Pentecost

Pepakit Ya I Jesus karing Alagad Na

I. Pamuklat a Panalangin

(Ikanta ya ing Come Holy Spirit ……)

Ibpa ming malugud dakal pung salamat king kaorasan a pigkalub mu ngeni kekami, antabayanan yu kami ban apagtagumpayan mi ing kekaming keynan. Maralas pu tigang kami king Espiritu, tutuknang mangadi, magduda, at milalako kapanaligan. Anyaran miya ngeni ing saup ning Banal a Espiritu, ing babye bie at ini pu pasalamatan at anyaran mi king lagyu ning kekang Anak, I Jesus. Amen.
II. Pamamasa

Jn 20: 19-23

19Kanitang bengi na ning aldo mu ring ita, mitipun la ding alagad.  Pakasara la ding pasbul king lugal nung nu la makatipun uli na ning takut da karing Judio.  Dinatang ya I Jesus at tinalakad ya libutad da.  Ngana karela,  “Kapayapan kekongan.”  20 Pangasabi na niti, pepakit na la karela ding gamat na at ing katalindikinan na.  Mesaya la ding alagad panakit da king Ginu.  21 Pasibayu nang sinabing Jesus karela,  “Kapayapan kekongan.  Nung makananu na kung tinubud ning Ibpa, makanyan da kayu namang tutubud.” 22 Pangasabi na niti, pengisnawanan na la at sinabi na,  “Tanggapan ye ing Banal a Espiritu. 23Nung patawaran yu la ding kasalanan na ning ninuman, mipatawaran la; ing e yu patawaran e ya mipatawaran.”

III. Turu

Pagmasusyan taya ngeni ing aldo na ning Pentekoste, na nung nukarin tinubud ne ning Dios ing kayang Espiritu ban mantabe kekatamu. King Matuang Tipan, ikit tamu nung makananu ing pamanantabe nang YHWH kareng Israelita king pamaglakbe da king disyertu papunta king mipangakung gabun para karela. King pamaglakbe da neng aldo penimunan na lang YHWH kapamilatan na ning metung a asias a biga ban ituru ing dalan at neng bengi naman kapamilatan ning metung a asias a api ban dinan na  lang sala (Ex. 13:21). Nya ikit ta keni nung makananu i YHWH, metung yang Apung Ginung parating manantabe kareng kayang sasakupan, aldo man o bengi.

King mabilug a bie ning Ginu tang Jesu Kristu, e taya dapat kalingwan na ing Banal a Espiritu parati yang manantabe Kaya. King binyag, king kayang  pamanuru, pamanulu at potang tutuksuan ne ning Diablo atsu parating manantabe Kaya. King pamanubud ning Ibpa king kayang Anak alang oras na ing Banal a Espiritu e ya manantabe. Nya ikwa na ning Anak ing sablang kayupayan at tagumpe king krus  pauli ning pamanantabe ning  Banal a Espiritu.

Bayu ya mitas banua ing Ginu tang Jesu Kristu pekikwanan na la namang tinubud deng kayang alagad. King pamanubud na karela pengisnawanan nala   at binye ne karela ing Banal a Espiritu ban deng maging kayantabe king karelang misyun. At ing  Banal a Espiritung ayni  na kalupa ning asias a biga at api ning Matuang Tipan iya ing mamye dalan ban e la malili king  misyun at yang mamie sala ban maging malino nung nanu ing kayang kaburyan.

King kasalukuyan tang panaun, itamung Katolikung Pilipinu, e taya  masyadung didinan pansin  ing Banal a Espiritu.  Mas didinan ta pang maragul a pansin ing kapagmasusyan  ta
kareng kekatamung patrun (piesta) o kaya naman  ing  pamagnobena kareng santu.  Nung kutnan da katamu ngeni nung ninu ing Ibpa agad tang makapakibat at nung kutnan da katamu mu naman nung ninu ing Anak, mas saguli tang makapakibat pero nung kutnan da katamu nung ninu ing Banal a Espiritu, e ta agad makapakibat. Kulang tamu kabalwan tungkul king Banal a Espiritu, ing e ta balu, iti ya ing panaun na ning Banal a Espiritu angga king datang yang pasibayu ing Ginu tang Jesu Kristu. Ya ing Pwersa o bibie lakas ban gawang mayap, Ya ing manantabe neng atyu tamu king masipit a pamangailangan, Ya ing bibye bie o pangisnawa, Ya ing kokonekta king Ibpa, king Anak at kekatamung talasalpantaya, Ya ing sangkan ning kekatamung pamibuklud-buklud o pamikakalugud, Ya ing egana-gana, uling ing Ibpa, Anak at Espirutu Santu metung lamu. Amen.

IV. Pamigunam

King libru ning Matuang Tipan, ikit talang miglakbe deng Israelita king disyertu. At balu tamu nung makananu kasakit ing bie king disyertu. Malakas ing angin, marakal a mabangis a animalis lalu na neng bengi, alang danum, mapali pero sobra ing dimla neng bengi. At iti balu nang YHWH, at ikit tamu nung makananu ya menantabe ing Dios kareng Israelita.

Kekatamu namang Kristiyanu keni Pilipinas, balu ta namang e ta maglakbe at e ta araranasan ing bie king disyertu pero atin tamung a ibye kabaldugan king disyertu. Maglakbe tamu mu naman, nyayta e king disyertu nune karing pagsubuk, problema, sakuna ning bie. E tamu sasabyan ing kasakit ning mabibie king disyerto, nune ing parati tang sasabyan ing kasakit ning bie, kasakit ning bie kalulu o kaya naman kasakit ning alang kakilala o kakapitan. Ing mabayat at masakit pa king kasalukuyan tang panaun ing magkapilit talakad king katutuan at kayapan., Masakit ing bisang maging mayap. Nya naman, e ta sana susuku  kareng disyertu ning bie tamu. Uling ing Ginu tamu mu namang Jesus ati yanamang disyertu at ing e tapa kakalingwan ing tinuksu ne pang mekatatlu  ning Dyablu king disyertu. E tala sana kakalingwan deng amanu ning Ginu tang Jesus ngana “Maniawad ku king Ibpa at dinan na kayung Talasaup a akayabe yu kapilan man (Jn. 14:16). Deng asias a biga ampong api ilang meging talasaup dareng anak ning Israel. Itamu namang Kristiyanu ing Banal a Espiritu yang maging talasaup tamu, “Saupan na kayu paniatang na ning Espiritu ning katutuan ban aintindian yu ing sablang katutuan (Jn. 16:13).  At nung kikilalanan tamu na ding katawan tamu templo na la ning Banal a Espiritu  na tinggap tamu king Dios(1Cor. 6:19), makasiguradu tamung tayran at ituru na katamu king pamaglakbe tamu king yatung iti na ating lugud, tula, kapayapan, kapibabatan, ganaka, kayapan, katapatan, kapakumbaban at pamangawat king sarili (Gal. 5:22-23). Amen.

V. Pamanahimik

VI. Tauling Panalangin

King balang pangadi tamu, ing pakibat tamu: “Kapnuan mu kami king kekang Espiritu”.

    Para kareng lider mi king pisamban at gubyernu na parati yo pung  tayran at ituru ning Banal a Espiritu king karelang gagawan. Pakibat pu.
    Para kareng pengari, na parati nong dinan sikanan ning Banal a Espiritu na mamye mayap a alimbawa kareng karelang anak. Pakibat pu.
    Para kareng anak, na parati nong dinan matalas a isip ning Banal a Espiritu ban idake ing karelang kagiywan king mangayap a bage. Pakibat pu.
    Para kareng komunidad Kristiyana, na parati nong dinan pamirespetu at pamikakalugud ning Banal a Espiritu. Pakibat pu.
    Para kekatamung atyu ngeni keni, na parating ing pamisanmetung yang itanam king pusu at kaisipan tamu ning Banal a Espiritu. Pakibat pu.

At ngeni pu mitatalnanan tang gamat at ikanta ya ing pangading tiru ning Ginu tang Jesu Kristu.

VII. Kutang

1.    Nanu la reng bage-bage na mengapalyari king bie tamu na dapat tang ipasalamat king Apung Ginu?
2.    Para keka sanu ing peka maragul a  milagrung gewa ning Banal a Espiritu king Jerusalem? Bakit?