Ing Kapakumbaban
I. Pamuklat a Panalangin Dios mi pung malugud a Ibpa, Buri mila pung ibuklat ding pusu at kaisipan mi kareng turu na ning kekang Anak, I Jesus. King saup na ning kekayu pung Banal a Espiritu dinan yu kami pung malino kaisipan. Patawaran yu kami pu kareng kekaming kakulangan. Amen.
II. Pamamasa
Lucas 14: 1, 7-14
Misan a Aldo ning Sabbath, mekumbira yang makipangan I Jesus king bale na ning metung a pamuntuk da ring Pariseo, at pegumasdan deng masalese ding tau. 7Apagumasdan nang Jesus nung makananu lang mamili karing luklukan pandangal ding mapilan a mekumbira. Selita ne karela ngan iting talimhaga. Ngana, 8“Nung kimbiran na ka ning ninuman king metung a kasalan, e me pipilinan ing luklukan pandangal. Pota ating mekumbirang ma marangal kesa keka. 9At lapitan na ka ning mengumbira kekayung adua at sabian na keka, ‘Paburen meng lukluk king luklukan mu ing taung ini!’ Mipakarine ka kanita at king pekamarayung luklukan karin ka lukluk. 10Ing masanting mung daptan neng mekumbira ka ya ing lukluk ka king pekamarayung luklukan. Lapitan na ka kanita ning mengumbira at sabian na keka, ‘Kakaluguran, keni ka king kabisera.’ Mirangal ka kanita king arapan da ring aliwang bisita. 11Uling ing ninumang magmatas mibaba ya, at ing ninumang magpakumbaba mitas ya.” 12Sinabi na naman Jesus king mengumbira keya, “Neng magtau ka, e mu la kukumbiran ding kekang kakaluguran o ding kekang kapatad o ding kekang kamaganak o ding masalaping siping mung bale, uling kumbiran da ka naman, at kanita miyablasan ka king depat mu karela. 13Neng magtau ka, ding kumbiran mu ila ding pakakalulu, ding lumpu, ding pile, at ding bulag. 14Mibendisyunan ka uling ila e ra ka ayablasan. Ablasan na ka ning Dios keng subli lang mie ding banal.”
III. Turu
King ebanghelyu, mekumbira ya ing Ginung Jesus makipangan king bale ning metung karing pamuntuk ding Pariseo. Kinumbira de e para maging kakaluguran nune buri dane na namang pakirakpan king kayang amanu at dapat. Buri dang damdaman king mismung asbuk na ing magkamali ya king pamanaral tungkul king kayaryan ning Dios. Pinlanu dang kumbidan de, ban ila mismu akit at damdaman da ing tungkul kaya. Sikat ne ing lagyu na kareng dakal a tau. At dening mamuntukan sasawa nong makaramdaman kareng kayang gagawan a miyayaliwang himala. Nya, kabang mamangan lang kayabe da, alang patna ing pamag-obserba da Kaya. Ing e da balu ila man pagmasdan no ning Ginu tang Jesu Kristo. Daramdaman na lang mipagkwentu, mipapagmaragul karing karelang agagawang e ustu at ustu. Singka magaling, mipapagparangalan la at alang bisang paysambut, buri da bida la ngan. At apagmasdan no ning Ginung Jesus ding mapilan kareng bisita king pamamamili dang luklukan pandangal. At kanini ne pin sinabi kareng kegana-ganang atyu karin ing metung a talimhaga. At ing talimhaga tungkul ya king panugali dareng bisita king metung a andaan: Dapat deng mekumbida lukluk la king pekatawling luklukan, at potang akit no kanita ning miki ukasyun agkatan na lang lukluk keta king masating at makayunang luklukan. Ing istorya ning talimhaga tungkul ya king kayaryan ning Dios na panagkat na kareng sablang tau. Ausan na katamung makipag-saya at makipangan. Oneng maralas potang meyagkat tana king andaan, asna na katamu kapagmaragul. Akakwa tala pang pagsisti reng taung makapadurut kekatamu. Pipagkwentuan ta pa ing kapalpakan a agagawa da. Ing lawe tamu king sarili matas. Kakalilwa tana ing sarili tamu, uling bala tamu mas banal ta kesa kareng aliwa. Gagawan tanang importanti ing sarili tamu. Buri tamu agad da katang sikaswan o dinan pansin neng ating ukasyun king kekatamung komunidad. Makanini ing kaburyan tang lukluk king pandangal a luklukan. Nya potang makanini ing maging kekatamung panugali, Ing miki ukasyun, ing Ginu tang Jesu Kristo sabyan na kekatamu ing “Pabustan meng lukluk king luklukan mu ing taung ini, taung makasalanan, sisisi, at manyawad pakalulu at kapatawaran kareng agawa ng kakulangan.” Amen.
IV. Pamigunam
Dakal tamu paralan gagawan ban da katamung pansinan ding tau. Buri tamung sumikat nya pagpursigyan tang mika masanting a bale, kotse, alahas at miyayaliwa pang bage. Buri tang mabanggit ya pa ing lagyu tamu potang atin tang sinaup king metung a proyektu. Bala tamu ing saya at tula manibat king bage-bage ayni. Pero, ngening kaorasan payabut na kekatamung Jesus nung makananu ing dapat tang panugali, Buri na katamung maging mababa lub ning Ginung Jesus. Uling kapamilatan ning kababan lub karin ya mibubuklat ing pasbul ning kayaryan ning Apung Ginu. Ing Ginu tang Jesus tiru nane ing dalan ning kababan lub nyang tauling apunan ngana, “Ninu ing lalung marangal, ing makalukluk king lamesa o ing susuyu keya? Siempre, itang makalukluk. Oneng atyu ku libutad yu bilang metung a talasuyu” (Lk 22:27). Ing buung bie ning Ginung Jesus, bie yang pamagsilbi, bie yang ating maragul a kababan lub. E ya meg-alinlangan at e ya mig espek a kapalit kareng mayap ng gewa kekatamu. Anyaran na kekatamu ngeni ning Ginu Jesus, na nung mas maging malapit ta Kaya, mas lalu ta sanang maging mababa lub. E tamu sana sukat ipagparangalan deng kekatamung agagawang kayapan, nune ing isipan tamu ing e gana-gana manibat mu Kaya at para Kaya ngan iti. Uling ing metung a ipus magtiwala ya kareng amanu na ning kayang panginwan. “Makanyan munaman kekayu; nung arapat yu na ing sablang inutus da kekayu, sabyan yu, Mistula kami mung ipus; tinupad kami mu king kekaming katungkulan.” (Lk. 17:10). Amen.
V. Pamanahimik
VI. Tauling Panalangin
Ginung Jesus, maralas pu mimwa kami kareng taung mantun kasikatan, kareng taung pagparangalan da ing karelang pibandyan. Mimwa kami pu uling maiinggit kami karela. Maralas pu kasi bisa kami namang sumikat at mikwalta. Salamat pu king mayap a balita, na sasabi ngeni kekami na ala king pusisyun o king materyal a bage ing pamagdakila ning metung a tau. Keka yu pu, ing mas importanti reng pusu ming mababa lub na makayandang sumuyu kareng aliwang tau. Sopan yu kami pung parating pantunan ing pamibie-bieng ayni. Amen.
VII. Kutang
1. Nanu ya kabaldugan ing kababan lub keka?
2. Ating bang grasya neng mababa tamu lob? Ikwentu.
3. Otmo deng pakakalulu, ring lumpu, ring pile, at ding bulag reng buri ng kumbiran Jesus king kayaryan ning Dios? Nanu wari ing atyu o atin karela?
Download here:
Page 1: http://www.mediafire.com/file/nnzmjz52x5n/08.29.10 pg. 1.doc
Page 2: http://www.mediafire.com/file/1km5x5mzjiz/08.29.10 pg. 2.doc
0 comments:
Post a Comment