Kadwang pulu’t atlung Domingu ning Ordinaryung Panaun

Ing Pakiduang ning Panga-alagad

I. Pamuklat a Panalangin

Dios ming Espiritu Santo, e kami pu makatalakad ning kayaryan ning Dios nung e mu kami pu sopan. Tipa ko pu king kekaming kalibutnan ban turuanan yu ke pung makiramdam at tanggapan ing sabyan na ngening Jesus. Tipa ko pu kareng pusu’t kaisipan mi at palablaban ing kekaming pamikakalugud. Amen.

II. Pamamasa


Lucas 14:25-33

25Milalu la karakal ding taung tutuki kang Jesus; inarapan na la at ngana, 26“E ya malyaring maging alagad ku ing ninumang lalapit kanaku nung maygit neng kaluguran kesa kanaku I tata na at ima na, ing asawa na at ding anak na, ding kapatad nang lalaki at babai at pati na ing mismung sarili na. 27E ya malyaring maging alagad ku ing ninumang e bisang mamusan king krus na at tuki kanaku. 28Nung magplanu yang patalakad tore ing metung kekayu, e ya pa wari lukluk at balakan na ing gastusan na ban abalu na nung managyu la ding pera na ba yang mayari ing tore? 29Pota mitalakad la ding pundasyun oneng e na ne man apayari, kaylian dia ding sablang manakit. 30Sabian da, ’Pegumpisan neng telakad ning taung iti at e na ne man pala apayari!’ 31O ninung ari a makilaban king kalupa nang ari ing e pa mu lukluk at misip nung ding apulu nang libung sundalus agyu da lang labanan ding aduang pulung libung sundalus na ning kalaban na? 32At nung e na agyu, mitubud yang pekakatawan na kabang marayu ya pa ing kalaban na ban makipagkasundu. 33Makanyan munaman e ya malyaring maging alagad ku ing ninuman, nung e na lakuan ing sablang atyu keya.


III. Turu

Ing ebanghelyu ngeni tungkul ya king pamaging tutung disipulu tamu king Ginu tang Jesu Kristo. Anyang panaun ayta milalu la karakal ding taung tutuki Kaya. Milalu la karakal ding tutuki uli na ning makapagmulala ng daraptan. At ikwa ng sinikat pauli da reni. Inulu nala reng taung malala na sakit, antimong ketung, babaing alang patugut daraya, deng bulag adinan nong panimanman, deng mete adinan nong pasibayung bie. Ikit da naman dening taung tutuki kaya nyang pedakalan no reng tinape ampong asan at mekapangan langan libri kaniti at dakal pa ing sinobra. Nya, nyang apansinan no ning Ginu tang Jesu Kristo reng dakal a taung maligaga king pamanuki Kaya, sinabi no reng bage dapat gawan ban maging tutu ng disipulu. “Ninu mang lalapit kanaku e ya malyaring maging alagad ku nung maygit neng luguran kesa Kanaku i tata na at i ima na, ing asawa na at ding kayang anak, ding kapatad ng lalaki at babai, at pati na ing mismung sarili na. Ing ninumang e bisang mamusan king krus na at tuki Kanaku, e ya malyaring maging alagad ku (v26-27).”

King kasalukuyang panaun marakal tamu mu namang talatuki at bisang tuki king Ginu tang Jesu Kristo. Ing kutang nanu lareng kekatamung sangkan ot bisa tamung tuki kang Jesus? Mayap ba o marok ing kekatamu mung sangkan nya bisa tayang tukyan? Ing sarili tamu mu ing makasagut kaniting kutang ayni. Pota nya tutuki tamu mu uli na ning akamulatan tana mu iti. O, kaya uli na ning atin tamu mung anyaran a maragul a pabor Kaya. O, kaya naman nya tutuki-tuki ta kunwari Kaya uling bisa tamu mu mung akilala dareng tau. Nung makanini tamu pamanisip at klasi pamilubluban, e ta misadsad king pamanuki Kaya, uling mas isipan tala reng kaluguran ta king bie at king sarili tamung kapakanan. Uling ing tutu e taya agyung isakwil ing sablang atyu kekatamu. At nung magbalak tamung tuki, pakasiguradu tamu ing tangu Kaya, uling kaylangan ing katapatan ampong kapibabatan king pamanuki Kaya. Kaylangan ing misip ta pamung dakal bayu taya tangwanan, kalupa na wari ning taung bisang manalakad tore na kaylangan ya pang lukluk at balakan ing gastusan na ban abalu na nung managyu lareng pera na ba yang mayari ing tore. Pota nung tengwanan Taya e tanaman asadsad, lulto tamu mung makarine. Amen.


IV. Pamigunam

Asna ka importanti king Ginu tang Jesu Kristo ing pamanalakad king Kayarian ning Dios. Mas importanti ya pa iti king pamilya ampo pang kamag-anak; Mas importanti ya pa iti kesa king bie tamu. Ya mismu ing memie alimbawa. Binie ne ing sarili ng bie. Agyu tayang pakyapusan? O, mig planu tamu mung manalakad tore at nyang mitalakad no reng pundasyun, ala ta nang kagiywan o lakas lub ban isundu at ayari ing kekatamung aumpisan? Kristiyanu tamu ba king lagyu? Mebinyag ta pin sana, pero e tamu mabibye antimong alagad Na?

Bayu ta makibat kareng kutang a areni, mayap ing pakaisip tapang banayad bayu ta makibat kening amun ning Ginu kekatamu. Bage kareng sinabi na ning Ginu tang Jesu Kristo ing parating Ari yapin ing Apung Ginu. Agyu ta bang makipaglaban king metung a Ari na ating adwang libung sundalus nung ditak lamu reng kekatamung sundalus? Nya, mas masanting ing makikasundu ta king Apung Ginu na tutung Ari ning bie at kamatayan. Nung sumuku ta Kaya, dinan na katamung bayung bie. E ta kaya sobra pamaglingap at pamanisip kareng sarili at kamag-anak at king kekatamung pibandyan? E la kaya maging sangkan deti king pamanalakad king kayaryan ning Dios? Nanu ing disisyun tamu? Agyu tayang tangwanan ing Ginu tang Jesu Kristo? Amen.

V. Pamanahimik

VI. Tauling Panalangin

Ginung Jesus, salamat pung dakal king binye yung kayapan ban mas lalu miyang aytidyan nung makananu ing tutung maging disipulu mu. Sopan yu kepu parating tangu na makasadyang mibabata at pamaging tapat Keka. Amen.

VII. Kutang

1. Anting metung a Kristiyanung inaus na ning Ginu ban maging talatuki na, pwedi me bang dinan oras ban pakiramdaman ing panagkat na keka?
2. Pwedi me bang tangwanan ing Ginu na maging kayabe na king pamanakad king kayaryan ning Dios?
3. Nanu la reng maragul a sumbagal king pamanangu ta king kaburyan ning Dios?

Download here:

Page 1:http://www.mediafire.com/file/s6j3ljnlsdfh78b/09.05.10 pg. 1.doc
Page 2:http://www.mediafire.com/file/s6j3ljnlsdfh78b/09.05.10 pg. 1.doc