Ing Anak a Mebating at ing Tatang a Malugud
I. Pamuklat a Panalangin
Ibpa, kalugud mu kekami. Nya naman marapat mu ing samban, purian at pasalamatan daka. King kaorasan pu pamasalan yu kepu kareng kekayung amanu at dinan kababan lub ban masaya milang tukyan deng kekang kaburyan. Amen.
II. Pamamasa
Lucas 15: 1-3, 11-32
Kanitang misan, linapit la kang Jesus ding dakal a talapanyingil buis at makasalanan ban makiramdam. Mibulungan la ding Pariseo at ding talaturu ning Kautusan. Ngara “Makisalamuha ya ing taung iti at makisulu karing makasalanan!” Inya sinabi neng Jesus karela iting talimhaga: Ngana pang Jesus, “Ating metung a taung ating aduang anak a lalaki. Ngana ning bungsu, “Tatang, ibie mu na kanaku ing mana ku.” Pinitna na ning tata ing bandi na karing adua nang anak. Kaybat ning mapilan a aldo, pisali na ning bungsu ing mana na at minta ya king marayung bansa. Darala na la ding sablang ayabli na. Karin na la ginastus ding pera na king e ustung pamibiebie. Inyang agastus na la ngan ding pera na, mika maragul a danup king bansang ita at megipit yang e mu nanu. Inya mekipagobra ya king metung a taung mabandi king bansang ita. Pepapuntalan ne niti king baryu ban manese babi. Buri nang pakabsian ing sarili na agyang karing bungang tanaman a kakanan da ring babi, oneng alang minie keya. Inyang api-isip-isip na ing kabilian na, nganang mekebalak, “Karakal na ipus tatang ko at sawa-sawa lang pamangan, kabang aku mamamate kung danup keti! Magbalik ku kang tatang ku at sabian ku, “Tatang, mikasala ku king Dios at keka. E na ku karapatdapat mayaus pang anak mu; ibilang mu na ku mung metung karing ipus mu.” Inya tinalakad ya at migbalik kang tatang na. “Marayu ya pa ikit na neng tata na at tutu yang melunus; inya memulayi yang sinalubung keya; kinaul ne at penuma. Ngana ning anak, “Tatang, mikasala ku king Dios at keka. E na ku karapatdapat mayaus pang anak mu.” Oneng sinabi na ning tata karing ipus na, “Mamalagwa kayu! Dala ye keni ing masanting diling imalan at ipasulud ye keya. Pasuluran yeng singsing at sandalyas. Kuanan ye ing pataban a biserung baka at paten ye; mangan tamu at magsaya! Uling ing anak kung iti mete ne, oneng meyakit yang pasibayu.” At megumpisa lang migsaya. Atyu kanita king marangle ing anak a pangane. Inyang pauli ya at malapit ne king bale, mekaramdam yang tigtigan at terakan. Inaus ne ing metung karing ipus at kitnan ne, “Nanu ing malilyari keti?” Pekibat na ning ipus, “Dinatang ya pu ing kapatad yu! Pepapate neng tatang yu ing biserung bakang pataban, uling ing kapatad yu mibalik yang mabie at alang sakit.” Mimua ya ing pangane at e bisang lungub. Inya linual ya ing tata at inaru ne. Oneng sinabi na, “Siyuan da kayu kilub ding dakal a banua at kapilan man e ra kayu pepasukal a lub. Agyang misan mu e yuku dininan biserung kambing ban pagtawan ku la ding kanakung kakaluguran! Ngeni mong dinatang ya ing anak yung yan a minyira king kekayung pibandian karing babaing magtinda king katawan da, pepapate ye pa ing biserung bakang pataban!” Ngana ning tata, “Anak ko, kapilan man kayabe ra ka at keka ing sablang bandi ku. Sukat tamung magsaya at tumula uling ining kapatad mu mete ne, makanyan man sinubli yang mebie; mebating ya at meyakit ya.”
III. Turu
Ating metung a pamilya, na kabang manalbe lang tibi misan a bengi, kabud dimdam da nya mu ing metung a pusang ngingyaw king arap dang pasbul. Nyang buklat ne ning tatang ing pasbul, kabud nya linub ing metung a pusang kule abu na ating makapal at makabang buwak. Miglalawe ya ing pusa kilub ning bale at kabud nya linundag king metung a luklukan na balamu dati ng pipagkeran. E la makapaniwala ding pamilya king karelang ikit, uling ing pusa dang mawawala kilub ning pitung banwa na miglagalag, oyni atyu king arpan da’t migbalik.
King ebanghelyu ngeni, kukwentu ne ning Ginu tang Jesus ing metung a talimhaga tungkul king metung a tatang a tinggap neng mitmung tula ing sisisi nang anak king pamagbalik na bale. Adya pang maragul ing agawa ng kasalanan ning kayang bunsung anak; kingwa no reng mana na adya pang i tata na maybe ya pa. Kaybat nong ikwa reng mana na pisali no reti at minta ya king aliwang lugar at karin linuste no reng pipagalan ng tata na (mana). Leko na ing dangalan na ning bunsung anak, migbabad ya king kasalanan. Pinutut na mismu ing kayang relasyun king kayang tatang pauli ning materyal a bage na makabye mung kuswelu pansamantala. Anyang megisan no ring pera na, memasukan yang ipus, at keni ing bunsung anak mas lalu yang mebaba pangatau, uling kapanwalan da reng Judio na ing babi metung yang marinat na e daman dapat talnan.
Itamu ing kukwentu ng Jesus king kayang talimhaga, uling maralas mikakasala tamu e mu Kaya pati na karing kapara tang tau. Pakipalit taya ing kekatamung dangalan o dignidad bilang kristyanu na maralas king mung mangalating bage. Agad tamung mimina at masasambut king tuksu. E taya didinan ulaga ing pamaging anak tamu king kekatamung Ibpang atyu banua. Na e tabalu na ing mumunang mayap a balita na daralan ning Ginu Jesus keka tamu yapin ing atin mayap ai maganakang tatang na parating makalawe at manantabe kekatamu.
Agya pang mikasala tamu kaya ala yang patugut manenaya king pamagbalik tamu king tutu tang kabilyan. Parati yang manenayang salubung kekatamu ban ipag-adya na katamung maragul a anda. “Mamalagwa kayu! Dala ye keni ing masanting diling imalan at ipasulud ye keya. Pasuluran yeng singsing at sandalyas. Kwanan ye ing pataban a biserung baka at paten ye; mangan tamu at magsaya! Uling ing anak kung iti mete ne, dapot sinubli yang mebie; mebating ya, dapot meyakit yang pasibayu.” Amen.
IV. Pamigunam
Maragul tamu pamialiwa king Apung Ginu. Itamung tau mabilis tamung manusga kareng mikakasala keka tamu, pero ing kekatamung Ibpa marakal at madalas manenaya ya keka tamu king pamagbalik ta kaya. Ala yang patnang mamatawad kareng keka tamung agagawang kasalanan. Makabuklat ya parati pusu at gamat, pupulayi yang sasalubung kekatamu neng magbalik king pibale-bale tamu.
Maralas pangilagan tala reng usgan tamung e mayap a tau pero ing Ginu tang Jesus malulunus ya karela at ala yang aliwang buri nung e ing karelang kaligtasan. Ing bunsung anak tuturing yang mete, nya buri neng dinan bie Jesus. Buri ng Jesus na mibalik ya king kayang Ibpang mayap at maganaka.
Makapagmulala ing gewa na ning Apung Ginu karing ayup a ating abilidad mibalik kareng dati dang tuknangan. Keng pamagrebeldi ta king Apung Ginu, akakit tapang mas atin la pang maragul a kakayahan deng ayup magbalik king karelang dating tuknangan kesa kekatamu. Tandanan tamu na melalang tamu king ganaka at kayapan ning Apung Ginu. At ya sanang gawang tang maragul a dahilan ban tang magbalik kaya. King kayang presensya, ating pagasa, lugud, alang patnang pamamantabe at tune saya’t tula. King pamagdayu ta Kaya, ating pansamantalang saya, pero kapalit ing alang-anggang alang pag-asa at matinding lungkut at kasakitan. Nya “Tara na abe, kapatad manenaya ne i Tatang keka ta! Amen.
V. Pamanahimik
VI Tauling Panalangin
Tatang mi po, dakal a salamat king maragul mung pakamal at lugud keka mi. salamat mu rin king talimhagang tiru yu ngeni keka mi. Dinan mu kaming pusung mapagmalasakit at mapaglunus ban aluguran milang tutu reng kekaming pamilya at kaparang tau adya pang malili la king tune dalan. Amen.
VII. Kutang
1. Nanu lang kekatamung kasangkanan ot bakit e ta lubus bisang miye lunus at tanggap kareng mikakasala kekatamu?
2. Atin kang karanasan, na misan mig tampu ka kang tatang mo? Nanu mo ing gewa ng tatang mu ban mibalik ka king bale yu?
0 comments:
Post a Comment