu na ning Ginung Jesus, “Pusanan me ing kekang krus at tuki ka kanaku” na ing buri ng ipayabut ing kalingwan tamu ing makapamie kuswelu kekatamu nune reng isipan tamu ing ikakayap dareng taung makapadurut kekatamu, antimo reng pamilya at sarili tang komunidad. Metung a alimbawa kaniti yapin ing kekatamung kasalukuyang gobernador na bayu ya paman linub king pulitika, marakal na sinabi kaya na masakit at magulu ing lulub kaniti. Dakal kareng kayang kakaluguran na sinabing misip kang dakal bayu mu luban iyan. Oneng e ne inisip ing kayang sariling kapakanan, nune mas inisip no pa reng mas dakal ng asopan, na mas maragul kesa king metung a parokya.

Ing kadwang paralan yapin ing pamaglarin o pamagbayung paditak-ditak. Asabi taya ini uling asna kasakit king tau ing bigla o mabilis a pamagbayu. Makananu ini? Alimbawa, asna ka kaymut kareng taung mangailangan saup. Ing gawan mu kanita, isane meng paditak-ditak ing sarli king pamamie at akit tamu maging sistema nane ning bie tamu iti. At kabang gagawan tang paditak-ditak iti, anyaran tamu ing saup ning Banal a Espiritu, uling makasiguradu e na buring malyari ini ning kalaban, I Satanas.

At ing katlung paralan king kapaglarinan yapin ing e pamangalingwan king panabilin na king tauling apunan, na bayu ne erapan ning Ginu tang Jesu Kristo ing kamatayan ngana, “Babie ke kekayu ing metung a bayung kautusan: mikakalugud kayu. Nung makananu da kayung liguran, makanyan kayu namang mikakalugud. Abalu da ring sablang tau king alagad da kayu, nung mikakalugud kayu” Lk. 13:34-35. Amen.


IV. Pamigunam

Masakit o imposibli king tau ing pamagbayu, pero nung idaun ta ngan iti king Ginu, makasiguradu tamung pagkalub na iti kekatamu. King Ginu ing imposibli maging posibli, alang duda kaniti. Tandanan tamung iya ngan ing linalang king bage akakit tamu keti king yatu at abe tamu kareni. Tandanan tamung dakal ing grasyang pagkalub na kekatamu ning Ginu king aldo-aldo. Nya nanu ing dapat tang ipakibat king lugud at ganakang ayni, nune ing kekatamu mu namang lugud, kapanyamban at kapasalamatan Kaya.

Nya agkatan na katamung lumapit kaya, ban manyad pakalulu at grasya ning kapatawaran. E tamu mu rin kakalingwan ing pamanyad lakas ning Banal ng Espiritu ban ing keka tamung pamagbayu o pamaglarin kareng kekatamung kasalanan apagtagumpayan ta iti. Ing sablang kapasalamatan at kapuryan Keka o Ginu. Amen.

V. Pamanahimik

VI. Tauling Panalangin

O Dios a Ibpa mi, dakal pung dakal a salamat king babye yung grasya kekami. Parati mi pu sanang aganaka ing keka yung kaburyan. Buri mu pung akamtan mi ing tune saya at tula ning bie at ini akit mi mu Keka. Pabustan yu ke pung parating makiramdam kareng amanu na ning kekang Anak, I Jesus, ing Ginu mi at tagapagligtas. Amen.


VII. Kutang

1. Kapilan tamu aranasan na ing pakalulu o kapatawaran ning Dios alang kupas?
2. Atin ta bang dapat ipanyad tawad kareng mismung kayabe ta king komunidad? Nung atin ngeni na ing pamikatagun para manyad kapagpasensyan kaniti.
3. Nanu la kaya reng pwedi tang adagdag a paralan king pamaglaren kareng kekatamung keynan?

Download here:

Page 1: http://www.mediafire.com/file/55a1twl9k0iizpw/12.05.10%20pg.%201.doc
Page 2: http://www.mediafire.com/file/hzdzdmeszgdyf2s/12.05.10%20pg.%202.doc