Katlung Dominggu ning Kwaresma

Sumisi Ka, Nung Ali, Mate Ka

I.    Pamuklat a Panalangin

Ibpa, salamat pu king kaorasan a iti. Pebustan yu pung mitipun-tipun nake na naman pu. Ginu, ing sanang lugud, masabal at kapayapan ilang maglugar kareng pusu mi. Iti pu anyaran mi king lagyu ng Jesus. Amen.

II. Pamamasa

Lk. 13:1-9

King oras a ita, dinatang la ding mapilan a tau at belita ra kang Jesus king pepapate na lang Pilato ding mapilan a tau Galilea kabang mamain la king Dios. Ngana Karela, “Isipan yu galang king maragul la kasalanan deting tau Galilea kesa karing aliwang tau Karin, uling makanyan ing miras karela? Ali! Sasabian  ku kekayu: ning e kayu sumisi at painggulut karing kekayung kasalanan mate kayu ngang kalupa ra. O deta naming labing walu kataung mete inyang mipatanan la king tore na ning Siloe? Isipan yu galang king mas maragul la kasalanan kesa karing aliwang taung makatuknang Jerusalem? Ali la! Oneng sasabian ku kekayu: nung e kayu sumisi at painggulut karing kekayung kasalanan, mate kayu naming kalupa ra!” Kanita selita neng Jesus itang talimhaga. Ngana, “Ating metung a taung ating tanaman a higera king ubasan na. Linawe na nung atin yang bunga, oneng ala yang ikit. Inya sinabi na king mamahala king ubusan. Atlu na kung banuang pupunta keti at manintun bunga king tanaman a iti, oneng ala ku pang ikit. Kuturan mu ne! Makaskup nia wala king ubasan! Oneng pekibat na ning mamahala, “E ta ya pa mu kukuturan king banuang iti. Gambulan ke at dinan pataba. Nung mamunga yak eng tutuking banua, lalung masanting; mung ali ya, kanita tana e kuturan.”

III. Turu

Asno kausu ngening panaun tamu reng motorsiklu. Ing sasabyan da nya memamanyali lang motorsiklo uling mayna la kanung mangan gas ampong saguli milabas ka kareng dalan a maskup. Oneng medalas naman ngeni ing aksidenti. Asnano kaingat keng dalan deng magmotorsiklu kareng mangaragul a saken, oneng ing makapagtaka, nya kanu mayayaksidenti la uling makalaparis lang malatik a batu at pauli na niti nya milalako la kanu keng direksyun da.

Madalas mu naman king bie tamu pangilagan tala reng maragul a problema o deng maragul a kasalanan. Pero ing tutu nanini ing madalas a magpabagsak kekatamu deng malatik a problema. Ing pamanyira o kaya mangabagsik a amanu, marinat lamung pamagkulang. Pero king arapan na ning Banal a Dios deng anggang kasalanan seryoso la. Dening lalawen tamung mangalating pamagkulang o kasalanan ilang maging dalan ning e tamu pamamamumga king lugud, katapatan at kapayapan king Ginu at karing aliwang tau. Dapat mingat tamu kareng mangaragul a problema o kasalanan pero e tala kakalingwan deng mangalatik a batung pweding makatalisud king pamanuki ta king Ginu.

King katlu ng Dumingu ning Kwaresma, papasyag na kekatamu ning ebanghelyo na kaylangan ing sumisi at payinggulut tamu kareng kekatamung kasalanan. At nung e tala agawang sisyan at payinggulutan dening kasalanan a reni, sasabyan na ning Ginu ing mate tamu. Kalupa da wari deng pipumpunan tamung ing Adan at Eba inyang e de pemintuan ing Dios, mete la e king bie laman nune mete la king bie Espiritu. Mabie la antimong tau pero mitda o mete ing relasyun da king Apung Ginu. At ikit tamu manibat nyang mete ing karelang relasyun king Apung Ginu kanita murin mibait ing kasakitan.

Ing kutang, ot bakit utus at buri na ning Ginu tang Jesu Kristu ing sisyan at gulutan tala reng kekatamung kasalanan? At ing pekamayan a pakibat yapin ing burin a kasi ning Ginu na midinan tang lugud, kayapan at kapayapan king bie na e na aibie ning yatung iti, na e mu kapilan asali. Piyaben-aben ta ngan deng kwalta, pibandyan o nanu mang materyal keti yatu e nala kasing nyaman ning lugud, kayapan ay kapayapan king bie. Amen.

IV. Pamigunam

King mitmung katahimikan anyaran tamu king Apung Ginu na dinan na katamung malugud a pusu na biyasang makiramdam kareng amanu na bibie  bie. Aslagan na katamu sana kaisipan ban mas lalung maging malalam ing kekatamung relasyun kaya. Binang masakit ing sumisi kareng kekatamung kasalanan pauli ning ketasan ta lub. Pero iting bage ayni yang kaburian na ning Apung Ginu. Buri na kasi e ta magkargang kasalanan ban tang maging matatag king bie at ban tang parating maus at sumandal kaya.

Ing bie tamu, kalupa na ning tanaman a igos nanung e mamunga, alang kwenta. Pero nanung klasing bunga ing burin a ning Dios? Ing burin g bunga ning Dios yapin ing pamamintu kareng turu o aral ng Jesus. Reng turu ng Jesus ilang maging pataba na lalage na king tanaman a igos. Pero e pa sapat ing pataba na kaylangan na ning tanaman igos para mamunga yang ating kapakinabangnan. E pa sapat ing pamamasa at pamagaral keng amanu na ning Dios, kaylangan ing aranasan de reng kekatamung kalupang tau ing bunga na ning kekatamung pamamasa at pamagaral king amanu nga ning Dios. Kaylangan akit da keng bie tamu nung nanu ing babasan at pagaralan tamu tungkul kang Jesus- mapanyaup, mapagmalasakit at malugud kareng kalupang tau. Amen.

V. Pamanahimik

VI Tauling Panalangin

Ibpang Ginu ming mayupaya, dagdagan yu pu sana ing kekaming grasyang mamatawad kareng kasalanan dareng kapara ming tau. Aslagan na ke pu sana ning Banal a Espiritu king kayang kapayapan at lugud ban keng makapamungang mayap at midinan pagkakataun sumuyu at lumingap kareng tau. Amen.

VII. Kutang

1. Nanu ing buri ng sabyan Jesus, na patse e ta gilutan ing kasalanan mipahamak tamu? Nanung kapahamakan ing buri ng sabyan Jesus?
2. Keng palage mu, keng talinghaga ng Jesus, ninu ing tanaman a igos, ninu ing mikibandi kanini? Ninu ing taga-sese? Ninu ing pataba? Nanu la reng bunga?