Domingo ning Pamaniubling Mie ning Ginu

Sinubli yang Mebie I Jesus

I.    Pamuklat a Panalangin

Ibpa, salamat king pamamye yu pung mayap a oras kekami ban makikit pasibayu keka. Apakikwanan mi pu sanang apilasan ing tune kabaldugan ning pamanyubling mieng Jesus a Ginu mi. King kapamilatan na ning kayang pamanyubling mie apakikwanan mi pu sanang apatatagan ing kekaming kasalpantayanan ban adake iti kareng aliwa. Amen.
II. Pamamasa

Juan 20:1-9

King abak a maranun na ning mumunang aldo ning paruminggu, maralumdum pa, minta ya king kutkutan I Maria Magdalena. Ikit na king makalako ya ing batung takap ning kutkutan. Inya milayi ya at minta kang Simon Pedro at king aliwang alagad a pakamalan nang Jesus. Ngana karela, “Kinua re king kutkutan ing Ginu at e mi balu nung nu re binili.” Inya linwal ya I Pedro at itang aliwang alagad at minta la king kutkutan. Milayi la, oneng itang aliwang alagad milayi yang mabilis kesa kang Pedro, at minuna yang miras king kutkutan. Dinuku ya at kilub ning kutkutan ikit na ing telang pamburul a makabili karin; oneng eya linub. Kanita dintang yang katuki na i Simon Pedro at taglus taglus yang linub king kutkutan. Ikit nang makabili karin ing telang pamburul at ing panyung penakap king buntuk nang Jesus. Iti e makakayabe king telang pamburul, nune makakalilua yang makatuklip king metung a lugal. Linub ya naman itang aliwang alagad a minunang dinatang at ikit na at meniwala ya. (E ra pa aintindian kanita ing sasabian na ning kasulatan king kailangan yang subling mie I Jesus.)

III. Turu

Sasabian da reng minunang disipulus ng Jesus king libru na ning Dapat 2:32-33 na “Binangun ne at pepasublian mie ning Dios iti mismung I Jesus, at ikami ngan testigu kami kaniti. Mitas ya king banda nang wanan ning Dios at tinggap ne kaya ing Banal a Espiritu, antimo ing pengaku na ning Ibpa na at ing akakit yu at daramdaman ngeni ya itang kalam a tigtug nang labis-labis kekami.”

Iti ya pu ing pagmasusyan tamu ngeni, ing pamanyubli ng mie Jesus. Ing pangasambut ning karulumduman king sala, ing pangasambut ning kasalanan keng mayap at mengapalyari iti kapamilatan ning kasakitan at kamatayan ng Jesus king Krus. Sasabyan napin San Pedro karing tau Corinto na e taya apikawani ing lasa’t pangamate ampo ing pamanyubling ng mie ning Ginung Jesus. Uling e ya maging ganap ing kekatamung panga kristiyanu nung alalu reng adwang areni, “At nung I Kristo e ya sinubling mebie, ing kasalpantayanan yu alang kabaldugan at atyu kayu pa king pamikasala. Nung ing kekatamung kapanayan kang Kristo para king bie iti, itamu ding taung dapat kalunusan dili keti king yatu (1 Cor 15:17,19). Mangabaldugan ing nung panwalan tamung ing Ginung Jesus sinubli yang mebie, makanyan mu naman ing malyari kekatamu potang arapan tana ing kamatayan. Ala na dapat ing takut king kamatayan at mitakutan tamu mu king kamatayan nung ing bie tamu ala yu pa kang Kristo. Oyni ing meging katatalakaran da reng minunang Kristiyano, erapan dang alang takut ing kamatayan uli na ning pamaniwala da king Ginung Jesu Kristo na minyambut na king kamatayan at kasalanan. Silaban dala, tinalip dala balat, pepakan dong leun, pete dala at kabang malilyari karela iti pupuryan depa murin ing Dios kapamilatan ning karelang pamagkanta.


Ngening panahun, na e na bawal ing pamanyamba kang Jesus antimong kekatamung Dios at tagapagligtas. At misan king pabanwa pagmasusyan tamu ing lasa, kamatayan at pamanyubling mie na ning Ginung Jesus. Ing kutang, atin pa bang kabaldugan ing kapagmasusyan ayni king bie tamo? Tutu ta kayang maniwala na tutu pin sinubli yang mie I Jesus? O maging kalupa tane ing metung kareng apostoles (Tomas) na bayu ya maniwala kaylangan akit at atalnan ne pa ing Ginu tang Jesus. Ban apatunayan tamung maniwala tamu king pamanyubli ng mie ning Ginu tang Jesus kaylangan ing akit da king bie tamu ing kekatamung kapanwalan. Nung nanu dapat ing paniwalan tamu, na ya naman ing parati tang sasabyan, sana akit da mismu karing pamidapat-dapat tamu. Paglokwan tala kasi reng sarili tamu neng kabud tala sasabyan deng kapanwalan pero e ta noman gagawan.

Metung yang amun kekatamu ngeni ing kapagmasusyan ning pamanyubli ng mie Jesus. Sana sunlag ya king bie tamu ing Ginung sinubling mebie ban kanita kapamilatan na ning mayap tang pamagbayu aramdaman dareng aliwa ing pag-asa, kasalpantayanan at lugud. Amen.

IV. Pamigunam

Linasa at mete ya king krus ing Ginu tang Jesus. Oneng tiparan na ing makatatlu ng sinabi karing kayang apostoles “Ing anak ning tau, lumasa at mate ya king krus pero king katlung aldo subli yang mie”, metupad iti at matupad mu naman ing sinabi na datang yang pasibayu ban na katamung idala ketang lugar na nung nukarin pulisan na ing kekatamung luwa at papagpaynawan na katamu kareng kekatamung kapagalan keti king yatung iti. At kabang panenayan taya king kayang kadwang panyatang sumaup tamung dakal la sanang ituki na king banwa. Uling malino ing kayang kaburyan na dinan na katang bie alang kapupusan, uling tutu na katnag kaluguran. Ing kutang, makananu tang makasaup ban e maging sayang ing krus at pamanyubli ng mie ning Ginu tang Jesus. Marakal ng besis ing dakal na lang mipahamak king kekatamung matsurang pamanugali. Marakal tana sinira at penasakit pauli ning pamag-iganti tamu. Pauli na niti ing pamanyubli ng mie ning Ginung Jesus manatili nya mu king krus ning kalbaryu. Manatili nya king kalbaryu uling manatili yang magkasakit neng atin taung mangarabyadu at magagarabyadu. Malinong malino na e na buri iting bage ayti. Nya nung mipanyaup at mabyasa tamung magsakripisyu para kareng aliwa, na parati tang isipan nung nanu ing a ibye tang mayap at ali nung nanu ing akwa o atanggap tamu. Karin pwedi tanang kawlan at sabyan na tutu ping sinubli yang mebie ing Ginu. Tara, kaluguran at kapatad ku king Ginu, lundag, terak at magkanta tamu “Ing Ginung Jesus sinubli yang mebie, Alleluia, ing Ginung Jesus sinubli yang mebie, Alleluia tara purian at pasalamatan taya, Alleluia, Alleluia, Alleluia, Amen.

V. Pamanahimik

VI Tauling Panalangin

Ginu, dakal a salamat pu king krus at pamanyubli yung mebie. Abalu mi pu ngeni na iti pu pala ing kaganapan ning kekaming panga Kristiyanu. Balu mi na pu ngeni na ing krus at ing kekang pamanyubling mie e la dapat pikawani, uling nung kabud na ing kekang krus yang king pusu mi, e ya matupad ing kaburyan mu. Uling buri mung buring tamasan mi ing bie alang-angga. Amen.

VII. Kutang

1.    Nanu ya kabaldugan keka ing Pamanyubli ng mebie Jesus?
2.    Makananu taya pagmasusyan ing pamanyubli ng mebie Jesus?
3.    Nanu lareng planu tang gawan ban panamdaman de reng aliwa ing pamanyubling mebie ng Jesus at e nya mu manatili king krus?

Domingo ning Palaspas ning Pamailasa ning Ginu

Ing Apunan ning Ginu


I.    Pamuklat a Panalangin

Ibpa, dakal pung dakal a salamat king mayap a oras a pigkalub yu pu kekami. Pabustan yu pung king kaorasan ing maging malino ya pu kekami nung nanu ya kabaldugan ing Jerusalem na ning kekayung anak, I Jesus. Dinan yu ke pung malalam a pang-unawa king kapagmasusyan ning pamaglub ng Jesus king Jerusalem. Iti ngan pu anyaran mi at pasalamatan mi king lagyu ning Ginu ming I Jesus. Amen.

II. Pamamasa

Lucas 22:14-23

Inyang miras na ing oras, linukluk ya I Jesus king lugal na king lamesa at ding apostol. Ngana karela, “Malambat ku nang pagnasan ing akayabe da kayung mangan king apunan ning Pamaglagpus bayu ku dumalan kasakitan! Sasabian ku kekayu: kapilan man e na ku pasibayung mangan kaniti anggang e lubus matupad iti king Kayarian ning Dios.” Kinua ne ing kopa at kaybat nang mekapagpasalamat king Dios binie ne karela. Ngana, “Tanggapan ye iti at pisulusuluan yeng inuman. Sasabian ku kekayu king manibat ngeni e na ku minum kaniting katas ning ubas anggang e datang ing Kayarian ning Dios.” At kinua ne ing tinape at kaybat nang mekapagpasalamat king Dios, pemirasu ne ing tinape at binie ne karela. Ngana, “Iti ya ing katawan ku a miyain para kekayu. Daptan yu iti king kapigaganakan kanaku.” Makanyan munaman, kaybat na ning apunan, binie ne ing kopa at sinabi na, “Ing kopang iti ya ing bayung kasunduan a mitalakad king kapamilatan na ning daya kung dumagus para kekayu. Oneng kasulu ke keti ing magtaksil kanaku! Uling mate ya ing Anak ning Tau agpang king birian ning Dios; oneng makalunus ne itang taung magtaksil kanaku!” At mikukutnanan la nung ninu kaya karela ing gawang kataksilan kang Jesus.

III. Turu

Keti king materyosung yatung tutuknangan tamu, parati namung atsyu la keng isip tamu reng bage-bage akakit tamu. Maralas makapokus tamu kareting bage atatlan o akakit tamu. Pero, king kekatamung kasalpantayanan bilang Kristiyanu, atin tang kapanwalan o paniwalan na ating bage na dyang e ta akakit panwalan tamu. Antimo ing pamaniwala tamu king misteryu ning bie, na kaybat na niting temporari tang bie atin tang puntalan a lugar na nung nukarin ganap na ngan ing bage-bage, ala ng danup, kasakitan at karin akayabe tane ing miglalang at tune lulugud kekatamu, ing Dios.

Makanini ya ing buri ng payabut ning mayap a balita ngening gaganakan tamu ing pamaglub o pamamunta ng Jesus king Jerusalem. Ing pamaglub ng Jesus keng Jerusalem yapin ing panahun na midinan ng kaganapan ing kayang misyun keti king yatu. At ing misyun ayti yapin ing dinan yang kaligtasan ing tau, uling melili at mababaldug ya ing tau king kulkul ning kasalanan. Ing kutang, ot akakwa tamung malili at mabaldug king kulkul ning kasalanan? Kasi, ing pamibie-bie tamu makatuun lamu kareng bage akakit da reng mata, milako kasi ing pamakiramdam tamu king siwala at panabilin ning mayap a pastul.



Oyni ing tuturu na kekatamung Jesus ngening kaorasan, ing parating makiramdam at mamintu king Dios ban akit tamu mu naman ing bage na e na akakit ning ordinaryung mata. Balu na ning Ginung Jesus na ing pamaglub na king Jerusalem magdalang kasakitan at kamatayan kaya. At iti makatatlu ng besis abanggit ining bageng ayni kareng kayang disipulus. Oneng ing Ginu akakit na ing bage na e na abut akit ning mata, at iti yapin ing kaybat ning kasakitan at kamatayan na king krus, ing pamanyubli ng mie. At balu na king kayang pamanyubling mie mangabaldugan ing pamanagumpe na laban king kamatayan at kasalanan.

Nya itamung disipilus ning Ginu tang Jesus, pakikwanan tayang pakyapusan na lumawe keng bage na e na akakit ning mata. Na, ing Ginu tang Jesus e ya kabud makalawe king Jerusalem na antimong magdalang kasakitan at kamatayan kaya, nune akakit nana ing ligayang manenaya kaya kapamilatan na ning pamakiramdam at pamamintu na king Ibpang atyu banua. Amen.

IV. Pamigunam

King mitmung katahimikan anyaran tamu king Apung Ginu na dinan na katamung malugud a pusu na biyasang makiramdam kareng amanu ng bibie bie. Aslagan na katamu sana kaisipan ban mas lalung maging malalam ing kekatamung relasyun kaya. Binang masakit ing sumisi kareng kekatamung kasalanan pauli ning ketasan ta lub. Pero iting bage ayni yang kaburian na ning Apung Ginu. Buri na kasi e ta magkargang kasalanan ban tang maging masaya bie. At neng dadanas ta namang problema keng bie, iti malilyari ban tang maging matatag king bie at ban tang parating maus at sumandal kaya.

Ing bie tamu, kalupa na ning tanaman a igos nanung e mamunga, alang kwenta. Pero nanung klasing bunga ing buri na ning Dios? Ing buri ng bunga ning Dios yapin ing pamamintu kareng turu o aral ng Jesus. Reng turu ng Jesus ilang maging pataba na lalage na king tanaman a igos. Pero e pa sapat ing pataba na kaylangan na ning tanaman igos para mamunga yang ating kapakinabangnan. E pa sapat ing pamamasa at pamagaral keng amanu na ning Dios, kaylangan ing aranasan de reng kekatamung kalupang tau ing bunga na ning kekatamung pamamasa at pamagaral king amanu na ning Dios. Kaylangan akit da keng bie tamu nung nanu ing babasan at pagaralan tamu tungkul kang Jesus – mapanyaup, mapagmalasakit at malugud kareng kalupang tau. Amen.

V. Pamanahimik

VI Tauling Panalangin

Ginu ming Jesus, tatanggapan da ko pu, king mitmung kaligayan king banal a aldong iti. Pasalamatan at pupuryan da ko pu king pamaglub yu king Jerusalem, bista man pung balu yu na iti mangabaldugan ning kekayung kasakitan at kamatayan king krus. Meging malino ya pu ngeni keka mi ing grasya ning sumangid ning Jerusalem, iti yapin pu ing pamakiramdam at kapamintuan na yang maging bunga ning tagumpe king kasalanan. Amen.

VII. Kutang

1.    Nanu la reng Jerusalem ning bie tamu na e tamu akalingwan angga man ngeni?
2.    King kasalukuyan, nanu ing asabi o panlawe tamu king kasakitan o sasabyan tamung Jerusalem?
3.    Potang dadanas tang Jerusalem, nanu lamo reng gagawan tamu?

Ikalimang Domingo ning Kwaresma

Ing Babaing Merakap king Pamakipangalugud

I.    Pamuklat a Panalangin

Ibpa, Dios ning pakalulu at kapatawaran, lunusan yu kami pu uling bina kami pung masyas a buntuk at pusu.  Mas masaguli kami pung manusga kesa king mamatawad.  Mas buri ming mablas marok kesa king luguran mila ring para ming tau.  Kareni ngan pung kainan, patawad pu! Amen.
II. Pamamasa

Juan 8: 1-11

¬1 Minuli ya ing balang metung karela king sarili nang bale, oneng minta ya I Jesus king Bunduk ding Olibo.  2At kabukasan abak a maranun minta yang pasibayu king Templo.  Lepitan de ring sablang tau karin.  Linukluk ya I Jesus at tiru nala.  3Dela re king arap na ding talaturu ning Kautusan at ding Pariseo ing metung a babai king arap da 4 at ngara kang Jesus, ”Maestro, merakap ya ing babaing iti a makipangalugud.  5 Agpang king kautusan, inutus na kekatamung Moises king ing anti kaniting babai paten ya king basibas batu.  Nanu ing asabi mu tungkul keya?”  6 Sinabi ra iti ba reng pakirakpan; ban atin lang abusbus laban kang Jesus.  Dinuku ya I Jesus at king kapamilatanan na ning taliri na sinulat ya king gabun.  7 Sigiran de king karelang pamangutang; inya inarapan na lang Jesus at sinabi na karela, ”Ing ninuman alang kasalanan kekayu ya ing munang masibas keya.”  8 Dinuku yang pasibayu at sinulat ya king gabun. 9 Inyang dimdam da iti meko lang tunggal-tunggal, megumpisa king matuang dili.  I Jesus na mu ing melakuan at ing babaing makatalakad arap na.  10 Minatna ya I Jesus at ngana king babai,  ”Nu la karin? Ala waring mitagan metung man ban matul keka?”  11 Nganang mekibat, ”Ala pu, Ginu.”  Nganang Jesus, ”Aku man, e ra ka atulan.  Mako na ka at e na ka mikakasalang pasibayu.”

III. Turu

Pwedi taya kayang sukdan ing lalam na ning kasalpantayanan ning metung a tau?  E taya asukad iti kapamilatan na ning makaba o masanting ng panalangin ning metung a tau.  Makasiguradu tamung e taya asukad ing kasalpantayanan na agya pang kilala taya o e taya man lubus kilala.  Maralas kasi magkamali o e la tutu deng akakit ning mata at daramdaman da reng balugbug tamu.  Agya pang deng abibye tang saup antimong abuluy kareng aliwang tau, e ya naman pweding gamitan panyukad king kasalpantayanan tamu.  Uling maralas atin tang sariling mutibu keng pamanyaup.  Alimbawa dininan taya ing metung a mangailangan uling atin tang buring kapalit.  Neng kayi naman nung ala yang a ibye kapalit ing sinopan tamu, agad tang isipan na ing Ginu yang miye nang kapalit at mas dakal pa ing panenayan tang kapalit.  Maralas mu naman ing mamye tamu mu uli na ning buri tamu puryan da katamu deng tau o kaya naman ban mabawasan ing panandaman ning konsensya tamu.

Atin metung a panyukad king kasalpantayanan, iti yapin ing pamamye kapatawaran karing mekagawang kasalanan keka tamu.  Masakit para keka tamu ing mamatawad at mas saguli o mayan ta naman manusga kareng mali ding aliwa.  Kalupa na wari ning ebanghelyu ngeni, deng talaturu ning kautusan o eskriba at pariseo dela de ing metung a babaing merakap makipangalugud king arapan na ning Ginung Jesus.

Kitnan de ing Ginu tang Jesus nung nanu ing asabi na.  Oneng dinuku yamu ing Ginu at sinulat king gabun kapamilatan ning daliri na.  Oneng kilitan de king pamangutang, nya sinabi na karela ”Ing ninuman alang kasalanan kekayu ya ing munang masibas keya.”  At metung man karing tau, alang mengangas mesibas king babaing merakap makipangalugud.  Bakit kaya, ot alang mesibas king babae?  Kasi, ikit da reng tau ing sarili da na ila man palpikasala la.  Na ila man dapat basibasan lang batu angga king mate la.  Nya, ngening panahun tamu nung tukyan tala reng utus ng Moises, itamu ngan atin ta ngan bukul o bugbug king katawan.

Nya maragul ing keka tamung kapasalamatan king Ginung Jesus na tuturung mamatawad karing mikasala keka tamu.  Uling king pamamatawad makasiguradung atin yang kayakibat a lugud at iti siguradung mamungang grasyang manibat king Apung Ginu. Amen.

IV. Pamigunam

E na sinabi ning Ginu tang Jesus na e ya mikasala ing babaing merakap makipangalugud.  Balu na ning Ginu na maragul ing kasalanan ning babae.  Oneng e ne buring gamitan ning Ginu ing batas na pweding makapanasakit o manyira king bie ning metung a makasalanan.  Buri na suklyan lang kapatawaran at lugud deng makagawang kasalanan.  Uling balu na ning Ginu tang Jesus na king pamamatawad ampong pamanyad kapatawaran mamunga iting grasya at kapayapan.  At ing pamaghiganti siguradung mamungang e pamikaintindi.

Nya ngening panahun na ning kwaresma, agkatan na katamung Jesus ing suryan talang miamas-amas deng sarili tamu.  Kutnan tala reng sarili tamu king mitmung katahimikan ning  isip at pusu tamu.  Petawaran tano ngan kaya reng mekagawang e ustu kekatamo? O, angga man ngeni, makatanam at pikarga-karga tapa ing mua king pusu tamu.  Pauli na niti e ya milulugal ing grasyang lugud at kapayapan a makaibye mu nung e ing kekatamung Dios at tagapagligtas, I Jesus.

Nung magkasakit at e tamu akalingwan ing meging kasalanan da reng aliwang tau kekatamu, talanga tala reng buntuk tamu at lawen ya king babo ning krus at pigunaman nung makananu nang pepakit ing tune ng lugud king tau.  At nung kaybat na niti e tamu parin agawa ing mamatawad at sasabyan ta parin na e ta talaga akalingwan ing depat da  kekatamung kasalanan, sasabyan na kekatamu ngeni ning Ginung Jesus, na sana, e naka tamu kapilan man mikasala at e tana kailangan ing kapatawaran. Amen.

V. Pamanahimik

VI Tauling Panalangin

Ginung Dios, dakal a dakal a salamat kareng kekang turu. Ngening kaorasan pu, midinan na ke na namang grasyang kapilan man e na abayaran ning pera. Iti pin Ginu, yapin ing grasyang mamatawad na siguradung ating kayakibat a lugud. Ngening kaorasan pu abalu mi nung nukarin ating pamamatawad ating kapatawaran. Nya king kegana-gana, patawad pu Ginu, patawad pu! Amen.

VII. Kutang

1.    Nanu ing panandaman tamu neng atin tang agawang e ustu karing aliwa at kaybat   petawaran na katamu?
2.    Nanu mong penandaman mu nyang mematawad ka?
3.    Ibye ya ing sariling opinyun.  ”Bilisan tamu ing pamanugse king sarili tamu at bagalan ta naman ing pamanusga karing aliwa.”

Kapat a Dominggu ning Kwaresma

Ing Anak a Mebating at ing Tatang a Malugud


I.    Pamuklat a Panalangin

Ibpa, kalugud mu kekami. Nya naman marapat mu ing samban, purian at pasalamatan daka. King kaorasan pu pamasalan yu kepu kareng kekayung amanu at dinan kababan lub ban masaya milang tukyan deng kekang kaburyan. Amen.

II. Pamamasa

Lucas 15: 1-3, 11-32

Kanitang misan, linapit la kang Jesus ding dakal a talapanyingil buis at makasalanan ban makiramdam. Mibulungan la ding Pariseo at ding talaturu ning Kautusan. Ngara “Makisalamuha ya ing taung iti at makisulu karing makasalanan!” Inya sinabi neng Jesus karela iting talimhaga: Ngana pang Jesus, “Ating metung a taung ating aduang anak a lalaki. Ngana ning bungsu, “Tatang, ibie mu na kanaku ing mana ku.” Pinitna na ning tata ing bandi na karing adua nang anak. Kaybat ning mapilan a aldo, pisali na ning bungsu ing mana na at minta ya king marayung bansa. Darala na la ding sablang ayabli na. Karin na la ginastus ding pera na king e ustung pamibiebie. Inyang agastus na la ngan ding pera na, mika maragul a danup king bansang ita at megipit yang e mu nanu. Inya mekipagobra ya king metung a taung mabandi king bansang ita. Pepapuntalan ne niti king baryu ban manese babi. Buri nang pakabsian ing sarili na agyang karing bungang tanaman a kakanan da ring babi, oneng alang minie keya. Inyang api-isip-isip na ing kabilian na, nganang mekebalak, “Karakal na ipus tatang ko at sawa-sawa lang pamangan, kabang aku mamamate kung danup keti! Magbalik ku kang tatang ku at sabian ku, “Tatang, mikasala ku king Dios at keka. E na ku karapatdapat mayaus pang anak mu; ibilang mu na ku mung metung karing ipus mu.” Inya tinalakad ya at migbalik kang tatang na. “Marayu ya pa ikit na neng tata na at tutu yang melunus; inya memulayi yang sinalubung keya; kinaul ne at penuma. Ngana ning anak, “Tatang, mikasala ku king Dios at keka. E na ku karapatdapat mayaus pang anak mu.” Oneng sinabi na ning tata karing ipus na, “Mamalagwa kayu! Dala ye keni ing masanting diling imalan at ipasulud ye keya. Pasuluran yeng singsing at sandalyas. Kuanan ye ing pataban a biserung baka at paten ye; mangan tamu at magsaya! Uling ing anak kung iti mete ne, oneng meyakit yang pasibayu.” At megumpisa lang migsaya. Atyu kanita king marangle ing anak a pangane. Inyang pauli ya at malapit ne king bale, mekaramdam yang tigtigan at terakan. Inaus ne ing metung karing ipus at kitnan ne, “Nanu ing malilyari keti?” Pekibat na ning ipus, “Dinatang ya pu ing kapatad yu! Pepapate neng tatang yu ing biserung bakang pataban, uling ing kapatad yu mibalik yang mabie at alang sakit.” Mimua ya ing pangane at e bisang lungub. Inya linual ya ing tata at inaru ne. Oneng sinabi na, “Siyuan da kayu kilub ding dakal a banua at kapilan man e ra kayu pepasukal a lub. Agyang misan mu e yuku dininan biserung kambing ban pagtawan ku la ding kanakung kakaluguran! Ngeni mong dinatang ya ing anak yung yan a minyira king kekayung pibandian karing babaing magtinda king katawan da, pepapate ye pa ing biserung bakang pataban!” Ngana ning tata, “Anak ko, kapilan man kayabe ra ka at keka ing sablang bandi ku. Sukat tamung magsaya at tumula uling ining kapatad mu mete ne, makanyan man sinubli yang mebie; mebating ya at meyakit ya.”

III. Turu
Ating metung a pamilya, na kabang manalbe lang tibi misan a bengi, kabud dimdam da nya mu ing metung a pusang ngingyaw king arap dang pasbul. Nyang buklat ne ning tatang ing pasbul, kabud nya linub ing metung a pusang kule abu na ating makapal at makabang buwak. Miglalawe ya ing pusa kilub ning bale at kabud nya linundag king metung a luklukan na balamu dati ng pipagkeran. E la makapaniwala ding pamilya king karelang ikit, uling ing pusa dang mawawala kilub ning pitung banwa na miglagalag, oyni atyu king arpan da’t migbalik.


King ebanghelyu ngeni, kukwentu  ne ning Ginu tang Jesus ing metung a talimhaga tungkul king metung a tatang a tinggap neng mitmung tula ing sisisi nang anak king pamagbalik na bale. Adya pang maragul ing agawa ng kasalanan ning kayang bunsung anak; kingwa no reng mana na adya pang i tata na maybe ya pa. Kaybat nong ikwa reng mana na pisali no reti at minta ya king aliwang lugar at karin linuste no reng pipagalan ng tata na (mana). Leko na ing dangalan na ning bunsung anak, migbabad ya king kasalanan. Pinutut na mismu ing kayang relasyun king kayang tatang pauli ning materyal a bage na makabye mung kuswelu pansamantala. Anyang megisan no ring pera na, memasukan yang ipus, at keni ing bunsung anak mas lalu yang mebaba pangatau, uling kapanwalan da reng Judio na ing babi metung yang marinat na e daman dapat talnan.

Itamu ing kukwentu ng Jesus king kayang talimhaga, uling maralas mikakasala tamu e mu Kaya pati na karing kapara tang tau. Pakipalit taya ing kekatamung dangalan o dignidad bilang kristyanu na maralas king mung mangalating bage. Agad tamung mimina at masasambut king tuksu. E taya didinan ulaga ing pamaging anak tamu king kekatamung Ibpang atyu banua. Na e tabalu na ing mumunang mayap a balita na daralan ning Ginu Jesus keka tamu yapin ing atin mayap ai maganakang tatang na parating makalawe at manantabe kekatamu.

Agya pang mikasala tamu kaya ala yang patugut manenaya king pamagbalik tamu king tutu tang kabilyan. Parati yang manenayang salubung kekatamu ban ipag-adya na katamung maragul a anda. “Mamalagwa kayu! Dala ye keni ing masanting diling imalan at ipasulud ye keya. Pasuluran yeng singsing at sandalyas. Kwanan ye ing pataban a biserung baka at paten ye; mangan tamu at magsaya! Uling ing anak kung iti mete ne, dapot sinubli yang mebie; mebating ya, dapot meyakit yang pasibayu.” Amen.

IV. Pamigunam
Maragul tamu pamialiwa king Apung Ginu. Itamung tau mabilis tamung manusga kareng mikakasala keka tamu, pero ing kekatamung Ibpa marakal at madalas manenaya ya keka tamu king pamagbalik ta kaya. Ala yang patnang mamatawad kareng keka tamung agagawang kasalanan. Makabuklat ya parati pusu at gamat, pupulayi yang sasalubung kekatamu neng magbalik king pibale-bale tamu.

Maralas pangilagan tala reng usgan tamung e mayap a tau pero ing Ginu tang Jesus malulunus ya karela at ala yang aliwang buri nung e ing karelang kaligtasan. Ing bunsung anak tuturing yang mete, nya buri neng dinan bie Jesus. Buri ng Jesus na mibalik ya king kayang Ibpang mayap at maganaka.

Makapagmulala ing gewa na ning Apung Ginu karing ayup a ating abilidad mibalik kareng dati dang tuknangan. Keng pamagrebeldi ta king Apung Ginu, akakit tapang mas atin la pang maragul a kakayahan deng ayup magbalik king karelang dating tuknangan kesa kekatamu. Tandanan tamu na melalang tamu king ganaka at kayapan ning Apung Ginu. At ya sanang gawang tang maragul a dahilan ban tang magbalik kaya. King kayang presensya, ating pagasa, lugud, alang patnang pamamantabe at tune saya’t tula. King pamagdayu ta Kaya, ating pansamantalang saya, pero kapalit ing alang-anggang alang pag-asa at matinding lungkut at kasakitan. Nya “Tara na abe, kapatad manenaya ne i Tatang keka ta! Amen.

V. Pamanahimik

VI Tauling Panalangin

Tatang mi po, dakal a salamat king maragul mung pakamal at lugud keka mi. salamat mu rin king talimhagang tiru yu ngeni keka mi. Dinan mu kaming pusung mapagmalasakit at mapaglunus ban aluguran milang tutu reng kekaming pamilya at kaparang tau adya pang malili la king tune dalan. Amen.

VII. Kutang

1. Nanu lang kekatamung kasangkanan ot bakit e ta lubus bisang miye lunus at tanggap kareng mikakasala kekatamu?
2. Atin kang karanasan, na misan mig tampu ka kang tatang mo? Nanu mo ing gewa ng tatang mu ban mibalik ka king bale yu?

Katlung Dominggu ning Kwaresma

Sumisi Ka, Nung Ali, Mate Ka

I.    Pamuklat a Panalangin

Ibpa, salamat pu king kaorasan a iti. Pebustan yu pung mitipun-tipun nake na naman pu. Ginu, ing sanang lugud, masabal at kapayapan ilang maglugar kareng pusu mi. Iti pu anyaran mi king lagyu ng Jesus. Amen.

II. Pamamasa

Lk. 13:1-9

King oras a ita, dinatang la ding mapilan a tau at belita ra kang Jesus king pepapate na lang Pilato ding mapilan a tau Galilea kabang mamain la king Dios. Ngana Karela, “Isipan yu galang king maragul la kasalanan deting tau Galilea kesa karing aliwang tau Karin, uling makanyan ing miras karela? Ali! Sasabian  ku kekayu: ning e kayu sumisi at painggulut karing kekayung kasalanan mate kayu ngang kalupa ra. O deta naming labing walu kataung mete inyang mipatanan la king tore na ning Siloe? Isipan yu galang king mas maragul la kasalanan kesa karing aliwang taung makatuknang Jerusalem? Ali la! Oneng sasabian ku kekayu: nung e kayu sumisi at painggulut karing kekayung kasalanan, mate kayu naming kalupa ra!” Kanita selita neng Jesus itang talimhaga. Ngana, “Ating metung a taung ating tanaman a higera king ubasan na. Linawe na nung atin yang bunga, oneng ala yang ikit. Inya sinabi na king mamahala king ubusan. Atlu na kung banuang pupunta keti at manintun bunga king tanaman a iti, oneng ala ku pang ikit. Kuturan mu ne! Makaskup nia wala king ubasan! Oneng pekibat na ning mamahala, “E ta ya pa mu kukuturan king banuang iti. Gambulan ke at dinan pataba. Nung mamunga yak eng tutuking banua, lalung masanting; mung ali ya, kanita tana e kuturan.”

III. Turu

Asno kausu ngening panaun tamu reng motorsiklu. Ing sasabyan da nya memamanyali lang motorsiklo uling mayna la kanung mangan gas ampong saguli milabas ka kareng dalan a maskup. Oneng medalas naman ngeni ing aksidenti. Asnano kaingat keng dalan deng magmotorsiklu kareng mangaragul a saken, oneng ing makapagtaka, nya kanu mayayaksidenti la uling makalaparis lang malatik a batu at pauli na niti nya milalako la kanu keng direksyun da.

Madalas mu naman king bie tamu pangilagan tala reng maragul a problema o deng maragul a kasalanan. Pero ing tutu nanini ing madalas a magpabagsak kekatamu deng malatik a problema. Ing pamanyira o kaya mangabagsik a amanu, marinat lamung pamagkulang. Pero king arapan na ning Banal a Dios deng anggang kasalanan seryoso la. Dening lalawen tamung mangalating pamagkulang o kasalanan ilang maging dalan ning e tamu pamamamumga king lugud, katapatan at kapayapan king Ginu at karing aliwang tau. Dapat mingat tamu kareng mangaragul a problema o kasalanan pero e tala kakalingwan deng mangalatik a batung pweding makatalisud king pamanuki ta king Ginu.

King katlu ng Dumingu ning Kwaresma, papasyag na kekatamu ning ebanghelyo na kaylangan ing sumisi at payinggulut tamu kareng kekatamung kasalanan. At nung e tala agawang sisyan at payinggulutan dening kasalanan a reni, sasabyan na ning Ginu ing mate tamu. Kalupa da wari deng pipumpunan tamung ing Adan at Eba inyang e de pemintuan ing Dios, mete la e king bie laman nune mete la king bie Espiritu. Mabie la antimong tau pero mitda o mete ing relasyun da king Apung Ginu. At ikit tamu manibat nyang mete ing karelang relasyun king Apung Ginu kanita murin mibait ing kasakitan.

Ing kutang, ot bakit utus at buri na ning Ginu tang Jesu Kristu ing sisyan at gulutan tala reng kekatamung kasalanan? At ing pekamayan a pakibat yapin ing burin a kasi ning Ginu na midinan tang lugud, kayapan at kapayapan king bie na e na aibie ning yatung iti, na e mu kapilan asali. Piyaben-aben ta ngan deng kwalta, pibandyan o nanu mang materyal keti yatu e nala kasing nyaman ning lugud, kayapan ay kapayapan king bie. Amen.

IV. Pamigunam

King mitmung katahimikan anyaran tamu king Apung Ginu na dinan na katamung malugud a pusu na biyasang makiramdam kareng amanu na bibie  bie. Aslagan na katamu sana kaisipan ban mas lalung maging malalam ing kekatamung relasyun kaya. Binang masakit ing sumisi kareng kekatamung kasalanan pauli ning ketasan ta lub. Pero iting bage ayni yang kaburian na ning Apung Ginu. Buri na kasi e ta magkargang kasalanan ban tang maging matatag king bie at ban tang parating maus at sumandal kaya.

Ing bie tamu, kalupa na ning tanaman a igos nanung e mamunga, alang kwenta. Pero nanung klasing bunga ing burin a ning Dios? Ing burin g bunga ning Dios yapin ing pamamintu kareng turu o aral ng Jesus. Reng turu ng Jesus ilang maging pataba na lalage na king tanaman a igos. Pero e pa sapat ing pataba na kaylangan na ning tanaman igos para mamunga yang ating kapakinabangnan. E pa sapat ing pamamasa at pamagaral keng amanu na ning Dios, kaylangan ing aranasan de reng kekatamung kalupang tau ing bunga na ning kekatamung pamamasa at pamagaral king amanu nga ning Dios. Kaylangan akit da keng bie tamu nung nanu ing babasan at pagaralan tamu tungkul kang Jesus- mapanyaup, mapagmalasakit at malugud kareng kalupang tau. Amen.

V. Pamanahimik

VI Tauling Panalangin

Ibpang Ginu ming mayupaya, dagdagan yu pu sana ing kekaming grasyang mamatawad kareng kasalanan dareng kapara ming tau. Aslagan na ke pu sana ning Banal a Espiritu king kayang kapayapan at lugud ban keng makapamungang mayap at midinan pagkakataun sumuyu at lumingap kareng tau. Amen.

VII. Kutang

1. Nanu ing buri ng sabyan Jesus, na patse e ta gilutan ing kasalanan mipahamak tamu? Nanung kapahamakan ing buri ng sabyan Jesus?
2. Keng palage mu, keng talinghaga ng Jesus, ninu ing tanaman a igos, ninu ing mikibandi kanini? Ninu ing taga-sese? Ninu ing pataba? Nanu la reng bunga?

Kadwang Dominggu ning Kwaresma

Ing Pamanaliwa na Itsurang Jesus


I.    Pamuklat a Panalangin

Ibpa, bibie mi pu ing kapurian at kapasalamatan keka. King pinandit pu pigunaman miya ing pamanaliwa na aske ning kekang anak, I Jesus at ing kekayung panabilin na, “Iti ya ing Anak ku, ing kanakung pinili, pakiramdaman ye.” Pabustan yu pung pakiramdaman miya ing kekayung anak ban miabuban mu sana king kayang kayupayan. Amen.

II. Pamamasa

Lucas 9:28-36

Kalabas da ring walung aldo kaybat na lang sinabi deting bage, tiki na lang minukiat Jesus di Pedro, Juan at Santiago king bunduk-bundukan ban manalangin. Kabang manalangin ya, minaliwa ya itsura ing lupa na at meging makasilo king puti ing imalan na! Kabud-abud ating aduang tau a meyakit kasabi na. Ila deti ri Moises at Elias; makapiblas la king e mu nanung kaligayan at kasabi re I Jesus. Pisasabian da ing tungkul king malapit nang pamanupad king parasan na ning Dios king kapamilatan na ning pangamate na karin Jerusalem. Matudtud yang maniaman I Pedro at ding kayabe na, oneng mipagising la at ikit da ing kaligayan nang Jesus ampon ding aduang lalaking makatalakad kayabe na. Inyang lalakuan da ne I Jesus ding adua katau, nganang Pedro kang Jesus, “Maestro, mayap ing keti tana! Gawa tamung atlung kubu; metung para keka, metung para kang Moises, at ing metung para kang Elias.” (Tune nang e balu ing sasabian na.) Kabang magsalita ya pa, linto ya ing metung a biga at tikpan na la; mitakutan la ding alagad inyang mitulid ya karela ing biga. Ngana ning siwalang ibat king biga, “Iti ya ing Anak ku, ing kanakung pinili, pakiramdaman ye!” inyang tinuknang neng magsalita ing siwala, ikit deng ya na mung dili I Jesus, Linihim da ring alagad iting bage milyari at ala lang belitanan ninuman king panaun a ita tungkul king ikit da.

III. Turu

Panaun na naman ning kwaresma. Kwaresma na mekwa king amanung kwarenta o 40 days. Kilub ning apat apulung aldo pigugunaman ta ing pamailasa at pangamate ning Ginu tang Jesus Kristu king krus. At kening panaun ayni, maralas ita mung kristiyanu ing magrekoleksyon o magretrit tamu ban mika panaun mibule king relasyun tamu king Apung Ginu.

Maralas apapagmasdan tamu kareng rekoleksyon o retrit ing bayu mag-umpisa, akakit tala reng magretrit ing asno kapagal itsura, matamle la, at neng kayi abasa mu pa king lupa da ing bala mu sasawa no king bie. Oneng potang mag-umpisa na ing retreat at medyu kakapitna na, titiman nala, at mikakabie nala. At iti makasiguradu tamung gawa na ning Dios, ing Dios Espiritu na bibie lakas, inspirasyun at bie kekatamu.

King ebanghelyu tamu ngeni, ikit da reng atlung alagad na ing Ginung Jesus menaliwa ya itsura kabang manalangin ya king Ibpa at ikit dya naming kasabi nala ri Moises at Elias. King makapagmulalang ikit ng Pedro, asabi na king Ginung Jesus na karin na la mu at gawa nalang kubu para kaya, para kang Moises at para kang Elias. Oneng e na balung Pedro ing planu na ning Ibpa. Ing planu ng pamagligtas Jesus kekatamu kareng kasalanan tamu.

King pamanaliwa ng itsurang Jesus pepakit na na kareng alagad nung makananu ta itsura king kablang bie. Potang malapit at makisabi tang parati king Ginu, itang salang ikit dareng apostol miabuban tamu. Inya neng susuryan at susuku tala reng bie tamu king Ginu mididinan tang grasyang alang kalupa, grasyang maging kawangis na ning Anak na ning Dios.

Oneng metung kareng kundisyun ban parati tayang tanggapan ing grasyang bibie na ning Ginu tang Jesu Kristo, yapin ing sinabi na ning Ibpa kareng minunang apostol, “Iti ya ing Anak ku, ing kanakung pinili, pakiramdaman ye.” Kanini ta mayna, e taya lubusan pakiramdaman ing Ginu kareng kayang panabilin. Akakalingwan tamu parati ing depatan ng lugud kekatamu. Inya naman neng kayi undap-undap ing sala kareng lupa tamu, e magluwat. Amen.

IV. Pamigunam

Metung kareng pasalamatan a grasyang akakit tamung bibie na ning Apung Ginu king pisamban yapin deng kekatamung Liturgical Celebration. Atin tamung panaun ning Adbiyentu, Pasku, Ordinaryung Dumingu, Kwaresma at Paskung Pagkabie. Maragul ing kapurian at kapasalamatan tamu Kaya karening ukasyung areni ning pisamban. Mididinan ta parating panaun ban suryan, migunam kareng kekatamung pamidapat-dapat. Ala yang patugut ing kekatamung pisamban na mamye paganaka kareng amanu at dapat ning keka tamung “Rabbi” I Jesus.

Ngening panaun ning Kwaresma, pakikwanan tamung manaliwa mu naman aske o lupa. Pabusnan miabuban tamu king grasya na ning Ginu tang Jesu Kristo. Kalupa na wari ning bulan na manikwang sala mu king aldo. Pakapangadi tamung kalupa na ning gewa ning kekatamung Maestro ban tangan alampasan deng pagsubuk ning bie. Anyaran tamung dinan na katamu parating masalang kaisipan ban e mangalingwan kareng kayang amanung babie bie. Parati ta sanang aganaka na metung kareng kaylangan ban manatili ya ing Ginu tang Jesus kekatamu ing parati tang makiramdam kaya. Na parati ta sanang ilage kareng pusu tamu at kaisipan deng amanu na ning Dios Ibpa, “Iti ya ing anak ku, ing kanakung pinili, pakiramdaman ye!” Amen.

VI Tauling Panalangin

Ginung mayupa, dakal pung dakal a salamat kareng paganaka at lugud na bibie mu kekami kilub ning Pisamban. Parati miya sanang pakiramdaman ing kekang Anak ban mika bie, tula at inspirasyun kami king aldo-aldo ming pamibie-bie. Amen.

VII. Kutang

1. Manibat inyang mikyabe tamu king BEC, ating bang pamagbayu kekatamo? Ikwento.
2. Nanung mas saguli keka, ing taimtim a pamangade, gawan ing obra o obligasyun aldo-aldo o pamamie saup kareng aliwa? Ipaliwanag.
3. Nanu namo ing makapagmulalang gewa tamu ban apakit taya ing lupa ng Jesus kareng kapatad tamu?
4. Nanu ing masanting tang agawa ban apakit ing grasya ng Jesus kareng aliwa?

Mumunang Dominggu ning Kwaresma

Ing Pamanuksu ning Diablo kang Jesus

I.    Pamuklat a Panalangin

Ibpa, minsan papu ing kapasalamatan at kapuryan. Balu mi pu nya tinubud me kekami ing kekang Anak ban na keng ituru nung makananu dapat ing mabibie king yatung iti. Ngening kaorasan pung iti, balu mi pung mika maragul keng kamasalan nung ninu reng tutung mapalad at ninu reng tutung pakakalulu keka. Amen.

II. Pamamasa

Lucas 4:1-13
    Meko ya I Jesus king Ilug ning Jordan; kitmuan ya king Banal a Espiritu at dela ne ning Espiritu king Disyerto nung nune tiksuan ning Diablo kilub ding apat apulung aldo. E ya bitasang mengan nanuman kilub da retang aldo, inya tutu yang danupan inyang milabas la. Ngana ning Diablo, “Nung ika ing Anak ning Dios, yutus mu kaniting batu ing maging tinape ya.” Pekibat nang Jesus,“Ing Kasulatan sasabian na, “E mu bukud king tinape ya mabibie ing tau.” Kaybat na nita, inukiat ne ning Diablo king matas a lugal at king metung a saglit pepakit na la kang Jesus ding sablang kayarian na ning yatu. Ngana ning Diablo, “Ibie ku keka ing sablang kayupayan at ing sablang pibandian na ning yatu uling iti ngan miyabe kanaku, inya aibie ku kenu mang buri kung ibie. Iti ngan maging keka nung siklaud ka king arapan ku.” Nganang mekibat Jesus, “Ing Kasulatan sasabian na, “Samban me ing Guinung kekang Dios at ya mung bukud mung suyuan,” Kanita tiki ne ning Diablo karin Jerusalem at dela ne king taluktuk na ning Templo at ngana, “Nung ika ing Anak ning Dios, luksu kang ibat ken, uling ing Kasulatan sasabian na, “Itubud na la ning Dios ding anghel na ba ra kang ingatan.” Sasabian na naman, “Sapnuan da ka karing karelang gamat ban ela manasakit ding bitis mu karing batu.” Pekibat nang Jesus, “Ing Kasulatan sasabian na, “E me sukat paniubukan ing Guinung kekang  Dios.” Inyang e ne atuksu ning Diablo I Jesus karing miyayaliwang paralan, likuan ne king mapilan a panaun.

III. Turu

Nung kutnan da katamu ngening kaorasan, ninu kaya kekatamu ngeni ing alang pamagkulang? Ninu kaya kekatamu ngeni ing alang kasalanan? Iting kutang ayni parati ta yang daramdaman neng ating pamikatugun para suryan ing kekatamung sariling pilubluban. Neng kayi papin agkat dong talakad deng alang kasalanan. Oneng ni metung a tau alang tatalakad ban patutwanan na iya ala yang kasalanan o pamagkulang. Neng kayi papin ating manyubuk na mamye pera o premyu nung atin mu man metung kareng makayarap a tau na apatunayan na iya ala yang kasalanan. Pero makanyan mu rin ala ninu man mangangas o maglakas lub na sabyan na iya malinis ya o ala yang bakas a kasalanan.

Ing ebanghelyu ngeni tungkul ya kekatamung taung asna kabilis keng pamanatul o pamanusga kareng aliwang tau. Agad tamung akakit ing mali o dapat dang matsura pero ing matsura tang dapat e ta akakit. Ana pin ning metung a magaling a pilosopong taga Gresya (Socrates) “ing peka maragul ng agawa ning metung a tau para apagtagumpayan na ing bie ing dapat kilalanan ne ing kayang sarili.” Oneng likas kekatamung tau ing mas buri talang abalu o akilala reng aliwa kesa keng sarili tamu. Nya maralas mas masala ta mata kareng agagawa dang e ustu deng aliwa. Nya kekatamung kapampangan ating kasabyan na bayu me linisan ing bakud da reng aliwa ing sarili mu pang bakuran ing linisan mu.


Ngeni pa namang panaun na ning pangampanya king pulitiku, maging natural namu kekatamu ing mipanyira. Ing kasiran na ning metung at metung ya namung daramdaman tamu. Ing e ta balu na ing anggang amanung linwal king asbuk tamu pakibatan tala potang marap tana king Apung Ginu (Mateo) uling deting amanung pepalwal ta keng asbuk tamu, manibatan langan king kalalaman ning pusu tamu. Metung a makalungkut iting malilyaring ayni king keka tamung lipunan, uling ala ng lultu ustu purus na langan e mayap, nya e malaut ing ala ng magtiwala king metung at metung.

Maralas naman king kekatamung komunidad ing maglinis-linisan tamu. Papalto tamung mayap tamu. Magmayabang tamu, agad talang kukumpara deng sarili tamu kareng aliwa. Dapat ikumpara taya ing sarili tamu “vertical” at e “horizontal”, talanga ta babo banwa at ikumpara  ta ing sarili tamu king kayapan at lugud a bibie ning Apung Ginu kekatamu. Nya tuturu na kekatamu ngeni ning Ginung Jesus ing tuknangan ta ing kayabangan,ing pamagmagaling at pamagmalinis bagkus dapat reng sarili tang pamagkulang o kasalanan ilang lawen at larinan tamu. King pamaging tutu king sarili, mas maging makatwiran at pante tamu panlalawe kareng sitwasyun daring aliwang tau. Amen.

IV. Pamigunam

Manahimik tamu at suryan tala reng sarili tang pilubluban. Asabi ne ning Ginung Jesus metung a talimhaga tungkul king metung a bulag na e pweding manayid king kalupa ng bulag. Uling pareu lang manabu king kulkul. Ing kutang, keka tamung kayabe na keng BEC, pota galang bulag tapa at baka deng tataryan tapa ila reng manaket? O kaya naman, nung e taman bulag duling tana man. Uling ing duling adwa ya akakit king metung a bage. E ya pareu panlalawe, uli mong kaluguran taya adya pang matsura ing dapat na mayap pa murin keka tamu. Neng kayi naman deng mata tamu sapak lang muri at e tana balu ing mali ampo ustu. Uling mitatakpan no reng mata tamu antimo ing kasikatan, kabyasnan o kaya king materyal a bage.

Nya masala ng sasabyan kekatamu ning Ginung Jesus ngeni na samasnan ta ing bie tamu, lingunan tala reng pamilya at deng anak a binie na keka tamu. Pakibalwan ta ing burin ng ipagawa kekatamung Jesus at nung nanu ing tune ng panlalawe king bie na ning tau. Pasaup ta kaya king kayang Banal a Espiritu na ilako no reng muri king mata tamu banta abalu tala reng pamialiwa ning mayap ampong marok. Pasaup ta murin na itulid no reng mata tamu ban ing mayap yang pagnasan tamu at aliwa ing dewakan. At katauli-taulyan ing dinan na katamung bayung mata na e bulag king katutwan, na matang kalupa da reng mata ng mapaglugud at mapaglunus. Amen.

V. Pamanahimik

VI Tauling Panalangin

Ibpa ming mayupayang tutu. Mapaglugud at mapaglunus. Parati yuke pung ituru at antabayanan ban maging malino panlalawe keng bage-bage. Dinan mu kaming matang kalupa da reng mata yu pu. matang mapaglunus at mapaglugud. Iti pu anyaran at pasalamatan mi king lagyu na ning keka yung anak, I Jesus. Amen.

VII. Kutang

1. Ninu kareng akilala mu na meging tagatayid keka papunta king kayapan?
2. Meging talataid na naka ning kayapan? Nung wa ikwentu, nung ali pa, nanung balak mung gawan?
3. Nanu la reng masanting gawan ban tamung e maging bulag king pamanayid kareng aliwa?

Ikalimang Dominggu king Ordinaryung Panaun

Ing Pamaniaus nang Jesus karing Mumunang Alagad

I.    Pamuklat a Panalangin
Ibpa ning lugud, ligaya, at ning kaganapan.  Dakal a dakal a salamat pu. Bistaman makasalan kaming tau biryan yu pung ausan yu kami ban maging magliligo kami karing tau. Kapalad mi pung lelangan at maging kasaup yu kepu king kekayung mismung dala langan ding tau king bale na ning Ibpang atyu banua. Amen.

II. Pamamasa
Lk. 5:1-11
1 Makatalakad ya kanitang minsan I Jesus king pampang ning Dagat-dagatan ning Genesaret at panikuanan da ring tau ing milapit kang Jesus ban makiramdam king amanu ning Dios. 2 Ikit na lang makasadsad king pampang ding aduang bangka; sidsad da la reti ding manasan ban linisan da la ring karelang lambat. 3 Sinake ya I Jesus king metung kareting bangka, itang kang Simon at inawad   na kang Simon king ilaut neng bagya king pampang. Linukluk ya I Jesus king bangka at tiru na la ding dakal a tau.
4 Kayari nang migsalita, ngana kang Simon, “ Ilaut me pang bagya ing bangka king malalam at ibaldug yu la ding lambat yu ba kayung makarakap asan.”
5 Nganang mekibat Simon, “ Maestro kabukas na keng babaldug lambat, oneng e ke mekarakap, nanuman. Makanyan man, nung ita ya  ing yutus mu, ibaldug ku la ding lambat.” 6 Bildug da la ring lambat; milalu la king karakal ding arakap dang asan at halus masira la ding lambat da. 7 Inya sininialan da la ring kayabe ra karing aliwang bangka ban lumapit la at sumaup karela. Linapit la at seke da la ring asan karing adua rang bangka. Halus mitittiabla ding bangka king pangakatmu ra. 8 Inyang ikit nang Simon Pedro iting mepalyari, siniklaud ya arap nang Jesus at ngana, “ Dumayu ka kanaku, Ginu, uling tau kung palpikasala!”
9 Mengapamulala ya I Simon at ding kayabe na king keraklan da ring asan a arakap da. 10 Makanyan ya naming mengapamulala  I Santiago at I Juan a anak ng Zebedeo at kayabe nang Simon.  Nganang Jesus kang Simon, “E ka tatakut, manibat ngeni manasan kang tau.”
11  Ginuyud da la king mamala ding bangka ra; likuan da ing sabla-sabla at tinuki la kang Jesus.

III. Turu

Metung karing panugali ning Dios ing e bisang magdili-dili. At ini ing metung karing sangkan ot bakit lelangan na katamu. Nya naman metung karing amana tang wangis Kaya ing  e tamu mu naman pweding miye nung ala lu reng kapara tang tau. Metung pang akakit tamung panugali na ning Apung Ginu ing mapanagkat ya o mapanaus ya. Manibat pa king umpisa na ning yatu inaus o igkat nane ing tau ban neng akayabe king tula, saya at kaganapan king bie. Inaus ne ning Ginu ing tau manibat mu king gabun, oneng nyang pengisnawanan ne midinan yang bie.

Ing Apung Ginu king Matuang Tipan, ala yang patugut mamaus ban ng ipayabut ing tune ng lugud king tau. Inaus no reng tatang o makatua dareng Israelita, di Abraham, Isaac, Jacob, Moises, deng hukum, deng ari at ding propeta  ban maging talasuyu nala king kayang kayaryan. At nanung sinabi ng Propeta Isaias nyang ausan ne ning Dios, ngana “Ala na kung kapanayan! Makalunus ku, uling makasalanan la ring labi ku, at uling manuknangan ku libutad da ring taung mangarinat a labi. Ngeni ikit ke karing sarili kung mata ing Ari, ing Ginung Mayupaya.“ Ikit ng Propeta Isaias ing kayang sarili na e man karapat-dapat king arapan ning Dios. Oneng uling ing Apung Ginu tune yang mayap ampong malugud tigkilan no reng labi ng Isaias kapamilatan na ning pamangabit ng baya king kayang labi at deng sabla ng dewakan at kasalanan mipatawaran la.

King Bayung Tipan, aliwa klasi ing pamanuas na ning Dios keka tamu. Ing pamanaus na meging personal, arapan at iti ngan mepalyari kapamilatan na ning pamanubud na king kayang Anak, I Jesus. Ing anak  na mismu ing megpakilala king tune lugud ning Ibpa at yana mismu ing managkat, mamaus ban maging talasuyu na katamu ning Dios.

At king keka tamung ebanghelyu ngeni, kalupa da reng karanasan ding tau king matuang tipan, I Pedro at ding kayabe ng manasan inaus o inagkat na lang Jesus ban gawan na lang magliligo karing tau. Pero bayula tinuki, pepakit na ning Ginung Jesus ing kayang kayupayan, kebukas nori Pedrung manyakap asan pero alalang ararakap. Oneng nyang sinabi ng Jesus na ilaut neng bagya ing bangka king malalam, mekibat yay Pedro ana “ Maestro, kebukas na keng miyayatsang lambat, dapot e ke mekarakap nanu man. Makanyan man, nung iti yang utus mu, iyatsa ko ring lambat.” Kanita mu rin mekarakap lang dakal a asan at halus masira la reng lambat.

Kening ebanghelyu pepakit ng Pedro ing mumuna ng katangian ning metung a magliligo kareng tau. Ing katangian ayni yapin kapamintuan adya pang balu tamu imposible king tau pero king Dios maging posible. Kalupa ng Abraham nyang ing Apung Ginu inutus neng iain ing kayang anak, I Isaac. Sinabi na “Nung yang kaburyan mu Ginu, yang masunud.” Kalupa na ning Indung Maria, nyang sabyan na ning Anghel na yang maging Indu na ning talapagligtas at agya pang e na lubus aytindyan pekibat na king anghel na “Talasuyu na ku ning Ginu, marapat sa kanaku antimo ing sinabi mu,” Kalupa na wari ning tiru ng pangadi keka tamung Jesus “ Mipamintuan ing lub mu keti sulip anti banua.”

Kadwang katangian na ning metung a magliligo, yapin ing dapat byasa yang mibabata, masipag at byasang sumaup king obra. (Nyang ikit dang alus masisira la reng lambat pauli ning dakal a asan a arakap da, sininyalan da la ring kayabe ra karing aliwang bangka ban lumapit at sumaup karela).

Katlung katangian a dapat atin ya ing metung a magliligo yapin ing kababan lub. (Inyang ikit nang Simon Pedro iting mepalyari, siniklaud ya arapan nang Jesus, at ngana, “Dumayu ka kanaku, Ginu, uling tau kung palpikasala!”).

Ausan at agkatan na katamu ning Ginu ngeni at piprisinta na la keka tamu rening katangian ban tamung maging tune magliligo kareng tau. Amen.

IV. Pamigunam
Kening kaorasan kaluguran a kapatad, mamaus at managkat ya ing Ginu tang Jesu Kristo na gawan na katamu mung magliligo kareng kapara tang tau. Mumuna ing agkatan na katamung magliligo karing sari-sarili tang pamilya at king keka tamung sari-sariling komunidad. Payabut na ning Ginu na bayu ta sana linisan o pakayapan ding aliwang sular den napang sarili tang sular ing keka tamung linisan.

Mamaus at managkat ya ing Ginung magliligo dareng tau uling asna pa karakal ing dewakan o kasalanan a mimiral king kasalukuyan. Dakal la pang reng taung kalulu nala  panyamusakan do pa karapatan. Dakal la reng taung maninutun Hustisya na magtiis namu king malilyari king bie da  at dakal la pa reng taung e makakakilala king lugud at pamagmalasakit na ning Dios king tau. Nya ala yang patugut managkat ing keka tamung Ginung Jesus ban tamung sumaup kaya king kayang misyung idala naka tamu ngan king arapan ning kayang Ibpang atyu banua. Amen.
V. Pamanahimik

VI Tauling Panalangin
Salamat Ginu king panaun a binye mung ayni. Midinan nake na naman pung sikanan lub kareng misyun mi king bie. Bista man pung ordinaryu kaming tau dininan mu keng maragul a grasya. Grasyang kayabe yu pu king misyun, misyung masakit pero kapalit na ing ligaya at kaganapan king bie alang-angga. Amen.

VII. Kutang

1.    Ibye ya ing sariling upinyun. Ot bakit deng kingwa ng alagad Jesus alus ordinaryu lang tau?
2.    Ot mo bakit, king kagaling dang manasan di Pedru, kabukas nong manasan ala lang arakap,pero nyang tinuki la kang Jesus mekarakap lang dakal a asan?
3.    Pwedi ya bang maging magliligo tao, ing metung a makasalanan? Bakit?

Kapat Domingu ning Ordinaryung Panaun

E ya Miparangalan ing Propeta king Sarili nang Balen

I.    Pamuklat a Panalangin

Ibpa, ngeni pung kaorasan bibye mi pu ing papuri at kapasalamatan keng binye yu na namang oras ban keng mikit-ikit king arapan yu. Patawad pu kareng e gana-gana ming pamagkulang kekayu at kareng kapara ming tau. Dakal mu rin pung salamat keng kekayung Anak, I Jesus, na pebalu na ing lugud at pamagsilbi ing e mu karing kakilala, kapamilya or kabaryu nune dapat pu pala kareng anggang kapusu, kareng anggang tau. Amen.

II. Pamamasa

Luke 4:21-30

Ngana karela, “Metupad ya ngeni iting kasulatan kabang pakiramdaman yeng mababasa.” Ikua na la ngan kapanandaman at pigmulalan da ing sintingan na ning sinabi na. Ngara, “Aliwa wari iti ing anak nang Jose?” Ngana karela, “Balu na ku king sabian ye kanaku ing kasebian, ‘Doktor, uluan mu ing kekang sarili.’ At sabian yu naman kanaku, Daptan mu munaman king kekang balen ing abalitan ming depat mu Karin Capernaum.’’’ Ngana pang Jesus, “sasabian ku iti kekayu, e ya miparangalan kapilan man ing propeta king sarili nang balen. Pakiramdaman yu ku: katutuan king dakal lang babaing mebalu karin Israel king panaun nang Elias inyang e minuran kilub ding atlung banua at kapitna, at mika maragul a saup king mabilug a bansa. Makanyan man, e ya mituburan munta i Elias kaninu man kareti nune mu king babaing mebalu ning Zarepat, king sakup ning Sidon. At dakal lang leprosuan karin Israel king panaun nang propeta Eliseo; oneng metung man kareti alang kinayap nung e mu i Naaman a tau Siria.” Eliseo; oneng metung man kareti alang kinayap nung e mu i Naaman a tau Siria.”  Mimimua la ding sablang taung atyu king sinagoga inyang dimdam da iti. Tinalakad la at liwal de I Jesus king balen at dela re king bingit  na ning bunduk-bundukan a katatalakaran na ning karelang balen bareng inabu king bangin. Oneng linabas ya kalibudtan da ring dakal a tau at sinulung na ing pamaglakad na.

III. Turu

Uling malapit na naman ing alalan king bansa tamu, apapagmasdan tala reng bisang tagal o reng manungkulan ing asno ngan kapanatu (‘All smile la ngan”) Neng kayi pa, nung mipagkwentu ko pa ing sabyan da keka ing kamag-anak na ka pa. Makikikamag-anak la ngan dening bisang tagal at ila ngan dinalan la ngan kanung kasakitan. Ing sagut buri dang payabut na kapusu at kapamilya dala reng pakakalulu. Uling ing katutuan mas dakal lang kalulung botanti kesa karing atinan. Makapagmulala mu naman ing dakal la reng proyektung mangalto at mabilis la pang mangayari. Balamu pasku neng malapit ing alalalan, dakal lang Sta Claus uling dakal lang taung sasaup uling atin lang buring kapalit. Buri da ing ibotu tala kening daratang a eleksyun.

Bala da reng Judio na ila mung dili at tune balayan a banal at pinili ning Apung Ginu, king makuyad a amanu, ing isip da espesyal la kareng anggang tau. Inya metung karing pagmaragul da ing atin lang pribelehiyu na ala karing aliwang lahi. Oneng keng kekatamung ebanghelyu ngeni, ing Ginung Jesus peyalyan ng e tutu ining pala-palage dang ayni. Ing Dios pagmalasakitan no ngan deng kegana-ganang taung magkasakit, uling
manibat pa king kamumulan  e nano buring mibayatnan o magkasakit ding taung kayang lelangan at uling iya mismu, ing miglalang, lugud ya. Inya kinwentu na ing milyari king Sidon at kang Naaman na taga Siria, adwang bansang ali Judio ban kanita apakit at abalu tamu na pante-pante ing panlalawe na ning Apung Ginu kareng maniwala o e maniwala kaya.

Makanyan mu naman ing malilyari king kasalukuyan tang pamibie-bie, bala tamu mas importanti la reng taung malapit kekatamu antimo reng keka tamung sari-sariling pamilya, kamag anak, kaluguran, kabarkada, kaklase o kaya deng kekatamung kabalen o kabaryu. Sosopan at didinan talang maragul a importansya  king bie tamu dyang neng kayi ing  pamanyaup tamu karela yang ikakarok da reng aliwang tau. Inya ini ing metung kareng sangkan nung bakit atin gulu o gera, o neng kayi e misusundu ing pisasabyan tungkul king kapayapan. Oyni mu naman ing sangkan nung bakit ing metung a pamilya agagawa ng makipate kareng aliwang pamilya. At iti muring ing sangkan ot bakit ating inggitan at e pamisanmetung king metung  a komunidad.

Tuturu na ning Ginu tang Jesu Kristu na itamu ngan anak na kata ngan ning Dios at mikakapatad tamu ngan. Neng sasaup tamu, e ta dapat lalawen o pairal  ing pamikamag-anak, pamikilala o kaya pamikaluguran nune sumaup tamu ngan karetang taung dapat sopan. Ini ing dapat tang daptan nung bisa at buri tang maging disipulu ng Jesus. Amen.

IV. Pamigunam

King kekatamung kulturang Pilipinu, makatatak na ing asna katamu kapanyaup. Pero suryan tamu nung nanu tang klasing taung sasaup, Atin taung sasaup ya karing mangailangan uling atin yang buring kapalit, Metung ka karete? Ing kadwang klasing taung sasaup, ya uling masaya ya king kayang gagawan at balu na nung sinaup ya kareng kapara ng tau, anti na nemong pinuri, silbyan at pesalamatan ing Ginu kareng bibye ng biyaya kaya. Isipan na naman ning taung iti na ing e gana-ganang pamye na bat mu ngan king Apung Ginu. Balu na ing Ginu yang magkalub kareng e gana-ganang grasyang atyu kaya. Metung ka karete?

Burin na ning Apung Ginu king Kaorasan, na pagsilbyan at luguran tala reng taung mangailangan. Na dyang e tala kilala ing dapat sopan tala. Na dapat mas gamitan taya ing kekatamung pusu, pusung mapaglunus kalupa na ning pusu ng Jesus. Pakyapusan taya I Jesus, na aliwa mu ing kabalen na o kilala reng buri ng lugaran at pagsilbiyan nune ing buri na ing deng kegana-ganang tau. Amen.

V.Pamanahimik

VI Tauling Panalangin

Ginu ning Lugud at Kapayapan, dakal a dakal a salamat pu king turu yu kekami ngeni. Mag-umpisa pu ngeni lugud at magsilbi kaming kalupa yu na alang panenayan a kapalit nune tutung masaya ing lugud at lilingap kareng aliwa. Ing e gana-ganang kapurian at kapanyamban keka mu angga na king kapilan pa man. Amen.
.

VII. Kutang

1. Ot bakit mas importanti la reng kamag-anak tamu kesa kareng aliwang tau? Ustuini o ali?
2. Ninu kareng kasiping tang bale na e taman buring pansinan?Bakit?
3. Atin ta kayang meging karanasan king bie na ikang dapat makwa keng metung a obra o posisyun oneng eka mekwa uling mas kinwa de itang taung kamag anak o kaluguran da?

Katlung Domingu ning Ordinaryung Panaun

Ing Pamagumpisa nang Jesus king Obra Na karin Galilea

I.    Pamuklat a Panalangin

Ibpa, salamat pu king kaorasan a pigkalub mu kekami. Dinan yu kami pung matibe kasalpantayanan at malino pami-isip ban apigunam la reng kekang mabie amanu ngening kaorasan. Iti pu ing adwan mi king lagyu ning Ginu ming Jesu Kristo at king pamanantabe ning Banal a Espiritu. Amen.
II. Pamamasa

Luke 1:1-4, 4:14-21

Kagalang-galang a Teofilo, Dakal na la rin pu ding migkapilit sinulat istoria tungkul kareng bage mepalyari libutad mi. Makayagpang ing karelang sinulat king sinabi da kekami ding mekasaksi at menaral kareting bage ibat na king kapupurmeruan. Kaybat kung inusisang mitmung kaingatan iting sablang bage, meyapan ku na naman pu ing sumulat metung a maayus a istorya para kekayu, kagalang-galang a Teofilo. Depat ku iti ban abalu yung lubus ing katutuan da ring sablang bage a mituturu na kekayu. Migbalik ya Galilea I Jesus at atyu keya ing upaya na ning Banal a Espiritu. Mikalat ing balita tungkul kang Jesus king mabilug a lugal a ita. Tinuru ya karing karelang sinagoga at pupurian de ring sabla. Kaybat na nita, mibalik ya Nazaret i Jesus, ing lugal nung nu ya meragul. King Aldo ning Sabbath, antimo ing ugali na, minta ya king sinagoga. Tinalakad ya ban mamasa karing Kasulatan. Binie re kang Jesus ing libru at ikit ne at binasa iting makasulat: “Ing Espiritu ning Ginu atyu kanaku, uling pinili na ku ban ipanaral ke ing Mayap a Balita karing pakakalulu. Tinubud na ku ban ihayag ing kalayaan karing bihag, at ing pangabalik da panimanman ding bulag, at ing pangayatbus ding mayayalipit, at ipabalu ing banua ning pamagligtas ning Ginu king balen na.” Lilun neng Jesus ing libru, binalik ne king kasaup, at linukluk ya. Makalawe la kang Jesus ding sablang tau king sinagoga. Ngana karela, “Metupad ya ngeni iting Kasulatan kabang pakiramdaman yeng mababasa.” Ikua na la ngan kapanamdaman at pigmulalan da ing sintingan na ning sinabi na. Ngara, “Aliwa wari iti ing anak nang Jose?”

III. Turu 

Queng mebasang ebanghelyu mebanggit ya ing lagyung Teofilo. I Teofilo ketang panaun a ita, metung yang bayung Kristiyanu. Ditak ya pa kebalwan patungkul nung ninu at nanu ing misyun ng Jesus king yatung iti. Pauli napin ning bayu-bayu ya pa king kayang kasalpantyanan, pekikwanan ng San Lucas ing paralan neng sulat ban dinan kamalayan nung ninu at nanu talaga ing tune ng misyun keti king yatung iti ning Anak ning Dios, I Jesus.

At kinwentu napin San Lucas na I Jesus atyu kaya ing Banal a Espiritu ning Ginu at pinili ne ban ipanaral ing Mayap a Balita karing pakakalulu. At mituburan ya ban ipasyag ing kalayaan dareng bihag, at  ibalik ing panimanman ding bulag, at ing pangayatbus ding mayayalipin, at ipabalu ing banua ning pamagligtas ning Ginu king balen na.

Anya dening sinulat ng San Lucas patungkul kang Jesus ilang meging paralan ban midinan yang kamasalan I Teofilo king kayang kasalpantayanang Kristiyanu. At makanyan munaman itamu babasan at pigugunaman tala naman deng patutu dareng apat a
ebanghelistang Mateo, Marco, Lucas at Juan ban midinan munaman kamasalan at sikanan ban maniwala king Ginu tang  Jesu Kristo.

At ngeni ping kaorasan, marapat mu na dinan talang mayap a oras deng talasulat keng mayap a balita, uling pauli na ning grasyang mipagkalub karela ning Banal a Espiritu,  maging dalan la ning grasya ning kasalpantayanan tamu king Apung Ginu na e na asali ning nanu mang pibadyan at kapilan man e kumupas angga na king kapupusan.

Maging magrasya ing bie dareng sablang tala pangalat ning mayap a balita, uli na ning panga una da king pangabulalag ning lugud, grasya, at pakalulu ning Apung Ginu.

Ngeni, keng kasalukuyan, e pa  murin magbayu ing panagkat ning Apung Ginu, ing maging masusi sa tanang talapakiramdam king kayang Amanu ban kanita midinan tamu mu namang kamasalan at lakas lub na igulisak na “Ing Espiritu ning Ginu atyu kanaku, uling pinili na ku ban ipanaral ke ing Mayap a Balita karing pakakalulu. Tinubud na ku ban ihayag ing kalayaan karing bihag, at ing pangabalik da panimanman ding bulag, at ing pangayatbus ding mayayalipit, at ipabalu ing banua ning pamagligtas ning Ginu king balen na.” Amen.

IV. Pamigunam

King mitmung kababan lub, suryan tamu ing kekatamung kasalpantayanan king Apung Ginu. Kutnan ta ing sarili tamu, “panwalan tala paba reng Amanu na ning Ginu tang Jesus?” “Didinan tala pa bang pansin ding kayang kautusan?” Ing masanting a kasagutan karening kutang a areni ing biyayan la reng Amanu na ning Ginu  keng bie tamu. Kareng mangalating mayap tang gagawan keni mag-umpisa ing mangaragul a milagru. Potang akakit da na magkapilit tang gagawang mayap, makasiguradu mung atin siguradung manawa keng grasyang babie ning Apung Ginu.

Nung king paligid tamu, maging bulag na la king katutuan. At mimiral na ing kalaraman, e ta sana paysambut kaniti, paniwalan tamu na kapilan pa man e ya managumpe ing dalumdum king sala. Sumambut ya wari ing e ustu, uling ing e ustu  manibat pa king kamumulan e ne ustu o e ne mayap. Parati tang manyawad grasya king Banal a Espiritu ban palablaban no parati reng pusu tamu at dinan malinis pami-isip ban makasuri parati king mayap at marok at gawan ing ustu king yatung iti.
Ngening bayu ya ing banua, ngeni ing masanting a oras ban misip at magplanu nung nanu ing buri tang gawan mayap king bie tamu. Ban kanita king pamanyalese ta king bie tamu siguradu dakal la reng maging matula at makinabang lalu na reng kaluguran ta king bie at ning mabilug tang komunidad.

Balu tamu na manyaman king lub ing atyu ta  king mayap. Uling agyang nanung malyari king paligid tamu, ala tang kapikakunwan, uling balu tamung kayabe taya ing Ginu tang Jesus at kapilan man e na katamu payingulutan, uling lugud ya. Maniwala tamu ba kaya? Amen.

V.Pamanahimik

VI Tauling Panalangin

Ginu ming Dios, dakal pung dakal a salamat, ing sablang kapanyamban at kapuryan ngeni at mangga man king alang angga. King lagyu ning Ginu ming Jesu Kristo. Amen.

VII. Kutang

1.    Atyu pa ba ing lab-lab ning pamamasa tamu at pamanigaral kareng Mayap ng Amanu ning Ginu tang Jesu Kristo? Wa o ala na, Bakit?
2.    Paniwalan tala pa ba reng kayang pangako?
3.    Nanu ing asabi mu kening katagang, “ Ing bie ku ya ing masanting a mensahi kareng kalupa kung tau.”