Ikalimang Domingo ning Kwaresma

Ing Babaing Merakap king Pamakipangalugud

I.    Pamuklat a Panalangin

Ibpa, Dios ning pakalulu at kapatawaran, lunusan yu kami pu uling bina kami pung masyas a buntuk at pusu.  Mas masaguli kami pung manusga kesa king mamatawad.  Mas buri ming mablas marok kesa king luguran mila ring para ming tau.  Kareni ngan pung kainan, patawad pu! Amen.
II. Pamamasa

Juan 8: 1-11

¬1 Minuli ya ing balang metung karela king sarili nang bale, oneng minta ya I Jesus king Bunduk ding Olibo.  2At kabukasan abak a maranun minta yang pasibayu king Templo.  Lepitan de ring sablang tau karin.  Linukluk ya I Jesus at tiru nala.  3Dela re king arap na ding talaturu ning Kautusan at ding Pariseo ing metung a babai king arap da 4 at ngara kang Jesus, ”Maestro, merakap ya ing babaing iti a makipangalugud.  5 Agpang king kautusan, inutus na kekatamung Moises king ing anti kaniting babai paten ya king basibas batu.  Nanu ing asabi mu tungkul keya?”  6 Sinabi ra iti ba reng pakirakpan; ban atin lang abusbus laban kang Jesus.  Dinuku ya I Jesus at king kapamilatanan na ning taliri na sinulat ya king gabun.  7 Sigiran de king karelang pamangutang; inya inarapan na lang Jesus at sinabi na karela, ”Ing ninuman alang kasalanan kekayu ya ing munang masibas keya.”  8 Dinuku yang pasibayu at sinulat ya king gabun. 9 Inyang dimdam da iti meko lang tunggal-tunggal, megumpisa king matuang dili.  I Jesus na mu ing melakuan at ing babaing makatalakad arap na.  10 Minatna ya I Jesus at ngana king babai,  ”Nu la karin? Ala waring mitagan metung man ban matul keka?”  11 Nganang mekibat, ”Ala pu, Ginu.”  Nganang Jesus, ”Aku man, e ra ka atulan.  Mako na ka at e na ka mikakasalang pasibayu.”

III. Turu

Pwedi taya kayang sukdan ing lalam na ning kasalpantayanan ning metung a tau?  E taya asukad iti kapamilatan na ning makaba o masanting ng panalangin ning metung a tau.  Makasiguradu tamung e taya asukad ing kasalpantayanan na agya pang kilala taya o e taya man lubus kilala.  Maralas kasi magkamali o e la tutu deng akakit ning mata at daramdaman da reng balugbug tamu.  Agya pang deng abibye tang saup antimong abuluy kareng aliwang tau, e ya naman pweding gamitan panyukad king kasalpantayanan tamu.  Uling maralas atin tang sariling mutibu keng pamanyaup.  Alimbawa dininan taya ing metung a mangailangan uling atin tang buring kapalit.  Neng kayi naman nung ala yang a ibye kapalit ing sinopan tamu, agad tang isipan na ing Ginu yang miye nang kapalit at mas dakal pa ing panenayan tang kapalit.  Maralas mu naman ing mamye tamu mu uli na ning buri tamu puryan da katamu deng tau o kaya naman ban mabawasan ing panandaman ning konsensya tamu.

Atin metung a panyukad king kasalpantayanan, iti yapin ing pamamye kapatawaran karing mekagawang kasalanan keka tamu.  Masakit para keka tamu ing mamatawad at mas saguli o mayan ta naman manusga kareng mali ding aliwa.  Kalupa na wari ning ebanghelyu ngeni, deng talaturu ning kautusan o eskriba at pariseo dela de ing metung a babaing merakap makipangalugud king arapan na ning Ginung Jesus.

Kitnan de ing Ginu tang Jesus nung nanu ing asabi na.  Oneng dinuku yamu ing Ginu at sinulat king gabun kapamilatan ning daliri na.  Oneng kilitan de king pamangutang, nya sinabi na karela ”Ing ninuman alang kasalanan kekayu ya ing munang masibas keya.”  At metung man karing tau, alang mengangas mesibas king babaing merakap makipangalugud.  Bakit kaya, ot alang mesibas king babae?  Kasi, ikit da reng tau ing sarili da na ila man palpikasala la.  Na ila man dapat basibasan lang batu angga king mate la.  Nya, ngening panahun tamu nung tukyan tala reng utus ng Moises, itamu ngan atin ta ngan bukul o bugbug king katawan.

Nya maragul ing keka tamung kapasalamatan king Ginung Jesus na tuturung mamatawad karing mikasala keka tamu.  Uling king pamamatawad makasiguradung atin yang kayakibat a lugud at iti siguradung mamungang grasyang manibat king Apung Ginu. Amen.

IV. Pamigunam

E na sinabi ning Ginu tang Jesus na e ya mikasala ing babaing merakap makipangalugud.  Balu na ning Ginu na maragul ing kasalanan ning babae.  Oneng e ne buring gamitan ning Ginu ing batas na pweding makapanasakit o manyira king bie ning metung a makasalanan.  Buri na suklyan lang kapatawaran at lugud deng makagawang kasalanan.  Uling balu na ning Ginu tang Jesus na king pamamatawad ampong pamanyad kapatawaran mamunga iting grasya at kapayapan.  At ing pamaghiganti siguradung mamungang e pamikaintindi.

Nya ngening panahun na ning kwaresma, agkatan na katamung Jesus ing suryan talang miamas-amas deng sarili tamu.  Kutnan tala reng sarili tamu king mitmung katahimikan ning  isip at pusu tamu.  Petawaran tano ngan kaya reng mekagawang e ustu kekatamo? O, angga man ngeni, makatanam at pikarga-karga tapa ing mua king pusu tamu.  Pauli na niti e ya milulugal ing grasyang lugud at kapayapan a makaibye mu nung e ing kekatamung Dios at tagapagligtas, I Jesus.

Nung magkasakit at e tamu akalingwan ing meging kasalanan da reng aliwang tau kekatamu, talanga tala reng buntuk tamu at lawen ya king babo ning krus at pigunaman nung makananu nang pepakit ing tune ng lugud king tau.  At nung kaybat na niti e tamu parin agawa ing mamatawad at sasabyan ta parin na e ta talaga akalingwan ing depat da  kekatamung kasalanan, sasabyan na kekatamu ngeni ning Ginung Jesus, na sana, e naka tamu kapilan man mikasala at e tana kailangan ing kapatawaran. Amen.

V. Pamanahimik

VI Tauling Panalangin

Ginung Dios, dakal a dakal a salamat kareng kekang turu. Ngening kaorasan pu, midinan na ke na namang grasyang kapilan man e na abayaran ning pera. Iti pin Ginu, yapin ing grasyang mamatawad na siguradung ating kayakibat a lugud. Ngening kaorasan pu abalu mi nung nukarin ating pamamatawad ating kapatawaran. Nya king kegana-gana, patawad pu Ginu, patawad pu! Amen.

VII. Kutang

1.    Nanu ing panandaman tamu neng atin tang agawang e ustu karing aliwa at kaybat   petawaran na katamu?
2.    Nanu mong penandaman mu nyang mematawad ka?
3.    Ibye ya ing sariling opinyun.  ”Bilisan tamu ing pamanugse king sarili tamu at bagalan ta naman ing pamanusga karing aliwa.”