Kanam a Dominggu ning Ordinaryung Panaun

Tuturu Ya at Manulu I Jesus

I. Pamuklat a Panalangin

Ibpa, king mitmung kababan lub, daraun miya pu ing kaorasan ayni, Ika pu Ginu ing mag ari at mamye kekaming inspirasyun ban lalu miyang lubus aytindyan ing bage ispiritwal at bage materyal. Maralas pu kasi mabubulag kami king babie na ning yatung iti, bala mipu kasi ing magpaligaya mu king tau yapin ing mika pibandyan. Para kanini, patawad pu. Amen.

II. Pamamasa

Lukas 6: 17, 20-26

Kinuldas ya I Jesus king bunduk-bundukan a kayabe ra. Miras ya king kapatagan at disnan na la karin ding dakal karing alagad na. Atyu la naman karin ding dakal a taung menibatan king mabilug a Judea at Jerusalem at menibatan karin Tiro at Sidon, ding aduang siyudad king lele ning dagat ban makiramdam kang Jesus at paulu karing karelang sakit. Dinatang la naman ding liligaligan da ring marawak a espiritu at kinayap la. Pagkapilitan deng atagkil ding sablang tau, uling pakayapan na la ngan ning upayang lulual kang Jesus. Linawe na lang Jesus ding alagad na at ngana, “Mapalad kayu, ikong pakakalulu, uling kekayu ya ing Kayarian ning Dios! “Mapalad kayu, ikong danupan ngeni, uling mipakabsian kayu! “Mapalad kayu, ikong tatangis ngeni, uling mipaligayan kayu! “Mapalad kayu nung pikakasaman da kayu, tanggian at pamakarinayan at paniabianan e mayap king uli na ning Anak ning Tau! Tumula kayu at magsaya potang mapalyari na ita, uling maragul ing ablas a makapanaya kekayu karin banua. Makanyan kabud ing depat da ring karelang makatua karing propeta. “Oneng kalulu na kayu, ikong mabandi ngeni; tikman yu na ing kanawan! Kalulu na kayu, ikong ating labis-labis a pagkabie, uling dumanup kayu! “Kalulu na kayu, ikong magsaya king tula , uling tumangis kayu! Kalulu na kayu, ikong pupurian da ring tau, uling makanyan munaman ing pamipuring depat da ring makatua da karing e tutung propeta.


III. Turu

Dimdam taya ing mebasang ebanghelyu at kukuri kareng kaisipan at pusu tamu rening amanung ing mismung migsalita ing keka tamung Ginung Jesus. Lubos ba ing pamaniwala tamu na tutupin ing mapalad la reng taung atyu keng masipit at daralan kasakitan king bie?

Keti king yatu, akakit tamu na reng taung atyu king mabayat a problema, makalunus la. Reng taung alang pegaralan, makalunus la. Reng taung alang pibandyan, makalunus la. Ing panlalawe ta naman kareng taung atin pibandyan, mangaragul sweldu, atin pegaralan, maswerti la. Oneng e makanini ing panlalawe ning Ginu tang Jesu Kristo, e masusukad ing saya o swerti ning tau, nung nanu itang atyu kayang materyal a bage. Balu ning Ginu na ing anggang sablang akakit tamu, na yapin ing kegana-ganang materyal kumupas at mawala ngan.

At ngening kaorasan, pabalu ne ning Ginu keka tamu ing pamiyaliwa ning materyal at ning bage ispiritwal. Ing ispiritwal a bage e kukupas at e mawawala. Kakablas at miraras iti nukarin pa man at manatili iti angga king kapupusan ning yatu. Keng mebasang ebanghelyu, anya pemaligwan nong mapalad deng pakakalulu ning Ginu, uling king karelang sitwasyun, ing Dios ya ing laman da reng pusu ra. Iya ing panaligan da king oras-oras a pamibie-bie da. Ala-lang apagmaragul at asandalan nune mu ing Dios a maganaka at mayap. Oneng maralas, kareng makwalta ditak lamu retang talagang pupuri at sasamba king Apung Ginu. Mas didinan dang pansin o importansya ing karelang materyal o kaya ing karelang sikanan. Anya, makanyan nang pamasalan ning Ginu, na mapalad la reng pakakalulu.

Itang istorya nitang lalaking mabandi, na linapit kang Jesus at bisang tuki antimong kayang disipulus. E ya melaus meging disipulus , uling e na alakwan ing kayang pibandyan. Masakit king metung a mabandi ing lungub king kayarian ning Dios.

Metung pang istorya, itang mabanding mika masanting a pupul, uling king sobra na ing kayang kayatinan, sinabi na keng sarili na, maswerti ya , mangan at matudtud nya mu. Oneng kwanan na ne bie ning Apung Ginu king benging ita. Nanung apala na nen mong atin yang pibandyan. Lakwan namu at ala yang adala agya pang malati o maragul king pibandyan. Amen.

IV. Pamigunam

Ngening malapit na naman ing pamagmasusi tamu king Mal a aldo o ausan tamung Kwaresma. Pasibayu tamung sumuri king bie tamung ispiritwal. Mabibie tamu ba king bie ispiritwal na miraras mangga man king alang angga? O atyu tapa king upaya ning yatung iti? Na, alang isipan nung makananu ing mika pibandyan ban maging Masaya. Wa, tutu maging masaya tamu potang atin tamung pibandyan. Oneng iting sayang iti, e magluwat, uling potang ikwa tane itang bage buri tamu atin ta namang buring akwa o adwanan. Kukupas kasi iti at mawawala. Oneng ing bage ispiritwal, tutung makabie bie uling iti manibat king Dios Espiritu Santu.

Iti ya ing amanuan ning Ginung Jesus, “Aku ing tinape ning bie…Aku ing danum a mabie….Aku ing sulu ning yatu….Aku ing dalan, katutwan at ing bie. Oyni dapat ing dinan tang maragul a pansin ing kilalanan yang miyamas-amas ing Ginung Jesus at tuparan deng kayang katuruan. Amen.

V. Pamanahimik

VI Tauling Panalangin

Ginung Dios, dakal pung dakal a salamat kareng katuruan a babie yu kekami. Maralas pu ing daralan kaming kapagsubukan king bie, at maging mayan iti at maging malakas kami lub pauli ning pamamie yu pung kamasalan king bie ispiritwal. Amen.

VII. Kutang

1.Nanu para keka ing mabibie king ispiritwal?
2.Dakal la bang taung mabibie king ispiritwal?
3.Okey mu ba ing maging mabandi king yatung iti? Nung wa o ali, Bakit?

Download here:

Page 1: http://www.mediafire.com/file/konxmorz1zm/02.14.10%20%20pg.%201.doc
Page 2: http://www.mediafire.com/file/zmzzmdnknmm/02.14.10%20%20pg.%202.doc