Kalimang Domingo ning Kuaresma

Ing Pangamate ng Lazaro

I Pamuklat a Panalangin

Malugud at mayap a Ibpa, ngeni pung kaorasan asna kami pu kapalad uling parati yu pung babie ing kekayung grasya. Dakal pung salamat king pamagkalub yu kekami king kekayung Anak i Jesus na pabalu at pepakit na ing bieng ayni manibatan ngan keka. Amen.

II. Pamamasa

Juan 11:1-45

Ating metung a taung masakit; Lazaro ing lagyu na. Tau ya Betania, ing balen nang Maria at ning kapatad nang i Marta. (2I Maria ya ing mitugtug pabanglu at menamulis karing bitis na ning Ginu king kapamilatan na ning buak na. Kapatad ne i Lazaro, ing masakit.) 3Inya pepabalita da ring mikapatad a babai kang Jesus ing anti kaniti: “Ginu, masakit ya ing kakaluguran mu. 4Inyang tinggap nang Jesus iting balita, sinabi na, “E na ikamate iting sakit; nune milyari iti para king ikaligaya na ning Dios ban mipaligayan ya ing Anak ning Dios king kapamilatan na niti.” 5Kaluguran na lang Jesus di Marta, Maria at i Lazaro. 6Inyang abalitan nang masakit ya i Lazaro, menatili ya pang aduang aldo king lugal nung nu ya karin. 7Kaybat na nita, sinabi na karing alagad. “Tara, magbalik tamu Judea.” 8Ngara ding alagad, “Maestro, bayu pamu buri da kang basibasan ding Judio; ngeni magbalik na ka na naman karin?” 9Nganang Jesus karela, “E ya wari labing aduang oras ing patingapun? E ya mitakid ing ninumang lalakad king masala uling akakit na ing sala na ning yatu. 10Oneng mitakid ya ing ninumang lalakad king bengi uling alang sala keya.” 11At ngana pa, “Matudtud ya ing kakaluguran tamung i Lazaro, oneng puntalan ke ba keng gisingan.” 12Ngara ding alagad, “Ginu, nung matudtud ya, mipaldan ya.” 13Ing buri nang sabyan Jesus, mete ne i Lazaro; bala da ring alagad ing karaniwan a pamanudtud ing amanuan na. 14Inya malino nang sinabing Jesus karela, “Mete ne i Lazaro. 15Oneng king uli yu matula ku king ala ku karin ban maniwala kayu. Tara, puntalan ta ya.” 16I Tomas a mayayaus kambal, sinabi na karing kalupa nang alagad, “Tara, tukian ta ya ing Maestro ban nung mate ya, mate tamu munaman!” 17Inyang miras ne i Jesus, abalu na king apat neng aldo mikutkut i Lazaro. 18Malapit ya ing Betania king Jerusalem; ating atlung kilometru manibat karin. 19At dakal lang Judio ding dinalo kari Marta at Maria ba da lang damayan uli na ning pangamate na ning kapatad da. 20Panamdam nang Maria king daratang ya i Jesus, tinipa ya at seganan ne. Melakuan ya i Maria king bale. 21Nganang Marta kang Jesus, “Ginu, nung atyu ka keti e ya sana mete ing kapatad ku! 22Agyang ngeni balu ku king ibie na keka ning Dios ing nanumang aduan mu.” 23Nganang Jesus kang Marta, “Mie yang pasibayu ing kapatad mu.” 24Mekibat ya i Marta, “Balu ku king mie yang pasibayu king tauling aldo.” 25Nganang Jesus, “Aku ing pamaniubling mebie at ing bie. Ing maniwala kanaku, agyang mate ya, mie yang pasibayu; 26at ing ninunamang mabibie at maniwala kanaku e mate kapilan man. Paniwalan mu ite?” 27Nganang mekibat, “Wa, Ginu paniwalan ku king ika ing Cristo, ing Anak ning Dios a datang keti king yatu.” 28Pangasabi na niti, meko ya i Marta at inaus ne i Mariang kapatad na at sinitsit na, “Atyu ing Maestro, kukutang na ka.” 29Panamdam nang Maria kaniti, memalagua yang tinikdo at selubungan ne. (30E pa miras kanita i Jesus king balen; atyu ya pa king lugal nung nu ne seganan Marta.) 31Inyang ikit deng memalaguang tinikdo at linual, tikian de i Maria ding Judiong darame keya king bale. Bala ra munta ya king kutkutan ban manangis karin. 32Miras ya king lugal nung nu ya karin i Jesus. Panakit na kang Jesus
siniklaud ya i Maria king arap na at ngana, “Ginu nung atyu ka keti e sana mete ing kapatad ku!” 33Panakit nang Jesus king i Maria manangis ya at pati ding Judiong kayabe na, mengisnawa yang malalam at metagkil ya kapanamdaman. 33Nganang
kinutang Jesus karela, “Nu ye kitkut?” Mekibat la, “Mekeni, Ginu at lawan mu.” 35Kiniak ya i Jesus. 36Inya sinabi da ring Judio, “Talagang kaluguran ne i Lazaro!” 37Oneng ngara ding mapilan, “Pepasala ne mata ing bulag! Baket pepaburen neng mete i Lazaro?” 38Pasibayu yang mengisnawang malalam i Jesus at kaybat minta ya king kutkutan. Iti metung yang kueba a makatakap batung maragul. 39Nganang Jesus karela, “Ilako ye ing batu.” Mekibat ya i Marta, kapatad na ning mete, “Ginu, mamau ne kanyan uling apat neng aldo makakutkut!” 40Nganang Jesus, “E ku wari sinabi keka king nung maniwala ka akit mu ing ligaya na ning Dios?” 41Inya leko re ing batu. Tinalanga ya banua i Jesus at ngana, “Ibpa, pasalamat ku king pakiramdaman mu ku. 42Balu ku king pakiramdaman mu ku kapilan man, oneng sinabi ku iti king uli da ring taung atyu keti ba lang maniwala king ika ing mitubud kanaku.” 43Pangasabi na niti, kinulait yang masikan. Ngana, “Lazaro, lumual ka!” 44Linual ya ing mete; makabalut la ding gamat at bitis na king telang pamburul at makabalut yang imalan ing lupa na. Nganang Jesus karela, “Kalagan ye at paburen yeng lumakad.” 45Uli na niti, meniwala la kang Jesus ding keraklan karing Judiong dinalo kang Maria at menakit king depat na.

III. Turu

Asna karagul kalam kekatamung tau ing pamikatawan ng tau ning Ginu tang Jesu Kristo. Uling king kapamilatan na niti, ikwa ng abalu at aranasan ing kapanamdaman tamu. Masala tang ikit iti king mebasang ebanghelyu nyang kinyak ya ing Ginung Jesus keng pangamate ning kaluguran nang i Lazaro. Ing Ginung Jesus, antimong kalupa tang tau, potang ating mewala bie kareng kaluguran tamu siguradu mu ing panamdaman ta iti. Nya nung nanu man ing daranasan tang kapagsubukan o problema, siguradu mung ayntindyan na katamu.

Metung mu naman kareng buri ng ipayabut ning ebanghelyu, yapin ing emu king saya o tula taya akakayabe ing Ginung Jesus, nune maski pa king mabayat o masipit a sitwasyun ta king bie. Maralas pin ing mas panamdaman taya ing presensya ning Ginung Dios neng atyu ta king mabayat a sitwasyun. Uling potang maybug tanang sumuku, karin taya ausan at pasaklolu Kaya. Iyang mamye lakas ban e tamu sumuku kareng kapagsubukan ning bie.

Ating metung a lider king Guagua, ngana pin nyang minsan, “Kaylangan ne talaga ning tau ing kasakitan”, uling kapamilatan ning kasakitan karin taya panamdaman ing ating parating pag-asa. At ing pag-asang iti yapin ing Ginung Jesus na parating sasaklolu kekatamu.” Digdag na pa, “Makananu meng abalu ing pamag-asa nung alang kasakitan? At panamdaman tamu ating malugud at mayap a Dios nung ating kasakitan king bie.” Amen.

IV. Pamigunam

King mitmung katahimikan, ganakan tala reng mangasakit a mengapalyari king bie tamu.. Ganakan tala reng kaluguran ta king bie na misan kayabe tala king tula, saya at lungkut. Suryan tala reng sarili tamu, nung makananu talang alampasan reng mangasakit a mengapalyari king bie tamu. (Limang minutung katahimikan). Ninu reng taung memye kekang sikanan ban akabyusan ing mabayat a problema? Anyang ala nang taung mekasaup ketang maragul at mabayat mung problema, Ninu ing inaus mu? Kaninu ka pesaklolu?

Siguradung metung yamu ing ausan tamu potang ala tanang akarapat, at iti yapin ing Ginu tang Jesu Cristo.. na e na katamung agyung tiisan. Mikatawan yang tau ing Ginu tang Jesus ban na katamung ayabut. Pebustan ng minta ya king sitwasyun tamu ban kanita mas lalu na katamung ayntindyan. Amen.

V.Pamanahimik

VI Tauling Panalangin

Dios a Ginu mi, dakal pung dakal a salamat king parating pamanantabe yu kekami. Abalu mi pu ngeni na kaylangan ya king tau ing kasakitan ban kanita e milako ing pamag-asa mi. Ikang parating pag-asa mi Ginu, uling nung ala ka, e maging ganap ing bie mi. Amen.

VII. Kutang
1. Nanu ya ing pekamabayat mung meging problema king bie na king kabalwan mu ing Dios ya ing ginawang paralan ban alampasan iti?
2. Para keka nanu ya kabaldugan ing kasakitan?
3. Nanung asabi mu king sinabi na nitang metung a lider king Guagua na, “Kaylangan ne talaga ning tau ing kasakitan”, uling kapamilatan ning kasakitan karin taya panamdaman ing ating parating pag-asa.”?

Download here:
Page 1: http://www.mediafire.com/file/2o3odd9x21b5kxk/04.10.11%20pg.%201.doc
Page 2: http://www.mediafire.com/file/6f6lw4ari3qinsg/04.10.11%20pg.%202.doc

Kapat a Domingo ning Kuaresma

Pepakayap neng Jesus ing Taung Mibait Bulag

I. Pamuklat a Panalangin

O Ibpa ning sala, payintulutan me y Jesus, ing sulu ning meto yatu, ing pakayapan na kami at pagkaluban kasalpantayanan at pamanalastas. Bustan mung ibalik no ring kekaming panimanman ban akit mi ya ing dalan payinturu keka at karing kapara ming tau at king kapupusan ning kekaming dalan akit daka sana. Iti yang adwan mi king lagyu ng Jesu Kristong Ginu mi. Amen.
II. Pamamasa

Juan 9:1-41

1King panaun a ita, kabang lalakad ya y Jesus ikit ne ing metung a lalaking bulag ibat pa king pangabayit na. 2Kitang da ring alagad na, “Maestro, ninu ing makikasalanan king pangabait nang bulag-ing lalaking iti o ding pengari na?” 3Mekibat ya I Jesus, “Bulag ya e uling mikasala ya o ding pengari na. Iti milyari ban king kapamilatan na mibulalag la ding dapat na ning Dios. 4Kabang aldo pa na sukat ta lang daptan ding dapat na nitang mitubud kanaku. Ing bengi daratang nung kapilan ala nang makapagobra. 5Kabang atyu ku king yatu, aku ing sulu ning yatu.” 6Inyang asabi na iti, linura ya king gabun at ginawa yang burak king kapamilatan na ning gabun at lura. At kiskas na ing burak karing mata na ning bulag. 7Ngana, “Munta ka at manimu king Sibul ning Siloe.” (Ing Siloe mangabaldugan yang “Tinubud.”) Inya minta ya at menimu at mibalik yang manakit na. 8Ngara ring keyang kasiping bale ampon ding menakit keya inyang bulag ya, “Aliwa iti ing lalaking parating makalukluk at magpalimos?” 9“Ya pin,” ngarang mekibat ding mapilan. “Aliwa ya, kalupa nia mu,” ngara naman ding aliwa. Oneng sinabi na ning bulag, “Aku ita.” 10Kitnan de, “Makananu lang mesala ding mata mu?” 11Pekibat na, “Ginawa yang burak ing taung ausan dang Jesus at kiskas na iti karing mata ku at sinabi na kanaku , ‘Munta ka king Siloe at manimu ka.’ Inya minta ku at menimu at menakit ku.” 12Ngarang kinutang, “Nu ya karin?” Nganang mekibat, “E ku balu.” 13Dela re karing Pariseo ing lalaking bulag. 14Aldo Sabbath inyang ginawa yang burak I Jesus at pepasala ne mata. 15Kitnan dia naman ding Pariseo nung makananu yang mesala mata. Nganang mekibat karela, “Kiskas na ing burak karing mata ku at menimu ku at ngeni manakit na ku.” 16Ngara ding mapilan a Pariseo, “E ya king Dios ing taung ita uling e ya tutupad king Aldo ning Sabbath.” Oneng sinabi da ring mapilan, “Makananu yang makarapat ing taung makasalanan karing anti kareting milagru?” Milaban-laban ing sasabian da. 17Inya pasibayu deng kitnan ing sadiang bulag. Ngara, “Ika naman, nanu ing asabi mu tungkul keya anti na ning pepasala na la ding mata mu?” Pekibat na, “Propeta ya.” 18E la bisang maniwala ding Judio king sadia yang bulag at ngeni manakit ne anggang e da la inaus ding pengari na. 19At kitnan da la, “Anak ye iti? Sasabian yu king mibait yang bulag. Nanu ing sangkan baket manakit ya ngeni? 20Mekibat la ding pengari na, “Balu mi king ya ing anak mi at king mibait yang bulag. 21Oneng e mi balu nung makananu yang manakit na ngeni o nung ninu ing mekapasala karing mata na. Kutnan ye; atyu ne king idad at makapagsalita ya para king sarili na!” 22Makanyan lang migsalita ding pengari na uling tatakut la karing Judio at uli na ning pikasundu da ring Judio king itiwalag de king sinagoga ing ninumang sumabi king I Jesus ya ing Cristo. 23 Inya ngara ding pengari na, “Kutnan ye; atyu ne king idad! 24Inya pasibayu deng inaus ing sadiang bulag ngara keya, “Sabian mu ing katutuan arapan na ning Dios! Balu mi king makasalanan ya ing taung ita.” 25Nganang mekibat, “E ku balu nung makasalanan ya o ali. Metung mu ing balu ku: kanita bulag ku, oneng ngeni manakit ku.” 26Kitang da, “Nanu ing depat na keka? Makananu na lang pepasala ding mata mu?”
27Pekibat na, “Sinabi kuna kekayu at e kayu bisang maniwala. Baket buri yung damdaman pasibayu? Bisa kayu namang maging alagad na?” 28At inunsultu de, ngara, Ika na sanang diling alagad na, oneng ikami alagad na kaming Moises. 29Balu mi king migsalita ya ing Dios kang Moises, oneng tungkul king taung iti, e mi man balu nun gnu ya ibat!” 30Nganang mekibat ning taung mesala mata, “Yan ing makapagmulala! E yu balu nung nu ya ibat, makanyan man ya ing pepasala karing mata ku! 31Balu tamu king e na la pakiramdaman ning Dios ding makasalanan, oneng pakiramdaman na la ding tune sasamba keya at tutupad king kaburyan na. 32Manibat na king pangalalang na ning yatu ala pang mibalitang mekapasala karing mata na ning mibait bulag. 33Nung e ya ibat king Dios ing taung iti, ala yang arapat nanuman.” 34Pekibat da, “Ikang mipanganak at meragul king kasalanan, ikang turu kekame?” At tiwalag de king sinagoga. 35Abalitan nang Jesus king tiwalag de; inyang ikit ne sinabi keya, “Maniwala ka wari king Anak ning Tau?” 36Mekibat ya, “Ninu ya, ginu, ban paniwalan ke?” 38Nganang Jesus, “Ikit mu ne at ya ing kapagsalita mu.” 37Ngana ning lalaki, “Maniwala ku, Ginu!” At sinamba ya kang Jesus. 39Sinabi nang Jesus, “Dinatang ku king yatung iti ban matul, ban manakit la ding bulag at mabulag la ding manakit.” 40 Dimdam da iti ding mapilan karing Pariseo a atyu karin kayabe na, at kitang da, “Ing buri mung sabian bulag kame?” 41Mekibat ya I Jesus, “Nung bulag kayu ala kayu sanang kasalanan; oneng sasabian yu ngeni, ‘Manakit kami,’ inya manatili kayung makasalanan.”

III. Turu
Ngening pagmasusyan taya ing Kapat ng Dumingu ning Kuaresma, tuturu na ning ebanghelyu na ing pamangilalang malalam king Apung Ginu metung yang prosesu. Dimdam taya ing istorya ning lalaking bulag, na kapamilatan ning Ginu tang Jesu Kristo meulu ya king kayang pangabulag. Mangabaldugan ing mamye murin palino o sala ban akilala tayang lubusan ing Apung Ginu yapin murin Ing Apung Ginu, grasya yang babye na iti keka tamu. At kaybat ng binye ing grasyang ayni keka tamu, kanita tapa akit na tunggal ditak akikilala tayang lubusan ing Apung Ginu. Anyang mumuna kitnan de ing lalaking bulag nung ninu ing mibalik king pamisala dareng kayang mata, ing pekibat na, “Ginawa yang burak ing taung ausan dang Jesus at kiskas na iti karing mata ku at sinabi na kanaku , ‘Munta ka king Siloe at manimu ka.’ Inya minta ku at menimu at menakit ku.” Kening dakeng ayni, ing balu namu ning bulag ing menulu kaya I Jesus. Kaybat kitnan dya naman ding Pariseo, nung ninu ing pepakayap kaya at keni ing pekibat na, “Propeta ya.” Kening dakeng ayni, ing bulag akilala na ne Ing Ginu tang Jesus na metung yang Propeta.
At king bandang tauli, anyang abalitan na ning Ginu tang Jesu Kristo na tiwalag de reng Pariseo king sinagoga. Ing mismung Ginu tang Jesu Kristo pepakilala na ing kayang sarili king dating bulag. “Maniwala ka wari king Anak ning Tau?” Mekibat ya, “Ninu ya, ginu, ban paniwalan ke?” Nganang Jesus, “Ikit mu ne at ya ing kapagsalita mu.” Ngana ning lalaki, “Maniwala ku, Ginu!” At sinamba ya kang Jesus. Amen.

IV. Pamigunam

Tutu pin kaluguran a kapatad na grasya yang manibatan king Apung Ginu ing kapagnasan tamung akilala taya. Iyang babies ala kareng mata tamu ban tayang akilala. King aldo-aldo tang pamibie-nie, ing Ginu tang Jesus ala yang sawang pakilala na ing tune ng lugud ning Dios kekatamu. Ing problema kekatamu, magbulag-bulagan tamung kalupa daring Pariseo kanita. Atin ping kasabyan na ing pekamasakit kanung gisingan yapin retang taung magtudturan. Reng masakit kanung turuanan yapin retang taung mimisip na balu danangan ing kegana-gana. Reng masakit kanung pastulan yapin retang taung sasabing balu dane ing dalan. Payabut na kekatamu ngening Jesus na reng taung sasabing kilala raneng lubusan ing Dios at lalon dalang mababa reng kalupa rang tau, makalunus la king arapan ning kayang Ibpang atyu banua. At reng taung makanini panugali, atin lapin sanang matang manakit pero king katutwanan ila ring bulag king arapan ning Apung Ginu. Amen.

V. Pamanahimik

VI. Tauling Panalangin

O malugud at maganakang Ibpa, dakal pung salamat king pigkalub mung mayap a oras kekami. Abalu mi pun a ika ing mamye grasya ban lalu rakang akilala. Parati yo pung pamasalan reng mata mi ban akit mi ing tune makaligaya Keka. Ing kapasalamatan, kapuryan at kapanyamban king Ibpa, Anak at Espiritu mangga man king alang angga. Amen.

VII. Kutang

1. Nanung gewa ng paralan ning Apung Ginu ban akilala me king bie mu? Ikwentu.
2. Panwalan mu bang kabang daralan tang kapagsubukan, mas lalu tayang akilala ing Dios? Wa o ali, paliwanag.
3. King kasalukuyan, king kekatamung komunidad, nanu la reng akakit tamung dapat midinan sala? Nanu ing dapat tang gawan?

Page 1: http://www.mediafire.com/?44tdgg834a5bh8w
Page 2: http://www.mediafire.com/?6zdxb3ah5z7v8a0

Katlung Domingo ning Kuaresma

I Jesus at ing Samaritana

I. Pamuklat a Panalangin

Ibpa mi pung malugud, patawaran yu kami pu kareng kekaming kakulangan kareng kapara ming tau lalu na pu kekayu. Ngeni pung kaorasan, anyaran mi na sumibul yapu sana ing Danum ning Bie karing pusu mi. Uling balu mi pu nung ala yu kareng pusu mi, malaut o imposible ing mie kaming ating kayapan, kapayapan at pamikakalugud. Amen.

II. Pamamasa

Juan 4:5-15

King panaun a ita, i Jesus kaylangan yang dumalan Samaria. 5Miras ya Sicar, ing metung a balen ning Samaria a malapit king gabun a pepamana nang Jacob kang Jose a anak na. 6Atyu karin ing talaga nang Jacob at anti ning mapagal ya i Jesus king pamaglakbe na, linukluk ya lele ning talaga. Halus kaugtuan nang aldo tapat kanita. 7Dinatang ya ing metung a Samaritana ban saklung danum. Nganang Jesus king Samaritana, “Maki-inum na ku mo.” (8Alalu kanita ding alagad na uling minta la king balen ban saling pamangan.) 9Mekibat ya ing Samaritana, Judio ka at aku Samaritana ku, obat maki–inum ka kanaku?” (Sinabi na iti uling ala lang pamakiabe ding Judio karing Samaritano.) 10Sinabi nang Jesus, “Nung balu mu mu ing babie ning Dios at nung ninu ing maki-inum, mekad ika na ing maniawad keya at ibie na keka ing danum a mabie.” 11Ngana ning babai, “Ala kang paniaklu, ginu, at malalam ya ing talaga. Nukarin ka kumang danum a mabie? 12Maygit ka pa wari king makatua ming i Jacob a minie kekami kaniting talaga? Mininum ya at ding anak nang lalaki at ding sese nang animal keting talaga.” 13Mekibat ya I Jesus, “Kumau yang pasibayu ing ninumang minum king danum niting talaga; 14oneng e ne kumau kapilan man ing ninumang minum king danum a ibie ku. Uling ing danum a ibie ku keya maging sibul ya kilub na at ibie ne ing bie alang angga.” 15Ngana ning babai, “Dinan mu ku kaniting danum, ginu, ban kanita e na ku kumaung pasibayu ni e na ku saklu keti.”

III. Turu

Ngening kasalukuyan asna karakal ing migluntong miyayaliwang danum. Atin ng “mineral water”, “purified water”, “distilled water” at atin la pang sasabyan na titinda da king dalan na “criminal water”. At nya kanu pamalagwan deng “criminal water”, uling kingwa da kanu iti king posu. Pauli na niti, memagluntu la ring miyayaliwang “water station”, at neng kayi akit mula pang siping-siping king metung a lugal.

Ing tema ning ebanghelyu tamu ngening katlung Dumingu ning Kwaresma yapin ing danum a bibye bie. Ing kutang nanu ing mumunang lulub king kaisipan tamu potang daramdaman taya ing amanung danum? Siguradung ing pakibat yapin ing metung ya karing bage importanti king bie ning tau. Nung ala yu iti, alang mabie bage sana keti king yatu. Uling reng kegana-ganang ating bie keti king yatu mangailangan la ngan danum.

Reng pipumpunan tamu keti Pampanga, menuknangan la king lele o pampang ning ilug, uling importanti ya king bie ing danum na ning ilug at nya ing sangkan nya inaus da katamung kapampangan. Makanyan murin reng Tagalug, na menukngan king lele mu naman king ilug, na nyang minuna inaus rong Taga-ilog at nyang melambat inaus danong Tagalug. Ing Pangansinan, uling malapit neman king dagat, at ing kabyayan da manibatan king danum ning dagat, at iti yapin ing asin, nya yang sangkan ot inaus dalang tau Pangasinan.

Nya kekatamungan ating bie, e taya akawani ing danum king aldo-aldo tang pamibie-bie. Kailangan ne ning kekatamung pisikal a katawan. Uling ing katawan tang pisikal atin ya dapat 75% a danum bayang masalese mibie-bie. Nya neng magkulang ta danum a katawan, siguradu mu ing mangayna tamu at ala tang ganang magobra.

At iti ya ing mayap a balita kekatamu ngeni. Ing Ginu tang Jesu Kristo bibye ne ing kayang sarili antimong danum ning bie, ban Iya ing mie lakas kekatamu neng daranas tang kapagsubukan, at neng mangayna ta kareng tuksu ning Dyablu. Kalupa na ning ordinaryung danum, na mamagus king mabilug tang katawan. Pabustan tamung ing Ginung Jesus, ing tune danum ning bie, iya ing magus keng mabilug tang pangatau ban kanita ing sablang gawan dareng kegana-ganang parti ning kekatamung katawan, mayap ngan. Amen.

IV. Pamigunam

King mitmung katahimikan, anyaran ta king Banal a Espiritu na dinan na katamung matibe kasalpantayanan king Anak ning Dios Ibpa, i Jesus. Pabustan na sanang sumala ta kaisipan ban akit na aliwa mu ing danum a ordinaryu ya ing importanti king bie tamu nune mas importanti ya ing Danum ning Bie, i Jesus.

Potang daranas tamung kapagsubukan o tuksu e ta kakalingwan ing maus king Danum ning Bie, uling Iya mismu sinabi na, “Nung ninuman ing minum king danum ning bie, e ne kumau kapilan paman.”

Ing materyal a bage temporari mu, kalupa na ning ordinaryung danum, sasaliwan, kauubusan, at dirinat pero ing Danum na ning Bie aliya. Ing mung adwanan na kekatamu yapin ing tanggapan taya king pusu tamu ban ya ing magus kareng mangaragul at angga na kareng mangalati tang uyat. Kanita, akit da, na e tamu mu kabud makatuknang king pampang ning ilug nune manuknangan ya pa ing Danum ning bie king bie tamu. Amen.

V.Pamanahimik

VI Tauling Panalangin

O Ginu, sinabi yu pu nung ninu ing maniawad king Danum ning Bie, e ne kumau kapilan pa man. Paniwalan mi pu ini, uling dakal ng besis ing dinipendi kami kareng bage materyal pero parati kepung mawa. Mididinan kami pung kapasnawan potang Ika, ing Danum ning Bie, atyu ka king bie mi. Kalupa ning danum a ordinaryu, na iyang mimye sikanan king katawan, parati kayu naman pu sanang manuknangan kekami (Ing Danum ning Bie) ban king pamaglakbe mi king yatung iti, reng kaladua mi miras la king kayarian ning Ibpa. Amen.

VII. Kutang

1. Para keka, nanu ya ing maragul ng pamiyaliwa ning danum a ordinaryu at ing Danum ning Bie?
2. Nanu kaya ing masanting tang gawan ban apabalu ta kareng kekatamung kapatad na mas importanti ya ing Danum ning Bie kesa king danum a ordinaryo?
3. Ngening Kwaresma, nanu la kaya reng pwedi tang baywan king sarili, ban ing Danum ning Bie manuknangan ya kareng pusu tamo?

Download:
Page 1: http://www.mediafire.com/?6birreh6fb724e1
Page 2: http://www.mediafire.com/?p9q519n14e4za8r

Kadwang Domingo ning Kuaresma

Ing Pamanaliwa nang Itsurang Jesus


I. Pamuklat a Panalangin

O Ibpa ning Ginu ming Jesu-Kristo, masampat ing atyu ke keti arapan ning pakamalan mung Anak. Bustan mung maslag nang lupa pagkaluban na keng sala at kapayapan. Mananu na sanang mirakayanan kami king sala ning lupa ning kekang Anak ban ing metung at metung kekami tune kaming mikakalugud. Amen.

II. Pamamasa

Mateo 17:1-9
Kalabas da ring anam a aldo, tiki neng Jesus i Pedro ampon ding mikapatad a Santiago at Juan; dela na la king metung a matas a bunduk nung nu la makapagdili-dili. 2King akakit da ring atlung alagad minaliwa ya itsura i Jesus; maslag yang anti ing aldo ing lupa na at meging makasilo ya king puti ing imalan na. 3Kabud-abud ikit de i Moises at i Elias; makipagsalita la kang Jesus. 4Inya nganang Pedro kang Jesus, “Ginu, masanting ing keti ta na. Nung bisa ka gawa kung atlung kubu keti; metung para keka, metung para kang Moises, at metung para kang Elias.” 5Kasalukuyan na pang magsalita inyang tikpan na la ning maslag a biga. Meramdam ya ibat king biga ing metung a siwala. Ngana, “Iti ya ing Anak kung pakamalan a lubus kung katulan. Pakiramdaman ye! 6Inyang dimdam de ring alagad ing siwala mitakutan lang e mu nanu, inya mipasubsub la king gabun. 7Linapit ya i Jesus karela at kilbit na la at ngana karela, “Mibangun kayu. E kayu tatakut!” 8Inyang minatna la, ala lang aliwang ikit karin nune na mu i Jesus. 9Nganang minutus Jesus karela kabang kukuldas la king bunduk, “Ala kayung babalitanan ninuman king ikit yu anggang e subling mie ing Anak ning Tau.”


III. Turu

Pagmasusyan taya ngeni ing kadwa ng Dumingu ning Kwaresma na nung nukarin ing ebanghelyu pepakit na ing pamanaliwa na itsura ning Ginu tang Jesu Kristo, “Maslag yang anti ing aldo ing lupa na at meging makasilo ya king puti ing imalan na.” Keng pamanaliwa na itsura ning Ginung Jesus, bilalag na ing tutu ng kayupayan, na iya ing mesabing Messiah, ing Talapagligtas, a Anak ning Dios. I Moises king Matuang Tipan ikit na naman ing kayupayan ning Dios inyang inaus ne king Bunduk ning Sinai “Minukiat ne kanita I Moises king bunduk at tikpan ne ning biga ing bunduk. Migdatun king babo ning bunduk ing makasilo nang aslag ning panga-atyu ning Ginu” (Exodo 24:15-16).


Kening pamanaliwa na itsura ning Ginung Jesus metupad na ing propesiya ng Propeta Isaiah 60:1-3, 19-20, ngana “ Jerusalem , talakad ka, at sunlag anti ing aldo; ing ligaya ning Ginu keka saslag ya! Mitakpan la king karalumduman ding aliwang bansa. Oneng keka ing sulu ning Ginu sunlag ya; ing ligaya na manatili keka! King uli ning kekang sala datang la ding bansa. Ari datang la uling ing bayu mung aldo saslag ya. “E mu ne maging sulu ing aldo king kayaldawan o ing bulan neng kabengian. Aku, ing Ginu, ing maging sulu mung alang kapupusan; ing sala ning kakung ligaya ya ing sunlag keka. Ding aldo ding kalungkutan mu miwakasan na la. Aldo at bulan lunto-lumbug la, oneng aku, ing Ginu, ing maging sulu mung alang angga.”
Ngening panaun ning Kwaresma, na iyang panaun na ning pamanalangin, at pamanyawad tawad kareng agagawa tang kasalanan. Anyaran tamu king grasya ning Ginu na sunlag ya ing makasilo ng lupa king bie tamu. Ban kanita ing kayupayan ning Ginung Jesus iyang miral king aldo-aldo tang pamibie-bie. Amen.


IV. Pamigunam

Ngening panaun ning Kwaresma, pabustan tamung sunlag ya ing makasilo ng lupa ning Ginung Jesus king bie tamu. Suryan tala reng ugali tamu nung makayung-yung la king sala o king dalumdum. Didinan na katamung oras ning Ginu na lawen tala king kasalukuyan nung nanu la reng mas maulaga king bie tamu. Importanti la paba reng prinsipyu tamo? O, ala tanang prinsipyu at parati tanang makipag – konpormisu? Mas maralas ba ing makipag konpormisu tana mu ban alang gulu, at ban kanita ala ta nang kapate? Buri tamu kasi ing masalese at manyaman a bie, agya pang e na ustu o e na makayung-yung ing bie tamu king Apung Ginu. Nung king kaorasan, binang masakit kekatamu ing talakaran lang pasibayu reng prinsipyu tamu, pasaup ta king Ginung Jesus na sunlag ya ing lupa na king bie tamu ban itamu man kapamilatan ning grasya na sunlag tamu mu naman lupa. Amen.


V.Pamanahimik

VI Tauling Panalangin
Ibpa ming Dios, dakal pung dakal a salamat king binye yung mayap a oras kekami. King pamipakit mu king sala ning lupa ning Anak mung Jesus, mipamasalan kami ning keyang grasya ban ibalik deng prinsipyu kesa king pamakipag-konpormisu. Amen.

VII. Kutang
1. Para keka nanu lareng bage pwedi tang larinan king kekatamung sarili at keng kekatamung komunidad?
2. Nanu lareng prinsipyu na ning tau, na e tana akakit tatalakaran da ngeni?
3. Para keka ng mas akakit mu ngening kasalukuyan kareng tau, prinsipyo o konpormisu?
4. Nanu ya keka kabaldugan ing pamanaliwa na aske ning Ginu tang Jesu Kristo?
5. Nanu kaya ing masanting a paralan ban apanatilyan tala reng prinsiyu ning kayapan?

Page 1: http://www.mediafire.com/?5tsequapvptdqnd
Page 2: http://www.mediafire.com/?18rw1l292z9686i

Mumunang Domingo ning Kuaresma

Ing Pamanuksu na ning Diablo kang Jesus

I. Pamuklat a Panalangin

Ginung Dios, a magnasang parating lugud at manantabe kekami. Pabustan yu pung apigunaman mi ing mensahi ning Kwaresma ban lalu kaming makapiagum king babie ng grasya ning pamagsakrapisyu para kareng aliwa. Lilungan mu kami ning Banal mung Espiritu ban lalung mi-ukit kareng pusu mi reng amanu ning kekang Anak, I Jesus. Amen.

II. Pamamasa

Mateo 4:1-11

Kanita dela ne ning Espiritu i Jesus king disyerto ba neng tuksuan ning diablo. 2Inyang i Jesus mekapag-ayunu neng apat apulung aldo at apat apulung bengi, tiblan ne ning danup. 3Dinatang ya ing mapanuksu at ngana kang Jesus, “Nung ika ing Anak ning Dios iyutus mung maging tinape la ding batung deni.” 4Nganang mekibat Jesus, “Sasabian na ning Kasulatan, ‘E mu bukud king tinape ya mabibie ing tau, nune king balang amanung manibatan king asbuk ning Dios.’” 5Kaybat, tiki ne ning diablo king Banal a Siudad at telakad ne king taluktuk ning Templo. 6“Nung ika ing Anak ning Dios,” ngana, magpabaldug ka, uling sasabian na ning Kasulatan, ‘Ipanibala na ka at paingat karing anghel na, at alalayan da ka, ban e ka mitisud agyang king metung mung batu.’” 7Nganang Jesus, “Sasabian na naman ning kasulatan, ‘E me paniubukan ing Ginung kekang Dios.’” 8Kaybat na nita, dela ne ning diablo king metung a bunduk a tutung matas. Pepakit na la kang Jesus ding sablang kayarian keti king yatu at ing sablang pibandyan da. 9“Ibie ku ngan keka ing sablang yan,” nganang sinabi kang Jesus, “nung siklaud ka king arapan ku at samban mu ku.” 10Pekibat nang Jesus, “Mabating ka, Satanas! Uling ing kasulatan sasabian na, ‘Samban me ing Ginung kekang Dios at ya mung bukud ing kekang suyuan.’” 11Likuan ne kanita ning diablo; dinatang la ding anghel at sinilbian de.


III. Turu

Peg-umpisan tane ing panaun ning Kwaresma nyang milabas a Miyerkules. At ing Miyerkules ayni pamalagwan tayang “Ash Wednesday” na nung nukarin paganaka ya kekatamung tau na menibat tamu mu king alikabuk o gabun at nung e nakatamu pengasnawan ning Dios ala ta sana king yatung iti. Nya karampatan mu ing iduku tala reng buntuk tamu king Dios ban ibye ing kekatamung kapanyamban at kapasalamatan Kaya.

At ngeni namang aldo iti, pagmasusyan taya ing mumuna ng Dumingu ning Kwaresma, na nung nukarin ipakit ne kekatamu ning ebanghelyu na ing mepiling balayan ning Dios, ing Israel e da ikwang a panagumpen ing tuksu ning diablo nyang miglakbe la king disyertu papunta king gabun a pengaku ng YHWH karela. Pero ing bayung Israel , ing mepiling Tagapagligtas, i Jesus na tau mu namang kalupa tamu, na daranup mu naman, at tinuksu na naman ning diablu, menagumpe ya.

Nyang ding Israelita miglakbe la king disyertu ban munta king mipangakung labwan a pengaku ng YHWH para karela, migrebeldi la king Dios pauli ning danum at pamangan. Masyadu lang mamaligwa at buri da ing Dios iyang tuki king buri da. E rane apanenayan man ing Apung Ginu iyang mismung galo ban dinan nong grasya. At iti ing panga-aliwa ning Ginu tang Jesus, uling agya mang dimdam na ing danup, e na ikwang peytuksu king diablu bagkus pebalu na king diablu na “E mu bukud king tinape ya mabibie ing tau, nune king balang amanung manibatan king asbuk ning Dios.”

Deng miglakbeng Israeilta king disyertu, e la kabud mapagrebeldi king Dios nune mapag-alinlangan la pa. Milako la kapanwalan o kasalpantayanan, nya ikwa reng pinyubukan ing Dios ngara, “Kayabe ta ya ing Ginu o ali ta ya?” (Exodo 17:7). Oneng ing Ginung Jesus e ya mekwa king patibung ning diablu, nya pekibatan ne ngana, sasabyan ning kasulatan, “E me paniubukan ing Ginung kekang Dios.’”

Ing katlu at pekamabayat a tuksu king Ginung Jesus, yapin ing tungkul king upaya at pibandyan. Na nung nukarin ibye na ngan ning diablu iti nung duku ya at samban ne. Deng Israelita mebaldug la king tuksung ayni, nyang ginawa ya i Aaron a gintung toro ban samban de. (Exodo 32:1-10). At ing Ginung Jesus menagumpe ya king tuksung ayni, kapamilatan ning amanu na ngana, “Samban me ing Ginung kekang Dios at ya mung bukud ing kekang suyuan.’” At iti mayakit ya naman king libru ning Deuteronomio 6:13.

Ing Ginung Jesus migtagumpe ya kareng tuksung parating gagamitan na ning diablu, pero reng Israelitang miglakbe king disyertu pepaysaul la king tuksu. I Jesus gampanan na ing misyun na ning bayung Israel na nung nukarin agkatan na katamung pakyapusan taya ban ing kayarian ning Dios iya ng miral. Amen.


IV. Pamigunam

Pakatandanan tamu pu na nung ing Apung Ginu, e ya kukupas at e manaliwa kapilan pa man. Ya ing Diyos a malugud at mayupaya napun, king kasalukuyan at king daratang pang panaun. At Ing diablu e ya naman manaliwa, iya ing mapanuksu napun at king kasalukuyan. Kalupa na ning Ginu tang Jesus, tinuksu neng mekatapilan besis, makanyan murin ing gagawan na kekatamu. Pero oyni mu naman ing pakatandanan tamu po, kapilan paman e ya managumpe ing diablu, uling balu tamung ing Dios malugud at maganaka Ya kareng kayang anak. At e tala sana kakalingwan parati reng kayang MAYAP a AMANU, uling kapamilatan dareni agyu tayang palayasan ing mapanuksu, ing dyablu.

Idukit tala kareng pusu tamu rening amanung sinambitla ning Ginu tang Jesus Kristo nyang tinuksu ne king disyertu ning dyablu. “E mu bukud king tinape ya mabibie ing tau, nune king balang amanung manibatan king asbuk ning Dios.” ‘E me paniubukan ing Ginung kekang Dios.’”Samban me ing Ginung kekang Dios at ya mung bukud ing kekang suyuan.’”

King pamaglakbe tamu king bie, dakal ing kapagsubukan at ila ring disyertu ta reni. Wa, tutung kailangan tala reng materyal a bage para mie, pero reni temporari langan. Reng Israelita king disyertu mas dininan dang pansin ing materyal a bage kesa king Dios na parating manantabe at lulugud. Amen.

V.Pamanahimik

VI Tauling Panalangin

O Dios, a Ibpa mi, dakal pung dakal a salamat king babie yung grasya kekami. Kareti pung apat-apulung aldo ning pamigunam, pabustan yu pung akit mi na ating tula at saya king pamagsakrapisyu para kareng aliwa. Kalupa ning kekang Anak, bista man pung mayap at malugud ya, pinili na ing magdusa para kekami. Dinan yu kepung grasya ban miya naman pung apakyapusan. Amen.


VII. Kutang

1. Nanu ing asabi tamu kareng bage temporari at permanenti?
2. Nanu lareng kekang pang-awakan o kapanwalan keng bie ot managumpe kang mas didinan mong pansin deng permanenting bage kesa kareng temporaring bage?
3. Mikapanaun ba na pigdudan mung ing Dios e na pakiramdaman ing pangadi mo? Ikwentu.
4. Nanu ngeni ing kapanwalan mu tungkul king presensya ning Dios king bie mu?
5. Makananu mu babie ing kapanyamban at kasuywan mu king Apung Ginu?

Page 1: http://www.mediafire.com/?9tyyq1ua3btecb3
Page 2: http://www.mediafire.com/?64qnrrwu0e514qm

Kasiyam a Domingo ning Ordinaryung Panaun

Kapilan man e ra kayu Kakilala

I. Pamuklat a Panalangin

O Ibpang malugud, sasamban at pupuryan da kayu pu. Pasalamatan king pinandit uli ning grasyang pagkalub mu kekami. Sopan yu kami pung makatalakad a metung a pibale-bale king babo ning batu ban agyang nanu mang datang a pagsubuk maging matatag kami. Iti ngan pu anyaran at pasalamatan mi king lagyu ning Ginu ming Jesu Kristo. Amen.


II. Pamamasa

Mateo 7:21-27

21“E bala na mung taung mamaus kanaku ‘Ginu, Ginu’ lulub king Kayarian ning Banua, nune deta mung tutupad king kaburian nang Ibpa kung atyu banua. 22Potang miras na ing Aldo ning Pamanukum, dakal la ding maus kanaku, ‘Ginu, Ginu! King lagyu mu penaral mi ing amanu na ning Dios; king lagyu mu penabi mi la ding demonyu, at king lagyu mu dinapat keng dakal a milagru.’ 23Oneng sabian ku kanita karela, ‘Kapilan man e ra kayu kakilala. Dumayu kayu kanaku, ikayung e mayap a dapat!’ “ 24Inya ing balang metung a makiramdam kareting amanu ku at tutuparan na la, mengari ya king taung biasa. Telakad ne ing bale na babo ning batu. 25Menabu ing uran, dinatang ing albug, at sepulan ne ning angin ing baleng ita; e ya miragsa uling makatalakad ya babo ning batu. 26“Oneng ing balang taung makiramdam kareting amanu ku, at kaybat e na la tutuparan, mengari ya king taung mangmang. Telakad ne ing bale na babo ning balas. 27Menabu ing uran, dinatang ing albug, at sepulan ne ning angin ing baleng ita, at miragsa ya at makapangilabut ing pangabagsak na!”


III. Turu

Ing metung a Katolikung Kristiyanu malyari yang maging miyembru daring organisasyun ning Pisamban. At keng pamaging miyembru na, alus aldo-aldo sisimba ya at mag nobena. Bayu ya lungub at luwal king pisamban titiltil ya king agua bendita o “holy water” at sabe siklaud maka arap king altar. Parati neng bibit - bitan ing kayang rosaryu pati na ing Bibliya. E ya kapilan man mig absent kareng selebrasyun ning pisamban, pasku, bayung banwa, maneldo, etc. Pero kapamilatan dangan reni, daramdaman mu kaya ing parating mag reklamu o saingsing king bie. “Ot kasakit ning bie ngene! Ngana parate” Parati ya pang mamarsala ngana “kasalanan dareng manungkulan ini” dapat antini ing gawan da… Parating kasiran kareng aliwang tau ing lulwal king asbuk na. Ala ng mayap at byasa nune mu ing sarili na.

Keng mebasang ebanghelyu, binanggit no ning Ginung Jesus reng adwa kataung menalakad bale. Ing metung telakad ne ing kayang bale babo ning batu at ing metung naman telakad ne ing kayang bale king balas. Itang mitalakad bale babo ning batu, keng panaun tamu, ila pin reng taung malalam pamangilala king Apung Ginu. E dala kabud balu reng amanu ning Dios, nune pagkapilitan do pang daptan reti. Oreni reng taung akakit tamung panatag a itsura o kabilyan king bie, agya pang daralan lang kasakitan. Mararapat iti, uling balu da’t panwalan, na nanuman ing malyari kayabe de ing Dios a malugud, Balu dang king katauli-taulyan ing Apung Ginu pa murin ing mag luid.

Ita namang mitalakad bale king balas, oreni ring tau king panaun tamu na agya pang asno kasanting kabilyan, marakal pibandyan, mangaragul at mangasanting la bale, ala lang kapanatagan a pamibie-bie. Pero mapangadi la naman reng taung areni at mapamakiramdam la naman kareng amanu ning Apung Ginu. Parati la namang sisimba, pauli na ning masanting dang kabilyan king bie at pamanyad pang karagdagang grasya. Oneng potang datangan no ning mabayat a problema at tuksu agad lang mimina kapanaligan king Apung Ginu. Kalupa na wari ning baleng makatalakad king balas, mabule at sasaguling malalasak. Amen.

IV. Pamigunam

Ngening kaorasan, suryan tamu ing bie tang kasalpantayanan. Ninung kalupa ta karening adwang mitalakad bale? Ing mitalakad bale babo ning bato, na matatag a pundasyon, na agyang nanu pang sabyan da tungkul king kayang kasalpantayanan, e ya matitinag. Na, agyang nanu pang daratang a problema e na akwang manyisi at iwasan na ing saing-sing. Pero, dakal la pa kareng kapatad tamu king kasalpantayanan , ing mimina kapanwalan king Dios pauli dareng pagsubuk king bie; pangading e mipapakibatan o kaya ning kakaluluan. Neng kayi naman, pauli ning masyadu tang malapit king pari, at ikit tamu na atin yang kapintasan king kayang panugali, agad tamung mimina kasalpantayanan. Tandanan tamu na e dapat makasentru ing kekatamung kasalpantyanan king pari nune king Ginu tang Jesus. Nung makanini ing sitwasyun tamu, kalupa taya itang taung mitalakad bale king balas. Amen.


V.Pamanahimik

VI Tauling Panalangin

Ginu, dakal pung dakal a salamat, babalik mi pu ing sablang kapuryan at kapasalamatan. Ing ligaya king Ibpa, ligaya king Anak at ligaya king Banal a Espiritu, mangga man king alang angga. Amen


VII. Kutang


1. Atin kang meging karanasan na meyna ka kasalpantayanan pauli ning kasakitan/tuksu king bie?
2. Nanu la reng meging armas tamu ban managumpe kareng kasakitan o tuksu ning bie?
3. King kasalukuyan, nanu ing pwedi tang gawan ban talang atalakad reng pibale-bale tamu king babo ning batu?

Page 1: http://www.mediafire.com/?jkqvtjjbjrb15bw
Page 2: http://www.mediafire.com/?vkxa2aqeagogjhk

Kawalung Domingo ning Ordinaryung Panaun

Ing Dios at ing Pibandian

I. Pamamasa

Mateo 6: 24-34

24”Alang ninumang makasuyu karing aduang panginuan; malyaring pikasaman ne ing mumuna, oneng luguran ne ing kadua o suyuan neng mitmung katapatan ing metung, oneng lakuan ne ing kadua. E kayu malyaring sumuyung miyagnan king Dios at king pibandian. 25”Inya sasabian ku kekayu: e kayu paihulu isip tungkul king bie yu, nung nanung kanan yu at inuman o tungkul king katawan yu, nung nanu ing isulud yu! 26Lawan yu la ding ayup: e la mananaman ni e la pupupul ni e la titipun pamangan, makanyan man pakanan na la ning Ibpa yung atyu banua. E kayu wari lalung maulaga kesa kareti? 27Neng paibalisa kayu isip, ninu mo kekayu ing makapakaba king bie na agyang metung mu mang oras? 28”Obat paigulu kayu isip tungkul king kekayung piblasan? Lawan yu la ding sampagang tutubu king marangle: e la magobra ni e la mamabal! 29Iti ing sasabian ku kekayu: I Solomon agyang mabandi ne, e ya pa naman mimalan a kasing santing ning metung karing sampagang den! 30Nung pipablasan ne ning Dios agyang ing dikut a atyu ngeni, oneng bukas maduluk ne king ornu, ikayu pa kaya ing e na piblasan? Karitak yu naman a kasalpantayanan! 31”Inya e kayu paigulu isip kukutang: Nukarin kami kumang pamangan, inuman, at piblasan? 32Deting bage ila ding kagugulu rang panintunan ding paganu. Balu na ning Ibpa yung atyu banua ing kailangan yu ngan iti. 33Bayu ing sable pakikuanan yung mag-ari ya ing Dios kekayu at tupad king kaburian na, at ibie na pati na ing sablang kailangan yu. 34Uli na niti, e me pigaganakan ing aldo bukas; saka yu na arapan nung nanuman ing darala na. Makagyu na ing darala nang problema ning balang aldo; e yu na daragdagan pa.


II. Turu


Pagmasusyan taya ngening aldo ing Kawalung Domingo ning Karaniwan a Panaun. Asabi tamung mayap at masaya ing keka tamung panandaman uling mitmu yang lugud ing mebasang ebanghelyu . Pabalu na keka tamu ing kaluguran na katamung kaluguran. Tuturu na katamung misip at migunam nung sanu reng bage importanti,

mas importanti at pinaka importanti keti king yatu. King bie ayni na asna king kabilis, maralas e tano didinan man pansin nung sanu talaga reng mas maulaga king bie tamu. Balamu robot o makina tana mu king aldo-aldo, kagising obra, patingapun ing keka tamung kaisipan maka tutuk ya nung nanu pa ing kulang a bage king sarili tamu at pamilya. E tana a papansinan ing lagu ning bie, ing importansya ning mikakalugud a pamilya. Nya kadalasan iya ing maging bunga na ning kalungkutan at kasiran king bie. Potang atyu ne ing tau kening kasiran a ayni, malungkut at asabi mu pa na ot milyari ini, ot e ko dininan pansin ding mas maulaga dapat king bie ku, ding pamilya ku. Amen.

III. Pamigunam

Masanting ku pu obra, at maragul ku pu sweldu. Masaya ku pung masaya king bie ku. Asasali ku ngan pu ing buri ku. Keng pamaging masaya ku king bie mag attend kung fellowship, pasalamat ku king Apung Ginu king grasyang pagkalub na kanaku. King pamaging maswerti ku king obra, sinali kung saken, sinali kung masanting a bale, memanutang ku ban kung asali ing aliwa pang bage.Mipasoso ku, kaliwat kanan ing utang ku, sala-salikut karing piyutangan ku. Damdaman kya mu ing saken na ning bumbay a pikautangan ku, sasalikut ku king banyu, mebyasa kung maglaram, pauli ning utang. E naku naman mag attend prayer meeting uling ating kung utang karing kayabe ku pati ketang pastor atin kung utang. Tutu pin ing sasabyan ning Ginu e pwedi ing adwa tamu panginwan, bie ispiritwal o bie material. Amen.


IV.Pamanahimik

V Tauling Panalangin

VI. Tauling Panalangin

Ibpa, salamat pung dakal keng pamanantabe yu pu. Dakal na kami na naman abalu kareng kekang turu, pabustan yu pung makapaglarin kami kareng kekaming kakulangan. Iti pu ing kekaming anyaran king lagyu ng Jesus. Amen.


VII. Kutang

1. Lista talang sunud-sunud reng atlung impotanti king bie tamu. At mangatwiran ot bakit mas importanti ya ing mumuna king kadua at ing kadua king katlu.
2. Atin ka bang meging karanasan na mas minuna meng penusignan ing sarili mu king bage material kesa king bage ispiritwal. Ikwentu.

Page 1: http://www.mediafire.com/?qk6azrr6ww6s0hx
Page 2: http://www.mediafire.com/?0d7gcd77bxgi0ad

Kapitung Domingo ning Ordinaryung Panaun

Ing Turu nang Jesus tungkul king Pamanablas

I. Pamamasa

Mateo 5: 38-48

38“Dimdam yu naman king kanitang minuna mituru karing tau: ‘Mata libe mata at ipan libe ipan.’ 39Oneng ngeni sasabian ku kekayu: e ye ablasan e mayap ing taung dinapat e mayap kekayu. Nung ating tampaling keka king wanan mung pisngi, iyarap mia naman ing kayli mung pisngi. 40Nung ating mandalum keka ba nia mung akua ing kekang baru, ibie mu pati na ing balabal mu. 41Nung ating mamilit kekang papusan na ing karga na kilub ning metung a kilometru, pusanan mu nang anggang aduang kilometru. 42Nung ating maniawad keka, dinan me; at nung ating mandam keka, paraman me. 43Dimdam yu naman king kanitang minuna mituru karing tau: ‘Luguran me ing kakaluguran mu at pikasaman me ing kalaban mu.’ 44Oneng ngeni sasabian ku kekayu: luguran yu la ding kalaban yu; at ipanalangin yu la ding liligalig kekayu. 45Kanita maging tune na kayung anak ning Ibpa yung atyu banua, uling papaslag ne ning Dios ing aldo na karing e mayap at mayap a tau, at babie na ing uran na karing darapat mayap at karing darapat e mayap. 46Nanung ablas ing panenayan yu king Dios nung luguran yu la mu detang malugud kekayu? Agyang ding talapanyingil buis makanyan ing daraptan da! 47At nung ding kakaluguran yu ila mung pakisabian yu, atin waring e karaniwan kanita? Agyang ding paganu makanyan la daraptan! 48Inya sukat kayung maging ganap antimo nung makananu yang ganap ing Ibpa yung atyu banua.

II. Turu

Aldo na naman ning grasya at pakalulu ning Ginu keka tamu. Makananu kaya nung alang aldo para king Apung Ginu? Kagulu siguradu ning bie tamo, uling ala tang kunekta king babie bie, babie inspirasyun para isadsad ing mabibie king magkapilit maging mayap. Ing keka tamung mayap a balita ngeni, masala ng papasyag ing maging magkapilit maging mayap at ating gawan kapaglarinan kareng bage-bage e masanting mangapalyari king bie tamu at king makapadurut. Makananu kaya mayari ing kegana-ganang e masanting a mangapalyari king paligid tamu? Iti ya ing maralas kung kukutang king sarili ko at king Apung Ginu. Alben taya ing metung karing tele nobela ngeni king kapuso tsanel 7 pamagat na “Baker King” . Me inspire ku ketang sinabi ng ima ng Tak Gu ana “Agya nanu pang gawan da kekang marok suklian mu iting mayap, pakatandanan mu iti anak, at datang ing oras mipala ka, uling iti ya ing kaburyan ning Apung Ginu” kasanting at kayap a panabilin na ning ima ng Tak Gu na angga king katauli taulian ning nobela gewa ng Tak Gu pematulan, pegsilbiyan, petawaran at tinggap ding memarusa kaya at king kayang ima. Ikwa napang pemye ing kayang pusisyun bilang presinte ning kumpanya ng tata na ketang atsi ng dati rati e ne atanggap uling mikapatad lamu king tatang. Binie ne iting pusisyun uling balu ng Tak Gu na mas magaling yang manager ing atsi na kang tatang na kesa kaya, migbalik nya mu ing Tak Gu king pamangawang tinape uling mas magaling yang gawang tinape kesa king magplanu para king kumpanya da. Mayap at magaling ya ing taung anti kaniti, agyu ng ilele ing sarili na. Pilan la pa kayang taung anti kaniti? Iti ya ing payabut o turu ning ebanghelyu ngeni, makayandang mag-umpisa king kayapan ban mituknang ing karokan, uling nung mipag ganti-ganti tang e mayap, makananu mag wakas iting kasalanan o karokan. Ing Ginung Jesus masala ng pepakit iti king kayang bie, ing pamamintu na king kayang Ibpa angga na king babo ning Krus, king oras ning kasakitan, king oras ning pinandit na mapatlud ne inawa ngana “Patawaran mula Ibpa ko, uling e ra balo ing karelang gagawan” panyawad tawad retang taung darapat e mayap keka tamu, king maligwang sasabyan. Sana king pinandit ayni ning pamakiramdam tamu kareng amanu ning Dios, akit tamu sana ing grasya ning pamangawang mayap na iya ing susi ning pamaging masaya keti at king kabilang bie. Amen.

III. Pamigunam

Ginu, kalwat ku pung atyu king aliwang bansa, anya pung atyu ku king malaut, asna ku karakal kaluguran, reng kanakung kamag-anak, alang bukang bibig nune ing lagyu ku. Parati da kung gagawan tegawan kareng anak da, agya pang atyu ku keti king malaut a lugar. Uing balu dang makasaup ku king karelang gastusan king karelang ukasyun. Misan, mekasali kung gabun, na kanaku yang babaldugan, parala kula king kanakung pisan ban iya namung mamayad king mikabandi king gabun. Alus a yayari kuneng babayaran anyang minuli ku minsan, at abalu ku king aliwa ya ing mekasali/mikabandi king gabun a tunggal ditak kung babaldugan. Kitna ke ing kakung pisan, at e ya mekapakibat at diku nya mu ing kayang buntuk, e na ku migsalita pa, uling ala namuring asaup iti. Ing gewa ku migbalik naku mu keti king malaut a lugar, aliwang bansa at mig umpisa na namang megobra ban tumipun at saling aliwang gabun. Mekatipun naku na naman at mekasaling gabun at abalu kung mikasakit ya ing pisan ku, at mangailangan yang maragul a alaga ban yang ma opera. Minuli ku at ikit keng mepayat at melalam a mata. Melunus ku, uling disnan ku ing ala lamang apangan, at deng anak na gaga la uling e la pa mengan. King lunus ku, pepasali kulang pamangan king asawa ku at pepalawe ke king espisyalistang doctor at pemaligwanan keng peopera. Meging matagumpe ing kayang operasyun. Ngeni magobra ne kanu at apapagaral no reng kayang anak. Masaya kung masaya uling atin kung taung asopan ing pisan ku at aliwa iya mu pati na ing buu ng pamilya at ding daratang na pang maging apu. Amen.

IV.Pamanahimik

V Tauling Panalangin

Ginung Dios, dakal pung salamat, dakal a salamat keng oras a pigkalub mu kekami. Mipaynawa kami king kekang pakalulu, pabustan yu pung ing mayap a balita miral king bie mi. Iti pu iyang adwan mi king lagyu ning Ginu ming Jesu Kristo. Amen.

VI. Kutang

1. Nanu na ing agawa kung kapaglarinan ban mayakit at manatili ing kayapan king sarili ku at kareng taung makapadurut kanaku?
2. Nanu ing panamdaman tamu neng lilisya tamu king kaburyan ning Apung Ginu?
3. Nanung asabi mu kaniti, “E tamu kanu kasalanan ing mibait a ating manang kasalanan, ing masaklap ing mate tamung lalabag king kaburyan ning Apung Ginu, iti ya kanu ing kasalanan.”

Page 1: http://www.mediafire.com/?pdya7xz99p466f3
Page 2: http://www.mediafire.com/?rqe3oqso8ho735u

Kanam a Domingo ning Ordinaryung Panaun

Ing Turu nang Jesus tungkul king Kautusan

I. Pamuklat a Panalangin

Dios a mayupaya, ing kapanyamban, kapurian at kapasalamatan keka mi pu babie. Ganap pu ing ke gana-ganang bage keti king yatu, uli na ning Dios kang gaganap at babie kabaldugan. Antabayanan yu kami pu ban lalu miyang apilasan ing kekang mayap a balita. Pabustan yu pung ing Banal yung Espiritu lilungan na kami ban lalung maging matibe ing pamikalugud mi. Iti pu ing anyaran mi king lagyu ng Jesu Kristung Ginu mi. Amen


II. Pamamasa

Mateo 5:17-37

“E yu sa isipan king aku dinatang ku keti ba keng payalan kabaldugan ing Batas o ing turu da ring Propeta. Dinatang ku keti, e para ba kung lang siran, nune ba ku lang iganap. Sasabian ku kekayu, mapda ya man ing banua at ing labuad, ni metung a tuldik o metung mang malati nang gulis ning Batas e ya masira anggang e miganap ing paksa na. Ulinita, ninuman ing taung labag agiang king metung karing pekamalating dili kareting kautusan at ituru na ing anti kanian karing aliwa, mabilang yang pekamababang dili king kayarian ning banua. Dapot ninu mang tutupad kareti at ituru na ing anti kanian karing aliwa, ita ing makilalang maula king kayarian ning banua. “Uling sasabian ku kekayu, nung ing kekong pamanupad king kaburian ning Dios katulad na mu ning pamanupad da ring eskriba at Pariseo, e kayu bitasang milub king kayarian ning banua. “ Apagaralan yu na nung makananung miyutus karing kekatamung pipumpunan: E ka makamate: ing ninu mang makamate mikapakibatan ya king arapan ning piukuman. Dapot aku ngeni sasabian ku kekayu: ninu man ing mimua king keyang kapatad, mikapakibatan ya king arapan ning Sanhedrin; ninu man ing atin sama king keyang kapatad mipanganib yang miyugse king api ning impiyerno. Ulinita, nung atin kang yayain king Dios, at aganaka mung atin yang samang lub keka ing kapatad mu, lakuan mu pamu ing kekang yayain king arapan ning altar, munta ka pamung makikasundu king kekang kapatad, kaibat, magbalik ka at kanita mu idaun ing kekang ain.


III. Turu

Pagmasusyan taya pu ngening aldong iti ing kanam a Domingo ning karaniwan a panaun. Dimdam taya ing mebasang ebanghelyu na ing Ginung Jesus e nala sisiran o lalako man kabaldugan ding Batas bagkus gaganapan no pa reti.

Pisabyan taya ngeni ing amanung batas. Potang daramdaman taya ing amanung batas, miyayaliwa ing pamag kabaldugan tamu uling dakal lang miyayaliwang batas a balu tamu. Antimo deng batas a pairal ning kekatamung gubyernu, alimbawa batas trapiku. Na nung alalu reti siguradung mamublema tamu king pupuntalan tamu. Batas kareng iskwela, alimbawa, bawal ing mangopya o makipate kareng kaklasi. Pauli da reti, maging maayos at siguradu lang mabyasa deng anak tamu. Atin tamu mu namang batas a pairal king mismung pamibale-bale tamu, alimbawa kareti ila pin reng paulagan tamung mayap a panugali at nung e dala pairal o tuturu

deng tatang at ima reti antimong batas, makasiguradu e maging masanting at maayus ing metung a pamilya. Niya mayap at masanting ing ating batas o turu, At iti patutwanan na ning mebasang ebanghelyu, na ing mismung anak ning Dios, I Jesus, didinan na lang maragul a ulaga.

Dakal la pang miyayaliwang klasing batas. At balu tamu na reti ngan makasaup lang maragul keka tamu. Uling nung alalu reti maging magulu ing kegana-gana. Siguradu mung mipapanyapat tang e ustu at iti kasiguruan na ning pangawakas ning meto yatu. Pablasang tutu na katamung kaluguran ning Apung Ginu, rening batas o turu kapnuan o pupunuan nala kapamilatan ning kayang bugtung a Anak I Jesus. Lalamnan nala, didinan na lang kaganapan, ban lalu tang maging mayap, masalese at masaya king pamibie-bie tamu. Uling nung king pang pamag-umpisa ning pamaglabag kareng utus (“E ka makamate”), at ing pamimwa king kapatad, kasalanan ne kaagad, e tana miras pa king maragul a kapahamakan o kasalanan king bie. Amen.


IV. Pamigunam

Ing Ginu tang Jesu Kristo kakatmuan no reng batas, e itang kulang la nune tune na katamung kaluguran, e na pabustan ing milaga ta pa king matsurang sitwasyun, mapaketi man king yatung iti at pati na king kabilang bie. Buri naka tamung maging masaya at payapa agya pa keti king yatung iti. Dimdam tayang mebasa ing mayap a balita na mikakasala tana potang mimwa tamu king kekatamung kapatad at e potang mekapate ta pa. Ini mangaituliran na lalarinan o sasagkan na nana ing kasiran bayu pa dagul.

Atyu ta ngeni king arapan ning Apung Ginu, ing kutang na keka personal, atin ka bang mua king metung a tau? O kaya naman, ating mimua keka maski metung mung tau? Nung atin kang mua king metung a tau, uling atin yang gewang e ustu keka, sabian mu ngeni king Dios, sumbung ka kaya, antimo waring ing anak susumbung king kayang Tatang uling ala kang agawa king kekang problema. At kaybat ning pamanyumbung mu keya king kayang depatan keka. Panyawad meng tawad king Apung Ginu king kayang agawang e ustu keka. Nung tutu king pusu mu ing pamanyad mung tawad king kasalanan na keka, kanini ka pa mituturing anak ning kakataskatasan a Diyos, kanini me pa akakawangis ing Ginu tang Jesus.

Ngeni, nung ika naman ing ating pamagkulang o kasalanan king kekang kalupang tau. Ngening kaorasan, panyawad mung kapatawaran iti king Apung Ginu. Uling nung e maulu iti o mipatawaran manyira pang lalu iti king kekang pangatau, dagul pang lalu ing pamikasala mu. At kaybat na ning tutu mung pamanyawad tawad misip kang paralan nung makananu ing pamaglarin kaniti. Nung ala kang aisip paralan nung makananu kang manyawad tawad ketang taung gewan mung e ustu, pasaup ka king Banal a Espiritu, at siguradung sopan na ka ban kayung miyayus. Amen.

V.Pamanahimik

VI Tauling Panalangin

Dios ning kaganapan, dakal pung dakal a salamat at mipasno na kami na naman, uling dininan mu na kami nanamang tune kabyasnan. Kabyasnang e na a ibye ning yatung iti. Melakas na kami na naman ban ituluy ing bie, bie a kayabe ka na parating gaganap kareng kekaming kakulangan. Ing kapanyamban, kapurian at kapasalamatan keka ngeni at mangga man king alang angga. Amen.

VII. Kutang

1. Nanu ing panamdaman mu neng atin kang kamua king metung a tau? Ikwentu
2. Nanu ing panamdaman mu neng atin namang taung makipagsalese o kaya gagawang paralan ban mibalik ing kekayung masanting a pami-abe?
3. Nanu ing mas masanting para kekatamu ing mikakalugud o mipapanyira at mipapandamusak? Bakit?

Download here:

Page 1: http://www.mediafire.com/?f4ialffidu3bd92
Page 2: http://www.mediafire.com/?6owgetioe3bvwc2

Kalimang Domingo ning Ordinaryung Panaun

Ing Asin at Sulu ning Yatu


I. Pamamasa

Mateo 5:13-16

13Ikayu ing asin ning yatu. Nung milako kalat ing asin, makananu mu pang ibalik ing kalat na? Ala nang kasilbian. Inya miugse namu king lual king daramusakan da ring tau. “14Ikayu ing sulu ning yatu. E ya malyaring isalikut ing balen a makatalakad king babo ning bunduk-bundukan. 15Alang manyinding sulu at kaybat takpan ne king palangganan; nune ibibili ya iti king tumpakan ba yang munie sala karing sablang atiu bale. 16Makanyan ya namang sukat sunlag king arapan da ring tau ing sulu yu ban akit da ing dapat yung mayap, at paligayan de ing Ibpa yung atiu banua.


II. Turu

Ing turu ning ebanghelyu tamu ngeni tungkul ya king metung a utus ning Ginu tamung JesuCristo. Ing utus a ini oini: dapat tang sunlag king arapan da ring tau, (v. 16) dapat tang mibie lasa king pamibiebie na ning yatu (v. 13).

Makananu tamung sunlag karing arapan da ring tau? Makananu tamung munie lasa king pamibiebie na ning yatu?

Ing ebanghelyo ngana kekatamu: akit da ring tau ing kekatamung sala kapamilatan da ring dapat tang mayap (v. 16). Ing pamibiebie Kristiyanu, metung yang biyeng mamieng santing at lugud king kapaligiran. Atin dapat pamanaliwang masanting a mayayakit ampon malilyari king kapaligiran ning Kristiyanu pauli na mu rin ning pamibiebie na ning Kristiyanung atiu karin. Ngeni, ngan ning ebanghelto, nung ala muring pamanaliwa at ala muring pamagbayung masanting ing malilyari king kapaligiran ning metung a kristiyanu, bali ala mu naman kabaldugan ing bie na. Mayapang ”iyugse nya mu king lual king daramusakan da ring tau” (v.13), ngana ning ebanghelyo. Ing aslag na ning mayap tang dapat e ya dapat misasalikut, e ya dapat pikakarine (v. 14-15). Ding pamibiebie tang tune ampon tapat at mitmung kasalpantayanan at lugud ila ding akit da ring taung makapaligid kekatamu.


Ing bie mayap, bie yang sala. Kapamilatan na ning biyeng ini, marakal lang tau king kapaligiran tamu a tutung midinan inspirasyun ampon pamag-asa king bie da. At pauli na niti, ing bukud mung maging parasan na ning bie tamung Kristiyanu ya ing ”kaligayan ning Ibpa a atyu banwa” (v.16)


III. Pamigunam

I Jesus tiru na kekatamu nung makananu lang dapat mabibie reng talatuki na. Anya anang migsalita kareng manasan, magtinda, talapagobra, negosyanti at maningil buwis lalaki man o babai: ”Nung ikayu maging talatuki da kayu, makapagsilbi kayu kanaku nukarin koman makatuknang at magobra. Uling ikayu maging kalupa na kayu ning asin”

Ing asin pangontra ya king buluk at iti bibili ya keng asan at karne, para eya masira.

Dapat manatili tang malinis at katanggap-tanggap uling kalupa taya i Jesus. Sopan tala deng mangailangan at maging masipag tamu, tapat at e ta magloku. At eyu sasalikut na ikatamu alagad na katamu. Dapat tang pabalu na balu taya i Jesus. Iya ing Sulu ning mabilug a yatu. Potang maging talatuki na katamu ning Ginu, sana magsilbi tamung malating sulu ding aliwa.


IV. Pangadi

Ginung Jesus paniwalan mi at sasalpantayanan na ika ing tune lulugud kekami bistat man e ke karapatdapat king arapan mu. Uli na pu ning lunus mu mananu sanang gawang mu keng parating mikakalugud, mipapagmasabal at misasanmetung para king ikasulung at ikakalat ning mayap a balita. Kapamilatan na ning B.E.C. mebiasa keng megpakumbaba at tutuki king kekong kautusan. Mananu sana Ginu, parati mu kaming dinan pusung malinis, e biasang tatanam kamwa, at alang ketasan. Iti ngan Ginu adwan mi kapamilatan nang Cristong Ginu mi. Amen.

V. Kutang

1. King makananung paralan na ika meging Sulu ka at Asin ding kaparang tau?

Download here:

Page 1: http://www.mediafire.com/?jmwae8ekjthgh6o
Page 2: http://www.mediafire.com/?vnw597gcl5568zd