Kalimang Domingo ning Kuaresma

Kailangan yang Mate ing Binutil Pale ban Mamunga yang Dakal

I. Pamuklat a Panalangin

Ibpa, e ya tinakut ibie na ing sarili ng bie ning Guinung Jesus uling balu na, mamunga ya ing keyang sakripisyu king kaligtasan para kekami. Dinan yu kami pu naman lakas lub ban milako ing takut mi potang anyaran yu na kekami ing sakripisyung dapat ming ganapan. Ilako yu kami takut king nanu mang kabayatnan a mibiebie kekami ban e ke rugu milalako pamag-asa agyang libutad ning kapagsubukan. Salamat pu Guinu. Salamat. Amen.
II. Pamamasa

Juan 12:20-33

20Ating mapilan a Griego karin a minta king piesta ban samba, 21Linapit la deti kang Felipe a tau Betsaida, Galilea. Ngara, “Malyari mi yang akit e Jesus?” 22Pintalan neng Felipe i Andres at sinabi na iti keya. At linapit la ilang adua kang Jesus at sinabi ra iti. 23Pekibat nang Jesus, “Dinatang na ing oras ban mipaligayan ya ing Anak ning Tau. 24Ing katutuan sasabian ku kekayu: subali mu nung manabu ya king gabun ing binutil pale at mate, manatili yang dili-dili, nung mate ya, mamunga yang dakal. 25Abating ne ning taung malugud king bie na ing bie na; oneng ing tanggi king bie na king yatung iti apapanatilian ne iti. Ninumang bisang sumuyu kanaku kailangan yang tuki kanaku; nung nu ku karin, karin ya naman ing talasuyu ku. Parangalan neng Ibpa ku ing ninumang sususyu kanaku. 27”Ngeni mababalisa ku pamiisip. ‘Ibpa, iligtas mu ku king oras a iti?’ Ali, uling iti yang sangkan nung inya dinatang ku – ban dikilan ing kasakitan a iti. 28Ibpa, parangalan me ing lagyu mu.” Kanita ing metung a siwalang ibat banua sinabi na, “Peparangalan ku ne at parangalan ke pang pasibayu.” 29Dimdam da ring taung atyu karin iting siwala at ngara, “Menuldul!” Sinabi da naman ding aliwa, “Ating anghel a mekipagsalita keya!” 30Mekibat ya I Jesus, “meramdam ya ing siwalang iti e king uli ku, nune king uli yu. 31Panaun na ban atulan ya ing yatung iti. Mitabi ne ngeni ing pamuntuk na niting yatu. 32At potang itas da na ku babo ning yatu, ilapit ku la kanaku ding sablang tau.” (33Sinabi na iti ban ipakilala na nung makananu deng ipapate.)


III. Turu

Ing “sipag at tiyaga”, ya ing paralan ning pamanyalita tamung pilipinu king amanuan tamung sakripisyu. Balu tamu king alang mayapo a malyari king bie tamu nung e taya pipagalan ing metung a bage at nung e taya pigpursigan ing metung a bage. Para kekatamu, ala yang ibungang masalese ing katamaran ampon ing ugaling sasamal.

Ing ebanghelyu tamu ngeni, makanyan mu naman ing sasabian ning Guinu kekatamu inyang ngana: “subali mu nung manabu ya king gabun ing binutil pale at mate, manatili yang dili-dili. Nung mate ya, mamunga yang dakal. “ (v. 24) Ala yang ibunga pin naman ing pale anggang e ya manabu king gabun at mate. Manatili ya pa murin a pale, at ala yang ibunga. Nung alang sakripisyu, ala tamung pupulan masalese king bie.
Malino ya ini king Guinu tamung Jesus uling kaya man, balu na king ing bie na, dapat yang midaun para king kaligtasan tamu. Ban midinan tamung kaligtasan, kailangan ya pa mung midaun antimong metung a sakripisyu ing sarili nang bie ban aicabus na kekatamu kareng kaparusan da reng kasalanan tamu. Ing Guinu, e ya me pwersang magsakripisyu. Tinggap ne ing sakripisyu king krus a kusa at e sapilitan. Alang ninu man ing memilit kaya ban i-ain ne ing sarili na para king kekatamung kaligtasan

Tutung masakit ampon e malagwa ing magsakripisyu. Kalupa ning amanuan tamung “sipag at tiyaga”, ing sakripisyu, metung yang mabayat a bage. Potang magsakripisyu ya ing metung a tau, kailangan neng painggulutan ing sarili nang kaburian ampon kanauan. Kailangan neng gulutan pa mu ing egana-ganang makasarili ban aisadsad ne ing pamagsakripisyu na.

Oini ing kabaldugan ning “sipag at tiyaga” kekatamu. At makanyan naman ing gewa ning Guinu king sarili na. Nganang San Pablo king sulat na kareng taga Filipos tungkul kang Kristo: “Linubas na ing sarili king sablang kamalan; mekilupa ya karing tau, at kinua na ing aske ning metung a ipus. At king pamakiwangis na karing tau, migpakumbaba yang maygit karing sabla….” (Phil. 2:7-8) Ing Guinung Jesus , likuan , kelinguan at peinggulutan na ing egana-ganang pansarili na ban ailigtas na katamu kareng kekatamung kasalanan.

Oneng ing amanuan tamung “sipag at tiyaga”, balamu e ya kumpletu. E ya kumpletu uling ing akakit tamu mu ing kabayatnan ampon pamagkasakit. Kekatamung Kristiyanu, ing pamagsakripisyu aliwa ya ya ing tutung parasan tamu. Ing pamagsakripisyu tamu, metung yamung paralan ban miras tamu king tutung parasan tamu. Ing paralan ning pamagsakripisyu, magbunga ya dapat king metung a panibayung kabilianan. Para kekatamung Kristianu, ing pamagsakripisyu, metung yang paralan a dapat tamu ngan dalanan ban miras tamu king panibayung bie a amanuan na ning Guinu.

Itamung Kristianu, e tamu tutuknang keng kabayatnan ampon pamagkasakit, uling balu tamu aliwa ya ini ing parasan tamu. Ing tutu tamung parasan ya ing panibayung pamibiebie a bunga ning pamagsakripisyu. Ing tutu tamung parasan ya ing ligaya ning banwa, a akwa tamu mu nung dumalan tamu king kalbaryu. Inya para kekatamung kristianu, e ya kabud “sipag at tiyaga”. Makarugtung ya dapat keni mu naman ing “tagumpay at ginhawa”. Uling itamung kristianu, agyang makananu ya pa kabayat ing krus a dadalan tamu, e tamu milalako pamagasa agyang kapilan man, uling karugtung ning pamamusan krus, ya ing pamag-asang akwa tamung ligaya a Guinu mu iyang maka-ibie kareng meging tapat keya.

E ta sana kakalinguan na ing parasan ning metung a binutil a pale a ban mate at manabu king gabun, nune ban mamunga at mamie bayung bie. Ing pamagsakripisyu tamu paralan ya mu ban akwa ta ya ing ligaya ampon bayung bie. Inya, makanyan na ka tamung agkatan ning Guinu - na e tamu dapat tatakut lalu na potang daranas tamung kasakitan ampon miyayaliwang kabayatnan uling balu tamu, e malaut ing ligaya ampon tagumpe kekatamung mamagkasakit king bie. Ing pamag-asa tamu iyang kakapitan tamu potang bibitbitan ta ne ing krus tamu. Amen

V. Pamigunam
Pigunaman ta ya ngeni ing sulat ng San Pablo kareng taga Filipos. Kening sulat ng aini, sasabian ng Pablo king I kristo, tutu neng beba ing sarili na, tinggap ne ing kamatayan king krus uling king kapamintuan na king kaburian ning Ibpa. Oneng pauli na ning keyang pamananggap king sakripisyung mibie keya, mibie mu naman ing ligaya keya. Sana, itamu man, e tamu tatakut kumaul king krus uling balu tamu, mibie yang pasibayu ing bieng tebili tamu. E tamu tatakut magsakripisyu. Kalupa ng kristo, pupulan tamu naman ing ligaya a makarikil kareng e milalako pamag-asa agyang libutad ning kasakitan.

“Makilupa kayu panandaman kang Cristo Jesus:
Agyamang atyu keya ing panga-Dios, makanyan man e na pinilit ing makipante ya king Dios. Nune linubas na ing sarili na king sablang kamalan; mekilupa ya karing tau, at kinua na ing aske ning metung a ipus. At king pamakiwangis na karing tau, migpakumbaba yang maygit karing sabla at meging mapamintu ya angga king kamatayan, wa, angga king kamatayan king krus.

Uli na niti, pepaygit ne ning Dios at dininan neng lagyu a mimigit karing sablang lagyu. Inya king lagyu nang Jesus, Kailangan lang siklaud ding sabla, ding king banua, ding keti king yatu at ding king lalam ning yatu. At ding sabla, karelang ipasiag king I Jesu-Cristo Guinu ya, king ikaligaya na ning Dios Ibpa.” (Phil. 2:5-11)


V. Pamanahimik

VI. Tauling Panalangin

Ibpa, maragul ing takut mi king kasakitan. Maragul ing takut mi king pamagsakripisyu uling e ke bisang misakitan king bie. Oneng nanu rugu ing apupul mi nung e ke magmasipag ampon magtiyaga? Nanu rugu ing pupulan mi nung matamad kami ampon alang kapagpursigian? Tatakut ke king krus, Guinu. Tatakut keng mamagkasakit. Masyadu kaming makasarili, inya e mi ailako ing makapit ming talan karing pansarili ming pigagap. Turuanan yu kami, malugud ming Guinu, ban milako ing takut mi lalu na nung kailangan kaming magsakripisyu. Ilako yu ing takut mi kareng kabayatnan king bie ban e ke milalako pamag-asa. Turuanan yu keng mamag-asa ban e kami tutuknang king pamaglakbe mi king kalbaryu, kayabe yu Guinu. Amen

VII. Kutang

1. Atiu pa mu rin ka ya ing kanakung pamag-asa agyang libutad ning maragul a kapagsubukan?

Download here:
Page 1: http://www.mediafire.com/?3b5sng42cb7169h
Page 2: http://www.mediafire.com/?z1cb4m6aa3ugoj9

Kalimang Domingo ning Kuaresma

Ing Pangamate ng Lazaro

I Pamuklat a Panalangin

Malugud at mayap a Ibpa, ngeni pung kaorasan asna kami pu kapalad uling parati yu pung babie ing kekayung grasya. Dakal pung salamat king pamagkalub yu kekami king kekayung Anak i Jesus na pabalu at pepakit na ing bieng ayni manibatan ngan keka. Amen.

II. Pamamasa

Juan 11:1-45

Ating metung a taung masakit; Lazaro ing lagyu na. Tau ya Betania, ing balen nang Maria at ning kapatad nang i Marta. (2I Maria ya ing mitugtug pabanglu at menamulis karing bitis na ning Ginu king kapamilatan na ning buak na. Kapatad ne i Lazaro, ing masakit.) 3Inya pepabalita da ring mikapatad a babai kang Jesus ing anti kaniti: “Ginu, masakit ya ing kakaluguran mu. 4Inyang tinggap nang Jesus iting balita, sinabi na, “E na ikamate iting sakit; nune milyari iti para king ikaligaya na ning Dios ban mipaligayan ya ing Anak ning Dios king kapamilatan na niti.” 5Kaluguran na lang Jesus di Marta, Maria at i Lazaro. 6Inyang abalitan nang masakit ya i Lazaro, menatili ya pang aduang aldo king lugal nung nu ya karin. 7Kaybat na nita, sinabi na karing alagad. “Tara, magbalik tamu Judea.” 8Ngara ding alagad, “Maestro, bayu pamu buri da kang basibasan ding Judio; ngeni magbalik na ka na naman karin?” 9Nganang Jesus karela, “E ya wari labing aduang oras ing patingapun? E ya mitakid ing ninumang lalakad king masala uling akakit na ing sala na ning yatu. 10Oneng mitakid ya ing ninumang lalakad king bengi uling alang sala keya.” 11At ngana pa, “Matudtud ya ing kakaluguran tamung i Lazaro, oneng puntalan ke ba keng gisingan.” 12Ngara ding alagad, “Ginu, nung matudtud ya, mipaldan ya.” 13Ing buri nang sabyan Jesus, mete ne i Lazaro; bala da ring alagad ing karaniwan a pamanudtud ing amanuan na. 14Inya malino nang sinabing Jesus karela, “Mete ne i Lazaro. 15Oneng king uli yu matula ku king ala ku karin ban maniwala kayu. Tara, puntalan ta ya.” 16I Tomas a mayayaus kambal, sinabi na karing kalupa nang alagad, “Tara, tukian ta ya ing Maestro ban nung mate ya, mate tamu munaman!” 17Inyang miras ne i Jesus, abalu na king apat neng aldo mikutkut i Lazaro. 18Malapit ya ing Betania king Jerusalem; ating atlung kilometru manibat karin. 19At dakal lang Judio ding dinalo kari Marta at Maria ba da lang damayan uli na ning pangamate na ning kapatad da. 20Panamdam nang Maria king daratang ya i Jesus, tinipa ya at seganan ne. Melakuan ya i Maria king bale. 21Nganang Marta kang Jesus, “Ginu, nung atyu ka keti e ya sana mete ing kapatad ku! 22Agyang ngeni balu ku king ibie na keka ning Dios ing nanumang aduan mu.” 23Nganang Jesus kang Marta, “Mie yang pasibayu ing kapatad mu.” 24Mekibat ya i Marta, “Balu ku king mie yang pasibayu king tauling aldo.” 25Nganang Jesus, “Aku ing pamaniubling mebie at ing bie. Ing maniwala kanaku, agyang mate ya, mie yang pasibayu; 26at ing ninunamang mabibie at maniwala kanaku e mate kapilan man. Paniwalan mu ite?” 27Nganang mekibat, “Wa, Ginu paniwalan ku king ika ing Cristo, ing Anak ning Dios a datang keti king yatu.” 28Pangasabi na niti, meko ya i Marta at inaus ne i Mariang kapatad na at sinitsit na, “Atyu ing Maestro, kukutang na ka.” 29Panamdam nang Maria kaniti, memalagua yang tinikdo at selubungan ne. (30E pa miras kanita i Jesus king balen; atyu ya pa king lugal nung nu ne seganan Marta.) 31Inyang ikit deng memalaguang tinikdo at linual, tikian de i Maria ding Judiong darame keya king bale. Bala ra munta ya king kutkutan ban manangis karin. 32Miras ya king lugal nung nu ya karin i Jesus. Panakit na kang Jesus
siniklaud ya i Maria king arap na at ngana, “Ginu nung atyu ka keti e sana mete ing kapatad ku!” 33Panakit nang Jesus king i Maria manangis ya at pati ding Judiong kayabe na, mengisnawa yang malalam at metagkil ya kapanamdaman. 33Nganang
kinutang Jesus karela, “Nu ye kitkut?” Mekibat la, “Mekeni, Ginu at lawan mu.” 35Kiniak ya i Jesus. 36Inya sinabi da ring Judio, “Talagang kaluguran ne i Lazaro!” 37Oneng ngara ding mapilan, “Pepasala ne mata ing bulag! Baket pepaburen neng mete i Lazaro?” 38Pasibayu yang mengisnawang malalam i Jesus at kaybat minta ya king kutkutan. Iti metung yang kueba a makatakap batung maragul. 39Nganang Jesus karela, “Ilako ye ing batu.” Mekibat ya i Marta, kapatad na ning mete, “Ginu, mamau ne kanyan uling apat neng aldo makakutkut!” 40Nganang Jesus, “E ku wari sinabi keka king nung maniwala ka akit mu ing ligaya na ning Dios?” 41Inya leko re ing batu. Tinalanga ya banua i Jesus at ngana, “Ibpa, pasalamat ku king pakiramdaman mu ku. 42Balu ku king pakiramdaman mu ku kapilan man, oneng sinabi ku iti king uli da ring taung atyu keti ba lang maniwala king ika ing mitubud kanaku.” 43Pangasabi na niti, kinulait yang masikan. Ngana, “Lazaro, lumual ka!” 44Linual ya ing mete; makabalut la ding gamat at bitis na king telang pamburul at makabalut yang imalan ing lupa na. Nganang Jesus karela, “Kalagan ye at paburen yeng lumakad.” 45Uli na niti, meniwala la kang Jesus ding keraklan karing Judiong dinalo kang Maria at menakit king depat na.

III. Turu

Asna karagul kalam kekatamung tau ing pamikatawan ng tau ning Ginu tang Jesu Kristo. Uling king kapamilatan na niti, ikwa ng abalu at aranasan ing kapanamdaman tamu. Masala tang ikit iti king mebasang ebanghelyu nyang kinyak ya ing Ginung Jesus keng pangamate ning kaluguran nang i Lazaro. Ing Ginung Jesus, antimong kalupa tang tau, potang ating mewala bie kareng kaluguran tamu siguradu mu ing panamdaman ta iti. Nya nung nanu man ing daranasan tang kapagsubukan o problema, siguradu mung ayntindyan na katamu.

Metung mu naman kareng buri ng ipayabut ning ebanghelyu, yapin ing emu king saya o tula taya akakayabe ing Ginung Jesus, nune maski pa king mabayat o masipit a sitwasyun ta king bie. Maralas pin ing mas panamdaman taya ing presensya ning Ginung Dios neng atyu ta king mabayat a sitwasyun. Uling potang maybug tanang sumuku, karin taya ausan at pasaklolu Kaya. Iyang mamye lakas ban e tamu sumuku kareng kapagsubukan ning bie.

Ating metung a lider king Guagua, ngana pin nyang minsan, “Kaylangan ne talaga ning tau ing kasakitan”, uling kapamilatan ning kasakitan karin taya panamdaman ing ating parating pag-asa. At ing pag-asang iti yapin ing Ginung Jesus na parating sasaklolu kekatamu.” Digdag na pa, “Makananu meng abalu ing pamag-asa nung alang kasakitan? At panamdaman tamu ating malugud at mayap a Dios nung ating kasakitan king bie.” Amen.

IV. Pamigunam

King mitmung katahimikan, ganakan tala reng mangasakit a mengapalyari king bie tamu.. Ganakan tala reng kaluguran ta king bie na misan kayabe tala king tula, saya at lungkut. Suryan tala reng sarili tamu, nung makananu talang alampasan reng mangasakit a mengapalyari king bie tamu. (Limang minutung katahimikan). Ninu reng taung memye kekang sikanan ban akabyusan ing mabayat a problema? Anyang ala nang taung mekasaup ketang maragul at mabayat mung problema, Ninu ing inaus mu? Kaninu ka pesaklolu?

Siguradung metung yamu ing ausan tamu potang ala tanang akarapat, at iti yapin ing Ginu tang Jesu Cristo.. na e na katamung agyung tiisan. Mikatawan yang tau ing Ginu tang Jesus ban na katamung ayabut. Pebustan ng minta ya king sitwasyun tamu ban kanita mas lalu na katamung ayntindyan. Amen.

V.Pamanahimik

VI Tauling Panalangin

Dios a Ginu mi, dakal pung dakal a salamat king parating pamanantabe yu kekami. Abalu mi pu ngeni na kaylangan ya king tau ing kasakitan ban kanita e milako ing pamag-asa mi. Ikang parating pag-asa mi Ginu, uling nung ala ka, e maging ganap ing bie mi. Amen.

VII. Kutang
1. Nanu ya ing pekamabayat mung meging problema king bie na king kabalwan mu ing Dios ya ing ginawang paralan ban alampasan iti?
2. Para keka nanu ya kabaldugan ing kasakitan?
3. Nanung asabi mu king sinabi na nitang metung a lider king Guagua na, “Kaylangan ne talaga ning tau ing kasakitan”, uling kapamilatan ning kasakitan karin taya panamdaman ing ating parating pag-asa.”?

Download here:
Page 1: http://www.mediafire.com/file/2o3odd9x21b5kxk/04.10.11%20pg.%201.doc
Page 2: http://www.mediafire.com/file/6f6lw4ari3qinsg/04.10.11%20pg.%202.doc