Kalabingapat a Domingo ning Ordinaryung Panaun

Lumapit ko kanaku, ikayung sablang mapagal na at kababayatnan

I. Pamuklat a Panalangin

Ibpa, king kekong paralan, maging mayan ing mabayat, maging kapaynauan ing kapagalan. Turuanan yu ke king paralan yu ban midinan keng kapaynawan king bie mi. Binie ye kekami I Jesus ban lapitan mi lalu na neng kababayatnan na kami king kekaming pamaglakbe keti king yatu. Bibie ne kekami ing paud nang mayan at tuturuanan na kaming maging kalupa ng mamu ampon mababa lub. Salamat Guinu king ganaka at lugud a panandaman mi king aldo-aldo. King kekong pamanantabe, king kekong alang sawang pamakiabe king daranasan ming kabayatnan. Salamat pu Guinu, Salamat. Amen.

II. Pamamasa

Mt.11: 25-30 25 King oras a iti nganang migsalitang Jesus, “Ibpa, Guinu na ning banua at yatu! Pasalamatan da ka uling pepakilala mu karing taung musmus l ing e mu pepakilala karing mangabiasa at maisip. 26 Wa, Ibpa, uling iti ya ing sarili mung tula at kaburian. 27 “ Ing sabla binie na kanaku ning Ibpa ku at alang makakilala king Anak nune mu ing Ibpa, at alang makakilala king Ibpa nune mu ing Anak at detang birian nang makakilala keya ning Anak. 28 “Lumapit kayu kanaku, ikayung sablang mapagal na at kababayatnan at dinan da kayung kapaynawan. 29 Pusanan ye ing paud ku at magaral kayu kanaku uling mamu ku at mababa lub, at manakit kayung kapaynawan. 30 Mayan yang idala ing paud ku at e mabayat ing papusan ku kekayu.”

III. Turu
Normal kekatamu king balu tamu nung nu ta munta potang atin tang partikular a problema o pamangailangan. Alimbawa, nung mamroblema ta kareng ipan tamu, ninu mo ing pupuntalan tamu? E mo ing dentista? Nung atin tamung problema kareng mata tamu, malagwa tamung mumunta kareng espesyalista kareng mata o kaya naman kareng optometrist. Nung reng sisesen tamung babi e la masyadung tataba o kaya naman manga- salunan la, malagwa tamung pupulayi king beterinaryu. Nung biglang ating mete kareng kamag-anak tamu, automatic king puntalan ta ya ing metung a funeraria at asikasuan ta no reng papelis para king libingan na. King bawat problema o pamangailangan, balu ta no reng puntalan tamu. Balu tamu, potang puntalan ta la rening taung a reni midinan kapakibatan ing pamangailangan tamu at alang dudang milako ing kapigaganakan tamu king ka-orasan muring ita. Ngeni, ing kutang. Pota mong atin tamung mabayat a kakargan king bie, nukarin tamu pupulayi? Potang atin tamung kabayatnan king bie a e tana a dinan solusyun, ninu ing pupuntalan tamu? Potang mamagkasakit tana king pamibibie tamu at balamu ala ta nang akakit a pamag-asa, nukarin tamu mumunta? E malagwang pakibatan ing kutang a ini. Kerakalan kareng tau, potang api-isip-isip da ne ing problema, e no manintun solusyun, nune dibersyun. Manintun na lang dibersyun uling agyang maka nanu de pang arapan ing problema da, e ya rin milalako. Iyang-iya ing balik-balik a problema. Iyang-iya ing paulit-ulit a magbalik king isipan dang e mipapainawa. Pauli na niti, dibersyun pin ing panintunan da bilang pakapata king sakit a dulut ning e milalakong problema. Inya, e ta dapat magtaka nung laganap ing bisyu ngeni. Ing bisyu, nanu ya man, metung yang dibersyun kareng taung mapagal na kareng kabayatnan a e milalako karela. Metung yang paralan ing bisyu ban mitakas la, agyang saguli mu, king problemang e naman mamako agyang makananu me pang solusyunan. Ing bisyu metung yang anti mong “ferry’s wheel” o “rueda” a akakit tamu neng malapit nang mag-piyesta. Potang sake kang rueda, iyukyat na ka king makatas, idurut na ka, ma-libang ka. Anti ka mong mikakawani king yatu potang sake kang rueda, anti ka mong mipapalapit king banwa a nung nukarin akakit mu ngan ing sabla potang atiu ka babo. Oneng potang meyari na, bisa ka’t ali, mibalik na ka na naman king yatung likuan mu. Makanyan ya ing bisyu. Ilako na ka king realidad agyang saguli mu. Ilako na ing sakit a panandaman mu. Oneng potang bandang tauli, mibalik ka murin king yatu, mibalik ya murin ing sakit a pekikuanan mung takasan. Ot mo makaniti ing malilyari kekatamu? Uling e tamu balu nung nu ta mulayi potang kababayatnan ta na. Isipan tamu king ing bisyu yang solusyun karing kabayatnan tamu. Oneng nanu ing malilyari kekatamu? Lalung daragul ing problema potang ing bisyu yang gagawan tamung solusyun kareng panandaman tamung kabayatnan. King ebanghelyu tamu ngeni, metung yang panagkat ing bibie na ning Guinu kareng taung kalupa tamung kababayatnan king bie inyang ngana: “ LUMAPIT KAYU KANAKU, IKAYUNG SABLANG MAPAGAL NA AT KABABAYATNAN “(v. 28). Agkatan na ka tamu ning Guinu king lumapit ta kaya. Iya ing puntalan tamu potang atin tang kabayatnan. Iya ing dapat panintunan tamu potang mamroblema ta na. E ta na manintun pang nanu pa mang dibersyun o bisyu a king isip tamu iyang makaibieng solusyun kareng kekatamung problema. Ing pamaglapit kang Kristo iyang panagkat na ning ebanghelyo tamu bilang pakibat kareng kabayatnan a panandaman tamu. Iya mu ing makaibie kekatamung kapasnauan at painawa kareng problemang daralan tamu uling tutu na ka tamung kaluguran at gaganakan. Imbes na king nanu-nanung bisyu o dibersyun ing makaibie kapasnauan kekatamu, pabusten ta ne ing Guinu king iya ing mamie kapasnauan kekatamu. Anang Jesus king ebanghelyo: ”DINAN DA KAYUNG KAPAYNAWAN” (V. 28) Ing kapaynawan a bibie na ning Guinu, kapaynawan yang tutu, kapaynawan a iya mu kabud ing makaibie. Pengaku ning Guinu kekatamu king ing babie nang kabayatnan kekatamu a buri nang pusanan tamu, MAYAN YANG IDALA AT E MABAYAT.(v. 30). Mabiasa ta king Guinu uling iya MAMU YA AT MABABA YA LUB (v. 29). Kerakalan kasi kareng daralan tang kabayatnan, bunga no ning ketasan ta lub. Mangadi tamu king Guinu, na sana, potang atin ta nang kakargan a kabayatnan king bie, iya kaagad ing pupuntalan tamu. Iya sana ing king isip tamu at ala nang aliwa pa. E tamu manintun dibersyun o bisyu king nanu mang paralan, nune ing Guinu sana iyang panintunan tamu at kaya tamu lumapit uling ustung linapit tamu keya, ing pangaku nang kapaynawan king mapagal tang isip iyang mibie kekatamu. Amen.

IV. Pamigunam

Minsan a aldo Guinu, mesora ku uling as naku karakal a pipian. King sora ku, likuan ku pa ing dapat kung pipian. Minta ku pa king SM ban milako ku sora king katambak a pipi. Inyang minuli kung magbengi na, disnan ku pa mu rin ing likuan kung dapat pipian. Merakal la pa pin, Guinu! Makanyan ke maralas gagawang solusyun king bie mi Guinu. Isipan mi mo ing dibersyun ampon ing bisyu iyang mamie kapasnawan kareng problema mi. Oneng potang kayari ning dibersyun o bisyu, iya mu naman ing dasnan ming problema. E na ke mebiasa Guinu. Imbes na keka ke mumunta at pupulayi potang marakal na ke problema, miyayaliwang bage ing gagawan mi nang panakap. Inya, lalu keng daragul problema. Dinan yu keng katahimikan Guinu. Mapagal na kami. Mapagal na keng durut-durut. Sinawa na keng magbakasakali kareng bage a balu mi naman e mamie tutung katahimikan at kapasnauan king bie mi. Ika kabud Guinu ing makaibie kekaming tutung kapaynauan kareng mapagal mi nang isip ampon katawan. Ika kabud Guinu, ika kabud. Amen.

V. Pamanahimik

VI. Tauling Panalangin
Ibpa, Salamat pu uling binie ye kekami ing mamu at mababa lub a Guinu ming Jesus. Nanu pu ing gawan mi nung ala yu? Nukarin ke pu munta ampon mulayi nung ala yu? Marakal na ke pu sibuknan a paralan ban maging mayan ing kekaming kakargan king pamibiebie oneng mabibigu kaming mabibigu. Lalu mu pung babayat ing kakargan mi, lalu mu pung magugulu ing kekaming pamibiebie. Turuanan yu ke pung lumapit a alang takut at alang pasubali king Guinung Jesus lalu na neng e mi na agyu ing kekaming problemang daralan. Dinan yu ke pung grasya king ipirmi mi kaya ing panimanman mi kabang mabibie kami. Uling iya kabud ing mamie kapaynawan at katahimikan kareng mapagal mi nang katawan at kaisipan. Turuanan yu keng maging kalupa nang mamu ampon mababa lub, uling kerakalan kareng kabayatnan ming daranasan, bunga no ning ketasan mi lub at kesyasan a pusu. Salamat pu Guinu. Salamat. Amen.

VII. Kutang
1. Pota mong daranas kung kabayatnan, ing Guinu mo iyang pupuntalan ku kaagad?

Download here:

Page 1: http://www.mediafire.com/file/2ono1rr19qc8gl4/07.03.11%20pg.%201.doc
Page 2: http://www.mediafire.com/file/b61d56g16dmyc65/07.03.11%20pg.%202.doc

Solemnidad ning Katawan at Daya ng Kristo

I Jesus ing Tinape ibat Banua

I. Pamuklat a Panalangin

Ibpa, marakal pung salamat uling binie ye kekami I Jesus, ing tinape ning bie. Binie ye kekami ing Guinung Jesus ban maging kanan mi at inuman king pamaglakbe mi keti yatu. Uling keya, lalu mi yang aintindian ing kaburian yung mantabe kekami kapamilatan na ning presensya na king banal a Eukaristiya. King keyang presensya king Banal a Eukaristiya, ikit mi ing keyang alang sawang kapanenayan at pamagpasensya kekami a maralas mangalinguan kareng grasyang bibie yu kekami aldo aldo. Potang tatanggapan mi ya, Ibpa, pabanalan yu kami, pasiknangan yu kami ban ing bie ning Guinung Jesus maging yang mismung pamibiebie mi. Salamat Ibpa king kekong presensya. Salamat pu. Amen.
II. Pamamasa

Jn 6: 51-58

51 Aku ing mabie tinape a tinipang ibat baua. Ing ninumang mangan kaniti mie ya kapilan man. At ing laman ku ya ing tinape a ibie ku ban mie ya ing yatu.”
52 Uli na niti, mapali lang mibadbaran ding Judio. Ngarang mipapangutang, “ Makananu nang aibie kekatamu ning taung iti ing laman na ba tamung apangan?”
53 Nganang Jesus karela, “Ing katutuan sasabian ku kekayu: nung e kayu mangan king laman na ning Anak ning Tau at minum king daya na e kayu mika bie king sarili yu.
54 Ing mangan king laman ku at minum king daya ku atin yang bie alang angga, at pasublian keng mie king tauling aldo. 55 Uling ing laman ku tune yang pamangan at ing kanakung daya tune yang inuman.
56 Ing mangan king laman ku at minum king daya ku manatili ya kanaku at aku manatili ku keya. 57 Tinubud na ku ning mabie Ibpa at king uli na mabibie ku; anti munaman ing mamangan kanaku mabibie ya king uli ku. 58 Iti ya ing tinapeng tinipa ibat banua. E ya anti king pengan ding makatua yu. Mengan la, oneng kaybat mete la. Ing mamangan king tinapeng iti mie ya kapilan man.”

III. Turu

Ngening Domingu, pagmasusian ta ya ing solemnidad ning Katawan at Daya ning Ginung Jesus. Aus da naman king aldong iti ya ing Corpus Christi. Amanu yang latin ing Corpus Christi a buri na sabian Katawan ng Kristu.
King kekatamung kasalpantayanan bilang Katolikung Kristianu, metung ne kareng peka sentrung kapaniwalan tamu ini. Ing kapaniwalan tamu yapin ya ing mismung sinabi ng Kristo kareng Judio inyang binulalag ne ing misteryo ning katawan at daya na bilang metung a tutung pamangan at tutung inuman inyang ana karela: “Ing laman ku tune yang pamangan at ing kanakung daya tune yang inuman.” (v. 55). At kalupa da ring Judio, itamu naman malyari tamung ikutang: “ Makananu nang aibie kekatamu ning taung iti ing laman na ban tamung apangan?” (v. 52)
Nung inyang panaun ng Jesus, memagkasakit lang paki-intindian ining sinabi na, kening kapanaunan tamu, marakal la pa mu rin reng mamagkasakit tanggap karing sinabi ning Ginu king iya ing “ tinape ibat banwa a bibieng alang anggang bie” (v. 51) Marakal kareng Kristianu lalu na kareng aliwang sekta ring maniwala king simbulu nya mu ning katawan at daya ning Guinu ing tinape at alak a tatanggapan tamu king santa misa. Oneng para kekatamu, paniwalan tamung tutu king ing tinape at alak a tatanggapan tamu neng komunyon king santa misa, e ne tinape, e ne alak, nune tutu neng katawan at daya ning Ginung Jesus. Ing tatanggapan tamu neng oras ning komunyon ning santa misa, lupa yang tinape ampon lupa yang alak, lalasa yang tinape ampon lalasa yang alak oneng e ne tinape ampon alak nune tutu na neng katawan at daya ning Guinu. Masakit paniwalan? Nung magkasakit ta yang paki-intindian, tandanan tamu marakal nong tutu reng memagkasakit kening doktrinang iti. At kalupa na naman inyang kapanaunan nang Jesus, marakal la rugu reng memaglako king pamakyabe da king Ginu uling “ masakit ing sasabian na. “ (v.60)

Oneng ing doktrina ning katawan at daya ning Ginu, lalu ta yang aintindian nung ing kasalpantayanan ta king Ginu iyang pakiramdaman tamu. Ing kasalpantayanan tamu paniwalan na ngan ing egana-ganang sasabian ning Guinu, kayabe ne ining turu na tungkul king katawan at daya na bilang pamangan at inuman. At uling paniwalan tamu king e na katamu lokuan o a loku ning Guinu, at uling iya ing Guinu at Dios a lulugud kekatamu, malagwa na kekatamung maniwala keya lalu na kening sasabian ng katawan at daya na bilang pamangan at inuman tamu. Ing kaligtasan a bibie na ning Guinu, ing bieng alang anggang pangaku na kekatamu, makatayid ya kening kapaniwalan tamu kening katawan at daya na inyang ngana: “ Nung e kayu mangan king laman na ning Anak ning Tau at minum king daya na e kayu mika bie king sarili yu. Ing mangan king laman ku at minum king daya ku atin yang bie alang angga, at pasublian keng mie king tauling aldo.” (v. 53-54)
Oneng lawen ta ya ining doktrinang ini king sala ning lugud. Potang akakit ta ya ing metung a bage king sala ning lugud, mas malagwa yang aintindian. King sala ning lugud, alang e malyaring aintindian. King sala ning lugud, ing masakit, maging mayan. Ing Ginung Jesus, darake ne ing sarili na kekatamu. E ya antimong regalu ing kayang pamagdake king sarili na uling ing regalu agyampang makananu ya pa ka mal, aliwa ya pa murin ing sarili mu ing bibie mu. Ing Ginu bibie ne ing katawan na at daya na. Bibie ne ing sarili na – ing bie na ban mika bie tamu. E ya tatakut ibie ne ing sarili na ban mika bie tamu. Kapamilatan ning pamagdake na king sarili na kekatamu, mididinan tamung bie a manibatan kaya. Ing bie na iyang maging bie tamu. King banal a Eukaristiya, ing tutung katawan at daya ning Guinu, bibie neng tutu ning Ginu ing sarili na. Potang tatanggapan ta ya king komunyon , ing Guinu iyang tutu tang tatanggapan.
E tamu masaya king ating tamung Guinung e tatakut ibie ne ing sarili na kekatamo? Misip tamung bagya. Nung e tatakut ibie ne ning Ginu ing sarili na kanaku, buri na sabian, tutu na kung kaluguran para gawan na ita. E wari, mamie tamung regalu kareng kaluguran tamu? Darake ta la king nanu mang kayatinan tamu uling kaluguran ta la. Itamung Pilipinu usu pa murin ing darake ta lang pamangan reng siping tang bale lalu na potang special ya ing linutu tamu o kaya atin tang kapiestan. Malagwa ini. Oneng malagwa tala kayang idake reng sarili tamung bato,mata o miyayaliwang parti ning katawan tamu kareng aliwang tao potang mangailangan la? Ali siguru. Pero nung kutnan ta ya ing Guinung Jesus nung idake ne ing kayang batu, pusu, mata ampon miyayaliwang parti ning katawan na kareng mangailangan kareti, metung ya ing pakibat na. E mu pusu, e mu batu, e mu mata, nune ing mabilug nang katawan pati daya ing ibie na kareng egana-ganang mangailangan. Iti gawan na uling tutu na katamung kaluguran. E ya bibiru ing Ginu inyang sinabi ng ibie ne ing sarili na bilang kanan at inuman tamu ban midinan tamung bie. E ya bibiru ing Ginu lalu na potang ing kekatamung kapakanan at kaligtasan ing pisasabian.
King katawan at daya ning Ginu, akakakit tamu king ing lugud ning Ginu e mu kabud amanu. Akakit tamu king dapat na. Pauli na niti, makasiguradu tamung lubus-lubusan ing lugud na kekatamu. Alang amanung maka larawan king lugud na king bawat metung kekatamu. Inya ala tang dapat ikatakut king bie nung balu tamu anti ya kaniti ing lalam ning lugud na kekatamu. E ta tatakut mumulayi kaya. E tamu tatakut sabian ta kaya ing egana-ganang pigagap at kapigaganakan tamu king bie uling gawan na ing nanu man paralan ban saupan na katamu agyang nung kailangan neng ibie ing sarili ng katawan at daya ban midinan kapakibatan ing kekatamung anyaran keya.

IV. Pamigunam
Ing Ginu atiu busal tamu. E mu king guni-guni tamu. E mu king paninap. Tutung atiu ing Ginu busal tamu. Neng sisimba tamu, potang oras na ning komunyon, iyang tutu ing mibibie kekatamu. Iya ing tatanggapan ning katawan ku, ing Ginung lulugud kanaku! At potang meyari na ing santa misa, bibili de ing Guinu king tabernakulu nung nukarin ating sulung makasindi ban paintindi na kanaku king atiu ya ing presensya ning Ginu. At potang puntalan ke ing Ginu at lukluk ku king arapan ning keyang tabernakulu, balu ku atiu ya kayabe ke. E ya mamako. E na ku lalakuan. Manenaya yang pakisabian ke agyang nanu pang oras ning abak, gatpanapun o bengi. Potang mikaka problema ku, mipapasno ku potang akasabi ku ne ing Guinung manenaya kanaku king Blessed Sacrament. Balu ku pakiramdaman na ku uling balu ku mabie ya at atiu ya ing presensya na karin. Marakal a besis manangis ku pa king presensya na uling tutung neng kai e ku na balung kargan ing bibitbitan kung problema. Oneng king presensya mu Guinu, mipapaldan ku. Mididinan kung sikanan ban isundu ku ing pamaglakad ku king bie ku. Neng lilino ne ing isip ku, a pi-isip-isip ku Guinu king abe da na ka man. Obat maliligalilg ku pa? Obat tatakut ku pa? Nung paniwalan kung kaluguran mu ku, nanu pa dapat ing kanakung kakarugan? Nung paniwalan kung ibie me ing katawan at daya mu para king kaligtasan ku, obat as na ku pa karakal a kapigaganakan? Kulang ku pa kasalpantayanan Guinu king kekang lugud. Tatakut ku pang magtiwala keka. Patatagan mu ku Guinu. Ika ing lakas da reng mimina. Ika ing santungan da reng ala ng sasandalan. Guinung Jesus, salamat pu king kekong lugud. King kekong alang anggang presensya king bie mi, salamat pu.

V. Pamanahimik

VI. Tauling Panalangin
Ibpa, ikayu ing mibie kekami kang Jesus, ing tinape mi ibat banwa. Pauli na, mididinan keng tutung pamangan ampon inuman ban miras ke king banwa. Pasalamat ke pu kekayu uling pauli ning tinape ning bie, akakayabe mi yang akakayabe ing Guinung Jesus a e mamako king kekaming presensya. Pauli na, malagwa mi yang apupuntalan at akakasabi king Blessed Sacrament lalu na neng mabayat ke pilubluban. Potang bibie ne ing sarili na bilang pamangan king kekaming katawan at kaladwa, mididinan keng lakas ban isundu mi ya ing pamaglakbe mi keti yatu. Salamat pu kang Jesus, ing tinape mi king bie. Salamat pu king lugud yu kekami a pepakit yu kekami kapamilatan ning Anak yung Jesus. Amen.

Kapiestan ning Santisima Trinidad

Binye ne ing Bugtung ng Anak
II. Pamamasa

Jn 3: 16-18
16Uli na ning maragul nang lugud ning Dios king yatu binie ne ing bugtung nang Anak ban ing ninumang maniwala keya e ya mate nune mirinan yang bie alang angga. 17 Uling tinubud ne ning Dios ing Anak na king yatu e ban atulan ne at parusan ing yatu, nune ban miligtas ya ing yatu king kapamilatan na. 18 E ya miyatulan kaparusan ing ninumang maniwala keya:oneng miyatulan ne ing e maniwala keya, uling e ya meniwala king bugtung nang Anak ning Dios

III. Turu
Ngening domingu, pagmasusian ta ya ing kapiestan ning Santissima Trinidad, o ausan tamung Holy Trinity o Banal na Santatlo king tagalog. E ta ya pagmasusian ing kapiestan na mu ning Dios nune ing kapiestan na ning Dios a megpakilala kekatamu bilang “Santissima Trinidad”. Metung ne king pekamalalam a doktrina ning Santa iglesia ini. Balang domingu, agkas taya king Credo, kaybat na ning sermon o homily na ning pari, ining kapaniwalan tamu king Dios bilang Santissima Trinidad.
Inyang panaun na ning matwang tipan ( Old Testament), kilalanan de ing Dios bilang metung a Dios at ala ng aliwa pang Dios. Ing Dios a ini iyang menantabe karela, iya ing megligtas karela lalu na king oras ning kasakitan da bilang metung a balen. Ing Dios iya naman ing sinaup ampon linugud karela at pepalto na ing lugud at lunus na king bansang Israel. At e mu kabud meging Dios de. Kapamilatan na ning metung a tipan, ing Dios a ini mengaku ya karelang e no paburen agyang kapilan man. Ing relasyun ning balen ning Israel king Dios as ne kasanting ampon tutu yang makatagkil. Uling king makaba dang istorya ning balen ning Israel, agyampang pilan deng besis pigtaksilan ampon kelinguan ing Dios a mekipagtipan karela, e no likuan ning Dios a megpakilala karela. Nung pepakit dang e la meging tapat reng memalen ning balen ning Israel king Dios, ing Dios e na tebili ing kasunduan o pisabi da at menatili yang tapat king lugud na karela agyampang kelinguan de ring balen ning Israel.
Uling tapat yapin ining kilalanan dang Dios, e ya tinuknang megpakilala pa king sarili na ban lalu deng a kilala ampon a luguran.
Inya pin king bayung tipan, ing Dios a ini, pepakilala ne ing sarili na bilang Dios pa murin. Oneng mas malalam ing pepabalu na kekatamu king sarili ng pangatau inyang itubud ne ing sarili ng anak a I Jesus. King Ginu tamung Jesus, akilala ta ya ing tune nang pangatau ning Dios tamu. Abalu tamu king iya Ibpa yang mayupaya at maragul ya lugud kekatamu. Abalu tamu king ing Dios, kalupa ning metung a ibpa, e na ka tamu paburen. Bibie na ing makakayap kekatamu at ala yang ipagkaimut agyang ing sarili ng anak ban miligtas ta sa king nanu mang kapahamakan. Abalu tamu naman, kapamilatan ng Jesus, king I Jesus anak yang bugtung at tinipa ibat banwa ban pakilala ne kekatamu ing Ibpa. Mapilan pamung domingu ing milabas inyang sinabi ning Ginung Jesus king iya ampon ing ibpa, metung la mu. King iya, gagawan na mu ing papagawa ning Ibpa at king iya mu kabud ing dalan papunta king Ibpa. Medyu siguru makalitu ne ini potang sasabian tamu king ing ibpa ampon ing anak metung la mu. Tutu, metung ya ing paniwalan tamung Dios at e la adwa o atlu. Metung ya ing Dios, oneng atlu king personas o pangatau. Obat makanyan? Uling iya ing mismung binulalag na kekatamu ning Ginu. Pauli na nita, makaduku ta yang paniwalan ing misteryung iti. Inyang milabas a domingu, ing Espiritung Banal iya naman ing tinipa banwa at menuknangan busal tamu.
King pangaitas na banwa ning Ginung Jesus, mitubud ya ing Espiritu ban maging kayabe tamu mangga na king kapupusan ning panaun. Ing Espiritu iyang mamantabe kekatamu. Iya ing mituturu kekatamu, iya ing lugud ning Ginu a atiu busal tamu. Nung suman ta ya ngan ing egana-gana, ing Dios a pepakilala king Israel, iyang kikilalanan tamu naman. Oneng lalu ta yang a kilala ing Dios a ini inyang dinatang ya ing Ginu tamung Jesus. Pepakilala ne kekatamu ing tune ng aske ning Dios. King pangatau ning Ginung Jesus, akilala ta yang tune king ing Dios tune yang lugud, tune yang maganaka at tune yang magmalasakit kekatamung mibabayatnan king pamaglakbe tamu keti king yatu. Kapamilatan na ning Ginung Jesus, ikit ta ya ing ganaka ning Dios a e tatakut midaun king sarili ng bie ban miligtas tamu. At ngeni, king busal tamu, panandaman ta ya pa mu rin ing lugud ning Dios a iti, king presensya na ning Espiritu nang Banal a alang patugut mamantabe king pamibiebie ning Pisamban at ding bie da ring bawat Kristiyanung talatuki ning Ginung Jesu Cristo.
Atin tamung tapat a Dios. King bayung tipan a mitatag inyang mibubu ya ing daya ning Ginung Jesus king Krus, makasiguradu tamu king atin tamung Dios a e maglakwan kekatamu at manatiling kayabe tamu mangga na king mapupus ya ing panaun. God is faithful. E na ka tamu paburen. Tapat ya. Ni minsan e ta pa ikwang mebigu king katapatan ning Dios a megpakilala kekatamu bilang Ibpa, Anak ampon Espiritu Santo.
Inya nanu dapat ing pakibat tamu kening Dios a megpakilalang Ibpa, Anak ampon Espiritu Santo? King mebasang ebanghelyu, metung ya mu ing anyaran na ning Ginu: Kasalpantayanan. Dapat maniwala tamu kening Dios a megpakilala kekatamu. Isuku taya ing sarili tamu keya, king keyang upaya ampon ganaka. Nung paniwalan tamung tapat ya, atin ta pang dapat ganakan? Misip tamu. Maniwala tamu at isuku tamu ing egana-ganang aspetu ning bie tamu keng Dios a mitmung katapatan at lugud. Alang ninu man a megtiwala keya ing minuling mebigu king bie.

IV. Pamigunam
Atin ta pa kayang akit a katapatan kareng tao? Ngening panaun nung nukarin marakal la reng mikakawaning talasawa at marakal a broken families, asabi tamu kayang atin pang katapatan king kekatamung komunidad? Nung reng dapat mikalugud e la mikakalugud, nanu pa kaya reng mi kaluguran mo? Neng kai mikakapatad la pa mo, oneng agyang karin, akakit tamu agyang mikakapatad la neng kai, mipapate la pa mu rin. Atin ba talagang katapatan king pamibiebie tamo? Ana minsan ning Dios king Propeta Isaias : “Akwa neng lakwan kaya ning inda ing kayang sisesen a bingot? Ali ne. Oneng nung sakaling akwa nang lakwan ne, aku, I Yahweh, e da kayu lakuan kapilanman.” Nung atin yang pepakilala ugali Ing Dios kekatamu, ya ing ugali ng katapatan. E na katamu a lakuan ning Dios uling anapin ning mebasang ebanghelyo, masyadu neng kaluguran ning Dios ing yatu. Tapat ya ing Dios kekatamu. Nung e na abut ning pamisip tamu nung nanu ing kabaldugan ning katapatan, lauen taya ing Dios at keya akit tamu ing kabaldugan ning katapatan. Lauen ta ya ing Ginung Jesus at karin akit tamu nung makananu ya katapat kekatamu. Alang nanu man ing malyaring milako king katapatan ning Dios kekatamu. Balu tamung e na katamu paburen ning Ginu? E mo mas practical kekatamu king isuku ta ya ing sarili tamu kaya? Pa-ubaya taya kaya ing egana-ganang pigagap tamu, ing egana-ganang kapanandaman tamu, ing egana-ganang pangabigu ning pusu tamu. E naka tamu lakuan. Atiu yang atiu king bie tamu uling tapat ya. King panga-Dios na, e na ikwang tinabili king katapatan kekatamu.


V. Tauling Panalangin
Ibpa, ninu pa mo ing dapat ming panaligan nung aliwa ika? King pamibiebie mi, ika mu ing a sandalan ming tutu uling e mu ke lalakuan at e mu ke papaburen. King keinan ming papakit, e ka magsawa kekami, e ka tutuknang babalik mu kami king ustung dalan. Ginung Dios, atlu king pangatau at metung mu king panga-Dios, kinupkup yu kami bilang anak yu inyang mebinyang kami. Manibat kanita, balu ming e yu ke tatabili at papaburen lalu na potang magugulu na ke isip ampon karugkarug na ke king malilyari kekami. Ika ing alang kapante king lugud ampon lunus. Alang makapante keka king katapatan yu. Salamat Ginu akilala da kayu at pebusten yung pepakilala ye ing sarili yu kekami. Salamat pu Ginu. Salamat. Amen.

VI. Kutang

1. Nung balu tamung tapat ya ing Ginu, ikwa tan eng sinuku kaya ing bie tamo?

Download here:
Page 1: http://www.mediafire.com/file/3gt47wygzaf1ivi/06.19.11%20pg.%201.doc
Page 2: http://www.mediafire.com/file/xte3esh8tmi98wy/06.19.11%20pg.%202.doc

Pentekostes

Ing Pamanyatang ning Espiritu Santo

I. Pamuklat a Panalangin

Ibpa, pasalamat ke pu ngeni uling binie ye kekami ing Banal a Espiritu. King pangabie na kekami ning Espiritu ning katutuan, mibait ya ing Santa Iglesia. Kapamilatan na ning Espiritu yu, e ke migaganakang malili uling balu ming antabayanan na kami king katutuan. Kapamilatan na, lalu mi yang akikilala ing Ginung Jesus a mitas banwa at makalukluk ngeni king wanan yu. Pauli na, mabibiasa keng mangadi keka ampon manalangin lalu na potang mamagkasakit ke king bie mi. Busni yo pu reng pusu mi ban miyang a tanggap ing kekong Banal a Espiritu a magpabanal kareng talatuki ning Ginung Jesus. Amen.

II. Pamamasa

Juan 20: 19-23

19Kanitang bengi na ning aldo mu ring ita, mitipun la ding alagad. Pakasara la ding pasbul king lugal nung nu la makatipun uli na ning takut da karing Judio. Dinatang ya i Jesus at tinalakad ya libutad da. Ngana karela, “Kapayapan keko ngan.” 20 Pangasabi na niti, pepakit na la karela ding gamat na at ing katalindikan na. Mesaya la ding alagad panakit da king Ginu. 21 Pasibayu nang sinabing Jesus karela, “Kapayapan keko ngan. Nung makananu na kung tinubud ning Ibpa, makanyan da kayu namang tutubud.” 22 Pangasabi na niti, pengisnawanan na la at sinabi na, “Tanggapan ye ing Banal a Espiritu. 23Nung patawaran yu la ding kasalanan na ning ninuman, mipatawaran la; ing e yu patawaran e ya mipatawaran.”


III. Turu

Mapilan pa mung domingo ing milabas inyang pakisabian nong Jesus reng apostoles na at pengaku na karela king itubud ne ing Banal a Espiritu karela ban akayabe de. Ing tutubud ng Espiritu ya ing Espiritu ning katutuan. King mebasang ebanghelyu, bibie na ne ning Ginu ing pengaku nang Espiritu. King ebanghelyu ng Juan, ing Ginung sinubling mebie iyang mibibie karela king Banal a Espiritu inyang “pengisnawanan” no reng apostoles na. “Tanggapan ye ing Espiritu”, ngana karela, at inyang sinabi na iti, “pengisnawanan” na la.(v.22)

Ing sinulat king ebanghelyung mebasa papakit na king ing Banal a Espiritu menibatan ya mismu king Ginung sinubling mebie. Menibatan ya king pangisnawa na. Metung yang paralan ini ban neng atimid kekatamu ning sinulat king ebanghelyu na ing Espiritu yapin tutu ing Espiritu ning Ginung Jesus a sinubling mebie. Pengaku ne karela ing Espiritu at ngeni binie ne karela. Obat mo “pangisnawa” ya pa mu ing paralan ng ginamit ning Ginu ban apakit nang mibie ne karela ing Banal a Espiritu? Nung mibalik ta king mumuna ng libru ning Biblia, ing Genesis, akit ta karin king ing Dios, inyang lelangan ne ing tau, kinangwa yang gabun at pinorma ne i Adan. Kaybat na nita, “pengisnawanan” ne I Adan ban midinan yang bie (Gen 2:7). Uling pengisnawanan ne, midinan yang bie I Adan. Makaniti ya naman ing buri ng pakit kekatamu ning sinulat king ebanghelyu tamu ngeni. I Jesus, pengisnawanan no ring apostoles na. Kapamilatan na niting pangisnawang iti, midinan la naman “bie” ring apostoles. At nanu ing mibait at midinan “bie” inyang pengisnawanan no ning Ginu reng apostoles na? Nung i Adan midinan yang bie kapamilatan ning pangisnawa ning Dios, ing Santa Iglesia iyang midinan bie inyang pengisnawanan no ning Ginu ring apostoles na. King pangabie ning Espiritu karela, mibait ya ing Santa Iglesia. Inyang binie na ne ing Espiritung Banal kareng apostoles, karin ne mibait ing ausan tamung Santa Iglesia. Ing Santa Iglesia ya ing balayan a mebuu pauli ng Kristo. At ninu ing balayan a iti? Itamu. Itamu ing balayan ning Ginu a mitipun at ausan tamung Santa Iglesia. Kening pamitipun da reng sasalpantaya king Dios, mibie ya ing Banal a Espiritu ban mantabe karela mangga na king kapupusan ning yatu. At uling ing Banal a Espiritu ya ing Espiritu ning Ginu, balu tamu king antabayanan na katamu ning Espiritu nung makananu na nakatamung antabayanan ning Ginung malugud.

Kapamilatan na ning Banal a Espiritu, e ya malili ing Santa Iglesia. Dinatang na ing marakal at mangaragul a kapagsubukan king Santa Iglesia, oneng agyampang nanung pamagkasakit ing denasan na ning Santa Iglesia, linual yang megtagumpe, kalupa ning Ginung sinubling mebie. Uling ing Espiritung mamantabe king Iglesia ya ing Espiritu ning katutuan, maniwala tamu at sasalpantaya tamu king e ya turung marok o nanu mang kamalian ing Santa Iglesia. Manibatan kening iglesia tamu ing katutuan, kayapan at tutung bie. E na buring sabian niti king e no magkamali ding miyembru ning Santa Iglesia. Uling tau tamu ngan, magkamali tamu naman. Mikakasala tamu naman agyampang miyembru tamu at kayabe tamu king iglesiang iti. Potang sasabian tamung e na ka tamu ilili o lokuan ning Santa Iglesia, ing buri tamung sabian keni, king ing Santa Iglesia, e ya turung karokan. E ya turung maling kapaniwalan. E ya turung salungat king katuruan ning Ginung Jesus. Kareng bageng makapatungkul king kasalpantayanan tamu at pamanugali, (ausan dang faith and morals king inglis), makasiguradu tamung e ya magkamali ing Santa Iglesia. At uli na pin antabayanan ne ning Espiritu ning katutuan ing Santa Iglesia, e ya migaganakang binie ning Ginu ing upayang mamatawad ampon e mamatawad kasalanan. (v.23) Memie yang upaya keng Iglesia ban itali no reng dapat itali na, at upayang lako no king pangatali reng dapat milako king pangatali. Makanini ya ka sigurado ing Ginu king iglesia na Eya magkamali uling ing mamantabe pin keya ing Banal a Espiritu. Mangadi ta king Banal a Espiritu. Uling Espiritu ne ning Ginu, anyaran tamu kayang lalu tayang akilala ing Ginu ban mipalapit tamu kaya. Anyaran tamu king dinan na katamung lakas ban tukyan ta ya ing Ginung Jesus lalu na king oras ning kasakitan o nanu mang tuksu. Anyaran tamu king Banal a Espiritu king antabayanan na katamu king bie ban e ta malili. Lalung lalu na, anyaran tamu king Espiritung Banal king palablaban na ka tamu pusu ban tutung lugud ing miral king bie ning bawat miyembru ning Santa Iglesia.


IV. Pamigunam

Ing Santa Iglesia maglakbe ya keti king yatu. Ala yu pa king keyang destinasyun a yapin ing banwa. Itamung kayabe king Iglesia ning Ginu, miyabe-abe tamung maglakbe. Kabang maglakbe tamu, kayabe ta ya ing Ginung sinubling mebie, at kayabe ta ya ing Espiritu ng Banal a mamanatabe kekatamu king dalan ning katutuan, king dalan ning kabanalan. Ing Banal a Espiritu ning Ginu yang magpabanal kekatamu, iya ing bibie sikanan kekatamu potang mimina ya ing kasalpantayanan tamu. Iya ing lugud ning Ginu a mibulus na kekatamung pusu. Iya ing tanda ning alang anggang lugud ning Ibpa ampon ning Anak. Iya ing binie ning Guinung Jesus ban kayabe tamu at ban e tamu mag dili-dili. Pauli ning Banal a Espiritu, ing pisamban maging yang anti mong metung a inda. Ing pisamban iyang ausan tamung inda. Pauli na mibait tamu king bayung bie ning Espiritu kapamilatan ning binyag tamu. At uling metung yang inda, e na buring dagul tamung e mayap. Turu na wari ning metung a inda ing e ustu king anak na? Ibili ne ning metung a inda king kapahamakan ing kayang anak? At potang magkamali ya ing anak na, ing munang sasaup yapin ya ing inda na. Pota e makiramdam ing anak at maging pasaway ya ing anak, ing mangargang mabayat a kalungkutan yapin ya ing inda. Kekatamung Pilipinu, as ne kaulaga ing inda. Ing santa iglesia tamu ausan ne ing sarili na bilang metung a inda a lilingap at mamantabe kareng anak na. Makanyan ya naman ing Espiritung Banal. Anti ya mong metung a inda ing Banal a Espiritu. Antabayanan na ka tamu ngan. E na katamu buring malili at pasiknangan na ka tamu ngan king pamaglakbe tamu papunta banwa.


V.Pamanahimik

VI Tauling Panalangin

Ibpa, Salamat pu king tiburan yung Espiritu Santo. Iya ing lakas da reng mimina, ing sala para kareng atiu king karalumduman. Iya ing mamie kabiasnan kareng e makaintindi. Iya ing kapayapan da reng magugulu, ing mamie katatagan karing karugkarug. Iya ing lugud ning Dios karing taung mayap a pilubluban. Iya ing katahimikan da ring e mipaindatun. Iya ing maghilum at magpakayap kareng sugat mi king bie. Iya ing kapatawaran a panandaman mi potang sisisi kami. Iya ing saya mi potang atiu ke king grasya. Iya ing sasaup potang mibabayatnan kami at ing lugud a panandaman mi kapilanman. Ginung Dios, Salamat pu. Salamat pu king kekong alang anggang lugud kekami a pepakit yu kekami kapamilatan ning Espiritu Santo. Amen.
.

VII. Kutang

1. Kapilan ke mo penandaman ing presensya ning Espiritu Santo king bie ku?

Page 1: http://www.mediafire.com/file/hiq9dkc6j1fp2lg/06.12.11%20pg.%201.doc
Page 2: http://www.mediafire.com/file/hvtowvyy9qxpoux/06.12.11%20pg.%202.doc

Solemnidad ning Pamaitas na Banwang Jesus

Ing Pamanukyat ning Ginu king Banua

I. Pamuklat a Panalangin

Ibpa, magsaya kami king Ginung Jesu Cristo uling king pangaitas na banwa. King tagumpe na king Krus at king pangasubling mebie na, ikwa ng ayari ing pepagawa yu kaya. Pauli na ning misyun a gewa na, akilala da kayu. Pekilala na kayu kekami at abalu mi ing tutung lugud yu at kayapan yu kekami kapamilatan na. King pangaitas na banwa, lalu keng mididinan pamag-asa uling balu mi e na ke kalinguan panalangin ampon gaganakan. Ngening kayabe yu ne king banwa, lalu keng sisikan a lub uling balu ming e no kakalinguan babanggitan kekayu reng kapigaganakan mi king aldo-aldo. Marakal pu salamat ne Ibpa. Salamat, salamat pu. Amen.



II. Pamamasa

Mateo 28:16-20

16 Minta la ding labing metung a alagad king Galilea at tinaglus la kinh bunduk atildu nang Jesus karela. 17Panakit da kang Jesus, siniklaud la’t simban de agyamang magduda la pa ding aliwa. 18Lepitan na lang Jesus at ngana karela, “Miyabie kanaku ing sablang kayupayan Karin banua at keti king yatu. 19Inya munta kayu at gawan yu lang alagad ku ding sablang bansa. Binyagan yu la king lagyu ning Ibpa at ning Anak at ning Banal a Espiritu 20at ituru yu lang tupad king sablang inutus ku kekayu. Tandanan yu: kayabe yuku kapilan man angga king kawakasan na ning panaun!”



III. Turu

Inyang milabas a domingu, dimdam tamu king ebanghelyo na sasadya na no ning Ginu reng apostoles na king pamaglako na. At uling malapit niyang mako, pengakuanan nong e no lakuan uling anyaran niya pin ning Ginu ing Banal a Espiritu king Ibpa ban manantabe karela ampon kekatamu. Tandanan tamu, e na katamu buring magdili-dili ning Ginu. Never na buri na katamung maglakbe king kekatamung bie at dadalan king miyayaliwang kasakitan ne e ta ya kayabe. Tutu ya at tapat ya ing Ginu kekatamu. Ngening dominggung iti, pagmasusuian ta ya ing Pangaitas na Banwa ning Ginung Jesus Cristo. Keng ka piestan a iti, balu tamu king mibalik ya ing Ginung Jesus banwa nung nu ya menibatan, king ligaya ning Dios Ibpa. Ing mebasang ebanghelyu e ne nilarawan kekatamu ing pangaitas na banwa ning Ginu. Oneng agyampang e ne nilarawan, binanggit ning Ginu ing pamagbalik na king Ibpa inyang ngana: “Ngeni munta na ku keka, lakuan ku ne ing yatu, oneng atyu la king yatu.” (v.11)

King pangaitas na banwa ning Ginu, magbalik ya king Ibpa uling menibatan ya king Ibpa. Tinubud ne ning Ibpa kekatamu ban pakilala ne ing Ibpa kekatamu (v.6). At nung buri ta yang akilala at arasan ing Ibpa, king Ginung Jesu Cristo mu ing tutung paralan ban agawa ta ini. Ngening mibalik ne ing Ginu king banwa at munta ne king Ibpa, nanu ing kabaldugan na para kekatamu ini? Mumuna, anti ya mong graduation ning Ginung Jesus ini. Uling anapin ning Ginu king mebasang ebanghelyo: “Inari ku ing obrang pepagawa mu kanaku” (v.4), buri ng sabian, ing egana-ganang penabilin ng gawan ning ibpa kang Jesus meyari na, dapat neng “mipaligayan” anti mo neng graduation. Ustung megraduate ya ing metung a istudyanti, buri na sabian a yari na na ngan ing egana-ganang dapat ng gawan. At potang graduation na, yapin na ing ceremonias ban midinan yang parangal o mipaligayan ya ing istudyanting memegkasakit king gewa ng obra. Inya ana rugu ning Ginu: “At ngeni, Ibpa, paligayan mu ku king keka mu ring kaligayan a sadiang
atyu kanaku king pangayabe ku keka bayu ya melalang ing yatu.” (v.5). Dapat mung muli ya banwa ing Ginung Jesus king Ibpa. Kaybat ng megtagumpe keti king yatu kapamilatan na ning pangamate na at pangasubli ng mebie, dapat mung mipaligayan ne at akwa na na ing ligaya a atiu na kaya bayu ya pa melalang ing yatu. Ing Ginu tutu yang Dios, tutu yang tau. King pangaitas na banwa, ing kayang pangatau mipaligayan ya naman uling e mu ne a kawani ing panga Dios na king panga Tau na. E mo makanyan mu naman ing parasan tamo? Potang ing bie tamu, bie yang makayabe king Ginu, muli tamu naman king banwa kalupa ning Ginu. Potang king bie tamu, ikwa tamung a yari ing papagawa ning Ginu kekatamu, mipaligayan tamu naman kalupa ning kaligayan a mibie king Ginu. Oneng e mu kabud ligaya ing kaulian na ning Ginu tamu potang muli ya banwa king Ibpa. Potang kayabe na ne ing Ibpa, balu tamu at paniwalan tamu king ing sablang upaya keti yatu ampon banwa mibie na ngan kang Cristo. Nganang Jesus king mebasang ebanghelyo: “Uling dininan meng upayang sumakup karing sablang tau ban munie bie alang angga karing sablang binie mu keya” (v.2). Keni sasabian na ning Ginu king binie na ning Ibpa ing sablang upaya keya. Alang nanu pa man ing e na sasakupan. Inya ngening balu tamung atiu ne banwa ing Ginu a nukarin kayabe ne ing Ibpa, masaya tamu king atin tamung metung a mamagitan kekatamu a mitmung upaya. Atin tamung metung a kilalang kilala king banwa ampon malapit a tutu kekatamu a balu tamung manalangin ampon migaganaka para king kabilian tamu keti king yatu. King ebanghelyung dimdam tamu, ing panalangin na kekatamu ning Ginu. Iti metung yang panalangin a manibatan keng metung a migaganaka kekatamu. Ngana: “Ibpang banal, ingatan mu la king kapamilatan na ning upaya ning lagyu mu, ing lagyung binye mu kanaku ban maging metung la mu, antimo ikata metung kata mu.” (v.11)

E tamu masuelo ngening balu tamung ing Ginung kaluguran tamu mipaligayan ne banwa, at karin, mibie na ngan ing sablang upaya keya, at karin mu rin, panalangin na ka tamu at agganakan na ka tamu pa? E tamu dapat midinan maragul a lakas a lub king atin tamung kayabe king bie a e tutuknang manalangin para king kekatamung kapakanan? Atin tamung kayabe king pamibiebie tamu at mitmung upaya at sasakupan ne ngan ing yatu ampon ing meto sikluban? Nung makanyan, e tamu tatakut king bie. E tamu mimina lub. E tamu milalako pamag-asa. Ing Ginung mipaligayan banwa ing tatalan king palakad ning bie tamu at king bie ning mabilug a yatu. Uli na nita, mamag-asa tamung kayapan ngan ing magtagumpe ampon mibie kareng egana-ganang maniwala king Ginung mitas banwa.


IV. Pamigunam

Potang kaluguran me ing metung a tau, atiu mung atiu king isipan mu. Agyang ,alaut na ka, agyang marakal ka pa gagawan, iya pa mu rin ing isipan mu. Mas migaganaka ka pin potang ala yu king arapan mu. Makanyan ing tutung tanda ning lugud. Potang ala lu king arapan mu reng kaluguran mu, ot lalu tamung migaganaka para karela? Nung metung ka mong inda o tata a magobra Manila, at balu mung likuan meng manguku ing anak mu, e ka mipaindatun, Maus at maus ka siguradu at pakibaluan mu nung masalese ne ing likuan mung anak. At nung ikwa ng melagnat ning likuan mung anak, e na ka mipatudtud at e na ka mipakali king kabilianan na ning likuan mu. Ing pangaitas na banwa ning Ginu anti ya mu naman kaniti. King pangaitas na banwa, e na akwang mipaindatun ning Ginu kareng likuan ng talatuki. Pigaganakan no pa at panalangin na la. At balu tamu na ing Ginu, maragul ya kapigaganakan kekatamu uling kaluguran na ka tamung tutu. Ngening kayabe
na ne ing Ibpa, balu tamung e mamako kapigaganakan kekatamu uling kaluguran na ka tamu. King Ginung mitas banwa, atin tamung mamagitan pin a tutung migaganaka para kekatamu. Balu tamu king upaya a mibie king Ginu, gawan at gawan na ing balu ng makakayap kekatamu.


V.Pamanahimik

VI Tauling Panalangin

Ibpa, metagkil na ke naman king bie ning Ginung Jesus. Kaluguran na ka, inya tiparan na ngan ing pepagawa yu keya. Kaluguran ye, inya binie yu ing sablang upayang tutung kaya bayu ya pa melalang ing yatu. King pangaitas na banwa, pepakit na king e mu ikayu ing kaluguran na nune ikami mu naman ing kaluguran na. Ikit mi ing kapigaganakan na kekami at tutu nang pigagap king misanmetung ke sa kalupa ning pamisanmetung yu. Ngeni balu ming sisitsit no kekayu reng kabayatnan mi at kasakitan. Uli na niti, lalu kaming lalakas a lub uling ababalu yu, kapamilatan na, ing egana-ganang kapigaganakan mi. Mamag-asa kami uling mibie na ngan kaya ing sablang upaya. Puli na nita, alang nanu man ing malyaring salangsang king kaburian nang kayapan kekami. Salamat pu Ginu. Salamat. Amen.

VII. Kutang

1. Nanu mong kapigaganakan ing buri mung pasabi keng Ginu king Ibpa king pangaitas na banwa?

Download here:

Page 1: http://www.mediafire.com/file/933pl4gn0bclgno/06.05.11%20pg.%201.doc
Page 2: http://www.mediafire.com/file/g4p8c8pcbrybcgn/06.05.11%20pg.%202.doc

Kanam a Domingo ning Pamaniubling Mie ning Ginu

Ing Pangaku tungkul king Banal a Espiritu

I. Pamuklat a Panalangin

Ibpang mayupaya, pupurian da ka at pasalamatan pauli ning lugud yu kekami. King Ginu ming Jesus, ikit mi ing pigagap na kekaming e ke mag dili-dili keti keng yatu. Penandaman mi kaya ing kapigaganakan na kekaming e ke malilili potang mibalik neng pasibayu king banwa. Salamat pu Ginu king kekayung pamaglingap ampon kapigaganakan para kekami. Dapat mung ibie mi keka ing mabilug ming kapaniwalan at pamagtiwala uling balu mi king kekong pamanantabe, e ke malyaring mipaburen. Salamat Ginu. Salamat. Amen


II. Pamamasa

Juan 14:15-21

15“Nung kaluguran yu ku, pamintuan yu la ding utus ku. 16Maniawad ku king Ibpa at dinan na kayung talasaup a kayabe yu kapilan man. 17Ya ing Espiritu na ning katutuan a e atanggap ning yatu uling e ne akakit at e ne balu. Oneng balu ye uling akayabe at manuknangan ya kekayu. 18“E ra kayu lakuan dili-dili; mibalik ku kekayu. 19Saguli na mu at e na na ku akit ning yatu, oneng akit yu ku; uling mabie ku, ikayu man mie kayu. 20Abalu yu king aldong ita king atyu ku king Ibpa at ikayu atyu kayu kanaku, nung makananu kung atyu kekayu. 21“Ing tatanggap karing utus ku at tutupad kareti ya ing malugud kanaku. At luguran neng Ibpa ku itang malugud kanaku. Luguran ke at ipakilala ku keya ing kanakung sarili.”


III. Turu

Sasadya na katamu ning mebasang ebanghelyo king pamanyatang ning Espiritung Banal a manibatan king Ibpa. Kalupa ng Jesus, mituburan ya naman ing Espiritung Banal ban pakyabayan na katamu keti king yatu. I Jesus, kaybat ng sinubling mebie, pengakuanan no reng apostoles na king anyaran ne king Ibpa ing Espiritung Banal a maging talasaup da ampon kayabe kapilanman. I Jesus inyang sinubli yang minuli banwa, e na katamu likuan, e na katamu pepaburen. Pepadala ne ing Espiritu na ban mantabe kekatamu.

Ing tema ning ebanghelyu tamu dudurut ya king adwang bage: lugud ampon presensya. Masakit tamung aintindian ing lugud nung alang presensya. Makananu tayang a luguran ing metung a bage nung e ta ya man akakit, nung e ta ya akakayabe, nung e ta ya apakisabian. Marakal kareng pamilyang Pilipinu a ating tata o ima a atiu king aliwang bansa ban magobra, aintindian da nung makananu kasakit mantinian ing lugud a alang presensya. Uling marakal ta na “advance technology” ngeni, akakwa ta nong daramdaman ampon akakit reng taung malaut a maka abroad. Oneng agyampang makanyan na ing agagawa na ning technology, ala ya pa murin kapalit ing tune ng presensya ning metung a luluguran. Makanyan ya ing tune lugud. Potang kaluguran me ing metung a tau o metung a bage, buri mu kayabe myang kayabe. Buri mu akakit myang akakit. Buri mu atin kayu palaging oras ban panandaman yu ing presensya ning bawat metung. Ing Ginung Jesus, makanyan mu naman ing penandaman na. Uling kaluguran no reng apostoles na, e na man abug a isip a lakwan na la kabud at mipaburen la. Nganang Jesus karela: “e ra kayu lakuan dili-dili” (v.18). Uling ing lugud manintun yang presensya, binie ne ing Espiritu na kekatamu bilang presensya na kekatamu mangga na king kapupusan
ning panaun. Ing Espiritung Banal ya ing Espiritu ning Ginu. Pauli ning Espiritu, tutu ta yang akakayabe ing Ginung Jesus. Tutu yang atiu kekatamu ing presensya ning Ginung Jesus a mamantabe pa mu rin at magmalasakit pa mu rin. Inyang anang Jesus: “Abalu yu king aldong ita king atyu ku king Ibpa at ikayu atyu kayu kanaku, nung makananu kung atyu kekayu.”(v.20), sasabian na kekatamu king iya pa murin ing kayabe tamu king pusu tamu at itamu pa murin ing kayabe na king pusu na pauli ning Espiritung Banal. Pauli ning Espiritu a manuknangan king kekatamung pusu, tutu ta yang kayabe ing Ginung sinubling mebie a lulugud at mamantabe kekatamu. Ing Espiritung ini, e naka tamu ilili o lokuan uling iya ing Espiritu ning katutuan (v.17). Imulat na ka tamu ning Espiritu nung nanu ing dapat tamung gawan. At uling Espiritu ne ning Ginu ing manuknangan kekatamu, ing natural mung pagawa na kekatamu ila reng utus ning Ginung Jesus. Uling nung tutu tayang kaluguran ing Ginu, “pamintuan ta la ring utus na.” (v.15). Nung ing Espiritu ya ing tanda na ning lugud ning Ginung Jesus kekatamu at ing tanda na ning alang angga ng presensya king kekatamung bie, ing malinong tanda naman ning kekatamung lugud king Ginu ya ing kapamintuan tamu kareng utus a binie na kekatamu. Inya nung tutu tayang luluguran ing Ginu, e ta la kakalinguan reng utus na kekatamu. Maging tapat tamu kaya. At nung tapat ta kaya, siguradu mung maging tapat ya naman kekatamu at luguran na ka tamu at ipakilala ne ing sarili na kekatamu.: (v.21). E malaut ing Ginu kekatamu. Atiu kekatamu ing presensya na kapamilatan na ning Espiritu ng Banal. Kaluguran na ka tamu ning Ginu. Uling kaluguran na ka tamu, e na akwang lakwan na ka tamung mag dili-dili, inya tinubud ne ing Espiritu na. Pakit tamung kaluguran ta ya naman ing Ginu . Pamintuan ta la reng utus na at akit tamu na lalu tang mipalapit king Ginu at lalu neng pakilala ing sarili na kekatamu kapamilatan ning Espiritu ng Banal.


IV. Pamigunam

Itamung Pilipinu, buri ta lang dagul reng anak tamung gagawan do reng tiru ta karela. Maragul tutu ing lungkut tamu potang akakit tamung daragul lang e mapamintu. Istung e la mamintu reng anak tamu, balu tamung dagul lang e mayap ampon e ustu ing direksyun da king pamibiebie da. Oneng nung akakit tamung mapamintu la reng anak tamu, sasaya tamu uling balu tamung mayap ing ibunga ning pamibiebie da ring anak tamu potang dagul la. At kalupa na naman ning sinabi ning Ginung Jesus, metung ya kareng tanda ning metung a pengari ing kapamintuan ning anak king lugud na ning anak kaya. E makanyan ing anyaran ning Ginung Jesus kekatamo? “Nung kaluguran yu ku, pamintuan yu la ding utus ku.” (v.15).

Neng kai akakit ta la reng mangalating anak a manangis potang akakit da nong mamako king bale reng pengari da. Bisa lang tuki at e la bisang magpalakuan. At nanu ing gawan na ning metung a pengari potang akakit nang panangisan ne ning anak na ing pamaglako na? Sabian na ning pengari king anak na king iya e ne man talagang mabating nune magbalik ya murin king mapilan a penandit. E la makanyan mu naman reng dimdam tamu king ebanghelyu ngeni? E na ka tamu buring lakuan ning Ginu inya kapamilatan na ning Espiritu na, kayabe ta ya pa murin maglakbe king bie tamu king aldo-aldo.


V.Pamanahimik

VI Tauling Panalangin

Ibpa, salamat king kekong lugud at presensya. E yu buring magdili-dili kami keti keng yatu inya pepadala ye ing kekong Banal a Espiritu. E yu buring malilili at malilitu kami keng pamaglakbe mi keni king yatu, inya tinubud ye ing Espiritu ning katutuan. Salamat Ginu. Dinan yu keng grasyang pamintuan mi la reng kautusan yu ban ming a pakit kekayung tutung lulugud ke kekayu. Ini aduan mi kapamilatan ning Ginung Jesus a lulugud at mamantabe kekami. Amen.

VII. Kutang

1. Asabi tamung kaluguran tayang tutu ing Ginu uling pamintuan tala reng kautusan ning Ginu?

Download here:
Page 1: http://www.mediafire.com/file/lzwcjjfcv5appj4/05.29.11%20pg.%201.doc
Page 2: http://www.mediafire.com/file/yucb9hqkrgb9vbs/05.29.11%20pg.%202.doc

Kalimang Domingo ning Pamaniubling Mie ning Ginu

I Jesus Ya ing Dalan Papunta king Ibpa

I. Pamuklat a Panalangin

Ibpa, king lugud mu binie me kekami ing bugtung mung anak ban pakit na kekami ing dalan papunta keka. Pauli na e mi na akwang malili king dalan papunta keka. At pauli na ikit mi nung makananu mu kami tutung kaluguran. Dinan yu ke pung matatag a kasalpantayanan king kekong Anak ba mi ya pang lalung akilala at a luguran. Ini adwan mi kapamilatan na ning Anak yung Jesus. Amen


II. Pamamasa

Juan 14:1-12

Nganang sinabing Jesus kareka, “E kayu sukat mababalisa. Maniwala kayu king Dios at maniwala kayu naman kanaku. 2Ating dakal a kuartu king bale nang Ibpa ku. Nung e mu makanyan e ku sabia iti kekayu. Mako ku ban magsadiang lugal para kekayu. 3At nung miras naku at mekapagsadiang lugal para kekayu, mibalik kung pasibayu keti at tuki da kayu ban nung nu ku karin, karin kayu naman. 4At balu yu ne ing dalan papunta king pupuntalan ku.” 5Nganang Tomas, “Ginu, e mi man balu nung nu ka munta, makananu mi yang balu ing dalan?” 6Pekibat ng Jesus, “Aku ing dalan, ing katutuan, at ing bie. Alang malyaring miras king Ibpa nung e mu king kapamilatan ku. 7Nung balu yu ku, balu ya naman ing Ibpa. Manibat ngeni balu yu ne at ikit yu ne.” 8Sinabi nang Felipe, “Ginu, ipakit me kekami ing Ibpa at managyu na iti kekami.” 9Mekibat ya i Jesus, “Felipe, kalambat yu na kung kayabe e yu ku pa balu? Ing menakit kanaku ikit na ne ing Ibpa.” Bakit sinabi mung “Ipakit me kekami ing Ibpa?” 10E ka wari maniwala king atyu ku king Ibpa at ing Ibpa atyu kanaku? E la manibat kanaku ding amanung sasabian ku kekayu. Gagawan naning Ibpang atyu kanaku ing obra na. 11Maniwala kayu kanaku: atyu ku king Ibpa at atyu kanaku ing Ibpa. Nung e kayu bisang maniwala king sasabian ku, maniwala kayu king uli da ring dapat ku. 12Ing katutuan sasabian ku kekayu: ing maniwala kanaku makarapat ya naman karing dapat a daraptan ku, at maygit pa kareti uling munta ku king Ibpa.


III. Turu

Inyang miglahar Bacolor, mebura la king mapa reng kerakalan da reng barangay Bacolor. King metung a lalakad king Bacolor inyang kapanaunan a ita, akwa nang malili ampon malitu king pamaglakad na uling mengawala no ngan reng dalan, reng miyayaliwang tanda ampon posti a dapat mamie king ustung direksyun. Potang mawala la reng dalan, as na kasakit panintunan ing direksyun. Akwa mung dumurut at akwa mung miras nung nu ka megumpisa. Asne kaulaga kekatamu ing dalan ampon ing direksyun. Inya potang atiu ka king bunduk o king gubat nung nukarin alang bitasang dalan o posting sumabi king direksyun, akwa mung malili ampon makulung at e naka makalual king bunduk. Makanyan mu naman king dagat. Alang tanda king karagatan lalu na potang lalaut na ka. Reng seaman ngeni gagamit nong miyayaliwang instrumentus ban abalu da ing karelang posisyun keng dagat. Oneng nung ala ka kareni, masakit meng panintunan ing kabilian mu potang magdili-dili na ka keng dagat. Masakit tutung miras king pupuntalan mu potang ala kang dalan, potang ala kang direksyun.

King ebanghelyu tamu, papakilala neng Jesus ing sarili na bilang dalan tamu papunta king Ibpa. Iya kabud ing dalan papunta king Ibpa. Ala ng aliwa pang dalan. Inya nung aliwa i Jesus iyang gawan tamung dalan papunta king Ibpa, siguradu mung malili ta king dalan
tamu papunta king Ibpa. At nung ing bie tamu e ne akwang arasan ning Dios, karagul a pangalili ita! Inya reng taung lalaut king Dios, milalako la direksyun. Reng taung alang takut king Ginu mamupul lang pait ampon lungkut king bie. Nung i Jesus ya ing gawan tamung guiya king bie tamu, e tamu malili, e tamu manyayang oras, e tamu akwang dumurut at muli mu nung nu ta megumpisa. Keng kapaniwalan tamu king eganaganang sasabian ning Ginu, siguradu mung ustu ing maging parasan na ning bie tamu. Oneng e makanyan ing malilyari king bie tamu keni yatu. Marakal lang tutu ring dalan a akakit tamu king yatu. Reng aliwang dalan mangasanting la. Reng aliwa as no kalualas ampon ka kombinienti. Ing problema mu, e tamu balu nung nu la papunta rening dalan a reni. E ta makasiguradu nung nu da ka tamu idala reng miyayaliwang dalan a akakit ta king yatu ngeni. Oneng ing sasabian ng dalan Jesus, metung ya puntalan-papunta ya king Ibpa. At iya ing dalan a ita.

I Jesus ya ing dalan. Medyu obvious na melitu la reng apostoles ning Ginu inyang anyaran da kayang palto ne ing Ibpa karela. Oneng nilino nang Jesus ini inyang pekibat na kang Felipe inyang ngana: “E ka wari maniwala king atyu ku king Ibpa at ing Ibpa atyu kanaku?” (v.10) Nung tutukyan mu ing bawat sasabian ning Ginung Jesus, tutukyan mu nya naman ing kaburian ning Ibpa uling ala yang gagawan ing Ginung Jesus a e na balu at kaburian ning Ibpa. Buri ta yang aranasan ing lugud ning Ibpa? Ini abalu ta ne at penandaman ta ne king Ginung Jesus tamu. Kang Jesus, mibulalag ne ing pangatau ning Ibpa. Kang Jesus ikit ta na nung makananu ya lulugud ing Ibpa. Kang Jesus ikit ta na nung makananu ya kayap kekatamu ing Ibpa uling e ne ikwang pegkaimut ing sarili ng anak para king kaligtasan tamu. E tamu kakawani king Ginung Jesus. Pakiramdaman taya. Panaligan taya uling pauli na muli tamu king banwa nung nu ya manenaya kekatamu ing Ibpa.


IV. Pamigunam

Marakal kareng tau ngeni magugulu la isip nung nanu ing ustu ampon ing mali. Nanu kaya ing dapat dang paniwalan? Ninu kaya ing dapat dang paniwalan? Miyayaliwa no ngeni ring tau at bageng mamie solusyun kekatamu ban midinan pakibat reng miyayaliwa tang problema. Agyang king kekatamung kasalpantayanan, marakal nong tutu reng lalapit kekatamu a mamie miyayaliwang kapaniwalan. Marakal nong tutu reng sasabing ila reng tutung kapaniwalan, ila reng dapat tamung paniwalan. Oneng sumangid da rening marakal ampon magulung pamanamuyut king miyayaliwang kapaniwalan, e tamu dapat mababalisa o kakarug agyang marakal la rening manamuyut kekatamung lakwan tamu ing kekatamung kapaniwalan ngeni at pagpalit taya ing kasalpantayanan tamu. Itamung kawan ning mayap a pastul, metung ya ing bosis a tutukyan tamu. Metung ya ing siualang akikilala tamu a tutuldu kekatamu king dalan. Agyampang marakal lang tutu reng bosis at siuala a manimuyut kekatamung tukyan tala, metung ya ing bosis a kikilalanan tamu – yapin ya ing bosis ning Ginu. I Kristo ya ing katutuan, ya ing dalan, ya ing bie. Nung iya ing tutukyan tamu, ala tang kalili. E ta mibili king kapahamakan, e ta malili.
Ing kapaniwalan tamu at kapanaligan king Ginu iya ing sala a mamie direksyun king kekatamung pamibiebie. King salang bibie na, milalako ngan ing egana-ganang dalumdum a makagulu king kekatamung isip. Ing katutuan na ning Ginu ya ing katutuan a e malyaring manlinlang at manloku kekatamu. Inya, manalig tamu kaya. King kekatamung kapanaligan at kasalpantayanan king Ginu, milako ngan ing pamangabalisa tamu uling balu tamu king ing kapaniwalan at kasalpantayanan ta kaya e ta malyaring magkamali, e ta malili, e ta magulu isip. I Jesus ya ing dalan papunta king Ibpa. Maniwala tamu kaya.


V.Pamanahimik

VI Tauling Panalangin

Ginung Dios, king mayap mung anak a I Jesus, akakit mi ya ing lugud ning lupa yu. Akakit mi ing kababan yu ampon ing pamagpasensya yu kekaming madalas e makaintindi ampon e mamintu karing kaburian yu para kekami. Manintun keng miyayaliwang paralan ban dasnan mi ing kabanalan yu. Ngeni pala, king dalan pepakit ning Anak yu, arasnan mi ing kabanalan a manibat mu kekayu. Saupan yu ke pung maniwala at manatili king Anak yu ban e mi akwang malili ampon malilitu king dalan papunta keka. Amen.


VII. Kutang

1. Nung i Kristo iyang dalan tamu, pipilian taya ing paralan na? King makananung paralan?

Download here:
Page 1: http://www.mediafire.com/file/4a4n0bjmnue2gdl/05.22.11%20pg.%201.doc
Page 2: http://www.mediafire.com/file/oyrou5gyv0a965o/05.22.11%20pg.%202.doc

Kapat a Domingo ning Pamaniubling Mie ning Ginu

I Jesus Ya ing Mayap a Pastul

I. Pamuklat a Panalangin

Ibpa, pupurian daka at pasalamatan uling dininan yukeng mayap a pastul. I Jesus iyang binye yung pastul kekami ban manantabe kekami king pamaglakbe mi keni king yatu. Iya ing pastul ming e tatakut midaun king sarili ng bie ban miligtas kekami king nanu mang e mayap. Pauli na, balu ming e ke mipaburen, e ke malilili at e ke mibili king nanu mang kapahamakan. King pamaglingap na kekami ning mayap a pastul, maging panatag ke lub ampon milalako ke takut kareng bage e mi balung arapan ampon dinan solusyon. Salamat pu Ginu. Salamat pu king kekong pamaglingap. Amen.

II. Pamamasa

Juan 10:1-10

“Ing katutuan sasabyan ku kekayu: ing lulub king kural da reng tupa a e daralan king pasbul, nune king aliwang paralan, ing taung ita mapanako ya at tulisan. 2Oneng ing lulub king pasbul, ya ing pastul da reng tupa. 3Ya ing bubuklatanan na ning bante pasbul. Pakiramdaman da ring tupa ing siwala na kabang ausan na la king lagyu ra at panimunan na la king paglual da. 4At nung alual na nala ngan, manimuna ya karela at tukyan de ring tupa uling balu re ing siwala na. 5Oneng e re tukian aliwang tau, nune takasan de uling e re balu siwala ing aliwang tau.” 6Sinabi neng Jesus iting talimhaga karela, oneng e ra aintindian ing buri ng sabian. 7Inya pasibayu ng sinabi ng Jesus karela, Ing katutuan sasabian ku kekayu: Aku ing pasbul na ning kural da ring tupa. 8Mapanako la at tulisan ding sablang dinatang a makauna kanaku, oneng ding tupa e da la pekiramdaman. 9Aku ing pasbul. Miligtas ya ing ninu mang lungub king kapamilatan ku. Malaya yang lungub at lual at makatagpu yang pastulan. 10Daratang ya ing mapanako ba ya mung manako, makamate at manyira. Dinatang ku ba lang mika bie-bie a labis-labis.


III. Turu

King kapat a domingu ning pangasubling mebie, ing atensyun ning ebanghelyu ngeni makarikil ya king mayap a pastul. Sasabian na ning Ginu na iya ing mayap a pastul. Papastulan no reng kawan a tutung keya. E tamu magkasakit paki intindian ini uling sane tamung manakit a mamastul king kekatamung lugar. Nung e man tupa ing papastulan da, siguru kambing la o aliwa pang animalis. Ing pastul pantun nong pamangan ring papastulan na. Dala no reng sese na nung nukarin ating pamangan ampon a inum. Makanyan ya naman ing amanuan ning mayap tang Ginu inyang sabian na iya ing mayap a pastul. Itamung sisesen na, balu tamung e tamu mipaburen at e ta mu muli king danup at mibili king nanu mang kapahamakan nung ing Ginu iyang mamastul kekatamu. Nung sasabyan na kekatamu ning Ginu ini, dapat tamung maniwala. Uling ing metung a tanda na kayabe tamu king kawan a papastulan na ning Ginu ya ing kapasidad tamung “akilala” taya ing bosis ning pastul tamu. Nganang Jesus “tukian de ring tupa (ing pastul) uling balu re ing siwala na.” (v.4). Pauli na niting pangakilala da reng tupa king bosis ning pastul, “e re tukian ing aliwang tau, nune takasan de uling e re balu siwala ing aliwang tau.” (v.5). Akikilala ta ya kaya ing bosis ning Ginu? Pota kayang kulait ya kekatamu, akwa ta ya pang pakiramdaman? O pota naman reng bosis da reng aliwa
ilang tutukyan tamu? “Pakiramdaman da ring tupa ing siwala na…” (v. 3). Ing bosis ning pastul ya ing bosis ning kaligtasan ampon kapakanan tamu. Oneng tukyan ta ya mu nung akilala ta ya bosis. Atukian ta ya ing panaus ning pastul nung akilala taya ing aus na. Kekatamung papastulan na ning Ginu, ing aus na ing mamie direksyun kekatamu at iyang babalangkas nung nukarin na katamu buring dala. Uling maragul ing tiwala tamu king e na ka tamu ilili ampon akwang paglokuan ning Ginu, importanti kekatamu king mabilug at buu ya ing kapaniwalan ta kaya. King kapanaunan ning Ginu king Israel kanita, ring egana-ganang tupa da ring metung a baryu kukulung do ngan king metung mung kural. Karin, abe-abe la ngan reng tupa da reng miyayaliwang pastul. Karin king metung a kural, samut-samut lang alang “name tag”, alang marka o serial number o nanu mang tanda ning bandi. Oneng potang atin datang a metung a pastul ning baryu ban kuanan no reng tupa na king kural a iti, kawani la reng tupa na agyang makasamut la kareng aliwang e na tupa, uli na ping akikilala de bosis ing pastul da. Ing bosis ning pastul da iyang tutukyan da uling balu da ala lang kalili nung ita iyang tukyan da. Siguru ngening domingung iti, pigunaman tamu nung tutu tayang akikilala ing bosis ning Ginu. Nung tutu tayang paniwalan ampon buu ing kekatamung kasalpantayanan kaya at nung alang takut tayang tutukyan ing bosis na potang ausan na ka tamu agyampang makasamut tamu king magulu ampon mangye kural ning yatu. Kilalanan taya ing siwala ning Ginu ban e ta malili ampon mawawala.


IV. Pamigunam

Potang tutung kaluguran mu ne ing metung a tau, ing egana-ganang aspetu ning pangatau na balu mu na at akikilala mu agyang ala yu o e me akakit. Anti mo kareng inda a atin sesesen a bingut. Potang kumyak ya ing baby da, balu da nung kiyak da ring baby da, kiyak yang danup, saket o, mabasang diaper. Aliwa ya ing kiyak ning bingut pota kanung daranup ya. At aliwa ne man ing siuala na potang atin yang sakit. Uling malalam na ing kebaluan na ning inda king kaluguran ng baby, aintindyan na kaagad ing kabaldugan ning bawat gaga na ampon kimut na. Neng kai king metung a pamilya, agyang e la misasabi ring mi inda o mi tata, balu da nung atin lang bibitbitan a problema deng kapamilya da o ali, uling makanyan napin kalalam ing pamikilala da king bawat metung. Ing lugud tamu king bawat metung ya ing mamie kebaluan kekatamu. Mengari ya mo ing mayap tang pastul inyang ngana: “Balu ku la bosis ding tupa ku at balu da ku bosis. Ausan ku la karing lagiu da.’ Ing lugud ya ing mamie kekatamung malalam a pamangilala king Ginu. Nung tutu tayang kaluguran ing Ginu, e masakit kekatamung a balu nung ining bageng ini
kaburian ne ning Ginu o ali. Nung tutu tayang luluguran ing Ginu, e masakit kekatamung tukyan tamu ing pamanaus na kekatamu. Luguran ta ya ing Ginu. Ibie tamu ing buu at mabilug tamung tiwala kaya potang atin yang panyaus. Munta tamu nung nu taya daramdaman ing bosis ning mamaus kekatamu.


V.Pamanahimik

VI Tauling Panalangin

Ibpa ming malugud, king pamanantabe ning mayap ming pastul, mididinan keng kapanatagan lub. Iya ing mayap ming pastul a tutung mimisip para king kapakanan mi, Pauli na, milalako ke takut ampon karug lalu na karetang kabayatnan mi king bieng e mi balung arapan. Pauli na, mididinan keng pamag-asang mikabus kami kareng egana-ganang e mayap a malilyari kekami. Uling iya ing pasbul, e na paburen luban da kami deng taung e mayap a dapat king kekaming bie. Salamat pu Ginu. Salamat. Amen


VII. Kutang

1. Pota kayang kulaitan na ka tamu ning Ginu, akilala taya pa kaya ing bosis na?

Download here:
Page 1: http://www.mediafire.com/file/iyijfij9oah65wy/05.15.11pg.%201.doc
Page 2: http://www.mediafire.com/file/o5ejzviph37o7fs/05.15.11%20pg.%202.doc

Katlung Domingo ning Pamaniubling Mie ning Ginu

Ing Pamaglakad Papunta Emaus

I. Pamuklat a Panalangin

Ibpang mayap, king pangasubling mebie ning anak mu, gewa mya namang mabie ing presensya na kekami, gewa meng kayabe mi king pamaglakad mi king bie a mitmung kabayatnan at pangabalisa. Pasiknangan yo ring pusu mi potang mimina ke lub. Abayanan yu kami lalu na potang daralumdum na at akakit ming masasaul ing kapanaligan mi keka. E yu ke paburen Ginu. E mu ke lalakwan. Amen

II. Pamamasa

Lucas 24: 13-35

13King aldo mu ring ita, ding adua karing alagad papunta la king baryung ausan dang Emaus; atin yang labing metung a kilometru dayu manibat Jeruselam. 14Pipagsalitan da ing sablang bage milyari. 15Kabang mipagsalita la at mikukutnanan, linapit ya i Jesus at mekiyagnan ya karela. 16Ikit de, oneng e re bitasang akilala. 17Kitnan na lang Jesus, Nanu ing pipagsalitan yu kabang lalakad kayu?” Tinuknang la; mitmu lang lungkut. 18Ngana kang Jesus ning metung a milagyuan Cleopas, “Ikayu na mung dili karing manuknangan Jerusalem ing e maki balu karing bage a kaybat-ibat pa mung mepalyari karin? 19Nganang kinutang, “Nanung bage?” Pekibat da, “Ding bage mepalyari kang Jesus ning Nazaret, ing propetang mayupaya king dapat at amanu king arapan na ning Dios at ding sablang tau. 20Dinemanda re ding kekaming pekapun ding pari at ding makatua na ning balen ban miyatulan kamatayan at pepapaku re king krus. 21Ya pa naman ing asahan ming magligtas king Israel! Subali pa kanita, iti ya na ing katlung aldo manibat inyang milyari ita. 22Mebigla kami king belita da ring mapilan a babaing kayabe mi. Minta la kanu king kutkutan nanding abak a maranun 23at e re disnan ing bangke na. Migbalik la at sasabian da king menakit la kanung anghel a sinabi karela king mabie ya i Jesus. 24Minta la naman king kutkutan ding mapilan a kayabe mi at makanyan pin ing disnan da; oneng e ria naman ikit i Jesus.” 25Kanita sinabi nang Jesus karela, “Kapurul yu naman a isip! Angga ngeni e yu pa paniwalan ing sablang inula da ring propeta?” 26E wari kailangan king i Cristo dumalan ya king sablang bage iti bayu ya lungub king Kayarian na?” 27At selese nang Jesus karela ing masasabi karing sablang kasulatan tungkul keya, manibat karing libru nang Moises at karing Kasulatan da ring sablang propeta. 28Miraras na la king baryung karelang pupuntalan at pepawaga nang Jesus king isundu na pa ing pamaglakad. 29Oneng pinigil de. “Ngara, “Tuki na kayu pa mu kekami, lalbug ne ing aldo at daralumdum na.” Inya tinuki yang sinalangi karela. 30Inyang kasulu da ne king pamangan, kinangwa yang tinape at pepasalamat ya king Dios; at pemirasu ne ing tinape at binie ne karela. 31Mibuklat la mata at akilala ra king ya pala i Jesus, oneng bigla yang mewala king panimanman da. 32Ngara king metung at metung, “Inya pala balamu milalablab kata pusu kabang pakisabian na kata king dalan at lilinawan na la kekata ding kasulatan!” 33Kanita mu rin linakad la at migbalik Jerusalem . Disnan da lang makatipun ding labing metung at ding aliwa pang kayabe ra 34a sasabing, “Tutu ya ping sinubling mebie ing Ginu! Pepakit ya kang Simon! 35Belita da ring adua katau ing milyari kabang dalan at nung makananu reng akilala ing Ginu inyang pemirasu ne ing tinape.

III. Turu

King dimdam tamung mebasang ebanghelyu, papakit na pa mu rin ing pamagkasakit da ring mumunang disipulos ng Jesus paki-intindian de ing pangasubling mebie ning Ginu. At emu ita. Karing adwang disipulos papunta Emaus, e mu pamagduda king pangasubling mebie ning Ginu ing kikimkiman da nune pati na ing pangabigu da king Ginung panaligan dang magligtas king balen ning Israel (v.21). Peniwalan de i Jesus. Ding amanu na at dapat na ilang ikit dang magdalang pamag-asa e mu karela nune king mabilug a balen. Keni tamu aintindian ing sasabian ning ebanghelyo na tutu lang malungkut reng adwa inyang disnan no ning Ginu (v.17). Milako la pamag-asa, mimina no lub. Pauli na nita, malungkut la ampon magugulu isip nung nanu talaga ing gawan da at nung atin pang kabaldugan ing
karelang kapaniwalan. Maralas, itamu naman atiu ta kening anti kanining sitwasyun. Milalako tamu mu naman pamag-asa lalu na potang ala ta nang akarapat at mumuli mu king pangabigu ing asahan tamung mamie tagumpe ampong saya king kekatamung bie. Oneng ing malugud a Ginu, e no pepaburen mibili king sitwasyun a ini. Kabang lalakad la, tikyan na la at pekyabayan na la. Kabang kayabe na la pekibaluan na nanu ing kakalungkut da. Mekipag-“dialogue” ya karela. (King B.E.C. at ne kaulaga ing dialogue king pamagbuu ning buklud). Ikit na siguru ning Guinu ing lalam ning sugat ning pangabigu da inya ikwa nong apasaya ampon apalablab pusu (v. 32) kapamilatan da reng amanu na kabang maglakad la. Makanyan ya ing Ginu. Potang tutung malalam ing kekatamung pangabigu at mabayat ing lungkut tamu, Karin ta ya asahan antabayanan na katamu. Datangan na katamu uling e na paburen manatili tamu king kabayatnan na ning lungkut tamu. At uling sigurung apasaya no ning Ginu karing amanu na kabang lalakad la, meg “special request” la rugu kaya king e ya pa mamako. Inya sinabi da kaya: “Tuki na kayu pa mu kekami, lalbug ne ing aldo at daralumdum na.” (v.29) Ing makatula mu inyang kayabe de king dalan, e de awangisan. Ikwa dyang awangisan at akilala inyang “kinangwa yang tinape at pepasalamat ya king Dios; at pemirasu ne ing tinape at binie ne karela” (v.30) Kareng ebanghelyu, potang akakit tan eng “kukuang tinape, papasalamat, mamirasu ampon mamie tinape” i Jesus, yapin ya ing tanda tamu king ing gagawan na ya ing “Eukaristiya”. Anti ya mo king misa tamu potang ing pari kuanan ne ing tinape, pasalamat y, pirasuan ne at kaybat ibie ne kekatamu. Makanyan nmu naman ing gewa ning ginu arapan da. At sasabian ning ebanghelyo na pauli na niti, Karin de pa awangisan at tutung akilala na iya pin ing Ginung sinubling mebie. (v. 31)

Mabie ya ing Ginu. E ta ne panintunan. Atiu ya mismu king busal tamu lalu na potang dadanas tamung mabayat a kapagsubukan, potang milalako ta na pamag-asa at potang magugulu tamu isip. Atiu ya, kayabe ta yang maglakbe king dalan ning bie tamu king aldo-aldo. At lalu neng atiu potang miyabe-abe tamu king Santa Misa nung nukarin ne dadake ing sarili ng bie bilang sikanan at lakas tamu at tanda ning keyang alang patnang pamanantabe king bie tamu. Alang nanung problema o pangabigu ing malyaring mikawani kekatamu king malugud a Ginung maglakbe kayabe tamu.


IV. Pamigunam

Itamu ngan, miraras tamu paminsan-minsan king bie a nung nukarin mimina ta lub lalu na potang marakal ta gaganakan at marakal ta problemang kakargan. Agyang neng minsan, akakalingwan tamu keng atin tamung kasalpantayan a sasabi kekatamu king e na katamu paburen ning Ginu. King mebasang Ebanghelyu, anti mu naman kaniti ing panandaman da reng adwang disipulus ning Guinu at pepasala no karela ing amanu ning Dios. Pauli ning presensya ning Ginu, mebating ing kabayatnan dang panandaman. Kailangan mu pala king problema da, ing presensya ning Ginu. Makanyan mu naman kekatamu. Agkatan na ka tamu ning Ginu na manatili king presensya na. E ne man mamako, e na ka tamu lalakwan, e na ka tamu papaburen. King presensya ning Ginu, midinan sala ing kekatamung dalumdum, mikalino ing kaguluan ning isip at mika kapanatagan ing pilubluban tamung e mipakali kareng daralan ta mung kabayatnan. King presensya ning Ginu, panaligan tamu king ing sarili na iyang ibie na para kekatamu ban misubling pasibayu ing lakas at tibe ning kekatamung kasalpantayan. E tamu tatabili king talan tamu king Ginu. Agyang kapilanman e na paburen magdili-dili tamu lalu na nung marakal ta isipan problema at mimina ta lub. Manalig ta kaya, atiu ya kayabe tamung maglakbe king aldo-aldo.


V.Pamanahimik

VI Tauling Panalangin

Ginung Jesus, binuklat yo reng isip me. Biklat yo reng mata mi uling malino mi nang akakit ing kekang presensya busal mi. Ika ing kayabe ming maglakbe king dalan ming lalakaran aldo-aldo. Ika ing makiramdam karing problema mi at miyayaliwang pigagap a maralas mumuli king pangabigu ampon pangabalisa. Palablaban yo reng pusu mi kareng Amanu yu sumangid ning kakargan ming kabayatnan. Kalupa ning gewa yu kareng disipulus yu papunta Emaus, pasiknangan yu ke lub ban e ke mimina kapanaligan at kapaniwalan keka. E yu ke pu lalakwan. E yu ke paburen malilili king dalumdum ning dalan mi. Ginung sinubling mebie, pasikanan yu ke lub king kekang amanu at presensya. Amen


VII. Kutang

1. Paniwalan tamung kayabe ta yang maglakbe ing Ginu king bie tamu lalu na potang kakabayatnan ta king bie?

Download here:
Page 1: http://www.mediafire.com/file/6b4phumvs47z44p/05.08.11%20pg.%201.doc
Page 2: http://www.mediafire.com/file/d3ohc935uw6c13j/05.08.11%20pg.%202.doc

Kadwang Domingo ning Pamaniubling Mie ning Ginu

Pepakit Ya i Jesus karing Alagad Na
I. Pamuklat a Panalangin

Iba, pasalamat ke pu ngeni uling binie ye kekami ing Banal a Espiritu. King pangabie na kekami ning Espiritu ning katutuan, mibait ya ing Santa Iglesia. Kapamilatan na ning Espiritu yu, e ke migaganakang malili uling balu ming antabayanan na kami king katutuan. Kapamilatan na, lalu mi yang akikilala ing Ginung Jesus a mitas banwa at makalukluk ngeni king wanan yu. Pauli na, mabibiasa keng mangadi keka ampon manalangin lalu na potang mamagkasakit ke king bie mi. Busni yo pu reng pusu mi ban miyang a tanggap ing kekong Banal a Espiritu a magpabanal kareng talatuki ning Ginung Jesus. Amen.

II. Pamamasa

Juan 20: 19-31

19Kanitang bengi na ning aldo mu ring ita, mitipun la ding alagad. Pakasara la ding pasbul king lugal nung nu la makatipun uli na ning takut da karing Judio. Dinatang ya i Jesus at tinalakad ya libutad da. Ngana karela, “Kapayapan keko ngan.” 20 Pangasabi na niti, pepakit na la karela ding gamat na at ing katalindikan na. Mesaya la ding alagad panakit da king Ginu. 21 Pasibayu nang sinabing Jesus karela, “Kapayapan keko ngan. Nung makananu na kung tinubud ning Ibpa, makanyan da kayu namang tutubud.” 22 Pangasabi na niti, pengisnawanan na la at sinabi na, “Tanggapan ye ing Banal a Espiritu. 23Nung patawaran yu la ding kasalanan na ning ninuman, mipatawaran la; ing e yu patawaran e ya mipatawaran.” 24Oneng i Tomas (ing mayayaus Kambal), ing metung karing labing adua, alayu inyang dinatang ya i Jesus. 25Inya sinabi da ring aliwang alagad kang Tomas, “Ikit mi ya ing Ginu!” Nganang mekibat Tomas, “E ku maniwala anggang e ku la akit ding bakas ding paku karing gamat na at itagkil ing taliri ku king bakas da ring paku at ing gamat ku king katalindikingan na.” 26Pangalabas da ring walung aldo, makatipun lang pasibayu ding alagad king bale at kayabe re i Tomas. Makasara la ding pasbul, oneng linub ya i Jesus at tinalakad ya libutad da. Nganang Jesus karela, “Kapayapan keko ngan.” 27At saka na sinabi kang Tomas, “Lawen mu la deng gamat ku at itagkil me keni ing taliri mu. Dala me keni ing gamat mu at itagkil me king katalindikingan ku. E na ka mag-alinlangan, maniwala na ka!” 28Mekibat ya i Tomas, “Ginu ko at Dios ko!” 29Nganang Jesus kang Tomas, “maniwala na ka uling ikit mu ko? Mapalad la deng maniwala kanaku agyamang e ra ku ikit!” 30Ginawa yang dakal at miyayaliwa pang milagru i Jesus king akakit da ring alagad na, oneng e la makasulat keting libru. 31Misulat la ding atsu keting libru ban maniwala kayu king i Jesus ya ing Cristo, ing Anak ning Dios at king pamaniwala yu mika bie kayu king kapamilatan na.


III. Turu

Mapilan pa mung domingo ing milabas inyang pakisabian nong Jesus reng apostoles na at pengaku na karela king itubud ne ing Banal a Espiritu karela ban akayabe de. Ing tutubud ng Espiritu ya ing Espiritu ning katutuan. King mebasang ebanghelhyu, bibie na ne ning Ginu ing pengaku nang Espiritu. King ebanghelyu ng Juan, ing Ginung sinubling mebie iyang mibibie karela king Banal a Espiritu inyang “pengisnawanan” no reng apostoles na. “Tanggapan ye ing Espiritu”, ngana karela, at inyang sinabi na iti, “pengisnawanan” na la.

Ing sinulat king ebanghelyung mebasa papakit na king ing Banal a Espiritu menibatan ya mismu king Ginung sinubling mebie. Menibatan ya king pangisnawa na. Metung yang paralan ini ban neng atimid kekatamu ning sinulat king ebanghelyu na ing Espiritu yapin tutu ing Espiritu ning Ginung Jesus a sinubling mebie. Pengaku ne karela ing Espiritu at ngeni binie ne karela. Obat mo “pangisnawa” ya pa mu ing paralan ng ginamit ning Ginu ban apakit nang mibie ne karela ing Banal a Espiritu? Nung mibalik ta king mumuna ng libru ning Biblia, ing Genesis, akit ta karin king ing Dios, inyang lelangan ne ing tau, kinangwa yang gabun at pinorma ne I Adan. Kaybat na nita, “pengisnawanan” ne I Adan ban midinan yang bie. Uling pengisnawanan ne, midinan yang bie I Adan. Makaniti ya naman ing buri ng pakit kekatamu ning sinulat king ebanghelyu tamu ngeni. I Jesus, pengisnawanan no ring apostoles na. Kapamilatan na niting pangisnawang iti, midinan la naman “bie” ring apostoles. At nanu ing mibait at midinan “bie” inyang pengisnawanan no ning Ginu reng apostoles na? Nung i Adan midinan yang bie kapamilatan ning pangisnawa ning Dios, ing
Santa Iglesia iyang midinan bie inyang pengisnawanan no ning Ginu ring apostoles na. King pangabie ning Espiritu karela, mibait ya ing Santa Iglesia. Inyang binie na ne ing Espiritung Banal kareng apostoles, karin ne mibait ing ausan tamung Santa Iglesia. Ing Santa Iglesia ya ing balayan a mebuu pauli ng Kristo. At ninu ing balayan a iti? Itamu. Itamu ing balayan ning Ginu a mitipun at ausan tamung Santa Iglesia. Kening pamitipun da reng sasalpantaya king Dios, mibie ya ing Banal a Espiritu ban mantabe karela mangga na king kapupusan ning yatu. At uling ing Banal a Espiritu ya ing Espiritu ning Ginu, balu tamu king antabayanan na katamu ning Espiritu nung makananu na nakatamung antabayanan ning Ginung malugud.

Kapamilatan na ning Banal a Espiritu, e ya malili ing Santa Iglesia. Dinatang na ing marakal at mangaragul a kapagsubukan king Santa Iglesia, oneng agyampang nanung pamagkasakit ing denasan na ning Santa Iglesia, linual yang megtagumpe, kalupa ning Ginung sinubling mebie. Uling ing Espiritung mamantabe king Iglesia ya ing Espiritu ning katutuan, maniwala

tamu at sasalpantaya tamu king e ya turung marok o nanu mang kamalian ing Santa Iglesia. Manibatan kening iglesia tamu ing katutuan, kayapan at tutung bie. E na buring sabian niti king e no magkamali ding miyembru ning Santa Iglesia. Uling tau tamu ngan, magkamali tamu naman. Mikakasala tamu naman agyampang miyembru tamu at kayabe tamu king iglesiang iti. Potang sasabian tamung e na ka tamu ilili o lokuan ning Santa Iglesia, ing buri tamung sabian keni, king ing Santa Iglesia, e ya turung karokan. E ya turung maling kapaniwalan. E ya turung salungat king katuruan ning Ginung Jesus. Kareng bageng makapatungkul king kasalpantayanan tamu at pamanugali, (ausan dang faith and morals king inglis), makasiguradu tamung e ya magkamali ing Santa Iglesia. At uli na pin antabayanan ne ning Espiritu ning katutuan ing Santa Iglesia, e ya migaganakang binie ning Ginu ing upayang mamatawad ampon e mamatawad kasalanan. Memie yang upaya keng Iglesia ban itali no reng dapat itali na, at upayang lako no king pangatali reng dapat milako king pangatali. Makanini ya ka sigurado ing Ginu king iglesia na e ya magkamali uling ing mamantabe pin keya ya ing Banal a Espiritu. Mangadi ta king Banal a Espiritu. Uling Espiritu ne ning Ginu, anyaran tamu kayang lalu tayang akilala ing Ginu ban mipalapit tamu kaya. Anyaran tamu king dinan na katamung lakas ban tukyan ta ya ing Ginung Jesus lalu na king oras ning kasakitan o nanu mang tuksu. Anyaran tamu king Banal a Espiritu king antabayanan na katamu king bie ban e ta malili. Lalung lalu na, anyaran tamu king Espiritung Banal king palablaban na ka tamu pusu ban tutung lugud ing miral king bie ning bawat miyembru ning Santa Iglesia.

IV. Pamigunam

Ing Santa Iglesia maglakbe ya keti king yatu. Ala yu pa king keyang destinasyun a yapin ing banwa. Itamung kayabe king Iglesia ning Ginu, miyabe-abe tamung maglakbe. Kabang maglakbe tamu, kayabe ta ya ing Ginung sinubling mebie, at kayabe ta ya ing Espiritu ng Banal a mamanatabe kekatamu king dalan ning katutuan, king dalan ning kabanalan. Ing Banal a Espiritu ning Ginu yang magpabanal kekatamu, iya ing bibie sikanan kekatamu potang mimina ya ing kasalpantayanan tamu. Iya ing lugud ning Ginu a mibulus na kekatamung pusu. Iya ing tanda ning alang anggang lugud ning Ibpa ampon ning Anak. Iya ing binie ning Guinung Jesus ban kayabe tamu at ban e tamu mag dili-dili. Pauli ning Banal a Espiritu, ing pisamban maging yang anti mong metung a inda. Ing pisamban iyang ausan tamung inda. Pauli na mibait tamu king bayung bie ning Espiritu kapamilatan ning binyag tamu. At uling metung yang inda, e na buring dagul tamung e mayap. Turu na wari ning metung a inda ing e ustu king anak na? Ibili ne ning metung a inda king kapahamakan ing kayang anak? At potang magkamali ya ing anak na, ing munang sasaup yapin ya ing inda na. Pota e makiramdam ing anak at maging pasaway ya ing anak, ing mangargang mabayat a kalungkutan yapin
ya ing inda. Kekatamung Pilipinu, as ne kaulaga ing inda. Ing santa iglesia tamu ausan ne ing sarili na bilang metung a inda a lilingap at mamantabe kareng anak na. Makanyan ya naman ing Espiritung Banal. Anti ya mong metung a inda ing Banal a Espiritu. Antabayanan na ka tamu ngan. E na katamu buring malili at pasiknangan na ka tamu ngan king pamaglakbe tamu papunta banwa.


V.Pamanahimik

VI Tauling Panalangin

Ibpa, Salamat pu king tiburan yung Espiritu Santo. Iya ing lakas da reng mimina, ing sala para kareng atiu king karalumduman. Iya ing mamie kabiasnan kareng e makaintindi. Iya ing kapayapan da reng magugulu, ing mamie katatagan karing karugkarug. Iya ing lugud ning Dios karing taung mayap a pilubluban. Iya ing katahimikan da ring e mipaindatun. Iya ing maghilum at magpakayap kareng sugat mi king bie. Iya ing kapatawaran a panandaman mi potang sisisi kami. Iya ing saya mi potang atiu ke king grasya. Iya ing sasaup potang mibabayatnan kami at ing lugud a panandaman mi kapilanman. Ginung Dios, Salamat pu. Salamat pu king kekong alang anggang lugud kekami a pepakit yu kekami kapamilatan ning Espiritu Santo. Amen.
.

VII. Kutang

1. Kapilan ke mo penandaman ing presensya ning Espiritu Santo king bie ku?

Download here:
Page 1: http://www.mediafire.com/file/7led1xz4gjtg64n/05.01.11%20pg.%201.doc
Page 2: http://www.mediafire.com/file/lb601vs4dnfpdps/05.01.11%20pg.%202.doc