Ika-labing-pitung Domingu ning Ordinaryung Panaun

Ing Turu nang Jesus tungkul king Panalangin

I. Pamuklat a Panalangin

Dios ning ganaka at lugud, lubus pu ing tula at saya mi king kaorasan. Sopan yu kepung parating maus keka, antimong metung a anak a mamaus parati king kayang Tatang.. Pabustan mung parati kaming magtiyagang maus keka lalu na kareng pamangailangan dareng dakal at aliwa kareng ditak. Iti ngan pu tatas mi king lagyu ning kekang Anak, I Jesus at king panantabe ning Banal a Espitiu. Amen.

II. Pamamasa

Lucas. 11:1-13

Misan, manalangin ya i Jesus king metung a lugal. Inyang mayari ne, ngana ning metung a alagad, “Ginu, ituru yu kaming manalangin antimo ing depatan nang Juan karing alagad na.” 2Nganang Jesus, “Sabian yu ing anti kaniti neng manalangin kayu: “Ibpa, samban ya ing lagyu mu; dating ne sa ing Kayarian mu. 3Dinan mu keng pamangan aldo-aldo. 4At patawaran mu kami karing kasalanan mi, uling patawaran mi la naman detang mikasala kekami. E mu ke iyarap king mabayat a kapagsubukan.’” 5Ngana pang sinabi karela, “Ipalage tamung ing metung kekayu minta ya king metung a kakaluguran king kapitangan ning bengi at sabian na, ‘Abe, paraman mukung atlung tinape. 6Mipaindalan ya ing metung kung kakaluguran a maglakbe at ala kung ayampang keya!’ 7At ipalage tamung ing pakibat na nitang kekang kakaluguran a atyu king kilub anti kaniti, ‘E mu ku istorbuan! Makakandadu ne ing pasbul at matudtud na kami ding anak ku. E na ku malyaring mibangun ban arinan da ka king pamangailangan mu.’ 8Sasabian ku kekayu, agyamang e ya mibangun uli na ning karelang pamikaluguran, mibangun yamu rin ban ibie ing aduan na ning kakaluguran na uli na ning pamamilit na niti. 9Inya sasabian ku kekayu: Maniawad kayu at mirinan kayu; manintun kayu, at manakit kayu; tuktuk kayu, at mibuklatanan kayung pasbul. 10Uling ing balang maniawad miririnan ya; ing balang tutuktuk mibuklatanan ya. 11Ninu mo kekayung tata ing munie ubingan king anak na nung iti maniawad yang asan? 12Dinan ye waring alakdan nung iti maniawad yang ebun? 13Agyamang marawak kayu biasa kayu pa namang munie mayap a bage karing kekayung anak, e kasi lalu na ing Ibpa yung atyu banua! Ibie ne ing Banal a Espiritu karing maniawad keya!”


III. Turu

King ebanghelyu ngeni, tiru no ning Ginu tang Jesu Kristo ring kayang disipulus nung makananu ing manalangin. Tiru na lang manalangin ban lang mika personal lang relasyun king Ibpang atyu banua. At ing pangadi mu ring ayni yang tuturu na ning pisamban ngening kasalukuyan ban tang mika personal a relasyun murin king Ibpa. Itamu deng anak Na at Ya ing Tatang tamung na kapilan man e naka tamu atiis. Purus ngan makakayap ing buri ng malyari kekatamu, pablasang likas yang Dios ning  kayapan at lugud.

Atlu rang puntu ing buri ng ituru kekatamu ning mayap a balita. Mumuna yapin ing siguradu nong pakibatan ning Ibpa deng panalangin tamu. At atlu la reng pwedi ng ipakibat kareng anyaran tamu. “Wa”, uling makakayap la reni kekatamu. Ing kadwa, “saguli mu” uling e tapa redi kareng grasyang areni, at pota imbis na makakayap la kekatamu reni, makakarok lapa. At ing katlu, “ali”, uling balu na ila pa ing maging sangkan ning pamangalingwan tamu Kaya.
Ing kadwang puntu, balu nano ning Ginu reng kaylangan tamu bayu tapa manyawad. At mas balu nala reng bage makakayap at makakarok kekatamu. Pero ing kutang, nung balu nano pala reng pamangailangan tamu, ot mangadi, at manyawad ta pa Kaya? Kaburyan ning Ginu tang Jesu Kristo ing mangadi o maus tamu king  Ibpa, uling buri neng dinan importansya ing pamanyawad ning metung a anak king kayang tatang. King pamanyawad ta king Ibpa, apapakit ta Kaya ing pamangailangan ta Kaya king bie tamu. Apapakit tamu mu naman kaya ing kababan tamu lub ampo pa ning pamaglambing ning metung a anak king kayang tatang. Akakit ta king aldo-aldo tang pamibie-bie ini king relasyun dareng anak kareng karelang pengari.

Deng responsableng pengari balu dana ing pamangailangan dareng karelang anak. Bibye dana ing bage kaylangan dareng karelang anak adya pang e da anyaran iti. Pero reng pengari masaya at manyaman ing karelang panamdaman neng reng anak da manyawad la karela. At e mu apaliwanag ing tune dang tula  lalu na neng aibye da ing anyaran dareng karelang anak.

Ing katlung puntu, apansinan tamung ing tiru ng pangadi ning Ginu tang Jesu Kristo kareng kayang alagad e ya makasarili. “Ibpa ming atyu banua misamban ya ing lagyu mu, at e ya Ibpa kung atyu banua.  Datang kekami ing kayaryan mu at e ya datang kanaku ing kayaryan mu. Ing kakanan mi king aldo-aldo, ibye mu kekami king aldo ngeni at idayu mu kami king tuksu. Masala ng papakit kekatamu ning Ginu na neng mangadi, aliwa ing sarili ing tatas tamu nune ing mabilug a komunidad. Abe-abeng mipapanantabe, mipapamatawad, at mikakalugud king lagyu ning Ibpa, ning Anak at ning Banal a Espiritu. Amen.


IV. Pamigunam

King mitmung katahimikan, agkatan na katamu ning Apung Ginu na manyawad kaya na ating kapibabatan at maragul a pamagtiwala. Agya pang balu nano reng pamangailangan tamu, maus ta pa murin kaya, uling kapamilatan ning pamanaus ta Kaya, mangabaldugan iti na angkinan tamu na iya Tatang taya at itamu anak na katamu. E na parating bibye ing anyaran tamu, uling e ta balu ing mas makakayap kekatamu. Mas didinan tang pansin kasi ing kuswelu ning laman kesa king espiritu. Nya naman madalas ing e ta maging kuntentu king bie, at parating ating kulang. E maging lubus ing tula at saya tamu pauli ning ing anyaran tamu pansarili mu at e pang komunidad. Nya maralas e na bibye ining klasing pamanyawad ayni. Anyaran ta Kaya ing bage makasaup kareng dakal at e kareng ditak. Uling ing grasya Na para kareng anggang lelangan na.

Anyaran ta ing saup ning Banal a Espiritu ban ya ing mituru keka tamu nung makananu tang manalangin na ating tiyaga at pamagtiwala king panibatan ning tune tula at saya. Amen.

V. Pamanahimik

VI. Tauling Panalangin

King makuyad a pinandit at mitmung kababan lub, sitsit tala Kaya ding kekatamung kayadwanan.

Mitatalnanan tang gamat, isipan tamung kayabe taya ing Ginu tang Jesus at ikanta taya ing tirung pangadi Na.

VII. Kutang

1.    Nanu mo kaya ing sangkan ot bakit kaya peturu lang manalangin ding alagad na ning Ginung Jesus?
2.    Para keka sanu keng parti ning Ibpa mi ing mas makabaldugan keka?
3.    Tutu pin ing panamdaman taya ing pangadi lalu na neng sasambitlan taya ing “Patawaran mu kami kareng sala mi keka antimo ing pamamatawad mi kareng mikasala kekami?
4.    Neng pangadian taya ing tiru ng pangadi ning Ginu, ikwa tanong  petawaran deng mikasala kekatamu? (magpakatutu ka brod/sis, ikwentu).
5.    Nanu mo ing a ibye tang payu o agawa ban maging instrumentu tamu king pamagbalik ning pamikaluguran dareng kalupa tang tau?

Ika-labing-anam a Domingu ning Ordinaryung Panaun

Delawan neng Jesus i Maria at Marta

I. Pamuklat a Panalangin

Ibpa, ing kapuryan at kapasalamatan king binie yu na namang panaun kekami ban abayanan at pakiramdaman. Pabustan yu pung ing Banal a Espiritu dinan na kaming pusung mapamakiramdam karing amanung babie bie. Dinan yu kepung malalam a pang-unawa king mayap a balita. Iti ngan pu pasalamatan at anyaran mi king lagyu ning Ginu ming I Jesus. Amen.

II. Pamamasa

Lucas 10:38-42

38Tiglus nang Jeus at ding alagad na ing pamaglakbe ra at miras la king metung a baryu. Tinggap na lang matula king pibalebale na ning metung a babaing milagyuan Marta. 39Atin yang kapatad a milagyuan Maria. Linukluk ya iti king arap na ning Ginu at mekiramdam ya king tuturu na. 40E na balu ing arapan nang Marta king dakal a obrang sukat nang daptan; inya linapit ya kang Jesus at sinabi na, “Ginu, e mu apapansin king pepaburen na kung magobrang dili-dili ning kapatad ko? Pakisabi yu na mo kang Maria ing saupan nako!” 41Pekibat ning Ginu, “Marta, Marta, maliligalig ka at mayayabala karing dakal a bage, 42oneng metung mu ing tune kailangan. Tinud yang memili I Maria at iti e milako keya.”


III. Turu

King Matuang Tipan, kabang maglakbe lareng Israelita papunta king mipangakung gabun para karela, ing Ginung Mayupaya e nala peburen king pamangailangan. Dininan nong pamangan kalupa na  ning manna, pugu at danum ban lang e mate king danup king ilang. Oneng e mu basta pamangan ing binye na karela nune didinan nala naman turu kapamilatan dareng amanu na. Kalupa dareng binye ng apulung utus o batas nung makananu la dapat mibibie antimong tau. Parati nong tuturu at antabayanan uling balu na ing tau asne kayna king tuksu lalu na king pamangan, pusisyun at pibandyan. Pepakit na karin ning Mayupayang Ginu na e mu king tinape o materyal a bage mabibie ing tau.

Kalupa na naman ing milyari anyang ing Ginu tang Jesus tinuksu ne ning Dyablu king ilang bayu na arapan ing misyun na. Ginamit nala naman ning Dyablu deng atlung bage na penuksu na kareng Israelita, pamangan, pusisyun at pibandyan. At dening atlu bageng areni ilang paralan o gagamitan na naman ning Dyablu king pamanuksu kekatamu king panaun a iti. Oneng ikit tamu nung nanu ing pengontra ning Ginu tang Jesus kareni, ing Amanung manibat king asbuk ning Apung Ginu.

King ebanghelyu tamu ngeni makanyan mu naman ing payabut na. Antimong metung a Kristiyanu dakal ing bage-bage a isipan tamung  kaylangan king  pamilya

tamu, pamaglinis, pamaglutu, pamanyese kareng kekatamung anak. King pamanyuyu tamu karela, susuywan ta nya naman ing Ginu. Pero king pamanyuyu tamu, e taya kakalingwan ing metung a importanting bage. ing makiramdam king Ginung Jesus kareng amanu na. Kaylangan ilele tangan ing kegana-gana para Kaya. 

Bibye ng Marta ing materyal a pamagsilbi, pero ing buri ning Ginu tang Jesus ing ibye na ing bage na e kukupas at e mawawala. Magobra yang alang patugut I Marta, e mipaydatun king sarili na, malilingasngas ya, nya ala neng oras makiramdam  at makyabe king Ginu tang Jesus. Akalingwan na ing peka importanti king bie at iti yapin ing makiramdam karing amanu ning Ginung Jesus na mamye kapayapan at lugud king metung a tau. Akalingwan no reng mabie amanung manibat king asbuk ning Apung Ginu na ilang meging sangkan ot bakit miras la king mipangakung gabun deng Israelita. Akalingwan na neng ing tau atyu ya king oras ning kapagalan at kapagsubukan, ing panlaban mu yapin deng amanu ning Ginu. Amen.


IV. Pamigunam

Itamung Kristiyanu, asna katamu kapalad uling ing kekatamung Diyos biryan na ing dinalo ya king busal tamu. Dinalo ya king pibale-bale ng Maria at Marta. Ninung Dios ing meging tau at mekisabing arapan kekatamung tau ban sabyan la ring bage makaibye bie king tau? Pepakit na talaga ing maragul ng lugud kekatamu. Nya naman dapat mung ilako tana ing kabalisan king pusu tamu, dinan tayang panaun ban pakiramdaman la ring kayang amanu.

Nya king kaorasan pabustan tayang lungub king pibale-bale tamu ban ing kapayapan at pamikakalugud ya ing miral king mabilug tang pamilya. Dinan tayang mayap a oras ban na katamung pakisabyan at ituru ban mika bie tanang alang-angga keti pa king yatu. At nung buri tang maging personal tayang kayabe king aldo-aldo tang pamibie-bie, pabustan tayang lungub karing pusu’t kaisipan tamu ban kanita ayawa tala reng aliwa tang kapatad na bista man ating problema, e ta milalako  tula, saya at pamag-asa king bie. At deng sanang kayang amanung tinggap tana e tala sana pikarineng idake la reti karing kalupa tang tau. Amen.

V. Pamanahimik

VI. Tauling Panalangin

Dios a malugud, abalu mi king kaorasan ing maragul ng importansya keka ing dinan dakang oras king pamibie-bie mi. Parati kayu pu sanang bumisita kareng pibale-bale  at kareng pusu mi ban keti pa pu king yatu atakman mina ing saya at tula ning presensya mu. Amen.

VII. Kutang

1.    Makananu ya ka importanti keka ing pamagbisita at bibisitan? Ikwentu.
2.    Atin tamu bang dapat baywan a ugali king pamananggap tamu kareng bisita tamu?
3.    Nung ngening kaorasan, bumisita yang personal keka ing Ginu tang Jesu Kristo, nanu mo ing muna mung gawan at sabyan kaakit mu kaya?

Ika-labing-limang Domingu ning Ordinaryung Panaun

Ing Talimhaga tungkul king Mayap a Samaritano

I. Pamuklat a Panalangin

Ibpa, dakal pung dakal a salamat king kaorasan a pigkalub mu kekami. Dinan yu kepung malalam a kasalpantayanan ban mas lalu miyang aintindyan ing mayap a balita ning kekang Anak, I Jesus. Pabustan yu pung ing nanu mang ituru ning Banal a Espiritu gawan mi iti king aldo-aldo ming pamibie-bie. Amen
II. Pamamasa

Lucas 10:25-37

25Linapit ya ing metung a talaturu ning Kautusan ban neng paniubukan I Jesus. Nganang mengutang, “Maestro, nanu ing sukat kung daptan ba kung tanggapan ing bie alang angga?” 26Pekibat nang Jesus, “Nanu wari ing makasulat king Kautusan? Nanu ing aintindian mu kareti?” 27Mekibat ya, “’Sukat meng luguran ing Ginung kekang Dios mabilug mung kaladua, at king mabilug mung sikanan, at king mabilug mung kaisipan’, at ‘Sukat meng luguran ing kalupa mung tau antimo ing kekang sarili.’” 28Nganang mekibat Jesus, “Ustu ing pakibat mu, daptan mu iti at mie ka.” 29Oneng buri na ning talaturu ning Kautusan ing ipakit na king maka matulid ya; inya ngana pang kinutang kang Jesus, “Ninu wari ing kalupa kung tau?” 30Nganang mekibat Jesus, “Ating metung a taung ibat Jerusalem; papunta ya Jerico. Sebatan de ring tulisan at kinua ra ing imalan a susulud na; pemalupalu re, at likuan deng halus mete na. 31Mipaintagun daralan ya ing metung a pari king lugal a ita; inyang ikit ne linipat ya kasumangid na ning dalan. 32Makanyan munaman, miras ya karin ing metung a Levita, at ikit ne ing biktima da ring tulisan; linipat ya naman king kasumangid na ning dalan. 33Dinalan ya naman karin ing metung a Samaritanong maglakbe. Ikit nia munaman at melunus ya. 34Lepitan ne at tigtugan na lang laru at alak ding sugat na at saka na la tinali. Kaybat seke ne king asno na at dela ne king bale pipaglayunanan at sinese ne karin. 35Kabukasan, kinangwa yang aduang salaping pilak king bulsa na at binie na la king mamahala king pipaglayunanan. Ngana, ‘Sesen me at nung magkanu man ing maging kulang bayaran ku pamagbalik ku.’” 36“Ninu ngeni king pamalak mu,” nganang Jesus, “kareting atlu ing dinapat pamakilupang tau king sebatan da ring tulisan?” 37Pekibat na ning talaturu ning Kautusan, “Itang pepakit lunus keya.” Nganang Jesus, “Nung makanyan, sige, anti munaman kaniti ing daptan mu.”


III. Turu

“Ninu wari ing kapara kung tao?” Iti ya ing kutang ning metung a talaturu ning batas king Ginu tang Jesus. Buri ng abalu nung ninu ampo nung makananu ne dapat luguran ing kapara ng tao. Ninu wari ing talagang dapat dinan ng panaun para luguran at pagsilbyan? Deng kayang kamag-anak? Deng kayang kalupang Judio? O deng kegana-ganang tao?

Makabaldugan ing pamagwakas ning kwentu ning Ginu tang Jesus king kapamilatan ning metung muna namang kutang na makaliwa king minunang kutang: Ninu kareng atlu katau ing meging kapara ng tau ning sebatan da ring tulisan? Mekibat neman ing talaturu ning batas ngana “Itang pepakit lunus keya” at nganang Jesus, “Nung makanyan, makanyan mu naman ing daptan mu.”

Para kekatamung kasalukuyang mangutang kalupa na ning talaturu ning batas, nung ninu wari ing kapara tang tau. Pakibatan na katamu ning Ginu tang Jesus na e tana masyadu pang paygulu o paylingasngas pa pamanisip nune pakiramdaman . ta namu nung nanu ing  bubulung ning pusu tamu. Bubulung ning pusu tamu na kaylangan tang makipag tau. Kalupa talang tau ding mangailangan agya pang e tala kalupa estadu bie, e tala kalupa itsura at e tala kalupa kapanwalan. Anggat tuturing tamung obligasyun ing Batas ning Lugud, ali taya maging kalupa ning Lugud a buri ning Dios.

E tamu mu apakit king pamagdame ing lugud ta karing kapara tang tau. Ikit ta king kwentu nung makananu ya tinuknang ing Samaritano  dyang maselan pa ing lugar, nung makananu na beyaran ing gastus king pamanulu at mengaku pang mamayad  nung atin pang kaylangan. E yamu sinaup nune teya ne pa ing sarili ng bie, na ala mang kundisyun o kapalit at king metung pang kasalang king kapanwalan king relihiyun.

Para karing Judio, deng Israelita mu ilang karelang kaparang tau o kapatad. E dala tuturing kapatad ding e makisanmetung king karelang relihiyun. Pero king Ginu tang Jesus, e ya maging sagabal ing nanu mang klasing pamiyaliwa king pamakipag tau. Amen.


IV. Pamigunam

King kutang ning talaturu ning batas, “Ninu ing kapara kung tau?”, E na pekibat ning Ginu tang Jesus na reng sasalpantaya mu king relihiyun da reng Judio ilang kaparang tau mu. Nung e ka Judio e ka kapatad o e ka ka-brod o e ka-sister. Oyni kasi ing pamanisip dareng Judio kanitang minuna. Sasabyan na kanita at ngeni kekatamu ning Ginu tang Jesus na marapat mung maging kapwa tau tamu kareng ninu mang tau lalu na kareng taung mangailangan saup. Ing pari at ing Levita bista man dakal la balung kabyasnan at matas la panlalawe kareng sarili da e la meging kaparang tau. Pero ing Samaritano, na tuturing dang “erehe o heretic” (Tau na e sasamba keng tune Dios) ya ing meging kaparang tau. Ing Apung Ginu e ya lalawe kareng titulu, relihiyun o karing kekatamung pangadi at e ya naman lalawe nung makatapilan ta makipag BEC. E taya alimitan ing lugud at pakamal ning Ginu king tau, ing importanti pasakup at panibala ta nangan kaya ing sabla-sabla. Ing lalon na ing pamagmalasakit at kayapan ta karing kapara tang tau lalu napin karing mababa kabilyan kekatamu. Kaylangan tamu ing tapang ampong tiyaga ning Samaritano ban agawa tamu ing kayang gewa. Dapat mung kalingwan ta ing e ta pamipareu at kaylangan mu ing kalingwan tala reng sarili tamu ban tang agawa iti. Amen.

V. Pamanahimik

VI. Tauling Panalangin

Ginung mayupaya, salamat king presensya ning Banal a Espiritu at mayap ing meging oras a binie na kekami ban lalu pang sumulung ing kabalwan mi kareng kekang kaburyan. Kaburyan mung ing lugud ala yang sukad at ala yang panenayan kapalit, Salamat pu. Ing kapuryan at kapasalamatan king kapamilatan ning lagyu ning mengabus kekami, I Jesus. Amen.

VII. Kutang

1.    Keng palage mu ot apili na lang alimbawa ning Ginu tang Jesus ding Saserdote ampong Levita na taong alang malasakit?
2.    Kapilan ka mo meging mayap a samaritano? Ikwento?
3.    Nanu la reng dapat tapang gawan ban apakyapusan taya ing mayap a Samaritano?

Ika-labing-apat a Domingu ning Ordinaryung Panaun

Tiburan na lang Jesus ding Pitung Pulu’t Adua

I. Pamuklat a Panalangin

Banal a Espiritu Santo, mamaus kami pu keka yu ban tipa ka king kekaming kalibutnan ban damayan at mipuspus kami king kekang kabanalan. Salangi ka kareng pusu mi ban lubus mi pung aytindyan ing mensai ning ebanghelyu. Dinan mu kami king milalablab mung api ning lugud ban adake mi ti kareng aliwang tau. Amen
II. Pamamasa

Lucas 10:1-12

Kaybat na nita, memili yang pitung pulu’t adua katau ing Ginu, at tinubud na lang tidua-tidua ban munta na lang mumuna keya king balang lugal a puntalan na. 2Sinabi na karela, “Dakal ing palutan, oneng ditak la mu ding magobra. Ipanalangin yu king makibandi king palutan king parala yang dakal a talapagobra ba rang tipunan ing pupul na. 3Lumakad na kayu! Tutubud da kayu antimong tupa libutad da ring asung-gubat. 4E kayu magdalang pitaka o suput-magpalimus o sandalyas at e kayu tutuknang kabang dalan. 5Kapilan man lungub kayu king metung a bale sabian yu pa mu, ‘Kapayapan king bale iti.’ 6Nung payapa ya ing makatuknang karin, manatili keya ing kapayapan; nung ali ne man, ibawi yu ing binie yung kagalangan keya. 7Manatili kayu king bale a tanggap kekayu; mangan kayu at minum king nanumang yapag da kekayu, uling ing magobra sukat yang mibayaranan. E kayu lilipat tuknangan. 8Nung munta kayu king isanu mang balen at tanggapan da kayu, mangan kayu king yapag da kekayu. 9Pakayapan yu la ding masakit karin at sabian yu karela, ‘Ing Kayarian ning Dios malapit ne kekayu.’ 10Nung munta kayu king isanu mang balen at e ra kayu tanggapan, lual kayu karing dalan at sabian yu,‘ 11Agyang ing alikabuk ning balen yu a mipakat karing bitis mi ipagpag ming antimong tutul kekayu; oneng tandanan yu iti, ing Kayarian ning Dios malapit ne kekayu!’ 12Sasabian ku kekayu king ing Sodoma tanggap yang mayan a parusa king Aldo ning Pamanukum kesa king balen a ita.


III. Turu

Ing takut ampo ing pamigaganaka sangkap nane ning bie ning tau. Ustung mimulat ne ing kekatamung kaisipan king yatung iti, siguradu mu ing e milako ing takut ampong kapigaganakan. Ing kutang ot kaya itamung tau asna katamu karakal pitatakutan ampong pigaganakan?  Marakal tamu pitatakutan uling asna karakal ing bage-bage tamung pangaku ampong obligasyun. Isipan tamu na e ta karapat-dapat lalu na neng kukumpara ta ing sarili tamu kareng aliwa. Tatakut tamung ipakit ing tune tang pangatau uling patsa abalu da isipan tang agad ing milako ing  pamagtiwala at lati ing lawe da kekatamu.

Asna katamu mu naman kapigaganaka king itsura tamu. Deng lalaki migaganaka la potang akakit da ing makakalbu nala buwak. Deng babai naman migaganaka noman neng mag-umpisa nong mikaka “wrinkles” king lupa da, o kaya naman potang sosobra la taba o payat a katawan at  potang tutuling o mangulubut nala balat.
Tatakut tamung mayatu lalu na kareng matas a pusisyun king obra tamu. Tatakut talang sabyan deng ideya tamu lalu na neng dakal a tau pero asna katamu kamwa king metung a tau potang mipayintagun na sasabyan na la ding ideya tamu.

Migaganaka tamu parati tungkul king kekatamung pamilya. Deng aliwang tatang migaganaka la kareng malagu dang asawa na pota tuki ya karing aliwang lalaki. Makanyan mu naman kareng ima na migaganaka kareng asawa dang pogi na lakwan ne at  reng pamilya na at tuki ya karing aliwa. Karen namang ala pang asawa migaganaka noman pota e no makapakyasawa. Kareng aliwa namang miyasawa, king kalwat danang miyayabe migaganaka la ot angga ngeni e lapa mikaka-anak. Karen namang dakal a anak, migaganaka noman nung  makananu dong paragulan at dinan a masanting a bie deng anak da.

Dakal pang bage-bage a pitatakutan at pigaganakan tamu king bie . At king kekatamung ebanghelyu ngeni abalu tamung tinubud no ning Ginu tang Jesu Kristo deng pitung pulu’t adwang lalaki ban munta karing miyayaliwang lugar ban ikalat ya ing mayap a balita, ing kayaryan ning Dios. Tutu e la milako kapilan man deng pitatakutan ampong kapigaganakan king yatung iti pero ating panulu kareni at ini yapin ing pamamie ning Dios king lubus at alang kapupusan a kapayapan. Kapayapan na e na a ibye ning yatung iti, kapayapan na kapilan man e tamu asali o e tamu akwa uling metung tamung maimpluwensyang tau. Ing tune kapayapan aranasan taya mu nung ibuklat tala reng pusu tamu ban tanggapan taya ing mamie tune kapayapan, I Jesus. Amen.


IV. Pamigunam

Buri ning Ginung Jesus na iligtas na katamu kareng keka tamung takut ampong kapikakunwan. Gawan na ini kapamilatan ning pamidake king bie tamu kareng aliwa na ngening panaun tamu kayabe ta karening pitung pulu’t adwang lalaki na ipasyag ing babie nang kapayapan ning Ginu. E na kaylangan ing mamunta tapa kareng mangarayung lugar, agawa ta iti king mismung kilub ning pamilya tamu, king kekatamung sariling komunidad o kaya naman kareng lugar nung nokarin tamu magobra. E makasaup ing tipunan talapa reng abe ta king obra ban sabyanan ing e ustu ing pangawan da king bie da. Ing masanting o mas ipektibung paralan ban ikalat ing kapayapan ning Dios ing ipakit tanamu kareng kekatamung mayap a dapat ing tune kapayapan at kapayapan kareng pusu tamu. Pusung tutung lulugud kalupa ning Ginu tang Jesu Kristo, na makasadyang sumuyu at magsakripisyu. Amen.

V. Pamanahimik

VI. Tauling Panalangin

O Dios, Ibpa ming malugud parati yu pu sanang ipa-isip karing kekaming kaisipan at idukit karing kekaming pusu ing parati miya sanang tanggapan king bie mi ing kekang Anak, parati mila sanang pakiramdaman at gawan deng kayang amanu. Ipagkalub mu munaman kekami ing sikanan ning Banal a Espiritu ban maging metung mu na naman karing disipulus ning Ginung Jesus na mamye kapayapan kareng aliwa. Amen.

VII. Kutang

1.    Para keka nanu ya ing mayap a balita a tinggap mu king ebanghelyu?
2.    Ot sinabi ning Ginu ing “Ing palutan dakal, dapot ding papalut ditak la mu? Tutu ine? Patunayan tamu.
3.    Ot kaya binawal no ning Ginu tang Jesus reng pitung pulu’t adwang lalaking tinubud na, na e la magdalang nanumang bage king puntalan da?
4.    Mekumbida na kang mangan king metung a bale na e mu masyadung kakilala ing mikibale? Nanu mo ing meging bunga ning salu-salung ini?
5.    Ninu mo reng pwedi tang kumbidan king kekatamung komunidad ban akayabe tala king tutu king kekatamung pamitipun?