Kapat a Domingo ning Kuaresma

Binie ne ning Dios ing Bugtung nang Anak

I. Pamuklat a Panalangin

Ibpa, tutung kaluguran yu kami uling binie ye kekami ing bugtung yung anak a I Jesus ban kapamilatan na, miligtas kami kareng kekaming kasalanan. E ye pigkaimut ing kekong anak para midinan kaming katimauan king bie. King kekong lugud, mididinan yang pamag-asa pasibayu ing mabilug a yatu, king kekong lunus, mididinan kaming lakas lub ban maus ampon mangadi kekayu. Balu ming e yu ke paburen. Balu ming gawan yu ngan ing sabla ban aibili yu kami king mayap a kabilianan. Salamat Ibpa king kekong lugud at lunus. Antabayanan yu kami pu, ikaming talatuki ning Guinung Jesus king kekaming pamaglakbe. Salamat Guinu. Salamat pu. Amen.


II. Pamamasa

Juan 3:14-21

14At nung makananu neng tinas Moises ing ubingan a tangsu king disyerto, makanyan ya namang sukat itas da ing Anak ning Tau 15ban ing ninumang maniwala keya mika bie yang alang angga. 16Uli na ning maragul nang lugud ning Dios king yatu binie ne ing bugtung nang Anak ban ing ninumang maniwala keya e ya mate nune mirinan yang bie alang angga. 17Uling tinubud ne ning Dios ing anak na king yatu e ban atulan ne at parusan ing yatu, nune ban miligtas ya ing yatu king kapamilatan na. 18E ya miyatulan kaparusan ing ninumang maniwala keya oneng miyatulan ne ing e maniwala keya, uling e ya meniwala king bugtung nang Anak ning Dios. 19Ing kayatulan ya iti: dinatang ya ing sala keti king yatu, oneng aliwa ing sala ing liguran da ring tau, nune ing dalumdum uling e mayap ing dapat da. 20Uling kasaman da ring darapat e mayap ing sala at e la lalapit king sala ban e mayakit ing karelang dapat. 21Oneng lalapit ya king sala ing darapat king katutuan ban masalang mayakit king ding dapat na daraptan na la agpang king kaburian ning Dios.

III. Turu
Potang ating malulunud king ilug o dagat, atsanan ta yang salbabida ing malulunud ba yang ating akapitan. Kapamilatan na ning salbabida, malyari yang gumato ing malulunud at miligtas ya king panga lunud na. Potang ating masisilab lalu na potang bale ya, atsanan ta yang danum ing masisilab a bale ban mituknang ing silab ampon ban e kumalat. Potang ating mabubungsul, pipepen ta ya ing mabubunsul ban mibalik ya animu. Atin tamung sari-sariling solusyun kareng problemang daratang kekatamu. Balu tamu potang guewa ta la reng solusyun a reni, micacabus tamu kareng problemang daratang a reni. King binasa tamung ebanghelyu, anti ya mong menintun paralan ing Ibpa nung makananu na katamung iligtas king kekatamung pangawala pauli da reng kasalanan tamu.

Ing ebanghelyung dimdam tamu ngeni, metung ne karing makatagkil a mensahi ning kasalpantayanan tamu. Kening binasa tamu, sasabian na kekatamu king ing Ibpa, binang kaluguran na katamu. At uling kaluguran na katamu, e na buring mawala tamu king bie. E na buring mibili tamu king marok a sitwasyun, lalu na ing pangawala tamu pauli da ring kasalanan tamu. Itamu, mikasala tamu ngan. Pauli da ring kasalanan tamu, mangaintuliran mu kekatamu ing kaparusan. Dapat mung mibie kekatamu ing parusa ning kamatayan at alang-anggang api ampon kasakitan a makarikil kareng egana-ganang lelangan keti yatu uli na pin mikasala tamu ngan. E tamu memintu, e tamu mekiramdam at e tamu depatan ing inutus ning Guinu. Kamatayan ing karapat-dapat mung pupulan ning pamibie-bieng makasalanan. Oini na ing manenaya kareng egana-ganang e mamintu kareng kaburian ning Guinu.

Oneng nanu ing milyari? Imbes na paburen naning Ibpa king mibie kekatamu ing karampatang parusa kareng guewa tamu, nanu ing guewa na? Pepaburen nang mibie ing makaintuliran a kaparusan a ini> ALI NA.

Uli na pin kaluguran na katamu ning Ibpa, e na pepaburen king mibie ta nang makanyan king kapalaran a kaparusan a iyang karapat-dapat mu kekatamu. Nune, ginawa yang paralan ing Ibpa, uli ning maragul nang lugud kekatamu ban alako na katamu kening makalunus tamung kapalaran a kaparusan. Ngeni, nanung paralan ing guewa na, ban milako tamu king kaparusan a ini?

Ngana ning ebanghelyu kekatamu: “…binie ne ing bugtung nang Anak…” (v.16). Oini ing meging paralan na ning Ibpa ban aicabus na katamu king alang-anggang kamatayan. Binie ne ing bugtung nang anak, ban kapamilatan na, miligtas tamu. (Manahimik tamu sagli ban pigunaman ta ya ing misteriong aini…)
Inya binie ne ning Ibpa I Jesus, ban micabus tamu kening kaparusan a ini a bunga ding kasalanan tamu. I Jesus iyang talapagligtas tamu. Iya ing talapangabus tamu. Iya ing tinubus kareng kekatamung kasalanan. Inaku na ngan ing kaparusan a dapat kekatamu. Kingwa na ngan ing kabayatnan da reng kekatamung kasalanan at binitbit no king krus. Kapamilatan ning keyang sakripisyu king krus, milako tamu king pangaalipan tamu karing kasalanan tamu at karing kaparusan a dapat mibie kareni. Pauli na ning sakripisyu na ning Guinu, mibayaran ngan ing dapat bayaran, mipakibatan ngan ing dapat pakibatan da reng guewa tang kasalanan, midinan hustisya ing kelan a hustisya a bunga da ring karawakan tamu ngan. Mibayu ngan ing sabla pauli ning sakripisyu ng Kristo. Mibayu ing bie tamu, pauli ning sakripisyu na.
At e tamu kakalinguan king ing Ibpa, uling king lugud na kekatamu, e ne pigkaimut ing bugtung nang anak. Iya na rugu ing pakamalan nang anak, e ne pa pigkaimut. Guewa na ini, uling kaluguran na katamu ning Ibpa. Gawan na ngan ing sabla ban aicabus na ka tamu king nanu mang karokan. Gawan na ngan ing agyu na ban mibili tamu king masanting a kabilianan, agyang nung buri na sabian niti king isakripisyu ne ing sarili nang anak. Kalugud na ning Ibpa kekatamo! E na katamu paburen. E Na katamu lalako pamag-asa agyang atiu ta na king kabilianan a lang pamag-asa.
Ngening panaun ning kuaresma, manintun tamung sariling panaun ampon oras ban pigunaman ta ya ing sakripisyu na ning Guinung Jesus para kekatamu. Pigunaman ta ya naman ing maragul na muring sakripisyu ning Ibpa inyang binie ne ing bugtung nang anak ban midinan tamung kaligtasan.
Minsan sana, magpasalamat tamu king Guinu. Sabian tamu keya ing maragul tamung kapasalamatan kening binie ng kaligtasan kekatamu. Pota kasing magpasalamat tamu, mititimid mu naman ing kamatutuan ning kekatamung pamikasala. Pauli niti, mididenan tamung kababan uling tatanggapan tamu king maina tamu at kailangan ta ya ing Guinu bilang talapangabus tamu king bie.
Kapasalamatan ampon kababan ing dapat ibunga ning kekatamung ebanghelyu ngeni. Salamat Guinu king kekang lugud! Salamat kang Jesus ing kekaming talapangabus! Salamat uling linigtas yu kaming makasalanan king alang-anggang kamatayan! Amen.

IV. Pamigunam
Ing istorya ng Maximilian Kolbe, a metung a Fransiskanung pari dimdam ta ne siguru. Inyang guera king Europa, sinukul do reng marakal a tau kareng ausan dang concentration camps. Reni kampu la a nung nukarin la pakakulung reng e da buring tau reng ausan dang Nazis ning Germany. Mesukul ya I Maximilian Kolbe keni, agyang pari ya e uling atin yang gewang e mayap, nune uling agyang ninu namung isipan dang kalaban, kukulung da, lalu na reng Hudyu. Minsan a aldo, ating mekatakas karing makakulung. Kinabukasan, inyang mamilang no reng sundalung maka-assign king kulungan, ikit dang kulang la bilang. Kanita, meging patakaran king kulungan, nung atin mang tumakas kareng makakulung, mamayaran la reng makakulung. E la mamayaran pera para ketang mekatakas, nune mamayaran lang bie. Nung metung ya ing mekatakas, kuma lang metung kareng makakulung at ipa-pate de. Guewa da ini ban e no tatakas reng tau. Basta ating tinakas karela, atin siguradung makibat kareng melakuan.

Inyang abak a ita, inyang abalu da na ring sundalung gwardya king ating metung a mekatakas karing makasukul, tildu de ing metung a lalaki ban magsilbing bayad king bie ning mekatakas. Inyang katuldu da king lalaki, mengyak neng mengyak. “Reng anak ku,” ngana, “makalunus no man reng anak ku nung paten da ku! Ali na pu sana aku!” Kabang manangis ya at kakalilua da ne, linapit ya I Maximilian Kolbe king peka lider da reng gwardya. At sinabi na karela king iya pari ya at ala ne mang pamilya. At sinabi na pa king iya namu ing kuanan da imbes na itang lalaking tildu da at menangis. Ora mismo, kingwa de I Maximilian Kolbe. Itang menangis a tildu da, micabus ya at binalik deng pasibayu keng kampu. Kilung de I Maximilian kolbe. E de pepakanan. Meyayat neng meyayat anggang meging butul ampon balat nya mu. Makarate nya mu king kulungan na uling masyadu neng maina katawan. Uling mabie ya pa agyang maina ne, ininjeksyunan deng lasun ba neng tuluyang mate. Kaybat, silab de katawan kalupa da reng aliwa.
I Jesus, makaniti mu naman ing guwa na kekatamu. Itamu ing dapat miparusan. Itamu ing dapat makibat kareng kasalanan tamu. Oneng I Jesus, kingwa na ing lugar tamu ban mikabus tamu king kaparusan. Binie ne ing sarili nang bie ban kapamilatan na ning sakripisyu na king krus, midinan tamung bayung pamibiebieng ating katimauan at alang takut. Amen.

V. Pamanahimik

VI. Tauling Panalangin

Ibpa, marakal pu salamat. Pauli ning maragul yung lugud kekami, binie ye ing bugtung yung anak ban miligtas kami. E ye pigkaimut ing kekong anak. Ban miligtas kami king kasalanan, tinggap ne ning anak yu ing kamatayan king krus. Kapamilatan na ning dayang mibubu para king kapatawaran da reng kasalanan mi, midinan keng bayung bie. Salamat pu Guinu. Salamat. Patawaran yu ke pu lalu na potang e mi pakamalan ing bayung bieng binunga ning sakripisyu yu. Patawad Guinu, patawad. Saupan yu ke pu lalu na potang papailalam kami pasibayu king kasalanan. Panatilian yu keng maging malinis ampon karapat-dapat king kekong arapan. Salamat pu Guinu. Salamat. Amen.

VII. Kutang

1. Nung ing Ibpa e ne pigkaimut ing anak na, atin ku pa kayang pagkaimut a bage king Guinu a anyaran na kanako?

Download here:
Page 1: http://www.mediafire.com/?6d6e3a1g2dyv3o2
Page 3: http://www.mediafire.com/?odymlje2j1ajeli

Kapat a Domingo ning Kuaresma

Pepakayap neng Jesus ing Taung Mibait Bulag

I. Pamuklat a Panalangin

O Ibpa ning sala, payintulutan me y Jesus, ing sulu ning meto yatu, ing pakayapan na kami at pagkaluban kasalpantayanan at pamanalastas. Bustan mung ibalik no ring kekaming panimanman ban akit mi ya ing dalan payinturu keka at karing kapara ming tau at king kapupusan ning kekaming dalan akit daka sana. Iti yang adwan mi king lagyu ng Jesu Kristong Ginu mi. Amen.
II. Pamamasa

Juan 9:1-41

1King panaun a ita, kabang lalakad ya y Jesus ikit ne ing metung a lalaking bulag ibat pa king pangabayit na. 2Kitang da ring alagad na, “Maestro, ninu ing makikasalanan king pangabait nang bulag-ing lalaking iti o ding pengari na?” 3Mekibat ya I Jesus, “Bulag ya e uling mikasala ya o ding pengari na. Iti milyari ban king kapamilatan na mibulalag la ding dapat na ning Dios. 4Kabang aldo pa na sukat ta lang daptan ding dapat na nitang mitubud kanaku. Ing bengi daratang nung kapilan ala nang makapagobra. 5Kabang atyu ku king yatu, aku ing sulu ning yatu.” 6Inyang asabi na iti, linura ya king gabun at ginawa yang burak king kapamilatan na ning gabun at lura. At kiskas na ing burak karing mata na ning bulag. 7Ngana, “Munta ka at manimu king Sibul ning Siloe.” (Ing Siloe mangabaldugan yang “Tinubud.”) Inya minta ya at menimu at mibalik yang manakit na. 8Ngara ring keyang kasiping bale ampon ding menakit keya inyang bulag ya, “Aliwa iti ing lalaking parating makalukluk at magpalimos?” 9“Ya pin,” ngarang mekibat ding mapilan. “Aliwa ya, kalupa nia mu,” ngara naman ding aliwa. Oneng sinabi na ning bulag, “Aku ita.” 10Kitnan de, “Makananu lang mesala ding mata mu?” 11Pekibat na, “Ginawa yang burak ing taung ausan dang Jesus at kiskas na iti karing mata ku at sinabi na kanaku , ‘Munta ka king Siloe at manimu ka.’ Inya minta ku at menimu at menakit ku.” 12Ngarang kinutang, “Nu ya karin?” Nganang mekibat, “E ku balu.” 13Dela re karing Pariseo ing lalaking bulag. 14Aldo Sabbath inyang ginawa yang burak I Jesus at pepasala ne mata. 15Kitnan dia naman ding Pariseo nung makananu yang mesala mata. Nganang mekibat karela, “Kiskas na ing burak karing mata ku at menimu ku at ngeni manakit na ku.” 16Ngara ding mapilan a Pariseo, “E ya king Dios ing taung ita uling e ya tutupad king Aldo ning Sabbath.” Oneng sinabi da ring mapilan, “Makananu yang makarapat ing taung makasalanan karing anti kareting milagru?” Milaban-laban ing sasabian da. 17Inya pasibayu deng kitnan ing sadiang bulag. Ngara, “Ika naman, nanu ing asabi mu tungkul keya anti na ning pepasala na la ding mata mu?” Pekibat na, “Propeta ya.” 18E la bisang maniwala ding Judio king sadia yang bulag at ngeni manakit ne anggang e da la inaus ding pengari na. 19At kitnan da la, “Anak ye iti? Sasabian yu king mibait yang bulag. Nanu ing sangkan baket manakit ya ngeni? 20Mekibat la ding pengari na, “Balu mi king ya ing anak mi at king mibait yang bulag. 21Oneng e mi balu nung makananu yang manakit na ngeni o nung ninu ing mekapasala karing mata na. Kutnan ye; atyu ne king idad at makapagsalita ya para king sarili na!” 22Makanyan lang migsalita ding pengari na uling tatakut la karing Judio at uli na ning pikasundu da ring Judio king itiwalag de king sinagoga ing ninumang sumabi king I Jesus ya ing Cristo. 23 Inya ngara ding pengari na, “Kutnan ye; atyu ne king idad! 24Inya pasibayu deng inaus ing sadiang bulag ngara keya, “Sabian mu ing katutuan arapan na ning Dios! Balu mi king makasalanan ya ing taung ita.” 25Nganang mekibat, “E ku balu nung makasalanan ya o ali. Metung mu ing balu ku: kanita bulag ku, oneng ngeni manakit ku.” 26Kitang da, “Nanu ing depat na keka? Makananu na lang pepasala ding mata mu?”
27Pekibat na, “Sinabi kuna kekayu at e kayu bisang maniwala. Baket buri yung damdaman pasibayu? Bisa kayu namang maging alagad na?” 28At inunsultu de, ngara, Ika na sanang diling alagad na, oneng ikami alagad na kaming Moises. 29Balu mi king migsalita ya ing Dios kang Moises, oneng tungkul king taung iti, e mi man balu nun gnu ya ibat!” 30Nganang mekibat ning taung mesala mata, “Yan ing makapagmulala! E yu balu nung nu ya ibat, makanyan man ya ing pepasala karing mata ku! 31Balu tamu king e na la pakiramdaman ning Dios ding makasalanan, oneng pakiramdaman na la ding tune sasamba keya at tutupad king kaburyan na. 32Manibat na king pangalalang na ning yatu ala pang mibalitang mekapasala karing mata na ning mibait bulag. 33Nung e ya ibat king Dios ing taung iti, ala yang arapat nanuman.” 34Pekibat da, “Ikang mipanganak at meragul king kasalanan, ikang turu kekame?” At tiwalag de king sinagoga. 35Abalitan nang Jesus king tiwalag de; inyang ikit ne sinabi keya, “Maniwala ka wari king Anak ning Tau?” 36Mekibat ya, “Ninu ya, ginu, ban paniwalan ke?” 38Nganang Jesus, “Ikit mu ne at ya ing kapagsalita mu.” 37Ngana ning lalaki, “Maniwala ku, Ginu!” At sinamba ya kang Jesus. 39Sinabi nang Jesus, “Dinatang ku king yatung iti ban matul, ban manakit la ding bulag at mabulag la ding manakit.” 40 Dimdam da iti ding mapilan karing Pariseo a atyu karin kayabe na, at kitang da, “Ing buri mung sabian bulag kame?” 41Mekibat ya I Jesus, “Nung bulag kayu ala kayu sanang kasalanan; oneng sasabian yu ngeni, ‘Manakit kami,’ inya manatili kayung makasalanan.”

III. Turu
Ngening pagmasusyan taya ing Kapat ng Dumingu ning Kuaresma, tuturu na ning ebanghelyu na ing pamangilalang malalam king Apung Ginu metung yang prosesu. Dimdam taya ing istorya ning lalaking bulag, na kapamilatan ning Ginu tang Jesu Kristo meulu ya king kayang pangabulag. Mangabaldugan ing mamye murin palino o sala ban akilala tayang lubusan ing Apung Ginu yapin murin Ing Apung Ginu, grasya yang babye na iti keka tamu. At kaybat ng binye ing grasyang ayni keka tamu, kanita tapa akit na tunggal ditak akikilala tayang lubusan ing Apung Ginu. Anyang mumuna kitnan de ing lalaking bulag nung ninu ing mibalik king pamisala dareng kayang mata, ing pekibat na, “Ginawa yang burak ing taung ausan dang Jesus at kiskas na iti karing mata ku at sinabi na kanaku , ‘Munta ka king Siloe at manimu ka.’ Inya minta ku at menimu at menakit ku.” Kening dakeng ayni, ing balu namu ning bulag ing menulu kaya I Jesus. Kaybat kitnan dya naman ding Pariseo, nung ninu ing pepakayap kaya at keni ing pekibat na, “Propeta ya.” Kening dakeng ayni, ing bulag akilala na ne Ing Ginu tang Jesus na metung yang Propeta.
At king bandang tauli, anyang abalitan na ning Ginu tang Jesu Kristo na tiwalag de reng Pariseo king sinagoga. Ing mismung Ginu tang Jesu Kristo pepakilala na ing kayang sarili king dating bulag. “Maniwala ka wari king Anak ning Tau?” Mekibat ya, “Ninu ya, ginu, ban paniwalan ke?” Nganang Jesus, “Ikit mu ne at ya ing kapagsalita mu.” Ngana ning lalaki, “Maniwala ku, Ginu!” At sinamba ya kang Jesus. Amen.

IV. Pamigunam

Tutu pin kaluguran a kapatad na grasya yang manibatan king Apung Ginu ing kapagnasan tamung akilala taya. Iyang babies ala kareng mata tamu ban tayang akilala. King aldo-aldo tang pamibie-nie, ing Ginu tang Jesus ala yang sawang pakilala na ing tune ng lugud ning Dios kekatamu. Ing problema kekatamu, magbulag-bulagan tamung kalupa daring Pariseo kanita. Atin ping kasabyan na ing pekamasakit kanung gisingan yapin retang taung magtudturan. Reng masakit kanung turuanan yapin retang taung mimisip na balu danangan ing kegana-gana. Reng masakit kanung pastulan yapin retang taung sasabing balu dane ing dalan. Payabut na kekatamu ngening Jesus na reng taung sasabing kilala raneng lubusan ing Dios at lalon dalang mababa reng kalupa rang tau, makalunus la king arapan ning kayang Ibpang atyu banua. At reng taung makanini panugali, atin lapin sanang matang manakit pero king katutwanan ila ring bulag king arapan ning Apung Ginu. Amen.

V. Pamanahimik

VI. Tauling Panalangin

O malugud at maganakang Ibpa, dakal pung salamat king pigkalub mung mayap a oras kekami. Abalu mi pun a ika ing mamye grasya ban lalu rakang akilala. Parati yo pung pamasalan reng mata mi ban akit mi ing tune makaligaya Keka. Ing kapasalamatan, kapuryan at kapanyamban king Ibpa, Anak at Espiritu mangga man king alang angga. Amen.

VII. Kutang

1. Nanung gewa ng paralan ning Apung Ginu ban akilala me king bie mu? Ikwentu.
2. Panwalan mu bang kabang daralan tang kapagsubukan, mas lalu tayang akilala ing Dios? Wa o ali, paliwanag.
3. King kasalukuyan, king kekatamung komunidad, nanu la reng akakit tamung dapat midinan sala? Nanu ing dapat tang gawan?

Page 1: http://www.mediafire.com/?44tdgg834a5bh8w
Page 2: http://www.mediafire.com/?6zdxb3ah5z7v8a0