Kadwang pulu’t metung a Domingu ning Ordinaryung Panaun

Ing Makiput a Pasbul

I. Pamuklat a Panalangin Ibpa, buri mi pung lumalam pa ing kekaming kasalpantayanan. Pabustan yu pung king kaorasan ing sopan na kami ning kekang Banal a Espiritu ban mas lalu mi yang aytindyan ing mayap a balita. Anyaran mi pu ini king lagyu ning kekang Anak, I Jesus. Amen.

II. Pamamasa

Lucas 13:22-30

22Sindu nang Jesus ing pamaglakad na. Tuturu ya karing balang balen at baryung daralanan nang papunta Jerusalem. 23Ngana ning metung a kinutang kang Jesus, “Ginu, ditak la mu ding taung miligtas?” Pekibat nang Jesus, 24“Pagpilitan yung milub king makiput a pasbul. Sasabian ku kekayu, dakal la ding bisang lungub oneng e la milub. 25Kabud sera ne ning manibala king pibalebale, mibata kayung makatalakad king lual at katuk na kayung katuk. Sabian yu, ‘Ginu, paluban yu kami!’ Ipakibat na kekayu, ‘E ra kayu balu penibatan!’ 26At sabian yu, ‘Kesulu mu kaming mengan at mininum at tinuru ka karin balen mi!’ 27At sabian nang pasibayu kekayu, ‘E ku balu nung nu kayu tau! Dumayu kayu kanaku, ikayung sablang marawak a dapat!’ 28Tumangis kayu at mitigis a ipan kabud akit yung atyu la king Kayarian ning Dios di Abraham, Isaac, Jacob, at ding sablang propeta, oneng ikayu naman mitabi kayu. 29At datang la ding tau ibat king aslagan at king albugan, king norti at king mauli, at lukluk la king lamesa king Kayarian ning Dios. 30Kanita ating miyuna karing makatauli ngeni, at ating mitauli karing makauna ngeni.”

III. Turu

Ing metung a mayap a pastul, gawa yang pasbul ning kwebang kulungan para kareng kayang papastulan a tupa. Uling tutu nong lilingapan at kaluguran deng kayang sese, ing gawan ng pasbul itang maskup ban kanita potang lungub la alawe nong tunggal-tunggal nung ating mepile o kaya mesugat. At potang kumpletu nala, ing mayap a pastul e mako king kabukas king gewa ng maskup a pasbul. King mismung pasbul karin ya matudtud o kaya paynawa. Yang maging pasbul dareng tupa ban ninu man ing bisang manako o kaya makamate dumalan ya pa king mayap a pastul. King ebanghelyu, ating metung a mengutang king Ginu tang Jesu Kristo, ngana, “Ginu ditak la mu ring taung miligtas?” Kening kutang ayni, e na pekibat Jesus ing ditak o dakal lang miligtas nune ing pekibat na “Pagpilitan yung milub king makiput a pasbul. Sasabyan ku kekayu, dakal la ring bisang lungub at e la milub” (23-24). Adwa lang puntu deng buri ng ipasyag ning mayap a balita kekatamu ngeni. Ing mumuna yapin ing alang patna o sawa ng pamanaus kekatamu at ing kadwa yapin ing makiput a pasbul. E ya sasawang mamaus kekatamu uling buri ng buri ing akayabe nakatamungan king bie ning kaganapan. At ing bie ning kaganapan akamtan taya mu king pamisanmetung tamu king Ginu tang Jesus. King pamisanmetung ta Kaya, pakikwanan tamung tukyan la reng kayang panabilin. Panabilin na parati kekatamung mikakalugud tamu. Oneng nanu ing gagawan tamu, deng luluguran tamu mu detang lulugud mu naman kekatamu, e tala agyung luguran deng taung dinapat marok kekatamu. Kening panugaling ayni, ing buri ng sabyan, agyu tamu mung lungub king malwalas a dalan at e tapa agyung lungub king maskup a dalan. Likas kasi kekatamung tau ing buri tamu ing malwalas ing daralanan, e tamu buri ing magkasakit, lalu na pamo ngeni na asna kausu ing “instant”, instant noodles, instant coffee, instant sikat, instant lugud nya mamungang instant baby at nung apapansinan tamu ing anggang bage instant e lulwat, uling alang pamagsakrapisyu. Nya anyaran na ngeni kekatamung Jesus ing pakikwanan tamung magkapilit lungub king maskup a pasbul. Bista man maskup ya ing pasbul, andat lungub tana man, parati na katamung lalawen nung nanu ing milyari kekatamu. Nung mepile taman o penasakit da king pamangawa tang mayap makasiguradu tamung dinan na katamung kapangisnawan ning Ginu tang Jesus. Amen.

IV. Pamigunam

Kaluguran a kapatad, pakikwanan tamu king katahimikan, ing suryan tala reng sarili tamu. Nukarin tamu mabibie? Mas buri ta ba ing bie na lulub king malwalas a pasbul o king maskup? Tutu na nini maralas ing mas buri ta ing lulub king malwalas a pasbul, uling e tana buri ing kasakitan at e tana apibata ing pamagsakrapisyu tamu. Potang mimina tana king pamagkapilit lungub king maskup a pasbul ganakan taya ing bie ning Ginu tang Jesu Kristo. Nung buryanan namu ning Ginu tang Jesus ing mayan a bie, na alang pamagsakripisyu, pwedi ng gawan. Oneng nung e na gewa ing pamagsakripisyu, nanu kaya ing kule ning bie tamu king kasalukuyan. Atin ya kayang kabaldugan ing bie tamu keti king yatu? Uling king kamatutwanan ing gewa ng pamagsakripisyu ning Ginu, ya ing mamie kekatamung lakas ban tamung mikakalugud ampo pang mipapagserbisyu. Nung ala tamu mung Jesus a pakyapusan, nanu ne kaya ing yatung ite? Amen.

V. Pamanahimik

VI. Tauling Panalangin

Dios ming maganaka at mapagsakripisyu, dakal pung dakal a salamat king pamanantabe yu pu parati kekami. Buri mi pung lungub king maskup a pasbul adya pa pung masakit uling balu mi kayabe daka parati. Balu mi pung e mu kami paburen, uling ketang kilub ning kulungan a maskup a pasbul karin miya akit ing kaganapan ning bie. Amen.

VII. Kutang
1. Araranasan tamu ba talaga na ing pasbul papunta king Ginu, maskup ya? Ikwentu.
2. Para keka nanu ing buri ng sabyan Jesus kanini, “Ring makatauli ngeni miuna la at ding makauna ngeni mitawli la.”

Download here:
Page 1: http://www.mediafire.com/file/kk2ktmy1ibk/08.22.10 pg. 1.doc
Page 2: http://www.mediafire.com/file/ijtkeiiiurw/08.22.10 pg. 2.doc

Kadwang pulung Domingu ning Ordinaryung Panaun

Delawan neng Maria i Elizabeth

I. Pamuklat a Panalangin Ibpang mayupang tutu, salamat pu kening kaorasan. Ala kami pu keni nung e mu kaburyan. Pebustan yu pung mitipun kami rening kekaming kapatad ban misan pa pisabyan ya ing buri mung ipayabut kekami. Manyaman pu king pusu mi ing migunam ban lalu ming aintidyan ing makananu ing tatangu at mamye pamagserbisyu Keka at kareng aliwang tau. Salamat murin pu king Indung Maria king pepakit nang masanting a alimbawa. Iti pu pasalamatan mi mu naman king lagyu ning kekang Anak I Jesus at king pamanantabe ning Banal a Espiritu. Amen.

II. Pamamasa

Lucas 1:39-56

E melambat ginayak ne i Maria at mamalagua yang minta king metung a balen king kabundukan ning Judea. Minta ya keng bale nang Zacarias at dininan neng mayap a oras i Elizabeth. Inyang dimdam neng Elizabeth ing pamagmananu nang Maria, ginalo ya ing anak king atian na. At i Elizabeth, kitmuan king Banal a Espiritu, migsalita yang masikan.Ngana, “ Mapalad ka karing sablang babai! At mapalad ya ing anak a mibait keka! Makananu kung pengaintuliran ing dalawan naku ning ima na ning kanakung Ginu? Uling kabud dimdam ku ing kekang pamagmananu ginalo ya ing anak king atian ku king tula. Mapalad ka uling paniwalan mu king ing balita na keka ning Ginu mipaltutu!” Nganang Maria, “Ing pusu ku pupurian ne ing Ginu; magsaya ya ing kaladua ku uli ning Dios a kakung tagapagligtas, uling e na ku kelinguan, akung maluka nang talasuyu! Manibat ngeni ausan da kung mapalad ding sablang tau, uli ning mangaragul a bage a dapat na kaku ning Mayupayang Dios. Banal ing lagyu na; lulunusan na la ding ating takut keya, karing sablang mituki-tuking lahi. Inatiat ne ing mayupaya nang takde, at simbulat na la ding mangatas a lub ketang kapalaluan ning karelang nasa. Bigsak nala ding ari ibat karing karelang tronu, at ding atiu keng kababan ilang tinas na. Pepakabsian na la ding danupan karing mayap a bage, at pepalakuan na lang alang darala ding mabandi. Tiparan na ing pengaku na karing makatua tamu at dinatang yaba neng saupan ing Israel a talasuyu na; pepakitanan neng lunus i Abraham at ding sablang lahi na ning kapilan pa man!” At inabayan neng Maria i Elizabeth kilub ding atlung bulan. Kaybat na nita, minuli ne.

III. Turu

Pagmasusyan taya ngeni ing maragul a grasyang tinggap ning Indung Maria, at iti yapin ing pangadala na banwa kaladua at katawan o ausan tamung “Assumption”. Asne ka imporatante keka tamu iting ukasyun, uling iti ya ing kapanayan ning metung at metung keka tamu, ing muli king keka tamung Tatang king banwa. At iti tatamasan nana ning keka tamung Indung Maria. Ing kutang, makananu mengapalyari at mepalyari iti king Indung Maria? Adwa lang puntu o sangkap na ikit tamung meging sangkan ning kayang pamanagumpe at iti akit tala king Libru ning Bie (Bibliya). Ing mumuna yapin ing pangapili nang Indung Maria ning Ibpa na iyang maging Indu ning tagapagligtas. Pinili ne ning Ibpa, oneng king kayang pangapili, e na leko ning Ibpa ing kayang kalayan ning pamamamili o pamagdisisyun, “Talasuyu na ku ning Ginu, marapat sa kanaku antimo ing sinabi mu” Lk. 1:38 nganang mekibat ning Indung Maria king kayang misyun keti king yatu. Tinangu ya ing Indung Maria king kayausan ning Ibpa, bista man dakal ya kutang “Makananung mapalyari iti kabang ala na ku man asawa? Lk. 1:34. King kekatamung kapanaunan e ya naman tutuknang mamaus at mamali ing Ibpa king maragul at marakal a misyun keti king yatu. Kalupa na naman ning Indung Maria, dakal tamu mu naman kapikakunwan, dakal la reng bage-bage na angga ngeni ala pang kasagutan. Oneng nung buri tang tamasan ing regalu ning Ibpa-ing ligaya banwa, kalupa na naman ning Indung Maria dapat ing makasadya tamu mu naman makibat “OPU, GINU” king misyun ta king yatung iti. Ing kadwang sangkap na akakit tamung paralan para tamasan ing ligaya banwa, yapin ing mebasang ebanghelyu -“Delawan neng Maria I Elizabeth” Ing kutang nanu kayang klasing pamagdalo ing gewa ng Maria king pisan ng Elizabeth? Balu ta naman ing marakal a sangkan ing pwedi king pamagdalo king metung a tau. Positibung alimbawa kaniti, yapin ing pamakirame king daguk ning kasakitan a dadanasan ning metung a tau, at pwedi mu namang negatibu, alimbawa kaniti ing pamagdalo king metung a tau, uling buri meng dinan problema. Ing Indung Maria, positibung-positibu ya king pamagdalo na king kayang pisan. Miglakbe ya pang asna kalaut ban nya mung adalo at akit ing kayang pisan. Atyu pa naman keng maselan a sitwasyun-kakagli ya. Marakal a panganib ing denasan na king kayang pamaglakbe papunta Judea. King maligwa at makuyad a amanu, marakal at maragul ing sakripisyung dinaun na ban nya mung akit at adalo ing kayang pisan. Bakit kaya pigkapilitan na ning Indung Maria ing akit ne ing kayang pisan? Adwa lang akakit tamung matibe sangkan: Ing mumuna, buri neng sopan Maria ing kayang pisan king kayang masakit a daranasan-maidad neng mebuktut, anya kailangan na ing saup pisikal. Kadwa, ing saup moral at ispiritwal, nanung nukarin, peyabut nang Mariang personal king kayang pisan ing e dapat migaganaka o mitatakutan king kayang sitwasyun, uling mayap at malugud ya ing Dios. Peyabut na naman king kayang pisan ing gewa ng kayapan at bendisyun kaya-king panga Indu ning Talapagligtas ning meto yatu-I Jesus. Amen.

IV. Pamigunam

Kaluguran a kapatad, pabustan tamung sopan na katamu ning Banal a Espiritu ban masalese at mataimtim tamung migunam king buri nang ipasyag ning Ibpa keka tamu. Buri na ning Ibpa na itamung kayang lelangan ing akayabe na katamu king alang anggang tula at saya king banwa. Oneng ating kailangan ban iti akamtan tamu. Pepakit nalang masala ning Indung Maria kapamilatan mismu ning bie na. Makasadyang tangu king kayausan ning Dios- mayan at saguli mu ing tatangu king kayausan king misyun, ada pin sasabi “tangu ng basti ban agad mikawani”. Ing masakit ing kadwang gewa ning Indung Maria- ing pamagserbisyung mitmung lakas, lugud at lingap. Masuksuk potang magserbisyu tang mitmung lakas, lugud at lingap king Apung Ginu at kareng kalupa tang tau. Neng kayi maybug munang e isundu at asabi na pa ning labi mu “Ot makanyan, gagawa nakang mayap ot atin pang e masaya” Oneng potang migunam tamu, at mekaisip miamas-amas aganaka tamu na e tala ngan a patulan deng e gana-ganang tau. At mas masanting ing pamatulan tamu ing Dios a babie bie kesa kareng taung alang kakuntentuan. Parati tamung ilage king pusu’t kaisipan na ing sablang gagawan tamu para king Apung Ginu. Uling nung ala yu murin ing kayang proteksyun e tana man agawa ing pamanyuyu. Maralas ing magugulu ta kaisipan na balamu mas manyambut ya pa ing dewakan kesa king kayapan. Oneng paganaka ning Dios keka tamu ngeni, na kailangan talaga ing pamagsakripisyu ban kamtan ing tune kule ning bie. “ E baling mapagal ya ing keka tamung kaisipan at katawan aliwa mu sana ing keka tamung kaladua. Uling nung ing katawan at kaisipan mu ing mapagal , siguradu mung makatudtud tapang manyaman, pero nung ing kaladua ing alang kapayapan, siguradu mung midame na ngan ing kegana-ganang bage a atyu keka tamu. Amen.

V. Pamanahimik

VI. Tauling Panalangin

King kapamilatan ning Krus at pamanyubling mie ning kekang Anak I Jesus. Babie mi pu ing kapuryan at kapasalamatan ngeni at mangga man king alang angga. Amen.

VII. Kutang

1. Nanu lareng tenguanan mu king Apung Ginu na angga man ngeni e mo pa gagawan?
2. Nanu no man reng tenguanan mung misyun king yatung iti, na agampanan muna la o gagawan mo pa king kasalukuyan?
3. Magkwentu king karanasan king tutung pamanyuyu, nanu ing panamdam?

Download here:

Page 1: http://www.mediafire.com/file/4wgmmmytf2q/08.15.10 pg. 1.doc
Page 2: http://www.mediafire.com/file/gzeqnnlzal2/08.15.10 pg. 2.doc

Kalabingsiyam a Domingo ning Ordinaryung Panaun

Ing Tapat at ing E Tapat a Ipus

I. Pamuklat a Panalangin

Ibpa, ing kapuryan, kapanyamban at kapasalamatan yang daraun mi keka. King pamanyulung napu ning kegana-ganang bage keti king yatu na yang maging sangkan ning maralas akakalingwan mi ing kadwa ng panyatang ning Ginu ming Jesu Kristo. Na king kadwa ng panyatang karin masukad nung makananu ing meging kapagsadyan mi king kayang panyatang. Pauli na ning maragul a kapasalamatan king Banal a Eukaristiya na atyu ing amanu ban yang maging paganaka kareng kekaming keynan. Amen.

II. Pamamasa

Lucas 12: 32-48

32“E kayu tatakut, malating kawan, uling ikakatula na ning Ibpa yu ing ibie ne kekayu ing Kayarian. 33Ipisali yu ing pibandian yu at ipamie yu ing abli karing pakakalulu. Gawa kayung bulsa a e maluluma at tumipun kayung pibandian karin banua uling karin e la mabawas; alang miraras a mapanako at alang pililiang makasira. 34Uling nung nu karin ing kekayung pibandian karin ya ing pusu yu. 35Parati kayu sanang makasadia king nanumang malyari, makapiblas at makasindi sulu. 36Makiapus kayu karing ipus a manaya king pamagbalik na ning karelang panginuan iba’t king kasalan ban king paniatang na potang tuktuk ya king pasbul agad-agad deng buklatanan. 37Mapalad la ding ipus a dasnan nang makagising at manaya king karelang panginuan! Sasabian ku kekayu, magsadia yang pamangan ing panginuan, paluklukan na la king lamesa at silbian na la. 38Mapalad la nung dasnan na lang magbante agyang datang ya king kapitangan ning bengi o king ganingaldo! 39Tandanan yu iti! Nung balu na mu ning buntuk na ning pamilya nung nanu yang oras datang ing mapanako, magsadia ya at e na paintulut milub ya king pibalebale na. 40Ikayu man sukat kayung magsadia uling datang ya ing Anak ning Tau king oras a e ye asahan.” 41Kitang nang Pedro, “Ginu, sasabian ye iting talimhaga para kekami o para karing sabla?” 42Pekibat ning Ginu, “Ninu wari ing ipus a tapat at matalino? Aliwa wari itang panibalan na ning panginuan na king pibalebale na ban munie pamangan karing aliwa pang ipus king oras ning pamangailangan da? 43Mapalad ya itang ipus a ita, nung dasnan neng magobra ning panginuan na king pamagbalik na! 44Wa, sasabian ku kekayu, panibalan ne ning panginuan na king sabla nang pibandian. 45Nung ing ipus a ita sabian na king sarili na, ‘E ya agad datang ing kanakung panginuan’, at pagumpisan na na lang panasakitan ding aliwang ipus a lalaki at babai at mangan ya at minum at maglasing. 46Datang ya ing panginuan na nitang ipus a ita king aldo a e a panayan at king oras a e na balu. At parusan neng mabayat ning panginuan na at iyabe ne karing e tapat a ipus. 47“Ing ipus a makibalu king kaburian na ning panginuan na, oneng e ne man migsadia ni tinupad man, miparusan yang mabayat. 48“Oneng ing ipus a e makibalu king kaburian na ning panginuan na at darapat karing bage sukat nang ikaparusa, miparusan ya man, mayan mu. Ing ninumang mirinan dakal, dakal ing manyawad keya; at ing ninumang mipagkatiwalan dakal, dakal ing pakibatan na.

III. Turu

Nyang ing Banal a Espiritu tinggap dane reng minunang apostoles, mibuklat la kaisipan at midinan lang lakas lub ban ipanaral de kareng sablang tau ing pamag-ari ning Apung Ginu. Atlu lang matimid dang sasalpantayanan at panaral do reni kareng tau; ing pangamate, pamanyubli ng mebie at ing pamagbalik ning Ginu tang Jesu Kristo king kawakasan ning panaun. Paniwalan dangan ing bageng ayti uling ikit dangan ing makapagmulalang bage mengapalyari king Ginu tang Jesu Kristo. Ikit dang personal ing kasakitan, pangamate at ing pamanyubli ng mebie ning Ginu tang Jesus. At parati da namang agaganaka ing sinabi na karelang Jesus ngana, “Mamako ku ban isadia ra kong lugal, at kaibat kung mekalako at mekapagsadyang lugal para kekayu, magbalik ku ba ra kong ituking kayabe ku: kanita nu karin ku man, karin kayu naman” (Jn 14:1-6). Paniwalan dareng minunang Kristiyanu ing sinabi ng Jesus at angga man ngeni yamu naman ing matibe tang sasalpantayanan. Nya naman potang sabyan ning pari king misa, ngana “ipasyag tamu ngeni ing kekatamung kasalpantayanan” kaybat makibat tamu o kaya ikanta taya pa “I Kristo mete ya, I Kristo mebie ya, I Kristo mebie ya at datang ya pa.” Parati tayang papasyag iting kasalpantayan ayni, oneng maralas e taya man didinan pansin. O, baka nya e taya didinan pansin uling paniwalan tamu mu ing pangamate at pamanyubli ng mie at e taya talaga buri pang datang Ya. Ing kutang, neng papasyag taya ing kasalpantayanan ayni, buri tane ba talagang datang ing Ginu tang Jesu Kristo? Siguradung miyayaliwa tamu pakibat king kutang ayni. Dakal keka tamu ing pakibat, “ali pa pu, uling dakal ku pa buring gawan, e la pa meyaring megaral deng anak ku, o kaya naman, e ku pa makasadyang marap Kaya.” Kareng aliwa, naman ing pakibat, “sige pu datang naka Ginu ban ng mayari ing daralanan kung kasakitan.” Gagawan tayang pamanakas king kasakitan ing panyatang ning Ginu at potang atyu ta naman king manyaman a kabilyan e tane man buring datang. Buri ng ipasyag ning ebanghelyu na dapat parati tang makasadya king panyatang ning kekatamung panginwan (I Jesus), na parati tang makapiblas, na ing buri ng sabyan ing parati tang mibie-bie king dangalan antimong kawangis ning Apung Ginu. Dapat parati tang makasindi sulu, uling ing sulu simbulu ne ning kapayapan at kayapan. Buri ng makasadya tamu dyang nanung oras ya datang, buri ng maging tapat at matalino tang ipus. At ing kapagsadyan kaniti yapin ing nung nanu ing penabilin ning panginwan yang dapat nang gawan ning metung a ipus. Nung nanu lareng responsibilidad na binye na kekatamu gawan talang mitmung lugud at kapasalamatan. Amen.

IV. Pamigunam

King kekatamung ebanghelyu ngeni anyaran na ing matyaga tamung pamagsadya king kadwa ng panyatang ning Ginu tang Jesu Kristo (Parousia) na yang sasabyan na murin ning Libru ng Santiago 5:7, “Inya, mibabata kayu, kapatad, mibabata kayu angga king panyatang na ning Ginu. Lawan yu nung makananu yang manenayang mitmung kapibabatan ing metung a ortelanu bayu mikabungang maulaga ing gabun na. Mapibabata yang manenaya king mumuna at tauling uran.” Lako tana king pusu’t kaisipan tamu ing takut king panyatang Na. Uling king kayang panyatang e na ngan kaylangan ing bage-bage a gugulu kareng kaisipan tamu, ing e gana-gana maging ganap na ngan, pulisan na ing lua tamu at ing anggang gewa tamung kayapan ablasan na ngan ning kayang pakalulu at ganaka. Ing kaylangan mu ing ibye ta ngan kaya ing kegana-gana pati na ing bage e ta asaan malyari. Parati tang ilage king pusu tamu na kaluguran na katamung kaluguran at parati nang patunayan ini king istorya ning tau. Parati tayang agkat king bie tamu na yang parating manabilin king e gana-gana tang gawan. Isuku ta ngan kaya ing sablang mangapalyari king bie tamu at gawan ta ngan ing kayang panabilin ban kanita nanu yaman oras datang makasadya tamung salubung kaya king mitmung tula at saya. Nung maniwala tamung datang yang pasibayu ing Ginu tang Jesus, atin tang matibe sangkan ban tang matyagang manenaya Kaya. Apibata tamu ing alipustan, panyiran at panasakitan da katamu deng aliwang tau, uling paniwalan tamung mayari mu rin ini king malapit ng panyatang ning Ginu. Atin pa kayang mas igit a pamag-asa king pasibayu ng panyatang ning Ginu ban ayusan na ngan ing sabla, ala na. Mengaku ya ing Ginu Na datang ya at yang siguradung malyari king yatung iti. At king kayang panyatang makanini mu ing asabi tamu, “Balu mi at paniwalan mi Ginu, gawan mu ing pengaku Mu.” Amen.

V. Pamanahimik

VI. Tauling Panalangin

Kaybat ning masusi tamung pamigunam, ikit tamu ing sarili nung nanu ing kabaldugan ning kapanenayan tamu king kadwa ng panyatang ning Ginu tang Jesu Kristo at nung makananu ta dapat maging matiyaga at parating makasadya king kayang panyatang. Ngeni, king mitmung matibe at malalam tang kasalpantayanan king talapangatbus ning yatu, ipasyag tayang ikanta ing kekatamung kasalpantayanan.

VII. Kutang
1. Nanu ya keka kabaldugan ing kadwa ng panyatang ning Ginu tang Jesu Kristo? 2. Nung potang bengi, datang ne ing Ginu, bisa naka? Nung wa/ali, Bakit?
3. Keng palege tamu, nanu la kaya reng maging sangkan, ot bakit e ya pa daratang king kadwa ng panyatang ning Ginu?

Download here:

Page 1: http://www.mediafire.com/file/njijiolzmzg/08.08.10 pg. 1.doc

Page 2: http://www.mediafire.com/file/zzzrnzenugz/08.08.10 pg. 2.doc

Ika-labing-walung Domingu ning Ordinaryung Panaun

Ing Talimhaga tungkul king Mabanding Mangmang

I. Pamuklat a Panalangin

O Espiritu ning Kabanal banalang Dios, tipa ka kekami at damayan mu kami ban maging banal kami at ing lugar a pinili mu. Pasiknangan mu kami ban lalu mi ya pung a isapusu ing mayap a balita ning Ginu ming Jesu Kristo. Amen

II. Pamamasa

Lucas. 12:13-21

13Ngana kang Jesus ning metung a taung kayabe da ring malda, “Maestro, yutus mu king kakung kapatad king ibie na kanaku ing parti ku king pibandian a likuan nang tatang mi.” 14Pekibat na, “Abe, ninu ing tinuldu kanaku ban maging ukum o ban pipartian ku kekayu ing kekayung mana?” 15At sinabi na karing sabla, “Mangilag kayu king sablang uri na ning kasakiman, uling ing bie ning tau ala yu king pibandian na nu pa man anti iti karakal.” 16Kanita selita neng Jesus iting talimhaga. Ngana, “Ing asikan na ning metung a taung mabandi mika masanting a pupul. 17‘Nanung daptan ku?’ nganang mengutang king sarili na. ‘Ala na kung pilulanan king kanakung pupul. 18A, oyni ing daptan ku,’ ngana, ‘lasakan ku la ding kanakung kamalig at mitalakad kung lalung mangaragul. Karin ku ilulan ing kanakung pupul at ing sablang aliwa kung pibandian. 19At kaybat sabian ku king kanakung sarili, Kasuerti mo! Atsu na ngan keka ing sablang kailangan mu king makabang panaun. Inya magpaynawa na ka mu; mangan, minum at magsaya!’ 20Oneng ngana ning Dios keya, ‘Mangmang! Ngening bengi mate ka; kaninu mipunta ing pibandian a tinipun mu?’ 21“Makanyan.” Nganang Jesus, “ing karanasan da ring taung tinipun pibandian para mu king sarili da, oneng e la mabandi arapan na ning Dios.”

III. Turu

Asne karagul a ulaga kekatamung tau ing pibandian. Alang taung sabyan na ing alang ulaga ing pibandian. Uling ing pibandian ya ing babie suporta ban tamung mie king materyal a yatung iti. Kaylangan taya ing pibandian pablasang itamung tau e tamu kabud kaladua o espiritu nune atin tang sangkap a materyal, na yapin ing kekatamung katawan. Ing sakit mu kekatamung tau, maralas ing mitatali o masisilu tamu king materyal a bage, akakalingwan tane ing importanting sangkap ning tau yapin ing espiritu. Kapamilatan na ning talimhaga ning mabanding mangmang king ebanghelyu, ituru na ngeni ning Ginu tang Jesus nung makananu ing dapat tang pamanisip at panugali tungkul king pibandian. Pelagwan neng mangmang ing mabandi ning Ginu tang Jesu Kristo uling ala yang parating sasabyan at isipan nune ing sarili na at ing kayang pibandian. Isipan na parati na ing a ibye na ngan ning pibandian ing kayang pamangailangan. Bala na neng dakal ne pibandian, ala ng maging kulang, ala neng gawan at magpakasaya nya mu. Ing e na balu ing kegana-ganang pibandian, lakwan na ngan king pangamate na at mawala ngan iting kabaldugan. Ing marok pa, neng makanini ne panlalawe ing tau, a iisip na mas mayap, mas magaling at mas biyasa ya kesa kareng aliwang tau. Ala yang sasabyan ing Ginu tang Jesus na marok ing pibandian. Ing buri napin ing mie tamung payapa at sagana. Kalupa dareng Israelita na pengakwanan na ning Dios a gabun a ating dakal a gatas ampong pulut pukyutan. Tiparan na ining pangakung ayni kareng Israelita, oneng mipaparusan la potang akakalingwan dane nung ninu ing mimie karela king gabun a dakal a ating dakal a gatas ampong pulut pukyutan (Ing Dios), at akakalingwan dala naman deng kalupa dang tau lalu na reng pakakalulu. Potang ing bie na ning metung a mabandi gagawan na nang peka importanti ing kayang pibandian, maging siguradu yang saradu pusu ampong gamat. Maging makasarili at maging sakim ya pa. At potang makanini ne ugali, milalako na naman ing kapagnasan ng sumaup at idake ing bie na kareng kalupa ng tau. Kanita mababawas ing pangawangis na king Apung Ginu at yang maging sangkan ning pamibie-bie ng malungkut. E na kaburyan ning Ginu tang Jesus na ing bie tamu maging malungkut, nya buri neng ipayabut kekatamu ing ustu tang panugali tungkul king pibandian. Ing pibandian e ya marok king tau, nung gamitan taya iti king pamagserbisyu kareng aliwang tau. E ya marok ing pibandian, nung ilage ta parati king kaisipan tamu na ing anggang bage, pati na ing bie tamu binye na kekatamu ning Ginu ban itamu maging daluyan na katamu ning kayang pakalulu at grasya. Amen.

IV. Pamigunam

Ating metung a kanta ngana: “Dust in the wind, all they are dust in the wind…nothing lasts forever but the earth and sky, all we do crumbles to the ground though we refuse to see…all your money won’t another minute by…” Ining kantang ayni, e yamu tungkul nung makananu ing ustu tang panugali tungkul king materyal a bage nune tungkul ya naman nung makananu ta ustu pamanisip tungkul king yatung iti. Kaylangan ing ibuklat tala reng mata at pusu tamu ban akit at mabyasa tang tanggapan na ing anggang materyal a pakikwanan ta ngan tipunan, mawala ngan iti, adya pang pakatigit ta talan at pakasalikut kaniti. King libro ning Ecclesiastes nganang simpleng sasabe, “Alang kabaldugan, ngana ning Talapanaral. Nanu mo ing pakinabang na ning taung alang patugut magobra?” (Eccl 1:2). Ini metung yang paganaka kekatamu bat kareng minunang tau, na ining bageng ayni malilyari mu rin king panaun tamu. Maging makabaldugan mu ing pipapagalan tamu, nung iti iyampang ta ngan king Ginu para king pamangawang mayap at kanita tamu mu asabi na ating kabaldugan ing binye ng grasya ning Ginu tamu. I Apostol Pablo paganaka na kekatamu na “Isipan yu la parati ding bage a atyu karin banua, aliwa ding bage a atyu keti king yatu” (Col 3:2). Makalawe yang maratna ing Ginu tang Jesu Kristo ngeni at sasabyan ng malakas at malino kekatamu na: Iwasan tamu ing sablang kasakiman. Maging tutu tamung anak ning Dios e king bage materyal a alikum tamu nune nung makananu la makalawe reng mata tamu king Anak ng I Jesus. Paka gwardya tamu ing sarili tamu king sablang uri ning kasakiman, pota bala tamu mabandi tamu ing tutu na pala ala tamang pibandian at kalulu ta pala. Amen.

V. Pamanahimik

VI. Tauling Panalangin

O, Dios mi pung Banal, dakal pung kapuryan at kapasalamatan king binye yung panaun. Midinan ke pung kamasalan nung makanu ing ustu ming panugali tungkul king pibandian. Paganaka yu pu parati kekami na ing sablang bage makapadurut kekami maging makabaldugan mu ini nung kekami ngan iti iyampang. Amen.

VII. Kutang
1. Aranasan muna king bie mu na tinagun ka king metung a ukasyun at e daka sikaso uling ordinaryu mu ing susulud mo at ala kamang katungkulan? Ikwentu.
2. Nanu ing kapanwalan mu tungkul king pibandian at king kamatayan?
3. Nanu mo ing gawan mu nung tinud kang maragul a premyu king lotto?

Download here:

Page 1: http://www.mediafire.com/file/1w032jmzwjn/08.01.10 pg. 1.doc

Page 2: http://www.mediafire.com/file/gmzg2q4jwjg/08.01.10 pg. 2.doc