Solemnidad ning Kristong Hari

Ing Pangapaku nang Jesus king Krus

I. Pamuklat a Panalangin

Ibpa, king kaorasan manyawad ke pung grasya ning kekayung pakalulu. Patawaran yu kami pu, uling maralas milang gagamitan deng kekaming upaya king sarili ming kapakanan. Sopan yu kami pung maging kawangis ning kekayung Anak, I Jesus, makasadyang magdaun king bie para kareng aliwa. Amen.

II. Pamamasa

Lucas 23:35-43

35Makatalakad la ding tau karin at manalbe la kabang pituya-tuya de ring makatua da ring Judio. Ngara, ”Linigtas na la ding aliwa; paburen yung iligtas na ngeni ing sarili na, nung ya pin ing Cristo, ing pinili ning Dios!” 36Pituya-tuya dia naman ding sundalus; lepitan de at alukan maslam a alak. 37 Ngara, ”Nung ika pin ing ari da ring Judio iligtas mu ing kekang sarili!” 38Deting amanu makasulat la king kabuntukan na: ”Iti ya ing Ari da ring Judio!” 39Ininsultuan nia naman ning metung karing kriminal a makabitin. Ngana, ”Aliwa wari ika ing Cristo? Iligtas mu ing kekang sarili at pati na ikami!” 40Oneng sebianan ne ning metung ing kayabe na. Ngana, ”Ala na kang takut king dios? Ing parusang tinggap mu kaparehu ne ning keya. 41Matulid para kekata ing magdusang anti kaniti uli na ning depat tang marawak; oneng ya ala yang bitasang depat a marawak.” 42At kaybat sinabi na kang Jesus, ”Jesus, e mu ku sana kakalinguan potang datang na ka king kekang kayarian!” 43Nganang Jesus keya, ”Ing katutuan sasabian ku keka: ngeni mu rin akayabe da ka king Paraiso.”

III. Turu

Pagmasusyan taya ngeni ing Solemnidad ning Kristong Ari. Bina yang maulaga ing ukasyung ayni king mabilug a Sankakristiyanuan, uling kapamilatan na niti, pasibayu ng paganaka ing tune kabaldugan ning upaya, ning tune pamagserbisyu.

Makasulat ngan kareng apat a ebanghelyu ing kasakitan, kamatayan king krus at ing pamanyubli ng mebie ning Ginu tang Jesu Kristo. Pisanan neng Jesus ing krus papunta king kalbaryo (king amanung Hebreo Golgotha), na ing buri ng sabyan “bungu” (23:33). Agpang king kwentu ing bungu ng Adan atyu ya karin. At ini ing meging sangkan ot atin ngening “Chapel of Adam” king “Holy Sepulchre”. King kwentu murin, sasabyan da ing tinulung daya ning Ginu tang Jesus king krus, minagus iti king bungu ng Adan. Ing minagus a daya ning bayung Adan, ing mapamintung Anak, i Jesus, iyang lilinis at babayu king minunang Adan.

Bakit kaya, pinili ne ning Ginung Jesus ing dalan ning Krus? Ot e na namu pinili ing malwat a bie? Ot biryanan ng mate king idad 33, na oyni ing idad ning kalakaslakasan ning metung a tau? Ot biryanan ng mate king makalunus at makarineng paralan? Oreni reng maralas tang kukutang at ing pakibat na kekatamu ning Ginu yapin ing tune upaya atin yang karampatang lugud at pamagsakrapisyu.

Tinuksu ne king disyertu ning Dyablu ing Ginu tang Jesus bayu ya pa mentra king

kayang ministeryu. At ngeni king babo ning krus, king oras ning dusa at kasakitan, inulit na naman ning Dyablu ing pamanuksu. Mekatatlu ne tinuksu ing Ginu tang Jesus. Tinuksu ne kapamilatan dareng makatua na ning Jerusalem , ngarang sinabi “Linigtas na la ding aliwa; paburen yung iligtas na ngeni ing sarili na…” (23:35). Reng sundalus ngara, “Nung ika pin ing ari da ring Judio iligtas mu ing kekang sarili!” (23:37). Ing metung karing kriminal a makabitin , ngana “Aliwa wari ika ing Kristo? Iligtas mu ing kekang sarili at pati na ikami!” (23:39). Buri na ning Dyablu ing e misundu ing pamikabus ning tau king kasalanan. Buri na ning Dyablu na mimwa ya ing Ginung Jesus kareng taung mipaku Kaya. Buri na ning Dyablu na datang la reng angel king banwa king metung mung utus ng Jesus ban ipakit ing tune ng upaya antimong ari. Oneng e makanini ing gewa ning Ginu tang Jesus. King babo ning krus, kabang papatak tunggal ditak ing kayang daya, e nana inisip ing kayang sarili nune ing isipan na itamu. Buri ng ipayabut at ipakit keka tamu ing tune ng upaya ning metung a tutung ari. At ing tune upayang ayni yapin ing makasadyang pamagdaun king sarili ng bie, ban lugud at magsakrapisyu para kareng aliwa. Amen.

IV. Pamigunam

Ngening kaorasan paganaka na kekatamu ning Ginu tang Jesu Kristo nung nanu ya kabaldugan ing kasakitan at kamatayan na king krus. Pebustan ng malyari ing bageng ayni, banang ipakit kekatamu ing tune kabaldugan ning upaya o ning metung a tutung ari. Ing tutung ating upaya dapat atin yang lugud at pamagsakrapisyu na agyu neng idaun ing kayang sarili para kareng aliwa. E na kalupa ning babie ng upaya ning yatu na imbis na magsilbi, buri tamu itamung pagsilbyan. Oyni ing metung a maragul a sangkan ot bakit parating magulu ing kekatamung lipunan at oyni murin ing sangkan ot bakit asna karakal kalulu.

King babo ning krus, inaus neng Jesus ing Ibpa ban patawaran no reng taung migtaksil, miglakwan, liningad, meninsultu, menumbuk, menampaling at memaku Kaya king krus (22:34). Sinabi ng Jesus king sisising mapanako, na ngeni murin akayabe nane king Paraiso (v.43). Mete yang dadaun ne ing kayang ispiritu king Ibpang atyu banua (22:46). King kayang kamatayan, ing kapatawaran at pakalulu meganap na: “Ikit da ring taung makatipun manalbe karin ing milyaring iti at minuli la; durugdugan da la ring salu ra” (23:48). Mipatawaran ya ing mapanako, e pauli ning sinisi ya nune talagang mitmu ya king pamamatawad ing Ginu tang Jesu Kristo. Ing kekatamung ari malapit yang talaga kareng pakakalulu, kareng sasakwil ning lipunan at karing makasalanan. Ing kayang kapatawaran e ne bunga ning nanu mang mayap tang dapat nune manibat ini king tune ng grasya. Amen.


V. Pamanahimik

VI. Tauling Panalangin

Diyos ning lugud at pakalulu, dakal a dakal pung salamat king binie yung panaun ban ipayabut kekami ing tune ng kabaldugan ning tutung upaya. Sopan yu kami, o Banal a Espiritu ban parating maging kawangis ing Ginung Jesus. Amen.

VII. Kutang

1. Nanu ya kabaldugan keka ing krus ning Ginu tang Jesus?
2. Nanu ing pamiyaliwa ning kayarian ning yatu at ing kayarian ning Dios?
3. Keng palage tamu, mag-ari neba ing Ginu tang Jesus king kekatamung komunidad? Nung wa, nanu la reng palatandanan at nung ali, nanu lamo reng dapat tapang gawan?

Download here:

http://www.mediafire.com/file/5ax4l2wcf5ftjy4/11.21.10 pg. 1.doc

http://www.mediafire.com/file/gh1tcnticoexi8y/11.21.10 pg. 2.doc