Mumunang Domingo ning Adbiyento

Alang Makibalu king Aldo o king Oras a Ita


I. Pamuklat a Panalangin

Ibpa, guewa yu keng kapamilya yu. King dagul ning tiwala yu kekami, dinenan yu keng responsibilidad ban gawan mi ing penibala yu kekami. Dinan yu keng grasya ban e ke sasawang manenaya king kekong pamanyatang ban dasnan yu keng masayang manenaya king kadwang pamanyatang ning Guinu ming Jesus. Salamat Guinu. Salamat pu. Amen.

II. Pamamasa

Marcos 13:32-37

32 “Alang makibalu metung man king paniatang na ning aldo o oras a ita ni ding anghel ning banua ni ing Anak. Ing bukud mung makibalu ya ing Ibpa. 33 Mingat kayu at parating makasadia uling e yu balu nung kapilan mapalyari ita. 34 Mangari ya king metung a lalaking miglakbe king marayung lugal: ipanibala ne ing tuknangan na karing ipus na, ing balang metung agpang king katungkulan na, at iyutus ne ing guardia king pasbul ban manatiling makasadia king pamagbalik na. 35 Inya magsadia kayung parati, uling e yu balu nung kapilan ya datang ing makibandi king bale, mapalyaring sisilim o king kapitangan ning bengi o ganingaldo o abak; 36 pota bigla yang datang at dasnan na kayung matudtud! 37 Ing sasabian ku kekayu ya naman ing sasabian ku karing sabla: Magsadia kayu!”

III. Turu

Reng magaral king eskwela atin lang ausan dang field trip. Ini gagawan da agyang minsan king pabanua. King field trip, mabibiasa la naman reng anak potang akakit dong aktual a malilyari reng pag-aralan da king eskwela. Tanu mong atin kang anak a mig-field trip king aliwang lugar. Karas ning sisilim, e la pa minuli reng anak. Dinatang ing alas otso ning bengi, e ya pa daratang ing anak mu. Siyempre migaganaka ka ikang pengari. E ka mipapaindatun, e ka man mipatudtud agyang mapagal na ka. Dinatang ing alas nuebi, ing alas dyes, at e ya pa daratang ing anak mu. Migaganaka na kang tutu. Lawe lawe ka lual ning awang nung ating daratang a saken. Miras ing alas dosi ning bengi. Manenaya ka pa at ngeni, meg-umpisa na kang mangadi uling king kapigaganakan mu king anak mu. E ka makakera nune migluklukan ka kabang panenayan meng datang ing saken a manatad king anak mu. Inyang ala una ning galing aldo, dinatang ya ing saken a manatad king anak mung panenayan. Mesaya ka uling mipasno ka. Kayabe do reng teachers na at sinabi da king ating mesirang tete king dalan, inya makanyan lang miras galing aldo king pamanuli da. Ikang manenaya, e na importanti ing milyari uling masaya ka, dinatang ne ing panenayan mung anak.

Ing ebanghelyu tamu tungkul ya king pamanyatang nang pasibayu ning Guinu. Sinabi na kekatamu king mako ya saguli oneng datang yang pasibayu. Buri na potang magbalik ya, dasnan na ka tamu, itamung likuan na, manenaya king pasbul kanu para king pamanyatang na. Kalupa ning pengaring e matudtud anggang e dinatang ing anak na, buri ning Guinu king panenayan ta ya at buri na pa king dasnan na ka tamung makagising at e matudtud. Ginamit ne ning ebanghelyu ing terminung “ipus” karing taung manenaya king panginuan a meko. Inyang kapanaunan nang Jesus, reng ipus e do kalupa reng “ipus” a aintindian tamu ngeni. Reng ipus kanita, kayabe da la king
pamilya – e no aliwa king pamilya. Anti na la mong ka-miyembru king pamilya. Inya makanyan ta yang aintindian ing panginuan potang buri nong dasnan makagising reng ipus na uling kapamilya na no reni. King kekatamung kultura, ing amanung “sese” mas malapit ya king kabaldugan ning ipus a amanuan nang Jesus.

Uling kayabe na katamu ning Guinu bilang miyembru ning sarili nang pamilya king metung a bale, buri na makasadya tamung makasadya king pamanyatang na. Kalupa ning pamanenaya ning metung a inda king mabebenging nang anak. Uling mikakalugud tamu, e ya metung a obligasyun a mabayat ing pamanenaya king Guinu. Uling miyembru na katamu ning pamilya nang Kristo, e ne ginamit ning Guinu ing pamagbalik na ban mitakutan tamu. Inya pin, ngeni panaun ning Adbiyento ( Advent), iyang iya ing panalangin tamu king datang ne. Uling balu tamu, potang datang ne, ipatupad na na ngan ing kaburian na kekatamu. At balu tamu, potang mipatupad ing kaburian ning Guinu, ing egana-ganang lugud, kayapan ampon kanauan iyang akit tamu. Inya, kareng minunang Kristiyanu, ing pangading” Datang na ka Guinu, Datang na ka” o “Maranatha” iyang madalas dang pangadi. Sana, itamu man, masaya ta yang panenayan ing pamanyatang na ning Guinu. Pagsadyan taya a alang takut. Reng taung manenaya king Guinu, ila reng taung e milalako pamag-asa. Balu da, e la mabigu king kapanenayan a gagawan da para king Guinu. Amen.

IV. Pamigunam

King domingung aiti, keni ya mag-umpisa ing kalendaryu ning pisamban. Magumpisa ya king ausan tamung panaun ning Adbiyento o “Advent” king Inglis. Ing buri nang sabian ning Advent – ing pamanyatang. Pamanyatang nang ninu? - Pamanyatang nang Kristu. Kerakalan kareng Kristianu, oini ing panaun ning Christmas. Wa, king panaun ning adbiyentu, sasadya ta ya ing sarili tamu ban pagmasusian ing misteryo ning pangabait ning Guinu keti king yatu. Ing pangabait na iyang ausan tamung First Coming o ing mumunang pamanyatang na ning Guinu. Oneng kayabe na ning pagmasusian tamung mumunang pamanyatang ning Guinu, iya ing Kadwang pamanyatang ning Guinu. Balu tamu, ampon paniwalan tamu king ing Guinu mibalik yang pasibayu uli sinabi na datang yang pasibayu. Inya naman manenaya tamu. Ing ebanghelyu tamu ngeni, iya ing sasabian na, king panenayan ta ya ing Guinu. Uling pin ing Christmas iyang atiu king buntuk tamu, milalako king isip tamu ing kadwa nang pamanyatang ning Guinu. Ing pamanyatang nang aini, masaya ya naman dapat. Nung matula tamu king mumunang pamanyatang ning Guinu, ya naman dapat ing tula tamung panandaman king kadwang pamanyatang na ning Guinu. Datang na ka Guinu, datang na ka! Oini ing dapat tang pangadi, itamu tutung masayang manenaya keya. Maranatha! Come Lord, Jesus, Come!


V. Pamanahimik

VI. Tauling Panalangin

Ibpa, datang ne pu sana ing kekong anak a I Jesus. Masaya mi ya pu sanang panenayan ban potang datang ya king oras a e mi balu, dasnan na kaming makagising ampon masayang manenaya keya. Masaya kami king mumuna yung pamanyatang, lalu ke pu sanang maging masaya king kadwa yung pamanyatang. Datang na ka Guinu, datang na kayu ban akit mi nang mipatupad ing egana-ganang kaburian yu keti yatu. Datang na kayu Guinu. Datang na kayu. Amen.

VII. Kutang

1. Makasadya ku kaya king pamanyatang ning Guinu?

Download here:
Page 1: http://www.mediafire.com/?c4jm5xan50n1bgy
Page 2: http://www.mediafire.com/?qoqp10p5swbpswq

Mumunang Domingo ning Adbiyento

Alang Makibalu king Aldo o king Oras a ita

Alang Makibalu king Aldo o king Oras a ita

I. Pamuklat a Panalangin

Dios ning alang kupas a lugud at kayapan, bendisyunan yu kami pu at ing pinili yung lugar ban ing kekang Banal a Espiritu ya pung miral king kaorasan. Sopan yu ke pung maging matalas a kaisipan at maging malam a lub ban miyang mas lalung aintidyan ing kekang Mayap a Amanu. Amen.

II. Pamamasa

Mateo 24:37-44

37Ing paniatang na ning Anak ning Tau kalupa na nitang milyari king panaun nang Noe. 38Kanitang panaun bayu dinatang ing albug, mamangan la at miminum ding tau; makiasawa la ding lalaki at babai angga king mismung aldo a linub ya king barku i Noe. 39At e ra balu ing malilyari angga king dinatang ing albug at tiki na lang ngan ning albug. Makanyan mu naman ing malyari potang datang ne ing Anak ning Tau. 40King panaun a ita karing aduang taung atyu king marangle, mayakua ya ing metung at mitagan ya ing kadua. 41Karing aduang babaing gigiling trigu, mayakua ya ing metung at mitagan ya ing kadua. 42Inya mingat kayu uling e yu balu nung nanung aldo ing paniatang na ning kekayung Ginu. 43Oneng tandanan yu ini: nung ing metung a mibalebale balu na nung nanung oras ning bengi karin ya datang ing mapanako, siguradung e ya matudtud at e ne paburen makapanlub king bale na. 44Inya, makanyan kayu namang sukat makasadiang parati, uling datang ya ing Anak ning Tau king oras a e ye panenayan datang!


III. Turu

Pagmasusyan taya ngeni ing mumuna nang Domingo ning Adbiyentu. Ing Adbiyentu yapin ing kapagmasusyan na nung nukarin I adya tamu ing sarili king kadwa ng panyatang ning Ginu tang Jesu Kristo. Masanting at mayap yang pamikatagun para kekatamung Katoliku ing kapagmasusyan a ini. Gagawan taya ini misan king pabanwa ban suryan pasibayu reng kekatamung sarili. Bisa tang mag retrit king panaun a ini. At ing pamagretrit pakiwangis taya king metung a taung bisang marap king salamin ban ng akit ing sarili na. Oneng e mu basta marap king salamin, nune anyaran ning Apung Ginu ing matras tamung mapilan a takbang ban mas lalu tang akit ing sarili tamu at akutang ing ninu na ngeni itamu king arapan ning Apung Ginu. Atin bang migbayu king pangatau tamo? Meging mas mayap tamu ba kesa ketang milabasan a Adbiyento?

Sasabyan na ning ebanghelyu na potang datang yang pasibayu ing Anak ning Tau, I Jesus, kalupa na nyang panaun ng Noe. Magsaya at mamangan la kanita reng tau bayu datang ing albug. At nyang dintang na ing oras, reng taung e maniwala king

daratang a albug, tiki no ning danum at mengamate la ngan. Itamu king kasalukuyan, uling balu tamu at paniwalan tamung datang yang pasibayu ing Ginu tang Jesu Kristo ban tuparan ing kayang pengakung ituki na katamu king kayang Tatang king banwa. E na binang maulaga nung kapilan iti mapalyari. Ing mas importanti kekatamu ing kapagsadyan king oras ayta. E tana kukutang nung kapilan ing kapupusan ning yatu nune nanu ing parati tang dapat gawan ban potang datang ita makasadya tang parati. Mas tamung didinan pansin ing pamabie-bie tang mayap at atin takut Kaya. Nanung pitatakutan tamu king panaun ning panyatang ning aldo ayta? Balu ta naman na potang datang na ing oras ayta maging maayus na ngan ing kegana-gana. Ala ng takut, danup at sakit. Mikakalugud no ngan reng tau. Uling ing Dios, Ing Apung Ginu lugud at mayap ya. Nya ing kegana-gana lugud at mayap ngan. Ing tauling kutang, buri mu ng marapat ine? Nung ali pa, misip ka at gawa ng kapaglarinan. Nung wa, tumiman ka at mayap a oras. Amen.


IV. Pamigunam

Pigunaman taya ngeni ing sulat ng San Pablo kareng tau Roma. Ing sulat ayni pwedi tayang maging armas king pamanyuri king bie tang kasalpantayanan at king kekatamung kapagsadyan king panyatang ng pasibayu ning Ginu tang Jesu Kristo.

Nganang San Pablo ngeni kekatamo, Kapatad: Balu yu king miras na ing oras: migising na ko ngeni: ing kaligtasan tamu mas malapit ngeni kesa kanitang magmula tamung salpantaya. Ing bengi alus linipas ne, at tutu neng malapit sunlag ing aldo. Payinggulutan ta na ing pamanyapat karing sablang dapat ning karalumduman, at damputan ta na la ring sandata at lage tana king masala ban marap king labanan. Mibye-bie ta sanang makayagpang king karampatan, anting tau king masala. E na magpalalu king katakawan at pamaglasing, e na darapat king nanu mang kanawangan, ala ng kagaspangan a ugali, e na mipate-pate at mipangarirya. Bustan yung I Jesu-Kristong Ginu ya ing maging kalasag yu: E yu na isipan ing munye dalan king pamanusig karing marok ng pamitan ning kekong katawan. Ing Amanu ning Ginu. Amen.

V. Pamanahimik

VI. Tauling Panalangin

(Ikanta taya)

Datang na ka, Ginu, lalbug ne ing aldo;
Ing bengi daratang dalumdum daralan.
Datang na ka, Ginu, at ikabus mu ku,
Ing alun maragul, ing angin masikan.

1. Kaba ning bie daralan kung takut
Pagal at danup at kapikakunuan
Ika ing Ginu ku at Dios ning bie ku
Datang na ka, Ginu, at ikabus mu ku.
2. Kaba ning bie daralan kung takut
Mikakasala uli ning keinan ku.
Dapot ibie mu ing pakalulu mu.
Datang na ka, Ginu, at ikabus mu ku.

VII. Kutang
1. Para keka nanu ya kabaldugan ing kadwa ng panyatang ning Anak ning Tau?
2. Nanu lamo reng gagawan mung kapagsadyan king panyatang ning Ginu?
3. Buri mu neng datang ing kadwa ng panyatang ning Ginu? Nung wa o ali, bakit?

Download here:
Page 1:
http://www.mediafire.com/file/37xd2ebcaqq9s35/11.28.10%20pg.%201.doc
Page 2:
http://www.mediafire.com/file/55a1twl9k0iizpw/11.28.10%20pg.%202.doc